1. (1) Kotea te faʼahi ʼae neʼe tatau ai ia Sefete pea mo Ana? (Vakaʼi te ʼuluaki pāki.) (2) Kotea te ʼu fehuʼi ʼe tou tali anai ki ai ʼi te alatike ʼaeni?

KO SEFETE neʼe ko te takitaki lototoʼa pea mo faiva ʼi te tau. Ko Ana, neʼe ko te fafine agavaivai. Neʼe tokaga lelei ki tona ʼohoana pea mo tona loto fale. Ko naua toko lua ʼaia neʼe nā tauhi kia Sehova. Pea neʼe nā tahi fai tana fakapapau kia Sehova pea mo nā faigaʼi ke nā fakahoko lelei. ʼE ko he faʼifaʼitakiʼaga lelei ʼaia kia natou fuli ʼae ʼe natou fia fai he fakapapau kia Sehova ia ʼaho nei. Tou faigaʼi muʼa ke tou tali ki te ʼu fehuʼi ʼaeni ʼe tolu: Kotea te fakaʼuhiga ʼo te fai he fakapapau? ʼE maʼuhiga feafeaʼi ia te ʼu fakapapau ʼae ʼe tou fai ki te ʼAtua? Kotea te ʼu ako ʼe tou maʼu mai ia Sefete pea mo Ana?

2, 3. ((1) Kotea te fakaʼuhiga ʼo te fai he fakapapau? (2) Kotea ʼae ʼe ui ʼi te Tohi-Tapu ʼo ʼuhiga mo te ʼu fakapapau ʼae neʼe tou fai ki te ʼAtua?

² ʼI te Tohi-Tapu, ʼe maʼuhiga ia te ʼu fakapapau ʼae ʼe fai ki te ʼAtua. Ohage la, ʼe feala ki he tahi ke ina fai he fakapapau kia Sehova, ʼe ina fai anai he gaue, peʼe ina foaki anai hana meʼa ʼofa, peʼe ina fakagata anai tana fakaʼaogaʼi he meʼa. Ko te fakapapau, ʼe ko he meʼa ʼe tou filifili ke tou fai, ʼaki pe totatou loto faʼitaliha. ʼE mole feala ke fakakinauʼi he tahi ke ina fai hana ­fakapapau . Kaʼe kapau ʼe fai e he tahi hana fakapapau, ʼe maʼuhiga ʼaupito kia mata ʼo Sehova, pea ʼe tonu ke ina fakahoko. ʼI te Tohi-Tapu, ka fai e he tahi he fakapapau, ʼe ina fakapapau ʼe ina fai anai he meʼa peʼe ʼe mole ina fai. (Senesi 14:​22, 23; Hepeleo 6:​16, 17) Kotea ʼae ʼe ui ʼi te Tohi-Tapu ʼo ʼuhiga mo te ʼu fakapapau ʼae ʼe tou fai ki te ʼAtua?

³ ʼE ui ʼi te Lao ʼa Moisese, ka fai e he tagata he fakapapau ki te ʼAtua, “e mole ina maumaui anai tana palalau, e ina fai anai ia o mulimuli ki te mea ae nee hau mai tona gutu.” (Numelo 30:3) Ki muli age, neʼe tohi fenei e Salomone: “Kapau nee ke fai he fakapapau ki te Atua, aua naa ke fakatuai tona fai, koteuhi e mole ofa ia ki te kau vale: Fakahoko te fakapapau ae kua ke fai.” (Ekelesiasi 5:3) Neʼe akoʼi e Sesu ki te hahaʼi ʼe maʼuhiga te ʼu fakapapau ʼae ʼe tou fai ki te ʼAtua. Neʼe ina ui fenei: “Neʼe ui fenei kia natou ʼi te temi muʼa: ‘ ʼAua naʼa ke holoʼi he fakapapau, kaʼe ʼe tonu ke ke fakahoko ʼau fakapapau ʼae neʼe ke fai kia Sehova.’ ”​—Mateo 5:33.

4. (1) ʼE maʼuhiga koa te ʼu fakapapau ʼae ʼe tou fai ki te ʼAtua? (2) Kotea ʼae ʼe tou fia iloʼi ʼo ʼuhiga mo Sefete pea mo Ana?

⁴ ʼE mahino ia, ʼe mole tonu ke tou hoko fai feia te ʼu fakapapau ʼae ʼe tou fai kia Sehova. Kapau ʼe mole tou fakahoko ʼatatou fakapapau, ʼe feala anai ke fakatupu kovi ki ʼatatou felogoʼi ʼae mo Sehova. Koia la ʼae neʼe fai ai e Tavite te ʼu fehuʼi ʼaeni: “Ko ai e feala anai ke hake ki te mouga o [Sehova]? Ko ai e malaga anai o kaku ki tona potu maonioni?” Pea neʼe ina ui leva ʼe tali anai e Sehova ia natou fuli ʼae “e mole fakapapau i te kaka.” (Pesalemo 24:​3, 4) Kotea te ʼu fakapapau neʼe fai e Sefete pea mo Ana? Neʼe faigafua koa te fakahoko ʼo ʼanā fakapapau?

5. Kotea te fakapapau ʼae neʼe fai e Sefete? Neʼe iku kitea?

⁵ Neʼe fai e Sefete tana fakapapau kia Sehova ʼi te temi ʼae neʼe alu ai ʼo tauʼi te kau Amone. Neʼe ko te ʼu fili ʼaia ʼo te hahaʼi ʼa te ʼAtua. (Tui Fakamaau 10:​7-9) Koia neʼe kole ai e Sefete kia Sehova ke natou malo ʼi te kau Amone ʼo ina fai te fakapapau ʼaeni: “Kapau e ke tuku anai ki oku nima te u foha o Amone, pea ko ae e ulu mai anai ki fafo mai te matapa o toku fale o fakafetaulaki mai kia au, i te aho ae e au liliu mai ai anai mo te malo mai te u foha o Amone, e fakatapui anai ia [kia Sehova].” Neʼe tali e te ʼAtua ki te faikole ʼa Sefete pea neʼe tokoni ki ai ke malo ʼi te tau. Pea ʼi te tau atu ʼa Sefete ki tona ʼapi, neʼe hu mai tona ʼofafine ki tuʼa ʼo fakafetaulaki kia ia. Neʼe ko ia ʼae neʼe tonu ke ina foaki maʼa Sehova. (Tui Fakamaau 11:​30-34) Kotea ʼae ka hoko anai ki tona ʼofafine?

6. (1) Neʼe faigafua koa kia Sefete pea mo tona ʼofafine tanā fakahoko te fakapapau ʼae neʼe fai e Sefete ki te ʼAtua? (2) Kotea ʼe ui ia Tetelonome 23:​21, 23 pea mo Pesalemo 15:​4, ʼo ʼuhiga mo te ʼu fakapapau?

⁶ Kapau neʼe loto e te ʼofafine ʼo Sefete ke fakahoko te fakapapau ʼo tana tamai, neʼe tonu ke alu ia ia ʼo tauhi kia Sehova ʼi te tapenaku lo ʼi tona maʼuli katoa. Neʼe hoko fai feia koa e Sefete tana fakapapau? Kailoa ia. Neʼe lagi kua iloʼi pe e Sefete, ʼe feala pe anai ke ʼuluaki hu mai tona ʼofafine ki tuʼa, ʼo fakafetaulaki mo ia. Neʼe faigataʼa kia Sefete te fakahoko ʼo tana fakapapau, ʼo feia pe mo tona ʼofafine. ʼI te sio ʼa Sefete ki tona ʼofafine, neʼe ina ui age ʼe mamahi tona loto. Neʼe alu leva tona ʼofafine ʼo ‘tagiʼi tona taupoʼou.’ Kotea tona tupuʼaga? Koteʼuhi neʼe mole he foha ʼo Sefete. Pea ʼe mole feala anai ke ʼohoana tona ʼofafine mo maʼu fanau. ʼE puli anai te higoa ʼo te famili ʼo Sefete. Kaʼe neʼe kua mahino kia Sefete pea mo tona ʼofafine, neʼe ʼi ai te faʼahi ʼe maʼuhiga age ia ʼi te ʼu meʼa ʼaia. Neʼe ui fenei e Sefete: “Nee au avahi toku gutu o lahi ia mua o [Sehova], pea e mole feala ke au toe liliu mai ki muli.” Neʼe ui fenei e tona ʼofafine: “Ke ke fai kia au o mulimuli ki te mea ae kua puaki e tou gutu.” (Tui Fakamaau 11:​35-39) ʼE ha mai ai, ko Sefete pea mo tona ʼofafine, neʼe ko he ʼu hahaʼi agatonu. Neʼe mole feala ke nā maumauʼi he fakapapau neʼe kua nā fai ki te ʼAtua, tatau aipe pe ʼe faigataʼa tona fakahoko.​—Lau ia Tetelonome 23:​21, 23; Pesalemo 15:4.

7. (1) Kotea te fakapapau ʼae neʼe fai e Ana? Pea neʼe hoko feafeaʼi? (2) Kotea ʼae ka hoko anai kia Samuele? (Vakaʼi te kiʼi nota.)

⁷ Neʼe fai e Ana tana fakapapau kia Sehova, ʼi te temi ʼae neʼe tau ai mo he aluʼaga faigataʼa. Neʼe ko he fafine fakaʼofaʼofa, he neʼe mole feala ke maʼu hana fanau. Koia neʼe gaohi koviʼi pea mo manukiʼi ai ia ia. (1 Samuele 1:​4-7, 10, 16) Neʼe ina fakaha kia Sehova te ʼu meʼa ʼae ʼe ina logoʼi ʼi tona loto. Pea neʼe ina fai leva te fakapapau ʼaeni: “[Sehova] o te atu fua tau! Kapau e ke ofa anai o mafuli mai ki te mamahi o tau fafine faifekau, kapau e ke manatui anai au pea e mole ke galoi anai tau fafine faifekau, pea kapau e ke foaki anai ki tau fafine faifekau he tama, e au momoli anai ia ia [kia Sehova] i tona mauli katoa, pea e mole fakalaka anai te tele i tona ulu.” * (Vakaʼi te kiʼi nota.) (1 Samuele 1:11) Neʼe fakalogo ia Sehova ki te faikole ʼa Ana. Koia ʼi te taʼu ʼae neʼe hoa mai ki ai, neʼe ina maʼu leva hana tama, ko Samuele. Neʼe fiafia ʼaupito ia Ana. Kaʼe neʼe mole ina galoʼi tana fakapapau ʼae neʼe ina fai ki te ʼAtua. ʼI tana fanauʼi tana kiʼi tama, neʼe ina ui fenei: “Nee au kole ia ia [kia Sehova].”​—1 Samuele 1:20.

8. (1) Neʼe faigafua koa kia Ana te fakahoko ʼo tana fakapapau? (2) ʼE fakamanatuʼi feafeaʼi mai ʼi te Pesalemo 61 ia te faʼifaʼitaki ʼa Ana?

⁸ ’I te taʼu tolu leva ʼo tana tama, neʼe fai leva e Ana te meʼa ʼae neʼe ina fakapapau kia Sehova. Neʼe ina ʼave leva ia Samuele ki te tapenakulo ʼi Silo, ki te Pelepitelo Lahi ko Eli. Pea neʼe ina ui fenei age: “Nee au kole te toe aeni, pea kua tali e [Sehova] te kole ae nee au fai kia ia. Koia foki ae e au loto ai ke au foaki ia ia [kia Sehova]: E tuku anai ia ia [kia Sehova] i tona mauli katoa. Pea nee natou ­atolasio  leva [kia Sehova] i ai.” (1 Samuele 1:​24-28) Talu mai ai, neʼe maʼuli leva ia Samuele ʼi te tapenakulo. Pea ʼe ui ʼi te Tohi-Tapu “nee tupu leva ia Samuele o lahi ia mua o [Sehova].” (1 Samuele 2:21) Neʼe mole faigafua kia Ana te fakahoko ʼo tana fakapapau. Neʼe ina iloʼi ʼe mole feala anai ke sio ki tana tama ʼi te ʼaho fuli, ia ia ʼae neʼe ʼofa mamahi ai. ʼE mole sio anai ki tona lahilahi ake. Kaʼe neʼe maʼuhiga kia Ana te fakapapau ʼae neʼe ina fai kia Sehova. Neʼe lotolelei ke ina sakilifisioʼi ia te ʼu meʼa ʼae neʼe maʼuhiga kia ia, ke feala hana fakahoko tana fakapapau ki te ʼAtua.​—1 Samuele 2:​1, 2; lau ia Pesalemo 61:​2, 6, 9.

9. Kotea te ʼu fehuʼi ka tou tali anai ki ai?

⁹ Kua tou mahino leva, ʼe maʼuhiga te ʼu fakapapau ʼae ʼe tou fai kia Sehova. Tou faigaʼi ke tou tali ki te ʼu fehuʼi ʼaeni: Kotea te ʼu fakapapau ʼe feala ke tou fai ia ʼaho nei? ʼE tonu ke tou faiga feafeaʼi ke tou fakahoko ʼatatou fakapapau?

10. Kotea te fakapapau ʼae ʼe maʼuhiga tokotahi ki he Kilisitiano? Pea ʼe ina fakahoko feafeaʼi anai te fakapapau ʼaia?

¹⁰ Ko te fakapapau ʼae ʼe maʼuhiga tokotahi ki he Kilisitiano, ʼe ko tana foaki tona maʼuli kia Sehova. ʼE ina fai he kole tokotahi, ʼo ina  fakapapau ai ʼe ina fakaʼaogaʼi anai tona maʼuli katoa moʼo tauhi ki te ʼAtua ʼo talu ai, tatau aipe pe kotea ʼae ka hoko anai. Neʼe ui e Sesu ke tou “fakafisi” kia tatou totonu. ʼE tou fakapapau ai ʼe tou fakamuʼamuʼa anai ia Sehova, kaʼe mole ko tatou. (Mateo 16:24) Pea talu mai te ʼaho ʼaia, “neʼe tou foaki ʼotatou maʼuli kia Sehova.” (Loma 14:8) ʼE maʼuhiga kia tatou te fakapapau ʼaia. Pea ʼe tou manatu tahi mo te tagata faipesalemo ʼae neʼe ina ui fenei: “Pe e feafeai anai ke au liufaki [kia Sehova] ana mea lelei fuli kia au? E au fai anai aku fakapapau [kia Sehova], ia mua o tana hahai katoa.”​—Pesalemo 116:​12, 14.

11. Kotea ʼae neʼe hoko ʼi te ʼaho ʼae neʼe kotou papitema ai?

¹¹ Neʼe kua kotou foaki koa ʼokotou maʼuli kia Sehova pea mo papitema? Kapau ko ia, ʼe ko he meʼa lelei. ʼE kei kotou manatuʼi koa te tehina ʼae neʼe ina fai te akonaki ʼo te papitema? Neʼe ina fehuʼi atu pe neʼe kua kotou foaki ʼokotou maʼuli kia Sehova. Pea mo ina ui atu pe ʼe kotou mahino koa, kapau “ ʼe kotou foaki ʼokotou maʼuli pea mo papitema, ʼe kotou fakaha ai ko koutou ko te kau Fakamoʼoni ʼa Sehova”? Pea ʼi takotou ʼio age ki ai, neʼe iloʼi ai leva e te hahaʼi fuli, neʼe kua kotou foaki ʼokotou maʼuli kia Sehova, pea kua feala leva ke papitemaʼi koutou pea mo fakanofo koutou ko he ʼu minisi ʼa Sehova. ʼE mahino ia, neʼe fiafia ʼaupito ia Sehova.

12. ((1) Kotea te ʼu fehuʼi ʼe tonu ke tou tahi fai? (2) Kotea te ʼu kalitate neʼe fakalotomalohiʼi tatou e Petelo ke tou gaueʼi?

¹² ʼI takotou papitema, neʼe kotou fakapapau ai kia Sehova ʼe kotou tauhi anai ki ai pea mo faiga fakamalotoloto ke kotou mulimuli ki ʼana lao. Kaʼe ko te papitema ʼe ko te kamataʼaga pe ʼaia ʼo te maʼuli ʼo he Kilisitiano. ʼAki te alu ʼo te temi, ʼe ʼaoga kia tatou fuli ke tou vakavakaʼi ia tatou totonu. ʼE feala ke tou tahi fai te ʼu fehuʼi ʼaeni: ‘Talu taku papitema, neʼe kua tuputupu koa ʼaku felogoʼi mo Sehova ʼo lelei age? ʼE kei au tauhi koa kia te ia mo toku loto katoa? (Kolose 3:23) ʼE kei au faikole tuʼumaʼu koa? ʼE au lau koa te Tohi-Tapu ʼi te ʼaho fuli? ʼE au kau tuʼumaʼu koa ki te ʼu fono ʼi te kokelekasio? ʼE au faiga malohi koa ke au kau ki te gaue faifakamafola? ʼE kei au fiafia koa ʼi te fai ʼo te ʼu gaue ʼaia?’ Neʼe fakatokaga mai e te apositolo ko Petelo, he ʼe feala pe ke mole kei tou fakahoko tatatou tauhi ʼae kia Sehova. Koia ʼe tonu ai ke tou gaue kinakina ke malohi ai tatatou tui, pea mo tuputupu totatou ʼatamai malama, pea ke tou maʼu te faʼa kataki, pea mo haga pipiki ki te ʼAtua.​—Lau ia 2 Petelo 1:​5-8.

13. Kotea ʼae ʼe tonu ke mahino ki ai he tahi ʼe ina foaki tona maʼuli kia Sehova pea mo papitema?

¹³ Ka kua tou fai he fakapapau kia Sehova ʼe mole feala ke toe holoʼi. Kapau ʼe ʼi ai he tahi ʼe mole kei fia tauhi kia Sehova peʼe mole kei fia mulimuli ki ʼana lao, ʼe mole feala anai ke ina ui neʼe mole ina foaki moʼoni tona maʼuli ki te ʼAtua pea neʼe mole moʼoni tona papitema. * (Vakaʼi te kiʼi nota.) Kapau ʼe fai e he tahi kua papitema he agahala mamafa, ʼe fakamauʼi anai ia ia e Sehova pea mo te kokelekasio. (Loma 14:12) ʼE mole tou loto ke tou hage ko natou ʼae neʼe ui e Sesu, neʼe mole kei natou maʼu te ʼofa ʼae neʼe natou maʼu ʼi te kamata. Kaʼe ʼe tou loto ke ina fai mai te ʼu palalau ʼaeni: “ ʼE au iloʼi ʼau gaue, mo tou ʼofa, mo tau tui, mo tau minisitelio pea mo tau faʼa  ­kataki, pea ʼe lahi age ʼau gaue fakamuli ʼaeni ʼi ʼae neʼe ke fai ʼi te kamata.” (Fakaha 2:​4, 19) ʼE tou fia fakafiafiaʼi ia te loto ʼo Sehova, koia ʼe tou faiga malohi anai ke tou fakaha ʼi ʼotatou maʼuli, ʼe tou tuha mo te fakapapau ʼae neʼe tou fai kia Sehova, ʼe tou foaki ʼotatou maʼuli kia te ia.

14. Kotea ia te lua fakapapau ʼae ʼe maʼuhiga tafito ki he tahi? Kotea tona tupuʼaga?

¹⁴ Ko te lua fakapapau ʼae ʼe maʼuhiga tafito ki he tahi, ko te fakapapau ʼae ʼe ina fai moka ʼohoana. Ko te ʼohoana ʼe taputapu. ʼE maʼuhiga ʼaupito kia mata ʼo Sehova ia te fakapapau ʼae ʼe fai ʼi te ʼohoana. Ka fai e he tagata mo he fafine he fakapapau, ʼe nā fai te fakapapau ʼaia ia muʼa ʼo Sehova pea mo natou fuli ʼae neʼe logo ki ai. ʼE nā fakapapau ai ʼe nā feʼofaʼaki mo fefakaʼapaʼapaʼaki anai, ʼi tonā maʼuli katoa, mo mulimuli ki te ʼu fakatuʼutuʼu ʼa te ʼAtua ʼo ʼuhiga mo te nofo ʼohoana. ʼE nā fai te ʼu fakapapau ʼaia ia muʼa ʼo te ʼAtua. ʼI tanā fai te ʼu fakapapau ʼaia, kua nā ʼohoana ʼi tonā maʼuli katoa. (Senesi 2:24; 1 Kolonito 7:39) Neʼe ui fenei e Sesu: “Ko te meʼa ʼae neʼe fakatahiʼi e te ʼAtua, ke ʼaua naʼa veteki e te tagata.” Ka ʼohoana he taumatuʼa, ʼe mole tonu ke nā ui, ʼe feala anai ke nā mavete mo kapau ʼe mole kei nā fia maʼuʼuli fakatahi.​—Maleko 10:9.

15. He koʼe ʼe mole tatau te manatu ʼa te kau Kilisitiano moʼoni pea mo te hahaʼi ʼo te malama, ʼo ʼuhiga mo te ʼohoana?

¹⁵ ʼE mole he nofo ʼohoana ʼe haohaoa, koteʼuhi ʼe tou agahala fuli. Koia ʼe ui ai ʼi te Tohi-Tapu, ʼo ʼuhiga mo natou ʼae ʼe ʼohoana, ʼi ʼihi temi, “ ʼe natou felaveʼi anai mo he ʼu mamahi.” (1 Kolonito 7:28) Tokolahi ʼi te temi nei, kua natou meʼa noaʼi ia te ʼohoana. ʼI tanatou manatu, kapau ʼe hoko mai he ʼu fihifihia, ʼe feala pe ke natou mavete. Kaʼe ʼe mole ko te manatu ʼaia ʼa te kau Kilisitiano moʼoni ʼo ʼuhiga mo te ʼohoana. ʼE natou iloʼi neʼe natou fai ʼanatou fakapapau ki te ʼohoana ia muʼa ʼo te ʼAtua. Kapau ʼe natou holoʼi tanatou fakapapau, ʼe hage pe neʼe natou lohiʼi te ʼAtua. Kaʼe ʼe fehiʼa te ʼAtua ʼi te kau gutuloi. (Levitiko ­19:12; Taaga Lea 6:​16-19) ʼE tonu ke manatuʼi e te kau Kilisitiano ʼae kua ʼohoana, ia te ʼu palalau ʼaeni ʼa te apositolo ko Paulo: “Kua ʼi ai koa hou ʼohoana? Tuku tau faiga ʼae ke ke mavae mai ia ia.” (1 Kolonito 7:27) Neʼe fai e Paulo te ʼu palalau ʼaia koteʼuhi neʼe ina iloʼi ʼe fehiʼa ia Sehova ki ʼae ʼe aga fakakaka ke mavete mo tona ʼohoana.​—Malakia 2:​13-16.

16. Kotea ʼae ʼe ui ʼi te Tohi-Tapu ʼo ʼuhiga mo te mavete pea mo te mavae ʼo he tahi mai tona ʼohoana?

¹⁶ Neʼe ui e Sesu ʼe mole feala ke mavete he tahi mo tona ʼohoana, gata pe mo kapau neʼe tono he tahi ia naua, pea ko ia ʼae neʼe nofo agatonu, ʼe mole fia fakamolemole ki tona ʼohoana. ʼE ko te tupuʼaga pe ʼaia ʼe tahi ki te mavete, ʼe tuku mai ʼi te Tohi-Tapu. (Mateo 19:9; Hepeleo 13:4) Kaʼe ʼe feafeaʼi ki he tahi ʼe fia mavae mai tona ʼohoana? ʼE palalau fakahagatonu mai te Tohi-Tapu ki te faʼahi ʼaia. (Lau ia 1 Kolonito 7:​10, 11.) ʼE mole maʼu ʼi te Tohi-Tapu he tupuʼaga ke tahi nofo he taumatuʼa. Kaʼe, ʼi ʼihi temi, ʼe ʼi ai te ʼu aluʼaga ʼe feala ke hoko, ʼo maʼua ai ki he Kilisitiano ke mavae mai tona ʼohoana. Ohage la, kapau ʼe feala ke tuʼutamakiʼia he tahi ʼi te faʼahi fakalaumalie koteʼuhi ko tona ʼohoana ʼe ko he aposita. Peʼe feala ke tuʼutamakiʼia moʼoni te maʼuli ʼo he tahi koteʼuhi ʼe agakovi ʼaupito tona ʼohoana. * (Vakaʼi te kiʼi nota.) 

17. Kotea ʼe feala ke fai e he taumatuʼa ke tologa ai tonā maʼuli fakataumatuʼa?

¹⁷ Kapau ʼe olo he taumatuʼa ʼo kole tokoni ki te kau tagata ʼafeā ʼo ʼuhiga mo tonā maʼuli fakataumatuʼa, ʼe feala ke natou fehuʼi age peʼe kua nā sisio ʼi te ʼata viteo Qu’est-ce que le vrai amour ? pea mo ako te kaupepa ʼE Feala Ke Fiafia Tokotou Famili. ʼE maʼu ai te ʼu pelesepeto Fakatohi-tapu ʼe tokoni anai kia naua, ke lelei tonā maʼuli fakataumatuʼa. Neʼe ui fenei e te taumatuʼa: “Talu tamā ako te kaupepa ʼaia, kua lahi toma fiafia.” Neʼe ʼi ai te tuagaʼane kua taʼu 22 tana ʼohoana, kaʼe neʼe ʼamanaki mavete mo tona ʼohoana. Neʼe sio leva ki te ʼata viteo. ʼE ina ui fenei: “Neʼe kua ma papitema tokolua. Kaʼe neʼe mole tatau te ʼu meʼa ʼae ʼe ma logoʼi. Neʼe to tonu ʼosi te foʼi ʼata viteo ʼaia. Kua lahi leva te ʼu gaue ʼe ma fai fakatahi, ohage ko he taumatuʼa.” ʼE mahino ia, kapau ʼe maʼuliʼi e he taumatuʼa ia te ʼu pelesepeto ʼa Sehova, ʼe tuputupu anai ʼanā felogoʼi ʼo malohi pea mo nā maʼu te fiafia.

18, 19. ((1) Kotea ʼae ʼe fai e ʼihi matuʼā? (2) Kotea ʼe feala ke tou ui ʼo ʼuhiga mo natou ʼae ʼe gaue ʼi te selevisi makehe temi katoa?

¹⁸ Neʼe tou vakaʼi ʼi muʼa atu te ʼu fakapapau ʼae neʼe fai e Sefete pea mo Ana. Neʼe fakaʼaogaʼi e te ʼofafine ʼo Sefete pea mo te tama ʼa Ana tonā maʼuli katoa ki te tauhi ʼae kia Sehova, ʼuhi ko te ʼu fakapapau ʼaia. Tokolahi te ʼu matuʼā ʼi te temi nei, ʼe natou fakalotomalohiʼi ʼanatou fanau ke natou toʼo te selevisi temi katoa pea ke natou fakaʼaogaʼi ʼonatou maʼuli ki te ʼu gaue ʼae ʼa te ʼAtua. Ko te maʼua ʼo tatou fuli ke tou fakalotomalohiʼi te kau tupulaga ʼaia ke natou hoko atu tanatou gaue.​—Tui Fakamaau 11:40; Pesalemo 110:3.

¹⁹ Ia ʼaho nei, ko te toko 67 000 tupu kau Fakamoʼoni ʼa Sehova ʼe natou kau ki te Selevisi Makehe Temi Katoa ʼi Te Malamanei Katoa. Ko ʼihi ʼe natou gaue ʼi te ʼu Petele, peʼe ki te laga ʼo te ʼu fale fono, peʼe ko te taupau ʼo te ʼu siliko. Ko ʼihi ʼe natou faiako, peʼe pionie makehe, peʼe misionea, peʼe natou taupau te ʼu Fale Fakatahi, peʼe gaue ʼi te ʼu fale ʼae ʼe fai ai te ʼu ako Fakatohi-Tapu. Ko natou fuli ʼaia neʼe natou fai te “Fakapapau ʼAe Ke Natou Fakalogo Ki Te Kautahi Pea Mo Maʼuli Fakafeʼauga.” ʼI tanatou fai ia te fakapapau ʼaia, neʼe natou tali ke natou gaue kinakina ʼo fakahoko te gaue ʼae ʼe tuku age anai kia natou, pea mo maʼuli fakafeʼauga, pea ke mole natou fai he gaue ʼe totogi mo kapau neʼe mole fakagafua age e te kautahi ke natou fai. ʼE mole ko te tagata ʼae ʼe makehe, kaʼe ʼe ko te gaue ʼae ʼe ina fai ʼe makehe. ʼE natou agavaivai mo faiga fakamalotoloto ke natou nonofo agatonu ki tanatou fakapapau pea mo hoko atu tanatou selevisi makehe temi katoa.

20. ʼE tonu ke feafeaʼi kia tatou te ʼu fakapapau ʼae ʼe tou fai ki te ʼAtua? Kotea tona tupuʼaga?

²⁰ Neʼe tou vakaʼi ʼi te alatike ʼaeni, te ʼu fakapapau ʼe tolu ʼe feala ke tou fai ki te ʼAtua. Neʼe lagi kua kotou fai ʼihi ʼi te ʼu fakapapau ʼaia? ʼE tou iloʼi te maʼuhiga ʼo te ʼu fakapapau ʼae ʼe tou fai pea ʼe tonu ke tou faiga malohi ke tou fakahoko. (Taaga Lea 20:25) Kapau ʼe mole tou fakahoko te ʼu fakapapau ʼae ʼe tou fai kia Sehova, ʼe feala ke fua kovi kia tatou. (Ekelesiasi 5:5) Koia, ʼofa pe ke tou hage ko te tagata faipesalemo, ʼae neʼe ina ui fenei kia Sehova: “E au fia hiva [tuʼumaʼu] anai tou huafa, pea e au fai anai aku fakapapau i te aho fuli.”​—Pesalemo 61:9.