1. Kotea ia te ʼu aluʼaga ʼae ʼe tou gaue fakatahi ai mo Sehova?

ʼI TE temi ʼae neʼe fakatupu ai e Sehova ia te ʼuluaki taumatuʼa, neʼe ina loto ke nā gaue fakatahi pea mo ia. Logo la ʼi te temi nei kua agahala ia te hahaʼi fuli, kae ʼe feala pe ki te hahaʼi agatonu ke natou gaue fakatahi mo Sehova ʼi te ʼaho fuli. Ohage la, ʼe tou “kaugā gaue mo te ʼAtua” ʼi te fakamafola ʼo te logo lelei ʼo tona Puleʼaga pea mo fai ni tisipulo. (1 Kolonito 3:5-9) ʼE ko he toe pilivilesio lahi te filifili ʼo tatou e te Tupuʼaga mafimafi ke tou fakahoko ia tana gaue maʼuhiga. Kae ʼe mole ko te aluʼaga pe ʼaia ʼe tou gaue fakatahi ai mo Sehova. ʼE tou vakaʼi anai ʼi te alatike ʼaeni, pe ʼe feafeaʼi hatatou toe gaue fakatahi mo Sehova moka tou tokoni ki totatou famili pea mo natou ʼo te kokelekasio, moka tou tali kaiga, moka tou tokoni mo lagolago ki te ʼu gaue ʼa te kautahi ʼae ʼe fakahoko ʼi te malamanei katoa pea moka tou fakalahi tatatou gaue ʼae maʼa Sehova.—Kolose 3:23.

2. He koʼe ʼe mole tonu ke tou fakatatau ia te ʼu gaue ʼae ʼe tou fai maʼa Sehova pea mo te ʼu gaue ʼae ʼe fai e ʼihi?

² ʼI tatatou ako ia te alatike ʼaeni, ʼe maʼuhiga kia tatou ke tou manatuʼi ʼe tou kehekehe fuli. ʼE mole tatau ʼotatou taʼu, ʼotatou  maʼuli malolo, te ʼu aluʼaga ʼo ʼotatou maʼuli pea mo ʼotatou fealagia. Koia ʼe mole tonu ai ke tou fakatatau ia te ʼu gaue ʼae ʼe feala ke tou fai maʼa Sehova pea mo te ʼu gaue ʼae ʼe feala ke fakahoho e ʼihi. Neʼe ui fenei e te apositolo ko Paulo: “Ke tahi vakavakaʼi e te tagata ʼana gaue ʼa ia totonu, pea ʼe ina maʼu ai anai he tupuʼaga ke fiafia ʼo ʼuhiga mo ia totonu pe. ʼE mole tonu ke ina fakatatau ʼana gaue mo te ʼu gaue ʼa he tahi age.”—Kalate 6:4.

3. He koʼe ʼe feala ke tou ui ko he tahi ʼe tokaga ki tona kiʼi famili ʼe gaue fakatahi mo Sehova?

³ ʼE loto e Sehova ke tou tokakaga ki ʼotatou famili. Ohage la, ʼe tou olo ʼo gaue ke maʼu he foʼi falā ke tou totogiʼaki te ʼu meʼa ʼae ʼe ʼaoga ki totatou famili. Tokolahi te ʼu faʼe ʼe nonofo ʼi fale ʼo tokakaga ki ʼanatou fanau ʼae ʼe kei liliki. Pea moka kua vaivavai peʼe mahamahaki ʼatatou matuʼā ʼe tonu ke tou tokakaga kia natou. Ko te ʼu faʼahi ʼaia ʼe maʼuhiga ʼaupito. ʼE ui fenei ʼi te Tohi-Tapu: “Kapau ʼe mole tokaga he tahi ki ʼona kaiga totonu, kaʼe tafito natou ʼo tona loto fale, kua fakafisi ia ki te tui pea ʼe kovi age ia ʼi he tahi ʼe mole tui.” (1 Timoteo 5:8) Kapau ʼe ʼi ai hokotou ʼu maʼua fakafamili, ʼe lagi mole lahi ia te ʼu gaue ʼae ʼe kotou fakahoko maʼa Sehova. Kae ʼaua naʼa kotou lotovaivai. ʼE fiafia ia Sehova moka kotou tokakaga ki tokotou famili.—1 Kolonito 10:31.

4. ʼE fakamuʼamuʼa feafeaʼi e te ʼu matuʼā ia te Puleʼaga? Pea kotea ʼe hoko moka ʼe natou fai ia te faʼahi ʼaia?

⁴ Ka tokoni ia te ʼu matuʼā ki ʼanatou fanau ke natou fai he ʼu fakatuʼutuʼu fakalaumalie ki te gaue maʼa Sehova, ʼe natou gaue fakatahi ai mo Sehova. Tokolahi ʼi te ʼu matuʼā neʼe natou fai te faʼahi ʼaia. Pea ki muli age leva, neʼe gaue temi katoa ʼanatou fanau maʼa Sehova pea ko ʼihi neʼe mavae mai ʼonatou ʼapi ʼo olo ʼo maʼuli ʼi he tahi age fenua. Ko ʼihi kua misionea, ko ʼihi kua pionie ʼi te ʼu koga meʼa ʼae ʼe ʼaoga ki ai he kau faifakamafola pea ko ʼihi leva ʼe natou gaue ʼi te ʼu Petele. ʼE moʼoni, ka mavae ia te ʼu fanau mai te loto fale ʼe mole kei feala ki te ʼu matuʼā ke natou fakatahi mo natou ohage ko tanatou fakaʼamu ki ai. Logo la ko he toe sakilifisio te aluʼaga ʼaia kia natou, kae ʼe natou fakalotomalohiʼi ʼanatou fanau ke hoko atu tanatou tauhi kia Sehova, tatau aipe te koga meʼa ʼae ʼe natou nonofo ai. Kotea tona tupuʼaga? He ʼe natou fiafia moka ʼe fakamuʼamuʼa e ʼanatou fanau ʼi tonatou maʼuli ia Sehova. (3 Soane 4) Tokolahi ʼi te ʼu matuʼā ʼe natou hage ko Ana, ʼae neʼe ina ui neʼe ina “foaki” tana tama ko Samuele kia Sehova. ʼE natou logoʼi ʼe ko he toe pilivilesio lahi te gaue fakatahi mo Sehova ʼi te ʼu aluʼaga ʼaia.—1 Samuele 1:28.

5. ʼE kotou lava tokoni feafeaʼi ki te ʼu tehina mo tuagaʼane ʼo tokotou kokelekasio? (Vakaʼi te ʼuluaki pāki.)

⁵ Kapau ʼe mole lahi ʼokotou maʼua fakafamili, ʼe feala pe ke kotou tokoni ki te ʼu tehina mo tuagaʼane ʼae ʼe mahahaki peʼe kua matuʼa peʼe ko natou ʼae ʼe ʼaoga ki ai he tokoni. Peʼe feala ke kotou lagolago kia natou ʼae ʼe tokakaga kia natou ʼaia. Kotou kumi ʼi tokotou kokelekasio pe ʼe ko ai ʼae ʼe feala ke kotou tokoni ki ai. Ohage la, ʼe lagi ko he tuagaʼane ʼe tokaga ki tana tamai peʼe ko tana faʼe ʼae kua vaivai. ʼE feala pe ke kotou toʼo he temi ke kotou nonofo mo te tamai peʼe ko te faʼe ke feala ki te tuagaʼane hana fai he tahi age ʼu gaue. Peʼe feala pe ke kotou tokoni ki he tahi ʼo ʼave ki te ʼu fono, peʼe kotou olo ʼo fai ʼana fakatau, peʼe kotou olo ʼo fakasiosio he tahi ʼe takoto ʼi te lopitali. Ka kotou fai ia te ʼu faʼahi ʼaia, ʼe kotou gaue fakatahi mo Sehova ke ina tali ki he kole neʼe fai age e he tahi.—Lau ia 1 Kolonito 10:24.

6. ʼE feafeaʼi hatatou tali kaiga ki te hahaʼi?

⁶ Ko natou ʼae ʼe kaugā gaue mo te ʼAtua, ʼi te agamahani ʼe natou tali kaiga lelei. ʼI te Tohi-Tapu, ko te kupu Fakakeleka ʼae neʼe fulihi ʼaki te kupu “tali kaiga” ʼe fakaʼuhiga ki “te agalelei ʼae ki te kau matapule.” (Hepeleo 13:2, nota) ʼE feala ke tou lau ʼi te Folafola ʼa te ʼAtua ia te ʼu faʼifaʼitaki ʼe tou ako mai ai pe ʼe feafeaʼi hatatou agalelei ki te hahaʼi. (Senesi 18:1-5) ʼE feala pea ʼe tonu ke tou tokoni ki te hahaʼi ʼi te ʼu temi fuli pe ʼae ʼe tou fealagia ai, tatau aipe pe ʼe ko ʼotatou “kaiga ʼae ʼi te tui” peʼe kailoa.—Kalate 6:10.

7. Kotea te ʼu fua lelei moka tou tali kaiga kia natou ʼae ʼe gaue temi katoa maʼa Sehova?

⁷ ʼE feala koa ke tou gaue fakatahi mo Sehova ʼo tou tali kaiga kia natou ʼae ʼe gaue temi katoa maʼa Sehova mo kapau ʼe ʼaoga kia natou he nofoʼaga? (Lau ia 3 Soane 5, 8.) Ka tou fai ia te faʼahi ʼaia, ʼe fua lelei anai kia natou pea mo tatou. Koia ʼae ʼe ui ai ʼi te Tohi-Tapu, ʼe tou “fefakalotomalohiʼaki” ai. (Loma 1:11, 12) Kotou tokagaʼi ia te aluʼaga ʼaeni neʼe hoko kia Olaf. ʼI tana kei tupulaga, neʼe ʼaʼahi tona kokelekasio e te tehina taupau ʼo te siliko pea neʼe ʼaoga ki ai he nofoʼaga. Kae neʼe mole he tahi ʼi te kokelekasio neʼe feala ke ina fakaʼapi ia ia. Neʼe kole ai e Olaf ki ʼana matuʼā ʼae ʼe mole ko he ʼu Fakamoʼoni ʼa Sehova pe ʼe feala la ke natou fakaʼapi ia te tehina taupau. Neʼe nā ʼio, kae neʼe tonu ke moe ia Olaf ʼi te foʼi sofa. Neʼe fai pe e Olaf te faʼahi ʼaia pea neʼe mole fakahemala. Neʼe ko he vahaʼa fakafiafia ʼosi ia kia Olaf ʼi tana fakatahi mo te tehina taupau. ʼI te uhu fuli, neʼe nā faipalalau ki he ʼu manatu fakalotomalohi ʼi tanā inu kafe. ʼI te lahi ʼo te ʼu fakalotomalohi ʼae neʼe fai age e te tehina taupau, neʼe fakatotonu ai e Olaf ke gaue temi katoa maʼa Sehova. Lolotoga te ʼu taʼu 40 ʼae kua hili, neʼe lahi te ʼu fenua neʼe gaue misionea ai ia Olaf.

8. He koʼe ʼe tonu ke tou agalelei ki ʼihi tatau aipe pe ʼe mole natou lotofakafetaʼi ʼi te kamata? Tuku mai he faʼifaʼitaki.

⁸ ʼE lahi te ʼu aluʼaga ʼe feala ke tou agalelei ai ki te kau matapule, tatau aipe pe ʼe mole natou lotofakafetaʼi ʼi te kamata. Ohage la, ko te tuagaʼane ʼe maʼuli ʼi Sepania, ʼe ina ako ia te Tohi-Tapu mo te fafine ʼe higoa ko Yesica neʼe haʼu mai te fenua ko Équateur. ʼI te tahi ʼaho ʼi tanā fai te ako, neʼe tagi ia Yesica. Pea neʼe fehuʼi age e te tuagaʼane pe kotea ʼae ʼe tagi ai. Neʼe ui age e Yesica ʼi muʼa ʼo tana haʼu ki Sepania, neʼe fakaʼofaʼofa he neʼe masiva. ʼI te tahi ʼaho, neʼe mole kei hana meʼa kai ke ina foaki ki tana kiʼi taʼahine gata pe ki he moʼi vai. Pea neʼe faikole ia Yesica ʼi tana fakamoe tana kiʼi taʼahine. Mole faʼa fualoa ki ai, pea neʼe ʼomai te ʼu Fakamoʼoni ʼa Sehova ʼe lua ʼo ʼaʼahi ia Yesica pea mo foaki age he nusipepa. Kae neʼe leakovi age ia Yesica mo ina haeʼi te nusipepa, ʼo ina ui fenei: “ ʼE kolua ʼaumai te meʼa ʼaeni ke au fafaga ʼaki taku kiʼi taʼahine?” Neʼe faiga e te ʼu tuagaʼane ke nā fakafimalieʼi tona loto kae neʼe mole loto ki ai ia Yesica. Ki muli age, neʼe ʼomai leva te ʼu tuagaʼane ʼo tuku ia he kiʼi taga meʼa kai ʼi tona muʼa matapa. ʼI te temi nei, ʼi tana ako ia te Tohi-Tapu, ʼe tagi he neʼe mahino neʼe mole ina tokagaʼi ia te tali ʼae ʼa te ʼAtua ki tana faikole. Kae kua fakatotonu malohi ia Yesica ke tauhi kia Sehova. ʼE  mahino ia, neʼe ʼi ai te ʼu fua lelei ʼo te manavaʼofa ʼae ʼo te ʼu tuagaʼane ʼe toko lua.—Ekelesiasi 11:1, 6.

9, 10. (1) Kotea la ia te ʼu gaue neʼe feala ke lagolago ki ai te kau Iselaele ʼaki te lotolelei? (2) Kotea la ia te ʼu gaue ʼe feala ke lagolago ki ai ia te ʼu tehina ʼi te kokelekasio ia ʼaho nei?

⁹ ʼI te temi muʼa, neʼe lahi te ʼu gaue neʼe feala ke lagolago ki ai ia te kau Iselaele ʼaki te lotolelei. (Ekesote 36:2; 1 Koloniko 29:5; Neemia 11:2) ʼO toe feia pe ia ʼaho nei, ʼe lahi ia te ʼu gaue ʼe feala ke tou foaki ai totatou temi, ʼotatou koloa, pea mo ʼotatou fealagia ke tou tokoni ai ki ʼotatou tehina mo tuagaʼane. Pea ka tou fai ia te faʼahi ʼaia, ʼe tou logoʼi anai he toe fiafia lahi pea ʼe tapuakinaʼi anai tatou e Sehova.

¹⁰ ʼE fakalotomalohiʼi ʼi te Folafola ʼa te ʼAtua ia te hahaʼi tagata ʼo te kokelekasio ke natou kaugā gaue mo Sehova ʼo natou liliu ai ko ni faifekau fakaminisitelio peʼe ko ni tagata ʼafeā. (1 Timoteo 3:1, 8, 9; 1 Petelo 5:2, 3) Ko natou ʼaia ʼe natou maʼumaʼua ʼi tanatou tauhi ʼae kia Sehova kae ʼe natou toe tokoni pe ki ʼihi ʼi te kokelekasio. (Gaue 6:1-4) Neʼe kua kole atu koa la e te kau tagata ʼafeā ke kotou kau ki te tali kaiga, peʼe ke kotou tokaga ki te ʼu tohi, peʼe ko te ʼu telituale, peʼe ko te taupau ʼo te fale fono, peʼe ko he tahi age gaue? Ko te ʼu tehina ʼae ʼe kau ki te ʼu gaue ʼaia, ʼe natou logoʼi ia te toe fiafia lahi.

11. Kotea ia te ʼu fua lelei neʼe maʼu e he tuagaʼane ʼi tana gaue ʼi te ʼu laga fale?

¹¹ Ko natou ʼae ʼe lotolelei ke lagolago ki te laga ʼo te ʼu fale fono, neʼe natou maʼu ʼonatou kaumeʼa foʼou. Neʼe ʼi ai te tuagaʼane ʼe higoa ko Margie neʼe gaue ki te laga ʼo te ʼu Fale Fono lolotoga taʼu ʼe 18. ʼI te ʼu gaue ʼaia, neʼe fiafia ʼi te tokoni ki ʼona kiʼi tehina ʼe kei finemui pea mo akoʼi age kia natou ia te gaue. ʼE ina ui, ʼe ko he faigamalie lelei ʼaia ke fefakalotomalohiʼaki te kau gaue. (Loma 1:12) Koia moka felaveʼi  mo he ʼu fihifihia ʼi tona maʼuli, ko ʼona kaumeʼa ʼae neʼe ina maʼu ʼi te ʼu laga fale, ʼe ʼomai ʼo fakalotomalohiʼi ia ia. Neʼe kua kotou kau koa la ki he ʼu laga fale? ʼE feala pe ke kotou kau ki he gaue laga fale tatau aipe pe ʼe mole kotou faiva ʼi he gaue.

12. Kotea te tokoni ʼae ʼe feala ke tou foaki ʼi te hili ʼo he tuʼutamaki fakanatula?

¹² ʼE toe feala foki ke tou gaue fakatahi mo Sehova ʼo tou tokoni ki ʼotatou tehina mo tuagaʼane ʼi te hili ʼo he tuʼutamaki fakanatula. Ohage la, ʼe feala ke tou foaki he falā. (Soane 13:34, 35; Gaue 11:27-30) Pe ʼe tou kau ki te fakamaʼa peʼe ko te toe gaohi ʼo te ʼu ʼapi hili he tuʼutamaki fakanatula. Ko te tuagaʼane ʼi Pologne ʼe higoa ko Gabriela, neʼe lahi tona fiafia ʼi te tokoni age ʼa te ʼu kokelekasio ʼi ʼona tafaʼaki ki te toe gaohi ʼo tona ʼapi ʼae neʼe maumauʼi e te hake ʼo te vai. Ka ina fakakaukauʼi te aluʼaga ʼaia, ʼe mole tuʼania ia ʼo ʼuhiga mo te ʼu meʼa ʼae ʼe mole kei ina maʼu, kae ʼe tokaga tafito ia ki te ʼu meʼa ʼae kua ina maʼu. ʼE ina ui fenei: “ ʼAki te aluʼaga ʼaia, ʼe au fakamoʼoni ai, ko takita kau ki te kokelekasio Fakakilisitiano, ʼe ko he toe pilivilesio fakatupu fiafia.” Tokolahi neʼe natou logoʼi te faʼahi ʼaia ʼuhi ko te tokoni ʼa te kautahi kia natou hili ʼo he tuʼutamaki fakanatula. Pea ʼe toe fiafia ʼaupito mo natou ʼae ʼe gaue fakatahi mo Sehova moʼo tokoni ki te ʼu tehina ʼaia.—Lau ia Gaue 20:35; 2 Kolonito 9:6, 7.

13. ʼE feafeaʼi hatatou fakamalohiʼi totatou ʼofa kia Sehova moka tou tokoni ki ʼihi? Tuku mai he faʼifaʼitaki.

¹³ Ko te tuagaʼane ʼe higoa ko Stephanie pea mo ʼihi kau faifakamafola ʼe natou gaue fakatahi mo te ʼAtua, ʼi tanatou tokoni ki te kau Fakamoʼoni ʼae neʼe feholaki mai tonatou fenua ki Amelika ʼuhi ko te tau. Neʼe natou tokoni ki te kau Fakamoʼoni ʼaia ke natou maʼu honatou nofoʼaga pea mo he ʼu meʼa ki ʼonatou loto fale. ʼE ina ui fenei: “Neʼe malave kia matou ia tanatou fiafia mo tanatou lotofakafetaʼi ki te ʼofa fakatautehina fakamalamanei. ʼI tanatou manatu, ko matou ʼae neʼe tokoni age, kae ʼi tona ʼuhiga moʼoni, ko natou ʼae neʼe tokoni lahi mai. ʼI tamatou sisio ʼae ki te ʼofa, te logo tahi, te tui, mo te falala kia Sehova neʼe toe malohi ai tomatou ʼofa ʼae kia Sehova, pea ʼe matou lotofakafetaʼi lahi ai kia meʼa fuli ʼe matou maʼu mai tana kautahi.”

14, 15. (1) Kotea ia te faʼahiga manatu ʼae neʼe maʼu e te polofeta ko Esaia? (2) ʼE lava faʼifaʼitakiʼi feafeaʼi e te kau Kilisitiano ia Esaia?

¹⁴ ʼE kotou fia fakalahi koa takotou gaue ʼae kia Sehova? ʼE kotou lotolelei koa ke kotou olo ʼo maʼuʼuli ʼi he koga meʼa ʼe ʼaoga ki ai he kau faifakamafola? ʼE moʼoni, ʼe mole ʼaoga ke tou olo mamaʼo ke tou fakaha ai tatatou lotofoaki. Kae ʼe ʼi ai ʼihi tehina mo tuagaʼane ʼe feala ke natou fai ia te faʼahi ʼaia. ʼE natou maʼu  ia te faʼahiga manatu ʼae neʼe maʼu e te polofeta ko Esaia. Neʼe fehuʼi fenei e Sehova: “Ko ai ka au fekaui anai, pea ko ai ka haele anai kia matou?” Pea neʼe ina tali fenei: “Koeni au, ke ke fekau au.” (Esaia 6:8) ʼE kotou lotolelei koa pea mo kotou lava tokoni koa ki te kautahi ʼa Sehova? ʼE kotou lotolelei koa ki ai? Kotea la ia te ʼu aluʼaga ʼe feala ke kotou tokoni ai?

¹⁵ Neʼe ui fenei e Sesu ʼo ʼuhiga mo te faifakamafola pea mo te fai ʼo ni tisipulo: “ ʼE lahi te taʼukai kaʼe ʼe tokosiʼi te kau gaue. Koia, kotou kole ki te Pule ʼo te taʼukai ke ina fekauʼi mai he kau gaue ki tana taʼukai.” (Mateo 9:37, 38) ʼE feala koa ke kotou pionie ʼi he koga meʼa ʼe ʼaoga ai he kau faifakamafola? Peʼe feala koa ke kotou tokoni ki he tahi ke ina fakahoko te faʼahi ʼaia? Tokolahi ʼi te ʼu tehina mo tuagaʼane neʼe natou ui ka alu he tahi ʼo gaue pionie ʼi he koga meʼa ʼe ʼaoga ki ai he kau faifakamafola, ʼe ina fakaha ai ia tona ʼofa ʼae ki te ʼAtua pea mo ʼona tatau. ʼE ʼi ai koa he tahi ʼu faʼahi ʼe kotou fia fakalahi ai takotou gaue maʼa Sehova? Kapau ʼe kotou fai feia, ʼe kotou fiafia anai.

16, 17. Kotea ʼihi aluʼaga ʼe feala ke kotou fakalahi ai takotou gaue ʼae kia Sehova?

¹⁶ ʼE kotou fia gaue koa ʼi te Petele peʼe tokoni ki te laga ʼo te ʼu fale fono? ʼE kotou fia tokoni koa ki te ʼu gaue ʼaia ʼi ni ʼaho peʼe ko ni vahaʼa peʼe ko ni mahina? ʼE ʼaoga tuʼumaʼu ki te kautahi ʼa Sehova ni hahaʼi ʼe lotolelei ke natou olo ʼo gaue ʼi he koga meʼa pe ʼe ʼaoga ki ai he kau gaue. ʼO feia mo natou ʼae ʼe natou fakahoko ia te ʼu gaue fuli ʼe kole age kia natou ke natou fai tatau aipe pe ʼe natou faiva ʼi he tahi age gaue. ʼE maʼuhiga kia Sehova ia natou ʼae ʼe lotolelei ke natou fai ni sakilifisio pea mo gaue ʼi he ʼu koga meʼa ʼe ʼaoga ki ai he kau gaue.—Pesalemo 110:3.

¹⁷ ʼE kotou loto koa ke akoʼi koutou ke feala hakotou fakalahi takotou gaue ʼae kia Sehova? ʼE lagi feala ke kotou fakaui ke kotou kau ki te Ako ʼo Te Kau Faifakamafola ʼo Te Pule’aga. ʼI te ako ʼaia, ʼe fakaako ai te ʼu tehina mo tuagaʼane ʼae kua gaue temi katoa maʼa Sehova ke feala honatou fakaʼaogaʼi lahi e te kautaki ʼa Sehova. Ko natou ʼae kau ki te ako ʼaia, ʼe tonu ke natou lotolelei ke olo ʼo gaue ʼi he koga meʼa pe ʼe fekauʼi natou ki ai. ʼE kotou fia fai koa te faʼahi ʼaia ke feala hakotou fakalahi takotou gaue ʼae kia Sehova?—1 Kolonito 9:23.

18. Kotea ia te ʼu lelei mo kapau ʼe tou gaue fakatahi mo Sehova ʼi te ʼaho fuli?

¹⁸ ʼE tou lotofoaki, mo agalelei pea mo lotomanavaʼofa koteʼuhi ʼe tou tauhi kia Sehova. ʼE tou tokagaʼi ia te hahaʼi ʼi te ʼaho fuli. Koia ʼe tou logoʼi ai ia te fiafia pea mo te tokalelei. (Kalate 5:22, 23) Tatau aipe pe ʼe kotea te ʼu aluʼaga ʼae ʼe tou tau mo ia, kae ʼe tou fiafia anai mo kapau ʼe tou haga faʼifaʼitakiʼi te lotofoaki ʼa Sehova pea mo tou liliu ko hona ʼu kaugā gaue ʼe maʼuhiga.—Taaga Lea 3:9, 10.