ALATIKE AKO 34
Moka Hinoʼi Tatou Ki He Tahi Age Selevisi Makehe
“ ʼE mole heʼe faitotonu te ʼAtua ke ina galoʼi takotou gaue mo te ʼofa ʼae neʼe kotou fakaha ki tona huafa.”—HEP. 6:10.
KATIKO 38 ʼE Ina Fakamalohi Anai Ia Koe
TE ʼU MANATU FAKANOUNOU *
1-3. He koʼe ʼe tonu ki ʼihi kaugana ʼa Sehova ke natou fetogi tanatou selevisi makehe?
ʼE FAKAMATALA fenei e Robert pea mo Mary Jo: “Neʼe ma gaue fiafia ia taʼu ʼe 21 ʼi te selevisi misionea. Kae neʼe mahahaki leva ʼaku matuʼā pea mo te ʼu matuʼā ʼa Mary Jo. Neʼe ma fiafia ʼi tamā tokakaga kia natou. Kae neʼe ma lotomamahi ʼaupito ʼi tamā mavae ʼi te koga meʼa ʼae neʼe ma gaue fiafia ai ʼi te selevisi misionea.”
2 Neʼe manatuʼi fenei e William pea mo Terrie: “Neʼe ma fetagihi he neʼe mole kei feala hamā toe liliu ʼo hoko atu tamā selevisi makehe ʼuhi ko tamā mahamahaki. Koia neʼe mole kei feala ai ke ma fakahoko te selevisi ʼae neʼe ma fakaʼamu tuʼumaʼu ki ai, ʼae ko te tauhi kia Sehova ʼi he fenua matapule.”
3 ʼE fakamatala fenei e Alekseï: “Neʼe matou iloʼi neʼe fia pupunu tomatou filiale e natou ʼae neʼe natou fakatagaʼi matou. Kae ʼi te pupunu leva ʼo te Petele, neʼe matou mavae ai mo he lotomamahi.”
4. Kotea te ʼu fehuʼi ʼae ka tou tali anai ki ai ʼi te alatike ʼaeni?
4 ʼE toe kau kia natou ʼaia, te ʼu toko lauʼi afe kau Petelite. ʼO toe feia mo ʼihi tehina mo tuagaʼane ʼe natou gaue temi katoa maʼa Sehova, ʼae neʼe hinoʼi ki he tahi age selevisi makehe. * Neʼe lagi faigataʼa ki te ʼu tehina mo tuagaʼane ʼaia, tanatou mavae ʼi he koga meʼa neʼe natou fakahoko fiafia ai tanatou selevisi makehe kia Sehova. Kotea ʼae ʼe feala ke tokoni kia natou ke natou fakamamahani ki te ʼu fetogi ʼaia? ʼE feafeaʼi hau tokoni kia natou ʼaia? Ko te ʼu tali ki te ʼu fehuʼi ʼaeni, ʼe toe fakaha mai ai pe ʼe feafeaʼi hatatou fakamamahani ki he fetogi foʼou ʼi totatou maʼuli takitokotahi.
ʼE FEAFEAʼI HATATOU FAKAMAMAHANI KI HE ALUʼAGA FOʼOU?
5. Kotea ʼae ʼe feala ke hoko moka ʼe fetogi tatatou selevisi makehe?
5 ʼE tatau aipe pe ʼe tou misionea, peʼe tou Petelite, peʼe tou kau ʼi he tahi age selevisi temi katoa, ʼe mahino ia, ʼe tou ʼoʼofa mamahi ki te hahaʼi pea mo te koga meʼa ʼae kua tou maʼuʼuli ai. Koia ʼae ʼe tou lotomamahi ai mo kapau ʼe tonu ke tou mavae mai ai. ʼE tou manatuʼi tuʼumaʼu anai te ʼu tehina mo tuagaʼane ʼae neʼe kua tou mahani mo natou. Pea ʼe tou tuʼania ki ʼonatou maʼuli, tafito la mo kapau neʼe tou mavae ʼuhi ko te ʼu fakataga. (Mat. 10:23; 2 Ko. 11:28, 29) Pea tahi, ʼe feala ke faigataʼa hatatou olo ki he tahi age koga meʼa, koteʼuhi ʼe tonu ke tou toe fakamamahani ki he tahi age agaʼi fenua. ʼE toe feala pe ke tou logoʼi te faʼahi ʼaia, moka ʼe tou toe liliu ki totatou fenua. Ohage la, ʼe fakamatala fenei e Robert mo Mary Jo: “Neʼe mole kei ma mahani mo tamā agaʼi fenua. Pea neʼe toe faigataʼa tamā faifakamafola ʼi tamā lea totonu. Neʼe kua fualoa tamā tauhi kia Sehova ʼi he tahi age fenua, koia neʼe kua ma hage pe ko he ʼu matapule ʼi toma fenua totonu.” ʼE toe feala pe kia natou ʼae kua fetogi tanatou selevisi makehe, ke natou felaveʼi mo he ʼu fihifihia fakapaʼaga. ʼE feala ke natou lotovaivai ai. Kae kotea ʼae ʼe feala ke tokoni kia natou?
6. ʼE feafeaʼi hatatou nonofo ovi kia Sehova?
6 Nofo ovi kia Sehova. (Sakp. 4:8) ʼO feafeaʼi? ʼE ʼaoga ke ke tui papau ko Sehova ‘ ʼe fagono ki te faikole.’ (Pes. 65:3) ʼE ui fenei ia Pesalemo 62:8, MN: “Kotou avahi tokotou loto kia te ia.” ʼE feala ke fakahoko e Sehova “ ʼo lahi maumau age ʼi te ʼu meʼa ʼae ʼe tou kole peʼe tou manatu ki ai, ʼo mulimuli ki tona malohi ʼae ʼe gaue ia tatou.” (Efe. 3:20) Koia ʼe mole ina foaki mai pe te ʼu meʼa ʼae ʼe tou kole age. Koteʼuhi ʼe ina fakatokatoka anai ʼotatou fihifihia ʼo ina fakahoko he aluʼaga neʼe lagi mole tou ʼamanaki ki ai.
7. (1) Kotea ʼae ka tokoni mai anai ke tou nonofo ovi kia Sehova? (2) Ka tou lau ia Hepeleo 6:10-12, kotea te ʼu fua lelei ʼe tou maʼu anai moka hoko atu tatatou tauhi agatonu kia Sehova?
7 Ke feala hatatou nonofo ovi kia Sehova, ʼe toe ʼaoga foki ke ke lau ia te Tohi-Tapu ʼi te ʼaho fuli pea mo ke metitasio ki ai. Ko te tehina neʼe misionea ʼi muʼa atu, ʼe ina foaki mai te tokoni ʼaeni: “Fai tuʼumaʼu tau ako fakafamili mo teuteuʼi lelei ʼau fono ohage pe ko tau fai ʼi muʼa ʼo te fetogi ʼo tau selevisi makehe.” ʼE toe ʼaoga ke ke faiga malohi ʼi te faifakamafola mo tau kokelekasio foʼou. ʼE mole galoʼi e Sehova ia natou ʼae ʼe tauhi agatonu kia te ia, tatau aipe pe ʼe mole kei feala hanatou gaue malohi ohage ko tanatou fai ʼi muʼa atu.—Lau ia Hepeleo 6:10-12.
8. ʼE tokoni feafeaʼi mai ia 1 Soane 2:15-17 ke tou maʼuli fakafeʼauga?
Mat. 13:22) ʼAua tau fakalogo ki te hahaʼi ʼae ʼe mole tauhi kia Sehova, peʼe ko ʼou kaumeʼa, peʼe ko tou famili ʼae ʼe natou fakaneke koe ke ke maʼu paʼaga ke lelei age tou maʼuli. (Lau ia 1 Soane 2:15-17.) Falala kia Sehova, koteʼuhi ʼe ina fakapapau ʼe ina foaki mai anai te ʼu meʼa fuli ʼae ʼe ʼaoga ki totatou maʼuli fakalaumalie “ ʼi tona temi totonu.” Pea ʼe tokoni mai anai ke malohi tuʼumaʼu tatatou tui, ke fimalie totatou loto pea ʼe ina foaki mai anai te ʼu meʼa ʼae ʼe ʼaoga ki totatou maʼuli.—Hep. 4:16; 13:5, 6.
8 Maʼuli fakafeʼauga. ʼAua naʼa taʼofi tau tauhi ʼae kia Sehova e te ʼu hoha ʼo te malama ʼa Satana. (9. Ka tou lau ia Taaga Lea 22:3, 7, he koʼe ʼe tou faigaʼi anai ke mole tou toʼo maʼua? Kotea ʼae ʼe feala ke tokoni mai ke tou toʼo he ʼu tonu ʼe fakapotopoto?
9 Faigaʼi ke ʼaua tau toʼo maʼua kae ʼe mole hona ʼaoga. (Lau ia Taaga Lea 22:3, 7.) ʼE feala ke totogi kovi moka ʼe tou fetogi ʼapi, ʼo tupu ai te lahi ʼo ʼotatou maʼua. Kapau ʼe mole ke loto ke lahi ʼou maʼua, faigaʼi ke mole ke kole falā moʼo totogi ʼaki he ʼu meʼa ʼe mole hona ʼaoga. ʼE feala ke faigataʼa hatatou iloʼi pe ʼe ko te fia ʼae ʼe tonu ke tou kole maʼua moka tou tau mo he aluʼaga ʼe fakatupu lotohoha. Ohage la, ko te taupau ʼo he tahi ʼi totatou famili ʼe mahaki. Kapau ʼe ke tau mo he aluʼaga feia, manatuʼi “ko te faikole mo te kole mamahi” ʼe tokoni atu anai ke ke toʼo he ʼu tonu ʼe fakapotopoto. ʼE feala ke tali e Sehova ʼau faikole ʼaki tana foaki atu te tokalelei ʼae ʼe ina ‘taupau tou loto pea mo ʼou fealagia fakakaukau.’ Pea ʼe tokoni atu anai te faʼahi ʼaia ke ke iloʼi pe kotea ʼae ʼe tonu ke ke fai.—Flp. 4:6, 7; 1 Pet. 5:7.
10. ʼE feafeaʼi hau maʼu hou ʼu kaumeʼa foʼou?
10 Nofo ovi ki ʼou kaumeʼa mo tou famili. Palalau ki hou ʼu kaumeʼa lelei ʼo ʼuhiga mo te ʼu meʼa ʼe ke logoʼi pea mo ʼou fihifihia. Kae tafito kia natou ʼae neʼe lagi tau mo he ʼu aluʼaga ohage ko koe. Kapau ʼe ke fai feia, ʼe feala ai anai ke fimalie tou loto. (Ekl. 4:9, 10) ʼE ke taupau tuʼumaʼu pe anai ʼou kaumeʼa ʼae neʼe kotou gaue fakatahi. Kae ʼi te temi nei ʼae kua fetogi ai tau selevisi makehe, ʼe ʼaoga ke ke kumi hou ʼu kaumeʼa foʼou. Manatuʼi, ke feala hau maʼu hou ʼu kaumeʼa, ʼe tonu foki ke ke aga fakakaumeʼa mo koe. Kae ʼe feafeaʼi hau kumi hou ʼu kaumeʼa foʼou? Fakamatala ki ʼihi te ʼu aluʼaga fakalotomalohi ʼae neʼe ke maʼu ʼi tau tauhi ʼae kia Sehova, ke feala hanatou logoʼi mo natou ia te fiafia ʼae neʼe ke maʼu. ʼE lagi mole mahino ʼihi ʼi tau kokelekasio pe koʼe ʼe ke leleiʼia te selevisi temi katoa. Kae ko ʼihi ʼe lagi natou leleiʼia te faʼifaʼitaki ʼae ʼe ke tuku, pea ʼe natou liliu ko hou ʼu kaumeʼa lelei. Kae ʼaua naʼa ke palalau tuʼumaʼu ʼo ʼuhiga mo koe totonu peʼe ko ʼau gaue ʼae neʼe ke fakahoko ʼi tau tauhi kia Sehova. Pea kapau ʼe ke maʼu he ʼu manatu fakalotovaivai, ʼaua tau palalau tuʼumaʼu ki ai.
11. ʼE feafeaʼi hau faigaʼi ke fiafia tuʼumaʼu tou maʼuli fakataumatuʼa?
11 Kapau neʼe tonu ke ke tuku tau selevisi makehe ʼuhi he neʼe mahaki tou ʼohoana, ʼaua tau tukugakoviʼi ia ia. Pea kapau neʼe ko koe ʼae neʼe mahaki, ʼaua tau tukugakoviʼi ia koe. ʼAua tau manatu ʼae neʼe ke fakalotomamahiʼi tou ʼohoana. Manatuʼi, ko koulua “ko he kakano ʼe tahi.” Pea neʼe kolua fakapapau Mat. 19:5, 6) Neʼe feala pe ke ke tuku tau selevisi makehe koteʼuhi neʼe ke faitama kae neʼe mole ke ʼamanaki ki ai. Koia ʼe ʼaoga ke ke fakamahino lelei ki tau kiʼi fanau ʼe maʼuhiga age ia ʼi tau selevisi makehe. Fakalotofimalieʼi ia ia ʼo ke ui age, ʼe ko “he fakapale” ia ia mai te ʼAtua. (Pes. 127:3-5) ʼE toe feala pe ke ke fakamatala kia ia te ʼu aluʼaga fakaofoofo ʼae neʼe hoko ʼi tau selevisi makehe. ʼE feala anai ke ʼekenaki ia ia ke toe tauhi mo ia kia Sehova ʼi te selevisi temi katoa.
ia muʼa ʼo Sehova ʼe kolua fetokagaʼaki anai tatau aipe pe ʼe kotea ʼae ʼe feala ke hoko. (TE ʼU TOKONI ʼAE ʼE FEALA KE FOAKI E ʼIHI
12. (1) ʼE feafeaʼi hatatou tokoni kia natou ʼae ʼe gaue temi katoa maʼa Sehova ke natou hoko atu tanatou selevisi makehe? (2) ʼE feafeaʼi hatatou tokoni kia natou ke natou fakamamahani mo te ʼu fetogi foʼou ʼaia?
12 ʼE lahi te ʼu kokelekasio ʼe natou fai he ʼu fakatuʼutuʼu ke hoko atu te selevisi ʼa natou ʼae ʼe gaue temi katoa maʼa Sehova. ʼE toe ʼi ai foki mo te tahi aluʼaga fakafiafia, ko te kaugā malie ʼo te ʼu tehina mo tuagaʼane ʼae ʼe natou fakalotomalohiʼi mo tokoni kia natou. ʼE loto e te ʼu tehina ke hoko atu tanatou selevisi makehe ʼo natou foaki kia natou te ʼu meʼa ʼae ʼe ʼaoga ki tonatou maʼuli fakasino. Peʼe natou tokakaga leva ki ʼonatou famili ʼae kua vaivai matuʼa peʼe mahahaki. (Kal. 6:2) Kapau neʼe fekauʼi ki tau kokelekasio he ʼu tehina mo tuagaʼane ʼe kau ki te selevisi temi katoa, ʼaua naʼa ke manatu neʼe natou fai he meʼa ʼe kovi ʼuhi ko te fetogi ʼo tanatou selevisi makehe. * Kae ʼe ʼaoga ke ke tokoni kia natou ke natou fakamamahani mo te ʼu fetogi foʼou ʼae kua hoko kia natou. Fakatalitali leleiʼi natou. Pea ke fakamalo ki te gaue ʼae neʼe natou fakahoko logo la ʼe mole kei feala hanatou gaue ohage ko te temi ki muʼa atu ʼuhi ko te mahaki. Faigaʼi ke ke feiloʼiʼaki mo natou. Pea ke taʼofi he ʼu ako mai ia natou, mai te ʼatamai malama ʼae kua natou maʼu, mo te ʼu ako ʼae neʼe natou kau ki ai pea mo te ʼu aluʼaga fakaofoofo ʼae neʼe hoko ʼi tanatou selevisi.
13. ʼE feafeaʼi hatatou lava tokoni kia natou ʼae ʼe hinoʼi ki he tahi age selevisi makehe?
13 ʼI te kamata, ʼe ʼaoga anai ke ke tokoni kia natou ʼae neʼe hinoʼi ki he tahi age selevisi makehe. ʼE lagi ʼaoga ke natou maʼu honatou nofoʼaga, mo hanatou meʼa fealuʼaki, mo he gaue pea mo te ʼu meʼa ʼae ʼe ʼaoga ki tonatou maʼuli. ʼE lagi toe ʼaoga ke natou iloʼi pe ʼe feafeaʼi te totogi ʼo te ʼu tukuhau, peʼe ko te maʼu ʼo he tokoni ki te taupau ʼo tonatou maʼuli malolo. Kae ko te faʼahi ʼae ʼe ʼaoga tafito kia natou, ko tau faigaʼi ʼae ke ke mahino ki tonatou aluʼaga. ʼI ʼihi temi ʼe natou tau mo te mahaki, peʼe tonu ke natou tokakaga ki ʼihi ʼo tonatou famili ʼae ʼe mahahaki. ʼE natou lotomamahi koteʼuhi ʼe lagi kua mate he tahi neʼe natou ʼoʼofa ai. * Pea ʼe lagi natou lotomamahi he ʼe mole kei natou fesioʼaki mo ʼonatou kaumeʼa mahani logo la ʼe mole natou fakaha mai. Pea tatau aipe pe ʼe mole natou fakaha atu, kae ʼe lagi natou lotomamahi koteʼuhi ʼe natou manatu tuʼumaʼu ki ʼonatou kaumeʼa. ʼE mahino ia, ʼe ʼaoga kia natou ia he temi loaloaga ke natou tauʼi te ʼu manatu ʼaia, ʼae ʼe feala ke natou lotomamahi ai.
14. Neʼe tokoni feafeaʼi ia he kokelekasio ki he tuagaʼane ke fakamamahani ki tana telituale foʼou?
14 Kapau ʼe ke tuku he faʼifaʼitaki lelei, ʼe feala ke ke tokoni kia natou ʼaia ke natou fakamamahani mo tonatou telituale foʼou. Ko te tuagaʼane neʼe gaue temi katoa lolotoga ni taʼu ʼi he fenua matapule, ʼe ina ui fenei: “ ʼI taku telituale ʼafeā, neʼe au fai te ʼu ako Tohi-Tapu ʼi te ʼaho fuli. Kae ʼi taku telituale foʼou leva, ʼi taku faifakamafola ai neʼe mole pe la feala ke au avahi taku Tohi-Tapu peʼe ke au fakaha he ʼata viteo. Pea neʼe fakaafe au e te ʼu tehina mo tuagaʼane ʼo taku kokelekasio foʼou ke au kaugā olo mo natou ki ʼanatou ʼaʼahi mo ʼanatou ako Tohi-Tapu. Ko te ʼu tehina mo tuagaʼane faʼafai mo lototoʼa ʼaia, ʼe natou fai he ʼu ako Tohi-Tapu ʼe tuputupu lelei. Koia ʼi taku sio ki te aluʼaga ʼaia, neʼe kamata fimalie ai toku loto. Neʼe au ako pe ʼe feafeaʼi te kamata ʼo he faipalalau ʼi taku telituale foʼou. Pea neʼe au toe fiafia ai.”
HAGA FAIGA TUʼUMAʼU
15. ʼE feafeaʼi hau faiga ke ke fiafia ʼi tau telituale foʼou?
15 ʼE feala ke ke fiafia ʼi te telituale foʼou ʼae kua hinoʼi koe ki ai. Pea ʼaua tau manatu ʼae neʼe ke fai he meʼa ʼe kovi ʼi tau telituale ʼafeā, peʼe mole kei maʼuhiga Gaue 8:1, 4) Kapau ʼe ke haga faiga tuʼumaʼu ʼi te faifakamafola, ʼe mahino ia ʼe ke maʼu anai ʼona fua lelei. Ohage la, ko te kau pionie neʼe fakamavae ʼi he fenua pea neʼe natou olo ʼo maʼuʼuli ʼi he tahi age fenua. Pea ko te fenua ʼaia, neʼe ʼaoga ki ai he kau faifakamafola. Koia neʼe feala ai ki te kau pionie ke natou faifakamafola ʼi te fenua ʼaia ʼi tanatou lea. ʼI ni kiʼi mahina pe, neʼe fakatuʼu te ʼu kutuga foʼou ʼi te lea ʼae ʼe palalauʼi e te kau pionie. Pea neʼe tuputupu vave te ʼu kiʼi kutuga ʼaia.
tau gaue. Fakakaukauʼi pe ʼe tokoni feafeaʼi atu ia Sehova ʼi te temi nei, mo ke faifakamafola tuʼumaʼu. Pea faʼifaʼitakiʼi ia te kau ʼuluaki Kilisitiano. ʼI te ʼosi ʼo tonatou fakatagaʼi, “neʼe natou fakalaka ʼi te fenua katoa ʼo natou tala te logo lelei ʼo te folafola.” (16. ʼE feafeaʼi hau lava maʼu ia te fiafia ʼi te telituale foʼou ʼae kua hinoʼi koe ki ai?
16 “Ko te fiafia o [Sehova] ko tokotou malohiaga.” (Nee. 8:10) ʼE tonu ke tou fiafia ʼuhi ko ʼatatou felogoi mo Sehova, kae mole ʼuhi ko tatatou selevisi makehe, tatau aipe pe ʼe maʼuhiga kia tatou. Koia, kapau ʼe ke fia maʼu ia te fiafia, ʼe tonu ke ke nofo ovi kia Sehova. Pea ʼe tonu ke ke falala tuʼumaʼu kia te ia, ʼo ke kumi ia tona poto, mo tana takitaki pea mo tana tokoni. Manatuʼi, neʼe ke leleiʼia tau telituale ʼafeā koteʼuhi neʼe ke faiga malohi ke ke tokoni ki te hahaʼi. ʼE toe feia pe, faiga fakamalotoloto ʼi te telituale foʼou ʼae kua hinoʼi koe ki ai. Pea ke sio pe ʼe tokoni feafeaʼi atu ia Sehova ke ke ʼofa kia te ia.—Ekl. 7:10.
17. Kotea ʼae ʼe tonu ke tou manatuʼi ʼo ʼuhiga mo tatatou selevisi makehe ʼae ʼe tou fakahoko nei?
17 ʼE tonu ke tou manatuʼi ʼe tou tauhi kia Sehova ki te heʼe gata. Kae ko tatatou selevisi makehe ʼae ʼe tou fakahoko ʼi te temi nei, ʼe lagi fetogi anai ʼi te malama foʼou. Tou toe vakaʼi te faʼifaʼitaki ʼo Alekseï ʼae neʼe tou talanoa ki ai ʼi te kamata. ʼE ina ui, ko te ʼu fetogi ʼae neʼe hoko ki tana selevisi makehe, neʼe tokoni ki ai ke teuteu ki te ʼu fetogi ʼae ʼe feala ke hoko ʼi te ka haʼu. ʼE ina fakamahino fenei: “Neʼe au tui tuʼumaʼu pe ʼe maʼuli moʼoni ia Sehova pea ʼe ina fakatuʼu moʼoni anai ia te malama foʼou. Kae ʼi te tahi age faʼahi, neʼe hage ia ʼe mamaʼo Sehova ia au pea ʼe kei mamaʼo te temi ʼae ka ina fakatuʼu ai te malama foʼou. ʼI te temi nei, kua hage pe ia ʼe tuʼu ʼi ʼoku muʼa, pea kua vave fakatuʼu pe ia te malama foʼou.” (Gaue 2:25) Koia, tatau aipe pe ʼe kotea tatatou selevisi makehe, tou nonofo ovi kia Sehova. ʼE mole ina liʼaki anai tatou ʼi he temi. Kae ʼe tokoni mai anai ke tou fiafia pea ke tou foaki te ʼu meʼa lelei tukupau kia te ia, ʼi he koga meʼa pe ʼe tou tauhi ai kia te ia.—Esa. 41:13.
KATIKO 90 Tou Fefakalotomalohiʼaki
^ pal. 5 ʼI ʼihi temi, ko ʼihi tehina mo tuagaʼane ʼe mole kei feala hanatou hoko atu tanatou selevisi makehe kia Sehova. Pea ko ʼihi leva ʼe hinoʼi natou ki he tahi age selevisi makehe. ʼE talanoa te alatike ʼaeni ki ʼonatou faigataʼaʼia pea mo te ʼu faʼahi ʼae ʼe feala ke tokoni ki tanatou fakamamahani ki te aluʼaga foʼou ʼae ʼe hoko ki tonatou maʼuli. Pea ʼe toe talanoa ai ki te tokoni ʼae ʼe feala ke foaki e ʼihi moʼo fakalotomalohiʼi pea mo lagolago kia natou. ʼE toe maʼu foki ʼi te alatike ʼaeni he ʼu pelesepeto ʼe feala ke tokoni mai kia tatou takitokotahi ke tou katakiʼi te ʼu fetogi ʼae ʼe hoko ʼi totatou maʼuli.
^ pal. 4 Pea tahi, tokolahi te ʼu tehina neʼe natou tuku leva te ʼu gaue ʼae neʼe natou fakahoko ki te ʼu tehina ʼae ʼe kei tupulaga ʼuhi ko te kua hifo ʼo tonatou malohi. Vakaʼi te alatike “Frères d’expérience, Jéhovah chérit votre fidélité” ʼi Te Tule Leʼo (Fakafalani) ʼo Sepetepeli 2018 pea mo te alatike “Tou Taupau Te Tokalelei ʼo Te Loto Logo La Te ʼu Fetogi ʼi ʼOtatou Maʼuli,” ʼi Te Tule Leʼo ʼo Oketopeli 2018.
^ pal. 12 ʼE tonu ki te kau tagata ʼafeā ʼo te kokelekasio ʼae neʼe kau ai te kau gaue temi katoa, ke natou foimo fai he tohi ʼe fakamatalatala ai tanatou fetogi kokelekasio. Koteʼuhi ʼe feala ai ke fakanofo fakavilivili natou ko he kau pionie, peʼe ko he kau tagata ʼafeā, peʼe ko he kau tagata faifekau fakaminisitelio ʼi tanatou kokelekasio foʼou.
^ pal. 13 Vakaʼi te ʼu alatike “He Tokoni Kia Natou ʼAe ʼe Putu” ʼi te nusipepa Kotou ʼAʼala! n° 3 ʼo te taʼu 2018.
^ pal. 57 FAKAMATALA ʼO TE ʼU PĀKI: Ko he taumatuʼa ʼe maʼua ke nā tuku tanā selevisi misionea, pea ʼe nā fetagihi ʼi tanā tauʼine ki tanā kokelekasio.
^ pal. 59 FAKAMATALA ʼO TE ʼU PĀKI: ʼI tanā kua tau atu leva ki tonā fenua, ʼe nā haga kole te tokoni ʼa Sehova ʼi te faikole ke feala hanā katakiʼi ʼonā fihifihia.
^ pal. 62 FAKAMATALA ʼO TE ʼU PĀKI: Neʼe tokoni ia Sehova kia naua ke nā toe kau ki te selevisi temi katoa. ʼE nā faifakamafola ki te kau matapule ʼi te lea ʼae neʼe nā ako ʼi te temi neʼe kei nā misionea ai.