ALATIKE AKO 6
ʼE Ke Falala Koa Ki Te ʼu Gaue ʼa Sehova?
“ ʼE haohaoa te ʼu gaue ʼo ia ʼae ko totatou Maka Malohi, he ʼe faitotonu ʼona ala fuli. Ko te ʼAtua ia ʼo te agatonu pea ʼe mole agakaka ʼi he temi, ʼe faitotonu mo aga fakahagatonu.”—TET. 32:4.
KATIKO 3 Ko Toku Malohiʼaga, Taku ʼAmanakiʼaga, Toku Falanakiʼaga
TE ʼU MANATU FAKANOUNOU *
1-2. (1) He koʼe ʼe faigataʼa ki te tokolahi tanatou falala ki he tahi ʼe maʼu tuʼulaga? (2) Kotea ʼae ka tou vakaʼi anai ʼi te alatike ʼaeni?
IA ʼAHO nei, kua faigataʼa ki te tokolahi ia tanatou falala ki he tahi ʼe maʼu tuʼulaga. ʼE natou tokagaʼi ʼe foaki e te ʼu malohi fakasusitisia pea mo fakapolitike ia he ʼu faigamalie ki te hahaʼi koloaʼia pea mo maʼu tuʼulaga kae liʼaki te hahaʼi fakaʼofaʼofa. ʼE ui ʼi te Tohi-Tapu: ‘ ʼE pule te tagata ki te tahi tagata ki tona malaʼia.ʼ (Ekl. 8:9) Pea tahi, ʼe mole lelei te aga ʼa ʼihi kau takitaki lotu, ʼo mole kei falala ai ʼihi ki te ʼAtua. Ko te tupuʼaga la ʼaia, ka ako e he tahi ia te Tohi-Tapu mo tatou, ʼe ko he toe gaue kia tatou tatatou tokoni ki ai ke falala kia Sehova pea mo ʼOna fakafofoga ʼi te kele.
2 ʼE mole ko te kau ako pe ʼae ʼe tonu ke natou falala kia Sehova pea mo tana kautahi. Tatau aipe pe ʼe kua tou fualoa ʼi te moʼoni, ʼe tonu ke tou fakamalohiʼi tatatou tui papau ʼae ko te ʼu gaue ʼa Sehova ʼe lelei tukupau tuʼumaʼu. ʼE feala pe ki he ʼu aluʼaga ke ina ʼahiʼahiʼi tatatou falala ʼi te aluʼaga ʼawwia. ʼI te alatike ʼaeni, ʼe tou vakaʼi anai ia aluʼaga ʼe tolu ʼe feala ke ʼahiʼahiʼi ai tatatou tui: (1) moka tou lau ʼihi fakamatala Fakatohi-tapu, (2) moka tuku mai he ʼu tuʼutuʼuni e te kautahi ʼa Sehova, pea (3) moka tou tau mo ni faigataʼaʼia ʼi te ka haʼu.
KOTOU FALALA KIA SEHOVA MOKA KOTOU LAU TE TOHI-TAPU
3. He koʼe ʼe feala ki ʼihi fakamatala Fakatohi-tapu ke ina ʼahiʼahiʼi tatatou falala ʼae kia Sehova?
3 Ka tou lau te Tohi-Tapu, ʼe feala ke tou feuiʼaki pe koʼe neʼe fai feia e Sehova ki ʼihi pea he koʼe neʼe ina toʼo ia te tonu ʼaia. Ohage la, ʼi te tohi ʼo Numelo, ʼe fakamatala ai neʼe matehi e Sehova ia te tagata Iselaele ʼi tana faifafie ʼi te ʼaho ʼo te Sapato. Kae ʼi te lua tohi ʼo Samuele, ʼe tou tokagaʼi ai ʼi he ʼu sekulo ki muli age, neʼe fakamolemole ki te Hau ko Tavite ʼae neʼe tono mo fakapo. (Num. 15:32, 35; 2 Sam. 12:9, 13) ʼE feala ke tou feuiʼaki fenei: ‘He koʼe neʼe fakamolemole ia Sehova kia Tavite ʼae neʼe tono mo fakapo, kae ina matehi leva ia te tagata ʼae neʼe mole ina fai he agahala mamafa.ʼ Moʼo tali ki te fehuʼi ʼaia, tou vakaʼi ia aluʼaga ʼe tolu ʼe lelei ke tou manatuʼi moka tou lau ia te Tohi-Tapu.
4. ʼE fakamalohiʼi feafeaʼi ia Senesi 18:20, 21 pea mo Tetelonome 10:17 ia tatatou falala ki te ʼu fakamau ʼa Sehova?
4 ʼE mole fakaha tuʼumaʼu mai ʼi te Tohi-Tapu te ʼu aluʼaga fuli ʼo he fakamatala. Ohage la, ʼe tou iloʼi neʼe fakahemala moʼoni ia Tavite ki te ʼu meʼa ʼae neʼe ina fai. (Pes. 51:2-4) Kae neʼe ko te tagata feafeaʼi ia ia ʼae neʼe ina maumauʼi ia te lao ʼo ʼuhiga mo te Sapato? Neʼe fakahemala koa ki te meʼa ʼae neʼe ina fai? Neʼe lagi kua talagataʼa ki muʼa atu ki te ʼu lao ʼa Sehova. Neʼe lagi kua foaki age ki ai he ʼu fakatokaga neʼe mole ina tokagaʼi peʼe neʼe mole fia fakalogo ki ai. ʼE mole fakaha ʼi te Tohi-Tapu. Kae ʼe feala ke tou tui papau ki te faʼahi ʼaeni, ko Sehova “ ʼe mole agakaka ʼi he temi.” (Tet. 32:4) ʼE fakatafito ʼana tonu ki he ʼu meʼa ʼe katoa, kae mole ki he ʼu palalau pe, ki he ʼu fakamahalo peʼe ki he ʼu meʼa ʼe hala ʼae ʼe fakatafito tuʼumaʼu ki ai te ʼu fakamau ʼa te tagata. (Lau ia Senesi 18:20, 21; Tetelonome 10:17.) ʼI tatatou iloʼi lelei ia Sehova pea mo ʼana lekula, ʼe toe malohi age ai tatatou falala ki ʼana fakamau. Tatau aipe pe ʼe mole tou maʼu he ʼu tali ʼi te moʼi temi pe ʼaia ki te ʼu fehuʼi, ʼe feala ke tou fai moka tou lau he fakamatala, kae ʼe tou iloʼi lelei totatou ʼAtua ke tou tui papau ‘ ʼe faitotonu ʼi ʼana gaue fuli.ʼ—Pes. 145:17.
5. ʼE iloga feafeaʼi ia tatou totatou ʼuhiga heʼe haohaoa moka tou fakamauʼi he aluʼaga? (Vakaʼi te ʼa takai “ ʼE Mole Tou Faitotonu Tuʼumaʼu ʼUhi Ko Totatou ʼUhiga Heʼe Haohaoa.”)
5 ʼE mole katoa tatatou faitotonu ʼuhi ko totatou ʼuhiga heʼe haoahaoa. Neʼe fakatupu tatou e te ʼAtua ki tona pāki. (Sen. 1:26) Koia, ka fai he aga ʼe heʼe faitotonu ki ʼihi, ʼe mole tou leleiʼia. Kae ʼi totatou ʼuhiga heʼe haohaoa, ʼe feala pe ke to hala tatatou fakamauʼi he aluʼaga, tatau aipe pe ʼe tou maʼu he ʼu fakamoʼoni. Ohage la, tou manatuʼi ia Sonasi ʼi tana itaita ʼi te fakaha e Sehova ia tona lotomanavaʼofa ki te kau Ninive. (Son. 3:10–4:1) Kae kotea ʼae neʼe hoko ʼi te fakaha e Sehova tona lotomanavaʼofa? Neʼe haofaki ai te toko 120 000 tupu kau Ninive neʼe fakahemala. Koia ʼe tou tokagaʼi ai neʼe mole ko te faʼahiga manatu ʼa Sehova ʼae neʼe tonu ke fetogi kae ko ʼae ʼa Sonasi.
6. He koʼe neʼe mole fakatonuhia e Sehova ʼana tonu?
6 ʼE mole ko he maʼua ʼo Sehova ke fakatonuhia ia muʼa ʼo te tagata te ʼu tonu ʼae ʼe ina toʼo. ʼE moʼoni, neʼe fakagafua e Sehova ki ʼihi kaugana agatonu ʼi te temi muʼa ke natou fakaha ʼanatou manatu ʼo ʼuhiga mo he ʼu tonu neʼe ina toʼo peʼe ina ʼamanaki toʼo. (Sen. 18:25; Son. 4:2, 3) Pea ʼi ʼihi temi, ʼe ina fakamahino ʼana tonu. (Son. 4:10, 11) Kae ʼe mole ko he maʼua ʼo Sehova ke ina fakatonuhia ʼana gaue. ʼE ko ia totatou Tupuʼaga. ʼE mole atalitali ia Sehova ke tou ʼio age ʼi muʼa ʼo hana fai he gaue peʼe ki muli age.—Esa. 40:13, 14; 55:9.
KOTOU FALALA KIA SEHOVA MOKA FOAKI ATU HE ʼU TUʼUTUʼUNI
7. Kotea ʼae ʼe feala ke faigataʼa kia tatou pea kotea tona tupuʼaga?
7 ʼE mahino ia, ʼe tou tui papau ʼe fakahoko tuʼumaʼu e Sehova ʼana gaue ʼi te faitotonu. Kae ʼe lagi faigataʼa kia tatou ia tatatou falala ki ʼona fakafofoga ʼi te kele. ʼE lagi tou feʼekeʼaki pe ʼe mulimuli koa ia natou ʼae neʼe fakanofo ki tana takitaki peʼe fai pe natou ʼo mulimuli ki te meʼa ʼae ʼe natou loto ki ai. Neʼe ʼi ai koa he ʼu hahaʼi neʼe lotolotolua feia ʼi te Tohi-Tapu? Tou fakakaukauʼi age te ʼu faʼifaʼitaki ʼe tolu ʼae ʼe tou maʼu ʼi te palakalafe 3. Neʼe feala pe ki he tahi ʼo te famili ʼo te tagata ʼae neʼe ina maumauʼi ia te lao ʼo te Sapato ke feʼekeʼaki pe neʼe kumi koa e Moisese ia te manatu ʼa Sehova ʼi muʼa ʼo te matehi ʼo te tagata ʼaia. Neʼe toe feala pe la ki he kaumeʼa ʼo Ulia, te Heti, ʼae neʼe tono tona ʼohoana mo Tavite, ke manatu neʼe fakaʼaogaʼi e Tavite tona ʼuhiga hau ke hao mai he tuʼā neʼe tuha mo ia. ʼI tona fakahagatonu, ʼe mole feala ke tou ui ʼe tou falala kia Sehova mo kapau ʼe mole tou falala ki ʼona fakafofoga ʼi te kele, ʼae ʼe falala ki ai ia Sehova.
8. Kotea ʼae ʼe tatau ai te aluʼaga ʼe tuʼu ia Gaue 16:4, 5 pea mo te faʼahiga haʼele ʼo te kokelekasio Fakakilisitiano ia ʼaho nei?
8 Ia ʼaho nei, ʼe takitaki e Sehova ia tana kautahi fakakelekele ʼaki ia te “tagata faifekau agatonu mo poto.” (Mat. 24:45) Ohage ko te kolesi pule ʼi te ʼuluaki sekulo, ʼe tokaga ia te kaugana ʼaia ki te foʼi famili ʼo te kau atolasio ʼa te ʼAtua ʼi te malamanei katoa pea mo foaki ia te ʼu tuʼutuʼuni ki te kau tagata ʼafeā ʼi te ʼu kokelekasio. (Lau ia Gaue 16:4, 5.) Pea ʼe tokaga leva ia te kau tagata ʼafeā ke muliʼi ia te ʼu tuʼutuʼuni ʼaia ʼi te ʼu kokelekasio. ʼE tou fakaha ʼe tou falala ki te ʼu gaue ʼa Sehova ʼaki tatatou mulimuli ki te ʼu tuʼutuʼuni ʼe foaki mai e tana kautahi pea mo te kau tagata ʼafeā.
9. Kotea te aluʼaga ʼe feala ai ke faigataʼa hatatou lagolago ki he tonu ʼe toʼo e te kau tagata ʼafeā pea kotea tona tupuʼaga?
9 ʼI ʼihi temi, ʼe faigataʼa tatatou lagolago ki te ʼu tonu ʼae ʼe toʼo e te kau tagata ʼafeā. ʼI te ʼu taʼu ki muli mai, neʼe fai he ʼu fetogi ki te fakatuʼutuʼu ʼo te ʼu siliko pea mo te ʼu kokelekasio. Ke vaevae lelei te ʼu Fale Fono, neʼe kole e te kau tagata ʼafeā ki ʼihi tehina mo tuagaʼane ke natou olo ʼo lagolago ki he tahi age kokelekasio. Ko te fetogi kokelekasio, ko tona fakaʼuhiga ʼe tou mavae mai ʼotatou kaumeʼa pea mo ʼihi ʼo totatou famili. ʼE maʼu koa e te ʼu tagata ʼafeā ia he fakatuʼutuʼu mai ia Sehova ʼe tohi ai pe ʼe alu ki te kokelekasio fea ia he tehina peʼe ko he tuagaʼane? Kailoa. Koia, ʼe feala ai ke faigataʼa hatatou mulimuli ki te tuʼutuʼuni ʼaia. Kae logo la he meʼa ke feafeaʼi, neʼe foaki e Sehova ki te kau tagata ʼafeā ia te maʼua ʼae ke natou toʼo ia te taʼi tonu ʼaia he ʼe falala kia natou. Koia, ʼe tonu mo tatou ke tou falala kia natou. *
10. Ia Hepeleo 13:17, he koʼe ʼe tonu ke tou fakalogo ki te kau tagata ʼafeā?
10 He koʼe ʼe tonu ke tou fakalogo ki te kau tagata ʼafeā pea mo lagolago ki te ʼu tonu ʼae ʼe natou toʼo, tatau aipe pe ʼe mole alu ai tatatou manatu? Koteʼuhi ʼi tatatou fai te faʼahi ʼaia, ʼe tou taupau ai te logo tahi ʼi te hahaʼi ʼa te ʼAtua. (Efe. 4:2, 3) Ka fakalogo te tagata takitokotahi ʼaki he agavaivai ki te ʼu tonu ʼe toʼo e te kolesi ʼo te kau tagata ʼafeā, ʼe tuputupu ai te kokelekasio. (Lau ia Hepeleo 13:17.) Ko te tahi faʼahi maʼuhiga, ʼi tatatou fakalogo ki te ʼu tagata ʼae neʼe hinoʼi e Sehova ke natou tokakaga kia tatou, ʼe tou fakaha ai ʼe tou falala kia te ia.—Gaue 20:28.
11. Kotea ʼae ʼe feala ke ina fakamalohiʼi tatatou falala ki te ʼu tuʼutuʼuni ʼe foaki mai e te kau tagata ʼafeā?
11 ʼE tou falala malohi anai ki te ʼu tuʼutuʼuni ʼae ʼe foaki mai e te kau tagata ʼafeā, he ʼe tou manatuʼi moka natou vakavakaʼi he ʼu aluʼaga ʼi te kokelekasio, ʼe natou kole ia te laumalie maʼoniʼoni. Pea tahi, ʼe natou fakakaukauʼi lelei te ʼu pelesepeto Fakatohi-tapu pea mo natou vakaʼi te ʼu tuʼutuʼuni ʼae ʼe foaki mai e te kautahi ʼa Sehova. ʼE natou loto tafito ke natou fakafiafiaʼi ia Sehova pea mo tokakaga lelei ki tana hahaʼi. ʼE natou iloʼi ʼe natou huʼi maʼua anai ia muʼa ʼo te ʼAtua ʼi tanatou faʼahiga fai tanatou gaue. (1 Pet. 5:2, 3) Kotou fakakaukauʼi age te aluʼaga ʼaeni, ʼi te malama ʼaeni ʼe mavetevete ai te ʼu lanu, mo te ʼu lotu pea mo te politike, ʼe logo tahi ai te kau atolasio ʼa Sehova ʼi tanatou tauhi ki he ʼAtua moʼoni pe ʼe tahi. Kapau ʼe maʼu te logo tahi ʼaia, koteʼuhi ʼe tapuakiʼi e Sehova ia tana kautahi.
12. Kotea te ʼu aluʼaga ʼe fakatafito ki ai te kau tagata ʼafeā ke natou iloʼi ai pe kua fakahemala moʼoni he tahi neʼe agahala mamafa?
12 Neʼe foaki e Sehova ki te kau tagata ʼafeā ia te toe maʼua lahi ko te taupau ʼo te agamaʼa ʼi te kokelekasio. Ka agahala mamafa he tahi, ʼe loto e Sehova ke natou vakavakaʼi pe ʼe tonu ke nofo ia ia ʼaia ʼi te kokelekasio peʼe fakamavae. Koia, ʼe tonu ai ke iloʼi lelei e te kau tagata ʼafeā pe ʼe kua fakahemala moʼoni ia ia ʼae neʼe agahala mamafa. ʼE lagi ina ui anai ʼe fakahemala, kae ʼe fakalialia koa ki te meʼa ʼae neʼe ina fai? ʼE ina fakatotonu koa ke ʼaua naʼa ina toe fai? Kapau neʼe agahala mamafa ʼuhi ko ʼana fakakaugā, ʼe lotolelei koa ke ʼaua naʼa toe fakatahi mo natou ʼaia? ʼE faikole anai te kau tagata ʼafeā, mo natou vakavakaʼi te ʼu fakamoʼoni ʼo fakatafito ki te Tohi-Tapu pea mo natou tokagaʼi pe kotea te manatu ʼa ia ʼae neʼe agahala ʼo uhiga mo te meʼa ʼae neʼe ina fai. Ki muli age leva, ʼe natou toʼo te tonu ʼae pe ʼe fakamavae peʼe kailoa ia ia ʼae neʼe agahala mamafa. ʼI ʼihi aluʼaga, ʼe tonu anai ke fakamavae ia ia ʼae neʼe agahala mamafa.—1 Ko. 5:11-13.
13. Kapau neʼe fakamavae hotatou kaumeʼa peʼe ko he tahi ʼo totatou famili, kotea ʼae ʼe feala ke tou feuiʼaki?
13 Kotea ʼae ʼe feala ke ina ʼahiʼahiʼi tatatou falala ki te kau tagata ʼafeā? ʼE lagi tou tali leleiʼi anai te tonu ʼa te kau tagata ʼafeā mo kapau ko ia ʼae neʼe fakamavae ʼe mole ko he tahi ʼo totatou famili peʼe mole tou kaumeʼa mo ia. Kae kotou fakakaukauʼi age mo kapau ko he tahi ʼo totatou famili. ʼI te lakaga leva ʼaia, ʼe lagi tou feuiʼaki pe neʼe vakavakaʼi fakalelei koa e te kau tagata ʼafeā ia te ʼu fakamoʼoni fuli peʼe neʼe natou fakamauʼi koa ohage ko hona fai e Sehova. Kotea ʼae ʼe feala ke tokoni mai ke tou taupau he faʼahiga manatu ʼe lelei ki te tonu ʼaia?
14. Kapau ʼe fakatuʼutuʼu e te kau tagata ʼafeā ke fakamavae he tahi ʼo totatou famili, kotea ʼae ʼe feala ke tokoni mai ke tou maʼu he manatu ʼe lelei?
14 Tou manatuʼi ko te fakamavae ʼo he tahi, ʼe ko he fakatuʼutuʼu ʼa Sehova ke fua lelei ki te kokelekasio pea mo ia ʼae neʼe agahala mamafa. Kapau ʼe tou tuku he tagata agahala mamafa ʼe mole fakahemala ke nofo ʼi te kokelekasio, ʼe feala ai ke ina fakaneke ʼihi ki te meʼa ʼae ʼe kovi. (Kal. 5:9) Pea tahi, ʼe mole feala ke mahino ki te kovi ʼo tana agahala, ʼo mole feala ai ke fetogi tana faʼahiga manatu mo tana aga ke tupu ai hana toe maʼu ia te ʼofa ʼo Sehova. (Ekl. 8:11) ʼE tou tui papau, moka fakatuʼutuʼu e te kau tagata ʼafeā ke natou fakamavae he tahi, ko tona fakaʼuhiga ʼe natou fakahoko fakamalotoloto tanatou gaue. ʼE natou iloʼi, ohage pe ko te kau tuʼi fakamau ʼo Iselaele ʼi te temi muʼa, ʼe ‘mole natou fakamau maʼa he tagata kae maʼa Sehova.ʼ—2 Klk. 19:6, 7.
KO TATATOU FALALA KIA SEHOVA ʼI TE TEMI NEI, ʼE KO HE AKOAKO KI TE KA HAʼU
15. He koʼe ʼe tonu ke tou falala ki te ʼu tuʼutuʼuni ʼae ʼe foaki mai e Sehova ʼi te temi nei?
15 ʼI te fakaovi mai ʼo te fakaʼosi ʼo te malama ʼaeni, ʼe tonu ke toe ʼaʼasili age tatatou falala ki te ʼu gaue ʼa Sehova. Kotea tona tupuʼaga? Koteʼuhi, lolotoga te mamahi lahi, ʼe foaki mai anai he ʼu tuʼutuʼuni ʼe matafaikehe kia tatou, ʼe faigataʼa tatatou mulimuli ki ai peʼe mole tou mahino ki tona ʼaoga. Koia, ʼe mole palalau fakahagatonu mai anai ia Sehova. ʼE ina fakaha mai anai ʼana fakatuʼutuʼu ʼaki ʼona fakafofoga ʼi te kele. ʼE mole ko he temi ʼaia ke tou fakafihiʼi ai te ʼu tonu ʼaia peʼe tou ui fenei: ‘ ʼE haʼu koa te ʼu tuʼutuʼuni ʼaeni mai ia Sehova peʼe ko he ʼu tonu pe ia ʼo te ʼu tehina ʼae ʼe natou takitaki te gaue?ʼ ʼE feafeaʼi anai tau aga ʼi te temi maʼuhiga ʼaia? ʼE fakalogo pe ki tau faʼahiga manatu ʼo ʼuhiga mo te takitaki fakateokalatike ʼi te temi nei. Kapau ʼe ke falala ki te ʼu tuʼutuʼuni ʼe tuku mai ʼi te temi nei pea mo ke fakalogo ki ai ʼaki he lotolelei, ʼe mahino ia, ʼe ke toe fai feia pe anai lolotoga te mamahi lahi.—Luka 16:10.
16. ʼE lava ʼahiʼahiʼi feafeaʼi tatatou falala ki te ʼu fakamau ʼa Sehova ʼi te ka haʼu?
16 ʼE lelei ke tou fakakaukauʼi ia te tahi age aluʼaga, ko te ʼu fakamau ʼae ka tala anai e Sehova ʼi te fakaʼosi ʼo te malama ʼaeni. ʼI te temi nei, ʼe tou fakaʼamu ke tauhi he tokolahi kia Sehova ʼi muʼa ʼo te fakaʼosi, ʼo kau ai mo natou ʼo totatou famili. Kae ʼi Alamaketone, ʼe ko Sehova ʼae ka ina toʼo anai te tonu fakaʼosi ʼo ʼuhiga mo tonatou ka haʼu ʼaki ia Sesu. (Mat. 25:31-33; 2 Tes. 1:7-9) ʼE mole ʼa tatou anai te filifili pe ʼe ko ai ʼae ka fakaha ki ai e Sehova tona lotomanavaʼofa. (Mat. 25:34, 41, 46) ʼE tou falala anai koa ki te ʼu fakamau ʼa Sehova peʼe tou tukia anai tatou ʼi ʼana fakamau? ʼE mahino ia, ʼe tonu ke tou fakamalohiʼi tatatou falala ʼae kia Sehova ʼi te temi nei ke feala hatatou falala katoa kia te ia ʼi te ka haʼu.
17. Kotea anai te ʼu fua lelei ka tou maʼu mai te ʼu fakamau ʼae ka tala anai e Sehova ʼi te fakaʼosi ʼo te malama ʼaeni?
17 Kotou fakakaukauʼi pe kotea anai ka tou logoʼi ʼi te malama foʼou moka tou sisio mata ki te ʼu fua lelei ʼo te ʼu fakamau ʼa Sehova. Kua pulihi ia te lotu hala ʼo toe feia ki te tuʼu faikoloa manumanu pea mo te tuʼu fakapolitike ʼae neʼe ina fakamamahiʼi te hahaʼi lolotoga te hisitolia ʼo te tagata. Kua pulihi te mahaki, te matutuʼa pea mo te mate. Kua pilisoniʼi ia Satana mo tana kau temonio lolotoga taʼu ʼe ʼafe. Kua pulihi mo te ʼu fakailoga ʼo te fakafeagai. (Apk. 20:2, 3) ʼE tou fiafia anai ʼi tatatou falala ki te ʼu gaue ʼa Sehova.
18. Kotea te ʼu ako ʼe tou taʼofi mai te aga ʼa te kau Iselaele ia Numelo 11:4-6 mo te 21:5?
18 ʼE feala koa ke hoko he ʼu faigataʼaʼia ʼi te malama foʼou ʼo feala ai ke ʼahiʼahiʼi tatatou falala ki te ʼu gaue ʼa Sehova? Kotou manatuʼi te aluʼaga ʼae neʼe hoko ki te kau Iselaele ʼi tonatou fakaʼateaina mai tanatou popula ʼi Esipito. ʼI tanatou manatuʼi te ʼu meʼa kai ʼi Esipito, neʼe meomeo ʼihi pea natou meʼa noaʼi ia te mane ʼae neʼe foaki age e Sehova. (Lau ia Numelo 11:4-6; 21:5.) ʼE feala koa ʼi te hili ʼo Alamaketone, ke tou maʼu ia te taʼi manatu ʼaia? ʼE mole tou mahino ki te toe gaue ʼae ka fai anai moʼo fakamaʼa ia te kele pea mo toe fakaliliu mamalie ko he palatiso. ʼE mahino ia, ʼe ko he toe gaue pea ʼe lagi hoko anai he ʼu kiʼi totō ʼi te kamata. ʼE tou meomeo anai koa ki te ʼu meʼa ʼae ka foaki mai e Sehova? Ko te faʼahi ʼe tou iloʼi papau, kapau ʼe tou lotofakafetaʼi ʼi te temi nei ki te ʼu meʼa ʼae ʼe foaki mai e Sehova, ʼe tou toe lotofakafetaʼi anai ʼi te ka haʼu.
19. ʼE ke fakamahino fakanounou feafeaʼi anai te ʼu manatu tafito ʼo te alatike ʼaeni?
19 ʼE lelei tuʼumaʼu te ʼu gaue ʼa Sehova. ʼE tonu ke tou tui papau ki ai. ʼE tonu foki ke tou falala ki te ʼu tagata ʼae ʼe falala ki ai ia Sehova ki te fakaʼapaʼapaʼi ʼo ʼana tuʼutuʼuni. ʼAua naʼa galo kia koutou ia te ʼu palalau ʼa Sehova ʼaki tana polofeta ko Esaia: “ ʼE kotou malohi anai mo kapau ʼe mole kotou lotohoha kae ʼe kotou lotofalala.”—Esa. 30:15.
KATIKO 98 Ko Te Tohi-Tapu ʼe Haʼu Mai Te ʼAtua
^ ʼE tokoni mai te alatike ʼaeni ke tou mahino ki te ʼaoga ʼae ke tou fakamalohiʼi tatatou falala ʼae kia Sehova pea mo ʼona fakafofoga ʼi te kele. ʼE tou toe vakaʼi anai pe ʼe ʼaoga feafeaʼi kia tatou ʼi te temi nei, pea mo teuteuiʼi feafeaʼi tatou ki te ka haʼu.
^ ʼE feala ki he aluʼaga ke tupu ai he nofo ʼa he tehina peʼe ko he famili ʼi tana kokelekasio. Vakaʼi Te Minisitelio ʼo Te Puleʼaga ʼo Novepeli 2002, “Te Tali Ki ʼAkotou ʼu Fehuʼi.”