1-3. (1) ʼO mulimuli kia Pesalemo 5:5-7, kotea ʼae ʼe logoʼi e Sehova ʼo ʼuhiga mo te agakovi? (2) He koʼe ʼe feala ke tou ui ka fakaʼalikiʼi he kiʼi fanau ʼe ko he fakafeagai ʼaia ki “te lao ʼa Kilisito”?

ʼE FEHIʼA ia Sehova ʼAtua ki te faʼahiga agakovi fuli. (Lau ia Pesalemo 5: 5-7.) ʼE fehiʼa moʼoni ki te fakaʼalikiʼi ʼo te ʼu fanau pea ko te ʼu aga ʼaia ʼe fakalialia ki ai ia Sehova. Ko tatou ʼaeni ko te Kau Fakamoʼoni ʼa Sehova, ʼe tou fia faʼifaʼitakiʼi ia Sehova. Ko te tupuʼaga la ʼaia ʼo tatatou fehiʼa ki te ʼu aga ʼae ʼe fakaʼalikiʼi ai te ʼu kiʼi fanau pea ʼe mole feala ke tou tali te ʼu aga ʼaia ʼi te loto kokelekasio.—Loma 12:9; Hep. 12:15, 16.

² Ka fakaʼalikiʼi e he tahi he kiʼi fanau, ʼe ina fakafeagai ki “te lao ʼa Kilisito.” (Kal. 6:2) Kotea tona tupuʼaga? Ohage ko tatatou vakaʼi ʼi te alatike kua hili, ko te lao ʼa Kilisito ʼe ko te ʼu meʼa fuli ʼae neʼe akoʼi mai e Sesu ʼi ʼana akonaki mo tana faʼifaʼitaki. Pea ko te lao ʼaia ʼe ina fakamuʼamuʼa ia te ʼofa mo te faitotonu. ʼE fakalogo e te kau Kilisitiano moʼoni ki te lao ʼaia, ko te tupuʼaga la ʼaia ʼo tanatou faigaʼi ke logoʼi e te ʼu fanau ʼe puipui ia natou pea ʼe tou ʼoʼofa moʼoni ia natou. Kae ka fakaʼalikiʼi e he tahi te kiʼi fanau ʼe manatu pe ia kia ia totonu pea ʼe ko he aga ʼe kovi ia. Pea ki muli age, ʼe manatu leva te kiʼi fanau ʼe mole he tahi ʼe ina puipui ia ia pea ʼe mole tou ʼoʼofa ia ia.

³ Kae meʼa fakaʼofaʼofa foki he ʼe tokolahi te ʼu kiʼi fanau ʼe fakaʼalikiʼi ʼi te kele katoa pea ʼe toe feala pe ke hoko te faʼahi ʼaia ʼi te Kau Fakamoʼoni ʼa Sehova. Kotea tona tupuʼaga? Koteʼuhi ia ʼaho nei, kua lahi ʼaupito te “hahaʼi agakovi pea mo kaka” pea ʼe feala pe ki ʼihi ia natou ʼaia ke natou hu ki te loto kokelekasio. (2 Tim. 3:13) Pea tahi, neʼe ʼi ai ʼihi neʼe natou ui ʼe natou kau ki te kokelekasio pea neʼe natou to ki ʼonatou holi kovi mo natou aga fakakaka, ʼo natou fakaʼalikiʼi ai te ʼu kiʼi fanau. Tou vakaʼi pe koʼe ʼe ko te fakaʼalikiʼi ʼo he kiʼi fanau ʼe ko he agahala mamafa ia. Pea ʼe tou vakaʼi anai pe ʼe kotea ʼae ʼe tonu ke fai e te kau tagata ʼafeā ʼo te kokelekasio moka ʼe ʼi ai he tahi neʼe ina fai  he agahala mamafa, ohage la ko te fakaʼalikiʼi ʼo he kiʼi fanau. ʼE tou toe vakaʼi anai pe ʼe feafeaʼi te puipui e te ʼu matuʼā ʼanatou kiʼi fanau. *

4-5. Ka fakaʼalikiʼi e he tahi he kiʼi fanau, ʼe ko he agahala ia ki te kiʼi fanau, kotea tonu tupuʼaga?

⁴ Ka fakaʼalikiʼi he kiʼi fanau, ʼe ʼi ai te ʼu nunuʼa kovi ʼe tau mo ia ʼo fualoa ʼaupito. ʼE feala ke fakatupu mamahi kia natou ʼae neʼe fakaʼalikiʼi, kae ʼe toe mamahi foki mo natou ʼae neʼe natou taupau, ko tona fakaʼuhiga ʼe ko ʼonatou famili pea mo ʼonatou tehina mo tuagaʼane ʼi te kokelekasio. ʼO mahino mai ai, ʼe ko te fakaʼalikiʼi ʼo he kiʼi fanau ʼe ko he agahala mamafa.

⁵ Ko te fakaʼalikiʼi ʼo he kiʼi fanau ʼe ko he agahala ia ki te kiʼi fanau ʼaia. * Ka tou fai he aga ʼe kovi ki he tahi pea ʼe tou fakamamahiʼi ia ia, ʼe ko he agahala. ʼE tou vakaʼi anai ʼi te alatike ʼae ka hoa mai, ko ia ʼae ʼe ina fakaʼalikiʼi te kiʼi fanau ʼe ina fakamamahiʼi ʼaupito ia te kiʼi fanau. Neʼe falala te kiʼi fanau kia ia, kae neʼe ina fakamamahiʼi ʼaupito ia ia. ʼE mole kei logoʼi ai e te kiʼi fanau hona puipui lelei, koteʼuhi neʼe fai age ki ai he ʼu aga ʼe kovi neʼe mole tonu ke ina iloʼi. ʼE tonu ke tou puipui te ʼu kiʼi fanau mai te ʼu agakovi ʼaia. Pea ʼe tonu ke tou fakalotomalohiʼi mo tokoni kia natou ʼae neʼe fakaʼalikiʼi.—1 Tes. 5:14.

6-7. Ka fakaʼalikiʼi e he tahi he kiʼi fanau, ʼe agahala ia ki te kokelekasio pea mo te puleʼaga, kotea tona tupuʼaga?

⁶ Ko te fakaʼalikiʼi ʼo he kiʼi fanau ʼe ko he agahala ia ki te kokelekasio. Kapau ʼe fakaʼalikiʼi he kiʼi fanau e he tahi ʼi te kokelekasio, ʼe ina ʼulihi te matagafua ʼo te kokelekasio. (Mat. 5:16; 1 Pet. 2:12) ʼE mole moʼoni te ui ʼae ʼe fakagafua ʼi te kokelekasio ke fakaʼalikiʼi te ʼu kiʼi fanau, koteʼuhi ko te toko lauʼi miliona hahaʼi ʼa Sehova ʼe natou tauʼi malohi ʼonatou holi pea mo ‘taupau malohi tanatou tui.’ (Suta 3) Pea ʼe mole tali ʼi te kokelekasio te ʼu hahaʼi ʼae ʼe natou fai te ʼu aga ʼe kovi kae ʼe mole natou fakahemala, ʼo toe feia mo natou ʼae ʼe natou ʼulihi te matagafua ʼo te kokelekasio.

⁷ Ko te fakaʼalikiʼi ʼo he kiʼi fanau ʼe ko he agahala ia ki te ʼu puleʼaga fakatagata. Ko te hahaʼi ʼa Sehova ʼe natou “fakalogo . . . ki te ʼu pule maʼoluga.” (Loma 13:1) ʼE tou fakaha tatatou fakalogo ʼaki tatatou fakaʼapaʼapa ki te ʼu lao ʼo te fenua. Kapau ʼe mole fakaʼapaʼapa he tahi ʼi te kokelekasio ki te lao, ohage la ʼe ina fakaʼalikiʼi he kiʼi fanau, kua agahala ia ki te puleʼaga. (Vakaʼi mo Gaue 25:8.) ʼE mole tonu ki te kau tagata ʼafeā ke natou fakatuʼā ia natou ʼae ʼe natou maumauʼi te lao. Kae ʼe mole tonu ke natou puipui ia ia ʼae neʼe ina fakaʼalikiʼi he kiʼi fanau. He ʼe ko te gaue ʼaia ʼa te Puleʼaga ke ina fakatuʼā ia ia ʼae neʼe ina fai te aga ʼae ʼe kovi. (Loma 13:4) ʼE tonu ki te tagata agahala ʼaia, ke ina utu pe te ʼu fua kovi ʼo ʼana gaue kovi.—Kal. 6:7.

8. Kotea te manatu ʼa Sehova moka agahala he tahi ki he tahi age?

⁸ Ko te fakaʼalikiʼi ʼo he kiʼi fanau ʼe ko he agahala ia ki te ʼAtua. (Pes. 51:6) Ka agahala he tahi ki he tahi age, ʼe toe agahala pe ia kia Sehova. Tou vakaʼi te Lao ʼae neʼe foaki e te ʼAtua ki Iselaele. ʼE ui ʼi te Lao ka kaihaʼa he tagata peʼe ina kakaʼi ia tona vahaʼa fale “ ʼe mole agatonu ia kia Sehova” ko tona fakaʼuhiga ʼe agahala kia Sehova. (Lev. 6:2-4, MN) Koia, kapau ʼe fakaʼalikiʼi e he tahi ʼi te kokelekasio he kiʼi fanau, ʼe hage pe ʼe ina kaihaʼa te ʼu lelei ʼo tona maʼuli pea ʼe heʼe agatonu ia ki te ʼAtua. Kapau ko he tahi kua iloʼi ʼe ko he Fakamoʼoni ʼa Sehova ʼe ina fakaʼalikiʼi he kiʼi fanau, ʼe ina ʼulihi te huafa ʼo Sehova. Ko te tupuʼaga la ʼaia, ka fakaʼalikiʼi e he tahi he kiʼi fanau, ʼe tonu ke fakatuʼā mamafa koteʼuhi kua agahala ia ki te ʼAtua.

9. Kotea te ʼu fakamahino ʼe foaki mai e te kautahi ʼa Sehova talu mai fualoa? Pea kotea tona tupuʼaga?

⁹ Talu mai fualoa, neʼe foaki e te kautahi ʼa Sehova he ʼu fakamahino ʼe fakatafito ki te Tohi-Tapu ʼo ʼuhiga mo te fakaʼalikiʼi ʼo te ʼu kiʼi fanau. Ohage la,  ʼe ʼi ai te ʼu alatike ʼi Te Tule Leʼo pea mo te Kotou ʼAʼala! ʼe fakamahino ai pe ʼe lava tauʼi feafeaʼi e natou ʼae neʼe fakaʼalikiʼi te ʼu mamahi ʼae ʼe tau mo natou pea ʼe feafeaʼi hatatou tokoni pea mo fakalotomalohiʼi ia natou ʼaia. ʼE toe fakamahino ai pe ʼe puipui feafeaʼi e te ʼu matuʼā ʼanatou fanau. Neʼe akoʼi te ʼu tagata ʼafeā ʼaki te Tohi-Tapu ke natou fakamauʼi te ʼu fihifihia ʼo ʼuhiga mo te fakaʼalikiʼi ʼo te ʼu kiʼi fanau. ʼE hoko atu e te kautahi ʼa Sehova tana fakamanatuʼi ki te ʼu kokelekasio pe ʼe feafeaʼi tanatou tokakaga ki te ʼu agahala mamafa ʼo ʼuhiga mo te fakaʼalikiʼi ʼo te ʼu kiʼi fanau. Kotea tona tupuʼaga? Ke tou iloʼi papau ai, ʼe tou fakamauʼi te ʼu aluʼaga ʼaia ʼo mulimuli ki te Lao ʼa Kilisito.

10-12. (1) Ka iloʼi e te ʼu tagata ʼafeā neʼe fai e he tahi he agahala mamafa, kotea ʼae ʼe tonu ke natou manatuʼi? Pea kotea tanatou gaue tafito? (2) ʼO mulimuli kia Sakopo 5:14, 15, kotea ʼae ʼe tonu ke fai e te ʼu tagata ʼafeā?

¹⁰ Ka tonu ke fakatokatoka e te kau tagata ʼafeā he aluʼaga peʼe ko he tahi neʼe ina fai he agahala mamafa, ʼe tonu ke natou manatuʼi ʼe fakamaʼua e te Lao ʼa Kilisito ke natou tokakaga ki te kokelekasio ʼaki te ʼofa pea ʼe tonu ke natou fai te meʼa ʼae ʼe totonu kia mata ʼo Sehova. Ka iloʼi e te ʼu tagata ʼafeā neʼe fai e he tahi he agahala mamafa, ʼe lahi te ʼu aluʼaga ʼe tonu ke natou tokakaga ki ai. ʼE maʼuhiga ki te ʼu tagata ʼafeā ke natou taupau ke maʼa te huafa ʼo Sehova pea ʼaua naʼa ʼulihi tona matagafua. (Lev. 22:31, 32; Mat. 6:9) ʼE tokaga e te ʼu tagata ʼafeā ki te maʼuli fakalaumalie ʼo te ʼu tehina mo tuagaʼane ʼi te loto kokelekasio. ʼE natou toe fia tokoni kia natou ʼae ʼe mamahi koteʼuhi neʼe fai age e he tahi kia natou he agahala mamafa.

¹¹ Pea tahi, kapau ko ia ʼae neʼe ina fai he agahala ʼe ko he tahi ʼo te kokelekasio, ʼe tonu ke faigaʼi e te ʼu tagata ʼafeā ke natou iloʼi lelei pe ʼe kua fakahemala moʼoni ia ia ʼae neʼe agahala. Pea kapau ko ia, ʼe tokoni anai te ʼu tagata ʼafeā ki ai ke ina toe maʼu hana ʼu felogoi lelei mo Sehova. (Lau ia Sakopo 5:14, 15.) ʼE feala ke fai e he Fakamoʼoni ʼa Sehova he agahala mamafa moka mole kei ina lava tauʼi ʼona holi kovi. Kua mahaki leva ʼi te faʼahi fakalaumalie, ko tona fakaʼuhiga ʼe mole kei lelei ʼana felogoi mo Sehova. * ʼE hage te ʼu tagata ʼafeā ʼe ko he ʼu toketa ʼi te faʼahi fakalaumalie. ʼE natou faiga malohi anai ke natou fakamalolo “ia ia ʼae ʼe mahaki,” ko tona fakaʼuhiga ke maʼu e te tagata ʼae neʼe agahala hona malolo lelei. Pea ʼe natou foaki anai he ʼu manatu ʼe toʼo mai ʼi te Tohi-Tapu moʼo tokoni age ki ai ke ina toe maʼu hana ʼu felogoi lelei mo te ʼAtua. Kae ʼe hoki feala hanatou tokoni ki ai, mo kapau neʼe fakahemala moʼoni.—Gaue 3:19; 2 Ko. 2:5-10

¹² ʼE tou mahino ʼe fua e te ʼu tagata ʼafeā he kavega mamafa. ʼE natou ʼoʼofa ki te kokelekasio koteʼuhi neʼe foaki e te ʼAtua kia natou te kavega ʼaia, ke natou taupau mo tokaga lelei kia natou ʼaki te ʼofa mo te faitotonu. (1 Pet. 5:1-3) ʼE loto e te ʼu tagata ʼafeā ke logoʼi e te ʼu tehina mo tuagaʼane ʼe puipui lelei ia natou ʼi te loto kokelekasio. Koia, ka natou iloʼi neʼe agahala mamafa he tahi, ʼe natou tokakaga fakavilivili atu aipe anai ki te koga ʼaia, tafito la mo kapau ko he kiʼi fanau neʼe fakaʼalikiʼi. Kotea ʼae ʼe tonu ke fai e te ʼu tagata ʼafeā? Tou vakaʼi te ʼu fehuʼi ʼae ʼe tou maʼu ʼi te kamataʼaga ʼo te  palakalafe 13, mo te  15 pea mo te  17.

13-14. ʼE tonu koa ki te ʼu tagata ʼafeā ke natou fakalogo ki te lao ʼo te fenua ʼo fakaha ki te kau polisi neʼe fakaʼalikiʼi te kiʼi fanau? Kotou fakamahino.

 ¹³ ʼE tonu koa ke fakaʼapaʼapa te ʼu tagata ʼafeā ki te ʼu lao ʼo te fenua, ʼo natou fakaha ki te kau polisi te aluʼaga ʼo te fakaʼalikiʼi ʼo he kiʼi fanau? ʼEi. ʼI te ʼu fenua ʼae ʼe maʼu ai te ʼu lao ʼaia, ʼe tonu ke fakaʼapaʼapa te ʼu tagata ʼafeā ki te ʼu lao, ʼo natou fakaha ki te kau polisi te fakaʼalikiʼi ʼo te ʼu kiʼi fanau. (Loma 13:1) Ko te ʼu lao ʼaia, ʼe mole fakafeagai ki te Lao ʼa te ʼAtua. (Gaue 5:28, 29) Ko te tupuʼaga la ʼaia, ka iloʼi e te ʼu tagata ʼafeā neʼe fakaʼalikiʼi he kiʼi fanau, ʼe natou fakaha fakavilivili atu aipe ki te filiale ke natou iloʼi te puleʼaki ʼae ka natou fai ke fakaha ai ʼe natou fakalogo ki te ʼu lao ʼo te fenua.

¹⁴ ʼE tonu ke tokakaga ia te ʼu tagata ʼafeā kia natou ʼae neʼe fakaʼalikiʼi, mo tokoni ki ʼanatou matuʼā  pea mo natou ʼae ʼe natou iloʼi te aluʼaga ʼaia neʼe hoko. ʼE fakaha age anai e te ʼu tagata ʼafeā ʼe tonu ke natou olo ʼo fakaha te aluʼaga ʼaia ki te kau polisi. Kae ʼe feafeaʼi leva mo kapau ko he tahi ʼi te kokelekasio neʼe ina fai te agahala ʼaia, pea ʼe feala ke iloʼi e te ʼu tehina mo tuagaʼane te aluʼaga neʼe hoko? ʼE tonu koa kia ia ʼae neʼe tagi ki te kau polisi ʼuhi ko tona fakaʼalikiʼi ke manatu ʼe ko tana hala mo kapau neʼe ʼulihi te huafa ʼo Sehova? Kailoa. Ko ia ʼae neʼe ina fai te agahala mamafa, ʼe ko ia ʼae neʼe ina ʼulihi te huafa ʼo te ʼAtua.

15-16. (1) ʼO mulimuli kia 1 Timoteo 5:19, he koʼe ʼe ʼaoga ke maʼu he ʼu fakamoʼoni ʼe lua pea hoki feala ke fakamauʼi e te ʼu tagata ʼafea te aluʼaga ʼae neʼe hoko? (2) Kotea ʼe tonu ke fai e te ʼu tagata ʼafeā mo kapau ʼe natou iloʼi neʼe tukugakoviʼi he tahi ʼi te kokelekasio neʼe ina fakaʼalikiʼi he kiʼi fanau?

 ¹⁵ He koʼe ʼe tonu muʼa ke maʼu e te ʼu tagata ʼafeā he ʼu fakamoʼoni ʼe lua ke fakamoʼoni ai neʼe fai e he tahi he agahala mamafa? Koteʼuhi ʼe fakatotonu mai ʼi te Tohi-Tapu ke fakamauʼi te aluʼaga ʼaia ʼi te faitotonu. Kapau ʼe fakafisi he tahi ki tana agahala, ʼe tonu leva ke ʼi ai he ʼu fakamoʼoni ʼe lua ke nā fakamoʼoni ai neʼe fai moʼoni ia te tehina ʼaia te agahala pea hoki feala leva ke fakamauʼi e te ʼu tagata ʼafeā te aluʼaga ʼaia. (Tet. 19:15; Mat. 18:16; lau ia 1 Timoteo 5:19.) Kae ka ui mai e he tahi neʼe fakaʼalikiʼi, ʼe tonu koa la ke kumi muʼa he ʼu fakamoʼoni ʼe lua ki te aluʼaga ʼaia, pea hoki feala leva ke fakaha ki te kau polisi? Kailoa ia. Kapau kua iloʼi e te ʼu tagata ʼafeā pea mo ʼihi atu, neʼe fakaʼalikiʼi he kiʼi fanau, ʼe mole ʼaoga anai he ʼu fakamoʼoni ʼe lua moʼo fakaha ki te kau polisi.

¹⁶ Kapau ʼe iloʼi e te ʼu tagata ʼafeā neʼe fakaʼalikiʼi he kiʼi fanau e he tahi ʼi te kokelekasio, ʼe tonu ke natou fakalogo ki te lao ʼo te fenua, ʼo natou fakaha ki te kau polisi. Hili ia, pea ʼe tonu ke natou fakasiosio lelei te aluʼaga totonu ʼae neʼe hoko. ʼE tonu leva ke natou vakavakaʼi te aluʼaga ʼaia ʼo mulimuli ki te Tohi-Tapu pea mo vakaʼi pe ʼe tonu ke fai he komite faifakamau. ʼE tonu muʼa ke fakafehuʼi e te ʼu tagata ʼafeā ia ia ʼae neʼe tukugakoviʼi pe neʼe ina fakahoko moʼoni te faʼahi ʼae neʼe tukugakoviʼi ai ia ia. Kapau ʼe ina fakafisi ki ai, pea ʼe fakafehuʼi anai e te ʼu tagata ʼafeā ia natou ʼae kua natou iloʼi te aluʼaga ʼaia. Pea kapau ʼe fakamoʼoni e he foʼi toko lua ko ia totonu pe ʼae neʼe ina fakaʼalikiʼi te kiʼi fanau, peʼe ko he tahi age kiʼi fanau ʼi he tahi age lakaga, kua feala leva ki te ʼu tagata ʼafeā ke natou fai he komite faifakamau, he ʼe kua natou maʼu he ʼu fakamoʼoni ki ai. * Kae kapau leva ʼe mole he ʼu fakamoʼoni ʼe lua ki te aluʼaga ʼae neʼe hoko, ʼe mole fakaʼuhiga leva neʼe tala e ia ʼae neʼe tukugakoviʼi ia te moʼoni. Logo la ʼe mole maʼu he foʼi toko lua ke nā fakamoʼoni ai neʼe fakaʼalikiʼi moʼoni e ia ʼae neʼe tukugakoviʼi e te kiʼi fanau, kae kua iloʼi e te ʼu tagata ʼafeā neʼe lagi hoko he aluʼaga ʼe kovi, ʼo tupu ai te mamahi ʼo te famili. Kae ʼe tonu ki te ʼu tagata ʼafeā ke natou toe hoko atu tanatou fakalotomalohi pea mo tokoni kia natou ʼae ʼe tau mo te mamahi. ʼE tonu leva ke leʼoleʼo lelei e te ʼu tagata ʼafeā ia ia ʼae neʼe tukugakoviʼi ke puipui ai te kokelekasio naʼa ina toe fakahoko te aga kovi ʼaia ki he tahi age kiʼi fanau.—Gaue 20:28.

17-18. He koʼe ʼe fai e te ʼu tagata ʼafeā he komite faifakamau?

 ¹⁷ He koʼe ʼe tonu ke fai he komite faifakamau? Kapau ʼe tonu ke fai e te ʼu tagata ʼafeā he komite faifakamau, ʼe mole tonu anai ke natou fakatuʼā ia ia ʼae neʼe ina fakaʼalikiʼi te kiʼi fanau, koteʼuhi ʼe fakatuʼā anai ia ia e te puleʼaga ʼi tana maumauʼi te lao. ʼE mole tonu ke fakafeagai te ʼu tagata ʼafeā ki te lao ʼo te puleʼaga. ʼE tonu ke natou tuku ke fakamauʼi ia ia e te puleʼaga. (Loma 13:2-4; Tito 3:1) Kae ʼe tonu ki te ʼu tagata ʼafeā ke natou sio fakapotopoto ʼo ʼuhiga mo ia ʼae neʼe agahala pe ʼe kei tonu ke nofo ʼi te kokelekasio peʼe kailoa.

¹⁸ Ka fai e te ʼu tagata ʼafeā he komite faifakamau, ʼe natou fakamauʼi pe anai he tahi ʼi te loto kokelekasio neʼe agahala ki te ʼAtua peʼe ki he ʼu tehina mo tuagaʼane. ʼE natou mulimuli anai ki te Tohi-Tapu ʼo natou sio fakapotopoto anai kia ia ʼae neʼe ina fakaʼalikiʼi te kiʼi fanau pe kua fakahemala moʼoni peʼe kailoa. Pea kapau ʼe mole fakahemala ia, ʼe tonu anai ke fakamavae ʼi te kokelekasio pea ʼe tonu ke  tala ifo ʼi te fono. (1 Ko. 5:11-13) Kapau ʼe fakahemala ʼe feala ia ke nofo ʼi te kokelekasio. Kae ʼe tonu ke fakaha age e te kau tagata ʼafeā ki ai, ʼe mole toe feala anai ke ina maʼu hona ʼu pilivilesio ʼi he kokelekasio pe. ʼE tonu anai ke tokakaga te kau tagata ʼafeā ki te ʼu kiʼi fanau ʼo natou fai he ʼu fakatuʼutuʼu moʼo puipui ʼo natou. ʼE natou fakatokaga ki te ʼu matuʼā ke natou puipui ʼanatou kiʼi fanau mai ia ia ʼae neʼe ina fai te agahala mamafa. ʼE tonu anai ke manatuʼi e te ʼu tagata ʼafeā te matagafua ʼo te famili ʼo te kiʼi fanau ʼae neʼe fakaʼalikiʼi.

19-22. Kotea ʼae ʼe tonu ke fai e te ʼu matuʼā moʼo puipui ʼo ʼanatou kiʼi fanau? (Vakaʼi te ʼuluaki pāki.)

¹⁹ Ko te maʼua ʼo ʼai ke puipui te ʼu kiʼi fanau? Ko te maʼua ʼo te ʼu matuʼā. * Ko te taupau ʼo te ʼu kiʼi fanau ʼe ko he gaue taputapu he ʼe ko natou ko he ‘tofiga mai ia Sehova.’ (Pes. 127:3) Ko te maʼua ʼo te ʼu matuʼā ke natou puipui ʼanatou kiʼi fanau. Kotea ʼae ʼe feala ke natou fai moʼo puipui ʼanatou kiʼi fanau mai te ʼu aga ʼae ʼo te faifakaʼalikiʼi?

²⁰ ʼUluaki, kotou fai he ʼu fekumi ʼo ʼuhiga mo te ʼu aga faifakaʼalikiʼi. Faigaʼi ke kotou iloʼi pe ʼe ko te ʼu faʼahiga hahaʼi feafeaʼi ʼae ʼe natou fia fakaʼalikiʼi te ʼu kiʼi fanau pea ʼe feafeaʼi hanatou kakaʼi te ʼu kiʼi fanau. Kotou tokakaga lelei ki te ʼu aluʼaga ʼae ʼe fakatupu tuʼutamaki. (Taag. 22:3; 24:3) Kotou manatuʼi ko natou ʼae ʼe natou fakaʼalikiʼi te ʼu kiʼi fanau, ko natou tuʼumaʼu pe ʼae kua falala mo mahani lelei ki ai te ʼu kiʼi fanau.

²¹ Lua, kotou felogoi lelei mo ʼakotou fanau. (Tet. 6:6, 7) ʼE tonu ke kotou fagono lelei ki ʼakotou fanau. (Sakp. 1:19) Kotou fakakaukauʼi age muʼa, ʼe matataku te ʼu kiʼi fanau ʼae neʼe fakaʼalikiʼi ʼi te fakamatala ʼo te aluʼaga ʼae neʼe hoko kia natou. Maʼa natou, ʼe mole tui anai he tahi moka ʼe natou fakamatala te aluʼaga ʼaia peʼe ko ia ʼae neʼe ina fakaʼalikiʼi neʼe ina fakamatakuʼi ke ʼaua naʼa ina fakamatala. Kapau ʼe kotou tokagaʼi ʼe mole ina tala te moʼoni, kotou fai ki ai he ʼu fehuʼi ʼo kotou fakaʼeteʼete pea mo fagono lelei ki ʼana tali.

²² Tolu, kotou akoʼi ʼakotou fanau. Kotou fakamahino kia natou te ʼu faʼahi ʼae ʼe tonu ke natou iloʼi ʼo ʼuhiga mo te ʼu koga tapu ʼo te sino ʼo mulimuli ki ʼonatou taʼu. Kotou akoʼi kia natou ke natou popoto ʼi te palalau ki he tahi ʼe ina fia fāfā ʼonatou koga tapu. Kotou fakaʼaogaʼi he ʼu alatike ʼo te kautahi ʼa Sehova ʼe fakamahino ai pe ʼe feafeaʼi te puipui ʼo ʼakotou fanau.—Vaka’i te fakamatala ’ae ’i te ’a takai “ Kotou Kumi Tokoni Pea Kotou Akoʼi Ki ʼAkotou Kiʼi Fanau.”

23. Kotea tatatou manatu ʼo ʼuhiga mo te fakaʼalikiʼi ʼo te ʼu kiʼi fanau?

²³ Ko tatou ʼaeni ko te Kau Fakamoʼoni ʼa Sehova, ʼe tou fehiʼa ki te fakaʼalikiʼi ʼo te ʼu kiʼi fanau koteʼuhi ʼe ko he agahala mamafa ia pea ʼe ko he aga ia ʼe kovi. ʼE fakalogo te ʼu kokelekasio ki te lao ʼa Kilisito, ko te tupuʼaga la ʼaia ʼo tanatou mole puipui ia natou ʼae ʼe natou fakaʼalikiʼi te ʼu kiʼi fanau mai te ʼu nunuʼa kovi ʼo ʼanatou agahala. ʼE feafeaʼi hatatou tokoni kia natou ʼae neʼe fakaʼalikiʼi? ʼE tou tali anai ki te fehuʼi ʼaia ʼi te alatike ka hoa mai.