Neʼe Ina Pauʼi Tatou Mai Te Fakapoʼuli
‘Neʼe pauʼi koutou [e Sehova] mai te fakapoʼuli ki tona malama matalelei.’ —1 PETELO 2:9.
KATIKO: 116, 102
1. Kotea neʼe hoko lolotoga te maumauʼi ʼo Selusalemi?
ʼI TE taʼu 607 ʼi muʼa ʼo te temi ʼo Kilisito, neʼe ʼohofi te kolo ko Selusalemi e te Hau Papilone ko Nepukatenesale 2 pea mo tana kautau. ʼE ui ʼi te Tohi-Tapu neʼe matehi e te hau ʼaki te heleta te kau tupulaga. Neʼe mole manavaʼofa pe la ki te tupulaga, peʼe ko te taupoʼou peʼe ko te maʼimoa. Pea ʼosi ia, neʼe ina ‘tutu leva te fale ʼo te ʼAtua, mo maumauʼi te ʼu kaupa ʼo Selusalemi, mo tuku ia meʼa fuli ki te afi ʼo ʼona fale hau pea mo maumauʼi te ʼu meʼa maʼuhiga fuli.’—2 Koloniko 36:17, 19.
2. Kotea te fakatokaga ʼae neʼe fai e Sehova, pea kotea ʼae neʼe hoko ki te kau Sutea?
2 Neʼe mole tonu ke punamaʼuli te kau Sutea ki te maumauʼi ʼo Selusalemi. Koteʼuhi ʼi ni taʼu ki muʼa atu, neʼe fekauʼi e te ʼAtua ʼana polofeta ke olo ʼo fakatokaga ki te hahaʼi, ʼe ʼohofi anai natou e te kau Papilone mo kapau ʼe natou haga talagataʼa aipe kia te ia. Neʼe kaugā malie te kau Sutea ʼae neʼe matehi ʼaki te heleta, pea ko natou ʼae neʼe hao neʼe ʼave ki Papilone ke natou maʼuʼuli ʼaunofo ai. (Selemia 15:2) Kaʼe neʼe feafeaʼi te maʼuli ʼaunofo? Neʼe kua hoko koa ki te kau Kilisitiano he aluʼaga ohage ko te maʼuli haʼisia ʼi Papilone? Kapau ko ia, pea neʼe hoko ʼanafea?
TE MAʼULI ʼAUNOFO ʼA TE KAU SUTEA
3. Kotea te kehekehe ʼo te maʼuli ʼaunofo ʼae ʼi Papilone mo te maʼuli popula ʼae ʼi Esipito?
3 Neʼe ui e Sehova ki te kau Sutea, ʼi te temi ʼae ka ʼave ai natou ke maʼuʼuli ʼaunofo ʼi Papilone, ʼe tonu anai ke natou tali te aluʼaga foʼou ʼaia pea mo natou faigaʼi ke lelei tonatou maʼuli. ʼAki ia Selemia neʼe ina ui fenei ai kia natou: “Kotou laga ni fale pea kotou nonofo ai. Kotou to ni ʼoloto pea kotou kai ʼona fua. Kotou kumi te tokalelei ʼo te kolo ʼae neʼe au tuku ke kotou maʼuli ʼaunofo ai, pea ke kotou hufakiʼi [te kolo] kia Sehova, he ʼe ʼi tona tokalelei ʼe kotou toe tokalelei ai.” (Selemia 29:5, 7, MN) Ko te kau Sutea ʼae neʼe mulimuli ki te ʼu fakatotonu ʼa Sehova, ko tonatou maʼuli ʼaunofo neʼe lelei pe. Koteʼuhi neʼe fakagafua e te kau Papilone ke natou fakatokatoka totonu pe he ʼu aluʼaga ʼe hoko anai ia natou pea mo feʼoloʼaki faʼifaʼitaliha ʼi te fenua. ʼI te temi ʼaia, neʼe haʼele lelei ʼi Papilone ia te ʼu matani gaue. Pea ʼe ha ʼi te ʼu tohi ʼafeā, ko te tokolahi ʼi te kau Sutea neʼe natou ako te fai fakatau koloa pea neʼe liliu ai ʼihi ko he ʼu tufuga faiva. Neʼe maʼu koloa ai ʼihi Sutea. Ko tonatou maʼuli ʼaunofo, neʼe mole faigataʼa ia ohage ko te maʼuli popula ʼa te kau Iselaele ʼi Esipito lolotoga ni taʼu ʼe lauʼi teau ki muʼa atu.—Lau ia Ekesote 2:23-25.
4. Ko ai ʼae neʼe maʼuli mamahi mo te kau Sutea heʼe agatonu? Pea he koʼe neʼe mole feala hanatou mulimuli katoa ki te Lao?
4 Ko ʼihi ʼo te kau Sutea ʼae neʼe maʼuʼuli ʼaunofo, neʼe ko te ʼu kaugana agatonu ʼa te ʼAtua. Logo la neʼe mole natou fai he meʼa ʼe kovi, kaʼe neʼe natou maʼuli mamahi fakatahi mo te kau Sutea heʼe agatonu. Neʼe feʼauga pe te ʼu meʼa ʼae neʼe ʼaoga ki tonatou maʼuli fakasino. Kaʼe neʼe feafeaʼi leva tanatou tauhi ʼae kia Sehova? ʼI te kua maumauʼi ʼo te fale lotu mo te ʼaletale, neʼe mole kei feala ki te kau pelepitelo ke fai ʼanatou gaue mahani. Kaʼe neʼe faiga malohi te kau Sutea agatonu ke natou taupau te Lao ʼa te ʼAtua. Ohage la, ko Taniela, mo Satalake, mo Mesake pea mo Apeteneko neʼe natou fakafisi ki te ʼu meʼa kai ʼae neʼe mole fakagafua ʼi te Lao ki te kau Sutea. ʼE fakaha mai ʼi te Tohi-Tapu, ko Taniela neʼe faikole tuʼumaʼu pe ki te ʼAtua. (Taniela 1:8; 6:10) Kaʼe neʼe mole feala ki te kau Sutea agatonu hanatou mulimuli katoa ki te Lao, koteʼuhi neʼe puleʼi natou e te puleʼaga pagani.
ʼE fakahoko tuʼumaʼu pe e te ʼAtua ʼana fakapapau
5. Kotea te fakapapau ʼae neʼe fai e Sehova ki tana hahaʼi? Pea he koʼe neʼe ko he fakapapau fakaofoofo ʼaia?
5 Neʼe toe feala koa ki te kau Iselaele hanatou tauhi katoa ki te ʼAtua? ʼI te temi ʼaia, neʼe faigataʼa, koteʼuhi neʼe ko te agamahani ʼa te kau Papilone ko tanatou mole fakaʼateainaʼi te hahaʼi ʼae ʼe ʼaunofo ʼi tonatou fenua. Kaʼe neʼe fakapapau e Sehova ʼAtua ki tana hahaʼi, ʼe ina fakaʼateainaʼi anai natou pea neʼe hoko moʼoni pe la te aluʼaga ʼaia. ʼE ha mai ai, ʼe fakahoko tuʼumaʼu pe e te ʼAtua ʼana fakapapau.—Esaia 55:11.
ʼE KEI MAʼULI HAʼISIA KOA TE KAU KILISITIANO KI PAPILONE LAHI?
6, 7. He koʼe ʼe maʼuhiga ke fetogi tatatou faʼahiga mahino?
6 Neʼe kua hoko koa ki te kau Kilisitiano he aluʼaga ʼe tatau mo te maʼuli haʼisia ʼae ʼi Papilone? Lolotoga ni taʼu, neʼe fakaha ʼi Te Tule Leʼo, ko te kau Kilisitiano agatonu neʼe natou
nonofo haʼisia ki Papilone Lahi ʼi te taʼu 1918 pea neʼe hoki natou ʼateaina mai Papilone Lahi ʼi te taʼu 1919. ʼI te alatike leva ʼaeni pea mo te alatike ʼae ka hoa mai, ʼe tou vakaʼi ai anai pe koʼe ʼe maʼuhiga ke fetogi tatatou faʼahiga mahino ki te aluʼaga ʼaia.ʼI te ʼu temi fualoa ki muʼa atu ʼo te ʼUluaki Tau Fakamalamanei, neʼe kua ʼosi mavae te ʼu kaugana fakanofo ʼa te ʼAtua mai te lotu hala
7 Tou fakakaukauʼi age muʼa te aluʼaga ʼaeni: Ko Papilone Lahi, ʼe ko te kautahi fakamalamanei ʼo te ʼu lotu hala. Pea neʼe mole popula te hahaʼi ʼa te ʼAtua ki te lotu hala ʼi te taʼu 1918. ʼE moʼoni neʼe fakatagaʼi te kau Kilisitiano fakanofo ʼi te temi ʼaia e te lotu, kaʼe neʼe fakatagaʼi tafitō natou e te ʼu puleʼaga. ʼI te ʼu temi fualoa ki muʼa atu ʼi te ʼUluaki Tau Fakamalamanei, neʼe kua ʼosi mavae te ʼu kaugana fakanofo ʼa te ʼAtua mai te lotu hala. Koia ʼae ʼe mole feala ai ke tou ui neʼe kamata haʼisia te hahaʼi ʼa Sehova ki Papilone Lahi ʼi te taʼu 1918.
KO TE TEMI FEA ʼAE NEʼE NONOFO HAʼISIA AI TE HAHAʼI ʼA TE ʼATUA KI PAPILONE LAHI?
8. Hili te mate ʼo te kau apositolo, kotea ʼae neʼe hoko? (Vakaʼi te ʼuluaki pāki.)
8 ʼI te Penikosite ʼo te taʼu 33 hili te temi ʼo Sesu, neʼe fakanofo te toko lauʼi afe Kilisitiano ʼaki te laumalie maʼoniʼoni. Neʼe natou liliu ai “ko he lanu filifiliia, ko he kau hau faisakilifisio [peʼe ko he kau pelepitelo fakahau], ko he puleaga maonioni, ko he hahai kua totogi.” (Lau ia 1 Petelo 2:9, 10.) Pea ko te kau apositolo neʼe natou tokakaga lelei ki te ʼu kokelekasio ʼi tonatou temi maʼuli. Kaʼe ʼi te hili ʼo tanatou mamate, ko ʼihi tagata ʼi te kokelekasio neʼe natou akoʼi ni manatu hala pea mo natou fia fakamamaʼo te ʼu tisipulo mai te moʼoni. Neʼe manako te ʼu tagata ʼaia ki te ʼu manatu fakafilosofia ʼa Platon mo Aristote, ʼo natou kamata akoʼi ai ʼanatou manatu totonu kaʼe tuku te ʼu moʼoni Fakatohi-tapu. (Gaue 20:30; 2 Tesalonika 2:6-8) Ko te tokolahi ia natou neʼe iloa pea neʼe tagata taupau ʼi te ʼu kokelekasio. Koia, tatau aipe pe neʼe ui e Sesu ki ʼana tisipulo “ko koutou ʼe kotou tau tehina fuli,” kaʼe neʼe kamata fakatuʼutuʼu e natou ni kalasi ko he kau takitaki lotu.—Mateo 23:8, MN.
Neʼe hage te kau Kilisitiano fakanofo agatonu ko te fulumeto ʼae neʼe talanoa ki ai ia Sesu, pea neʼe natou faiga malohi ʼi tanatou tauhi ʼae ki te ʼAtua
9. Kotou fakamatala pe neʼe kamata gaue feafeaʼi te Lotu Fakakilisitiano aposeta mo te puleʼaga Loma. Pea kotea ʼona fua?
9 Koia, ʼi te taʼu 313 hili te temi ʼo Kilisito, neʼe fakamoʼoni leva te Hau ko Constantin ki te magaʼi lotu Fakakilisitiano aposeta ʼaia ʼi tana nofo hau ʼi te Puleʼaga pagani ʼae ko Loma. Neʼe kamata gaue fakatahi ai leva ia te Ekelesia mo te puleʼaga Loma. Ohage la, neʼe fai e te Hau ko Constantin ia te fono mo te kau takitaki lotu pea neʼe higoa te fono ʼaia ko te Fono ʼo Nicée. ʼI te ʼosi ʼo te fono ʼaia, neʼe fakamavae e te hau ia te patele ko Arius ʼi Loma, he neʼe mole tui ki tanatou ui ʼae ko Sesu ʼe ʼAtua. Ki muli mai, neʼe liliu ia Théodose ko te Hau ʼo Loma, pea neʼe toe liliu ai mo te Lotu Katolika ko te lotu tafitō ʼaia ʼo te Puleʼaga Loma. ʼE ui e te kau faihisitolia, neʼe ui leva e te puleʼaga pagani ko Loma ko Mateo 13:24, 25, 37-39.) Neʼe kua natou haʼisia moʼoni ki Papilone Lahi.
natou ko he ʼu “Kilisitiano” lolotoga te ʼafio ʼa te Hau ko Théodose. ʼI tona fakahagatonu, neʼe tali e te kau Kilisitiano aposeta te ʼu akonaki pagani, he neʼe kua natou kau ki Papilone Lahi. Kaʼe neʼe kei ʼi ai pe ʼihi Kilisitiano fakanofo agatonu. Neʼe natou hage ko te fulumeto ʼae neʼe talanoa ki ai ia Sesu. Ko te kau agatonu ʼaia, neʼe natou faiga malohi ʼi tanatou tauhi ʼae ki te ʼAtua, kaʼe ko te tokosiʼi pe neʼe fakalogo ki te logo ʼae neʼe natou tala. (Lau ia10. He koʼe neʼe kamata lotolotolua te hahaʼi ʼo ʼuhiga mo te ʼekelesia?
10 ʼI te temi ʼae neʼe kei lau ai e te hahaʼi ia te Tohi-Tapu ʼi te lea Fakakeleka peʼe Fakalatina, neʼe feala ai ke natou fakatatau te ʼu akonaki ʼa te Folafola ʼa te ʼAtua pea mo te ʼu akonaki ʼa te ʼekelesia. ʼI te mahino ʼae ʼa ʼihi ʼe
hala te ʼu akonaki ʼa te ʼekelesia, neʼe natou lituʼa leva ki te ʼu akonaki ʼaia. Kaʼe kapau neʼe natou fakaha tanatou manatu ki ʼihi, neʼe feala ai pe ke matehi natou.11. Neʼe tapuʼi feafeaʼi e te ʼekelesia ia te Tohi-Tapu?
11 ʼAki te temi, neʼe palalau ʼihi ʼi te lea Fakakeleka peʼe Fakalatina. Kaʼe neʼe mole pe fakagafua e te kau takitaki lotu te fakaliliu ʼo te Folafola ʼa te ʼAtua ki te ʼu lea ʼae neʼe palalauʼi e te hahaʼi. ʼO ha mai ai, neʼe ko te kau takitaki lotu pe mo ʼihi hahaʼi popoto neʼe feala ke natou lau te Tohi-Tapu, pea neʼe ʼi ai ʼihi ʼi te kau takitaki lotu neʼe mole popoto ʼi te lautohi mo faitohi lelei. Ko ʼae neʼe mole manatu tahi mo te ʼu akonaki ʼa te ʼekelesia, neʼe fakatuʼā mate. Ohage pe ko te maʼuli ʼaunofo ʼa te kau Sutea ʼi Papilone, neʼe mole feala ki te kau pelepitelo hau fakanofo, ke tauhi ki te ʼAtua ʼi hona aluʼaga ʼe fakatuʼutuʼu lelei. ʼO ha mai ai, neʼe puleʼi e Papilone Lahi ia te hahaʼi.
TONATOU FAKAʼATEAINA MAI PAPILONE
12, 13. Kotea te ʼu tupuʼaga ʼe lua neʼe tokoni ki te fakaʼateaina ʼo te kau Kilisitiano moʼoni? Kotou fakamahino.
12 Neʼe feala koa ʼi he temi ke tauhi katoa mo faʼifaʼitaliha ia te kau Kilisitiano moʼoni ki te ʼAtua? ʼEi. Neʼe ʼi ai tupuʼaga maʼuhiga ʼe lua ke natou lotofalala ai. ʼUluaki, neʼe ko te faʼu ʼo te masini ta tohi. ʼI muʼa ʼo tona faʼu ʼi te teitei taʼu 1450, ko te Tohi-Tapu neʼe hiki nima pea neʼe mole faigafua. Pea neʼe mahina hogofulu te hiki e he tagata faiva ia he Tohi-Tapu pe ʼe tahi. Neʼe toe faitohi te kau tagata hiki Tohi-Tapu ʼi te ʼu kiliʼi manu. Koia ʼae neʼe mole lahi ai te ʼu Tohi-Tapu pea neʼe totogi kovi ʼaupito. Kaʼe, ʼaki te masini ta tohi pea mo te ʼu pepa, neʼe feala ai ke ta e he tagata faiva ni pasina ʼe 1 300 tupu ʼi te ʼaho fuli.
13 Ko te lua tupuʼaga, neʼe ko te fakaliliu ʼo te Tohi-Tapu. ʼI te teitei taʼu 1500, neʼe fakaliliu te Folafola ʼa te ʼAtua e he ʼu tagata lototoʼa ki te ʼu lea ʼae neʼe palalauʼi mahani e te hahaʼi. Logo la neʼe feala ke natou mamate ai, kaʼe neʼe natou fakahoko pe tanatou gaue ʼaia. Neʼe lahi ai te iita ʼa te kau takitaki lotu. Kotea tona tupuʼaga? Neʼe natou matataku naʼa lau e te hahaʼi ʼae ʼe fakamalotoloto ia te Tohi-Tapu ʼi tanatou lea totonu. He neʼe feala ai ke natou fai te ʼu fehuʼi ʼaeni: ‘ ʼE tuʼu ʼifea te akonaki ʼo te pulekatolio ʼi te Tohi-Tapu? Kofea ʼae ʼe ui ai ʼi te Tohi-Tapu ʼe tonu ke tou totogi te ʼu patele moka natou fai he misa ki he mate? Kofea ʼae ʼe talanoa ai ʼi te Tohi-Tapu ʼo ʼuhiga mo te ʼu tuʼi tapu pea mo te ʼu kaletinale?’ ʼE lahi te ʼu akonaki hala ʼa te ʼekelesia neʼe fakatafito ki te ʼu filosofia ʼa Platon mo Aristote. Ko he ʼu tagata neʼe maʼuʼuli ʼi ni taʼu ʼe lauʼi teau ʼi muʼa ʼo te temi ʼo Kilisito. ʼI te temi ʼae neʼe faifehuʼi ai te hahaʼi ki te kau takitaki lotu, neʼe natou iita. Pea ko te hahaʼi tagata mo fafine ʼae neʼe mole natou tali ʼanatou akonaki, neʼe matehi natou. Neʼe fakagatagata e te kau takitaki lotu te lau ʼo te Tohi-Tapu e te hahaʼi pea mo ʼanatou faifehuʼi. Kaʼe ko ʼihi ʼae neʼe lototoʼa neʼe mole natou loto ke puleʼi natou e Papilone Lahi. Neʼe kua natou maʼu te ʼu moʼoni
ʼae ʼe tuʼu ʼi te Folafola ʼa te ʼAtua pea neʼe natou fia hoko atu tanatou mahino ki te Tohi-Tapu. Koia neʼe kua ovi mai pe tonatou fakaʼateaina ʼae mai te lotu hala.Neʼe fakaliliu te Folafola ʼa te ʼAtua e he ʼu tagata lototoʼa ki te ʼu lea ʼae neʼe palalauʼi mahani e te hahaʼi
14. (1) Kotea ʼae neʼe fai e te hahaʼi ʼae neʼe natou fia ako te Tohi-Tapu? (2) Kotou fakamatala ia te ʼu fekumi ʼa te Tehina ko Russell ʼo ʼuhiga mo te moʼoni.
14 Neʼe ko te tokolahi ʼae neʼe natou fia lau mo ako te Tohi-Tapu pea natou fakaha te ʼu manatu ʼae neʼe natou ako. Neʼe mole natou loto ke ui age e te kau takitaki lotu pe kotea ʼae ʼe tonu ke natou tui ki ai. Neʼe natou feholaki ai ki te ʼu fenua ʼae neʼe feala ai tanatou ako faʼifaʼitaliha te Tohi-Tapu. Ko te tahi ʼi te ʼu fenua ʼaia, neʼe ko Amelika. ʼI te taʼu 1870, ko Charles Taze Russell pea mo ʼihi neʼe natou ako ʼo loloto ia te Tohi-Tapu. ʼI te kamata, neʼe loto muʼa te Tehina ko Russell ke ina maʼu pe ʼe ko te lotu fea ʼae ʼe akoʼi ai te moʼoni. Neʼe ina fakatatau fakalelei te ʼu akonaki Fakatohi-tapu mo te ʼu akonaki ʼa te ʼu lotu ʼae ʼe natou ui ʼe natou Kilisitiano pea mo ʼae ʼo te ʼu lotu ʼe mole Kilisitiano. Pea neʼe mahino fakavilivili atu aipe te tehina neʼe mole pe la he lotu ʼe tahi ʼe mulimuli katoa ki te Folafola ʼa te ʼAtua. ʼI te tahi ʼaho, neʼe faipalalau ai mo te kau takitaki lotu ʼo te ʼu lotu kehekehe. Pea neʼe fakaʼamu te Tehina ko Russell ʼe natou tali anai mo akoʼi ki ʼonatou ʼekelesia te ʼu moʼoni ʼae neʼe ina maʼu mo tana kiʼi kutuga ʼi te Tohi-Tapu. Kaʼe neʼe fakafisi ki ai te kau takitaki lotu. Neʼe iloʼi atu aipe e te Kau Ako ʼo Te Tohi-Tapu, neʼe mole feala hanatou tauhi fakatahi ki te ʼAtua mo natou ʼae ʼe kau ki te lotu hala.—Lau ia 2 Kolinito 6:14.
15. (1) Ko ʼanafea ʼae neʼe kamata haʼisia ai te kau Kilisitiano ki Papilone Lahi? (2) Ko te ʼu fehuʼi fea ka tali anai ki ai te alatike ʼae ka hoa mai?
15 Neʼe tou ako ʼi te alatike ʼaeni, ko te kau Kilisitiano moʼoni neʼe kamata haʼisia ki Papilone Lahi hili te mate ʼo te apositolo fakamuli ʼae ko Soane. Kaʼe ʼe tonu ke tou toe iloʼi te ʼu tali ki te ʼu fehuʼi ʼaeni: ʼE tou iloʼi feafeaʼi neʼe kua fakaʼateaina moʼoni ia te kau fakanofo mai Papilone Lahi lolotoga te ʼu taʼu ʼi muʼa ʼo te taʼu 1914? ʼE moʼoni koa neʼe mole fiafia ia Sehova ki ʼana kaugana he neʼe mole kei natou faʼa gaue ʼi te faifakamafola lolotoga te ʼUluaki Tau Fakamalamanei? ʼI te temi ʼaia, neʼe ʼi ai koa ni tehina neʼe mole kei nonofo agatonu, ʼo mole natou maʼu ai te ʼofa ʼo te ʼAtua? Pea kapau neʼe kamata haʼisia te kau Kilisitiano ʼi te lotu hala ʼi te ʼosi mamate ʼa te kau apositolo, ko ʼanafea ʼae neʼe fakaʼateainaʼi ai natou? ʼE hoki tou maʼu anai te ʼu tali ki te ʼu fehuʼi maʼuhiga ʼaia ʼi te alatike ʼae ka hoa mai.