Ko Ai ʼAe ʼe Ina Takitaki Ia Tau Faʼahiga Manatu?
“Tuku takotou faʼifaʼitakiʼi ia te ʼu aga ʼo te tuʼu ʼo te ʼu faʼahiga meʼa ʼaeni.”—LOMA 12:2.
1, 2. (1) Neʼe kotea te tali ʼa Sesu ʼi tona fakalotomalohiʼi e Petelo ke manatu pe kia ia totonu? (Vakaʼi te ʼuluaki pāki.) (2) He koʼe neʼe tali feia ia Sesu?
NEʼE punamaʼuli te ʼu tisipulo ʼa Sesu. ʼI tanatou manatu ʼe toe fakatuʼu anai e Sesu ia te puleʼaga ʼo Iselaele, kae neʼe ui age e Sesu kua vave pe tona fakamamahiʼi pea mo tona mate. Ko te apositolo ko Petelo ʼae neʼe ʼuluaki palalau ʼo ina ui fenei: “ ʼAliki, tuku tau palalau feia, ʼe mole hoko anai kia koe te ʼu faʼahi ʼaia.” Neʼe tali fenei age e Sesu: “Fakalaka ʼi ʼoku tuʼa, Satana! Ko koe ko he maka fakatupu tukia kia au, koteʼuhi ʼe mole ke maʼu te ʼu manatu ʼa te ʼAtua, kaʼe ko te ʼu manatu ʼa te tagata.”—Mateo 16:21-23; Gaue 1:6.
2 ʼAki te ʼu palalau ʼaia neʼe fai e Sesu, neʼe ina fakaha lelei ko te ʼu manatu ʼa Sehova ʼe kehekehe ia mo te ʼu manatu ʼo te malama ʼaeni ʼe puleʼi e Satana. (1 Soane 5:19) Neʼe fakalotomalohiʼi e Petelo ia Sesu ke manatu pe kia ia totonu ohage ko te tokolahi ʼo te malama ʼaeni. Kae neʼe iloʼi e Sesu ʼe loto e Sehova ke teuteu ki te ʼu mamahi pea mo te mate ʼae ka ʼamanaki hoko kia te ia. Neʼe ha lelei ʼi te tali ʼa Sesu, neʼe mulimuli ki te faʼahiga manatu ʼa Sehova kae neʼe ina liʼaki te faʼahiga manatu ʼa te malama.
3. He koʼe ʼe faigataʼa te tali ʼo te manatu ʼa Sehova pea mo toe faigataʼa te liʼaki ʼo te manatu ʼa te hahaʼi ʼo te malama?
3 Kae ʼe feafeaʼi kia tatou? ʼE tou maʼu koa te faʼahiga manatu ʼa Sehova peʼe ʼa te hahaʼi ʼo te malama? ʼI totatou ʼuhiga Kilisitiano, ʼe tou faiga malohi ke tou fai ia meʼa fuli ʼae ʼe leleiʼia e te ʼAtua. Kae ʼe feafeaʼi ʼatatou faʼahiga manatu? ʼE tou faiga malohi koa ke tou maʼu te manatu ʼa Sehova, ko tona fakaʼuhiga, ke tou maʼu te faʼahiga sio ʼa Sehova? ʼE ʼaoga he ʼu faiga ki te aluʼaga ʼaia. Kae, ʼe faigafua te maʼu ʼo te manatu ʼa te hahaʼi ʼo te malama, koteʼuhi ko te laumalie ʼo te malama ʼe nofo ʼi te faʼahi fuli. (Efeso 2:2) Pea tahi, ko te hahaʼi ʼo te malama ʼe natou manatu pe kia natou totonu, pea ʼe feala pe anai ke tou maʼu tanatou faʼahiga manatu. ʼEi, ʼe faigataʼa te maʼu ʼo te manatu ʼa Sehova kae ʼe faigafua te maʼu ʼo te manatu ʼa te hahaʼi ʼo te malama.
4. (1) Kotea ʼae ka hoko anai mo kapau ʼe tou tuku ke fakahalaʼi ʼatatou faʼahiga manatu e te malama? (2) Kotea ka tou vakaʼi anai ʼi te alatike ʼaeni?
4 Kapau ʼe tou tuku ke fakahalaʼi ʼatatou faʼahiga manatu e te malama, ʼe mahino ia ʼe tou manatu pe anai kia tatou totonu. Pea tahi, ʼe tou loto pe anai ke tou filifili te meʼa ʼae ʼe lelei mo te meʼa ʼae ʼe kovi. (Maleko 7:21, 22) Koia ʼe maʼuhiga ʼaupito ke tou maʼu “te ʼu manatu ʼa te ʼAtua,” kae mole ko “te ʼu manatu ʼa te tagata.” ʼE tokoni mai anai te alatike ʼaeni ke tou fai feia. ʼE tou vakaʼi anai pe koʼe ʼe mole faigataʼa fau te maʼu ʼo te faʼahiga sio ʼa Sehova pea he koʼe ʼe fua lelei kia tatou. ʼE tou toe vakaʼi anai pe ʼe feafeaʼi hatatou mole mulimuli ki te ʼu faʼahiga manatu ʼa te malama. ʼI te alatike ka hoa mai, ʼe tou ako anai pe ʼe tou maʼu feafeaʼi te manatu ʼa Sehova ʼo ʼuhiga mo he ʼu aluʼaga kehekehe.
KO TE FAʼAHIGA MANATU ʼA SEHOVA ʼE FUA LELEI
5. He koʼe ʼe mole loto e ʼihi ke fetogi ʼanatou faʼahiga manatu e he tahi?
5 Ko ʼihi ʼe mole natou loto ke fetogi ʼanatou faʼahiga manatu e he tahi. ʼE natou tahi ui, “ ʼE au mulimuli pe au ki taku faʼahiga manatu.” ʼE mahino ia ʼe natou fia ui, ʼe ʼa natou pe te toʼo ʼo ʼanatou tonu. ʼE mole natou loto ke puleʼi peʼe ke fakalotoʼi natou e he tahi ke natou hage ko te hahaʼi fuli. * (Vakaʼi te kiʼi nota.)
6. (1) Kotea te ʼateaina ʼae ʼe foaki mai e Sehova? (2) Ko he ʼateaina koa ʼe mole hona tuʼakoi?
6 ʼE tou iloʼi tatau aipe pe ʼe tou maʼu te faʼahiga manatu ʼa Sehova, kae ʼe feala pe ke tou fakaha ʼatatou manatu. ʼE ui fenei ia 2 Kolonito 3:17: “Ko te potu ʼae ʼe maʼu ai te laumalie ʼo Sehova, ʼe maʼu ai te ʼateaina.” ʼE foaki mai e Sehova te ʼateaina ʼae ke tou liliu ko te faʼahiga tagata ʼae ʼe tou loto ki ai. ʼE ʼi ai te ʼu faʼahi ʼe tou leleiʼia tafito pea ʼe feala ke tou filifili te ʼu meʼa ʼae ʼe tou fia fai ki ai. Neʼe fakatupu feia tatou e Sehova. Kae ʼe mole fakaʼuhiga leva ʼe tou maʼu he ʼateaina ʼe mole hona tuʼakoi. (Lau ia 1 Petelo 2:16.) Ke feala hatatou iloʼi pe kotea te meʼa ʼae ʼe lelei mo te meʼa ʼae ʼe kovi, ʼe loto e Sehova ke tou fakaʼaogaʼi ia tana Folafola ohage ko hotatou takitaki. ʼE faigataʼa fau koa, peʼe fua lelei anai?
7, 8. ʼE faigataʼa fau koa te maʼu ʼo te faʼahiga sio ʼa Sehova? Tuku mai he faʼifaʼitaki.
7 Tou toʼo he faʼifaʼitaki. ʼE faigaʼi e te ʼu matuʼā ke natou akoʼi ki ʼanatou fanau te ʼu aga ʼae ʼe lelei. Ohage la ko te aga fakahagatonu, te gaue kinakina, pea mo te tokaga ki ʼihi. Ko he faʼahi ʼe mole faigataʼa. ʼE teuteuʼi e te ʼu matuʼā ʼanatou fanau ke natou maʼu he maʼuli fiafia. Ka lalahi anai te fanau pea mo mavae ʼi te loto fale, ʼe natou toʼo faʼitaliha anai ʼanatou tonu. Kapau ʼe natou filifili ke natou maʼuliʼi te ʼu aga ʼae ʼe lelei neʼe akoʼi age e ʼanatou matuʼā, ʼe feala ai anai ke natou toʼo he ʼu tonu ʼe lelei mo natou hao ai mai te ʼu fihifihia, te ʼu tuʼania, pea ʼe mole natou fakahemala anai ki ʼamuli.
ʼE fakaafe tatou e Sehova ke tou ako ke tou maʼu tana faʼahiga sio pea mo maʼuliʼi ʼana pelesepeto
8 Ohage ko he tamai ʼofa, ʼe loto e Sehova ke maʼuli fiafia ʼana fanau. (Esaia 48:17, 18) Koia ʼe ina akoʼi mai he ʼu pelesepeto ʼo ʼuhiga mo te aga ʼae ʼe tonu ke tou fai, ʼo feia ki ʼatatou felogoi mo ʼihi. ʼE ina fakaafe tatou ke tou ako ke tou maʼu tana faʼahiga sio pea mo maʼuliʼi ʼana pelesepeto. Ko he faʼahi ʼe mole faigataʼa, kae ʼe tokoni mai ke tou maʼu te poto pea ke lelei age ʼatatou tonu. (Pesalemo 92:6; Taaga Lea 2:1-5; Esaia 55:9) ʼE feala pe hatatou filifili te ʼu meʼa ʼae ʼe tou leleiʼia, kae ʼe tou fai anai he ʼu tonu ʼe tou maʼuli fiafia ai anai. (Pesalemo 1:2, 3) Ka tou maʼu te faʼahiga manatu ʼa Sehova, ʼe tou maʼu ai he ʼu fua lelei.
ʼE MAʼOLUGA TE FAʼAHIGA MANATU ʼA SEHOVA
9, 10. Kotea ʼae ʼe ha ai ʼe maʼoluga age te faʼahiga manatu ʼa Sehova ʼi te faʼahiga manatu ʼa te malama?
9 Ko he tahi tupuʼaga ʼaia ke tou fia fakaalu tahi ai ʼatatou faʼahiga manatu ki ʼae ʼa Sehova, ʼe ko tana faʼahiga manatu ʼe maʼoluga age ia ʼi te faʼahiga manatu ʼa te malama. ʼE foaki e te malama he ʼu tokoni ʼo ʼuhiga mo te aga ʼae ʼe tonu ke fai, te maʼuli fiafia ʼo te famili, te maʼu ʼo he gaue lelei, pea mo ʼihi aluʼaga ʼo te maʼuli. Kae ʼe lahi te ʼu tokoni ʼa te malama ʼe mole alu tahi mo te manatu ʼa Sehova. Ohage la, ʼe tautau ʼekenaki e te malama ia te hahaʼi ke natou kumi pe te meʼa ʼae ʼe lelei kia natou pea ke natou manatu ʼe mole kovi te ʼu felaveʼi fakasino heʼe ʼaoga. Pea ʼi ʼihi temi, ʼe ui e te malama ko te ʼu taumatuʼa ʼe natou maʼuli fiafia age anai mo kapau ʼe natou tahi nofo peʼe mavete tatau aipe pe ʼe mole faʼa maʼuhiga ʼona tupuʼaga. ʼE fakafeagai te aluʼaga ʼaia ki te ʼu akonaki ʼo te Tohi-Tapu. Kae, ʼe ʼaoga age koa te ʼu tokoni ʼo te malama ʼi te ʼu tokoni ʼa te Tohi-Tapu ia ʼaho nei?
10 Neʼe ui fenei e Sesu: “ ʼE ha te poto ʼi ʼana gaue.” (Mateo 11:19) Logo la te kua laka ki muʼa ʼo te malama ʼi te faʼahi ʼo te tekenolosia, kae ʼe mole feala ke ina fakatokatoka te ʼu fihifihia ʼae ʼe ina taʼofi te fiafia ʼo te hahaʼi, ohage ko te tau, te fehiʼa ki te ʼu lanu, pea mo te faifakapo. Pea tahi, ko te manatu ʼa te malama ʼe mole kovi te ʼu felaveʼi fakasino heʼe ʼaoga. Kae tokolahi te hahaʼi ʼe natou fakamoʼoni ʼe maumauʼi e te ʼu felaveʼi fakasino heʼe ʼaoga te maʼuli fakafamili, mo tupu ai he ʼu mahaki, pea mo ʼihi aluʼaga fakaʼofaʼofa. ʼE feafeaʼi ki te ʼu tokoni ʼa Sehova? Ko te kau Kilisitiano ʼae neʼe natou tali ʼana tokoni ʼe fiafia ʼonatou maʼuli fakafamili, ʼe lelei tonatou malolo fakasino, pea ʼe natou felogoi lelei mo ʼonatou tehina mo tuagaʼane fuli ʼi te malamanei katoa. (Esaia 2:4; Gaue 10:34, 35; 1 Kolonito 6:9-11) ʼE fakamoʼoni ai ko te faʼahiga manatu ʼa Sehova ʼe maʼoluga age ia ʼi te faʼahiga manatu ʼa te malama.
11. Ko ai ʼae neʼe ina takitaki te faʼahiga manatu ʼa Moisese, pea neʼe kotea ʼona fua?
11 Ko te ʼu kaugana ʼa Sehova ʼo te temi muʼa neʼe natou iloʼi te maʼoluga ʼo tana faʼahiga manatu. Ohage la, logo la neʼe akoʼi age kia Moisese ia “te poto katoa ʼo te kau Esipito,” kae neʼe ina iloʼi ko te poto moʼoni ʼe haʼu mai ia Sehova. (Gaue 7:22; Pesalemo 90:12) Ko te tupuʼaga ʼaia ʼo tana kole fenei kia Sehova: “Fakaha mai kia au ou ala.” (Ekesote 33:13) Neʼe tuku e Moisese ke takitaki ia ia e te faʼahiga manatu ʼa Sehova. Koia neʼe fakaʼaogaʼi ai e Sehova ia ia ʼi hona aluʼaga fakaofoofo moʼo fakahoko ʼo Tona finegalo, pea neʼe ina fakamaʼuhigaʼi ia Moisese ʼo ina fakahigoaʼi ko he tagata ʼe tui malohi.—Hepeleo 11:24-27.
12. Kotea ʼae neʼe fakatafito ki ai e Paulo ʼana tonu?
12 Ko te apositolo ko Paulo, neʼe poto, neʼe ko he tagata neʼe ako, pea neʼe palalau ʼi te lea Fakahepeleo mo Fakakeleka. (Gaue 5:34; 21:37, 39; 22:2, 3) Kae neʼe ina liʼaki te poto fakamalama kae ina fakatafito ʼana tonu ki te Folafola ʼa te ʼAtua. (Lau ia Gaue 17:2; 1 Kolonito 2:6, 7, 13.) Koia, neʼe fua lelei ai ia tana faifakamafola pea neʼe fakaʼamu ki te fakapale ʼae ka ina maʼu ʼo talu ai.—2 Timoteo 4:8.
13. He koʼe ʼe ko totatou maʼua takitokotahi ko te fakaalu tahi ʼatatou faʼahiga manatu mo ʼae ʼa Sehova?
13 ʼE ha lelei mai, ʼe maʼoluga age ia te faʼahiga manatu ʼa te ʼAtua ʼi te faʼahiga manatu ʼa te malama. Kapau ʼe tou mulimuli ki te ʼu lekula ʼa te ʼAtua, ʼe tou maʼuli fiafia moʼoni anai. Kae ʼe mole fakakinauʼi tatou e Sehova ke tou maʼu ia tana faʼahiga manatu. ʼO toe feia pe, ʼe mole puleʼi ʼatatou faʼahiga manatu e “te tagata faifekau agatonu mo poto” pea mo te kau tagata ʼafeā. (Mateo 24:45; 2 Kolonito 1:24) ʼE ko totatou maʼua takitokotahi, ke tou fakaalu tahi ʼatatou faʼahiga manatu mo ʼae ʼa Sehova. Kae ʼe feafeaʼi hatatou fai te faʼahi ʼaia?
ʼAUA TATATOU FAʼIFAʼITAKIʼI TE ʼU AGA ʼO TE MALAMA ʼAENI
14, 15. (1) Kotea ʼae ʼe tonu ke tou metitasio ki ai ke tou maʼu te faʼahiga manatu ʼa Sehova? (2) He koʼe ʼe mole tonu ke tou fakahu te ʼu manatu ʼa te malama ki ʼotatou ʼatamai? Tuku mai he faʼifaʼitaki.
14 ʼE ui fenei ia Loma 12:2: “Tuku takotou faʼifaʼitakiʼi ia te ʼu aga ʼo te tuʼu ʼo te ʼu faʼahiga meʼa ʼaeni, kaʼe ke kotou fetogi tokotou ʼulugaaga ʼo kotou fakafoʼou tokotou ʼatamai, ke feala ai ke kotou vakavakaʼi pea mo iloʼi e koutou totonu ia te finegalo ʼo te ʼAtua, ʼae ʼe lelei, mo haohaoa pea mo ina leleiʼia.” Tatau aipe pe kotea ʼae neʼe mulimuli ki ai ʼatatou faʼahiga manatu ʼi muʼa ʼo tatatou iloʼi te moʼoni, kae ʼe ha mai ʼi te vaega ʼaeni ʼe feala ke tou fetogi ʼo tou fakaalu tahi ʼatatou faʼahiga manatu mo ʼae ʼa Sehova. ʼE moʼoni, ʼe feala ke fakahalaʼi ʼatatou faʼahiga manatu e te ʼu agaaga ʼae neʼe tuku holo mai e ʼatatou matuʼā mo te ʼu aluʼaga ʼae neʼe hoko ʼi ʼotatou maʼuli, kae ʼe feala ke tou haga fetogi ʼatatou manatu. Pea ʼe fetogi anai ʼatatou manatu ʼo mulimuli pe ki te ʼu faʼahi ʼae ʼe tou fakakaukau tafito ki ai. Kapau ʼe tou metitasio ki te faʼahiga manatu ʼa Sehova, ʼe tou sisio ai ki te lelei tuʼumaʼu ʼo tana faʼahiga manatu, pea ʼe tou fia mulimuli anai ki ai.
15 Kae ke tou fakafoʼou ʼatatou faʼahiga manatu ke tou maʼu ai te faʼahiga manatu ʼa Sehova, ʼe tonu ke tuku tatatou “faʼifaʼitakiʼi ia te ʼu aga ʼo te tuʼu ʼo te ʼu faʼahiga meʼa ʼaeni.” Ko tona fakaʼuhiga, ʼe mole tonu ke tou toe sioʼi, mo lau pea mo fakalogo ki te ʼu meʼa ʼae ʼe fakafeagai ki te ʼu manatu ʼa te ʼAtua. Ke tou mahino ki te maʼuhiga ʼo te aluʼaga ʼaia, ʼe tou vakaʼi anai he faʼifaʼitaki ʼo ʼuhiga mo te meʼa kai. Ko he tahi ʼe loto ke lelei tona malolo fakasino, ʼe ina kai anai te ʼu meʼa kai ʼae ʼe ʼaoga ki tona maʼuli. Kae ʼe mole anai he ʼuhiga ʼo ʼana faiga mo kapau ʼe ina kai tuʼumaʼu pe te ʼu meʼa kai ʼae ʼe mole ʼaoga ki tona malolo fakasino. ʼO toe feia pe, ʼe vaʼiganoa anai ʼatatou faiga ʼae ke tou ako ke tou iloʼi te faʼahiga manatu ʼa Sehova mo kapau ʼe tou tuku pe tatou ke hu te ʼu manatu ʼa te malama ki ʼotatou ʼatamai.
16. Kotea ʼae ʼe tonu ke tou puipui tatou mai ai?
16 ʼE tou lava tekeʼi katoa koa te ʼu manatu ʼa te malama? Kailoa, koteʼuhi ʼe tou maʼuʼuli ʼi te malama ʼaeni. (1 Kolonito 5:9, 10) Ka tou faifakamafola, ʼe palalau te hahaʼi ʼo ʼuhiga mo he ʼu manatu pea mo he ʼu akonaki ʼe hala. Kae ʼe mole fakaʼuhiga leva ʼe tonu ke tou tali mo tou haga taupau ʼi ʼotatou ʼatamai te ʼu manatu hala ʼaia. Ohage pe ko Sesu, ʼe tonu ke tou foimo liʼaki te ʼu manatu ʼae ʼe loto e Satana ke tou maʼu. Pea ʼe feala ke tou toe puipui ia tatou ʼo mole tou lau, mo sioʼi pea mo fakalogo ki he ʼu meʼa ʼe lagolago ki te ʼu manatu ʼa te malama.—Lau ia Taaga Lea 4:23.
17. Kotea ʼae ʼe tonu ke tou fai ke mole tou maʼu te faʼahiga manatu ʼa te malama?
17 Ohage la, ʼe tonu ke tou filifili fakalelei ʼotatou kaumeʼa. ʼE fakatokaga mai ʼi te Tohi-Tapu, kapau ʼe tou kaumeʼa lelei mo te hahaʼi ʼae ʼe mole tauhi kia Sehova, ʼe tou maʼu anai ia tanatou faʼahiga manatu. (Taaga Lea 13:20; 1 Kolonito 15:12, 32, 33) ʼE tonu foki ke tou toe filifili fakalelei ʼatatou fakafiafia. Ka tou liʼaki te ʼu fakafiafia ʼae ʼe lagolago ki te evolisio, te agamalohi, peʼe ko te aga heʼe ʼaoga, ʼe tou puipui ai ʼotatou ʼatamai mai te ʼu manatu ʼae ʼe “fakafeagai ki te ʼatamai malama ʼo ʼuhiga mo te ʼAtua.”—2 Kolonito 10:5.
ʼE tou tokoni koa ki ʼatatou fanau ke natou liʼaki te ʼu fakafiafia ʼae ʼe kovi? (Vakaʼi te palakalafe 18, 19)
18, 19. (1) Kotea te ʼu manatu ʼa te malama ʼae ʼe tonu ke tou tokakaga ki ai? (2) Kotea te ʼu fehuʼi ʼe tonu ke tou fai, pea kotea tona tupuʼaga?
18 ʼE tonu foki ke tou iloʼi mo tou liʼaki te ʼu manatu ʼae ʼe fakamafola e te malama kae ʼe lagi mole tou tokagaʼi. Ohage la, ko ʼihi tala logo ʼe natou hikihiki he ʼu manatu fakapolitike. Pea ko ʼihi tala logo ʼe lagolago ki te ʼu fakatuʼutuʼu mo te ʼu gaue ʼae ʼe leleiʼia e te malama. Ko ʼihi ʼata pea mo ʼihi tohi ʼe fakalotomalohiʼi ai “te manatu muʼa kia kita” peʼe ko “te manatu muʼa ki tokita famili.” Pea ʼe hage tona fakaha ʼi te ʼu ʼata mo te ʼu tohi ʼaia ʼe ko he ʼu manatu ʼe fakapotopoto, mo lelei pea mo faitotonu. Kae, ko te ʼu faʼahiga manatu ʼaia ʼe mole alu tahi mo te ʼu akonaki Fakatohi-tapu. ʼE ui ʼi te Tohi-Tapu, ʼe hoki tou fiafia moʼoni anai mo totatou famili mo kapau ʼe takimuʼa totatou ʼofa ʼae kia Sehova. (Mateo 22:36-39) Maʼia pe la mo ʼihi fakamatala ʼe fai ki te ʼu fanau ʼe hage mai ʼe lelei, kae ʼe feala pe ʼaki te temi ke meʼa noaʼi e te ʼu fanau he ʼu aga heʼe ʼaoga.
19 ʼE mole fakaʼuhiga leva ʼe mole tonu ke tou fakafiafia. Kae ʼe tonu ke tou fai te ʼu fehuʼi ʼaeni: ‘ ʼE feala koa ke au iloʼi te ʼu manatu ʼa te malama ʼae ʼe fakaha ʼi hona aluʼaga ʼe faigataʼa tona fakatokagaʼi? ʼE au tokaga koa ke mole matou sioʼi mo toku famili ʼihi polokalama ʼi te televisio pea ke mole matou lau ʼihi tohi? ʼE au tokoni koa ki taku fanau ke natou maʼu te faʼahiga sio ʼa Sehova, ke mole natou mulimuli ki te ʼu manatu fakamalama ʼae ʼe natou logo mo sisio ki ai?’ Kapau ʼe tou iloʼi ia te kehekehe ʼo te faʼahiga manatu ʼa te ʼAtua pea mo ʼae ʼa te malama, ʼe mole tou “faʼifaʼitakiʼi [anai] ia te ʼu aga ʼo te tuʼu ʼo te ʼu faʼahiga meʼa ʼaeni.”
KO TE FAʼAHIGA MANATU FEA ʼAE ʼE KE FAʼIFAʼITAKIʼI NEI?
20. ʼE tou iloʼi feafeaʼi anai pe ko te faʼahiga manatu fea ʼae ʼe tou faʼifaʼitakiʼi?
20 ʼE tonu ke tou manatuʼi, ʼe ʼi ai ʼihi logo ʼe haʼu mai ia Sehova pea ko ʼihi logo ʼe haʼu mai ia Satana pea mo tona malama. Kae ʼe ke mulimuli koa kia ai? Ko te faʼahi ʼae ʼe ke alu ʼo toʼo mai ai ʼau logo. Kapau ʼe ke tali pea mo ke faʼifaʼitakiʼi te ʼu manatu ʼa te malama, ʼe ke manatu pe anai kia koe totonu. Koia ʼe maʼuhiga ʼaupito ke tou filifili fakalelei te ʼu meʼa ʼae ʼe tou sioʼi, mo lau, mo fakalogo pea mo te ʼu meʼa ʼae ʼe tou fakakaukau ki ai.
21. Kotea ka tou vakaʼi anai ʼi te alatike ʼae ka hoa mai?
21 Neʼe tou ako ʼi te alatike ʼaeni, ʼe tonu ke tou tekeʼi te ʼu manatu ʼa te malama ke feala hatatou maʼu te faʼahiga manatu ʼa Sehova. ʼE tonu foki ke tou metitasio ki te ʼu manatu ʼa te ʼAtua ke feala ai hatatou faʼifaʼitakiʼi ia ia. ʼI te alatike ka hoa mai, ʼe tou vakaʼi anai pe feafeaʼi hatatou fai te faʼahi ʼaia.
^ pal. 5 ʼI tona fakahagatonu, maʼia mo te hahaʼi ʼae ʼe maʼuʼuli faʼitaliha ʼe natou mulimuli ki te faʼahiga manatu ʼa ʼihi. Ohage la, ka tou fia iloʼi pe neʼe kamata feafeaʼi te maʼuli peʼe ko te filifili ʼo ʼotatou mutuʼi meʼa, ʼe tou mulimuli ki te manatu ʼa ʼihi ʼi hona faʼahiga aluʼaga. Kae ʼe feala hatatou filifili pe ko ai ʼae ka tou faʼifaʼitakiʼi anai.