ALATIKE AKO 9
Ko Te ʼOfa Mo Te Faitotonu ʼi Te Iselaele ʼAfeā
“E ofa ia ia ki te faitotonu mo te mooni; e fonu te kele i te agalelei o [Sehova].”—PES. 33:5.
KATIKO 3 Tatatou Malohi, Tatatou ʼAmanaki, Tatatou Falala
TE ʼU MANATU FAKANOUNOU *
1-2. (1) Kotea ʼae ʼe tou loto fuli ki ai? (2) Kotea ʼae ʼe tou tui papau ki ai?
ʼE TOU loto fuli ke ʼofainaʼi tatou. Pea ʼe tou loto fuli ke mole tou tau mo he aluʼaga ʼe heʼe faitotonu. Kapau ʼe tahitahiga te fakaha mai e ʼihi ia te ʼofa mo te faitotonu, ʼe feala pe ke tou ui ʼe mole hotatou ʼuhiga pea ʼe mole hatatou ʼamanaki.
2 ʼE iloʼi e Sehova, ʼe ʼaoga lahi ia te ʼofa mo te faitotonu kia tatou. (Pes. 33:5) ʼE feala ke tou tui papau, ʼe ʼofa mamahi ia te ʼAtua kia tatou pea ʼe loto ia ke gaohi leleiʼi tatou. Pea ʼe ha te faʼahi ʼaia ʼi te Lao ʼae neʼe ina foaki ki te kau Iselaele ʼaki ia Moisese. Kapau ʼe ke lotomamahi he ʼe mole ʼofainaʼi koe peʼe ke tau mo he aluʼaga heʼe faitotonu, ʼe lelei ke ke vakaʼi pe ʼe fakaha feafeaʼi ʼi te Lao * ʼa Moisese ia te tokaga ʼofa ʼa Sehova ki tana hahaʼi.
3. (1) Ohage ko tona fakamahino mai ia Loma 13:8-10, kotea ʼe tou mahino ki ai moka ʼe tou ako ia te Lao Fakamoisese? (2) Kotea te ʼu fehuʼi ʼe tali anai ki ai te alatike ʼaeni?
3 Ka tou ako ia te Lao ʼa Moisese, ʼe tou mahino ai pe ʼe kotea ʼae ʼe logoʼi e totatou ʼAtua ʼofa, ia Sehova ʼi tona loto. (Lau ia Loma 13:8-10.) ʼI te alatike ʼaeni, ʼe tou vakaʼi anai ia he ʼu lao neʼe foaki ki te kau Iselaele pea ʼe tou tali anai ki te ʼu fehuʼi ʼaeni: He koʼe ʼe feala ke tou ui neʼe fakatafito ia te Lao ki te ʼofa? He koʼe ʼe feala ke tou ui neʼe fakalotomalohiʼi e te Lao ia te hahaʼi ke natou fakaha ia te faitotonu? Kotea neʼe tonu ke fai e natou ʼae neʼe natou maʼu he faʼahiga pule ke mulimuli ia te hahaʼi ki te Lao? Pea ko te faʼahiga hahaʼi feafeaʼi ʼae neʼe puipui tafito e te Lao? ʼE tou maʼu anai ia he fakalotofimalie mo he ʼamanaki ʼaki te ʼu tali ʼo te ʼu fehuʼi ʼaia. Pea ʼe tou fakaovi ai ki tatatou Tamai ʼofa.—Gaue 17:27; Loma 15:4.
KO HE LAO ʼE FAKATAFITO KI TE ʼOFA
4. (1) He koʼe ʼe feala ke tou ui neʼe fakatafito ia te Lao ki te ʼofa? (2) Ohage ko tona ui ia Mateo 22:36-40, kotea te ʼu fakatotonu tafito ʼae neʼe fakaha e Sesu?
4 ʼE feala ke tou ui neʼe fakatafito ia te Lao Fakamoisese ki te ʼofa, koteʼuhi ko faʼahi fuli ʼae ʼe fakahoko e Sehova ʼe ʼekenaki e te ʼofa. (1 Soa. 4:8) Neʼe fakatafito e Sehova ʼana Lao ʼe 600 tupu kia fakatotonu tafito ʼe lua: Ko te ʼofa ki te ʼAtua mo te ʼofa ki tona tatau. (Lev. 19:18; Tet. 6:5; lau ia Mateo 22:36-40.) Koia ʼae ʼe tou tui papau ai ʼe lahi te faʼahi ʼe feala ke tou ako ʼaki ia te Lao ʼo ʼuhiga mo te ʼofa ʼo Sehova. Tou vakaʼi he ʼu faʼifaʼitaki.
5-6. Kotea ʼae ʼe fakamaʼua e Sehova ki te ʼu taumatuʼa? Pea kotea ʼae ʼe tokaga lelei ki ai? Tuku mai he faʼifaʼitaki.
5 Ke ke nofo agatonu ki tou ʼohoana mo ke tokaga ki ʼau fanau. ʼE loto e Sehova ke malohi te ʼofa ʼae ʼe fefakahaʼaki e te taumatuʼa ʼi tonā maʼuli katoa. (Sen. 2:24; Mat. 19:3-6) Moka hala ki tuʼa ia te tagata peʼe ko te fafine ʼohoana, pea ʼe ko he aluʼaga fakatupu lotomamahi ʼaupito ʼaia. Koia ʼe tou mahino ai pe koʼe neʼe tapuʼi ia te tono ʼi te fitu Folafola ʼo te ʼu Folafola ʼe Hogofulu. (Tet. 5:18) Ko he agahala ʼaia “ki te Atua” pea ʼe ko he toe kafo mamahi ʼaia ki tona ʼohoana. (Sen. 39:7-9) Pea ko te kafo ʼaia ʼe feala ke tau mo he tahi lolotoga he ʼu taʼu.
6 ʼE mole puli kia Sehova pe ʼe feafeaʼi te fetokagaʼaki ʼa he taumatuʼa. Neʼe loto tafito e Sehova ke gaohi fakalelei ia te ʼu fafine ʼohoana. Ko te tagata ʼohoana ʼae neʼe fakaʼapaʼapa ki te Lao, neʼe ʼofa ia ki tona ʼohoana. Pea neʼe mole mavete mo tona ʼohoana ʼuhi pe ko he kiʼi meʼa noa. (Tet. 24:1-4; Mat. 19:3, 8) Kae kapau neʼe hoko he faigataʼaʼia pea ʼe fakatotonu e te tagata ke mavete mo tona ʼohoana, neʼe tonu ke ina foaki kia ia he pepa mavete. Pea neʼe feala pe ke ui e te hahaʼi ko te fafine neʼe hala ki tuʼa. Koia ko te pepa fakamoʼoni ʼaia, neʼe ina puipui ia he fafine ʼohoana mai te ʼu aluʼaga ʼaia. ʼE mahino ia, ʼi muʼa ʼo te foaki e te tagata ki tona ʼohoana te pepa fakamoʼoni ʼo tanā mavete, neʼe alu muʼa ʼo kumi tokoni ki te kau tagata ʼafeā ʼo te kolo. ʼI tana fai te faʼahi ʼaia, neʼe ko he faigamalie ʼaia ke natou faigaʼi ʼo tokoni ki te taumatuʼa ke mole nā mavete. Ko te temi fuli pe ʼae neʼe fia mavete ai he tagata mo tona ʼohoana he ʼe manatu pe kia ia totonu, neʼe mole kau ai ia Sehova. Kae, neʼe tokagaʼi pea mo logoʼi e Sehova ia te lotomamahi ʼaupito ʼa te fafine.—Mala. 2:13-16.
7-8. (1) Kotea ʼae neʼe fakatotonu e Sehova ki te ʼu matuʼā? (Vakaʼi te ʼuluaki pāki.) (2) Kotea te ʼu ako maʼa tatou?
7 ’E toe ha lelei ’i te Lao te ʼofa ʼa Sehova ki te ʼu fanau. Neʼe ina fakatotonu ki te ʼu matuʼā ke natou tokakaga lelei ki te ʼu meʼa fuli ʼae ʼe ʼaoga ki ʼanatou fanau ʼi te faʼahi fakasino, ʼo feia mo te faʼahi fakalaumalie. Neʼe tonu ke natou toʼo ia te ʼu faigamalie fuli ke natou akoʼi ki ʼanatou fanau te Lao ke natou mahino pea mo leleiʼia te Lao ʼa Sehova, pea ke natou ʼoʼofa ia te ia. (Tet. 6:6-9; 7:13) Neʼe kua tauteaʼi e Sehova ia te kau Iselaele he neʼe natou fai te ʼu aga ʼe kovi ki ʼanatou fanau. (Sel. 7:31, 33) Neʼe mole tonu ke gaohi koviʼi e te kau Iselaele ʼanatou fanau, kae neʼe tonu ke natou tokakaga lelei ki ai, mo fakamaʼuhigaʼi ohage pe ko honatou tofiga, ko he meʼa ʼofa neʼe foaki age e Sehova kia natou.—Pes. 127:3.
8 Te ʼu Ako: ʼE tokagaʼi e Sehova ia te ʼu felogoi fakataumatuʼa. ʼE loto ke ʼoʼofa te ʼu matuʼā ki ʼanatou fanau pea ʼe ina fakamauʼi anai ia natou ʼae ʼe natou gaohi koviʼi ʼanatou fanau.
9-11. He koʼe neʼe fai e Sehova he lao ʼe ina tapuʼi te manumanū?
9 ʼAua naʼa kotou manumanū. Neʼe tapuʼi ʼi te ʼu lao ʼe Hogofulu te manumanū. Neʼe tapu te manumanū ki he meʼa ʼe maʼu e he Tet. 5:21; Loma 7:7) Neʼe fai e Sehova te lao ʼaia he neʼe ina fia tuku he ako maʼa te kau Iselaele. Kapau ʼe tou maʼu he ʼu manatu ʼe kovi peʼe ko he holi ʼe kovi, ʼe tou fai anai he meʼa ʼe kovi. Koia neʼe tonu ai ko tana hahaʼi ke natou tokakaga ki ʼonatou loto, ki ʼanatou manatu, mo ʼanatou fakakaukau. (Taag. 4:23) Kapau ʼe taupau e he Iselaele ke tuputupu ʼi tona loto he ʼu holi ʼe kovi, ʼe mole kei ʼofa anai ki te hahaʼi. Ohage la, neʼe fai e te Hau ko Tavite te hala ʼaia. Neʼe ko te tagata agalelei. Kae ʼi te tahi ʼaho, neʼe manumanū ki te ʼohoana ʼo te tahi tagata. Pea ko tona holi ʼaia neʼe ina taki ia ia ki te agahala. (Sakp. 1:14, 15) Neʼe tono mo te fafine, pea neʼe faiga ke ʼaua naʼa iloʼi e tona ʼohoana, pea neʼe ina matehi leva ia ia.—2 Sam. 11:2-4; 12:7-11.
tahi. (10 Neʼe iloʼi lelei pe e Sehova moka fakalogo te kau Iselaele ki tana lao ʼae ʼo ʼuhiga mo te manumanū, koteʼuhi ʼe ina iloʼi ia te ʼu manatu pea mo te ʼu meʼa ʼae ʼe tou logoʼi ʼi ʼotatou loto. (1 Klk. 28:9) Neʼe akoʼi natou ʼaki te lao ʼaia, ke natou liʼaki ia te ʼu manatu ʼae ʼe taki ai natou ke natou fai he ʼu aga ʼe kovi. ʼE ha mai ai ko Sehova ʼe ko he Tamai poto pea mo manavaʼofa.
11 Te ʼu Ako: ’E mole sio pe Sehova ki te ’u meʼa ʼae ʼe ha ʼi tuʼa. Kae ʼe ina iloʼi ʼotatou loto, totatou ʼuhiga ʼo kita totonu. (1 Sam. 16:7) ʼE mole he meʼa ʼe feala ke ʼū kia mata ʼo Sehova, pe ko hatatou manatu, peʼe ko he meʼa ʼe tou logoʼi ʼi ʼotatou loto, peʼe ko hatatou gaue. ʼE ina tokagaʼi ia te lelei ʼae ʼe ia tatou. Kae ʼe loto ia ke tou tokagaʼi ʼatatou manatu ʼae ʼe kovi, ke tou tekeʼi ke ʼaua naʼa natou taki tatou ke tou fai he ʼu aga ʼe kovi.—2 Klk. 16:9; Mat. 5:27-30.
KO HE LAO NEʼE INA UGA TE HAHAʼI KI TE FAITOTONU
12. Kotea ʼae ʼe tou mahino ki ai moka tou lau ia te Lao ʼa Moisese?
12 Ka tou lau ia te Lao ’a Moisese, ’e tou mahino ai ’e ʼofa ia Sehova ki te faitotonu. (Pes. 37:28; Esa. 61:8) Neʼe faitotonu tuʼumaʼu pe ki te hahaʼi fuli, ʼo ina tuku mai ai he faʼifaʼitakiʼaga lelei maʼa tatou. Ka fakalogo te kau Iselaele ki ʼana lao, neʼe ina tapuakiʼi natou. Kae ka mole natou mulimuli ki ʼana lekula faitotonu, neʼe natou utu pe te ʼu fua ʼo ʼanatou aga ʼae ʼe kovi. Tou vakaʼi te tahi ʼu lao ʼe lua.
13-14. Kotea ʼae neʼe fakamaʼua ʼi te ʼu ʼuluaki lao ʼe lua? Pea he koʼe neʼe lelei ki te kau Iselaele ke natou fakalogo ki ai?
13 Tauhi ʼateaina pe kia Sehova. ʼI te ʼu ʼuluaki lao ʼe lua ʼa Moisese, neʼe fakamaʼua ki te kau Iselaele ke natou tauhi ʼateaina pe kia Sehova kae ke mole natou tauhi ki te ʼu fakatata. (Eke. 20:3-6) Neʼe mole tuku age e Sehova te ʼu lao ʼaia ke fua lelei kia ia, kae ke fua lelei ki tana hahaʼi. Ka natou agatonu kia Sehova, neʼe maui malie ia meʼa fuli maʼa natou. Kae ka natou tauhi ki te ʼu ʼatua ʼo te ʼu puleʼaga ʼae, neʼe natou tau pea mo ni malaʼia.
14 Ohage ko te kau Kanaane. Neʼe natou tauhi ki te ʼu ʼatua mate kae tuku te ʼAtua moʼoni pe ʼe tahi. Neʼe natou lainoa ai. (Pes. 115:4-8) Ka natou fai tanatou tauhi, neʼe natou fai ni aga heʼe ʼaoga fakalialia pea mo sakilifisioʼi ni tamaliki. Neʼe toe feia pe mo te kau Iselaele, ka natou talagataʼa kia Sehova ʼo natou tauhi ai ki te ʼu fakatata, neʼe natou maumauʼi ai ʼonatou matagafua pea mo fakamamahiʼi ʼonatou famili. (2 Klk. 28:1-4) Neʼe toe liʼaki e ʼihi kau pule ia te ʼu lao faitotonu ʼa Sehova. Neʼe natou puleʼi fakamalohi te hahaʼi ʼo natou gaohi koviʼi ia te kau masisiva. (Esk. 34:1-4) Neʼe fakatokaga e Sehova ia te kau Iselaele, ʼe ina tauteaʼi anai natou ʼae ʼe natou gaohi koviʼi te hahaʼi fafine pea mo te ʼu fanau. (Tet. 10:17, 18; 27:19) Kae ka fakalogo te hahaʼi kia Sehova, neʼe natou fefaiʼaki he ʼu aga faitotonu, pea neʼe tapuakiʼi natou e Sehova.—1 Hau 10:4-9.
15. Kotea te ako ʼe tou maʼu ʼo ʼuhiga mo Sehova?
Esa. 49:15) Tatau aipe pe mole ina fai he meʼa ʼi te temi ʼaia, kae ʼi tona temi totonu, ʼe ina fakatuʼā anai ia natou ʼae ʼe mole fakahemala ʼuhi ko tanatou gaohi koviʼi te hahaʼi.
15 Te ʼu Ako: Ko ʼihi ʼe natou ui ʼe natou atolasio kia Sehova kae ʼe natou fakafisi ki ʼana lao, pea ʼe natou gaohi koviʼi ʼana kaugana. ʼE mole tonu ke tou tukugakoviʼi ai ia Sehova. ʼE ʼofa ia tatou pea ʼe ina iloʼi te ʼu aga heʼe faitotonu ʼae ʼe fai kia tatou. ʼE ina logoʼi ʼotatou mamahi ohage pe ko he faʼe ʼe ina logoʼi te ʼofa ʼae ki tana kiʼi tamasiʼi. (NEʼE FEAFEAʼI TE FAKAHOKO ʼO TE LAO?
16-18. Neʼe feafeaʼi te takitaki e te Lao Fakamoisese ia te maʼuli ʼo he Iselaele? Pea kotea te ako ʼe tou maʼu ai?
16 Neʼe lahi te ʼu agaaga ʼo te maʼuli ʼa te kau Iselaele neʼe takitaki e te Lao Fakamoisese. ʼI te temi ʼaia neʼe fakanofo e Sehova ia te kau matutuʼa moʼo fakamauʼi tana hahaʼi. Pea neʼe tonu ke natou fakamauʼi ʼaki te faitotonu. Neʼe mole gata pe ki te ʼu faʼahi ʼae ʼe pipiki ki te tauhi, kae ʼe toe kau ai mo te ʼu tokakovi pea mo te faifakapo. Tou toʼo he ʼu faʼifaʼitaki.
17 Kapau ʼe matehi e he Iselaele ia he tahi, ʼe mole matehi atu aipe. ʼE tonu muʼa ki te kau matutuʼa ʼo te kolo ke natou vakavakaʼi te ʼu aluʼaga ʼae neʼe hoko pea ke natou fakatuʼutuʼu leva pe ʼe tonu ke matehi te tagata ʼaia. (Tet. 19:2-7, 11-13) Neʼe natou toe fakamauʼi te ʼu koga ʼo te ʼaho fuli, ohage la ko te ʼu tokakovi ʼa he taumatuʼa, pe ko he ʼu ke ʼo ʼuhiga mo te ʼu koloa. (Eke. 21:35; Tet. 22:13-19) Ka faitotonu ia te ʼu matutuʼa ʼi ʼanatou fakamau pea mo fakalogo te kau Iselaele ki te Lao, ko te puleʼaga katoa ʼe natou maʼuli fimalie. Pea tahi, ʼe toe fakavikivikiʼi ai ia Sehova.—Lev. 20:7, 8; Esa. 48:17, 18.
18 Te ʼu Ako: ’E tokaga’i e Sehova te ’u agaaga ’o ʼotatou maʼuli. ʼE loto ia ke tou faitotonu pea mo ʼoʼofa ki te hahaʼi. ʼE ina tokagaʼi te ʼu meʼa ʼae ʼe tou fai pea mo te ʼu meʼa ʼae ʼe tou palalauʼi ʼi ʼotatou maʼuli takitokotahi.—Hep. 4:13.
19-21. (1) Neʼe tonu ke feafeaʼi te aga ʼa te kau matutuʼa ki te hahaʼi ʼa te ʼAtua? (2) Kotea te ’u lao neʼe fakatuʼu e Sehova moʼo puipui te hahaʼi? Pea kotea ʼe tou ako mai ai?
19 Neʼe fia puipui e Sehova ia tana hahaʼi mai te ʼu aga kovi ʼa te ʼu puleʼaga ʼi ʼonatou tafaʼaki. Ko te tupuʼaga la ʼaia ʼo tana ui ki te kau matutuʼa ke natou fakahoko ia te Lao ʼaki te faitotonu, kae mole ʼaki te fakapalatahi. Ko tona fakaʼuhiga ʼe mole tonu ke natou agafefeka moka natou faifakamau. Neʼe tonu ke natou ʼofa ki te faitotonu.—Tet. 1:13-17; 16:18-20.
20 ’I te ʼofa ʼa Sehova ki tana hahaʼi, neʼe ina fakatuʼu te ʼu lao ʼe ina puipui ia te hahaʼi mai te ʼu aluʼaga heʼe faitotonu. Ohage la, ʼe ina puipui he tahi neʼe fai ki ai he ʼu tukugakovi ʼe hala. Neʼe feala ki he tahi neʼe tukugakoviʼi ke ina iloʼi pe ko ai ʼae neʼe ina tukugakoviʼi ia ia. Pea neʼe feala ke fai hana tagi ki te tuʼi fakamau. (Tet. 19:16-19; 25:1) Neʼe tonu ke maʼu he ʼu fakamoʼoni ʼe toko lua ke feala ai hona fakatuʼā. (Tet. 17:6; 19:15) ʼE feafeaʼi la mo kapau neʼe maumauʼi te lao e he Iselaele, kae ko he tokotahi pe ʼe fakamoʼoni ki ai? ʼE mole tonu anai ke ina ui ʼe hao anai ʼi te tuʼā. Koteʼuhi neʼe sio ia Sehova ki te meʼa ʼae neʼe ina fai. Neʼe toe puipui mo te famili mai te ʼu aga heʼe faitotonu. Logo la ko he tamai ʼe pule ki tona famili, kae ʼe fakatuʼakoi pe tana pule. Ko ʼihi tokakovi fakafamili, neʼe ko te maʼua ia ʼo te kau matutuʼa ʼo te kolo ke natou fakatokatoka te ʼu aluʼaga ʼaia.—Tet. 21:18-21.
21 Te ʼu Ako: Ko Sehova ’e ko he faʼifaʼitakiʼaga ʼe lelei tukupau. ʼE mole feala ʼi he ʼaho ke ina fai he meʼa ʼe heʼe faitotonu. (Pes. 9:8) ʼE ina fakapale ia natou ʼae ʼe fakalogo pea mo agatonu ki ʼana lao, kae ʼe ina tauteaʼi ia natou ʼae ʼe aga kovi he ʼe natou fakaʼaogaʼi kovi tanatou pule. (2 Sam. 22:21-23; Esk. 9:9, 10) ʼI ʼihi temi ʼe ʼi ai ʼihi ʼe natou fai he ʼu aga ʼe kovi kae natou hao pe mai te tuʼā. Kae ʼe fakahoko pe anai e Sehova tana faitotonu ʼi tona temi totonu. (Taag. 28:13) Pea ko natou leva ʼae ʼe mole natou fakahemala ʼi ʼanatou aga ʼae ʼe kovi, ʼe natou mahino anai “ ʼe ko he meʼa fakamataku moka tauteaʼi he tahi e te ʼAtua maʼuli.”—Hep. 10:30, 31.
KO AI ʼAE NEʼE PUIPUI TAFITO E TE LAO?
22-24. (1) Ko ai ʼae neʼe puipui tafito e te Lao, pea kotea ʼae ʼe tou ako ai ʼo ʼuhiga mo Sehova? (2) Kotea te fakatokaga ʼe tou maʼu ia Ekesote 22:22-24?
22 Neʼe puipui tafito e te Lao ia natou ʼae kua hala tamai mo faʼe, te ʼu fafine vitua pea mo te kau matapule. Koʼeni te fakatotonu neʼe fai ki te kau tuʼi fakamau ʼo Iselaele: “E mole ke fakahalai anai he fakamaau ke kovi Tet. 24:17) Neʼe ʼofa ia Sehova pea mo tokaga kia natou ʼae ʼe fakaʼofaʼofa, pea mo ina tauteaʼi ia natou ʼae ʼe natou gaohi koviʼi ia natou ʼaia.—Lau ia Ekesote 22:22-24.
ki te matapule mo te fanau ae kua mate tana tamai, pea e mole ke too anai te u kofu o he vitua o fakamooni ai te totogi o he maua.” (23 Neʼe toe puipui e te Lao ia natou ʼo te famili ki te ʼu aga heʼe ʼaoga, he neʼe ina tapuʼi te momoe ʼa he tahi mo he tahi ʼo tona famili. (Lev. 18:6-30) Neʼe fai e te hahaʼi ʼo te ʼu fenua ʼae ʼi ʼonatou tafaʼaki ia te ʼu aga heʼe ʼaoga ʼaia, kae neʼe fakatotonu e Sehova ki tana hahaʼi ke natou fehihiʼa ki te ʼu aga ʼaia.
24 Te ʼu Ako: Neʼe fakanofo e Sehova ʼihi tagata ki he ʼu tuʼulaga. Pea ʼe ina loto ke natou tokakaga lelei kia natou ʼae ʼe natou takitaki. ʼE fehiʼa ki te ʼu aga heʼe ʼaoga pea ʼe ina fai ia meʼa fuli ke puipui ia natou ʼae ʼe vaivavai pea mo fakamauʼi ia natou ʼae ʼe natou gaohi koviʼi ia natou.
KO TE LAO, “ ʼE KO HE ʼATA PE IA ʼO TE ʼU MEʼA LELEI ʼAE KA HOKO MAI”
25-26. (1) He ko’e ’e mole feala ke ma’u te ʼofa mo kapau ʼe puli te faitotonu? (2) Kotea ʼae ka tou vakaʼi anai ʼi te alatike ʼae ka hoa mai?
25 ’E mole feala ke ma’u te maʼuli ʼi te kele mo kapau ʼe mole he ʼaele ke tou manava ki ai. ʼO toe feia pe, ʼe mole feala ke maʼu te ʼofa mo kapau ʼe puli te faitotonu. Kapau ʼe tou tui papau ʼe faitotonu ia Sehova kia tatou, ʼe tuputupu anai totatou ʼofa ʼae kia te ia. Pea kapau ʼe tou ʼoʼofa ki te ʼAtua pea mo ʼana lao, ʼe tou ʼoʼofa anai ki te hahaʼi pea ʼe mole tou fai anai he aga heʼe faitotonu kia natou.
26 ʼAki te Lao ʼa Moisese neʼe feala ki te hahaʼi ke natou fakaovi kia Sehova. Kae ko Kilisito ʼe ko te fakaʼosiʼaga ʼo te Lao. Koia neʼe fetogi ai te Lao ʼaki he meʼa ʼe lelei age. (Loma 10:4) Koia neʼe ui ai e te apositolo ko Paulo ko te Lao “ ʼe ko he ʼata pe ia ʼo te ʼu meʼa lelei ʼae ka hoko mai.” (Hep. 10:1) ʼE tou vakaʼi anai ʼi te alatike ʼae ka hoa mai, pe ʼe kotea te ʼu meʼa lelei ʼaia, pea he koʼe ʼe maʼuhiga ke maʼu te ʼofa pea mo te faitotonu ʼi te ʼu kokelekasio Fakakilisitiano.
KATIKO 109 Tou ʼOfa Mamahi ʼAki Te Loto Katoa
^ pal. 5 Ko te alatike ʼaeni ʼe kau ki te ʼu alatike ʼe fa ʼae ʼe talanoa ai pe koʼe ʼe feala ke tou tui papau ʼe tokaga ia Sehova kia tatou. Ko te ʼu alatike ʼe tolu ʼae ʼe kei toe, ʼe maʼu anai ʼi Te Tule Leʼo ʼo Maio 2019. Pea koʼeni ʼonatou kupu tafito: “Ko Te ʼOfa Mo Te Faitotonu ʼi Te Kokelekasio Fakakilisitiano,” “Ko Te ʼOfa Mo Te Faitotonu Logo La Te Agakovi,” “Ko He Fakalotofimalie Kia Natou ʼAe ʼe Gaohi Koviʼi.”
^ pal. 2 HE ʼU FAKAMAHINO: Ko fakatotonu ʼe 600 tupu neʼe foaki e Sehova ki te kau Iselaele ʼaki ia Moisese, ʼe fakahigoa ko “te Lao,” “te Lao ʼa Moisese,” “te Lao Fakamoisese” peʼe “ko te ʼu fakatotonu.” Pea ko te kupu Lao ʼe feala ke toe fakaʼuhiga ki te ʼu ʼuluaki tohi ʼe nima ʼo te Tohi-Tapu (mai ia Senesi kia Tetelonome) peʼe ki te ʼu Koga Tohi-Tapu Fakahepeleo katoa.
^ pal. 60 TAKAFI: ʼE loto e Sehova ke maʼuli fimalie te ’u fanau, ke natou logo’i ’e ʼofaina’i natou e ʼanatou matuʼā pea mo ’ako’i natou
FAKAMATALA ʼO TE ʼU PĀKI Takafi: Ko he fafine Iselaele ʼe ina teuteu’i te meʼa kai pea mo ʼana taʼahine. ʼI muli, ʼe ko he tamai ʼe ina akoʼi ki tona foha te tokaga ki he ovi.
^ pal. 64 FAKAMATALA ʼO TE ʼU PĀKI Pasina 24: Ko he kau matutuʼa ʼi te matapa ʼo te kolo ʼe natou tokoni ki he fafine vitua pea mo tana kiʼi tama, neʼe gaohi koviʼi e te tagata fakatau koloa.