Kua Ke Maʼu Koa Te ʼu Manatu ʼa Sehova?
“Ke kotou fetogi tokotou ʼulugaaga ʼo kotou fakafoʼou tokotou ʼatamai.”—LOMA 12:2.
1, 2. Kotea ʼae ʼe tou ako ʼi te hoko atu ʼo tatatou tuputupu? Tuku mai he faʼifaʼitaki.
TOU fakakaukauʼi age muʼa moka foaki e he tahi he meʼa ʼofa ki he kiʼi tamasiʼi. Pea ui age e te ʼu matuʼā, ke fakamalo. ʼE fai anai e te kiʼi tamasiʼi, koteʼuhi neʼe fakatotonu age e ʼana matuʼā. Kae ʼi tana lahilahi ake, ʼe mahino leva anai pe koʼe neʼe manatu ʼana matuʼā ʼe maʼuhiga ke fakamalo moka fai age he aga ʼe lelei. ʼI te hoko atu, ʼe fakamalotoloto anai ʼana fakamalo he neʼe ina ako te lotofakafetaʼi.
2 ʼE toe feia mo tatou. ʼI tatatou kamata ako ia te moʼoni, neʼe tou ako ʼe maʼuhiga ke tou fakalogo ki te ʼu fakatotonu tafito ʼa Sehova. Kae ʼi te hoko atu ʼo tatatou tuputupu ʼi te faʼahi fakalaumalie, ʼe toe lahi ai te ʼu faʼahi ʼe tou ako ʼo ʼuhiga mo ʼana manatu, ko tona fakaʼuhiga, te ʼu meʼa ʼae ʼe ina leleiʼia, mo te ʼu meʼa ʼae ʼe fehiʼa ai, pea mo tana faʼahiga sio. Ka tou tuku te ʼu manatu ʼa Sehova ke ina takitaki ʼatatou tonu mo ʼatatou gaue, ʼe tou fakaha ai ʼe tou maʼu ʼana manatu.
3. He koʼe ʼe feala ke faigataʼa hatatou maʼu te ʼu manatu ʼa Sehova?
3 Logo la ʼe tou fiafia ʼi te ako ke tou maʼu te ʼu manatu ʼa Sehova, kae ʼe faigataʼa ʼi ʼihi temi koteʼuhi ʼe tou agahala. Ohage la,
kua tou iloʼi te manatu ʼa Sehova ʼo ʼuhiga mo te maʼa ʼi te aga ʼae ʼe tonu ke fai, mo te fia maʼu koloa, mo te gaue faifakamafola, mo te fakaʼaogaʼi kovi ʼo te toto, pea mo ʼihi faʼahiga meʼa. Kae ʼe feala pe ke faigataʼa hatatou mahino ki te faʼahiga manatu ʼa Sehova ʼo ʼuhiga mo te ʼu faʼahi ʼaia. Koia ʼe feafeaʼi hatatou ako ke lahi age tatatou maʼu te manatu ʼa Sehova? Pea ʼe tokoni feafeaʼi mai anai te faʼahi ʼaia ke tou fai te meʼa ʼae ʼe lelei ʼi te temi nei pea mo te ka haʼu?KOTEA ʼAE ʼE TONU KE TOU FAI KE TOU MAʼU TE ʼU MANATU ʼA TE ʼATUA?
4. Kotea te fakaʼuhiga ʼo te fakafoʼou ʼo totatou ʼatamai?
4 Lau ia Loma 12:2. ʼI te vaega ʼaeni, ʼe fakaha e te apositolo ko Paulo te meʼa ʼae ʼe tonu ke tou fai ke tou maʼu ai te faʼahiga manatu ʼa Sehova. Neʼe ina ui ʼe tonu ke “tuku [tatatou] faʼifaʼitakiʼi ia te ʼu aga ʼo te tuʼu ʼo te ʼu faʼahiga meʼa ʼaeni.” Ohage ko tatatou vakaʼi ʼi te alatike ki muʼa atu, ʼe tonu ke tou liʼaki te ʼu manatu pea mo te ʼu aga ʼa te malama. Kae neʼe toe ui e Paulo ʼe tonu ke tou fakafoʼou totatou ʼatamai. Ko tona fakaʼuhiga ʼe tonu ke tou ako te Folafola ʼa te ʼAtua, ke tou mahino mo metitasio ki ʼana manatu, pea mo tou faiga malohi ke tou maʼu tana faʼahiga manatu.
5. Fakamahino pe kotea te kehekehe ʼo te lautohi pea mo te ako.
5 Ko te ako ʼe mole ko he lau fakavilivili ʼo he alatike peʼe ko te fakailoga ʼo he ʼu tali. ʼI te temi ʼae ʼe tou ako ai he alatike, ʼe tou fakakaukauʼi pe ʼe kotea ʼae ʼe ui ai ʼo ʼuhiga mo te ʼuluagaaga ʼo Sehova, mo ʼana gaue, pea mo tana faʼahiga manatu. Tou faigaʼi ke tou mahino pe koʼe ʼe ʼi ai he ʼu faʼahi ʼe ui mai e Sehova ke tou fai peʼe ke tou liʼaki. Tou toe fakakaukauʼi pe kotea te ʼu fetogi ʼae ʼe tonu ke tou fai ʼi totatou maʼuli pea mo ʼatatou faʼahiga manatu. ʼE moʼoni, ʼe mole lagi feala hatatou metitasio ki te ʼu puani fuli ʼaia ʼi te ʼu lakaga ʼae ʼe tou ako ai. Kae ʼe lelei ke tou toʼo he kiʼi temi ʼi te ʼu lakaga ʼaia ʼe tou ako ai, moʼo metitasio ki te ʼu faʼahi ʼae ʼe tou lau.—Pesalemo 119:97; 1 Timoteo 4:15.
6. Kotea ʼae ʼe hoko moka tou metitasio ki te ʼu Folafola ʼa te ʼAtua?
6 ʼE hoko he aluʼaga fakaofoofo moka tou metitasio tuʼumaʼu ki te Folafola ʼa te ʼAtua. ʼE tou ‘vakavakaʼi pea mo iloʼi e tatou totonu,’ peʼe tou tui papau, ko te faʼahiga manatu ʼa Sehova ʼe haohaoa. ʼE tou kamata mahino ai ki tana faʼahiga sio, pea ʼe tou tali tana faʼahiga manatu. Koia ʼe tou fakafoʼou ai totatou ʼatamai pea mo tou kamata fetogi tatatou faʼahiga manatu. Pea ʼaki te temi, ʼe tou maʼu ai te ʼu manatu ʼa Sehova.
ʼE MALAVE ʼATATOU MANATU KI ʼATATOU AGA
7, 8. (1) Kotea te manatu ʼa Sehova ʼo ʼuhiga mo te ʼu koloa? (Vakaʼi te ʼuluaki pāki.) (2) Kapau ʼe tou maʼu ia te manatu ʼa Sehova, kotea ʼae ka maʼuhiga tuʼumaʼu anai kia tatou?
7 ʼE malave ʼatatou manatu ki ʼatatou aga. (Maleko 7:21-23; Sakopo 2:17) Tou vakaʼi he ʼu faʼifaʼitaki ʼe ha lelei ai te faʼahi ʼaia. Tou vakaʼi te faʼifaʼitaki ʼo Sesu. ʼI te fakamatala ʼo ʼuhiga mo tana tupu, ʼe ha lelei ai te manatu ʼa Sehova ʼo ʼuhiga mo te ʼu koloa. Neʼe fili tonu e te ʼAtua ia Sosefo mo Malia ke nā taupau ia tona ʼAlo logo la neʼe mole lahi tanā foʼi falā. (Levitiko 12:8; Luka 2:24) ʼI te temi ʼae neʼe tupu ai Sesu, neʼe “tuku ia ia [e Malia] ki he kaiʼaga manu, koteʼuhi neʼe mole kei ʼi ai honatou nofoʼaga ʼi te fale tali fagona.” (Luka 2:7) Neʼe feala pe ke tupu ia Sesu ʼi he nofoʼaga ʼe lelei age mo ka na pau la neʼe loto ki ai ia Sehova. Kae neʼe loto ia ke lahilahi ake ia Sesu ʼi he famili ʼe ina fakamuʼamuʼa ia te tauhi ki te ʼAtua. Pea neʼe maʼuhiga age te faʼahi ʼaia kia Sehova.
8 ʼE tou ako ʼaki te fakamatala ʼaia pe kotea ia te manatu ʼa Sehova ʼo ʼuhiga mo te ʼu koloa. ʼE loto e ʼihi matuʼā ke maʼu koloa ʼanatou fanau, tatau aipe pe feala ke fua kovi ai ki te ʼu felogoi ʼo ʼanatou fanau mo Sehova. Kae ʼe ha lelei mai, ko te faʼahi ʼae ʼe maʼuhiga ʼaupito kia Sehova, ʼe ko ʼatatou felogoi ʼae mo ia. Kua ke maʼu koa ia te faʼahiga manatu ʼa Sehova ʼo ʼuhiga mo te faʼahi ʼaia? Kotea ʼae ʼe ha ʼi tau faʼahiga aga?—Lau ia Hepeleo 13:5.
9, 10. ʼE feafeaʼi hatatou fakaha ʼe tou manatu tahi mo Sehova ʼo ʼuhiga mo te fakatukia ʼo ʼihi?
9 Tou vakaʼi te tahi faʼifaʼitaki ʼe ha ai te faʼahiga manatu ʼa Sehova ʼo ʼuhiga mo he tahi ʼe ina fakatukia ʼihi. Ko tona fakaʼuhiga, ko he tahi ʼe ina fai he ʼu meʼa ʼe agahala ai ʼihi peʼe fakagata ai e ʼihi tanatou tauhi kia Sehova. Neʼe ui fenei e Sesu: “Ko ʼae ʼe ina fakatukia he tahi ia natou liliki ʼaeni ʼe tui, ʼe lelei age ke tau ki tona kia he foʼi maka momosi fulumeto pea ke li ki te tai.” (Maleko 9:42) ʼE mahino ia, ʼe ko he ʼu palalau fakahagatonu. Pea ʼe tou iloʼi ʼe faʼifaʼitakiʼi lelei e Sesu ia tana Tamai. Koia ʼe tou tui papau ai ʼe fehiʼa ia Sehova moka fakatukia e he tahi ia he tisipulo ʼa Sesu.—Soane 14:9.
10 ʼE tou maʼu koa te manatu ʼa Sehova mo Sesu ʼo ʼuhiga mo te fakatukia ʼo ʼihi? Kotea ʼae ʼe ha ʼi ʼatatou aga? Ohage la, ʼe lagi tou leleiʼia he faʼahiga teu pea mo he faʼahiga faʼu ʼo te lauʼulu ʼe lagi fakatupu itaita ki ʼihi ʼo te kokelekasio peʼe fakatupu ʼi ʼihi he ʼu manatu heʼe ʼaoga. Kae kapau ʼe tou iloʼi te faʼahi ʼaia kotea anai ka tou fai? Ko totatou ʼofa ki ʼotatou tehina mo tuagaʼane ʼe ina ʼekenaki anai koa tatou ke tou fakafisi ki te ʼu faʼahi ʼae ʼe tou leleiʼia?—1 Timoteo 2:9, 10.
11, 12. He koʼe ko hotatou puipui tatatou ako ke tou fehiʼa ki te meʼa ʼae ʼe fehiʼa ki ai Sehova pea mo te maʼu ʼo te lotololomi?
11 Tou vakaʼi te tolu faʼifaʼitaki: ʼE fehiʼa Sehova ki te heʼe faitotonu. (Loma 1:18) ʼE moʼoni, ʼe ina iloʼi ʼe faigataʼa ʼi ʼihi temi te fai ʼo te meʼa ʼae ʼe lelei he ʼe tou agahala. Kae, ʼe ina loto ke tou fehiʼa ki te meʼa ʼae ʼe kovi ohage pe ko ia. (Lau ia Pesalemo 97:10.) Kapau ʼe tou metitasio ki te ʼu tupuʼaga ʼae ʼe fehiʼa ai Sehova ki te ʼu meʼa ʼae ʼe kovi, ʼe tokoni mai anai ke tou maʼu tana faʼahiga manatu mo tou lotomalohi ʼo tekeʼi ia te fai ʼo te ʼu meʼa ʼae ʼe kovi.
Ko ʼihi faʼahiga meʼa ʼe kovi logo la ʼe mole fakaha totonu mai ʼi te Tohi-Tapu
12 Kapau ʼe tou ako ke tou fehiʼa ki te meʼa ʼae ʼe kovi, ʼe toe tokoni mai anai ke tou mahino ko ʼihi faʼahiga meʼa ʼe kovi logo la ʼe mole fakaha totonu mai ʼi te Tohi-Tapu. Ohage la, ʼe ʼi ai te faʼahiga meʼe ʼe heʼe ʼaoga ʼe higoa ko te lap dance, kua fai e te tokolahi ia ʼaho nei. ʼI te manatu ʼa ʼihi ʼe mole tatau te faʼahiga meʼe ʼaia mo te ʼu felaveʼi fakasino, * (Vakaʼi te kiʼi nota.) Kae kotea te manatu ʼa Sehova? Tou manatuʼi, ʼe fehiʼa Sehova ki te ʼu faʼahiga aga fuli ʼae ʼe kovi. Koia tou fakamamaʼo mai te ʼu aga fuli ʼae ʼe kovi ʼo tou ako ke tou maʼu te lotololomi pea mo tou fehiʼa ki te meʼa ʼae ʼe fehiʼa ki ai Sehova.—Loma 12:9.
koia ʼe mole kovi ia kia natou.TOU FAKAKAUKAUʼI ʼI TE TEMI NEI PE KOTEA ʼAE KA TOU FAI ʼI TE KA HAʼU
13. He koʼe ʼe tonu ke tou fakakaukauʼi fakatomuʼa te faʼahiga sio ʼa Sehova?
13 Ka tou ako, ʼe tonu ke tou fakakaukauʼi te faʼahiga sio ʼa Sehova he ʼe feala ai ke tou toʼo he ʼu tonu ʼe fakapotopoto. Koteʼuhi ʼi te temi ʼae ka tou felaveʼi ai mo he aluʼaga ʼe ʼaoga ai ke tou toʼo he tonu fakavilivili, ʼe mole tou punamaʼuli anai. (Taaga Lea 22:3) Tou vakaʼi he ʼu faʼifaʼitaki Fakatohi-tapu.
14. Kotea ʼe tou ako mai te tali ʼa Sosefo ki te ʼohoana ʼo Potifale?
14 ʼI te temi ʼae neʼe faigaʼi ai e te ʼohoana ʼo Potifale ke ina fakahalaʼi ia Sosefo, neʼe ina teteke atu aipe ia ia. ʼE mahino ia, neʼe metitasio ia Sosefo ki te manatu ʼa Sehova ʼo ʼuhiga mo te nofo ʼohoana. (Lau ia Senesi 39:8, 9.) Neʼe ui fenei e Sosefo ki te ʼohoana ʼo Potifale: “E feafeai anai ke au fai he mea kovi feia . . . , pea ke au toe agahala ai ki te Atua?” ʼE ha ai neʼe ina maʼu te faʼahiga sio ʼa te ʼAtua. Kae ʼe feafeaʼi kia tatou? Kotea anai ka ke fai moka fia fakatahi hou kaugā gaue mo koe? Peʼe feafeaʼi moka momoli atu e he tahi he ʼu palalau peʼe ko he pāki ʼe heʼe ʼaoga ki tau telefoni toʼotoʼo? * (Vakaʼi te kiʼi nota.) Kapau neʼe kua tou ako mo tali te faʼahiga sio ʼa Sehova mo tou iloʼi pe ʼe kotea anai ka tou fai, ʼe faigafua age anai tatatou nofo agatonu kia te ia.
15. ʼE feafeaʼi hatatou nonofo agatonu kia Sehova ohage ko te ʼu tupulaga Hepeleo ʼe toko tolu?
15 Tou vakaʼi ʼi te temi nei te faʼifaʼitaki ʼo te ʼu tupulaga Hepeleo ʼe toko tolu ʼae ko Satalake, mo Mesake pea mo Apeteneko. ʼI te temi ʼae neʼe fakatotonu age e Nepukatenesale ke natou atolasio ki te fakatata aulo ʼae neʼe ina fakatuʼu, neʼe natou fakafisi. ʼI tanatou tali ki te hau, neʼe ha lelei ai ia tanatou kua fakakaukauʼi pe kotea anai ka hoko mo kapau neʼe natou nofo agatonu kia Sehova. (Ekesote 20:4, 5; Taniela 3:4-6, 12, 16-18) Kae ʼe feafeaʼi ia ʼaho nei? Kotea anai ka ke fai moka kole atu e tou patolo ke ke fai hou meʼa ʼofa ʼo ʼuhiga mo he fakafiafia ʼe pipiki ki te lotu hala? ʼE lelei ke tou metitasio ʼi te temi nei ki te faʼahiga manatu ʼa Sehova ʼo ʼuhiga mo te ʼu faʼahiga fakafiafia ʼaia. Koteʼuhi ka hoko mai he aluʼaga feia, kua tou iloʼi pe kotea te ʼu palalau pea mo te ʼu faʼahi ʼe tonu ke tou fai ohage pe ko te ʼu tupulaga Hepeleo ʼe toko tolu.
Neʼe kua ke fai koa hau ʼu fekumi, mo fakamahino lelei ʼi ʼau pepa faitoʼo pe kotea ʼae ʼe ke loto ki ai pea mo ke palalau mo tau toketa? (Vakaʼi te palakalafe 16)
16. Ko tatatou mahino lelei ki te faʼahiga manatu ʼa Sehova ʼe lava tokoni feafeaʼi mai ke tou nofo teuteu moka tou tau mo he mahaki ʼe kovi?
16 Kapau ʼe tou metitasio ki te faʼahiga manatu ʼa Sehova, ʼe tokoni mai anai ke tou Gaue 15:28, 29) Kae ʼo ʼuhiga mo te ʼu faitoʼo ʼae ʼe fakaʼaogaʼi ai te toto, ʼe tonu ki te Kilisitiano takitokotahi ke ina toʼo pe e ia he tonu ʼe fakatafito ki te ʼu pelesepeto Fakatohi-tapu. Ko te temi fea ʼae ʼe lelei ai ke tou toʼo he tonu? Ko te temi koa ʼae kua tou nonofo ai ʼi lopitali, ʼi te mamahi mo totatou fakaneke ʼae ke tou toʼo fakavilivili he tonu? Kailoa ia. ʼE ko te temi ʼaeni ʼae ʼe tonu ke tou fai ai he ʼu fekumi, mo fakamahino lelei ʼi ʼatatou pepa faitoʼo pe kotea ʼae ʼe tou loto ki ai, pea mo tou palalau mo totatou toketa. * (Vakaʼi te kiʼi nota.)
nofo agatonu kia te ia moka tou tau mo he mahaki ʼe tonu ke faitoʼo fakavilivili. ʼE moʼoni, kua tou fakatotonu ke tou fakafisi ki he foʼi huki toto maʼia mo te ʼu koga tafito ʼo te toto. (17-19. He koʼe ʼe maʼuhiga ke tou ako ʼi te temi nei pe ʼe kotea te faʼahiga manatu ʼa Sehova? Tuku mai he faʼifaʼitaki.
17 Tou vakaʼi leva ʼi te temi nei ia te tali ʼae neʼe fai fakavilivili e Sesu ki te tokoni heʼe fakapotopoto ʼa Petelo: “ ʼAliki, tuku tau palalau feia.” ʼE mahino papau ia neʼe lahi te metitasio ʼa Sesu ki te faʼahi ʼae neʼe loto e te ʼAtua ke ina fai pea ki te ʼu lea fakapolofeta ʼo ʼuhiga mo tona maʼuli ʼi te kele pea mo tana mate. ʼI tana maʼu te ʼatamai malama ʼaia, neʼe lotomalohi ai ʼo nofo agatonu kia Sehova pea mo foaki tona maʼuli ko he sakilifisio maʼa tatou fuli.—Lau ia Mateo 16:21-23.
18 Ia ʼaho nei, ʼe loto e te ʼAtua ke tou liliu ko ʼona kaumeʼa pea mo tou faiga malohi ʼo fakamafola te logo lelei. (Mateo 6:33; 28:19, 20; Sakopo 4:8) Kae ohage pe ko tona fai e Petelo kia Sesu, ʼe feala pe ki ʼihi hahaʼi agalelei ke natou faigaʼi ʼo fakalotovaivaiʼi tatou. Ohage la, ʼe feala ke foaki atu e tou patolo ia he gaue ʼe totogi lelei age kae ʼe ke iloʼi, ʼe tonu anai ke ke gaue hola fakalaka pea ʼe mole feala ai anai ke ke kau ki te ʼu fono peʼe ki te faifakamafola. Peʼe kapau ʼe kei ke ako, ʼe lagi feala pe ke foaki atu e ʼau faiako te faigamalie ʼae ke ke mavae ʼi tou ʼapi ʼo hoko atu tau ako. Kapau ʼe hoko te faʼahi ʼaia, ʼe ʼaoga anai ke ke faikole, mo fai he ʼu fekumi, pea mo ke palalau ki tou famili peʼe ki te ʼu tagata ʼafeā ia muʼa ʼo tau toʼo he tonu. ʼE lelei age tau ako ke ke iloʼi te faʼahiga sio ʼa Sehova ki te ʼu aluʼaga ʼaia ʼi te temi nei pea mo ke maʼu ʼana manatu. Koia, kapau la ʼe ke maʼu te faigamalie ʼae ke ke maʼu te ʼu meʼa ʼaia, ʼe lagi faigafua anai hau mole tali te ʼu faʼahi ʼaia. ʼE ke iloʼi lelei pe te meʼa ʼae ʼe tonu ke ke fai he neʼe kua ke fakatotonu ke ke tokaga tafito ki tau tauhi kia Sehova.
19 ʼE lagi ke manatu ki ʼihi aluʼaga ʼe feala ke ʼahiʼahiʼi fakapunamaʼuli ai tau nofo agatonu kia Sehova. ʼE moʼoni, ʼe mole feala ke tou fakakaukauʼi fakatomuʼa te ʼu aluʼaga fuli ʼae ʼe feala ke hoko. Kae kapau ʼe tou metitasio ki te faʼahiga manatu ʼa Sehova lolotoga tatatou ako takitokotahi, ʼe tou manatuʼi anai te ʼu meʼa ʼae neʼe tou ako pea ʼe tou iloʼi anai pe feafeaʼi tona maʼuliʼi ʼi he aluʼaga pe ʼe tou felaveʼi mo ia. Koia ka tou ako, tou vakaʼi pe ʼe kotea te faʼahiga sio ʼa Sehova, mo tou maʼu tana faʼahiga manatu, pea tou fakakaukauʼi pe ʼe feafeaʼi anai hana tokoni mai ke tou toʼo he ʼu tonu fakapotopoto ʼi te temi nei pea mo te ka haʼu.
TE ʼU MANATU ʼA SEHOVA MO TOU KA HAʼU
20, 21. (1) He koʼe ʼe tou leleiʼia anai totatou ʼateaina ʼi te malama foʼou? (2) Pea ʼe feafeaʼi hatatou leleiʼia te maʼuli ʼi te temi nei?
20 ʼE tou fakatalitali fuli ki te malama foʼou. Tokolahi ia tatou ʼe tou fia maʼuʼuli ʼo heʼe gata ʼi te Palatiso ʼi te kele. ʼI te takitaki ʼo te Puleʼaga ʼo te ʼAtua, ʼe fakaʼateaina anai tatou mai te ʼu mamahi fuli ʼe tou tau mo ia ʼi te tuʼu ʼaeni. Pea ʼe kei tou maʼu pe anai te ʼateaina ʼae ke tou filifili te ʼu meʼa ʼae ʼe tou leleiʼia mo loto ki ai.
21 Kae ʼe mole fakaʼuhiga leva ʼe mole he tuʼakoi ʼo totatou ʼateaina. He ʼe fakatafito anai e te kau agamalū ʼanatou tonu ki te ʼu lao pea mo te ʼu manatu ʼa Sehova. Pea ʼe tou maʼu anai he fiafia lahi pea mo tou mahu ʼi te tokalelei. (Pesalemo 37:11) Kae ʼi tatatou fakatalitali ʼaia, ʼe feala ke tou fiafia mo kapau ʼe tou maʼu te ʼu manatu ʼa Sehova.
^ pal. 12 Ko te lap dance ʼe ko he gaue ʼa he tahi ʼe ina fai he meʼe ʼe heʼe ʼaoga mo ʼona kiʼi meʼa liliki ʼi te ʼu fuga tuli ʼo he tagata neʼe ina totogi tana meʼe. ʼO mulimuli ki te ʼu faʼahi ʼae neʼe hoko, ʼe feala pe ke fakaʼuhiga ki he aga heʼe ʼaoga pea ʼe tonu anai ke fai e te kau tagata ʼafeā he komite faifakamau. Ko he Kilisitiano neʼe ina fai te faʼahiga gaue ʼaia ʼe tonu ke kole tokoni ki te kau tagata ʼafeā.—Sakopo 5:14, 15.
^ pal. 14 Ko te feʼaveʼaki ʼo he ʼu palalau, mo he ʼu pāki peʼe ko he ʼu viteo heʼe ʼaoga ʼi te telefoni toʼotoʼo, ʼe fakahigoaʼi ko te ʼu sextos. ʼO mulimuli ki te ʼu faʼahi ʼae neʼe hoko, ʼe tonu anai ke fai e te kau tagata ʼafeā he komite faifakamau. ʼI ʼihi aluʼaga, ko te ʼu pule maʼoluga ʼe natou fakatuʼā te kau tupulaga ʼae ʼe natou momoli he ʼu sextos ohage pe ko natou ʼae ʼe pilisoniʼi ʼuhi ko te ʼu aga fakalialia ʼae neʼe natou fai. Kapau ʼe ke fia maʼu he tahi ʼu fakamahino, ʼe feala tau alu ki tatatou tuʼasila jw.org pea mo ke lau ia te alatike “ Les jeunes s’interrogent : Le sexting : que faut-il savoir ? ” (Vakaʼi LA BIBLE ET VOUS > ADOLESCENTS.) Peʼe ke vakaʼi te alatike “ Comment parler des sextos à votre ado ” ʼi te Réveillez-vous ! ʼo Novepeli 2013, pasina 4-5.
^ pal. 16 Kapau ʼe ke fia maʼu he tahi ʼu fakamahino ʼo ʼuhiga mo te ʼu pelesepeto Fakatohi-tapu ʼae ʼe lava tokoni atu, vakaʼi te tohi Kotou Haga Nonofo ʼi Te ʼOfa ʼo Te ʼAtua, pasina 246-249.