Kapau ʼe moʼoni te faʼahi ʼaia, pea tou fakakaukauʼi muʼa pe ʼe malave feafeaʼi ki totatou maʼuli. Tou toʼo he faʼifaʼitaki: Ko he foha ʼo he tehina neʼe fakamate pea neʼe lotomamahi ai te tehina. Neʼe lagi ina feʼekeʼaki pe neʼe sio fakatomuʼa ia Sehova ki te aluʼaga ʼaia, pea ina fakatotonu leva ʼe lavaʼi anai e naua taumatuʼa ia te malaʼia ʼaia. Pea ʼi te malama ʼaeni, ko te tokolahi ia tatou ʼe tou tau anai mo he ʼu malaʼia. Koia, ʼe tonu koa ke tou tui ʼe puleʼi e Sehova ia meʼa fuli ʼae ʼe hoko ʼi totatou maʼuli?

ʼAki tatatou vakaʼi ia 1 Kolonito 10:13, ʼe tou mahino ai anai ʼe mole lagolago ia te Tohi-Tapu ki te manatu ʼae ko Sehova ʼe ina iloʼi fakatomuʼa pe kotea ʼae ʼe feala ke tou ʼutakiʼi pea ʼe hoki ina filifili leva te ʼu ʼahiʼahi ʼae ka tou tauʼi anai. He koʼe ʼe feala ke tou ui te faʼahi ʼaia? Tou vakaʼi age muʼa ia tupuʼaga ʼe fa.

ʼUluaki, neʼe foaki e Sehova ki te tagata ia te loto faʼitaliha, te ʼateaina ʼo te toʼo ʼo he ʼu tonu. ʼE ina loto ke tou toʼo ʼatatou tonu. (Tetelonome 30:19, 20; Sosue 24:15) Kapau ʼe tou toʼo he tonu ʼe fiafia ai ia Sehova, ʼe tou falala ʼe ina takitaki anai tatou. (Taaga Lea 16:9) Kaʼe ka tou toʼo he ʼu tonu ʼe mole lelei, ʼe tou utu anai ʼona fua kovi. (Kalate 6:7) Koia, kapau la neʼe filifili e Sehova ia te ʼu ʼahiʼahi ʼae ka tou tauʼi anai, ʼe tou maʼu moʼoni koa ia te loto faʼitaliha?

Lua, ʼe mole puipui tatou e Sehova mai “te ʼu aluʼaga fakafokifa.” (Tagata Tanaki 9:11, MN) ʼE feala pe ke hoko he tuʼutamaki ki he tahi, he ʼe fakalaka ʼi he koga meʼa ʼe hoko ai he aluʼaga fakafokifa. Neʼe talanoa pe la ia Sesu ki te tuʼutamaki ʼae neʼe mamate ai te toko 18 hahaʼi, he neʼe holo ifo te tule kia natou. Pea neʼe ina fakaha fakalelei, neʼe mole natou mamate ʼuhi ko te ʼAtua. (Luka 13:1-5) Koia, ʼe mole fakapotopoto hatatou manatu ʼe fakatuʼutuʼu fakatomuʼa e te ʼAtua pe ko ai ʼae ka hao peʼe mate ʼi he tuʼutamaki.

Tolu, ʼe tonu ke tou tahi nofo agatonu kia Sehova. Neʼe ui e Satana ʼe tauhi pe te ʼu kaugana ʼa Sehova kia te ia, ʼuhi ko te ʼu tapuakina ʼae ʼe Ina foaki kia natou. Pea neʼe toe lau e Satana ʼe mole tou nonofo agatonu anai kia Sehova mo kapau ʼe tou felaveʼi mo he ʼu ʼahiʼahi. (Sopo 1:9-11; 2:4; Fakaha 12:10) Kapau la ʼe puipui tatou e Sehova mai he ʼu ʼahiʼahi, ʼe hage leva neʼe moʼoni ia Satana.

Fa, neʼe mole filifili e Sehova ke ina iloʼi fakatomuʼa ia meʼa fuli ʼae ka hoko anai kia tatou. ʼE moʼoni, ʼe feala ke iloʼi e Sehova pe kotea ʼae ka hoko ʼi te ka haʼu mo ka na pau la neʼe loto ki ai. (Esaia 46:10) Kaʼe ʼe fakaha mai ʼi te Tohi-Tapu neʼe mole filifili e te ʼAtua ke ina iloʼi fakatomuʼa te ʼu meʼa fuli. (Senesi 18:20, 21; 22:12) Ko Sehova ʼe ʼofa pea mo faitotonu, koia ʼae ʼe ina tuku ai ke tou fai ʼateaina pe ʼatatou tonu.—Tetelonome 32:4; 2 Kolonito 3:17.

Kaʼe kotea ʼae neʼe fia fakamahino e Paulo ʼi tana ui ʼae ko Sehova “ ʼe mole ina tuku anai ke fakahalaʼi koutou ʼo fakalaka age ʼi te meʼa ʼae ʼe kotou lavaʼi”? ʼI heni, neʼe fakamatalatala e Paulo te meʼa ʼae ʼe fai e Sehova lolotoga he ʼu ʼahiʼahi, kaʼe mole ʼi muʼa ʼo tonatou hoko mai. * (Vakaʼi te kiʼi nota.) Kapau ʼe tou falala kia Sehova, pea ʼe tokoni mai anai ʼi te ʼu ʼahiʼahi fuli ʼae ʼe hoko ʼi totatou maʼuli. (Pesalemo 55:23) Tou vakaʼi ʼi te temi nei te ʼu tupuʼaga ʼe lua ʼae neʼe feala ai ke ui e Paulo ia te faʼahi ʼaia.

Te ʼuluaki tupuʼaga: Ko te ʼu ʼahiʼahi ʼae ʼe tou fakalaka ai, ʼe toe hoko foki ki “te hahaʼi fuli.” ʼUhi ʼae he kei tou maʼuʼuli ʼi te malama ʼa Satana, ʼe tou felaveʼi fuli pe mo he ʼu faigataʼaʼia pea mo he ʼu tuʼutamaki. Kaʼe kapau ʼe tou falala kia Sehova, ʼe tou ʼutakiʼi te ʼu ʼahiʼahi ʼaia pea mo tou nonofo agatonu. (1 Petelo 5:8, 9) ʼI te ʼu ʼuluaki vaega ʼo 1 Kolonito  kapite 10, neʼe talanoa ai ia Paulo ʼo ʼuhiga mo ʼihi ʼahiʼahi neʼe fakalaka ai te kau Iselaele ʼi te toafa. (1 Kolonito 10:6-11) Ko natou ʼae neʼe falala kia Sehova, neʼe feala ke natou katakiʼi te ʼu ʼahiʼahi ʼaia. Kaʼe ko ʼihi kau Iselaele neʼe natou talagataʼa kia Sehova. Neʼe mole natou nonofo agatonu koteʼuhi neʼe mole natou falala kia te ia.

Te lua tupuʼaga: “ ʼE agatonu te ʼAtua.” Kotea tona fakaʼuhiga? Ka tou fakakaukauʼi ia te faʼahiga tokaga ʼae ʼa Sehova ki ʼana kaugana ʼi te hoholo ʼo te hisitolia, ʼe tou mahino ai, ʼe tokoni kia “natou ae e ofa kia ia, mo tauhi ana folafola.” (Tetelonome 7:9) Pea ʼe tou toe ako ai foki, ʼe fakahoko tuʼumaʼu e Sehova ʼana fakapapau. (Sosue 23:14) Koia ʼe tou tui papau, (1) ko Sehova ʼe mole ina fakagafua anai ke tou tau mo he ʼahiʼahi ʼe mole tou lavaʼi, pea (2) ʼe ina teuteuʼi anai maʼa tatou ia “he faigamalie” ke tou hao ai.

ʼE teuteuʼi feafeaʼi anai e Sehova ia “he faigamalie” maʼa natou ʼae ʼe falala kia te ia? ʼE moʼoni, ʼe feala pe hana pulihi ia te ʼahiʼahi. Kaʼe tou manatuʼi, neʼe ui e Paulo ʻʼe teuteuʼi anai e Sehova he faigamalie, ke feala ai hatatou ʼutakiʼi’ te ʼahiʼahi. Koia, ʼe teuteuʼi tuʼumaʼu e Sehova ia he faigamalie maʼa tatou ʼaki tana fakamalohiʼi tatou ke feala ai hatatou nonofo agatonu. Tou vakaʼi pe ʼe ina teuteuʼi feafeaʼi ʼihi faigamalie.

• Ko Sehova ʼe ina “fakafimalieʼi tatou ʼi ʼotatou ʼahiʼahi fuli.” (2 Kolonito 1:3, 4) ʼE ina fakafimalieʼi totatou ʼatamai, mo totatou loto pea mo te ʼu meʼa ʼae ʼe tou logoʼi ʼaki te Tohi-Tapu, mo tona laumalie maʼoniʼoni pea mo tana tagata faifekau agatonu.—Mateo 24:45; Soane 14:16, nota; Loma 15:4.

• ʼE feala ke fakaʼaogaʼi e Sehova ia tona laumalie maʼoniʼoni moʼo takitaki ʼo tatou. (Soane 14:26) ʼE feala ke tokoni mai te laumalie maʼoniʼoni ke tou manatuʼi te ʼu fakamatala Fakatohi-tapu pea mo te ʼu pelesepeto ke tou toʼo ai he ʼu tonu fakapotopoto.

• ʼE feala ke fakaʼaogaʼi e Sehova ʼana ʼaselo ke tokoni mai kia tatou.—Hepeleo 1:14.

• ʼE feala ke fakaʼaogaʼi e Sehova ʼotatou tehina mo tuagaʼane ke tokoni mai kia tatou. Pea ʼaki ʼanatou palalau mo te ʼu meʼa ʼae ʼe natou fai, ʼe feala ke natou fakalotomalohiʼi tatou.—Kolose 4:11.

Koia, kotea ʼae neʼe tou ako mai te ʼu palalau ʼa Paulo ia 1 Kolonito 10:13? Ko Sehova ʼe mole ina filifili te ʼu ʼahiʼahi ʼae ka tou fakalaka ai. Kaʼe ʼe tou tui papau, ʼe feala ke tou ʼutakiʼi te ʼu ʼahiʼahi fuli mo kapau ʼe tou falala kia Sehova. Pea ʼe tou iloʼi ʼe teuteuʼi tuʼumaʼu anai e Sehova ia he faigamalie maʼa tatou ke feala ai hatatou nonofo agatonu kia te ia.