ALATIKE AKO 32
Ke Tuputupu Tuʼumaʼu Tokotou ʼOfa
“Koʼeni te meʼa ʼae ʼe au haga kole, ke haga tuputupu tokotou ʼofa.”—FLP. 1:9.
KATIKO 106 Ke Tou Maʼuliʼi Te ʼOfa
TE ʼU MANATU FAKANOUNOU *
1. Ko ai ʼae neʼe tokoni ki te fakatuʼu ʼo te kokelekasio ʼo Filipe?
KO TE apositolo ko Paulo, mo Silasi, mo Luka pea mo Timoteo neʼe olo ki Filipe. Neʼe puleʼi e te kau Loma te kolo ʼaia. ʼI tanatou tau atu ki ai, neʼe natou tokagaʼi ʼe tokolahi te hahaʼi neʼe natou fia logo ki te logo lelei ʼo te Puleʼaga. Ko te ʼu tehina ʼaia ʼe fa, neʼe natou tokoni ki te fakatuʼu ʼo he kokelekasio pea neʼe kamata fakahoko ai e te ʼu tehina mo tuagaʼane ʼanatou fono Fakakilisitiano. Neʼe lagi fai ʼanatou fono ʼi te ʼapi ʼo te tuagaʼane neʼe tali kaiga lelei ʼe higoa ko Litia.—Gaue 16:40.
2. Kotea te fihifihia ʼae neʼe felaveʼi mo te kokelekasio?
2 Neʼe mole fualoa ki ai, pea felaveʼi leva te kokelekasio foʼou mo he fihifihia. Neʼe ʼi ai te hahaʼi neʼe mole ʼoʼofa ʼi te moʼoni. Pea neʼe ʼekenaki e Satana te hahaʼi ʼaia ke natou fakafeagai ki te faifakamafola ʼa te kau Kilisitiano agatonu ʼaia. Neʼe puke ia Paulo mo Silasi, pea neʼe ta ʼaki ni kauʼi ʼakau pea mo pilisoniʼi naua. ʼI tanā mavae ʼi te pilisoni, neʼe nā toe liliu ʼo fakalotomalohiʼi ʼonā tehina mo tuagaʼane foʼou. Pea neʼe mavae leva ia Paulo, mo Silasi pea mo Timoteo ʼi te kolo ʼaia, kae neʼe lagi nofo aipe ia Luka ʼi ai. Kotea ʼae neʼe hoko ki te kokelekasio foʼou ʼaia ki muli age? Neʼe tokoni ia Sehova ki te kau Kilisitiano foʼou ʼaia ʼaki tona laumalie maʼoniʼoni, ke hoko atu tanatou tauhi kia te ia ʼaki he faʼafai. (Flp. 2:12) ʼE mahino ia, neʼe fiafia ia Paulo ʼo ʼuhiga mo natou.
3. Kotea ʼae neʼe ui ia Filipe 1:9-11 ʼo ʼuhiga mo te faikole?
3 Hili ki ai ni taʼu ʼe 10, neʼe faitohi leva ia Paulo ki te kokelekasio ʼo Filipe. Pea ka kotou lau te tohi ʼaia, ʼe kotou tokagaʼi anai te ʼofa mamahi ʼo Paulo ki ʼona tehina. Neʼe ina tohi fenei: Flp. 1:8) Ohage la, neʼe ina ui ʼi tana tohi, ʼe faikole anai maʼa natou. Neʼe ina kole kia Sehova ke tokoni kia natou ke haga tuputupu tonatou ʼofa pea mo natou mahino pe ʼe kotea te ʼu meʼa ʼae ʼe maʼuhiga pea mo maʼa. Neʼe ina toe kole ke ʼaua naʼa natou fakatupu tukia ki ʼihi kae ke hoho atu tanatou maʼu te fua ʼo te faitotonu. ʼE mahino papau ia, ʼe toe ʼaoga kia tatou te ʼu palalau ʼa Paulo. Koia ʼae ʼe tonu ai ke tou lau te tohi ʼa Paulo ʼae neʼe ina fai ki te kau Filipe. (Lau ia Filipe 1:9-11.) ʼE tou vakaʼi anai ʼi te alatike ʼaeni, te ʼu manatu ʼae neʼe tohi e Paulo. Pea ʼe tou toe vakaʼi anai pe ʼe feafeaʼi hatatou maʼuliʼi te ʼu manatu ʼaia.
“ ʼE au fakaʼamu ke au sio kia koutou fuli he ʼe au ʼofa mamahi ia koutou ohage ko Kilisito Sesu.” (KE HAGA TUPUTUPU TOKOTOU ʼOFA
4. (1) Ka tou lau ia 1 Soane 4:9, 10, neʼe fakaha feafeaʼi e Sehova tona ʼofa ʼae kia tatou? (2) ʼE tonu ke feafeaʼi totatou ʼofa ʼae ki te ʼAtua?
4 Neʼe fakaha e Sehova tona ʼofa lahi kia tatou, ʼi tana fekauʼi mai tona ʼAlo ki te kele ke haʼu ʼo mate moʼo totogi ʼatatou agahala. (Lau ia 1 Soane 4:9, 10.) Neʼe ʼofa te ʼAtua kia tatou kae neʼe kei tou agahala. Ko te tupuʼaga la ʼaia ʼo tatatou ʼofa ia te ia. (Loma 5:8) ʼE tonu ke feafeaʼi totatou ʼofa ki te ʼAtua? Neʼe tali ia Sesu ki te fehuʼi ʼaia ʼi te temi ʼae neʼe ina ui fenei ai ki te Faliseo: “ ʼE tonu ke ke ʼofa kia Sehova tou ʼAtua, ʼaki tou loto katoa, mo tou maʼuli katoa pea mo tou ʼatamai katoa.” (Mat. 22:36, 37) ʼE tou loto ke tou ʼoʼofa ki te ʼAtua ʼaki totatou loto katoa, pea ke malohi tuʼumaʼu ʼi te ʼaho fuli. Neʼe ui e Paulo ki te kau Filipe ʼe tonu ke “haga tuputupu” tonatou ʼofa. Kotea ʼae ʼe tonu ke tou fai ke malohi ai totatou ʼofa ʼae ki te ʼAtua?
5. ʼE feala ke tuputupu feafeaʼi totatou ʼofa ʼae kia Sehova?
5 ʼE tonu ke tou iloʼi ia te ʼAtua ke feala hatatou ʼoʼofa ia te ia. ʼE ui fenei ʼi te Tohi-Tapu: “Ko ia ʼae ʼe mole ʼofa ʼe mole ina iloʼi ia te ʼAtua, koteʼuhi ko te ʼAtua ʼe ko te ʼofa.” (1 Soa. 4:8) Neʼe ui e te apositolo ko Paulo, kapau ʼe tou maʼu “te ʼatamai malama totonu pea mo te fakasiosio tonu katoa,” ʼo ʼuhiga mo Sehova, ʼe haga tuputupu ai anai totatou ʼofa. (Flp. 1:9) ʼI tatatou kamata ako te Tohi-Tapu, neʼe tuputupu ai totatou ʼofa ki te ʼAtua, koteʼuhi neʼe tou iloʼi ai ʼona kalitate taulekaleka. Pea kapau ʼe tou iloʼi lelei ia Sehova, ʼe toe malohi ai totatou ʼofa kia te ia. Koia ʼae ʼe maʼuhiga ai ke tou ako mo tou metitasio tuʼumaʼu ki te Tohi-Tapu.—Flp. 2:16.
6. Ka tou lau ia 1 Soane 4:11, 20, 21, kotea te ako ʼe tou maʼu ʼo ʼuhiga mo te ʼofa?
6 Kapau ʼe tou ʼoʼofa ki te ʼAtua, ʼe tonu foki ke tou ʼoʼofa ki ʼotatou tehina mo tuagaʼane. (Lau ia 1 Soane 4:11, 20, 21.) ʼE tou ʼoʼofa fuli kia Sehova, pea koia ʼae ʼe lagi tou manatu ai ʼe faigafua tatatou ʼoʼofa ki ʼotatou tehina mo tuagaʼane. Pea ʼe tou toe faiga fuli ke tou faʼifaʼitakiʼi ʼona kalitate. ʼE tou toe manatu ʼe faigafua he ʼe tou faʼifaʼitakiʼi ia Sesu, ʼae neʼe ʼofa mamahi pea mo ina foaki tona maʼuli maʼa tatou. Kae ʼi ʼihi temi, ʼe tou tokagaʼi ai ʼe mole faigafua tuʼumaʼu tatatou fakalogo ki te fakatotonu ʼae ke tou feʼofaʼaki. ʼE tou vakaʼi anai te faʼifaʼitaki ʼo te kokelekasio ʼo Filipe.
7. He koʼe neʼe tokoniʼi e Paulo ia Evoti mo Sinitise?
7 Ko Evoti mo Sinitise, neʼe ko he tau tehina faʼafai ʼi te moʼoni. Neʼe nā ‘gaue fakatahi’ mo te apositolo ko Paulo. Kae neʼe lagi nā fihi ʼo mole kei nā felogoi ai. Neʼe faitohi leva ia Paulo ki te kokelekasio ʼae neʼe kau ai te ʼu tuagaʼane ʼaia. Neʼe palalau fakahagatonu ia Paulo kia Evoti mo Sinitise ʼo ina tokoniʼi naua ke nā “manatu tahi.” (Flp. 4:2, 3) Neʼe manatu ia Paulo ke ina tokoniʼi ia te kokelekasio. Koia neʼe ina tohi fenei ai: “Kotou haga fai ia meʼa fuli ʼo mole kotou muhumuhu pea mo fihi.” (Flp. 2:14) ʼE moʼoni, neʼe fakahagatonu te tokoni ʼa Paulo, kae neʼe tokoni ki te ʼu tuagaʼane agatonu ʼaia pea mo te kokelekasio katoa ke tuputupu tanatou feʼofaʼofani.
8. He koʼe ʼe faigataʼa tatatou ʼoʼofa ki ʼotatou tehina mo tuagaʼane ʼi ʼihi temi? Kotea te faʼahi ʼae ʼe lelei ke tou fakakaukauʼi?
8 ʼI ʼihi temi ʼe faigataʼa tatatou ʼoʼofa ki ʼotatou tehina mo tuagaʼane, koteʼuhi ʼe tou hage pe ko Evoti mo Sinitise. ʼE tou sioʼi te ʼu lakahala ʼo ʼotatou tehina mo tuagaʼane. Kae ʼe tou agahala fuli pe ʼi te ʼaho fuli. Kapau ʼe tou sioʼi tuʼumaʼu te ʼu lakahala ʼa te ʼu tehina mo tuagaʼane, ʼe faigataʼa anai tatatou ʼoʼofa kia natou. Ohage la, ko he tehina ʼe mole kei ina manatuʼi ke ina fakamaʼa te Fale Fono, ʼe feala ke tou ita ai. Pea kapau leva ʼe tou kamata tanaki ʼana lakahala, ʼe toe lahi age anai totatou ita pea veliveli ai mo totatou ʼofa ʼae kia ia. Ka tou felaveʼi mo he aluʼaga feia, ʼe lelei ke tou fakakaukauʼi te faʼahi ʼaeni: ʼE sio ia Sehova ki ʼatatou lakahala ʼo toe feia aipe ki te ʼu lakahala ʼo totatou tehina. Kae ʼe ʼofa aipe ia Sehova ʼi totatou tehina pea mo tatou. Koia la ʼae ʼe tonu ai ke tou faʼifaʼitakiʼi te ʼofa ʼo Sehova ʼo tou tokagaʼi tuʼumaʼu te ʼu kalitate ʼo ʼotatou tehina mo tuagaʼane. Kapau ʼe tou faiga malohi ke tou ʼoʼofa ki ʼotatou tehina mo tuagaʼane, ʼe malohi ai anai tatatou logo tahi.—Flp. 2:1, 2.
“TE ʼU MEʼA ʼAE ʼE MAʼUHIGA ʼAUPITO”
9. Kotea “te ʼu meʼa ʼae ʼe maʼuhiga ʼaupito” ʼae neʼe palalau ki ai ia Paulo?
9 Neʼe takitaki e Sehova ia Paulo ʼaki tona laumalie maʼoniʼoni ke tokoni ki te kau Filipe ke natou “iloʼi papau te ʼu meʼa ʼae ʼe maʼuhiga ʼaupito.” (Flp. 1:10) Pea ko te tokoni ʼaia ʼe toe ʼaoga pe ki te kau Kilisitiano fuli. Kotea te ʼu meʼa ʼae ʼe maʼuhiga ʼaupito? Ko te fakatapuha ʼo te huafa ʼo Sehova, mo te fakahoko ʼo ʼana fakapapau, mo te tokalelei pea mo te logo tahi ʼo te kokelekasio. (Mat. 6:9, 10; Soa. 13:35) Ka tou fakamuʼamuʼa te ʼu meʼa maʼuhiga ʼaia ʼi totatou maʼuli, ʼe tou fakaha ai ʼe tou ʼoʼofa ia Sehova.
10. Kotea ʼae ʼe tonu ke tou fai ke tou maʼa ai kia mata ʼo Sehova?
10 Neʼe toe ui e Paulo ʼe tonu ke tou “maʼa.” ʼE mole fakaʼuhiga leva ʼe tonu ke tou haohaoa. Koteʼuhi ʼe mole feala ke tou haohaoa ohage ko Sehova ʼAtua. Kae kapau ʼe tou faiga malohi ke tuputupu totatou ʼofa, mo tou iloʼi te ʼu meʼa ʼae ʼe maʼuhiga tafito ʼi totatou maʼuli, pea ʼe tou maʼa anai kia mata ʼo Sehova. ʼE feala ke tou fakaha totatou ʼofa ʼo tou faiga malohi ke ʼaua naʼa tou fakatupu tukia ki ʼotatou tehina mo tuagaʼane.
11. He koʼe ʼe mole tonu ke tou fakatupu tukia he tahi?
11 ʼE fakatokaga mai ʼi te Tohi-Tapu ke ʼaua naʼa tou fakatupu tukia ki ʼotatou tehina mo tuagaʼane. ʼE ko he fakatokaga maʼuhiga ʼaupito ia. ʼE feafeaʼi hatatou fakatukia he tahi? ʼE feala ke tukia he tahi ʼuhi pe ko he fakafiafia peʼe ko he gaue neʼe tou filifili, peʼe ko ʼotatou mutuʼi meʼa. ʼE lagi mole kovi te ʼu meʼa ʼae ʼe tou fai kia mata ʼo Sehova. Kae kapau ʼe tou fakatukia he leʼo ʼo loto ʼo he tahi ʼo mamahi ai, ʼe ko he lakahala mamafa. Neʼe ui e Sesu, ʼe lelei age ke tau ki totatou kia he foʼi maka momosi fulumeto pea ke fakamou tatou ʼi te loto tai, ʼi hatatou fakatukia he tahi ʼi ʼana ovi.—Mat. 18:6.
12. Kotea te ako ʼe tou taʼofi mai te faʼifaʼitaki ʼo te taumatuʼa pionie?
12 Neʼe ʼi ai te taumatuʼa pionie neʼe mulimuli ki te tokoni ʼa Sesu. ʼI tonā kokelekasio, neʼe kau ai te taumatuʼa neʼe hoki papitema age pe. Pea ko te taumatuʼa ʼaia neʼe lalahi ake ʼi he ʼu famili neʼe lahi te ʼu meʼa neʼe tapuʼi ai. Neʼe manatu naua, ʼe mole tonu ke olo te kau Kilisitiano ʼo sinema maʼia pe la mo te sioʼi ʼo he ʼu ʼata Hep. 5:14) ʼI tanā fai feia, neʼe fakaha e te taumatuʼa pionie tonā ʼofa ki tonā tehina mo tuagaʼane ʼaki ʼanā palalau pea mo tanā aga.—Loma 14:19-21; 1 Soa. 3:18.
ʼe lelei. Koia neʼe nā punamaʼuli ai ʼi tanā iloʼi ʼae neʼe olo ia te taumatuʼa pionie ʼo sinema. Hili ia, neʼe mole toe olo ai te taumatuʼa pionie ʼo sinema. Koteʼuhi neʼe nā loto muʼa ke mahino te taumatuʼa foʼou, ʼe mole kovi te sioʼi ʼo he ʼata pea ʼe fakalogo pe ki te leʼo ʼo loto ʼa te takitokotahi. (13. ʼE feafeaʼi hatatou fakatukia he tahi?
13 ʼE feala ke tou fakatukia he tahi moka ʼe tou uga ia ia ke agahala. ʼO feafeaʼi? Tou toʼo he faʼifaʼitaki. Ohage la, ko he tahi ʼe ina ako te Tohi-Tapu pea faiga malohi ke ina tuku tana inu kava. Pea ʼe mahino kia ia ʼe ko te puleʼaki pe ʼe tahi ke mole ina toe inu hana moʼi kava. Neʼe tuputupu vave ai ʼi te moʼoni pea mo papitema. ʼI te tahi ʼaho leva, neʼe fakaafe leva ia ia e te tehina ki he kiʼi meʼa kai. Pea neʼe ina uga ia ia ke inu hana moʼi kava. Neʼe ina ui fenei: “Koʼeni kua ke papitema pea ʼe foaki atu anai e Sehova tona laumalie maʼoniʼoni ke ke lava tauʼi ʼou vaivaiʼaga. Kua feala pe ke ke inu hau moʼi kava.” Kapau ʼe fakalogo te tehina foʼou ki te tokoni ʼaia ʼae ʼe mole fakapotopoto, ʼe tau anai mo he ʼu fihifihia.
14. He koʼe ʼe tokoni mai te ʼu fono ke tou muliʼi te ʼu tokoni ʼae ia Filipe 1:10?
14 Kapau ʼe tou kau tuʼumaʼu ki te ʼu fono, ʼe faigafua anai hatatou muliʼi te ʼu tokoni ʼae ia Filipe 1:10. ʼUluaki, ʼe tou maʼu ʼi te ʼu fono he ʼu akonaki ʼe fakaha ai pe kotea ʼae ʼe maʼuhiga kia mata ʼo Sehova. Lua, ʼe fakamahino mai ai te ʼu faʼahi ʼae ʼe tonu ke tou fai mo kapau ʼe tou fia nofo maʼa. Pea tolu leva, ʼe tou feugaʼaki ki te “ ʼofa pea mo te ʼu gaue lelei.” (Hep. 10:24, 25) Ka fakalotomalohiʼi tatou e ʼotatou tehina mo tuagaʼane, ʼe tuputupu anai totatou ʼofa kia natou mo te ʼAtua. Pea ʼe mole tou fai anai he meʼa ʼe fakatupu tukia kia natou.
KOTOU HAGA ‘MAʼU TE FUA ʼO TE FAITOTONU’
15. ʼE tou maʼu feafeaʼi te “fua ʼo te faitotonu”?
15 Neʼe faikole tuʼumaʼu ia Paulo ki te ʼAtua ke maʼu e te kau Filipe “te fua ʼo te faitotonu.” (Flp. 1:11) Pea ʼe mahino ia, ko tonatou ʼofa ʼae kia Sehova mo tana hahaʼi neʼe ko he agaaga ia ʼo “te fua ʼo te faitotonu.” ʼE toe kau ai tanatou vaevae ki te hahaʼi tanatou ʼamanaki pea mo tanatou tui kia Sesu. ʼE fakaʼaogaʼi ʼi te Tohi-Tapu he tahi faʼifaʼitaki ia Filipe 2:15. ʼE talanoa ʼo ʼuhiga mo te kau Kilisitiano ʼe tonu ke natou “mu . . . ohage ko he ʼu malama ʼi te malamanei.” Pea tahi neʼe ui e Sesu ko ʼana tisipulo ʼe ko “te malama ʼo te malamanei.” (Mat. 5:14-16) Neʼe toe fakatotonu age e Sesu ke natou “fai ni tisipulo,” pea mo ui age kia natou ʼe natou “liliu anai ko [he kau] fakamoʼoni . . . ʼo kaku ki te ʼu potu taupotu ʼo te kele.” (Mat. 28:18-20; Gau 1:8) Koia ʼe tou maʼu anai te “fua ʼo te faitotonu” mo kapau ʼe tou kau ki te faifakamafola.
16. Ka tou lau ia Filipe 1:12-14, ʼe feafeaʼi hatatou mu ohage ko he malama maʼia ʼi te ʼu temi faigataʼa? (Vakaʼi te pāki ʼo te takafi.)
16 ʼE feala kia tatou fuli ke tou fakamu totatou malama tatau aipe pe ʼe kotea he aluʼaga ʼe tou tau mo ia. ʼI ʼihi temi ʼe ʼi ai he ʼu aluʼaga ʼe feala ke ina taʼofi tatatou fakamafola te logo lelei. Kae ʼe ko he ʼu faigamalie ʼaia ke tou faifakamafola ai. Ohage la, ʼi te temi ʼae neʼe faitohi ai te apositolo ko Paulo ki te kau Filipe, neʼe pilisoni ʼi te ʼapi ʼi Loma. Logo la neʼe seiniʼi, kae neʼe faifakamafola ki te kau solia ʼae neʼe natou leʼo pea mo natou ʼae neʼe ʼomai ʼo ʼaʼahi ia ia. Neʼe faʼafai tuʼumaʼu ia Paulo ʼi te faifakamafola Filipe 1:12-14; 4:22.
tatau aipe pe ʼe kotea te aluʼaga ʼae neʼe tau mo ia. Pea koia ʼae neʼe falala malohi ai ʼona tehina kia Sehova pea mo natou “tala ai te folafola ʼa te ʼAtua ʼaki he lototoʼa, ʼo mole natou matataku.”—Lau ia17. ʼE hoko atu feafeaʼi e ʼihi tehina mo tuagaʼane te faifakamafola tatau aipe pe ʼe faigataʼa?
17 Tokolahi ʼotatou tehina mo tuagaʼane neʼe natou faʼifaʼitakiʼi te lototoʼa ʼa Paulo. ʼE natou maʼuʼuli ʼi he ʼu fenua ʼe tapuʼi ai te faifakamafola ʼi te ʼu ʼapi. Kae ʼe natou faigaʼi ke natou fakamafola te logo lelei ʼi ʼihi age aluʼaga. (Mat. 10:16-20) ʼI he fenua ʼe tapuʼi ai te faifakamafola, neʼe fakalotomalohiʼi e te taupau ’o te siliko te ʼu tehina mo tuagaʼane ke natou tahi maʼu tona “telituale.” Ko tona fakaʼuhiga, ke natou faifakamafola ki ʼonatou famili, mo ʼonatou vahaʼa fale, mo ʼonatou kaugā ako, mo ʼonatou kaugā gaue pea mo natou ʼae ʼe natou feiloʼiʼaki. Ia taʼu ʼe lua, neʼe kua lahi ai te ʼu kokelekasio ʼo te siliko ʼaia. ʼE lagi ʼe tou maʼuʼuli ʼi he fenua ʼe mole tapuʼi ai te faifakamafola. Kae ʼe feala pe ke tou taʼofi he ʼu ako mai te faʼifaʼitaki ʼo ʼotatou tehina mo tuagaʼane. ʼE tonu ke tou kumi tuʼumaʼu he ʼu faigamalie ke tou fakamafola ai te logo lelei. Pea ʼe tonu ke tou falala tuʼumaʼu, ʼe foaki mai anai e Sehova te malohi moʼo tauʼi he ʼu faʼahiga fihifihia pe.—Flp. 2:13.
18. Kotea ʼae ʼe tonu ke tou fai?
18 Tou faiga malohi ke tou muliʼi te ʼu tokoni ʼae ʼe tou maʼu ʼi te tohi ʼa Paulo ki te kau Filipe. Koia, ʼe tonu ke tou iloʼi pe ʼe kotea te ʼu meʼa ʼae ʼe maʼuhiga ʼaupito, mo tou maʼa, ke mole tou fakatukia he tahi pea mo tou maʼu te fua ʼo te faitotonu. Kapau ʼe tou fai te faʼahi ʼaia, ʼe tuputupu ai anai totatou ʼofa pea mo tou fakakololiaʼi tatatou Tamai fonu ʼi te ʼofa ʼae ko Sehova.
KATIKO 17 “ ʼE Au Loto Ki Ai”
^ pal. 5 Ia ʼaho nei, ʼe ʼaoga ke tou fakamalohiʼi totatou ʼofa ki ʼotatou tehina mo tuagaʼane. ʼE tou vakaʼi anai te tohi ʼa Paulo ki te kau Filipe, koteʼuhi ʼe tokoni mai anai ke haga tuputupu totatou ʼofa ki ʼotatou tehina mo tuagaʼane tatau aipe pe ʼe tou tau mo he ʼu fihifihia.
^ pal. 54 FAKAMATALA ʼO TE ʼU PĀKI: Lolotoga te fakamaʼa ʼo te Fale Fono, ko te tehina ʼe higoa ko Joe, ʼe ina tuku tana gaue kae faipalalau mo te tahi tehina mo tona foha. Ko te tahi tehina ʼe higoa ko Mike ʼe lolotoga faifakamaʼa pea ʼe ita. ʼE ina ui fenei: ‘ ʼE mole gaue ia Joe kae ʼe faipalalau ia.’ Ki muli age neʼe sio leva ia Mike, ʼe tokoni ia Joe ki te tuagaʼane kua vaivai matuʼa. Neʼe mahino leva ia Mike ʼe tonu ke manatu ʼuluaki ki te ʼu kalitate ʼo tona tehina.
^ pal. 58 FAKAMATALA ʼO TE ʼU PĀKI: ʼI he fenua ʼe mole feala ke faifakamafola faʼifaʼitaliha ai te Kau Fakamoʼoni ʼa Sehova, ko he tehina ʼe palalau ki tona kaumeʼa ʼo ʼuhiga mo te Puleʼaga kae ʼe tokaga naʼa logo age he tahi. Ki muli age, ʼe palalau te tehina ki tona kaugā gaue ʼo ʼuhiga mo te moʼoni ʼi tonā temi malolo.