ALATIKE AKO 44
ʼE Ke Maʼu Te ʼOfa Agatonu ʼo Sehova?
“ʼE heʼe gata tona ʼofa agatonu.”—PES. 136:1, NWT.
KATIKO 108 Te ʼOfa Agatonu ʼo Te ʼAtua
TE ʼU MANATU FAKANOUNOU *
1. Kotea ʼae ʼe loto ki ai ia Sehova?
NEʼE ui fenei e Sehova: ‘ʼE au ʼofa ki te ʼofa agatonu.ʼ (Oseo 6:6) ʼE fakalotomalohiʼi e totatou ʼAtua ʼana kaugana ke natou fakamaʼuhigaʼi mo natou maʼuliʼi ia te kalitate ʼaia. Ohage ko tona ui e te polofeta ko Mikea, ʼe ina loto ke tou ‘leleiʼia te ʼofa agatonu.ʼ (Mik. 6:8) ʼE mahino ia, ʼe tonu ke tou iloʼi pe kotea te ʼofa agatonu ke feala hatatou leleiʼia te kalitate ʼaia.
2. Kotea ia te ʼofa agatonu?
2 Kotea ia te ʼofa agatonu? ʼE ke maʼu tuʼa 200 tupu ia te kupu “ʼofa agatonu” ʼi te Tohi-Tapu Fakafalani. Ka kita maʼu te ʼofa agatonu, ʼe kita ʼofa mamahi ai ki he tahi ʼo tou haga ʼofa ki ai mo nofo tuʼumaʼu ʼi ʼona tafa. ʼE ko Sehova ia te faʼifaʼitakiʼaga lelei ʼo te ʼofa agatonu. ʼI te alatike ʼaeni, ʼe tou vakaʼi anai pe ʼe ina fakaha feafeaʼi ia te kalitate ʼaia ki tana hahaʼi. Pea ʼi te alatike ʼae ka hoa mai, ʼe tou vakaʼi anai ʼe feala ke tou faʼifaʼitakiʼi ia ia pea mo fefakahaʼaki te ʼofa agatonu.
KO SEHOVA ʼE “MAHU ʼI TE ʼOFA AGATONU”
3. Kotea ʼae neʼe fakaha age e Sehova kia Moisese?
3 ʼI te ʼosi mavae ʼa te kau Iselaele mai Esipito, neʼe fakaha age e Sehova kia Moisese ia tona huafa pea mo ʼona kalitate. Neʼe ina ui fenei: “Sehova, Sehova, ʼAtua ʼo te manavaʼofa pea mo te lotoʼofa, tuai ʼi te ita pea mo mahu ʼi te ʼofa agatonu pea mo te moʼoni, ʼe ina fakaha te ʼofa agatonu ki te toko lauʼi afe pea mo fakamolemole te hala, te talagataʼa pea mo te agahala.” (Eke. 34:6, 7, NWT) ʼAki te ʼu palalau matamatalelei ʼaeni, neʼe fakaha ai e Sehova kia Moisese ia te fakaʼuhiga kehe ʼo Tona ʼofa agatonu. Kotea te faʼahi ʼaia?
4-5. (1) Kotea ʼae neʼe ui e Sehova ʼo ʼuhiga mo ia? (2) Kotea te ʼu fehuʼi ʼae ka tou tali ki ai?
4 Neʼe mole ui pe e Sehova, ko ia ko he ʼAtua ʼe ʼofa agatonu. Neʼe ina fakaha lelei ko ia ʼe “mahu ʼi te ʼofa agatonu.” ʼE fakaʼaogaʼi tuʼa lahi ia te kupu ʼaia ʼi te Tohi-Tapu. (Num. 14:18; Nee. 9:17; Pes. 86:15; 103:8; Soe. 2:13; Son. 4:2) ʼI te agamahani, ʼe fakaʼuhiga kia Sehova kae mole ki te tagata. ʼE mole koa la fakaofoofo ia te fakahaha e Sehova ia tona ʼuhiga ʼi tana Folafola? ʼE mahino mai, ʼe maʼuhiga kia te ia te kalitate ʼaia. * Ko te tupuʼaga la ʼaia ʼo te palalau fenei ʼa te Hau ko Tavite: “Sehova E, ʼe kaku ki te lagi tou ʼofa agatonu. . . . ʼE maʼuhiga tou ʼofa agatonu, ʼAtua E! ʼI te malumalu ʼo ʼou kapakau, ʼe nono ai te ʼu foha ʼo te tagata.” (Pes. 36:5, 7, NWT) ʼE tou fakamaʼuhigaʼi koa te ʼofa agatonu ʼo te ʼAtua ohage ko Tavite?
5 Ke tou mahino lelei pe kotea te ʼofa agatonu, ʼe tou tali anai ki te ʼu fehuʼi ʼaeni ʼe lua: Ko ai ʼae ʼe fakaha ki ai e Sehova tona ʼofa agatonu? Pea kotea te ʼu lelei ʼe tou maʼu mai tona ʼofa agatonu?
KO AI ʼAE ʼE FAKAHA KI AI E SEHOVA TONA ʼOFA AGATONU?
6. Ko ai ʼae ʼe fakaha ki ai e Sehova ia tona ʼofa agatonu?
6 Ko ai ʼae ʼe fakaha ki ai e Sehova tona ʼofa agatonu? ʼE ui ʼi te Tohi-Tapu, ʼe lahi te ʼu meʼa ʼe tou leleiʼia ohage ko “te gaue kele,” ‘te vino pea mo te lolo,ʼ ‘te fakatonutonu,ʼ ‘te ʼatamaiʼ peʼe ko “te poto.” (2 Klk. 26:10; Taag. 12:1; 21:17; 29:3) Koia ʼe mole feala ke tou fakaha te ʼofa agatonu ki he ʼu meʼa peʼe ki he ʼu aluʼaga, kae ki te hahaʼi pe. Ko tona fakaʼuhiga ʼe mole fakaha e Sehova tona ʼofa agatonu ki te tagata fuli. ʼE ina fakaha tona ʼofa agatonu kia natou ʼae ʼe felogoi lelei mo ia. ʼE agatonu totatou ʼAtua ki ʼona kaumeʼa. ʼE ina fakapapauʼi age he ka haʼu taulekaleka pea ʼe mole gata anai ʼi he temi tona ʼofa ʼae kia natou.
7. ʼE fakaha feafeaʼi e Sehova ia tona ʼofa ki te tagata fuli?
7 ʼE fakaha e Sehova ia tona ʼofa ki te tagata fuli. Neʼe ui fenei e Sesu ki te tagata ko Nikotemo: “Neʼe ʼofa mamahi te ʼAtua ki te malamanei ʼo ina foaki ai tona ʼAlo ʼulu tokotahi, pea ko ʼae ʼe tui kia te ia ʼe mole mate anai kaʼe ʼe ina maʼu anai te maʼuli heʼe gata.”—Soa. 3:1, 16; Mat. 5:44, 45.
8-9. (1) He koʼe ʼe ʼofa agatonu ia Sehova ki ʼana kaugana? (2) Kotea ʼae ka tou vakaʼi anai?
Pes. 36:11; 103:17; Tan. 9:4) Ko te ʼu palalau ʼaeni neʼe tohi ʼaki te laumalie ʼo Sehova ʼe ha ai ʼe ʼofa agatonu ki ʼana kaugana koteʼuhi ʼe natou iloʼi ia ia, mo manavasiʼi kia te ia, mo ʼoʼofa ki ai pea mo fakalogo ki ʼana fakatotonu. Koia, ʼe ina fakaha pe ia tona ʼofa agatonu ki ʼana kaugana, ia natou ʼae ʼe natou fai te faʼahiga tauhi ʼae ʼe ina leleiʼia.
8 Ohage ko tatatou vakaʼi, ʼe ʼofa agatonu ia Sehova kia natou ʼae ʼe natou maʼu he ʼu felogoi lelei mo ia, ʼae ko ʼana kaugana. ʼE ha lelei ai te ʼu palalau neʼe fai e te Hau ko Tavite pea mo te polofeta ko Taniela. Ohage la, neʼe kole e Tavite ki te ʼAtua ‘ke folahi tou ʼofa agatonu kia natou ʼe natou iloʼi ia koe.ʼ Neʼe ina fakatokagaʼi ‘ʼe heʼe gata te ʼofa agatonu ʼo Sehova kia natou ʼe manavasiʼi kia te ia.ʼ Pea neʼe ui e Taniela kia Sehova ‘Sehova E, ʼAtua moʼoni, ia koe ʼae ʼe ʼofa agatonu kia natou ʼae ʼe ʼoʼofa ia te ia pea mo fakalogo ki ʼana fakatotonu.ʼ (9 ʼI muʼa ʼo tatatou liliu ko ʼana kaugana, neʼe kua fakaha mai e Sehova ia tona ʼofa, ohage ko tana fakaha ki te tagata fuli. (Pes. 104:14) Kae ʼi te temi nei kua tou tauhi ai ki ai, ʼe tou maʼu tona ʼofa agatonu. Neʼe ina fakapapauʼi mai ‘ʼe mole puli anai toku ʼofa agatonu kia te koe.ʼ (Esa. 54:10) Ohage ko tona tokagaʼi e Tavite, ‘ʼe kehe te faʼahiga tokaga ʼa Sehova ki tana tagata agatonu.ʼ (Pes. 4:4) Kotea ʼae ʼe ina uga tatou ke tou fai? ʼE ui e te tagata faipesalemo ‘ke tokaga ia ia ʼe poto ki te ʼu meʼa ʼaia, pea ke mahino ia ia ki te ʼofa agatonu ʼo Sehova.ʼ (Pes. 107:43) ʼE tou vakaʼi anai ia fua lelei ʼe tolu ʼo te ʼofa agatonu ʼo Sehova ki ʼana kaugana.
ʼE TOU MAʼU HE ʼU LELEI MAI TE ʼOFA AGATONU ʼO SEHOVA
10. Ia Pesalemo 31:8, kotea ʼe ha mai ai ʼe heʼe gata te ʼofa agatonu ʼo Sehova?
10 ʼE mole puli anai te ʼofa agatonu ʼo Sehova. ʼE ha tuʼa 26 ia te koga maʼuhiga ʼo tona ʼofa agatonu ʼi te Pesalemo 136. ʼE tou lau fenei ʼi te ʼuluaki vaega ʼo te kapite ʼaia: “Kotou fakafetaʼi kia Sehova koteʼuhi ʼe agalelei pea ʼe heʼe gata tona ʼofa agatonu.” (Pes. 136:1, NWT) Pea ʼe toe maʼu ʼi te vaega te ʼu palalau ʼaeni: ‘Koteʼuhi ʼe heʼe gata tona ʼofa agatonu.ʼ Ka tou lau te kapite ʼaia, ʼe tou ʼofolele ki te lahi ʼo te ʼu aluʼaga ʼe haga fakaha ai e Sehova tona ʼofa agatonu. ʼI te ʼu palalau ʼaeni ‘koteʼuhi ʼe heʼe gata tona ʼofa agatonu,’ ʼe ha mai ai ʼe fakaha tuʼumaʼu e Sehova tona ʼofa agatonu ki ʼana kaugana. ʼI fakalotomalohi leva tatatou iloʼi ʼe mole liʼaki fakafuanoa e Sehova ʼana kaugana. ʼE fakaovi kia natou ʼae ʼe tauhi age kia te ia pea ʼe mole ina liʼaki natou, tafito la mo kapau ʼe natou tau mo ni mamahi. Te ʼu lelei ʼe tou maʼu mai ai: Ko te manatu ʼae ʼe mole liʼaki tatou e Sehova, ʼe tou maʼu ai te fiafia pea mo te malohi. ʼE feala ai ke tou tauʼi te ʼu faigataʼaʼia pea mo tou haga tauhi kia te ia.—Lau ia 2 ki te 26Pesalemo 31:8.
11. Ia Pesalemo 86:5, kotea ʼae ina uga ia Sehova ke fakamolemole?
11 ʼE uga e te ʼofa agatonu ʼo Sehova ke fakamolemole. Ka sio ki he tagata agahala ʼe fakahemala pea mo fetogi tana aga, ʼe uga ia ia e tona ʼofa agatonu ke ina fakaha te lotomanavaʼofa ki te tagata ʼaia. Neʼe ui fenei e te tagata faipesalemo ko Tavite ʼo ʼuhiga mo Sehova: “E mole ina fai kia tatou o mulimuli ki atatou agahala, e mole ina fakatua tatou o mulimuli ki atatou agakovi.” (Pes. 103:8-11) Neʼe mahino ia Tavite ki te mamafa ʼo te maʼu ʼo he leʼo ʼo loto ʼe mole lelei koteʼuhi neʼe kua fakalaka ai. Kae neʼe toe mahino ko Sehova ʼe “fakamolemole.” Kotea ʼae ʼe ina uga ia Sehova ke lotomanavaʼofa? ʼE tou maʼu tona tali ia Pesalemo 86:5. (Lau.) Ohage ko tona ui e Tavite ʼi tana faikole, ʼe lotolelei ia Sehova ke fakamolemole koteʼuhi ʼe mahu ʼi te ʼofa agatonu kia natou fuli ʼe pauʼi age.
12-13. Kapau ʼe tautea totatou loto pea mo tou lotomamahi ʼuhi ko he ʼu agahala ki muʼa atu, kotea ʼae ʼe feala ke tokoni mai?
12 ʼI te temi ʼae ʼe tou agahala ai, ʼe vevele totatou loto pea ʼe lelei ke tou logoʼi te faʼahi ʼaia. ʼE feala ai ke tou fakahemala pea mo tou fetogi. ʼE fakaʼofaʼofa koteʼuhi ʼe taʼomia ʼihi kaugana ʼa te ʼAtua ʼuhi he ʼe tautea ʼonatou loto ʼi he ʼu agahala neʼe natou fai ki muʼa atu. ʼE tautea ʼonatou loto pea ʼe natou manatu ʼe mole feala anai ke fakamolemole age ia Sehova, tatau aipe
pe ʼe natou fakahemala moʼoni. Kapau ʼe ke logoʼi te faʼahi ʼaia, ʼe feala anai ke tokoni atu tau mahino ʼae ʼe loto e Sehova ke ina fakaha tona ʼofa agatonu ki ʼana kaugana.13 Te ʼu lelei ʼe tou maʼu mai ai: Logo la ʼe tou heʼe haohaoa, ʼe feala ke tou tauhi kia Sehova ʼaki he lotofiafia mo he leʼo ʼo loto ʼe lelei. Koia, “ʼe fakamaʼa tatou mai te ʼu agahala fuli ʼaki te taʼataʼa ʼo tona ʼAlo ko Sesu.” (1 Soa. 1:7) Ka ke lotovaivai ʼuhi ko hou vaivaiʼaga, manatuʼi ʼe lotolelei ia Sehova ke fakamolemole kia natou neʼe agahala pea kua fakahemala. Tou vakaʼi te pikipikiga neʼe fai e Tavite ʼo ʼuhiga mo te ʼofa agatonu pea mo te lotofakamolemole. Neʼe ina tohi fenei: “Kae o hage ko te atu lagi e maoluga i te kele, e toe lahi feia foki tona agalelei kia tatou ae e matataku kia ia; o hage ko te potu esite e mamao mai te potu uesite, e ina toe fakamamao feia foki atatou agahala ia tatou.” (Pes. 103:11, 12) ʼEi, ʼe lotolelei ia Sehova ke “fakamolemole” mai.—Esa. 55:7.
14. Neʼe fakaha feafeaʼi e Tavite totatou faʼahiga puipui e te ʼAtua ʼaki tana fakaha mai tona ʼofa agatonu?
14 ʼE puipui tatou e te ʼofa agatonu ʼo Sehova. ʼI tana faikole, neʼe ui e Tavite kia Sehova ‘ko koe ko he nonoʼaga kia te au, ʼe ke taupau anai au ʼi te temi mamahi. ʼE ke ʼaofi anai au ʼaki ni kalaga fakafiafia ʼo te haofaki. . . . Ko ʼae ʼe falala kia Sehova ʼe ʼaofi ia e tona ʼofa agatonu.ʼ (Pes. 32:7, 10) ʼI te temi muʼa, neʼe puipui e te ʼu kaupa ʼo he kolo ia tana hahaʼi. Pea ʼe toe feia pe mo te ʼofa agatonu ʼo Sehova. ʼE ina ʼaofi pea mo puipui tatou ʼi te faʼahi fakalaumalie ʼaki tana tokoni mai ke tou nonofo agatonu. Pea tahi, ʼe uga ia Sehova e tona ʼofa agatonu ke ina taki mai tatou kia te ia.—Sel. 31:3.
15. He koʼe ʼe feala ke tou fakatatau ia te ʼofa agatonu ʼo Sehova ki he nonoʼaga peʼe ki he tule malohi?
15 Neʼe toe fakaʼaogaʼi e Tavite ia te tahi fakata moʼo palalau ki te puipui ʼe maʼu e te ʼu kaugana ʼa te ʼAtua. Neʼe ina tohi fenei: “Ko te ʼAtua ʼe ko toku nonoʼaga lelei, te ʼAtua ʼae ʼe ina fakaha mai te ʼofa agatonu.” Neʼe ina toe ui ʼo ʼuhiga mo Sehova: “ʼE ko ia ko toku ʼofa agatonu pea mo toku tule malohi, mo toku nonoʼaga lelei pea mo toku haofakiʼaga, toku paletau pea mo au nono ia te ia.ʼ (Pes. 59:17, NWT; 144:2, NWT) He koʼe neʼe fakatatau e Tavite ia te ʼofa agatonu ʼo Sehova ki he nonoʼaga peʼe ki he tule malohi? ʼI he faʼahi pe ʼe tou maʼuʼuli ai, kapau ʼe tou tauhi kia te ia, ʼe foaki mai anai e Sehova ia te puipui fakalaumalie ʼae ʼe ʼaoga mai moʼo taupau tatatou fakakaumeʼa mo ia. ʼE fakamoʼoni ki ai te Pesalemo 91. Neʼe ui e ia ʼae neʼe ina tohi te pesalemo ʼaeni: ‘ʼE au fia ui kia Sehova: Ko koe ko toku nonoʼaga pea mo toku tule malohi.ʼ (Pes. 91:1-3, 9, 14) Neʼe toe fakatatau e Moisese ia Sehova ki he nonoʼaga. (Pes. 90:1) ʼI te ʼu temi fakaʼosi ʼo tona maʼuli, neʼe talanoa ki he manatu fakalotofimalie. ʼI te hili ʼo tana ui ‘ko te ʼAtua ʼe ko he nonoʼaga talu mai te ʼu temi ki muʼa atu,ʼ neʼe ina ui ‘ʼe puipui koe e ʼona nima heʼe gata.ʼ (Tet. 33:27) Kotea ʼe tou mahino ai ʼo ʼuhiga mo Sehova ʼi te ʼu palalau ʼaia?
16. ʼE tokoni feafeaʼi mai ia Sehova kia tatou? (Pesalemo 136:23)
16 Ko Sehova ʼe ko totatou Nonoʼaga, koia ʼae ʼe tou logoʼi ai tana puipui. Kae ʼi ʼihi temi, ʼe tou lotomamahi pea ʼe faigataʼa tatatou toe lotomalohi. ʼI te ʼu temi ʼaia, kotea ʼae ʼe fai e Sehova maʼa tatou? (Lau ia Pesalemo 136:23.) ʼE faʼufua mai ʼo fakatuʼu ake mamalie tatou. (Pes. 28:9; 94:18) Te ʼu lelei ʼe tou maʼu mai ai: ʼE fakalotomalohi kia tatou tatatou iloʼi ʼe feala ke tou falala kia Sehova. ʼE tokoni mai ia aluʼaga ʼe lua: ʼUluaki, ʼe ina puipui tatou ʼi he faʼahi pe ʼe tou maʼuʼuli ai. Lua, ʼe tokaga lelei tatatou Tamai ʼae ʼe ʼi selo kia tatou.
ʼE MOLE GATA ANAI TE FAKAHA MAI E SEHOVA IA TONA ʼOFA AGATONU
17. Ia Pesalemo 33:18-22, kotea ʼae ʼe tou tui papau ki ai
17 Ohage ko tatatou vakaʼi, ʼe tou tui papau, ʼe tokoni mai anai ia Sehova ʼi te temi ʼae ʼe ʼahiʼahiʼi ai tatou. ʼE ina foaki mai anai ia te tokoni ʼae ʼe ʼaoga ke feala hatatou nonofo agatonu kia te ia. (2 Ko. 4:7-9) Neʼe tokagaʼi e te polofeta ko Selemia: “ʼUhi ko te ʼofa agatonu ʼo Sehova ʼae neʼe mole matou mamate ai, koteʼuhi ʼe mole gata anai tona manavaʼofa.” (Tagi. 3:22, NWT) ʼE tou tui papau ʼe hoko atu anai te ʼofa agatonu ʼo Sehova kia tatou, koteʼuhi ohage ko tona fakatokagaʼi e te tagata faipesalemo, ‘ʼe sio te ʼu mata ʼo Sehova kia natou ʼae ʼe manavasiʼi kia te ia, kia natou ʼae ʼe falala ki tona ʼofa agatonu.ʼ—Lau ia Pesalemo 33:18-22.
18-19. (1) Kotea ʼae ʼe tou fia manatuʼi? (2) Kotea ʼae ka tou vakaʼi ʼi te alatike ʼae ka hoa mai?
18 Kotea ʼae ʼe tou fia manatuʼi? ʼI muʼa ʼo tatatou tauhi kia te ia, neʼe kua fakaha mai e Sehova ia tona ʼofa, ohage ko tana fai ki te tagata fuli. Kae ʼi te temi ʼaeni kua tou tauhi ai ki ai, kua tou maʼu tona ʼofa agatonu. ʼUhi ko te ʼofa ʼaia, ʼe puipui tatou e Sehova. ʼE ina taupau tatou ʼi ʼona tafa pea ʼe ina fakahoko anai te ʼu fakapapau taulekaleka fuli ʼae neʼe ina fai mai. ʼE ina loto ke tou fiafia. (Pes. 46:2, 3, 8) Koia, logo la te ʼu ʼahiʼahi kehekehe, ʼe ina foaki mai anai te malohi ke feala hatatou nonofo agatonu kia te ia.
19 Neʼe tou vakaʼi pe ʼe fakaha feafeaʼi e Sehova ia te ʼofa agatonu ki ʼana kaugana. Kae ʼe ina loto ke tou fefakahaʼaki te kalitate ʼaia. Kotea anai ʼe tonu ke tou fai? ʼI te alatike ʼae ka hoa mai, ʼe tou vakaʼi anai te manatu maʼuhiga ʼaia.
KATIKO 136 Ke Fakapale Koe e Sehova
^ pal. 5 Kotea ia te ʼofa agatonu? Ko ai ʼae ʼe fakaha ki ai e Sehova ia te taʼi ʼofa ʼaia? Pea kotea te ʼu lelei ʼe maʼu e natou ʼae ʼe natou maʼu te ʼofa ʼaia? ʼI te alatike ʼaeni, ʼe tou tali anai ki te ʼu fehuʼi ʼaia. Pea ʼi te alatike ʼae ʼe hoa mai, ʼe hoko atu anai tatatou palalau ki te kalitate maʼuhiga ʼaia ʼo totatou ʼAtua.
^ pal. 4 Ko te manatu ʼae ʼe mahu te ʼofa agatonu ʼo Sehova, ʼe tou toe maʼu ʼi ʼihi atu vaega.—Vakaʼi ia Neemia 13:22; Pesalemo 69:14; 106:7; pea mo Tagi Laulau 3:32.
^ pal. 54 FAKAMATALA ʼO TE ʼU PĀKI: ʼE ʼofa ia Sehova ki te tagata fuli, ʼo kau ai ʼana kaugana. ʼE ha ʼi te ʼu kiʼi pāki ʼi ʼoluga ʼo te ʼu hahaʼi ia te ʼu aluʼaga ʼe fakaha ai te ʼofa ʼo te ʼAtua. Ko ia ʼae maʼuhiga age ko te fealagia ʼae ʼe ina foaki mai ʼaki te totogi.
^ pal. 62 FAKAMATALA ʼO TE ʼU PĀKI: ʼE makehe ia te tokaga ʼa Sehova kia natou ʼae ʼe natou filifili ke natou tauhi kia te ia pea mo tui ki te totogi. ʼE mole gata ʼaki pe te maʼu e te ʼu kaugana ʼa Sehova ia tona ʼofa ki te tagata fuli, kae ʼe natou toe maʼu mo tona ʼofa agatonu. ʼE ha ʼihi aluʼaga ʼo tona ʼofa agatonu ʼi te ʼu kiʼi pāki.