1. He koʼe ko ʼihi ʼe mole natou fia ako te Tohi-Tapu?

IA ʼAHO nei, tokolahi te hahaʼi ʼe tonu ke natou gaue kinakina ke maʼu ai hanatou falā moʼo taupau tonatou maʼuli. Pea ko ʼihi ʼi ʼotatou tehina mo tuagaʼane ʼe tonu ke natou gaue ʼi te ʼaho katoa ke maʼu ai hanatou foʼi falā moʼo fafaga ʼo ʼanatou kiʼi fanau pea hoki natou liliu mai ki fale ʼi te afiafi. Pea ko te tokolahi ʼe natou fai he ʼu gaue kinakina, pea ʼi tanatou kua tau atu ki fale, ʼe mole kei feala pe la hanatou ako te Tohi-Tapu koteʼuhi kua natou gaʼegagaʼe.

2. Ko te temi fea ʼae ʼe feala ai ke tou ako te Tohi-Tapu?

² Kae ʼe tonu ke tou toʼo he temi ke tou ako fakamalotoloto te Tohi-Tapu pea mo ʼatatou tohi. ʼE maʼuhiga ʼaupito ke tou fai te faʼahi ʼaia mo kapau ʼe tou fia maʼu he ʼu felogoi lelei mo Sehova pea mo tou maʼu te maʼuli heʼe gata. (1 Tim. 4:15) Ko ʼihi ʼe natou ʼaʼala ʼi te ʼaho fuli ʼi te mafoata ʼo ako te Tohi-Tapu kae ʼe kei momoe ʼonatou kiʼi famili, koteʼuhi kua natou malolo lelei. Pea ko ʼihi ʼe natou leleiʼia age te afiafi ke natou ako ai te Tohi-Tapu pea mo metitasio ki ai.

3-4. Kotea te tonu ʼae neʼe toʼo e te Kolesi Pule ʼo ʼuhiga mo ʼatatou tohi? Pea kotea tona tupuʼaga?

³ ʼE lagi kua kotou iloʼi pe te maʼuhiga ʼae ke kotou toʼo he temi moʼo ako te Tohi-Tapu. Kae kotea koa ʼae ʼe tonu ke tou ako? ʼE lahi te ʼu meʼa ʼe tonu ke tou lau kae ʼe mole feala ke tou lau fuli. Ko ʼihi ʼe feala ke natou lau fuli ʼatatou tohi. Kae tokolahi ʼi ʼotatou tehina mo tuagaʼane ʼe mole feala ke natou lau te ʼu tohi koteʼuhi ʼe mole maʼu honatou temi. ʼE mahino te Kolesi Pule ki te aluʼaga ʼaia. Ko te tupuʼaga la ʼaia, neʼe toʼo ai e te Kolesi Pule he tonu ke natou fakasiʼisiʼi te ʼu tohi ʼae ʼe ta pea mo ʼae ʼi te Neti.

 ⁴ Ohage la, ʼe mole tou toe maʼu anai te tohi Annuaire des Témoins de Jéhovah koteʼuhi ʼi te temi nei kua tou maʼu fuli te ʼu faʼifaʼitaki fakalotomalohi ʼi tatatou tuʼasila ʼi te Neti jw.org^® pea mo te ʼu emisio ʼi te JW Télédiffusion. Pea ko Te Tule Leʼo ki te tufa pea mo te Kotou ʼAʼala! ʼe tufa pe anai tuʼa tolu ʼi te taʼu. Neʼe mole fai te ʼu fakatuʼutuʼu ʼaia, ke feala hatatou fai he tahi age ʼu faʼahiga meʼa ʼae ʼe mole kau ki te tauhi ʼae kia Sehova. Kae ʼe ko he fakafealagia ʼaia, ke tou iloʼi “te ʼu meʼa ʼae ʼe maʼuhiga ʼaupito” kia tatou. (Flp. 1:10) ʼE tou vakaʼi pe ʼe feafeaʼi hatatou iloʼi te ʼu meʼa ʼae ʼe maʼuhiga pea kotea te ʼu fua lelei ka tou maʼu ʼi tatatou ako tokotahi te Tohi-Tapu.

5-6. Kotea te ʼu tohi ʼae ʼe tonu ke tou ako fakamalotoloto?

⁵ Kotea ʼae ʼe tonu ke tou ʼuluaki ako? ʼE tonu ke tou ako te Folafola ʼa te ʼAtua ʼi te ʼaho fuli. ʼI te vahaʼa fuli, ʼe ʼi ai te polokalama ki te lau ʼo te Tohi-Tapu maʼa te kokelekasio. Pea kua fakasiʼisiʼi te ʼu vaega Fakatohi-tapu ʼae ʼe tonu ke tou lau, ke feala ai hatatou metitasio ki te ʼu vaega mo tou fai he ʼu fekumi ki ʼatatou tohi. ʼE mole tonu ke tou lau pe te ʼu vaega ʼae ʼo te vahaʼa, kae ʼe tonu ke malave ki ʼotatou loto pea mo tou fakaovi ai kia Sehova.​—Ps. 19:15.

⁶ Kotea ʼae ʼe tonu ke tou toe ako fakamalotoloto? ʼE tonu ke tou teuteuʼi lelei te ʼu fono ʼo te vahaʼa ʼo toe feia mo te Ako Tohi-Tapu ʼo Te Kokelekasio pea mo te ako leva ʼo Te Tule Le’o ʼi te fakaʼosi vahaʼa. Pea ʼe tonu ke tou toe lau fuli te ʼu Tule Leʼo ki te tufa pea mo te Kotou ʼAʼala!.

7. ʼE tonu koa ke tou lotovaivai mo kapau ʼe mole tou lava lau pea mo sioʼi fuli te ʼu meʼa ʼae ʼe foaki mai e tatatou kautahi?

⁷ Kae ʼe feafeaʼi ki te ʼu meʼa ʼae ʼe tou maʼu ʼi ʼatatou tuʼasila ʼi te Neti jw.org^® pea mo te JW Télédiffusion? ʼE lahi te ʼu meʼa ʼae ʼe tonu ke tou sioʼi. Tou toʼo he faʼifaʼitaki: Fakakaukauʼi age muʼa, ʼe kotou olo ki he fale kai pea ʼe kotou sisio ki te ʼu meʼa kai kehekehe ʼi te laupapa. ʼE mole feala anai ki te hahaʼi ke natou ʼahiʼahi te ʼu meʼa kai fuli ʼaia. ʼE tonu anai ke natou filifili pe te ʼu meʼa kai ʼe natou fia kakai ki ai. Pea ʼe toe feia pe ki tatatou ako te Tohi-Tapu. Kapau ʼe mole feala ke tou lau fuli, ʼe mole tonu ke tou lotovaivai ai. Tou lau pea mo tou sioʼi te ʼu meʼa ʼae ʼe tou lavaʼi. ʼI te lakaga leva ʼaeni, ʼe tou vakaʼi anai pe ʼe feafeaʼi te fai ʼo he ako tokotahi pea kotea ʼae ʼe tonu ke tou fai ke fua lelei ai kia tatou.

8. Kotea ʼae ʼe tonu ke tou fai mo kapau ʼe tou teuteuʼi Te Tule Leʼo? Pea kotea tona ʼaoga kia tatou?

⁸ Ka kotou ako te Tohi-Tapu, ʼe tonu ke kotou fakakaukauʼi lelei ki te ʼu meʼa ʼae ʼe kotou lau ke feala hakotou maʼu he ʼu manatu ʼe foʼou. Koia la ʼae ʼe mole tonu ai ke kotou lau fakaviliviliʼi pea mo fakailoga atu aipe he ʼu tali. Ohage la, ka tou teuteuʼi Te Tule Leʼo ʼe tonu muʼa ke tou vakaʼi te ʼu manatu fakanounou ʼae ʼe tou maʼu ʼi te kamata ʼo te alatike. Pea ʼe tou sioʼi leva te kupu taki ʼo te alatike mo te ʼu manatu tafito pea mo te ʼu fehuʼi fakamanatu. Pea ʼe tou lau mamalie leva te alatike mo tou tokakaga ki te ʼu meʼa ʼae ʼe tou lau. Pea ʼe tonu ke tou maʼu te manatu ʼae ka vakaʼi ʼi te palakalafe. ʼI te agamahani, ʼe tou maʼu te manatu ʼaia ʼi te ʼuluaki falasisi ʼo te palakalafe. Pea ʼe ina fakaha mai te manatu ʼae ka fakamahino ʼi te palakalafe. Ka kotou lau te alatike, ʼe kotou tokagaʼi te pikipikiga ʼo te palakalafe mo te manatu tafito pea mo te kupu taki ʼo te alatike. Kotou fakailoga te ʼu kupu ʼae ʼe  mole kotou mahino ki ai ʼo toe feia ki te ʼu manatu foʼou ʼae ka kotou fakaloloto anai ʼi ʼakotou fekumi ki muli age.

9. (1) He koʼe ʼe tonu ke tou fakatokagaʼi lelei te ʼu vaega Fakatohi-tapu moka tou ako Te Tule Leʼo? (2) ʼO mulimuli kia Sosue 1:8, kotea ʼae ʼe tonu ke tou fai moka ʼosi lau he vaega Fakatohi-tapu?

⁹ Ka tou ako Te Tule Leʼo ʼe tokoni mai anai ke tou mahino ki te Tohi-Tapu. Tou fakatokagaʼi lelei te ʼu vaega Fakatohi-tapu, tafito ia te ʼu vaega ʼae ka tou lau lolotoga te fono. Pea tou toʼo te ʼu manatu maʼuhiga ʼo te vaega ʼae ʼe alu tahi mo te manatu ʼae kua fakamahino ʼi te palakalafe. Tou toʼo he temi moʼo metitasio ki te vaega ʼae neʼe tou lau pea mo tou fakakaukauʼi pe ʼe feafeaʼi hatatou maʼuliʼi.—Lau ia Sosue 1:8.

10. ʼO mulimuli kia Hepeleo 5:14, he koʼe ʼe tonu ke akoʼi e te ʼu matuʼā ʼanatou fanau te ako ʼo te Tohi-Tapu pea mo fai he ʼu fekumi?

¹⁰ ʼE mahino papau, ʼe loto e te ʼu matuʼā ke leleiʼia e te ʼu fanau tanatou Ako Fakafamili. Koia ʼe tonu ke iloʼi e te ʼu matuʼā pe ʼe kotea ʼae ka natou ako ʼi te Ako Fakafamili. Kae ʼe mole fakaʼuhiga leva ʼe tonu ke fai e te ʼu matuʼā he ʼu ako ke lahi feafeaʼi. E feala pe hanatou sioʼi he emisio ʼi te JW Télédiffusion peʼe ke natou fai he ʼu kiʼi gaue lolotoga te Ako Fakafamili ʼi te vahaʼa fuli, ohage la ke natou faʼu te aleka ʼo Noe. Pea ʼe toe maʼuhiga ke akoʼi e te ʼu matuʼā ki ʼanatou fanau pe ʼe feafeaʼi te ako ʼo te Tohi-Tapu. Ohage la, ʼe ʼaoga ki te ʼu kiʼi fanau ke natou iloʼi pe ʼe feafeaʼi te teuteuʼi ʼo te ʼu fono peʼe ko te fai ʼo he ʼu fekumi ki te ʼu fihifihia ʼae ʼe natou tau mo ia ʼi te fale ako. (Lau ia Hepeleo 5:14.) Kapau ʼe kotou toʼo he temi moʼo ako te Tohi-Tapu ʼi ʼokotou ʼapi, ʼe faigafua anai tanatou muliʼi te ʼu fono peʼe ko te ʼu fakatahi lalahi ʼae ʼe fakaha tahitahiga ai te ʼu kiʼi ʼata viteo. ʼE mahino ia, ʼe mulimuli pe anai te loaloaga ʼo te ako Fakatohi-tapu ki te taʼu pea mo te agaaga ʼo te kiʼi fanau.

11. He koʼe ʼe maʼuhiga ke popoto ʼatatou kau ako ʼi te fai ʼo tanatou ako takitokotahi?

¹¹ ʼE toe ʼaoga ki te kau ako ke natou iloʼi pe ʼe feafeaʼi te fai ʼo tanatou ako takitokotahi. ʼI tanatou kei foʼofoʼou, ʼe tou fiafia moka natou fakailoga ʼanatou tali ʼi ʼanatou tohi ako pea mo tanatou teuteuʼi ʼanatou fono. Kae ʼe mole tonu ke gata ai. ʼE tonu ke tou akoʼi natou ke natou popoto ʼi te fai ʼo he ʼu fekumi pea mo fai hanatou ako takitokotahi. Kapau ʼe tou akoʼi kia natou te ʼu faʼahi ʼaia, ʼe tokoni anai kia natou ke natou lava tauʼi ʼonatou fihifihia. Pea ka hoko anai he fihifihia kia natou, ʼe mole natou olo anai ʼo fehuʼi ki ʼihi ʼo te kokelekasio te  meʼa ʼae ʼe tonu ke natou fai. ʼE natou fai pe anai ʼanatou fekumi ʼi ʼatatou tohi.

12. Kotea ʼape ʼatatou fakatuʼutuʼu moka tou ako te Tohi-Tapu?

¹² Kapau ʼe mole kotou leleiʼia te lautohi, ʼe lagi kotou manatu ʼe mole feala anai ʼi he ʼaho ke kotou ako te Tohi-Tapu. Kae ʼe feala pe ke kotou kamata mamalie te ako ʼo te Tohi-Tapu. Pea ʼaki te temi, ʼe kotou fakalahilahi anai te temi ʼae ʼe kotou ako ai leva te Tohi-Tapu. Kotou manatuʼi te tupuʼaga ʼo takotou ako te Tohi-Tapu. ʼE moʼoni, ʼe tou ako fuli he ʼe tou fia fakaovi kia Sehova. Kae ʼi ʼihi temi, ʼe tou fai he ʼu fekumi he ʼe tou tau mo he ʼu fihifihia, pe ʼe tou fia maʼu he tali ki he fehuʼi neʼe fai mai e he tahi.

13. (1) ʼE feala ke fakamahino feafeaʼi e he tupulaga tana tui ki ʼona kaumeʼa? (2) ʼE feafeaʼi hatatou maʼuliʼi te tokoni ʼae ia Kolose 4:6?

¹³ Kotou fakakaukauʼi age muʼa he tupulaga ʼe kei ako. Pea ʼe tui e ʼona kaumeʼa fuli ʼae ʼi te fale ako ki te evolisio, ʼo natou manatu neʼe hifo mai te tagata mai te ʼu manu. Kae ʼe kotou fia fakamahino age neʼe fakatupu e te ʼAtua te tagata, ohage ko tona fakaha ʼi te Tohi-Tapu. (Loma 1:20; 1 Pet. 3:15) Kae ʼe kotou manatu ʼe mole kotou lava fakamahino te faʼahi ʼaia. Kae ʼe feala pe hakotou fai he ʼu fekumi ʼi ʼatatou tohi moʼo fakamahino te manatu ʼaia. ʼE kotou tokagaʼi anai ʼe mole faigataʼa fau te fakamahino ʼo takotou tui. Tokolahi te hahaʼi ʼe natou tui ʼe haʼu te tagata mai te manu, ʼuhi pe he neʼe natou logo ki he tagata neʼe ina fai he ʼu ako maʼoluga, neʼe ina ui ʼe moʼoni te manatu ʼaia. Kotou kumi ʼi ʼatatou tohi he ʼu manatu ʼe tahi peʼe lua, ke kotou lava fakamahino ai kia natou te moʼoni. Pea ko natou ʼae ʼe fia mahino moʼoni ʼe lagi feala pe anai ke natou ako te Tohi-Tapu.—Lau ia Kolose 4:6.

14-16. (1) ʼE feafeaʼi hakotou faiga ke kotou mahino lelei ki he tohi ʼo te Tohi-Tapu neʼe mole kotou iloʼi lelei? (2) ʼE feafeaʼi hakotou mahino lelei ki te tohi ʼo Amosi? (Vakaʼi mo te fakamatala ʼae ʼi te ʼa takai “Akoako Ke Kotou Iloʼi Lelei Te ʼu Kaugana ʼa Sehova ʼi Te Tohi-Tapu.”)

¹⁴ Kotou fakakaukauʼi age muʼa, neʼe fakatuʼutuʼu ke ako te tohi ʼo he kiʼi polofeta ʼi te fono ʼo te kokelekasio, kae ʼe mole kotou iloʼi lelei te polofeta ʼaia. Ko te ʼuluaki meʼa ʼae ʼe tonu ke kotou fai, ke kotou fakatuputupu ia koutou te fia iloʼi ʼo te hisitolia ʼo te polofeta ʼaia. ʼE feafeaʼi anai hakotou fai te faʼahi ʼaia?

¹⁵ Kae ʼe tou fai muʼa te ʼu fehuʼi ʼaeni: ‘Kotea ʼae ʼe au iloʼi ʼo ʼuhiga mo ia ʼae neʼe ina tohi te tohi ʼaeni? Ko ai ia ia? Neʼe maʼuli ʼifea? Neʼe kotea tana gaue?’ Kapau ʼe tou iloʼi te maʼuli ʼo te tagata ʼaia, ʼe tou mahino anai ki tana faʼahiga faifakamatala pea mo te ʼu faʼifaʼitaki ʼae neʼe ina fakaʼaogaʼi. Pea ʼi takotou lolotoga lau tana tohi, kotou fakatokagaʼi te ʼu kupuʼi palalau ʼae ʼe ha ai te ʼuluagaaga moʼoni ʼo te polofeta ʼaia.

¹⁶ Hili ia, ʼe feala pe ke kotou kumi pe neʼe tohi ʼi te temi fea te tohi ʼaia? ʼE feala pe ke kotou sioʼi ʼi te Tohi-Tapu Fakafalani. (La Bible. Traduction du monde nouveau. Table des livres de la Bible). Kapau ʼe kotou ako he tohi ʼe ko he tohi ʼo te ʼu kiʼi polofeta pea ʼe lelei ke kotou fai he ʼu fekumi pe neʼe feafeaʼi te maʼuli ʼo te hahaʼi ʼi te temi ʼae neʼe tohi ai te tohi ʼaia. Kotou kumi pe koʼe neʼe fekauʼi te polofeta ki te fenua ʼaia, pea kotea te ʼu aga kovi ʼae neʼe fai e te hahaʼi ʼaia. ʼE feala ke kotou mahino lelei ki te hisitolia mo kapau ʼe kotou fai he ʼu fekumi ʼi ʼihi atu tohi ʼo te Tohi-Tapu. Ohage la, kapau ʼe kotou fia mahino ki te ʼu meʼa ʼae neʼe hoko ʼi te temi ʼo te polofeta ko Amosi, ʼe feala pe ke kotou fai he ʼu fekumi ʼi te ʼu tohi ʼo Lua Hau  pea mo Lua Koloniko. Pea ʼe toe feala pe ke kotou kumi ki te tohi ʼo Oseo koteʼuhi neʼe maʼuli mo ia ʼi te temi ʼo te polofeta ko Amosi. Kapau ʼe kotou fai he ʼu fekumi ʼi ʼihi atu tohi ʼo te Tohi-Tapu, ʼe kotou mahino lelei anai pe neʼe feafeaʼi te maʼuli ʼo te hahaʼi ʼi te temi ʼo Amosi.—2 Hau 14:25-28; 2 Klk. 26:1-15; Oseo 1:1-11; Amo. 1:1.

17-18. ʼE kotou maʼu feafeaʼi he fiafia lahi ʼi takotou ako te Tohi-Tapu tafito la moka kotou tokagaʼi he ʼu manatu ʼe hage ʼe mole faʼa maʼuhiga?

¹⁷ Ka kotou lau te Tohi-Tapu, ʼe lelei ke kotou fia iloʼi meʼa fuli. Ohage la, ʼe kotou lau ia Sakalia kapite 12 ʼae neʼe fakaha fakatomuʼa te mate ʼo te Mesia. (Sakl. 12:10) Pea kotou lau te vaega 12 ʼae ʼe ui ai ko “te famili o te fale o Natane” ʼe natou fetagihi anai ʼuhi ko te mate ʼo te Mesia. ʼE lelei ke kotou tokagaʼi te manatu ʼaia. ʼE feala pe ke kotou fai te fehuʼi ʼaeni: ‘Kotea te pikipikiga ʼo te famili ʼo Natane pea mo te Mesia? ʼE feala koa ke au iloʼi loloto atu te faʼahi ʼaia?’ ʼE ʼaoga ke kotou fai he ʼu fekumi. Pea ʼe ʼi ai te pikipikiga ʼo Sakalia 12:12 pea mo 2 Samuele 5:13, 14, pea ʼe kotou mahino ai ko Natane ʼe ko he foha ʼo Tavite. Pea ʼe toe pipiki ki ai ia Luka 3:23, 31 ʼae ʼe toe fakaha ai ko Sesu ʼe haʼu mai te hakoga ʼo Natane, koteʼuhi ko tana faʼe ko Malia. (Vakaʼi Te Tule Leʼo ki te tufa 2016 N° 3 p. 9 “Ko ai ia te tamai ʼa Sosefo?”.) Koia ʼe kotou toe fia mahino loloto anai ʼo ʼuhiga mo te faʼahi ʼaia. ʼE kotou iloʼi neʼe kua fakaha fakatomuʼa ʼi he lea fakapolofeta ʼe kau anai ia Sesu ʼi te hakoga ʼo Tavite. (Mat. 22:42) Kae neʼe maʼu e Tavite ʼona foha ʼe toko 20 tupu. Pea ko Sakalia neʼe ko te kui ʼa te Mesia ʼae neʼe tupu mai ai ia Malia. Pea ʼe lelei ke kotou tokagaʼi neʼe fakakikite e Sakalia ʼe mamahi anai te ʼu hakoga ʼo Natane ʼuhi ko te mate ʼo Sesu.

 ¹⁸ Tou toʼo he tahi age faʼifaʼitaki. ʼI te ʼuluaki kapite ʼo Luka, ʼe kotou lau ai neʼe hifo mai te ʼaselo ko Kapeliele ʼo ʼaʼahi ia Malia pea mo fakaha age ki ai ʼe ina fanauʼi anai he tama. Neʼe ui fenei e te ʼaselo: “ ʼE maʼuhiga anai pea ʼe fakahigoa anai ko te ʼAlo ʼo te Maʼoluga, pea ko Sehova ʼAtua ʼe ina foaki age anai te hekaʼaga fakahau ʼo Tavite tana tamai, pea ʼe hau anai ia ki te ʼapi ʼo Sakopo ʼo talu ai.” (Luka 1:32, 33) ʼI te agamahani, ʼe tou lau tuʼumaʼu pe te ʼuluaki koga ʼo te logo ʼa Kapeliele, ʼi tana fakaha ʼae ko Sesu ʼe fakahigoa anai ko “te ʼAlo ʼo te Maʼoluga.” Kae neʼe toe ui e Kapeliele ʼe “hau” anai ia Sesu. ʼE feala ke tou feʼekeʼaki pe neʼe mahino feafeaʼi ia Malia ki te ʼu palalau ʼaia. Neʼe lagi manatu ia Malia ʼe hau anai ia Sesu ʼi Iselaele ʼo ina fetogi te Hau ko Helote peʼe ko he tahi age pe hau. Pea kapau ʼe hau anai ia Sesu pea ko Malia tana faʼe ʼe liliu anai ko te fafine ʼaliki ʼo te fenua, pea ko tona famili ʼe maʼuli anai ʼi te fale hau. Kae ʼi te Tohi-Tapu neʼe mole ko te ʼu palalau ʼaia neʼe fai e Malia kia Kapeliele. Pea neʼe mole kole pe la e Malia hona tuʼulaga ʼi te Puleʼaga ohage ko tona fai e te ʼu tisipulo ʼe lua ʼae ʼa Sesu. (Mat. 20:20-23) ʼE ha ʼi te ʼu manatu ʼaia, ko Malia neʼe ko te fafine agavaivai ʼaupito.

19-20. ʼO mulimuli kia Sakopo 1:22-25 pea mo 4:8, kotea tatatou fakatuʼutuʼu moka tou ako te Tohi-Tapu?

¹⁹ Kotou manatuʼi ka tou ako te Tohi-Tapu mo ʼatatou tohi, ko tatatou fakatuʼutuʼu tafito ke tou fakaovi kia Sehova. ʼE tou toe fia mahino lelei pe ʼe “ko te faʼahiga tagata feafeaʼi” ia tatou pea kotea te ʼu fetogi ʼae ʼe tonu ke tou fai ke fiafia ai ia te ʼAtua. (Lau ia Sakopo 1:22-25; 4:8.) ʼI muʼa ʼo hatatou kamata tatatou ako tokotahi, ʼe tonu ke tou kole kia Sehova tona laumalie maʼoniʼoni. ʼE tonu anai ke tou kole mamahi ke tokoni mai ke tou fakaʼaogaʼi lelei te ʼu meʼa gaue ʼae ka tou ako, pea ke tou iloʼi pe kotea te ’u fetogi ’e tonu ke tou fai ’i ʼotatou maʼuli.

²⁰ ʼE tou fia liliu fuli anai ʼo hage ko te kaugana agatonu ʼa te ʼAtua ʼae neʼe ui fenei e te tagata faipesalemo ʼo ʼuhiga mo ia: “ ʼE ina maʼu tona fiafiaʼaga ʼi te lao ʼa Sehova, pea ʼe ina lau leʼo veliveli tana lao ʼi te ʼaho mo te po. . . . ʼE lava lelei anai ia meʼa fuli ʼe ina fai.”—Pes. 1:2, 3.