Ko taku matuʼa ko John Mills, neʼe papitema ʼi te Kolo ʼo New York ʼi tona taʼu 25 ʼi te 1913. Ko te tehina ko Russell ʼae neʼe ina fai te akonaki ʼo te papitema. Mole faʼa fualoa, neʼe alu taku matuʼa ki Trinité pea neʼe ina ʼohoanaʼi ai ia Constance Farmer ko he tahi neʼe faiva ʼi tana akoʼi te Tohi-Tapu. Neʼe tokoni taku matuʼa ki tona kaumeʼa ko William R. Brown ʼo fakaha age ia te “Photo-Drame de la Création.” Pea neʼe ina fai feia ʼo aʼu ki te hinoʼi ʼo te famili Browns ki Afelika Uesite ʼi te 1923. Ko Papa mo Mama, neʼe nā maʼu te ʼamanaki ʼae ke nā maʼuʼuli ʼi selo, pea neʼe nā hoko atu ʼi Trinité.

Neʼe matou toko hiva. Neʼe fakahigoaʼi te ʼuluaki ko Rutherford ohage ko te pelesita ʼo te Watch Tower Bible and Tract Society. Neʼe au tupu ʼi te ʼaho 30 ʼo Tesepeli 1922, pea neʼe fakahigoaʼi au ohage ko Clayton J. Woodworth, ko ia ʼae neʼe takitaki ki te nusipepa LʼÂge dʼOr (ʼi te temi nei Kotou ʼAʼala!). Neʼe lelei tomatou akoʼi e ʼamatou matuʼā kae tafito ki te ʼu fakatuʼutuʼu fakalaumalie. Neʼe maʼu e tamatou Faʼe he fealagia maʼuhiga moka ina fakamahino mai te ʼu manatu ʼi te Tohi-Tapu. Pea ko Papa ia, neʼe ina fai he ʼu haka mo ʼonā mata mo tona sino katoa moʼo fakamatala mai te ʼu hisitolia Fakatohi-tapu.

Neʼe fua lelei ʼanā faiga. Ko te toko tolu ia matou tagata ʼe toko nima, neʼe kau ki Te Ako ’o Kileate. Ko te toko tolu ʼo ʼomatou kiʼi tokolua neʼe pionie lolotoga ni taʼu ʼi Trinité-et-Tobago. ʼUhi ko te lelei ʼo ʼanā faʼifaʼitaki pea mo tanā akoʼi matou neʼe hage ia ko matou ko he ʼu fanau neʼe to “i te fale o [Sehova].” Neʼe tokoni mai ʼanā fakalotomalohi ke matou nonofo mo fiafia “i te u lotoa o totatou Atua.”—Pes. 92:14.

Kua fai ia te ʼu fakatuʼutuʼu ʼo te faifakamafola ʼi tomatou ʼapi. ʼE fakatahitahi ai te kau pionie pea ʼi ʼihi temi ʼe natou faipalalau ʼo ʼuhiga mo te tehina ko George Young ko he misionea mai Kanata pea neʼe alu ia ki Trinité. Neʼe fakamatala fakafiafia mai e ʼaku matuʼā ʼo ʼuhiga mo ʼona kaumeʼa ko  Browns ʼae kua nonofo ʼi Afelika Uesite. ʼAki te ʼu aluʼaga ʼaia, neʼe ina ʼekenaki ai au ke au toʼo te selevisi ʼi toku taʼu 10.

Ko ʼamatou tohi ʼi te temi ʼaia, neʼe fakahaha fakahagatonu ai te ʼu aluʼaga ohage la ko te lotu hala mo te ʼu faikoloa heʼe faitotonu pea mo te faipolitike fakakaka. Ki muli mai, ʼi te 1936 ko te kau takitaki lotu neʼe natou ʼekenaki te puleʼaga ʼo Trinité ke natou tapuʼi te ʼu tohi fuli ʼo te Watch Tower. Neʼe matou fufu ia te ʼu tohi, kae neʼe hoko atu pe tamatou fakaʼaogaʼi ʼo aʼu ki te ʼosi fuli ʼo te ʼu tohi ʼae neʼe tanaki. Neʼe matou fai leva hamatou ʼu haʼele lalo peʼe ʼaki he ʼu lelue ʼo fakaʼaogaʼi ʼamatou kiʼi pepa lotu peʼe ko te ʼu pano. Neʼe matou olo leva ki te kolo ʼo Tunapuna fakakutuga ʼi te ʼu motoka ʼe ʼi ai te ʼu fakatagi, neʼe matou faifakamafola ai ʼo aʼu ki te ʼu potu taupotu ʼo Trinité. ʼE ko he meʼa fakafiafia he ʼe ʼaki te ʼu faʼahi ʼaia neʼe hoko, neʼe malave kia au pea neʼe au papitema ʼi toku taʼu 16.

Ko tamatou tofiʼa fakafamili pea mo ʼaku gaue neʼe ina fakatupu ia au te holi ʼae ke au misionea. Ko te holi ʼaia, neʼe kei malohi ia au ʼi te temi ʼae neʼe au alu ai ki Aruba ʼi te 1944 pea neʼe au felaveʼi ai mo te tehina ko Edmund W. Cummings. Neʼe matou fiafia ʼi te fakatahi mo te toko hogofulu ʼi te ʼAho Fakamanatu ʼo te taʼu 1945. ʼI te taʼu 1946, neʼe tuʼu ai leva te ʼuluaki kokelekasio ʼi te motu ʼaia.

Mole faʼa fualoa ki ai, neʼe au faifakamafola faigamalie ki he taʼahine ʼe ma gaue fakatahi ko Oris Williams. Ko Oris neʼe malohi tana fakafeagai ʼuhi ko te ʼu akonaki ʼae neʼe akoʼi age ki ai. ʼUhi ko tana akoʼi te Tohi-Tapu, neʼe ina iloʼi ai te Folafola ʼa te ʼAtua pea neʼe papitema ʼi te ʼaho 5 ʼo Sanualio 1947. ʼAki te temi, neʼe ma femanakoʼaki leva pea ma ʼohoana. Pea neʼe pionie ʼi Novepeli 1950. Pea neʼe toe kamata toku maʼuli mo Oris.

Neʼe fakaafe maua ke ma kau ki Te Ako ’o Kileate, ʼi te 1955. ʼI tamā teuteu ki te pilivilesio ʼaia, neʼe ma mavae ʼi ʼamā gaue, fakatau toma ʼapi pea mo te ʼu meʼa ʼae neʼe ma maʼu pea mo tauʼine ki Aruba. ʼI te ʼaho 29 ʼo Sulio 1956, neʼe maʼu toma pepa ʼi te 27 kalasi ʼo Te Ako ’o Kileate pea neʼe hinoʼi maua ki Nigéria.

Neʼe tokagaʼi e Oris: “ ʼE feala kia Sehova ke tokoni ki he tahi ʼe gaue fakamisionea ke ina lavaʼi he faʼahiga maʼuli ʼi he fenua pe ʼe alu ki ai. ʼE mole au hage ko toku ʼohoana, neʼe mole au fia misionea. Neʼe au fia maʼu hoku ʼapi pea mo haku ʼu tamaliki. Kae neʼe fetogi leva taku manatu ʼi taku iloʼi ʼae te maʼuhiga pea mo fakavilivili ke fakamafola te logo lelei. ʼI te temi pe ʼae neʼe maʼu ai toma pepa ʼi Kileate, neʼe kua tokalelei ke au faifakamafola ohage ko he misionea. Kae ʼi tamā heheka ki te vaka Queen Mary, mai Worth Thornton ko te pilo ʼo te tehina ko Knorr neʼe ina ui mai: ‘Olo la.’ Pea ʼe ui mai ʼe ma olo anai ki te Petele. Neʼe hoi ʼo ina ui fenei: ‘ ʼOho ia.’ Kae neʼe au pulihi atu aipe te ʼu faʼahiga manatu ʼaia pea ʼaki te ʼu faʼahiga gaue neʼe au fai, neʼe au fia nofo leva ʼi te Petele. Ko te gaue ʼae neʼe au leleiʼia tafito ko te tali fagona. ʼE au ʼofa ki te hahaʼi pea ko te gaue ʼaia, neʼe ina fakafealagia ke au felogoʼi fakahagatonu mo te ʼu tehina ʼo Nigérian. Tokolahi ʼe natou ʼomai mo te ʼuli, gaʼegagaʼe, fia iinu mo fia kakai. ʼE ko he meʼa fakafiafia te foaki age ʼo te ʼu meʼa ʼae ʼe ʼaoga kia natou moʼo natou fakamokomoko pea mo fakafimalie. Ko te ʼu meʼa fuli ʼaia, neʼe ko he ʼu gaue maʼuhiga ia maʼa Sehova pea neʼe ina foaki mai ia te toe fiafia lahi.” ʼEi, ʼi te ʼu gaue fuli, neʼe ma tuputupu ai.

Lolotoga tamatou fono fakafamili ʼi Trinité ʼi te 1961, ko te tehina ko Brown neʼe ina fakamatala ʼana ʼihi gaue neʼe ina leleiʼia ʼi Afelika. Pea neʼe au toe fakamatala mo ʼamā gaue neʼe tuputupu ʼi Nigéria. Ko te tehina ko Brown neʼe ina ʼai tona nima ki toku fuga ʼuma pea ʼe ina ui age ki taku matuʼa: “Johnny, neʼe heʼeki ke alu koe ki Afelika kae ko Woodworth neʼe alu ia.” Pea neʼe tali mai e taku matuʼa: “Hoko atu he ʼe maʼuhiga te gaue.” Ko te taʼi fakalotomalohi ʼaia, neʼe ina fakamalohiʼi au ke au fakahoko taku gaue faifakamafola ʼo lahi age.

Neʼe au toe maʼu te pilivilesio ʼae ko te kau ki te ako ia mahina ʼe hogofulu ʼi te kalasi 37 ʼi Kileate ʼi te 1962. Ko te tehina ko Wilfred Gooch ʼae ko te taupau ʼo te filiale ʼo Nigéria neʼe kau ki te kalasi 38 pea neʼe hinoʼi ia ia ki Pilitania. Pea neʼe tuku mai leva te taupau ʼo te filiale ʼo Nigéria kia au. ʼO  mulimuli ki te faʼifaʼitaki ʼa te tehina ko Brown, neʼe lahi taku fefaifolauʼaki mo akoʼi mo iloʼi mo ʼofa ki te ʼu tehina ʼo Nigérian. Logo la neʼe mole natou maʼu ia te ʼu meʼa fuli ʼi te faʼahi fakasino kae ko tonatou fiafia pea mo tonatou maʼuli fakafeʼauga neʼe natou fakaha ai ʼe mole fakalogo te lelei ʼo te maʼuli ki te paʼaga peʼe ko te ʼu koloa. Logo la te ʼu aluʼaga fuli ʼaia, kae ko he meʼa fakafiafia moka natou ʼomai ki te ʼu fono ʼe natou teu fakaʼapaʼapa pea mo maʼa. Moka ʼe natou olo ki te ʼu fakatahi, tokolahi ʼe natou ʼomai ʼi te ʼu kamio peʼe ko te ʼu bolekajas * (ko te ʼu ka ʼe ava fuli ʼona faʼahi pea neʼe faʼu pe e te ʼu hahaʼi ʼo te fenua). ʼI ʼihi temi ko te ʼu ka ʼe pulusi ai te ʼu pāki pea ʼe tohi ai: “Ko he ʼu kiʼi mosiʼi vai ʼe feala ke liliu ko he moana malohi.”

Neʼe moʼoni te pāki ʼaia. Ko te faiga ʼa he tokotahi ʼe maʼuhiga. Pea neʼe matou hilifaki ki ai ʼamatou faiga. ʼI te 1974, neʼe liliu ia Nigéria ko te ʼuluaki fenua ʼi tuʼa ʼo Amelika neʼe aʼu ki te toko 100 000 faifakamafola. Neʼe tapuakina ʼosi te gaue.

Lolotoga te tuputupu ʼo te gaue kae neʼe malohi te Tau Fakasivili ʼi Nigéria ʼi te 1967 ki te 1970. Lolotoga ni mahina, neʼe mole kei feala he felogoi ʼo ʼomatou tehina ʼi te potu ʼo Biafra ʼi te Vai Tafe ʼo Niger mo te filiale. Neʼe tonu pe ke matou toʼo hanatou meʼa kai fakalaumalie. Ohage pe ko tona fakamatala ʼi te kamata ʼo te alatike, ʼaki te faikole pea mo te falala ʼae kia Sehova, neʼe matou fakalaka liuliuga ai ʼi te vai tafe.

Kei au manatuʼi pe tamatou fefakalakaʼaki ʼi te Vai Tafe ʼo Niger, neʼe feala pe ke matou tuʼutamaki peʼe matou mamate, peʼe maʼu he ʼu mahaki peʼe ko ʼihi atu tuʼutamaki. Logo la neʼe faigataʼa ʼaupito kae neʼe matou lava fakalaka ʼi te kau polisi kae neʼe kovi age leva ʼi te faʼahi ʼo Biafra he neʼe pupunu. ʼI te tahi ʼaho, neʼe au fakalaka ʼi te Vai Tafe ʼo Niger ʼi te poʼuli ʼi he kiʼi vaka ʼe alu ʼi Asaba ki Onitsha pea neʼe au fakalotomalohiʼi te ʼu taupau ʼo Enugu. Neʼe au toe alu ʼo fakalotomalohiʼi te ʼu tagata ʼafeā ʼi Aba koteʼuhi neʼe kua tapuʼi te olo ki tuʼa ʼa te hahaʼi ʼi te temi ʼaia. ʼI Port Harcourt, neʼe fakaviliviliʼi te ʼosi ʼo te fono ʼaki te faikole koteʼuhi neʼe ulufi e te kau polisi te loto kolo ʼo Biafra.

Neʼe maʼuhiga te ʼu fono moʼo fakalotomalohiʼi ʼomatou tehina ʼo ʼuhiga mo tanatou pipiki kia Sehova pea mo foaki he ʼu tokoni ʼe ina fakamalohiʼi tanatou nofo agatonu pea mo logo tahi. Ko te ʼu tehina Nigérian neʼe natou lava fakalaka ʼi te ʼu fihifihia faigataʼa ʼaia. Neʼe natou fakaha ai te ʼofa ʼae ʼe fakalaka age ia ʼi te fehiʼa ʼae ʼe maʼu ʼi te ʼu telepi pea mo natou taupau tanatou logo tahi. ʼE ko he toe pilivilesio ia takita lagolago kia natou ʼi te ʼu temi faigataʼa.

ʼI te 1969, ko te tehina ko Milton G. Henschel neʼe pelesita ʼi te Fakatahi Fakamalamanei ʼae ko tona kupu tafito “Paix sur la terre” (Te Tokalelei ʼi Te Kele) ʼi te Yankee Stadium, ʼi New York pea neʼe lahi te ʼu ako neʼe au maʼu ʼi tamā gaue fakatahi. Neʼe to lelei, he ʼe ʼi te 1970 neʼe toe fai te Fakatahi Fakamalamanei ʼi Lagos, ʼi Nigéria ko tona kupu tafito “Hommes de bonne volonté” (Te Hahaʼi Lotolelei). Mole faʼa fualoa ki ai ʼi te ʼosi ʼo te tau fakasivili, ko te fakatahi ʼaia, neʼe fua lelei ʼuhi ko te tapuakina ʼa Sehova. Neʼe maʼuhiga te fakatahi ʼaia, koteʼuhi neʼe fai ia lea ʼe 17 pea neʼe kau ki ai te toko 121 128 hahaʼi. Ko te ʼu tehina ko Knorr mo Henschel pea mo natou ʼae neʼe ʼomai mai Amelika mo Pilitania neʼe natou fakatokagaʼi ko te hoki fai e te papitema kaugā malie feia talu mai te Penikosite, neʼe ko te toko 3 775 tisipulo foʼou. Ko te tokoni ki te fakatuʼutuʼu ʼo te fakatahi, neʼe lagi ko te temi ʼaia ʼi toku maʼuli neʼe au maʼumaʼua ʼosi ai. Neʼe tuputupu vave ʼosi te kau faifakamafola.

Lolotoga te ʼu taʼu ʼe 30 tupu ʼae neʼe au nofo ʼi Nigéria, neʼe au fiafia ʼi taku gaue fakatemi ohage ko he taupau fealuʼaki peʼe ko he taupau ʼi te ʼu potu ʼo Afelika Uesite. Neʼe fiafia te kau misionea ʼi tanatou maʼu ia he ʼu fakalotomalohi pea mo he tokagaʼi ʼo natou takitokotahi. ʼE au fiafia ʼi te fakaha age ʼe mole galoʼi natou e Sehova. Ko te gaue ʼaia, neʼe au ako ai te maʼuhiga ʼae ke tou tokakaga ki te hahaʼi takitokotahi pea mo tokoni kia natou ke natou fiafia pea mo taupau maʼu te malohi mo te logo tahi ʼi te kautahi ʼa Sehova.

ʼUhi ko te tokoni ʼa Sehova, neʼe feala ke matou tauʼi te ʼu fihifihia ʼuhi ko te tau mo te mahaki. Neʼe fealagia ia meʼa fuli ʼuhi ko te tapuaki ʼa Sehova. Ko Oris ʼae palalau:

 “Neʼe liuliuga tamā maʼu ia te taʼi mahaki ko te paludisme. ʼI te tahi temi, ko Worth neʼe ʼave ki te lopitali ʼo Lagos kua pogia. Neʼe ui mai ʼe lagi feala pe ke mate kae meʼa lelei pe he neʼe toe ofo. ʼI tana ofo ake, neʼe palalau atu aipe ki te afilimie ʼae ʼe ina leʼoleʼo ʼo ʼuhiga mo te Puleʼaga ʼo te ʼAtua. Ki muli mai, neʼe au alu mo Worth ʼo ʼaʼahi ia te afilimie ko Mr. Nwambiwe moʼo fakaloloto tana mahino ki te Tohi-Tapu, neʼe ina tali te moʼoni pea neʼe liliu ki muli mai ko he tagata ʼafeā ʼi Aba. Neʼe au lava tokoni ki te tokolahi ʼe lotu Mahometa, ia natou ʼae fakamalotoloto ke natou liliu ko he ʼu kaugana ʼa Sehova. Neʼe lahi age tomatou fiafia ʼi tamatou akoʼi ʼae ke matou iloʼi pea mo ʼoʼofa ki te hahaʼi Nigérian, tana agaʼi fenua, pea mo tana lea.”

Neʼe ko he tahi ia ʼaia ako: Ke feala hamatou fiafia ʼi tamatou gaue ʼi he fenua matapule, ʼe tonu ke matou akoʼi ke matou ʼoʼofa ʼi ʼomatou tehina mo tuagaʼane, tatau aipe pe ʼe kehekehe ʼonatou faʼahiga maʼuli mo matou.

Hili tamā gaue ʼi te Petele ʼo Nigéria, ʼi te 1987 neʼe ma tali he tahi gaue fakamisionea ki te motu Sainte-Lucie ʼi te ʼu Caraïbes. Neʼe ko he gaue ʼe lelei ʼosi, kae neʼe ʼi ai pe te tahi ʼu faʼahi. ʼO kehe ia mo Afelika ʼae ʼe feala ki he tagata ke ina ʼohoanaʼi he ʼu fafine ʼe tokolahi, kae ʼi heni ʼi Sainte-Lucie ko te fihifihia ʼe feala ki he tagata mo he fafine ke nā nonofo kae mole nā ʼohoana. ʼAki te malohi ʼo te Folafola ʼa te ʼAtua, neʼe ina ʼekenaki ia te tokolahi ʼo natou, ʼe natou ako te Tohi-Tapu ke natou fai ia te ʼu fetogi ʼae ʼe ʼaoga.

ʼI te kua hifo leva ʼo toma malolohi, neʼe fakatuʼutuʼu e te Kolesi Pule ke hiki ia maua ki te ʼu pilo lalahi ʼi Brooklyn, ʼi New York, ʼi Amelika, ʼi te 2005. Neʼe ko he fakatuʼutuʼu ʼofa ia. ʼE au fakafetaʼi kia Sehova ʼi te ʼaho fuli ʼo ʼuhiga mo Oris ʼae kua mate ʼuhi ko te fili ʼi te 2015 pea ʼe mole he kupu ʼe feala ke fakamahino ʼaki te mamahi ʼae ʼe kita logoʼi. Neʼe lahi ʼona kalitate pea neʼe ʼofainaʼi pea neʼe toe manavaʼofa. Neʼe au ʼofa mamahi ʼi toku ʼohoana lolotoga toma maʼuli ia taʼu ʼe 68. Neʼe ma tokagaʼi ko te maʼu ʼo te fiafia ʼi te nofo ʼohoana peʼe ʼi te kokelekasio, ʼe ko te fakaʼapaʼapa ki ʼae ʼe takitaki, maʼu te lotofakamolemole, taupau te agavaivai pea mo fakaha ia te fua ʼo te laumalie.

Moka matou logoʼi te lotovaivai peʼe ko he ʼu aluʼaga ʼe fakatupu mamahi, ʼe matou haga kia Sehova ʼi te faikole ʼo kole tana tokoni ke hoko atu ʼamatou sakilifisio takitokotahi. ʼI te hoko atu ʼo ʼamatou faiga, neʼe matou tokagaʼi ʼe maui malie tuʼumaʼu pe ia meʼa fuli pea ʼe toe lelei age la ia ʼi te ka haʼu.—Esa. 60:17; 2 Ko. 13:11.

ʼI Trinité-et-Tobago, neʼe tapuakiʼi e Sehova ia te gaue ʼo ʼaku matuʼā pea mo ʼihi hahaʼi, ʼo feala ai ke maʼu ʼi te ʼu tanaki fakamuli ia te toko 9 892 hahaʼi neʼe kau ki te tauhi moʼoni. ʼI Aruba, ko te tokolahi neʼe natou toe fakafoʼou ia te kokelekasio ʼafeā ʼae neʼe Au kau ai. Kua tuʼu ai nei kokelekasio ʼe 14 ʼi te motu ʼaia. ʼO ʼuhiga leva mo Nigéria ko te kaugā malie ʼo natou ʼe faifakamafola kua fakalaka ki te toko 381 398. Pea ko te motu ʼae ko Sainte-Lucie ko te toko 783 ʼe natou lagolago ki te Puleʼaga ʼo Sehova.

Kua au taʼu 90 nei. Ia Pesalemo 92:15 ʼe ui ai ʼo ʼuhiga mo natou ʼae ʼe nonofo ʼi te fale ʼo Sehova: “E natou mau foki ni fua i te temi matua, e natou fonu i te huhua pea e natou fuluihega lelei.” ʼE au fakafetaʼi lahi ʼo ʼuhiga mo te maʼuli ʼae neʼe au maʼu ʼi taku tauhi kia Sehova. Ko te tofiʼa maʼuhiga ʼae neʼe au maʼu, ʼe ina fakalotomalohiʼi au ke au tauhi katoa kia Sehova. ʼAki tona ʼofa moʼoni, neʼe fakafealagia mai e Sehova ke au fiafia “i te u lotoa o [toku] Atua.”—Pes. 92:14.