1. Neʼe fakaha feafeaʼi e te ʼu Fakamoʼoni ʼa Sehova ʼaeni ʼe toko tolu tanatou agatonu kia Sehova?

KOTOU fakakaukauʼi age muʼa te ʼu aluʼaga ʼaeni neʼe hoko ki he ʼu Fakamoʼoni ʼa Sehova. (1) Ko he kiʼi taʼahine ʼi te fale ako. ʼE kole e tona faiako ki te kalasi ke natou fai ia he fakafiafia fakalotu. ʼE iloʼi e te kiʼi taʼahine ʼe mole leleiʼia e te ʼAtua te taʼi fakafiafia ʼaia, koia ʼe fakafisi ai ki tona faiako ʼaki he aga fakaʼapaʼapa. (2) Ko he tupulaga ʼe umiuminoa, ʼe alu ʼo faifakamafola ʼi te ʼu ʼapi. ʼE ina iloʼi ʼe ʼi ai te kiʼi tama ʼe nā ako tahi, ʼe nofo ʼi te ʼapi ʼae ʼe hoa mai, pea ki muʼa atu, neʼe kua ina vaʼi te Kau Fakamoʼoni ʼa Sehova. Kae neʼe alu pe te tupulaga ʼo tukituki tona matapa. (3) Ko he tehina ʼe gaue kinakina ke feala hana taupau tona kiʼi famili. ʼI te tahi ʼaho, neʼe ui age e tona patolo ke ina fai he agakaka. Neʼe fakamahino age e te tehina, ʼe mole feala ke ina fai te aga ʼaia, tatau aipe pe ʼe fakamavae ia ia, he ʼe maʼua ia ke fakaʼapaʼapa ki te lao. Ko te koga ʼaia ʼe fakamaʼua e te ʼAtua ke fai e ʼana kaugana.—Loma 13:1-4; Hep. 13:18.

2. Kotea te ʼu fehuʼi ʼae ka tou tali anai ki ai?

² Kotea la te kalitate neʼe kotou tokagaʼi ʼi te foʼi toko tolu ʼaeni? Neʼe lagi lahi te ʼu kalitate neʼe kotou tokagaʼi, ohage la ko tonatou lototoʼa, peʼe ko tanatou aga fakahagatonu. Kae ʼe ʼi ai te tahi kalitate ʼe maʼuhiga ʼaupito: ko te agatonu. Neʼe natou agatonu fuli kia Sehova. Neʼe mole he tahi ia natou toko tolu neʼe ina maumauʼi ia he lao ʼa Sehova. Koʼena te aga ʼae ʼe tonu ke fai e ia ʼae ʼe fia nofo agatonu ki te ʼAtua. ʼE mahino ia, neʼe fiameʼameʼa ia Sehova ʼi tana sio ʼae ki tanatou agatonu. ʼO feia pe la mo tatou, ʼe tou fia fakafiafiaʼi ia te loto ʼo tatatou Tamai ʼae ʼe ʼi selo. Tou faiga ke tou tali ki te ʼu fehuʼi ʼaeni: Kotea ia te agatonu? He koʼe ʼe tonu ke tou agatonu? Kotea ʼae ʼe tonu ke tou fai ke tou fakatotonu malohi ai ke tou nonofo agatonu ʼi te ʼu temi faigataʼa ʼaeni?

3. (1) ʼE tou fakaha feafeaʼi ʼe tou agatonu? (2) Kotou fakamahino pe koʼe ʼe maʼuhiga ke katoa tatatou agatonu?

³ ʼE tou fakaha feafeaʼi tatatou agatonu ʼae ki te ʼAtua? ʼE tonu ke tou ʼoʼofa kia Sehova ʼi totatou loto katoa, pea ke tou pipiki ʼateaina pe kia te ia. Pea ka tonu ke tou fai he tonu, ʼe tou fakamuʼamuʼa tuʼumaʼu anai ia te finegalo ʼo te ʼAtua. Koʼeni te tahi ʼu fakamahino. Ko te kupu Fakahepeleo ʼae neʼe fakaliliu ʼaki te kupu “agatonu” ʼi te Tohi-Tapu, ʼe toe fakaʼuhiga ki he meʼa ʼe haohaoa, pe’e katoa, peʼe heʼe mele. Ohage la, neʼe tonu ke sakilifisioʼi e te kau Iselaele ia he ʼu manu kia Sehova. Pea ʼe ui ʼi te Lao, ʼe tonu ke natou ʼaumai he ʼu manu ʼe heʼe mele. * (Lev. 22:21, 22) Neʼe mole tonu ke natou ʼomai mo he manu neʼe vaʼe mutu, peʼe motu hona taliga, peʼe mata kivi, peʼe ko he manu ʼe mahaki. Neʼe fakamaʼua e Sehova ke natou ʼaumai he manu ʼe katoa mo heʼe mele. (Mala. 1:6-9) ʼE tou mahino pe koʼe ʼe maʼuhiga kia Sehova ke tou foaki he manu ʼe katoa mo heʼe  mele. Ka tou totogi he meʼa, peʼe ko he fuaʼi ʼakau, peʼe ko he tohi, peʼe ko he meʼa gaue, ʼe mole tou leleiʼia mo kapau ʼe mole katoa te meʼa ʼae neʼe tou totogi. Kae ʼe tou loto ke katoa. ʼE toe feia pe mo Sehova, ʼe loto ia ke katoa totatou ʼofa pea mo tatatou agatonu ʼae kia te ia.

4. (1) ʼE tonu koa ke tou haohaoa pea hoki feala leva ke tou ui ʼe tou agatonu? (2) Kotea ʼae ʼe loto e Sehova ke tou fai ʼi te Pesalemo 103:12-14?

⁴ Ko tona fakaʼuhiga koa ʼe tonu ke tou haohaoa, ke ʼaua naʼa tou agahala, pea hoki feala leva ke tou ui ʼe tou agatonu? ʼI ʼihi temi ʼe tou tokagaʼi ʼe lahi ʼotatou vaivaiʼaga, peʼe ko ʼatatou lakahala. Kae ʼe mole tonu ke tou manatu ʼe mole feala ke tou agatonu mo kapau ʼe tou lakahala. Tou vakaʼi ia tupuʼaga ʼe lua. ʼUluaki, ʼe mole nofo ia Sehova ʼo lamalama ʼatatou hala. ʼE ui fenei ʼi te Tohi-Tapu: “Kana nee ke taupau te manatu ki te u agahala, [Sehova], ko ai e feala anai ke mauli?” (Pes. 130:3) ʼE ina iloʼi totatou ʼuhiga agahala, pea ʼe fakamolemole gafua. (Pes. 86:5) Lua, ʼe iloʼi e Sehova ʼotatou tuʼakoi, ʼe mole ina fakamaʼua mai ke tou fai he meʼa ʼe mole tou lavaʼi. (Lau ia Pesalemo 103:12-14.) Kae ʼe feafeaʼi hatatou liliu ʼo katoa pea mo heʼe mele ki ʼona mata?

5. Kapau ʼe fia agatonu he tahi kia Sehova, he koʼe ʼe maʼuhiga ke ina maʼu ia te ʼofa?

⁵ Kapau ʼe fia agatonu he tahi kia Sehova, ʼe maʼuhiga ke ina maʼu ia te ʼofa. ʼE tonu ke katoa totatou ʼofa ʼae ki te ʼAtua, ke tou pipiki ʼateaina pe kia te ia, tatatou Tamai ʼae ʼe ʼi selo. Kapau ʼe katoa totatou ʼofa, maʼia ʼi te ʼu temi ʼae ʼe ʼahiʼahiʼi ai tatou, ʼe tou fakaha ai ʼe tou agatonu. (1 Klk. 28:9; Mat. 22:37) ʼE kotou manatuʼi te foʼi toko tolu ʼae neʼe tou palalau ki ai ʼi te kamata? He koʼe neʼe natou fai te faʼahi ʼaia? Neʼe fehiʼa koa te kiʼi taʼahine ki te ʼu fakafiafia ʼae ʼi te fale ako? Neʼe loto koa te tama tupulaga ke fakalainoaʼi ia ia ʼi te faifakamafola? Neʼe loto koa te tehina ke fakamavae mai tana gaue? Kailoa ia. Kae neʼe natou iloʼi lelei te ʼu lao faitotonu ʼa Sehova, pea ko te meʼa ʼae neʼe maʼuhiga tafito kia natou ko tanatou fakafiafiaʼi tanatou Tamai ʼae ʼe ʼi selo. Neʼe natou ʼoʼofa ia Sehova, koia neʼe natou fakamuʼamuʼa ai tona finegalo ʼi te ʼu tonu ʼae neʼe natou toʼo. ʼI tanatou fai ia te faʼahi ʼaia, neʼe natou fakaha ai tanatou agatonu.

6. (1) He koʼe ʼe tonu ke tou agatonu? (2) He koʼe neʼe mole nonofo agatonu ia Atama mo Eva kia Sehova?

⁶ He koʼe ʼe maʼuhiga kia tatou fuli ke tou agatonu? He neʼe tukugakoviʼi e Satana ia Sehova, pea neʼe ina toe laukoviʼi mo tatou. ʼI te ʼoloto ʼo Eteni, neʼe liliu te ʼaselo agatuʼu ʼaia ko Satana, “Ko He Tahi ʼe Fakafeagai.” Neʼe ina ui e agakovi te ʼAtua, mo manatu pe kia ia  totonu, pea ʼe ko he Pule ʼe agakaka. ʼI tana fai te ʼu loi ʼaia, neʼe ina ʼulihi ai te huafa maʼa ʼo Sehova. Kae neʼe fakalogo pe ia Atama mo Eva kia Satana, ʼo nā fakafeagai ai kia Sehova. (Sen. 3:1-6) ʼI tanā maʼuli ʼi Eteni, neʼe lahi te ʼu faigamalie neʼe nā maʼu ke nā fakamalohiʼi tonā ʼofa ʼae kia Sehova. Kae ʼi te temi ʼae neʼe ʼahiʼahiʼi ai naua e Satana, neʼe mole kei katoa tonā ʼofa. Kae ʼe ʼi ai te tahi fehuʼi ʼe feala ke tou lagaʼi: ʼE feala koa ke nofo agatonu he tahi kia Sehova ʼAtua, mo kapau ʼe mole ʼofa ai? ʼE feala koa ki te tagata ke ina fakaha tana agatonu? Neʼe lagaʼi te fehuʼi ʼaia ʼi te aluʼaga ʼae neʼe hoko kia Sopo.

7. Ia Sopo 1:8-11, kotea te manatu ʼa Sehova ʼo ʼuhiga mo Sopo pea kotea te manatu ʼa Satana ʼo ʼuhiga mo Sopo?

⁷ Neʼe maʼuli ia Sopo ʼi te temi ʼae neʼe mavae ai te kau Iselaele mai Esipito. Neʼe makehe tana agatonu. Neʼe hage pe ia Sopo ko tatou, neʼe ko te tagata agahala. Neʼe ina fai ni lakahala. Kae neʼe ʼofa ia Sehova ia ia ʼuhi ko tana agatonu. Kae neʼe ui e Satana ʼe mole feala ke nofo agatonu he tahi kia Sehova. ʼI tana fai te ʼu palalau ʼaia neʼe hage pe neʼe fakalainoaʼi e Satana ia Sehova. Koia neʼe ui ai e Sehova kia Satana ke ina tokagaʼi ia Sopo. Neʼe fakamoʼoni e Sopo ʼi tona maʼuli, ko Satana ʼe gutuloi. Neʼe kole e Satana ke ʼahiʼahiʼi muʼa ia Sopo pe ʼe nofo agatonu anai kia Sehova. Neʼe falala ia Sehova ki tona kaumeʼa ko Sopo, koia neʼe ina tuku ai ia Satana ke ina ʼahiʼahiʼi ia ia.—Lau ia Sopo 1:8-11.

8. Neʼe ʼahiʼahiʼi feafeaʼi e Satana ia Sopo?

⁸ Ko Satana ʼe agakovi pea mo faifakapo. Neʼe ina pulihi te ʼu koloa ʼo Sopo, mo ʼana kaugana, pea neʼe maumauʼi tona matagafua ia muʼa ʼo te hahaʼi. Neʼe ina matehi te ʼu fanau ʼofaina ʼe toko hogofulu ʼa Sopo. Hili ʼaia pea neʼe ina fakamamahiʼi leva ia Sopo ʼo ina fakatupu he ʼu foʼi polo ʼi tona sino katoa, mai  tona foʼi ʼulu ki ʼona lalo vaʼe. Neʼe hoha ʼaupito te ʼohoana ʼo Sopo, pea mo lotomamahi. Koia neʼe ina uga ai ia Sopo ke laukovi ki te ʼAtua kae mate. Neʼe fia mate ia Sopo, kae logo la ʼona mamahi, neʼe nofo agatonu pe ia kia Sehova. ʼOsi ʼaia pea neʼe toe ʼahiʼahiʼi e Satana ia Sopo. Neʼe ina fekauʼi he ʼu tagata ʼe toko tolu, neʼe ko te ʼu kaumeʼa pe ʼo Sopo, ke natou olo ʼo fakasiosio ia Sopo, kae neʼe mole natou fakafimalieʼi ia tona loto. Kae neʼe natou fakatonutonuʼi ia ia pea mo munaʼi ia ia. Neʼe natou ui ʼe ko te ʼAtua ʼae neʼe ina fakatupu ʼona malaʼia pea ʼe mole ina tokagaʼi tana nofo agatonu. Pea neʼe natou ui age ki ai ʼe ko he tagata agakovi, koia ʼe tau ai mo te ʼu malaʼia fakamataku ʼaia.—Sopo 1:13-22; 2:7-11; 15:4, 5; 22:3-6; 25:4-6.

9. Kotea ʼae neʼe mole fia tuku e Sopo ʼi te temi ʼae neʼe tau ai mo te ʼu ʼahiʼahi?

⁹ Kotea ʼae neʼe fai e Sopo ʼi tana tau mo te ʼu aluʼaga ʼaia? Ko Sopo neʼe mole ko he tagata neʼe haohaoa. Neʼe ita pea neʼe ina pupulaʼi ʼona kaumeʼa. Neʼe ina fai he ʼu palalau neʼe mole ina fakakaukauʼi, pea neʼe fakahemala leva ki ʼamuli. Neʼe ina ui e faitotonu age ia ia ʼi te ʼAtua. (Sopo 6:3; 13:4, 5; 32:2; 34:5) Kae ʼi te ʼu temi faigataʼa ʼaia neʼe tau ai ia Sopo mo ni mamahi fakamataku, neʼe mole situʼa ia kia Sehova ʼAtua. Neʼe mole tui ia ki te ʼu loi ʼae neʼe fai age e ʼona kaumeʼa. Neʼe ina ui fenei: “ ʼE mole feala ke au ui ko koutou ko te kau agatonu! ʼO aʼu ki toku mate, ʼe mole au tuku anai taku agatonu!” (Sopo 27:5, MN) Neʼe ha ʼi te ʼu palalau ʼa Sopo tana fakatotonu malohi ʼae ke nofo agatonu kia Sehova, tatau aipe pe kotea te ʼu aluʼaga ʼae ka hoko. Neʼe mole ina fia tuku tana agatonu, pea ʼe feala pe ke tou fai feia mo tatou.

10. ʼE ʼahiʼahiʼi feafeaʼi tatou e Satana ohage ko tana fai kia Sopo?

¹⁰ ʼE toe ʼahiʼahiʼi tatou e Satana, ohage pe ko tana fai kia Sopo. ʼO feafeaʼi? ʼE ui e Satana ʼe mole tou ʼoʼofa moʼoni ia Sehova ʼAtua, pea ʼe tou tuku anai tatatou tauhi ʼae kia Sehova, mo kapau ʼe tou fia haofaki ʼotatou maʼuli. Ki tana manatu, ʼe mole feala anai ke tou nonofo agatonu. (Sopo 2:4, 5; Fkha. 12:10) Kae kotea ʼe kotou logoʼi moka kotou logo ki te ʼu palalau ʼaia? ʼE kotou lotomamahi koa? Kotou fakakaukauʼi age muʼa te aluʼaga ʼaeni: ʼE falala ia Sehova kia koe, koia ʼe ina tuku atu he faigamalie maʼuhiga ke ke fakaha tau agatonu. Neʼe fakagafua e Sehova kia Satana ke ina ʼahiʼahiʼi ia koe pe ʼe ke nofo agatonu anai kia te ia peʼe kailoa. ʼE falala ia Sehova ʼe ke nofo agatonu anai pea ʼe ke fakamoʼoni anai ko Satana ʼe gutuloi. Pea ʼe Ina fakapapau atu ʼe tokoni atu anai. (Hep. 13:6) ʼI toe pilivilesio leva tatatou iloʼi ʼae ʼe falala ia te Tuʼi ʼo te ʼatulaulau kia tatou. Kua kotou mahino la pe koʼe ʼe maʼuhiga ke tou nonofo agatonu? He kapau ʼe tou fai ia te faʼahi ʼaia, ʼe tou fakamoʼoni ai ko Satana ʼe gutuloi, mo tou fakaʼapaʼapa ai ki te huafa maʼa ʼo tatatou Tamai, pea mo lagolago ki tana pule faʼitaliha. Kotea ʼae ʼe feala ke tou fai ke tou taupau ai tatatou agatonu?

11. Kotea te ako ʼe feala ke tou maʼu mai ia Sopo?

¹¹ “ ʼI te ʼu ʼaho fakamuli” ʼaeni, kua ʼaʼasili kovi te ʼahiʼahiʼi e Satana ia te hahaʼi ʼa te ʼAtua. (2 Tim. 3:1) Kotea ʼae ʼe tonu ke tou fai ke tou taupau maʼu tatatou agatonu? ʼE ʼi ai te tahi ako ʼe feala ke tou maʼu mai ia Sopo. ʼI muʼa ʼo tona ʼahiʼahiʼi, neʼe kua tuʼa lahi te fakaha e Sopo tana agatonu ki te ʼAtua. Tou vakaʼi fakatahi ia te ʼu ako ʼe tolu ʼe feala ke tou maʼu mai ia Sopo, ʼe tokoni mai anai ke tou nonofo agatonu ki te ʼAtua.

12. (1) Ohage ko tona ui ia Sopo 26:7, 8, 14, kotea ʼae neʼe fai e Sopo ke tupu ai tana manavasiʼi pea mo tana fakaʼapaʼapa kia Sehova? (2) Kotea ʼae ʼe feala ke tou fai?

¹² Neʼe fakaʼapaʼapa ia Sopo kia Sehova, koia neʼe malohi ai tona ʼofa ʼae ki te ʼAtua. Neʼe toʼo e Sopo he temi loaloaga ke ina fakakaukauʼi te ʼu meʼa ʼae neʼe fakatupu e Sehova.  (Lau ia Sopo 26:7, 8, 14.) Neʼe punamaʼuli ʼi tana fakakaukauʼi ia te kele, mo te lagi, mo te ʼu ʼao, mo te mana. Pea neʼe mahino ai, ko he ʼu kiʼi meʼa veliveli pe kua ina iloʼi ʼo ʼuhiga mo te ʼu meʼa ʼae neʼe fakatupu e Sehova. Neʼe toe maʼuhiga kia ia ia te ʼu Folafola ʼa te ʼAtua. Koia neʼe ina ui fenei ai: “Neʼe au taupau fakalelei ʼana folafola.” (Sopo 23:12, MN) Neʼe punamaʼuli ʼosi ia Sopo ʼi te ʼu meʼa ʼae neʼe fakatupu e Sehova, koia neʼe fakaʼapaʼapa lahi ai kia ia. Neʼe ʼofa ki tana Tamai pea neʼe ina fia fakafiafia’i tona loto. Neʼe ina fakatotonu malohi ai ke nofo agatonu. ʼE tonu ke tou faʼifaʼitakiʼi ia Sopo. ʼE lahi te ʼu meʼa neʼe fakatupu e te ʼAtua kua tou mahino ki ai, ʼi te ʼu meʼa ʼae neʼe iloʼi e te hahaʼi ʼi te temi ʼo Sopo. Pea kua tou maʼu ia te Tohi-Tapu katoa, ʼo feala ai ke tou iloʼi lelei pe ko ai ia Sehova. ʼAki te ʼu faʼahi ʼaia, kua tou fakaʼapaʼapa pea mo manavasiʼi ki te ʼAtua, ʼo tupu ai totatou ʼoʼofa pea mo tatatou fakalogo kia te ia. Pea ʼe tuputupu ai tatatou fia nonofo agatonu kia te ia.—Sopo 28:28.

13-14. (1) Ohage ko tona ui ia Sopo 31:1, neʼe fakaha feafeaʼi e Sopo tana fakalogo? (2) ʼE tou lava faʼifaʼitakiʼi feafeaʼi ia ia?

¹³ Neʼe fakalogo katoa ia Sopo ki te ʼAtua, koia neʼe ina lava taupau ai tana agatonu. Neʼe iloʼi e Sopo ko he tahi ʼe fia agatonu kia Sehova, ʼe maʼua ke fakalogo kia te ia. Ka tou fakalogo ki te ʼu lao ʼa te ʼAtua pea ʼe toe ʼaʼasili ai tatatou fia taupau tatatou agatonu. Neʼe faiga malohi ia Sopo ke fakalogo ki te ʼAtua ʼi tona maʼuli ʼo te ʼaho fuli. Ohage la, neʼe tokaga ki ʼana felogoi ʼae pea mo te hahaʼi fafine. (Lau ia Sopo 31:1.) Neʼe kua ʼohoana ia Sopo, pea neʼe ina iloʼi ʼe mole feala ke ina tokagaʼi he tahi fafine ʼi tuʼa ʼo tona ʼohoana. Ia ʼaho nei, kua lahi te ʼu fakaneke ke tou fai ni felaveʼi fakasino heʼe ʼaoga. Kae ʼe tonu ke tou faʼifaʼitakiʼi ia Sopo, ʼo mole tou manako ki he tahi ʼe mole ko tokita ʼohoana. ʼE tou fakafisi ki te sioʼi ʼo he ʼu pāki peʼe ko he ʼu ʼata ʼe kovi. (Mat. 5:28) Kapau ʼe tou puleʼi feia ʼotatou holi, ʼe tou lotomalohi anai ke tou taupau tatatou agatonu ʼae ki te ʼAtua.

 ¹⁴ Neʼe toe fakaha e Sopo tana agatonu ʼi tana faʼahiga fakaʼaogaʼi ʼona koloa. Neʼe iloʼi e Sopo kapau ʼe ina tuku tana falala ki ʼona koloa, ʼe feala anai ke ina fai he agahala mamafa pea tauteaʼi anai ia ia. (Sopo 31:24, 25, 28) Ia ʼaho nei, ʼe tou maʼuʼuli ʼi he malama ʼe manako pe ki te paʼaga. Kapau ʼe tou maʼuliʼi te ʼu pelesepeto Fakatohi-tapu ʼo ʼuhiga mo te fakaʼaogaʼi fakapotopoto ʼo te falā pea mo te ʼu koloa, ʼe tou lotomalohi anai ke tou taupau tatatou agatonu.—Taag. 30:8, 9; Mat. 6:19-21.

15. (1) Kotea ʼae ʼe tokoni mai ke tou lava taupau tatatou agatonu? (2) He koʼe ʼe ko he tokoni ʼaia ke tou taupau te ʼamanaki ʼae ʼe foaki mai e Sehova?

¹⁵ Neʼe taupau e Sopo tana agatonu he neʼe ʼamanaki tuʼumaʼu pe ia ʼe fakapale anai e te ʼAtua. Neʼe tui papau ia Sopo ʼe tokagaʼi e te ʼAtua tana agatonu. (Sopo 31:6) Logo la ʼona ʼahiʼahi, kae neʼe falala tuʼumaʼu ia Sopo ʼe fakapale anai ia ia e Sehova, koia ʼae neʼe nofo agatonu ai. Neʼe fiafia ʼaupito ia Sehova ʼi te agatonu ʼa Sopo, pea neʼe Ina fakapale lahi ia ia lolotoga tona maʼuli. (Sopo 42:12-17; Sakp. 5:11) Pea ʼe toe maʼu anai e Sopo he ʼu tapuakina ʼe lahi age moka liliu ʼo haohaoa. ʼE kotou tui papau koa ʼe fakapale anai koutou e Sehova ʼuhi ko takotou agatonu? ʼEi foki, he ʼe mole fetogi totatou ʼAtua. (Mala. 3:6) Kapau ʼe tou manatuʼi ʼe maʼuhiga kia Sehova tatatou agatonu, ʼe feala anai ke tou taupau maʼu ʼi ʼotatou loto, ia tatatou ʼamanaki taulekaleka ʼae ki te ka haʼu.—1 Tes. 5:8, 9.

16. Kotea ʼae tonu ke tou fakatotonu ke tou fai?

¹⁶ Kotou fakatotonu malohi ke kotou taupau maʼu takotou agatonu. ʼI ʼihi temi, ʼe feala pe ke kotou manatu ʼe kotou to tokotahi, pea ʼe mole he tahi ʼe agatonu kia Sehova. ʼE kotou fakatahi anai mo ni lauʼi miliona hahaʼi agatonu ʼi te kele katoa. ʼE kotou fakatahi anai mo te ʼu tagata mo te ʼu fafine ʼae neʼe nonofo agatonu kia Sehova ʼi te ʼu temi muʼa, logo la neʼe tuʼutamakiʼia ʼonatou maʼuli. (Hep. 11:36-38; 12:1) ʼOfa pe ke tou fakatotonu malohi ke tou faʼifaʼitakiʼi ia Sopo, ʼae neʼe ina ui fenei: “ ʼE mole au tuku anai taku agatonu!” Kapau ʼe kotou nonofo agatonu kia Sehova, ʼe kotou fakakololiaʼi ia ia ʼo talu ai.