Ke Ke Tauhi Kia Sehova Mo He Loto Katoa
“E Sehova, ʼe au kole atu ke ke manatuʼi neʼe au haʼele ’i ʼou muʼa ’i te moʼoni pea mo he loto katoa.” —2 HAU 20:3, MN.
KATIKO: 52, 65
1-3. Kotea te fakaʼuhiga ʼo te ui ʼae ke tou tauhi kia Sehova mo “he loto katoa”? Tuku mai he faʼifaʼitaki.
ʼE TOU agahala fuli pea mo fai ni lakahala. Kaʼe neʼe foaki mai e Sehova te sakilifisio ʼo Sesu pea ʼe lotofakamolemole gafua. Koia, kapau ʼe tou agavaivai pea mo fakahemala, ʼe feala ke tou kole ke fakamolemole mai. ʼE tou tui papau ʼe mole fai anai e Sehova he meʼa kia tatou “o mulimuli ki atatou agahala.” (Pesalemo 103:10) Koia, ʼe tonu ke tou ‘tauhi kia ia ʼi totatou loto katoa.’ (1 Koloniko 28:9) Kaʼe, ʼe feafeaʼi hatatou fakahoko te faʼahi ʼaia logo la totatou ʼuhiga agahala?
2 Ke feala hatatou iloʼi te faʼahi ʼaia, tou toʼo he faʼifaʼitaki. ʼE feala ke tou fakatatau te maʼuli ʼo te Hau ko Asa pea mo te Hau ko Amatesia. Neʼe fai e te ʼu hau ʼaia ʼe lua he ʼu gaue ʼe lelei. Kaʼe neʼe nā toe fai foki he ʼu lakahala ʼuhi pe ko tonā ʼuhiga agahala. Kaʼe ʼe ui mai ʼi te Tohi-Tapu “nee pipiki katoa te loto o Asa [kia Sehova] i tona mauli katoa.” (2 Koloniko 15:16, 17; 25:1, 2; Taaga Lea 17:3) ʼEi, neʼe faiga tuʼumaʼu ke ina fakafiafiaʼi te loto ʼo Sehova koteʼuhi neʼe pipiki katoa tona loto ki te ʼAtua. (1 Koloniko 28:9) Ko Amatesia neʼe mole tauhi kia Sehova mo “he loto katoa.” Hili tana tauʼi te ʼu fili ʼo te ʼAtua, neʼe ina ʼave ʼanatou taula ʼatua pea neʼe ina kamata atolasio ki ai.—2 Koloniko 25:11-16.
3 Ko te tauhi ki te ʼAtua mo “he loto katoa,” ko tona fakaʼuhiga ʼe tou ʼoʼofa mamahi ia Sehova pea ʼe tou fia atolasio kia te ia ʼo talu ai. ʼI te Tohi-Tapu, ko te kupu “loto” ʼe tau fakaʼuhiga ki totatou ʼuhiga moʼoni ʼae ʼi loto. ʼE kau ki ai tatatou faʼahiga fakakaukau, te ʼu meʼa ʼae ʼe tou leleiʼia, te ʼu meʼa ʼae ʼe tou fia fai ʼi totatou maʼuli pea mo ʼatatou fakatuʼutuʼu. Logo la totatou ʼuhiga agahala, kaʼe ʼe feala ke tou tauhi kia Sehova mo he loto katoa. ʼEi, ʼe tou tauhi kia Sehova koteʼuhi ʼe tou loto moʼoni ki ai kaʼe mole ʼuhi he ko hotatou maʼua peʼe ko hatatou agamahani.—2 Koloniko 19:9.
4. Kotea ʼae ka tou vakaʼi anai?
4 ʼE tonu ke tou mahino lelei ki te fakaʼuhiga ʼo te tauhi ki te ʼAtua mo he loto katoa. Koia, tou vakaʼi te maʼuli ʼo Asa pea mo te ʼu maʼuli ʼo te tahi ʼu hau agatonu ʼe toko tolu ʼo Suta: Ko Sosafate, mo Esekiasi pea mo Sosiasi. Logo la neʼe fai e te ʼu hau ʼaia ni lakahala, kaʼe neʼe tali natou e Sehova. He neʼe sio ki tanatou tauhi kia te ia mo he loto katoa. He koʼe neʼe ina tokagaʼi ia natou? Pea ʼe tou lava faʼifaʼitaki feafeaʼi ia natou?
‘NEʼE KATOA TE LOTO ʼO ASA KIA SEHOVA’
5. Kotea ʼae neʼe fai e Asa ʼi te temi ʼae neʼe hau ai?
5 Ko Asa neʼe ko te tolu hau ʼaia ʼo Suta hili te vaeluaʼi ʼo te puleʼaga ʼo Iselaele: Ko te puleʼaga ʼo Iselaele pea mo te puleʼaga ʼo Suta. ʼI tona fakanofo ke hau ʼi Suta, neʼe ina fakatotonu ke ina pulihi te tauhi hala pea mo te aga heʼe ʼaoga. Neʼe ina maumauʼi te ʼu taula ʼatua ʼae neʼe atolasio ki ai te hahaʼi pea neʼe ina kapu te kau paomutu ʼo te fale tapu. Neʼe toʼo leva e Asa “te tuulaga o te fafine hau mai tana [kui, MN], o tupu nee ina fau he fakatata.” (1 Hau 15:11-13) Pea neʼe toe fakalotomalohiʼi e Asa te hahaʼi ke natou “kumi [ia Sehova]” pea mo fakalogo ki te “lao mo ana fakatotonu.” Koia, neʼe ina fai ia meʼa fuli ʼe ina lavaʼi moʼo tokoni ki ʼihi ke natou atolasio kia Sehova.—2 Koloniko 14:3.
Neʼe fakatotonu e Asa ʼe ina pulihi te tauhi hala mai tona puleʼaga
6. Kotea ʼae neʼe fai e Asa ʼi te temi ʼae neʼe tauʼi ai e te kau Etiopea ia Suta?
6 ʼI te ʼu ʼuluaki taʼu ʼe hogofulu ʼo te ʼafio hau ʼa Asa, neʼe mole tau te puleʼaga ʼo Suta. Pea neʼe ʼomai leva te kau Etiopea mo kau solia ʼe toko tahi miliona pea mo saliote tau ʼe tolugeau ʼo tauʼi ia Suta. (2 Koloniko 13:23; 14: 5, 8, 9) Kotea ʼae neʼe fai e Asa? Neʼe falala ʼe tokoni anai ia Sehova ki ʼana kaugana. Koia, neʼe faikole ai kia Sehova ke tokoni age ke natou malo ʼi te tau. (Lau ia 2 Koloniko 14:10.) ʼI ʼihi temi, neʼe tuku e Sehova ke tauʼi e tana hahaʼi ʼonatou fili, tatau aipe pe neʼe mole agatonu te ʼu hau kia te ia. Neʼe ina fai te faʼahi ʼaia ke ha ko ia te ʼAtua moʼoni. (1 Hau 20:13, 26-30) Kaʼe ʼi te temi ʼaia, neʼe tokoni ia Sehova ki tana hahaʼi koteʼuhi neʼe falala ia Asa kia te ia. Neʼe tali ia Sehova ki te faikole ʼa Asa pea neʼe natou malo ai ʼi te tau. (2 Koloniko 14:11, 12) Ki muli age, neʼe fai e Asa ia he agahala mamafa ʼi tana kole tokoni ki te hau ʼo Silia kaʼe mole kia Sehova. (1 Hau 15:16-22) Logo la te faʼahi ʼaia, kaʼe neʼe tokagaʼi aipe e Sehova te ʼofa ʼo Asa ia ia. Pea “nee katoa te loto o Asa [kia Sehova] i tona mauli katoa.” Koia, ʼe tou lava faʼifaʼitakiʼi feafeaʼi ia te faʼifaʼitaki lelei ʼa Asa?—1 Hau 15:14.
7, 8. ʼE ke faʼifaʼitakiʼi feafeaʼi anai ia Asa?
7 ʼE feafeaʼi hau iloʼi ʼe ke pipiki kia Sehova mo tou loto katoa? ʼE feala ke ke fai kia koe te ʼu fehuʼi ʼaeni: “ ʼE au fakalogo koa anai kia Sehova tatau aipe pe ʼe faigataʼa? ʼE au fakatotonu koa ke maʼa tuʼumaʼu tona kokelekasio?” Ke ke fakakaukauʼi age muʼa te lototoʼa ʼo Asa ʼi tana fakahifo tana kui fafine ʼi te tuʼulaga hau ʼae neʼe nofo mo ia. ʼI ʼihi temi, ʼe feala ke ke maʼu te lototoʼa ʼaia, ohage ko Asa. Ohage la, kapau ko he tahi ʼo tou famili peʼe ko hou kaumeʼa lelei neʼe agahala, neʼe mole fakahemala pea neʼe fakamavae ʼi te kokelekasio, ʼe lelei ke ke fai te ʼu fehuʼi ʼaeni: ʼE ke fakatotonu koa ke mole ke toe fakatahi mo te kilisitiano ʼaia? Kotea ʼe uga anai koe ʼe tou loto ke ke fai?
8 Ohage ko Asa, ʼe feala ʼi ʼihi temi ke ke logoʼi ʼe fakafeagai atu te hahaʼi fuli kia koe. ʼE lagi vaʼi koe e ʼou kaugā ako peʼe ko ʼau faiako koteʼuhi ko koe ko te Fakamoʼoni ʼa Sehova. Peʼe lagi ʼi te fale gaue, ʼe lau e ʼou kaugā gaue tou vale ʼi tau toʼo he ʼu ʼaho malolo ki he fakatahi lahi peʼe ko tau mole fai he ʼu hola fakalaka. ʼI te ʼu aluʼaga ʼaia, ke ke falala kia Sehova, ohage ko tona fai e Asa. Faikole kia Sehova, mo fakaha ʼe ke lototoʼa pea mo ke haga fai te meʼa ʼae ʼe lelei. ʼAua naʼa galo kia koe neʼe foaki e Sehova te malohi kia Asa pea ʼe ina toe fai feia pe anai kia koe.
9. He koʼe ʼe fiafia ia Sehova moka ke faifakamafola?
9 Neʼe mole manatu pe ia Asa kia ia totonu. Kaʼe, neʼe ina toe fakalotomalohiʼi ʼihi ke natou “kumi [ia Sehova].” ʼO toe feia pe mo koe, ʼe feala ke ke tokoni ki te hahaʼi ke natou tauhi kia Sehova. Pea ʼe tokagaʼi e Sehova moka ke palalau ki ʼihi ʼo ʼuhiga mo ia. ʼE mahino ia, ʼe fiafia ʼi tana sio ki tau fai te faʼahi ʼaia. Kotea tona tupuʼaga? Koteʼuhi ʼe ke ʼofa ia te ia pea ʼe ke tokaga ki te hahaʼi pea mo tonatou ka haʼu.
NEʼE KUMI E SOSAFATE IA SEHOVA
10, 11. ʼE ke lava faʼifaʼitakiʼi feafeaʼi ia Sosafate?
10 Ko Sosafate, ia te foha ʼo Asa, “nee haele . . . ia ia i te ala o tana tamai ko Asa.” (2 Koloniko 20:31, 32) ʼO feafeaʼi? Ohage pe ko tana tamai, neʼe ina fakalotomalohiʼi te hahaʼi ke natou haga tauhi kia Sehova. Neʼe ina fekauʼi te ʼu tagata ʼo te ʼu kolo ʼo Suta ke natou akoʼi te hahaʼi ʼo natou fakaʼaogaʼi “te tohi a te lao a [Sehova].” (2 Koloniko 17:7-10) Neʼe toe alu ki he telituale ʼo te puleʼaga noleto ʼo Iselaele, ki te hahaʼi ʼae neʼe maʼuʼuli ʼi te ʼu moʼuga ʼo Efalaimi. Kotea tona tupuʼaga? Koteʼuhi ke ina “toe aumai . . . natou [kia Sehova].” (2 Koloniko 19:4) ʼEi, ko Sosafate neʼe ko he hau “nee ina kumi [ia Sehova] i tona loto katoa.”—2 Koloniko 22:9.
Neʼe fakalotomalohiʼi e Sosafate te hahaʼi ke natou haga tauhi kia Sehova
11 Ia ʼaho nei, ʼe loto e Sehova ke tou akoʼi te hahaʼi ʼae ʼi te malamanei katoa ke natou iloʼi ia ia. Pea ʼe feala kia tatou fuli ke tou kau ki te gaue ʼaia. ʼE kua ke fakatuʼutuʼu koa ke ke kau ki te gaue ʼaia ʼi te mahina fuli? ʼE ke fia akoʼi koa te Tohi-Tapu ki ʼihi ke feala hanatou toe atolasio mo natou kia Sehova? ʼE ke faikole koa ʼo ʼuhiga mo te aluʼaga ʼaia? ʼEi, kapau ʼe ke fai he ʼu faiga, ʼe tokoni atu anai ia Sehova kia koe ke ke kamata he ako Tohi-Tapu mo he tahi. ʼE ke lotolelei anai koa ʼo sakilifisioʼi tou temi ke ke fai he ako ʼa he tahi? Ohage ko Sosafate, neʼe faiga ʼo tokoni ki ʼihi ke natou toe liliu mai ʼo tauhi kia Sehova. ʼO toe feia pe mo koe, ʼe feala ke ke tokoni ki he tehina peʼe ko he tuagaʼane kua vaivai ʼi te faʼahi fakalaumalie. Pea tahi, ʼe fai e te kau tagata ʼafeā he ʼu fakatuʼutuʼu ke natou olo ʼaʼahi mo tokoni kia natou ʼae ʼi tonatou telituale kua fakamavae pea kua natou fakahemala ki ʼanatou agahala.
12, 13. (1) ʼI te mataku ʼa Sosafate, kotea ʼae neʼe ina fai? (2) He koʼe ʼe tonu ke tou faʼifaʼitakiʼi ia Sosafate?
12 Ohage ko tana tamai, neʼe tuku e Sosafate tana falala kia Sehova ʼi te temi ʼae neʼe haʼu ai he foʼi tau ʼo tauʼi te puleʼaga ʼo Suta. (Lau ia 2 Koloniko 20:2-4.) Neʼe mataku ia Sosafate. Koia neʼe kole tokoni ai kia Sehova. ʼI tana faikole, neʼe ina fakaha ʼe mole feala ke natou tauʼi te fili. Neʼe ina toe ui ko ia mo tana hahaʼi ʼe mole natou iloʼi pe kotea ka natou fai anai. Kaʼe, neʼe falala ia Sosafate ʼe tokoni age anai ia Sehova kia natou. Koia ʼae neʼe ina ui fenei ai: “E sisio [peʼe fakahaga] atu omatou mata kia koe.”—2 Koloniko 20:12.
13 Ohage ko Sosafate, ʼe feala ʼi ʼihi temi ke mole tou iloʼi pe kotea anai ʼe tou fai moka tou tau mo he fihifihia. Pea ʼe tou toe matataku foki. (2 Kolonito 4:8, 9) Kaʼe, ʼaua naʼa galo kia koe te aluʼaga ʼae neʼe fai e Sosafate. Ia muʼa ʼo te hahaʼi fuli, neʼe faikole kia Sehova ʼo ina ui age ʼe kua natou vaivai. (2 Koloniko 20:5) Kapau ko koe ko he pule famili, ʼe feala tau faʼifaʼitakiʼi ia Sosafate. Kole kia Sehova ke tokoni atu kia koe mo tou famili ke ke tauʼi he fihifihia pea mo ke iloʼi pe kotea ka ke fai anai. ʼAua naʼa ke ufiufi moka logo atu tou famili ki ʼau faikole ʼo ʼuhiga mo he aluʼaga feia. ʼE natou mahino ai anai ʼe ke tuku tau falala kia Sehova. ʼEi, kapau neʼe tokoni ia Sehova kia Sosafate, ʼe toe tokoni atu anai kia koe.
NEʼE FAI TUʼUMAʼU E ESEKIASI TE MEʼA ʼAE ʼE LELEI
14, 15. Neʼe tuku katoa feafeaʼi e Esekiasi tana falala ki te ʼAtua?
14 Tou talanoa leva ki te tahi hau, ia Esekiasi. ʼE ui ʼi te Tohi-Tapu “neʼe haga pipiki kia Sehova.” Neʼe mole tuku e tana tamai he faʼifaʼitaki lelei kia ia koteʼuhi neʼe atolasio ki te ʼu taula ʼatua. Kaʼe, ko Esekiasi “neʼe ina pulihi leva te ʼu koga meʼa maʼoluga, pea neʼe ina maumauʼi te ʼu pou taputapu, pea neʼe ina tuʼusi te pou taputapu, pea neʼe ina laliki te gata kapa ʼae neʼe fai e Moisese.” He koʼe neʼe ina fai te faʼahi ʼaia? Koteʼuhi neʼe atolasio ki ai te kau Iselaele. Koia, neʼe pipiki ia Esekiasi ki te ʼAtua mo tona loto katoa. “Neʼe hoko atu pe tana taupau te ʼu fakatotonu ʼae neʼe foaki e Sehova kia Moisese.”—2 Hau 18:1-6, MN.
15 ʼI te temi ʼae neʼe hau ai ia Esekiasi, ko te foʼi tau malohi ʼa te kau Asilia neʼe natou tauʼi ia Suta. Pea neʼe natou faiga ke natou maumauʼi ia Selusalemi. Ko te hau ʼo Asilia, ia Sanekelipe, neʼe laukovi kia Sehova pea Esaia 37:15-20.) Neʼe tali ia Sehova ki te faikole ʼa Esekiasi. ʼO feafeaʼi? ʼAki tana fekauʼi ifo he ʼaselo ke haʼu ʼo matehi ia te toko 185 000 kau tau Asilia.—Esaia 37:36, 37.
neʼe faiga malohi kia Esekiasi ke tuku tanatou fakafeagai. ʼI te ʼu temi fakatupu tuʼutamaki ʼaia, neʼe tuku katoa e Esekiasi tana falala kia Sehova. Pea neʼe ina kole tana tokoni. Neʼe ina iloʼi ʼe malohi ʼaupito age ia Sehova ʼi te kau Asilia. Pea ʼe feala ke ina haofaki tana hahaʼi. (Lau ia16, 17. ʼE ke lava faʼifaʼitakiʼi feafeaʼi ia Esekiasi?
16 Ki muli age, neʼe mahaki leva ia Esekiasi pea neʼe meihiʼi pe ke mate. ʼI te ʼu temi faigataʼa ʼaia, neʼe ina kole mamahi kia Sehova ke ina manatuʼi tana agatonu pea ke tokoni age ki ai. (Lau ia 2 Hau 20:1-3.) * (Vakaʼi te nota ʼi te fakaʼosi ʼo te alatike.) Neʼe fagono ia Sehova ki te faikole ʼa Esekiasi pea neʼe ina fakamalolo ia ia. ʼAki te Tohi-Tapu, ʼe tou iloʼi ai ʼe mole tou ʼamanaki ʼe fai anai e te ʼAtua he milakulo moʼo fakamalolo ʼo tatou ia ʼaho nei peʼe ke fakaloaloa atu totatou maʼuli. Kaʼe ohage ko Esekiasi, tou tuku tatatou falala ki te tokoni ʼa Sehova. Pea ʼe feala ke tou ui fenei kia te ia: “Fakalelei age, Ê Sehova, ʼe au kole atu ke ke manatuʼi neʼe au haʼele ’i ʼou muʼa ’i te moʼoni pea mo he loto katoa.” ʼE ke falala koa ʼe tokaga tuʼumaʼu anai ia Sehova kia koe, tatau aipe pe ʼe ke mahaki?—Pesalemo 41:4.
17 Kotea te tahi faʼahi ʼe feala ke tou faʼifaʼitakiʼi ai ia Esekiasi? ʼI ʼihi temi, ʼe ʼi ai ʼihi aluʼaga ʼe fakalelu ki ʼatatou felogoʼi mo Sehova peʼe fakapuli temi ki tatatou tauhi kia te ia. Ohage la, tokolahi te hahaʼi ʼe natou fakamaʼuhigaʼi ʼi ʼihi tagata ohage ko honatou ʼatua. ʼE natou fakaʼaogaʼi lahi tonatou temi ki te lau ʼo he ʼu manatu ʼo ʼuhiga mo te hahaʼi ʼaia pea ʼe natou sioʼi ʼonatou pāki. Peʼe natou tau fakaʼaogaʼi te Neti ke natou felogoʼi ai mo te hahaʼi. ʼE mahino ia, ʼe tou fiafia ʼi te felogoʼi mo totatou famili peʼe ko ʼotatou kaumeʼa ʼi te Neti. Kaʼe, ʼe feala ke puli noa totatou temi ʼi te ʼu meʼa gaue ʼaia. ʼE toe feala pe ke tou liliu ʼo fiatuʼu mo kapau ʼe tou sisio ko te tokolahi ʼe natou leleiʼia ʼotatou pāki peʼe ko te ʼu palalau ʼae ʼe tou tohi ʼi te Neti. Peʼe tou iita mo kapau ʼe mole kei natou sioʼi. ʼE feala ke tou ako mai te ʼu faʼifaʼitaki ʼa te apositolo ko Paulo, mo Pilisila pea mo Akila. ʼI tau manatu la, neʼe natou fakaʼaogaʼi koa tonatou temi ke natou kumi te ʼu kiʼi meʼa noa fuli ʼe fai e te hahaʼi, tafito la te hahaʼi ʼae ʼe mole tauhi kia Sehova? ʼE ui ʼi te Tohi-Tapu ko Paulo “neʼe tokaga tafito . . . ʼo fakamafola te folafola.” Pea neʼe fakaʼaogaʼi e Pilisila mo Akila tonā temi ki te fakamafola pea mo te fakamahino lelei age ʼo “te ala ʼo te ʼAtua” ki ʼihi. (Gaue 18:4, 5, 26) Koia, ke ke fai kia koe te ʼu fehuʼi ʼaeni: “ ʼE au tokaga koa ke ʼaua taku fakamaʼuhigaʼi te tagata ohage ko hoku ʼatua? ʼE au faiga koa ke mole lahi te temi ʼae ʼe au fai ai he ʼu meʼa ʼe mole maʼuhiga?”—Lau ia Efeso 5:15, 16.
NEʼE FAKALOGO IA SOSIASI KI TE ʼU FAKATOTONU ʼA SEHOVA
18, 19. ʼE ke lava faʼifaʼitakiʼi feafeaʼi ia Sosiasi?
18 Ko te Hau ko Sosiasi, neʼe toe fakalogo 2 Koloniko 34:31) Ko Sosiasi neʼe ko te mokoliha ʼo Esekiasi. ʼI tana kei tupulaga, “nee ina kamata kumi leva te Atua o Tavite.” Pea ʼi tona taʼu 20, neʼe ina kamata pulihi te tauhi taula ʼatua ʼi Suta. (Lau ia 2 Koloniko 34:1-3.) Neʼe fai e Sosiasi he ʼu faiga malohi ke ina fakafiafiaʼi te loto ʼo Sehova ʼo laka age ʼi te ʼu hau ʼae ʼo Suta. Pea ʼi te tahi ʼaho, neʼe maʼu e te pelepitelo lahi te tohi ʼo te Lao ʼa te ʼAtua ʼi te fale lotu. Neʼe lagi ko te tohi ʼae neʼe tohi totonu e Moisese. ʼI tana logo ki tona lau e tana sikalaipe, neʼe mahino ai Sosiasi ʼe tonu ke lahi age te ʼu faʼahi ʼae ke ina fai ke tauhi ai kia Sehova mo he loto katoa. Neʼe ina toe fakalotomalohiʼi tana hahaʼi ke natou toe fai feia. Koia, ko te hahaʼi “nee mole natou maliu kehe leva mai” ia Sehova ʼi te temi ʼae neʼe kei maʼuli Sosiasi.—2 Koloniko 34:27, 33.
ki te ʼu fakatotonu ʼa Sehova “i tona loto katoa.” (Neʼe fia fakafiafiaʼi moʼoni e Sosiasi te loto ʼo Sehova pea neʼe ina foimo fai atu aipe he ʼu fetogi
19 Kapau ko koe ko he tupulaga, ʼe feala ke ke faʼifaʼitakiʼi ia Sosiasi pea mo ke ako ke ke iloʼi lelei age ia Sehova. Neʼe lagi iloʼi e Sosiasi ʼi tana kui tagata, ia te Hau ko Manase ʼae neʼe fakahemala, ko Sehova ʼe fakamolemole gafua. ʼO toe feia pe mo koe, ʼe lahi anai te ʼu faʼahi ʼe ke ako mai ia natou ʼae kua matutuʼa ʼi tou famili pea mo tau kokelekasio. ʼE feala ke natou fakamatala atu te ʼu meʼa lelei fuli neʼe fai e Sehova maʼa natou. Pea tahi, ʼaua naʼa galo kia koe te meʼa ʼae neʼe logoʼi e Sosiasi hili tana kua iloʼi te meʼa ʼae neʼe ui ʼi te Lao. Neʼe ina fia fakafiafiaʼi moʼoni te loto ʼo Sehova pea neʼe ina foimo fai atu aipe he ʼu fetogi. ʼI tau lau te Tohi-Tapu, ʼe ke toe fakatotonu malohi anai ke ke fakalogo kia Sehova. Pea ʼe malohi anai tau fakakaumeʼa mo ia pea ʼe ke fiafia lahi anai. ʼE ke fia palalau anai ki ʼihi ʼo ʼuhiga mo Sehova. (Lau ia 2 Koloniko 34:18, 19.) Ka ke ako te Tohi-Tapu, ʼe ke tokagaʼi ai anai ʼe ʼi ai te ʼu aluʼaga ʼe feala ke ke hikihiki ʼi tau tauhi kia Sehova. Koia, faiga malohi ke ke fai te ʼu fetogi ʼaia, ohage ko tona fai e Sosiasi.
TAUHI KIA SEHOVA MO HE LOTO KATOA
20, 21. (1) Kotea te ʼu faʼahi ʼae ʼe mole kehekehe ai te ʼu hau ʼaia ʼe fa? (2) Kotea ʼae ka tou talanoa anai ki ai ʼi te alatike ka hoa mai?
20 Kotea te ʼu ako ʼe tou taʼofi mai te ʼu hau ʼaia ʼe fa ʼo Suta ʼae neʼe tauhi kia Sehova mo he loto katoa? Ko te ʼu tagata ʼaia neʼe natou fakatotonu ke natou fakafiafiaʼi te loto ʼo Sehova pea mo tauhi kia te ia ʼi tonatou maʼuli katoa. Neʼe natou tuku tanatou falala kia te ia moka tauʼi natou e te ʼu fili malolohi. Kaʼe, ko te faʼahi ʼae ʼe maʼuhiga ko tanatou tauhi kia Sehova ʼuhi ko tanatou ʼoʼofa ia te ia.
21 Logo la te ʼuhiga agahala ʼo te ʼu hau ʼaia pea mo tanatou fai ia he ʼu lakahala, kaʼe neʼe natou maʼu te ʼofa ʼo Sehova. Neʼe sio ki te meʼa ʼae ʼi ʼonatou loto pea neʼe ina iloʼi neʼe natou ʼoʼofa moʼoni ia te ia. ʼE tou toe agahala mo tatou pea ʼe tou fai ni lakahala. Kaʼe, ʼe tou toe maʼu anai mo tatou te ʼofa ʼo Sehova mo kapau ʼe sio mai ʼe tou tauhi age kia te ia mo he loto katoa. ʼI te alatike ʼae ka hoa mai, ʼe tou talanoa ai anai ki te ʼu ako ʼe tou taʼofi anai mai te ʼu lakahala ʼa te ʼu hau ʼaia.
[Nota]
^ pal. 16 2 Hau 20: 1-3, MN: “ ’I te ’u ʼaho ʼaia, neʼe mahaki ia Esekiasi ʼo mei mate. Neʼe hu age leva ia Isaia te foha ʼo Amotesi, te tagata polofeta, pea mo ina ui fenei age: “Koʼeni te meʼa ʼae neʼe ui e Sehova: ‘Fai he ’u fakatotonu ki tou loto fale, he ʼe ko koe, ʼe ke mate moʼoni anai, ʼe mole ke maʼuli anai.’ ” Neʼe fakahaga e [Esekiasi] tona fofoga ki te kaupa pea neʼe faikole fenei kia Sehova: “Fakalelei age, Ê Sehova, ʼe au kole atu ke ke manatuʼi neʼe au haʼele ’i ʼou muʼa ’i te moʼoni pea mo he loto katoa, pea neʼe au fai te meʼa ʼae ʼe lelei ki ʼou mata.” Pea neʼe tagi mamahi ai ia Esekiasi.”