ALATIKE AKO 33
ʼE Haofaki Anai Ia “Natou ʼAe ʼe Fagono Atu”
“Ke ke tokaga fakalelei kia koe mo tau faiakonaki. Ke ke kataki ʼi te ʼu meʼa ʼaia, he ʼe ʼi tau fai te faʼahi ʼaia, ʼe ke haofaki anai ia koe totonu pea mo natou ʼae ʼe fagono atu.”—1 TIM. 4:16.
KATIKO 67 “Fakamafola Te Folafola”
TE ʼU MANATU FAKANOUNOU *
1. Kotea ʼae ʼe tou fakaʼamu fuli ki ai ʼo ʼuhiga mo totatou famili?
NEʼE ui fenei e te tuagaʼane ʼe higoa ko Pauline *: “ ʼI taku iloʼi te moʼoni, neʼe au fakaʼamu ke au fakatahi mo toku famili ʼi te Palatiso. Kae tafito toku ʼohoana ia Wayne pea mo tamā kiʼi tama ke matou fakatahi mo ia ʼo tauhi kia Sehova.” ʼE ʼi ai koa he tahi ʼi tou famili ʼe mole heʼeki ina ako ke ina iloʼi pea mo ʼofa kia Sehova? ʼE mahino ia, ʼe ke hage pe ko Pauline, ʼe ke loto ke tauhi tou famili mo koe kia Sehova.
2. Kotea te ʼu fehuʼi ka tou talanoa anai ki ai ʼi te alatike ʼaeni?
2 ʼE mole feala ke tou fakamalohiʼi totatou famili ke natou tali te logo lelei. Kae ʼe feala ke tou fakalotomalohiʼi ia natou ke natou fakakaukau pea mo tali te logo ʼo te Tohi-Tapu. (2 Tim. 3:14, 15) Koia, he koʼe ʼe tonu ke tou faifakamafola ki totatou famili? He koʼe ʼe tonu ke tou faigaʼi ke tou mahino ki te ʼu meʼa ʼae ʼe natou logoʼi? ʼE feafeaʼi hatatou tokoni ki totatou famili ke natou ʼoʼofa kia Sehova ohage ko tatou? Pea ʼe feala ke tokoni feafeaʼi mai te ʼu tehina mo tuagaʼane ʼo totatou kokelekasio?
HE KOʼE ʼE TONU KE TOU FAIFAKAMAFOLA KI TOTATOU FAMILI?
3. Ka tou lau ia 2 Petelo 3:9, he koʼe ʼe tonu ke tou faifakamafola ki totatou famili?
3 Kua vave pe te haga ʼa Sehova ʼo pulihi te malama agakovi ʼaeni. Kae ʼe hao pe anai ia natou ʼae ʼe “lelei ʼonatou loto ke natou maʼu te maʼuli heʼe gata.” (Gaue 13:48) ʼE mahino ia, ʼe tou fakaʼaogaʼi lahi totatou temi mo totatou malohi ke tou faifakamafola ʼi totatou kolo ki he hahaʼi ʼe mole tou iloʼi. Koia la ʼae ʼe tou toe faifakamafola ai ki totatou famili ke natou tauhi mo natou kia Sehova. Pea tahi, ko tatatou Tamai ʼofa ʼae ko Sehova, “ ʼe mole loto ia ke fakaʼauha he tahi, kaʼe ʼe loto ia ke kaku te hahaʼi fuli ki te fakahemala.”—Lau ia 2 Petelo 3:9.
4. ʼE tonu ke feafeaʼi ʼatatou palalau moka tou faifakamafola ki totatou famili?
4 Tou manatuʼi, ʼe ʼi ai te faʼahiga tala ʼo te logo ʼo te haofaki ʼe lelei pea mo tona faʼahiga tala ʼe kovi. Ohage la, ʼe feala pe ke tou palalau fakaʼeteʼete moka ʼe tou faifakamafola ki he tahi ʼe mole tou iloʼi. Kae kapau leva ʼe tou faifakamafola ki he tahi ʼo totatou famili, ʼe lagi fefeka fau ʼatatou palalau.
5. Kotea ʼae ʼe tonu ke tou manatuʼi ʼi muʼa ʼo hatatou tala te moʼoni ki totatou famili?
5 Tokolahi ia tatou ʼe fakahemala ki tatatou ʼuluaki faʼahiga faifakamafola ki totatou famili. Koteʼuhi kua tou mahino neʼe mole lelei tatatou faʼahiga palalau. Ko te apositolo ko Paulo neʼe ina tokoniʼi fenei te kau Kilisitiano: “Ke lelei tuʼumaʼu ʼakotou palalau, ʼo konakonaʼi ʼaki te masima, ke kotou iloʼi ai te faʼahiga tali ʼae ʼe tonu ke kotou fai ki he tahi.” (Kol. 4:5, 6) ʼE lelei ke tou manatuʼi te tokoni ʼaia moka ʼe tou palalau ki totatou famili. Koteʼuhi, kapau ʼe mole tou fai te faʼahi ʼaia, ʼe feala pe ke tou fakalotomamahiʼi ia natou ʼo mole natou fia fagono mai.
ʼE TOU LAVA TOKONI FEAFEAʼI KI TOTATOU FAMILI?
6-7. Tuku mai he faʼifaʼitaki ʼe ha ai ʼe maʼuhiga ke tou lotomahino ki totatou ʼohoana ʼae ʼe mole ko he Fakamoʼoni ʼa Sehova.
6 Ke ke lotomahino. Ko Pauline ʼae neʼe tou palalau ki ai ʼi muʼa atu, ʼe ina ui fenei: “ ʼI te kamata, neʼe au fia palalau tuʼumaʼu pe ʼo ʼuhiga mo te ʼAtua mo te Tohi-Tapu ki toku ʼohoana. Neʼe mole heʼeki he temi kua ma faipalalau ai ʼo ʼuhiga mo te ʼu aluʼaga ʼo te maʼuli ʼi te ʼaho fuli.” Kae ko te ʼohoana ʼo Pauline, ia Wayne, neʼe mole ina iloʼi lelei te Tohi-Tapu. Koia neʼe mole mahino ki te ʼu faʼahi ʼae neʼe palalau ki ai ia Pauline. Neʼe hage kia ia, neʼe manatu pe ia Pauline ki tana lotu. Pea
neʼe manatu ia, kua kau ia Pauline ʼi he magaʼi lotu ʼe fakamataku pea neʼe kakaʼi. Koia ʼae neʼe tuʼania ai ia Wayne ʼo ʼuhiga mo tona ʼohoana.7 Neʼe ui e Pauline, neʼe lahi te temi ʼae neʼe fakatahi ai mo ʼona tehina mo tuagaʼane. Ohage la, neʼe fakatahi mo natou ʼi ʼihi afiafi, ʼi te ʼu fakaʼosi vahaʼa, ʼi te ʼu fono, ʼi te faifakamafola mo te ʼu temi fakafiafia. ʼE toe ui fenei e Pauline: “ ʼI ʼihi ʼaho, ʼe mole he tahi moka tau mai ia Wayne ki fale, pea nofo tokotahi ai.” ʼE mahino papau ia, neʼe loto e Wayne ke fakatahi tuʼumaʼu mo tona ʼohoana pea mo tona foha. Pea tahi, neʼe mole ina iloʼi te hahaʼi ʼae neʼe fakatahi tuʼumaʼu mo naua. Neʼe hage kia ia kua maʼuhiga age ki tona ʼohoana ʼona kaumeʼa foʼou ia ia. Koia neʼe fia mavete leva ia Wayne mo Pauline. Kia koe la, neʼe tonu koa ke lotomahino feafeaʼi ia Pauline?
8. Ka tou lau ia 1 Petelo 3:1, 2, kotea ʼae ʼe malave tafito ki totatou famili?
8 Tuku he faʼifaʼitaki ʼe lelei. ʼI te agamahani, ʼe malave tafito ki totatou famili ʼatatou aga kae mole ko ʼatatou palalau. (Lau ia 1 Petelo 3:1, 2.) Ki muli age, neʼe mahino leva ia Pauline ki te faʼahi ʼaia. Neʼe ina ui, ʼe ina iloʼi neʼe ʼofa ia Wayne ia naua pea neʼe mole fia mavete mo ia. Kae ʼaki ʼana faʼahiga palalau neʼe mahino leva ʼe tonu ke ina maʼuliʼi te ʼu tokoni ʼa Sehova ʼo ʼuhiga mo te nofo ʼohoana. Neʼe maʼuhiga age ke ina tuku he faʼifaʼitaki ʼe lelei ʼi hana faifakamafola tuʼumaʼu kia ia. Koia neʼe tuku leva e Pauline tana fakakinauʼi ia Wayne ke nā faipalalau ki te Tohi-Tapu. Kae nā palalau pe leva ki te ʼu aluʼaga ʼo te maʼuli ʼo te ʼaho fuli. Neʼe tokagaʼi e Wayne kua agamalū ia Pauline mo fakaʼapaʼapa pea kua fakalogo lelei tona foha. (Taag. 31:18, 27, 28) Pea neʼe toe tokagaʼi e Wayne te ʼu fua lelei ʼo te Tohi-Tapu ʼo ʼuhiga mo tona famili. Koia neʼe ina tuku ai ke malave te Folafola ʼa te ʼAtua ki tona loto pea mo tona ʼatamai.—1 Ko. 7:12-14, 16.
9. He koʼe ʼe tonu ke hoko atu tatatou tokoni ki totatou famili?
Sel. 44:4, MN) Neʼe ui e Paulo kia Timoteo ke kataki ʼi ʼana faiga moʼo tokoni ki ʼihi. Kotea tona tupuʼaga? Koteʼuhi ʼi tana fai te faʼahi ʼaia, ʼe ina haofaki anai ia ia totonu pea mo natou ʼae fagono kia ia. (1 Tim. 4:16) ʼE tou ʼoʼofa ʼi totatou famili pea ʼe tou loto ke natou iloʼi te ʼu moʼoni ʼo te Folafola ʼa te ʼAtua. Ko te ʼu gaue mo te ʼu palalau ʼae neʼe fai e Pauline, neʼe fua lelei ki tona kiʼi famili. ʼI te temi nei, kua fiafia ʼi te tauhi fakatahi mo tona ʼohoana kia Sehova. Pea kua nā pionie toko lua pea ko Wayne kua tagata ʼafeā.
9 Ke hoko atu tau tokoni ki tou famili. ʼE fakaha mai e Sehova he faʼifaʼitaki. ʼE ina foaki “liuliuga” ki te hahaʼi te fealagia ʼae ke natou tali te logo lelei pea ke natou maʼu ai te maʼuli heʼe gata. (10. He koʼe ʼe tonu ke tou kataki fualoa?
10 Ke ke kataki fualoa. ʼI te temi nei, kua tou mulimuli ki te ʼu pelesepeto ʼa te ʼAtua ʼi totatou maʼuli. Kae ʼe lagi ʼe faigataʼa ki totatou famili hanatou tali lelei te tauhi foʼou ʼae ʼe tou tui ki ai pea mo te ʼu fetogi ʼae kua tou fai ʼi totatou maʼuli. ʼI te agamahani, ko te ʼuluaki meʼa pe ʼe natou fakatokagaʼi ko tatatou mole kei kau ki te ʼu ʼaho lalahi fakalotu mo natou. Peʼe ko tatatou mole kei kau ki te ʼu gaue fakapolitike. ʼI te kamata, ko ʼihi ia natou ʼe natou iita mai kia tatou. (Mat. 10:35, 36) Kae ʼaua tatatou manatu ʼae, ʼe mole natou fetogi anai ʼi he ʼaho. Kapau ʼe mole kei tou fia tokoni ke natou mahino ki tatatou tui, ʼe hage pe ia ʼe tou fakamauʼi ia natou ʼo tou ui ʼe mole natou tuha ke natou maʼu te maʼuli heʼe gata. Neʼe mole foaki mai e Sehova te fealagia ʼae ke tou fakamauʼi te hahaʼi. Kae neʼe ina tuku katoa te fakamau kia Sesu. (Soa. 5:22) Kapau ʼe tou kataki fualoa, ʼe feala pe ʼi he ʼaho ki totatou famili ke natou tali mo fagono ki te logo lelei.—Vakaʼi te fakamatala ʼae ʼi te ʼa takai “ Fakaʼaogaʼi Tatatou Tuʼasila ʼi Te Neti Moʼo Akoʼi ʼo Niʼihi.”
11-13. Kotea te ako ʼe ke taʼofi mai te faʼifaʼitaki ʼae neʼe tuku e Alice ki ʼana matuʼā?
11 Ke ke agalelei kae ʼaua naʼa ke tuku ke fetogi ʼau tonu e tou famili. (Taag. 15:2) Tou vakaʼi te faʼifaʼitaki ʼo Alice. Neʼe ina ako ke ina iloʼi ia Sehova pea neʼe nofo mamaʼo ʼi ʼana matuʼā. Neʼe mole tui ʼana matuʼā ki te ʼAtua kae neʼe nā faipolitike. Koia neʼe mahino ia Alice ʼe tonu ke palalau fakavilivili ki ʼana matuʼā ʼo ʼuhiga mo te ʼu meʼa ʼae neʼe ina ako ʼi te Tohi-Tapu. ʼE ina fakamahino fenei: “Kapau ʼe mole tou fakaha fakavilivili ki totatou famili kua fetogi tatatou tui mo totatou faʼahiga maʼuli, ʼe natou punamaʼuli lahi anai.” Neʼe ina kole ʼi te ʼu tohi ʼae neʼe ina fai ki ʼana matuʼā pe ʼe kotea tanā manatu ʼo ʼuhiga mo te ʼu akonaki ʼo te Tohi-Tapu. Pea neʼe ina filifili he ʼu manatu ʼe feala ke nā leleiʼia ohage la ko te ʼofa. (1 Ko. 13:1-13) Pea tahi, neʼe fakamalō ia Alice ki ʼana matuʼā ʼi tanā pusiaki pea mo tokaga lelei kia ia. Pea neʼe ina momoli te ʼu meʼa ʼofa kia naua. ʼI te ʼu temi ʼae neʼe alu ai ʼo fakasiosio ʼana matuʼā, neʼe faiga malohi ʼo tokoni ki tana faʼe ki te fakamaʼa ʼo te ʼapi. ʼI te kamata, ʼi tana fakaha ki ʼana matuʼā te ʼu akonaki foʼou ʼae kua tui ki ai, neʼe nā iita ai.
12 ʼI tana nofo ʼi ʼana matuʼā, neʼe hoko atu pe e Alice tana lau te Tohi-Tapu ʼi te ʼaho fuli. ʼE ina fakamatala fenei: “Neʼe tokoni te faʼahi ʼaia ki taku faʼe ke mahino ai, ʼe maʼuhiga kia au te Tohi-Tapu.” Neʼe fakatotonu leva e te tamai ʼa Alice ke ina ako te Tohi-Tapu ke mahino pe koʼe neʼe fetogi te faʼahiga manatu ʼo tona ʼofafine. Pea neʼe toe fakatuʼutuʼu ke ina maʼu he ʼu hala ʼi te Tohi-Tapu. Neʼe toe ui fenei e Alice: “Neʼe au foaki age tana Tohi-Tapu ʼe tuʼu ai te kiʼi tohi neʼe au fai maʼa ia.” Kotea tona fua? Neʼe mole maʼu e taku tamai he ʼu hala, kae neʼe malave ʼaupito kia ia te ʼu faʼahi ʼae neʼe ina lau ʼi te Folafola ʼa te ʼAtua.
13 ʼE tatau aipe pe ʼe faigataʼa, kae ʼe ʼaoga ke tou agalelei pea ʼaua tatatou tuku ke fetogi ʼatatou tonu e totatou famili. (1 Ko. 4:12) Ohage la ko Alice, neʼe ina ʼutakiʼi te fakafeagai ʼo tana faʼe. ʼI tana papitema, neʼe ui age e tana faʼe ko ia ʼe ko he “taʼahine agakovi.” Kotea ʼae neʼe fai e Alice? Neʼe ina ui fenei: “Neʼe mole au tuku noaʼi te aluʼaga ʼaia. Kae neʼe au fakamahino ʼaki he fakaʼapaʼapa kua au fakatotonu ke au liliu ko he Fakamoʼoni ʼa Sehova. Pea ʼe mole au fetogi anai te tonu ʼaia. Neʼe au faigaʼi ke au fakalotofimalieʼi taku faʼe ʼo au ui age ʼe au ʼofa mamahi ia ia. Pea neʼe ma faifetagihi leva ʼo au teuteuʼi ai he kiʼi meʼa kai lelei. ʼI te temi leva ʼaia, neʼe mahino ai taku faʼe ko te Tohi-Tapu neʼe ʼi ai ʼona fua lelei ki toku maʼuli.”
14. He koʼe ʼe mole tonu ke tou tuku ʼi he temi ke fetogi ʼatatou tonu e totatou famili?
14 ʼE mahino papau ia, ʼe lagi ʼaoga ki totatou famili he temi ke natou mahino ʼe maʼuhiga kia tatou tatatou tauhi ʼae kia Sehova. Ohage la, neʼe mole muliʼi e Alice te loto ʼo ʼana matuʼā ʼae ke ina maʼu he gaue ʼe lelei. Kae neʼe ina fakatotonu ke liliu ko he pionie. Koia neʼe toe tagi ai tana faʼe. Kae neʼe lotomalohi ia Alice. Neʼe ina fakamahino fenei: “Kapau ʼe ke fakagafua ki tou famili ke natou fetogi tau tonu ʼi he aluʼaga pe, ʼe mahino ia ʼe natou faigaʼi anai ke natou fetogi tuʼumaʼu ʼau tonu. Kae kapau ʼe ke agalelei mo lotomalohi, ʼe lagi fakalogo atu anai ʼihi ʼi tou famili.” Ko te aluʼaga ʼaia neʼe hoko kia Alice. Ia ʼaho nei, kua pionie ʼana matuʼā pea kua tagata ʼafeā tana tamai.
TE ʼU TOKONI ʼAE ʼE FEALA KE FOAKI E TE KOKELEKASIO KATOA
15. Ka tou lau ia Mateo 5:14-16 pea mo 1 Petelo 2:12, ʼe tokoni feafeaʼi te ʼu “gaue lelei” ʼo ʼotatou tehina mo tuagaʼane ki totatou famili?
15 ʼE fakaʼaogaʼi e Sehova te ʼu “gaue lelei” ʼo ʼana kaugana ke ina taki mai te hahaʼi kia te ia. (Lau ia Mateo 5:14-16; 1 Petelo 2:12.) Neʼe kua felaveʼi koa tou ʼohoana ʼae ʼe mole ko he Fakamoʼoni ʼa Sehova mo he tahi ʼo tou kokelekasio? Ohage la, ko Pauline ʼae neʼe tou palalau ki ai ʼi te kamata, neʼe ina fakaafe he ʼu tehina mo tuagaʼane ki tona ʼapi ke natou feiloʼiʼaki mo tona ʼohoana, ia Wayne. Neʼe manatuʼi leva e Wayne pe neʼe tokoni feafeaʼi te tehina kia ia ke mahino pe ʼe ko ai te Kau Fakamoʼoni ʼa Sehova. Neʼe ina ui fenei: “Neʼe toʼo e te tehina tona ʼaho malolo ke ma sioʼi te faigaoʼi ʼi te televisio. Pea neʼe au ui maʼa ʼaku, ‘ ʼE hage pe ko te tagata fuli.’ ”
16. He koʼe ʼe tonu ke tou fakaafe totatou famili ki te ʼu fono?
16 Ka tou fakaafe totatou famili ki ʼatatou fono, ʼe ko he tokoni lelei ʼaia kia natou. (1 Ko. 14:24, 25) Ko te ʼuluaki fono ʼae neʼe kau ai ia Wayne, neʼe ko te ʼAho Fakamanatu. Neʼe ina tali te fakaafe koteʼuhi neʼe to tonu mo tana ʼosi gaue pea neʼe mole loaloaga te fono. ʼE ina manatuʼi fenei: “Neʼe mole au mahino ki te akonaki fuli, kae ʼe au manatuʼi te aga ʼa te hahaʼi. Neʼe natou ʼomai kia au, mo fakatalitali leleiʼi au pea mo fakaʼalofa mai. Neʼe au iloʼi ai, ʼe natou fakamalotoloto.” Neʼe ʼi ai te taumatuʼa neʼe agalelei kia Pauline pea neʼe nā tokakaga ki tana kiʼi tama ʼi te ʼu fono pea mo te faifakamafola. Koia neʼe kole ai leva e Wayne ki te tehina ke ina fai hana ako Tohi-Tapu, koteʼuhi neʼe fia mahino lelei ki te ʼu akonaki foʼou ʼae kua tui ki ai tona ʼohoana.
17. He koʼe ʼe mole tonu ke tou tukugakoviʼi ia tatou? Kae he koʼe ʼe mole tonu ke tou manatu ʼe mole fetogi anai ʼi he ʼaho totatou famili?
17 ʼE tou fakaʼamu ke ʼi ai he ʼaho, ʼe tou tauhi fakatahi ai mo totatou famili kia Sehova. Kae logo la ʼatatou faiga malohi ke natou liliu ko he ʼu kaugana ʼa te ʼAtua, kae ʼe mole pe natou tali te moʼoni. Kapau koia, ʼe mole tonu ke tou tukugakoviʼi ia tatou ʼo ʼuhiga mo tanatou tonu ʼaia. Pea tahi, ʼe mole tonu ke tou fakamalohiʼi he tahi ke ina tali te ʼu akonaki Fakatohi-tapu. Kae kapau ʼe fakatokagaʼi e tou famili ʼe ke fiafia ʼi tau tauhi kia Sehova, ʼe feala pe ke malave kia natou. Koia, faikole maʼa natou, mo agalelei pea mo ke tokoni kia natou. (Gaue 20:20) ʼE feala ke ke tui papau, ʼe tapuakina anai e Sehova ʼau faiga. Pea kapau ʼe filifili e tou famili ke natou fagono atu, ʼe haofaki anai ia natou.
KATIKO 57 Tou Fakamafola Ki Te Faʼahiga Hahaʼi Fuape
^ pal. 5 ʼE tou loto ke ako e totatou famili ke natou iloʼi ia Sehova. Kae ʼe tonu ke natou filifili pe ʼe natou tauhi anai kia Sehova peʼe kailoa. ʼE tou vakaʼi anai ʼi te alatike ʼaeni pe ʼe kotea ʼae ʼe feala ke tou fai ke faigafua ai ki totatou famili hanatou fagono mai.
^ pal. 1 Ko ʼihi higoa neʼe fetogi.
^ pal. 53 FAKAMATALA ʼO TE ʼU PĀKI (vakaʼi te fakamatala ʼae ʼi te ʼa takai): Ko he tehina tupulaga ʼe tokoni ki tana tamai ʼae ʼe mole ko he Fakamoʼoni ʼa Sehova ki te faʼu ʼo tana motoka. ʼE ina maʼu he faigamalie ke ina fakaha ki tana tamai he kiʼi ʼata viteo ʼi te jw.org.
^ pal. 55 FAKAMATALA ʼO TE ʼU PĀKI: ʼE fagono lelei he tuagaʼane ki tona ʼohoana ʼae ʼe mole ko he Fakamoʼoni ʼa Sehova. ʼE ina fakamatala te ʼu gaue ʼae neʼe ina fai ʼi te ʼaho katoa. Ki muli age, ʼe fakafiafia mo tona kiʼi famili.
^ pal. 57 FAKAMATALA ʼO TE ʼU PĀKI: Neʼe fakaafe e te tuagaʼane te ʼu tehina mo tuagaʼane ʼo tona kokelekasio ki tona ʼapi. Pea ʼe natou faigaʼi fakamalotoloto ke natou feiloʼiʼaki mo tona ʼohoana. Ki muli age, neʼe nā kau taumatuʼa ki te ʼAho Fakamanatu.