ALATIKE AKO 31
“ ʼE Mole Tou Tuku Anai”
“Koia ʼe mole tou tuku anai.”—2 KO. 4:16.
KATIKO 128 Kotou Faʼa Kataki ʼo Kaku Ki Te Fakaʼosi
TE ʼU MANATU FAKANOUNOU *
1. Kotea ʼae ʼe tonu ke fai e te kau Kilisitiano ke natou haga lele ki te fakaʼosi?
ʼE KAU te kau Kilisitiano ʼi te lele ki te maʼuli. ʼE tatau aipe pe neʼe hoki tou kau ki te lele peʼe kua fualoa, kae ʼe tonu ke tou haga lele ki te fakaʼosi. Neʼe foaki e te apositolo ko Paulo he ʼu tokoni ki te kau Kilisitiano ʼo Filipe, pea ʼe fakalotomalohiʼi ai anai tatou ke tou lele ki te fakaʼosi. Ko ʼihi ʼi te kokelekasio ʼo Filipe, neʼe kua natou tauhi kia Sehova lolotoga ni taʼu ʼi te temi ʼae neʼe natou maʼu ai te tohi ʼa Paulo. Pea neʼe kua natou tauhi agatonu pe kia Sehova, kae neʼe fakamanatuʼi age e Paulo te maʼuhiga ʼae ke hoko atu tanatou lele ʼaki he faʼa kataki. Neʼe ina loto ke hoko atu tanatou muliʼi tona faʼifaʼitaki, ko tona fakaʼuhiga ke natou haga ‘lele ʼaki te fakatuʼutuʼu ʼae ke natou maʼu te fakapale.’—Flp. 3:14.
2. He koʼe neʼe foaki e Paulo he ʼu tokoni ki te kau Filipe ʼi tona temi totonu?
2 Neʼe ʼaoga ʼaupito te ʼu tokoni ʼa Paulo ki te kau Filipe koteʼuhi neʼe gaohi koviʼi natou, talu mai te fakatuʼu ʼo te kokelekasio. Pea neʼe hoko leva he aluʼaga makehe ʼi te tau atu ʼa Paulo mo Silasi ki te kolo ʼo Filipe ʼi te taʼu 50 ʼo totatou temi. Neʼe ʼi ai te meʼa neʼe ha kia Paulo, pea ʼi te meʼa ʼaia neʼe fakaafe ai ia naua ke nā ‘fakalaka ki Masetonia.’ (Gaue 16:9) ʼI ai, neʼe nā felaveʼi mo te fafine ʼe higoa ko Litia. “Neʼe fakalogo pea neʼe avahi e Sehova tona loto” ki te logo lelei. (Gaue 16:14) Neʼe mole fualoa ki ai, neʼe papitema leva ia Litia mo tona kiʼi famili. Kae neʼe fakahoko leva e te Tevolo he ʼu fihifihia kia natou. Ko te hahaʼi tagata ʼo te kolo neʼe natou toho ia Paulo mo Silasi ki te kau pule kolo. Neʼe natou tukugakoviʼi hala ia naua ʼo natou ui ʼe nā fakatupu he ʼu maveuveu. Koia neʼe natou ta ia Paulo mo Silasi, mo pilisoniʼi, pea ki muli age leva neʼe natou fakatotonu ke nā mavae ʼi te kolo. (Gaue 16:16-40) Neʼe nā lotovaivai ai koa? Kailoa ia. Pea ʼe feafeaʼi ki te ʼu tehina mo tuagaʼane ʼo te kokelekasio foʼou? Neʼe natou katakiʼi pe la mo natou he ʼu mamahi. ʼE mahino papau ia, neʼe fakalotomalohiʼi natou e te faʼifaʼitaki ʼae neʼe tuku e Paulo mo Silasi.
3. Kotea ʼae neʼe mahino ki ai te apositolo ko Paulo? Pea ko te ʼu fehuʼi fea ʼae ka tou vakaʼi?
3 Neʼe fakatotonu e Paulo ke mole ina liʼaki tana lele. (2 Ko. 4:16) Neʼe mahino kia ia ʼe tonu ke tokaga tafito ki tana fakatuʼutuʼu, ke feala ai hana tauhi agatonu kia Sehova ʼo kaku ki tana mate. Kotea ʼae ʼe tou ako mai te faʼifaʼitaki ʼo Paulo? Kotea te ʼu faʼifaʼitaki ʼo te ʼu kaugana agatonu ʼo te temi nei ʼe ha ai ʼe tou lava katakiʼi te ʼu faigataʼaʼia? Pea ʼe fakamalohiʼi feafeaʼi tatou e tatatou ʼamanaki ke ʼaua naʼa tou tuku tatatou lele?
TE ʼU FUA LELEI ʼO TE FAʼIFAʼITAKI ʼO TE APOSITOLO KO PAULO
4. Neʼe maʼumaʼua feafeaʼi ia Paulo ki te tauhi kia Sehova, logo la ʼona faigataʼaʼia?
4 Kotou fakakaukauʼi age muʼa te ʼu gaue neʼe lolotoga fai e Paulo ʼi te temi ʼae neʼe faitohi ai ki te kau Filipe. Neʼe mole feala hana faifakamafola ʼi te kolo, koteʼuhi neʼe pilisoni ʼi he ʼapi ʼi Loma. Logo la te aluʼaga ʼaia, kae neʼe maʼumaʼua ʼi te faifakamafola kia natou ʼae neʼe ʼomai ʼo ʼaʼahi ia ia. Pea neʼe ina fai mo te ʼu tohi ki te ʼu kokelekasio ʼae ʼe tuʼu mamaʼo. ʼO toe feia pe ia ʼaho nei, tokolahi te kau Kilisitiano ʼe mole feala hanatou olo ʼo faifakamafola ʼi te ʼu ʼapi. Kae ʼe natou faiga malohi ke natou faifakamafola kia natou ʼae ʼe ʼomai ʼo ʼaʼahi natou. ʼE natou toe fai he ʼu tohi fakalotomalohi kia natou ʼae ʼe mole feala hanatou felaveʼi.
5. Ka tou lau ia Filipe 3:12-14, kotea ʼae neʼe tokoni kia Paulo ke tokaga tuʼumaʼu ki tana fakatuʼutuʼu?
5 Neʼe mole tuku e Paulo ke fakaleluʼi ia ia e te ʼu gaue peʼe ko te ʼu hala ʼae neʼe ina fai ʼi muʼa atu. Neʼe ui e Paulo, ʼe maʼuhiga ke ‘galoʼi te ʼu meʼa ʼae ʼi muli, kae ke haga ki te ʼu meʼa ʼae ʼi muʼa,’ ko tona fakaʼuhiga ke fakaʼosi lelei tana lele. (Lau ia Filipe 3:12-14.) Kotea ʼihi faʼahiga meʼa neʼe feala ke fakaleluʼi ai ia Paulo? ʼUluaki, ʼi muʼa ʼo tana liliu ʼae ko he Kilisitiano, neʼe maʼu tuʼulaga ʼi te lotu Sutea. Kae kia ia, neʼe hage te ʼu meʼa ʼaia, ʼe “ko he ʼu ʼotaʼota.” (Flp. 3:3-8) Lua, logo la neʼe lotomamahi ʼuhi ko tana fakatagaʼi te kau Kilisitiano, kae neʼe mole ina tuku ke taʼofi e te faʼahi ʼaia ia tana tauhi kia Sehova. Pea tolu leva, ʼi tana manatu neʼe mole heʼeki feʼauga tana gaue ʼae maʼa Sehova. ʼE ha mai ai, neʼe fua lelei te gaue faifakamafola ʼa Paulo logo la neʼe pilisoniʼi, mo ta, mo tuki makaʼi, mo tuʼutamakiʼia ʼi te ʼu vaka ʼae neʼe faifolau ai, pea neʼe hala mo meʼa kai pea mo meʼa laofi. (2 Ko. 11:23-27) ʼE tatau aipe pe ʼe kotea ʼae neʼe kua ina fakahoko pea mo te ʼu aluʼaga ʼae neʼe tau mo ia, kae neʼe mahino ia Paulo neʼe tonu ke hoko atu tana tauhi kia Sehova. Pea ʼe tonu ke tou faʼifaʼitakiʼi ia ia.
6. Kotea “te ʼu meʼa ʼae ʼi muli” ʼe lagi tonu ke tou galoʼi?
6 ʼE feafeaʼi hatatou “galoʼi te ʼu meʼa ʼae ʼi muli” ohage ko Paulo? Ko ʼihi ia tatou ʼe lagi ʼaoga ke tou tauʼi totatou lotomamahi ʼuhi ko ʼatatou agahala ʼae neʼe tou fai ʼi muʼa atu. Kapau koia, ʼe lelei ke tou fai hatatou ako takitokotahi ʼo ʼuhiga mo te totogi ʼae neʼe foaki e Kilisito. Kapau ʼe tou ako, mo tou metitasio pea mo tou faikole ki te manatu fakalotomalohi ʼaia, ʼe tokoni lahi mai anai ke tou maʼu he fakalotofimalie. Pea ʼe feala ai ke tuku tatatou tukugakoviʼi pe ia tatou ʼuhi ko ʼatatou agahala ʼae kua ʼosi fakamolemole e Sehova. Tou vakaʼi te tahi ako mai te faʼifaʼitaki ʼa Paulo. Ko ʼihi neʼe lagi natou tuku he gaue neʼe lelei ai tonatou totogi ke feala hanatou gaue lahi maʼa Sehova. Koia, ʼe feala koa ke tou galoʼi te ʼu meʼa ʼae neʼe tou fai ki muʼa atu ʼo mole tou holi ki he ʼu meʼa neʼe feala ke tou maʼu? (Num. 11:4-6; Ekl. 7:10) Ko “te ʼu meʼa ʼae ʼi muli,” ʼe feala pe ke kau ki ai he ʼu gaue neʼe tou fai maʼa Sehova peʼe ko he ʼu ʼahiʼahi neʼe tou katakiʼi ʼi muʼa atu. ʼE mahino ia, ʼe tou fakaovi anai ki tatatou Tamai, moka tou fakakaukauʼi te faʼahiga tokoni ʼae ʼa Sehova kia tatou ʼi muʼa atu ʼo kaku mai ki te temi nei. Kae ʼaua naʼa tou manatu kua feʼauga tatatou gaue kia Sehova.—1 Ko. 15:58.
7. Ka tou lau ia 1 Kolonito 9:24-27, kotea ʼae ʼe ʼaoga ke tou malo ai ʼi te lele ki te maʼuli? Tuku mai he faʼifaʼitaki.
7 Neʼe mahino lelei ia Paulo ki te ʼu palalau ʼaeni ʼa Sesu: “Ke kotou faiga malohi.” (Luka 13:23, 24) Neʼe iloʼi e Paulo neʼe tonu ke ina fai he ʼu faiga ʼi tona maʼuli katoa ohage ko Kilisito. Koia neʼe ina fakatatau ai te maʼuli Fakakilisitiano ki he lele. (Lau ia 1 Kolonito 9:24-27.) Ko he tahi ʼe kau ki he lele, ʼe tokaga tafito ke kaku ki te laini fakaʼosi kae ʼe mole toe tokaga ia ki he tahi age meʼa. Ohage la, ʼe feala pe ke fai te lele ʼi he ala ʼe tuʼu ai he ʼu fale koloa peʼe ko ʼihi atu meʼa ʼe feala ke fakaleluʼi ai te kau lele. ʼI takotou manatu, ʼe tuʼu anai koa he tagata lele ʼo sioʼi he ʼu meʼa ʼe fakahaha ʼi he fale koloa? Kailoa ia, ʼe mole ina fai anai te faʼahi ʼaia koteʼuhi he ʼe fia malo. ʼO toe feia pe, ka tou kau ʼi te lele ki te maʼuli, ʼe tonu ke tou tekeʼi te ʼu meʼa ʼae ʼe feala ke fakaleluʼi ai tatou. Pea kapau ʼe tou tokakaga tafito ki tatatou fakatuʼutuʼu, mo tou tauhi ʼaki he faʼafai kia Sehova ohage ko Paulo, ʼe tou maʼu anai te fakapale.
TOU HAGA TAUHI KIA SEHOVA LOGO LA TE ʼU FAIGATAʼAʼIA
8. Kotea te ʼu faigataʼaʼia ʼe tolu ʼae ka tou vakaʼi anai?
8 Tou vakaʼi ʼi te temi nei te ʼu faigataʼaʼia ʼe tolu ʼe feala ke tou lotovaivai ai. ʼUluaki, ko he ʼu aluʼaga ʼe mole hoko ohage ko tatatou fakaʼamu ki ai. Lua, ko te hifo ʼo te sinoʼi tagata. Pea tolu leva, ko he ʼu faigataʼaʼia ʼe tou katakiʼi lolotoga he temi loaloaga. ʼE feala ke fua lelei kia tatou tatatou ako te faʼahiga katakiʼi e ʼihi tehina mo tuagaʼane te ʼu aluʼaga ʼaia.—Flp. 3:17.
9. ʼE malave feafeaʼi kia tatou moka ʼe mole hoko he ʼu aluʼaga neʼe tou fakaʼamu ki ai?
9 Ka mole hoko te ʼu aluʼaga ʼae ʼe tou fakaʼamu ki ai. ʼE tou atalitali mo he fakaʼamu lahi ki te ʼu meʼa lelei fuli ʼae neʼe fakapapauʼi mai e Sehova. Ko te polofeta ʼa Sehova ʼae ko Hapakuke, neʼe fakaʼamu lahi ke fakagata la e Sehova ia te ʼu agakovi ʼae neʼe hoko ʼi Suta. Kae neʼe ui fenei e Sehova kia ia: “Haga atalitali ki ai.” (Hap. 2:3, MN) ʼE moʼoni, ka mole hoko te ʼu aluʼaga ʼae ʼe tou fakaʼamu ki ai ʼe feala ke puli ai tatatou faʼafai. Pea ʼe toe feala ai foki ke tou lotovaivai ai. (Taag. 13:12) Neʼe hoko te aluʼaga ʼaia ki ʼihi tehina mo tuagaʼane ʼi te teitei taʼu 1914. ʼI te temi ʼaia, tokolahi te ʼu Kilisitiano fakanofo neʼe atalitali ke natou hake ki te lagi ʼi te taʼu 1914. Kae kotea ʼae neʼe fai e te ʼu kaugana agatonu ʼi te mole hoko ʼo te aluʼaga ʼaia?
10. Kotea ʼae neʼe fai e te taumatuʼa ʼi te mole hoko ʼo te ʼu aluʼaga ʼae neʼe nā fakaʼamu ki ai?
10 Tou vakaʼi te faʼifaʼitaki ʼo te ʼu tehina agatonu ʼe toko lua neʼe nā tau mo he faigataʼaʼia feia. Ko te tehina ko Royal Spatz neʼe papitema ʼi te 1908 ʼi tona taʼu 20. Neʼe tui papau kua vave hake pe ki te lagi. Koia, ʼi te 1911, ʼi tana fakaui ʼae ki te tuagaʼane ʼe higoa ko Pearl ke nā ʼohoana, neʼe ina ui fenei: “ ʼE ke iloʼi te aluʼaga ʼae ka hoko ʼi te 1914. Kapau ʼe tonu ke ta ʼohoana, pea ʼaua naʼa ta toe fakatuatuai.” Neʼe tuku koa e te taumatuʼa Kilisitiano ʼaia tanā lele ki te maʼuli ʼi te temi ʼae neʼe mole nā hake ai ki te lagi ʼi te 1914? Kailoa ia, koteʼuhi neʼe nā tokakaga tafito ke nā tauhi agatonu kia Sehova. Kae neʼe mole nā manatu ʼateaina pe ki tonā fakapale. Neʼe nā fakatotonu ke nā lele ʼi te lele ki te maʼuli ʼaki he faʼa kataki. Koia, ko Royal mo Pearl neʼe nonofo agatonu pea mo nā maʼumaʼua ʼi te tauhi kia Sehova ʼo kaku ki tanā mamate ʼi he ʼu taʼu ki muli age. ʼE mahino ia, kua kotou fia sisio ki te ʼaho ʼae ka fakalakatonuʼi ai e Sehova tona huafa, mo tana pule faʼitaliha pea mo ina fakahoko ʼana fakapapau fuli. ʼE feala ke kotou tui papau, ʼe fakahoko anai e Sehova te ʼu aluʼaga ʼaia ʼi te temi ʼae kua ina filifili. Pea ʼi tatatou atalitali ʼaia, tou faigaʼi ke tou maʼumaʼua ʼi te tauhi ki te ʼAtua. Kae ʼaua naʼa tou lotovaivai moka ʼe mole hoko he ʼu aluʼaga neʼe tou fakaʼamu ki ai.
11-12. He koʼe ʼe feala ke hoko atu tatatou tauhi kia Sehova logo la te kua hifo ʼo totatou sinoʼi tagata? Tuku mai he faʼifaʼitaki.
11 Te hifo ʼo te sinoʼi tagata. ʼE moʼoni, ʼe ʼaoga ki he tagata lele he malohi feʼauga pea hoki lava kau ki te lele. Kae ʼe mole ʼaoga ke kotou maʼu he malohi feia ke feala hakotou tui mo tauhi kia Sehova. Kotea tona tupuʼaga? Koteʼuhi, tokolahi ʼe natou fia foaki tuʼumaʼu ʼonatou fealagia fuli kia Sehova logo la te kua hifo ʼo tonatou sinoʼi tagata. (2 Ko. 4:16) Ohage la, ʼi tona taʼu 88 ko te tehina ko Arthur Secord, * neʼe kua gaue ia taʼu ʼe 55 ʼi te Petele. ʼI te temi nei, kua vaivai matuʼa pea kua mahamahaki. ʼI te tahi ʼaho, neʼe tokaga te afilimie kia ia pea neʼe ina ui fenei age: “Tehina ko Secord, neʼe lahi ʼaupito ʼau gaue ʼae maʼa Sehova.” Kae neʼe mole tokaga tafito ia Arthur ki ʼana gaue. Koia neʼe malimali pea mo ina tali fenei ki ai: “ ʼEi, ʼe moʼoni. Kae ʼe mole ko te ʼu gaue ʼae neʼe tou fai ʼe maʼuhiga. Koteʼuhi ʼe maʼuhiga age ke tou nonofo agatonu ʼi te temi nei.”
12 Neʼe lagi kua kotou tauhi kia Sehova lolotoga ni taʼu. Kae ʼi te temi nei, ʼe mole kei feala hakotou gaue ohage ko te temi muʼa he ʼe kua kotou mahamahaki. Kapau koia, ʼaua naʼa kotou lotovaivai. ʼE feala ke kotou tui papau, ʼe maʼuhiga kia Sehova te ʼu gaue ʼae neʼe kotou fakahoko Hep. 6:10) Kotou manatuʼi ʼe mole tou fakaha totatou ʼofa ʼae kia Sehova moka hoki tou fai pe he ʼu tuʼuga gaue maʼa te ia. Kailoa ia. ʼE tou fakaha ʼe tou ʼoʼofa ia Sehova mo kapau ʼe tou maʼu he manatu ʼe lelei pea mo tou fai ia meʼa fuli ʼaki totatou loto katoa. (Kol. 3:23) ʼE mahino ia Sehova ki ʼotatou tuʼakoi pea ʼe fiafia ia moka ʼe tou foaki age te ʼu meʼa fuli ʼae ʼe tou lavaʼi.—Mko. 12:43, 44.
agatonu ki muʼa atu. (13. Kotea ʼae neʼe hoko kia Anatoly mo Lidiya? Pea ʼe tokoni feafeaʼi mai tanā faʼifaʼitaki ke tou hoko atu tatatou tauhi logo la te ʼu ʼahiʼahi?
13 He ʼu faigataʼaʼia ʼe tou katakiʼi lolotoga he temi loaloaga. Lolotoga ni taʼu, ko ʼihi kaugana ʼa Sehova neʼe natou katakiʼi he ʼu faigataʼaʼia pea neʼe fakatagaʼi natou. Ohage la, ko Anatoly Melnik * neʼe kei taʼu 12 ʼi te temi ʼae neʼe puke ai tana tamai. Neʼe pilisoniʼi pea neʼe ʼave ki Sibérie, ia kilometa ʼe 7 000 mai te fenua ko Moldavie ʼae ʼe nofo ai tona famili. Neʼe mole gata ai, he ʼe hili ki ai he taʼu katoa, ko Anatoly mo tana faʼe pea mo te ʼu matuʼā ʼo tana faʼe neʼe toe ʼave mo natou ki Sibérie. Ki muli age, neʼe feala ke natou kau ki te ʼu fono neʼe fai ʼi te tahi kolo. Kae neʼe tonu ke natou haʼele ia kilometa ʼe 30 ʼi te nive pea neʼe kovi ʼosi te momoko. Hili ia, ko te tehina ko Melnik neʼe pilisoni taʼu ʼe tolu, ʼo mamaʼo ai mai tona ʼohoana ko Lidiya pea mo tona ʼofafine. Kae neʼe kei taʼu katoa pe tona kiʼi ʼofafine ʼi te temi ʼae neʼe pilisoniʼi ai. Logo la te ʼu taʼu faigataʼa ʼaia, kae neʼe hoko atu e Anatoly mo tona famili tanatou tauhi agatonu ʼae kia Sehova. Ia ʼaho nei kua taʼu 82 ia Anatoly pea ʼe kau ʼi he Komite ʼo te Filiale ʼi he fenua ʼo Asia. Tou faʼifaʼitakiʼi ia Anatoly mo Lidiya, ʼo tou fai ia meʼa fuli ʼe tou lavaʼi ʼi te tauhi kia Sehova. Pea tou hoko atu tatatou katakiʼi te ʼu faigataʼaʼia ohage pe ko tatatou fai ʼi muʼa atu.—Kal. 6:9.
KOTOU TOKAKAGA TUʼUMAʼU KI TAKOTOU ʼAMANAKI
14. Kotea ʼae neʼe tonu ke fai e Paulo ke ina maʼu tona fakapale?
14 Neʼe tui papau ia Paulo ʼe ina fakaʼosi anai tana lele mo ina maʼu tona fakapale. Ko Paulo neʼe ko he Kilisitiano fakanofo. Neʼe fakaʼamu ke ina maʼu “te fakapale ʼae ʼe ko te pauʼi mai te ʼAtua.” Kae ke feala hana maʼu tona fakapale, neʼe mahino kia Paulo ʼe tonu ke ‘hoko atu tana lele.’ (Flp. 3:14) Pea neʼe fakaʼaogaʼi e Paulo he faʼifaʼitaki moʼo tokoni ki te kau Filipe ke natou tokakaga tuʼumaʼu ki tanatou ʼamanaki.
15. Neʼe tokoni feafeaʼi ia Paulo ki te kau Kilisitiano ʼo Filipe ke ‘hoko atu tanatou lele’?
15 Neʼe fakamanatuʼi e Paulo ki te kau Filipe ʼe natou maʼuʼuli anai ʼi selo. (Flp. 3:20) He koʼe neʼe tonu ke natou manatuʼi te faʼahi ʼaia? Koteʼuhi ʼi te temi ʼaia, neʼe loto e te hahaʼi ke natou kau ki te Puleʼaga ʼo Loma he neʼe feala ke natou maʼu he ʼu lelei mai ai. * Kae neʼe kau te ʼu tehina fakanofo ʼi he Puleʼaga ʼe lelei age, he ʼe ko te ʼu lelei ʼae ʼe natou maʼu mai ai ʼe maʼuhiga age. ʼE ha mai ai, neʼe maʼuhiga age te kau ki te Puleʼaga ʼae ʼi selo ʼi te Puleʼaga Loma. Ko te tupuʼaga la ʼaia ʼo te fakalotomalohiʼi fenei e Paulo te kau Filipe: “Ke tuha takotou aga mo te logo lelei ʼo ʼuhiga mo Kilisito.” (Flp. 1:27) ʼI te vaega ʼaeni, ko te ʼu palalau ʼae “ke tuha takotou aga,” ko tona fakaʼuhiga “ke tuha takotou aga mo te Puleʼaga ʼae ʼe kotou kau ai.” Ia ʼaho nei, ʼe tuku mai e te kau Kilisitiano fakanofo he faʼifaʼitaki lelei, ʼo natou haga lele ke natou maʼu tonatou fakapale ʼae ko te maʼuli heʼe gata ʼi te lagi.
16. Ka tou lau ia Filipe 4:6, 7, kotea ʼae ʼe tonu ke tou fai tatau aipe pe ʼe kotea tatatou ʼamanaki?
16 ʼE tonu ke tou haga lele ʼaki te fakatuʼutuʼu ʼae ke tou maʼu te fakapale, tatau aipe pe ʼe tou maʼu te ʼamanaki ʼae ko te maʼuli heʼe gata ʼi te lagi peʼe ʼi te Palatiso ʼi te kele. ʼE mahino ia, ʼe lahi te ʼu aluʼaga ʼe tonu anai ke tou katakiʼi. Kae ʼe mole tonu ke tou manatu ki te ʼu meʼa ʼae neʼe tou fai ʼi muʼa atu pea ʼaua naʼa tou tuku ke fakaleluʼi tatatou tauhi kia Sehova e he meʼa. (Flp. 3:16) ʼE lagi kua fualoa tatatou atalitali ʼae ke fakahoko e Sehova ʼana fakapapau. Peʼe lagi kua tou vaivai matuʼa pea kua hifo totatou sinoʼi tagata ʼi te temi nei. Pea ʼe mahino papau ia, neʼe tou katakiʼi he ʼu ʼahiʼahi mo he ʼu fakataga lolotoga he ʼu taʼu. Kae tatau aipe pe ʼe kotea he aluʼaga ʼe kotou tau mo ia, “ ʼaua naʼa kotou tuʼania ki he meʼa.” Koteʼuhi kotou fakaha ki te ʼAtua ʼakotou kole, mo ʼakotou kole mamahi, pea ʼe ina foaki atu anai te tokalelei ʼae ʼe maʼoluga age ʼi te ʼu ʼatamai fuli.—Lau ia Filipe 4:6, 7.
17. Kotea ʼae ka tou vakaʼi ʼi te alatike ka hoa mai?
17 Ko he tagata lele ka vave kaku ki te laini fakaʼosi, pea ʼe tokaga tafito ke ina fakaʼosi tana lele. ʼE toe feia mo tatou, ka tou fakaovi ki te fakaʼosi ʼo tatatou lele, ʼe tou tokakaga tafito ki te ʼu fakapapau taulekaleka ʼo ʼuhiga mo te ka haʼu. ʼE tou faiga malohi anai ʼo tou haga fai te faʼahi ʼaia ʼi te temi nei. Kotea ʼae ʼe tonu ke tou fai ke tou kau tuʼumaʼu ʼi te lele pea mo tou faʼa kataki? ʼE tokoni mai anai te alatike ʼae ka hoa mai ke tou iloʼi pe kotea ʼae ʼe tonu ke fakamuʼamuʼa pea mo tou “iloʼi papau te ʼu meʼa ʼae ʼe maʼuhiga ʼaupito.”—Flp. 1:9, 10.
KATIKO 79 Akoʼi Age Ke Natou Tutuʼu Malohi
^ pal. 5 ʼE tou faiga tuʼumaʼu ke tou tuputupu pea ke lelei age tatatou tauhi kia Sehova, pe ʼe kei tou foʼofoʼou peʼe kua tou fualoa ʼi te moʼoni. Neʼe fakalotomalohiʼi e te apositolo ko Paulo ʼona tehina mo tuagaʼane ke natou haga fai feia. Ka tou lau tana tohi ki te kau Filipe, ʼe ʼekenaki ai tatou ke tou lele ʼaki he faʼa kataki te lele ʼae ki te maʼuli. ʼE tou vakaʼi anai ʼi te alatike ʼaeni pe ʼe feafeaʼi hatatou maʼuliʼi te ʼu tokoni ʼa Paulo ʼae neʼe ina fai ʼaki te takitaki ʼa te ʼAtua.
^ pal. 11 Vakaʼi te fakamatala ʼo te maʼuli ʼo te tehina ko Secord, “La part que j’ai prise à l’extension du vrai culte” ʼi Te Tule Leʼo (Fakafalani) ʼo te ʼaho 1 ʼo Fepualio 1966.
^ pal. 13 Vakaʼi te fakamatala ʼo te maʼuli ʼo te tehina ko Melnik, “Enseigné depuis l’enfance à aimer Dieu” ʼi te Réveillez-vous ! (Fakafalani) ʼo te ʼaho 22 ʼo Oketopeli 2004.
^ pal. 15 Neʼe maʼu e te hahaʼi ʼae neʼe maʼuʼuli ʼi Filipe he ʼu lelei neʼe toe maʼu pe e te hahaʼi ʼo te Puleʼaga ʼo Loma. Koia ko te ʼu tehina mo tuagaʼane mai Filipe neʼe feala ke natou mahino ki te faʼifaʼitaki ʼa Paulo.