ʼI TE taʼu ʼaeni kua hili, neʼe fakanofo te ʼu tehina ʼe toko lauʼi afe ʼi te malamanei katoa ko he kau tagata ʼafeā mo faifekau fakaminisitelio. Kapau ʼe ke kau ia natou ʼaia, ʼe mahino ia ʼe ke fiafia he ʼe ke tauhi kia Sehova pea mo ʼou tehina ʼi hona aluʼaga foʼou.

Kae ʼe lagi ke tuʼania pea ʼe tonu. Ko te tagata ʼafeā ʼe kei tupulaga ʼe higoa ko Jason ʼe ina ui fenei: “ ʼI toku fakanofo ko he tagata ʼafeā, neʼe au mafasia ʼuhi ko te ʼu gaue foʼou ʼae neʼe hinoʼi au ki ai.” Neʼe toe feia pe la ia Moisese mo Selemia. ʼI tanā manatu, ʼe mole nā lavaʼi anai te ʼu gaue ʼae neʼe fakatotonu age e Sehova ke nā fai. (Ekesote 4:10; Selemia 1:6) Kapau ʼe ke maʼu te manatu ʼaia, ʼe feafeaʼi anai hau fakamalohiʼi ia tau falala pea mo ke tuputupu? ʼE lelei ke ke ako mai te faʼifaʼitaki ʼa Timoteo.—Gaue 16:1-3.

Neʼe lagi taʼu 20 ia Timoteo ʼi tana kamata kaugā folau mo te apositolo ko Paulo. ʼI te kamata, ʼuhi ko tana kei tupulaga neʼe lagi manatu ia Timoteo, ʼe mole ina lavaʼi anai te akoʼi mo te tokoniʼi ʼo ʼihi. (1 Timoteo 4:11, 12; 2 Timoteo 1:1, 2, 7) Kae neʼe hoko atu pe ia tana tuputupu, pea ʼi ni taʼu ʼe hogofulu ki muli age neʼe ui fenei e Paulo ki te kokelekasio ʼo Filipe: “ ʼE au fakaʼamu, kapau ʼe ko te finegalo ʼo te ʼAliki ko Sesu, ke au fekauʼi vave atu ia Timoteo kia koutou.” He koʼe neʼe ui e Paulo te faʼahi ʼaia? Neʼe ina fakamahino fenei: “ ʼE mole au maʼu he tahi ʼe hage ko Timoteo.”—Filipe 2:19, 20.

He koʼe ko Timoteo ko he faʼifaʼitaki lelei ki te kau tagata ʼafeā? Tou vakaʼi ia tupuʼaga ʼe ono.

1. Neʼe tokaga moʼoni ki te hahaʼi. Neʼe ui e Paulo ki te ʼu tehina ʼae ʼi Filipe, ʼe “tokaga moʼoni” anai ia Timoteo kia natou. (Filipe 2:20) Neʼe loto e Timoteo ke nonofo ovi te ʼu tehina kia Sehova, koia neʼe lotolelei ai ke ina fakaʼaogaʼi tona temi, mo tona malohi ke tokoni kia natou.

Ko te tehina kua taʼu 20 tupu tana tagata ʼafeā ʼe higoa ko William, ʼe ina ui fenei tuʼumaʼu ki te ʼu tehina ʼae neʼe hoki fakanofo ko he ʼu tagata ʼafeā: “Kotou ʼoʼofa ki ʼokotou tehina. Kotou tokagaʼi tafito te ʼu meʼa ʼae ʼe ʼaoga kia natou kae ʼaua takotou tokakaga pe ki te fakatuʼutuʼu ʼo te ʼu meʼa ʼo te kokelekasio.” ʼAua naʼa kotou hage ko he tagata sofea papika ʼae ʼe tokaga pe ki te ʼu hola ʼae neʼe tuku age, kae mole ki te hahaʼi ʼae ʼe fakaatalitali ki ai.

2. Neʼe ina fakamuʼamuʼa tana tauhi ʼae kia Sehova. Neʼe ui e Paulo, ko Timoteo ʼe mole hage ko natou ʼae ʼe “natou kumi te ʼu meʼa ʼae ʼe lelei kia natou, kaʼe mole ko te ʼu meʼa ʼae ʼe lelei kia Sesu Kilisito.” (Filipe 2:21) Neʼe tokagaʼi e Paulo ko te ʼu tehina ʼo Loma, te kolo ʼae neʼe ina fai ai tana tohi, neʼe lahi pe tanatou tokakaga ki te ʼu meʼa ʼa natou totonu. ʼI ʼihi temi, neʼe natou fakamuʼamuʼa te ʼu meʼa ʼae ʼe lelei kia natou kae mole ko te tauhi kia Sehova. Kae neʼe mole feia ia Timoteo. ʼI te temi fuli pe ʼae neʼe feala ai ke toe lahi age tana tauhi ki te ʼAtua, neʼe hage pe ko Esaia ʼae neʼe ina ui fenei: “Koeni au, ke ke fekau au.”—Esaia 6:8.

ʼE feafeaʼi anai hau fakapotopoto moka ke tokaga ki te ʼu meʼa ʼae ʼe ʼaoga kia koe pea mo te kokelekasio? ʼUluaki, mulimuli ki te tokoni ʼaeni ʼa Paulo: “Ke kotou iloʼi papau te ʼu meʼa ʼae ʼe maʼuhiga ʼaupito.” (Filipe 1:10) Fakamuʼamuʼa ia tau tauhi ʼae kia Sehova. Lua, fakagata te ʼu aluʼaga ʼae ʼe ina kaihaʼa tou temi mo tou malohi. Neʼe faitokoni fenei ia Paulo kia Timoteo: “Ke ke hola mai te ʼu holi ʼo te temi tupulaga, kaʼe ke ke faiga fakamalotoloto ke ke fakaha te faitotonu, mo te tui, mo te ʼofa pea mo te tokalelei.”—2 Timoteo 2:22.

3. Neʼe gaue kinakina ʼi te tauhi ʼae kia Sehova. Neʼe ui fenei e Paulo ʼo ʼuhiga mo  Timoteo: “Ohage ko he tamasiʼi mo tana tamai, neʼe kaugā gaue mo au ʼaki he faʼafai ki te tuputupu ʼo te fakamafola ʼo te logo lelei.” (Filipe 2:22) Ko Timoteo neʼe mole ko he tahi neʼe piko. Neʼe gaue kinakina mo Paulo, ʼo malohi ai tanā fakakaumeʼa.

Ia ʼaho nei, ʼe lahi te gaue ʼae ʼe tonu ke fai ʼi te kautahi ʼa Sehova. Ko te ʼu gaue ʼaia ʼe fakatupu fiafia moʼoni pea ʼe tokoni atu ke ke fakaovi ki ʼou tehina mo tuagaʼane. Koia, ʼe feala ai ke ke fakatuʼutuʼu ke “lahi tuʼumaʼu [ʼau] gaue ʼi te ʼAliki.”—1 Kolonito 15:58.

4. Neʼe ina maʼuliʼi te ʼu meʼa ʼae neʼe ina ako. Neʼe faitohi fenei ia Paulo kia Timoteo: “Neʼe ke mulimuli lelei ki taku akonaki, mo taku faʼahiga maʼuli, mo taku fakatuʼutuʼu, mo taku tui, mo taku kataki fualoa, mo toku ʼofa, mo taku faʼa kataki.” (2 Timoteo 3:10) Koia, neʼe toe lahi age te ʼu gaue ʼae neʼe hinoʼi ki ai ia Timoteo ʼuhi ko tana maʼuliʼi te ʼu meʼa ʼae neʼe ina ako.—1 Kolonito 4:17.

He koʼe ʼe mole ke kumi ke ke faʼifaʼitakiʼi he tagata ʼafeā ʼe faiva? Ko Tom, kua tagata ʼafeā talu mai fualoa, ʼe ina manatuʼi ko te tagata ʼafeā faiva neʼe tokaga pea mo akoako leleiʼi ia ia. ʼE ina ui fenei: “Neʼe au kole tokoni tuʼumaʼu kia ia pea neʼe au maʼuliʼi ʼana tokoni. ʼI taku fai te faʼahi ʼaia, neʼe au falala ai ʼe au lavaʼi anai te ʼu gaue ʼae ʼe tonu ke au fai.”

5. Neʼe ina akoako tuʼumaʼu ia ia totonu. Neʼe tokoniʼi fenei Timoteo e Paulo: “Ke ke faiga fakamalotoloto ke ke pipiki ki te ʼAtua.” (1 Timoteo 4:7, nota) Ko he tahi ʼe faigaoʼi, ʼe ʼaoga ke ina akoako tuʼumaʼu ia ia, tatau aipe pe ʼe ʼi ai hona tagata ako faigaoʼi. Koia neʼe uga fenei ai e Paulo ia Timoteo: “Ke ke haga fai fakamalotoloto tau lautohi ia muʼa ʼo te kaugā malie, mo tau faitokoni pea mo tau faiakonaki. . . . Ke ke fakakaukauʼi lelei te ʼu meʼa ʼaia, ke ke tokaga tafito ki ai, ke sisio lelei ai te hahaʼi fuli ki tau lakalaka ki muʼa.”—1 Timoteo 4:13-15.

ʼE tonu foki mo koe ke ke hikihiki ʼou fealagia. Ako fakalelei ia te Tohi-Tapu, pea mo ke iloʼi te ʼu fakatuʼutuʼu foʼou ʼo te kautahi. ʼAua naʼa ke falala fau kia koe totonu. ʼE mole lelei anai ke ke manatu kua ke liliu ʼo faiva pea mo ke ui ʼe feala pe hau puleʼakiʼi he aluʼaga kae mole ke fai he ʼu fekumi. Kae ohage ko Timoteo, “tokaga fakalelei kia koe mo tau faiakonaki.”—1 Timoteo 4:16.

6. Neʼe falala ki te laumalie ʼo Sehova. Neʼe manatu Paulo ki te minisitelio ʼa Timoteo ʼi tana ui fenei age: “Ke ke taupau ʼaki te tokoni ʼa te laumalie maʼoniʼoni ʼae ʼe nofo ia tatou, te meʼa maʼuhiga ʼae neʼe foaki atu.” (2 Timoteo 1:14) ʼEi, neʼe tonu ke falala ia Timoteo ki te laumalie ʼo te ʼAtua.

Ko Donald, kua tagata ʼafeā talu mai fualoa, ʼe ina ui fenei: “ ʼE tonu ke maʼuhiga ki te kau tagata ʼafeā mo faifekau fakaminisitelio ʼanatou felogoi mo te ʼAtua. He ʼe natou malolohi ai anai. Kapau ʼe natou kole te laumalie ʼo te ʼAtua pea mo maʼu tona fua, ʼe natou liliu moʼoni anai ko he ʼu tapuakina ki ʼonatou tehina.”—Pesalemo 84:7, MN; 1 Petelo 4:11.

Ko he meʼa fakalotomalohi tatatou sisio ki he ʼu tehina neʼe hoki fakanofo ko he kau tagata ʼafeā mo faifekau fakaminisitelio. Pea ohage pe ko koe, ʼe natou tuputupu ʼi te tauhi ʼae kia Sehova. Ko Jason ʼae kua tou talanoa ki ai ʼi te kamata, ʼe ina ui fenei: “Talu toku fakanofo ko he tagata ʼafeā, neʼe lahi te ʼu faʼahi neʼe au ako mo toe tuputupu ai taku lotofalala ʼo ʼuhiga mo te ʼu gaue ʼe tonu ke au fai. ʼI te temi nei, kua au leleiʼia ʼaku gaue ʼi toku ʼuhiga tagata ʼafeā pea ʼe ko he pilivilesio fakaofoofo ia kia au.”

ʼE hoko atu anai koa tau tuputupu ʼi tau tauhi ʼae kia Sehova? Kapau ʼe ke faʼifaʼitakiʼi ia Timoteo, ʼe ke liliu anai mo koe ko he tapuakina ki ʼou tehina mo tuagaʼane.