ALATIKE AKO 45
Tou Haga Fakaha Te ʼOfa Agatonu
“Kotou fefakahaʼaki te ʼofa agatonu pea mo te manavaʼofa.”—SAKL. 7:9, NWT.
KATIKO 107 Tou Faʼifaʼitakiʼi Ia Te ʼOfa ʼo Te ʼAtua
TE ʼU MANATU FAKANOUNOU *
1-2. Kotea te ʼu tupuʼaga lelei ke tou fakaha ai ia te ʼofa agatonu?
ʼE LAHI te ʼu tupuʼaga lelei ke tou fakaha ai te ʼofa agatonu. Koʼeni ʼihi tupuʼaga ʼe tou maʼu ʼi te tohi ʼo Taʼaga Lea: “ʼAua naʼa ke tuku ke puli ia koe te ʼofa agatonu pea mo te agatonu. . . . Koia ʼe ke maʼu anai tona ʼofa pea mo iloʼi anai tau fakapotopoto ia mata ʼo te ʼAtua pea mo te tagata.” “ʼE fai e te tagata ʼae ʼe ina maʼu te ʼofa agatonu te meʼa ʼae ʼe lelei kia ia.” “Ko ʼae ʼe ina kumi te faitotonu pea mo te ʼofa agatonu, ʼe ina maʼu anai te maʼuli.”—Taag. 3:3, 4, NWT; 11:17, nota, NWT; 21:21, NWT.
2 ʼE talanoa ia te ʼu taʼaga lea ʼaeni kia tupuʼaga ʼe tolu ʼe tonu ai ke tou fakaha ia te ʼofa agatonu ki ʼihi. ʼUluaki, ʼe tou liliu ai ʼo maʼuhiga kia mata ʼo te ʼAtua. Lua, ʼe fua lelei anai kia tatou koteʼuhi ʼe tou maʼu ai he ʼu fakakaumeʼa ʼe tologa. Pea tolu, ʼe tou maʼu anai he ʼu tapuakina ʼi te ka haʼu, ohage ko te maʼuli heʼe gata. Koia, ʼe ʼi ai te ʼu tupuʼaga lelei ke tou mulimuli ki te tokoni ʼaeni ʼa Sehova: “Kotou fefakahaʼaki te ʼofa agatonu pea mo te manavaʼofa.”—Sakl. 7:9, NWT.
3. Kotea te ʼu fehuʼi ka tou tali ki ai ʼi te alatike ʼaeni?
3 ʼI te alatike ʼaeni, ʼe tou tali anai kia fehuʼi ʼe fa: Ko ai ʼae ʼe tonu ke tou fakaha ki ai te ʼofa agatonu? Kotea te ako ʼe tou taʼofi mai te tohi ʼo Lute ʼo ʼuhiga mo te ʼofa agatonu? ʼE tou lava fakaha feafeaʼi ia te ʼofa agatonu ki ʼihi? Kotea te ʼu fua lelei ʼe maʼu e natou ʼae ʼe natou fakaha ia te ʼofa agatonu?
KO AI ʼAE ʼE TONU KE TOU FAKAHA KI AI TE ʼOFA AGATONU?
4. Ka tou fia faʼifaʼitakiʼi ia Sehova, ʼe tou fakaha feafeaʼi anai ia te ʼofa agatonu? (Maleko 10:29, 30)
4 Ohage ko tatatou vakaʼi ʼi te alatike kua hili, ʼe fakaha e Tan. 9:4) ʼE tou fia liliu ‘ohage ko ni fanau ʼofaina, ʼe natou faʼifaʼitakiʼi ia te ʼAtua.’ (Efe. 5:1) Koia, ʼe tou fia fakaha ai te ʼofa agatonu ki ʼotatou tehina mo tuagaʼane.—Lau ia Maleko 10:29, 30.
Sehova tona ʼofa agatonu, ko tona fakaʼuhiga ʼe haga pipiki ʼaki he agamalū kia natou ʼe ʼoʼofa pea mo tauhi kia te ia. (5-6. ʼE tautau fakaʼaogaʼi feafeaʼi ia te kupu “agatonu”?
5 Kapau ʼe tou mahino lelei ki te fakaʼuhiga ʼo te ʼofa agatonu, ʼe faigafua age anai tatatou fakaha te kalitate ʼaia ki te ʼu tehina mo tuagaʼane. Kotea te kehekehe ʼo te kupu “ʼofa agatonu” pea mo te kupu “agatonu,” ʼae ʼe tou fakaʼaogaʼi ʼi ʼihi temi? Tou toʼo he faʼifaʼitaki.
6 ʼE tou ui anai ʼo ʼuhiga mo he tagata gaue ʼe agatonu ki tona fale gaue mo kapau kua lauʼi taʼu tana gaue ai. Kae lagi heʼeki pe la felaveʼi mo te patolo pea mo ʼona tokoni gaue. Pea ʼi ʼihi temi ʼe mole manatu tahi mo te ʼu tonu ʼae ʼe toʼo. ʼE mole feala ke tou ui ʼe ʼofa ʼi tona fale gaue, kae ʼe fiafia ʼi te maʼu ʼo hana gaue ʼe totogi ai ia ia. ʼE hoko atu anai tana gaue ai ʼo kaku ki tana letelete, mo kapau ʼe mole ina maʼu he tahi age gaue ʼe lelei age tona totogi.
7-8. (1) Kotea ʼae ʼe ina uga he tahi ke ina fakaha ia te ʼofa agatonu? (2) He koʼe ʼe tou vakaʼi ʼihi vaega ʼo te tohi ʼo Lute?
7 Kotea te kehekehe ʼo te tagata gaue ʼaia ʼe agatonu ki tona fale gaue pea mo he tahi ʼe ina fakaha te ʼofa agatonu? ʼE mole tatau ʼonā aluʼaga. ʼI te temi muʼa, kotea ʼae neʼe ina uga te ʼu kaugana ʼa te ʼAtua ke natou fakaha te ʼofa agatonu? Neʼe natou fai te faʼahi ʼaia, koteʼuhi neʼe natou lotolelei ki ai kae neʼe mole ko he fakamaʼua kia natou. Tou toʼo te faʼifaʼitaki ʼo Tavite. Neʼe lotolelei ke ina fakaha te ʼofa agatonu ki tona kaumeʼa ko Sonatane logo la neʼe faigaʼi e te tamai ʼa Sonatane ke ina matehi ia ia. Hili ni taʼu ki te mate ʼa Sonatane, neʼe haga fakaha e Tavite ia te ʼofa agatonu ʼaki tana ʼofa kia Mefiposete, te foha ʼo Sonatane.—1 Sam. 20:9, 14, 15; 2 Sam. 4:4; 8:15; 9:1, 6, 7.
8 ʼE lahi te ʼu ako ʼe tou taʼofi anai moka tou vakaʼi ʼi ʼihi vaega ʼo te tohi ʼo Lute. Kotea te ʼu ako ʼe tou taʼofi mai te faʼifaʼitaki ʼo natou ʼe talanoa ki ai te fakamatala ʼaeni? Pea ʼe tou lava fakaha feafeaʼi ia te ʼofa agatonu ʼi tatatou kokelekasio? *
KOTEA TE AKO ʼE TOU TAʼOFI MAI TE TOHI ʼO LUTE ʼO ʼUHIGA MO TE ʼOFA AGATONU?
9. He koʼe neʼe manatu ia Naomi ʼe feagai ia Sehova kia ia?
9 ʼE fakamatala ʼi te tohi ʼo Lute ia te hisitolia ʼo Naomi, mo Lute, te ʼohoana ʼo tana tama. Pea ʼe toe talanoa ai kia Poase, ko he tagata mai te famili ʼo te ʼohoana ʼo Naomi pea neʼe manavasiʼi ki te ʼAtua. Neʼe to te hoge ʼi Iselaele, koia neʼe olo ai ia Naomi mo tona ʼohoana pea mo ʼanā tama ʼe lua ʼo nonofo ʼi Moape. Koia neʼe mate ai ia te ʼohoana ʼo Naomi. Neʼe ʼohoana leva ʼana tama ʼe lua pea toe mamate mo naua. (Lute 1:3-5; 2:1) ʼI te hoko mai ʼo te ʼu ʼahiʼahi ʼaia, neʼe lotomamahi ai ia Naomi. ʼI te lahi fau ʼo tona lotomamahi, neʼe hake ai ʼi tana fakakaukau ʼe feagai ia Sehova kia ia. Tou tokagaʼi te ʼu palalau ʼaeni neʼe ina fai moʼo fakaha ia te ʼu meʼa ʼae neʼe ina logoʼi: “Kua hiki fakafehagai te nima o [“Sehova,” NWT] kia au.” “Kua fakafonu au e te Mafimafi aki te mamahi.” Neʼe ina toe ui fenei: “Kua siaki au e [“Sehova,” NWT], pea kua fakamamahii au e te Mafimafi.”—Lute 1:13, 20, 21.
10. Kotea ʼae neʼe logoʼi e Sehova ʼi tana logo ki te ʼu palalau neʼe fai e Naomi? Pea kotea neʼe ina fai maʼa ia?
Ekl. 7:7) Koia neʼe tokoni ai kia Naomi ke ina iloʼi ʼe hoko atu anai tana lagolago ki ai. ʼO feafeaʼi? (1 Sam. 2:8) Neʼe ina uga ia Lute ke ina fakaha te ʼofa agatonu kia Naomi. ʼE tou iloʼi neʼe lituʼa ia Lute kia meʼa fuli pea neʼe agalelei. Koia, neʼe tokoni ai ki te faʼe ʼo tona ʼohoana ke ina logoʼi ʼe ʼofainaʼi pea mo malohi ʼi te faʼahi fakalaumalie. Kotea te ako ʼe tou taʼofi mai te faʼifaʼitaki ʼo Lute?
10 Kotea ʼae neʼe logoʼi e Sehova ʼi tana logo ki te ʼu palalau neʼe fai e Naomi? Neʼe mole liʼakina e Sehova ia te fafine agatonu ʼaeni neʼe lotomamahi. Kae neʼe ʼofa ia ki ai. Neʼe ina iloʼi “e fakaliliu e te fakataga te tagata poto o vale.” (11. Kotea ʼae ʼe ina uga he ʼu tehina mo tuagaʼane lototokaga ke natou tokoni kia natou ʼae ʼe mamahi?
11 ʼE tokoni mai te ʼofa agatonu ke tou tokoni kia natou ʼe mamahi. Ohage la ko Lute mo Naomi, ʼe fiafia te ʼu tehina mo tuagaʼane lototokaga ʼi te tokoni kia natou ʼe lotovaivai peʼe lotomamahi ʼi te kokelekasio. ʼE natou ʼoʼofa ʼi ʼonatou tehina mo tuagaʼane, pea ʼe natou fia fai ia meʼa fuli moʼo tokoni kia natou. (Taag. 12:25; 24:10) ʼE natou mulimuli ai ki te tokoni ʼaeni ʼa Paulo: “Kotou fai he ʼu palalau fakalotofimalie kia natou ʼae ʼe lotomamahi, mo kotou tokoni ki te kau vaivai, pea mo kataki fualoa ki te hahaʼi fuli.”—1 Tes. 5:14.
12. Kotea te faʼahiga fai ʼe lelei moʼo tokoni ki he tahi ʼe lotovaivai?
12 ʼI te agamahani, ko te faʼahiga tokoni lelei ʼe feala ke tou fai ki he tahi ʼe lotovaivai, ʼe ko tatatou fakalogo fakalelei pea mo tou fakaha ʼe tou ʼofa ia ia. ʼE lotofakafetaʼi anai ia Sehova ki te tokoni ʼae ʼe tou foaki ki he tahi ʼo ʼana kaugana. (Pes. 41:2) ʼE tou lau fenei ia Taaga Lea 19:17: “Ko ia ae e ofa ki ae e masiva e ina foaki [“kia Sehova,” NWT], ae e ina toe liufaki anai kia ia o mulimuli ki tana gaue.”
13. Kotea te ʼu tonu ʼe kehekehe neʼe toʼo e Lute pea mo Olipa? He koʼe neʼe ha te ʼofa agatonu ʼi te tonu ʼae neʼe toʼo e Lute? (Vakaʼi te pāki ʼo te takafi.)
13 ʼE tou mahino lelei ki te fakaʼuhiga ʼo te ʼofa agatonu ʼi tatatou vakaʼi te aluʼaga ʼae neʼe hoko kia Naomi ʼi te hili ʼo te mate ʼo tona ʼohoana pea mo ʼana tama ʼe lua. ʼI te iloʼi ʼae e Naomi ‘neʼe tokaga ia Sehova ki tana hahaʼi ʼaki tana foaki age he meʼa kai,ʼ neʼe ina fakatotonu leva ke toe liliu ki tona fenua. (Lute 1:6) Neʼe kaugā olo mo ia te ʼu fafine ʼe lua ʼae neʼe ʼohoana mo ʼana tama. Kae ʼi tanatou lolotoga faifagona, neʼe tuʼa tolu ia te ui age e Naomi kia naua ke nā toe liliu ki Moape. Kotea ʼae neʼe hoko? ‘Neʼe uma leva ia Olipa ki te faʼe ʼo tona ʼohoana pea alu ai leva, kae neʼe nofo ia Lute pea mo ia.ʼ (Lute 1:7-14) ʼI tanā filifili ke toe liliu ki tonā ʼapi, neʼe fakalogo ia Olipa ki te meʼa ʼae neʼe kole age e Naomi. Kae neʼe fakatotonu malohi e Lute ke lagolago kia Naomi. Neʼe feala pe ke toe liliu mo ia ki tona ʼapi, kae ʼi tona ʼofa agatonu ki te faʼe ʼo tona ʼohoana, neʼe ina filifili ke nā kaugā olo. (Lute 1:16, 17) Kapau neʼe haga lagolago ia Lute kia Naomi he neʼe lotolelei ki ai, kae neʼe mole manatu ia ko he fakamaʼua. Ko te tonu ʼae neʼe toʼo e Lute ʼe ko te fakaha lelei ʼaia ʼo tona ʼofa agatonu. Kotea te ako ʼe tou taʼofi mai te fakamatala ʼaeni?
14. (1) Kotea ʼe feala ke fai e te ʼu tehina mo tuagaʼane ia ʼaho nei? (2) Ia Hepeleo 13:16, kotea te ʼu sakilifisio ʼae ʼe fiafia ki ai ia Sehova?
14 ʼE uga tatou e te ʼofa agatonu ke tou fai ni fakatuʼutuʼu. ʼI te temi nei ohage pe ko te temi muʼa, tokolahi te kau Kilisitiano ʼe natou fakaha ia te ʼofa agatonu ki ʼonatou tehina mo tuagaʼane, maʼia mo natou ʼae ʼe mole natou iloʼi. Ohage la, ka natou iloʼi neʼe hoko he tuʼutamaki fakanatula, ʼe natou foimo fakalavelave pe kotea te tokoni ʼe feala ke natou fai. Pea kapau ʼe tau he tahi ʼi te kokelekasio mo he faigataʼaʼia fakaekonomika, ʼe natou foaki he tokoni ʼaoga. Ohage ko te kau Kilisitiano ʼo Masetonia ʼo te ʼuluaki sekulo, neʼe natou fai ni sakilifisio. ʼI ʼihi temi neʼe natou foaki “ʼo laka age ʼi ʼonatou fealagia” moʼo lagolago kia natou ʼae ʼe ʼaoga ki ai he tokoni. (2 Ko. 8:3) ʼE mahino ia, neʼe fiafia ia Sehova ʼi tanatou lotofoaki.—Lau ia Hepeleo 13:16.
ʼE TOU LAVA FAKAHA FEAFEAʼI TE ʼOFA AGATONU KI ʼIHI?
15-16. Neʼe faʼa kataki feafeaʼi ia Lute?
15 ʼE feala ke tou taʼofi ni ako maʼuhiga mai te faʼahiga tokaga ʼa Lute kia Naomi. Tou vakaʼi te ʼu ako ʼaia.
16 Ke ke faʼa kataki. ʼI te temi ʼae neʼe fakaha age ai e Lute ʼe fia nofo mo ia ʼi Suta, neʼe ʼuluaki fakafisi age ia Naomi. Kae neʼe mole lotovaivai ia Lute. Kotea ʼae neʼe hoko? “I tana sio kua tuu malohi te loto o Lute ke alu mo ia, nee tuku leva e Naomi tana fakamalohii ia ia ke nofo.”—Lute 1:15-18.
17. Kotea ʼae ka tokoni atu ke ʼaua naʼa ke lotovaivai vave?
17 Te ako: ʼE tonu ke tou faʼa kataki moka tou tokoni ki he tahi ʼe lotomamahi. Koia, ʼaua naʼa tou lotovaivai vave. ʼI te kamata, ʼe lagi fakafisi mai anai he tuagaʼane * ʼe tau mo he ʼu aluʼaga faigataʼa ki te tokoni ʼae ʼe tou foaki age. Kae ʼe uga anai tatou e te ʼofa agatonu ke hoko atu tatatou tokoni ki ai. (Kal. 6:2) Ke tou loto falala ʼe hoko mai anai he temi, ʼe ina tali anai te tokoni ʼae ʼe tou foaki age.
18. Kotea te ʼu palalau neʼe fai e Naomi neʼe mamahi ai te loto ʼo Lute?
18 ʼAua naʼa ke hoko ita. ʼI te temi ʼae neʼe tau ai ia Naomi mo Lute ki Petelehemi, neʼe toe felaveʼi ai ia Naomi mo ʼona vahaʼa fale. Neʼe ina fakamatala fenei age: “Nee au mau koloa i taku mavae i heni, pea kua fakaliliu mai au e [“Sehova,” NWT] mo oku nima atea.” (Lute 1:21) Tou fakakaukauʼi age pe kotea ʼae neʼe logoʼi e Lute ʼi tana logo ki te palalau ʼaia ʼa Naomi. Neʼe fai e Lute ia meʼa fuli moʼo tokoni kia Naomi. Neʼe nā kaugā fetagihi, neʼe ina fakalotofimalieʼi ia ia pea neʼe nā kaugā haʼele lalo lolotoga ni ʼaho. Kae logo la te ʼu faʼahi fuli ʼaia, neʼe ui fenei e Naomi: “Kua fakaliliu mai au e [“Sehova,” NWT] mo oku nima atea.” Neʼe mole palalau pe la ki te tokoni ʼae neʼe foaki age e Lute, ʼae neʼe nofo ʼi ʼona tafa. Neʼe lagi mamahi ai te loto ʼo Lute. Kae neʼe hoko atu pe tana pipiki kia Naomi.
19. Kotea ʼae ʼe tokoni mai ke ʼaua naʼa tou lituʼa ki he tahi ʼe fakafisi mai ki te tokoni ʼae ʼe tou foaki age?
19 Te ako. ʼE feala ki he tuagaʼane ʼe tau mo he aluʼaga faigataʼa ke ina fai ni palalau ʼe feala ke tou mamahi ai, logo ai te ʼu faiga fuli neʼe tou fai moʼo tokoni ki ai. Kae ʼaua naʼa ke hoko ita. ʼAua naʼa ke lituʼa ki ai kae ke ke kole kia Sehova ke tokoni atu ke ke iloʼi he faʼahiga fakalotofimalieʼi ʼo ia.—20. Kotea ʼae neʼe tokoni kia Lute ke ina maʼu ia te malohi moʼo haga fai ia te meʼa ʼae ʼe lelei?
20 Fakalotomalohi he tahi ʼe ke sio ʼe ʼaoga ki ai. Neʼe fakaha e Lute ia te ʼofa agatonu kia Naomi, kae neʼe toe ʼaoga foki ki ai he fakalotomalohi. Koia neʼe uga ai e Sehova ia Poase ke ina fakalotomalohiʼi ia ia. Neʼe ui fenei age e Poase kia Lute: “Ke totogi e [“Sehova,” NWT] au gaue kia te koe, pea ke foaki atu he totogi lahi kia te koe e [“Sehova,” NWT], te Atua o Iselaele, ae kua ke hau o nono i lalo o ona kapakau!” Neʼe malave kia Lute te ʼu palalau fakalotofimalie ʼaia. Neʼe tali fenei age e Lute: “Kua ke fakapelepelei toku loto, pea kua ke palalau ki te loto o tau fafine faifekau.” (Lute 2:12, 13) Neʼe fai e Poase te ʼu palalau matamatalelei ʼaia ʼi tona temi totonu. Pea neʼe maʼu ai e Lute te malohi moʼo haga fai ia te meʼa ʼae ʼe lelei.
21. Ia Esaia 32:1, 2, kotea ʼae ʼe tonu ke tokaga ki ai te kau tagata ʼafeā?
21 Te ako. Ko natou ʼae ʼe natou fakaha te ʼofa agatonu ki ʼihi, ʼe toe ʼaoga ʼi ʼihi temi kia natou he ʼu fakalotomalohi. Ohage ko tona fakaha e Poase kia Lute, ʼe mole ugia tona lotoʼofa, koia ʼe tonu ai ke mata poto te kau tagata ʼafeā pea mo foaki he fakamalo kia natou ʼae ʼe natou foaki he tokoni ki ʼihi. Ko he ʼu fakalotomalohi ʼi tona temi totonu, ʼe ina foaki he malohi ki te ʼu tehina mo tuagaʼane ke natou haga fai ia te meʼa ʼae ʼe lelei.—Lau ia Esaia 32:1, 2.
KOTEA TE ʼU FUA LELEI ʼE MAʼU E NATOU ʼAE ʼE NATOU FAKAHA IA TE ʼOFA AGATONU?
22-23. Neʼe ha feafeaʼi ia Naomi kua fetogi tana faʼahiga manatu? Pea kotea tona tupuʼaga? (Pesalemo 136:23, 26)
22 Mole faʼa fualoa ki ai, neʼe tokaga ia Poase ke tanaki e Lute he ʼu tuʼuga fulumeto maʼa ia pea mo te faʼe ʼo tona ʼohoana. (Lute 2:14-18) Kotea ʼae neʼe logoʼi e Naomi ʼi te fakaha e Poase tana lotofoaki? Neʼe ina ui fenei: “Ke tapuakina ia ia e [“Sehova,” NWT], ia ia ae e manavaofa kia natou ae e mauli o hage ko tona manavaofa kia natou ae kua mamate!” (Lute 2:20, ʼuluaki koga) Neʼe fetogi ia te manatu ʼa Naomi. Ki muʼa atu, neʼe ina ui fenei ʼaki he lotomamahi: “Kua siaki au e [“Sehova,” NWT]. Pea ki muli age, neʼe kalaga fakafiafia fenei: ‘Neʼe mole taʼofi e Sehova tona ʼofa agatonu.ʼ Kotea ʼae neʼe tupu ai te fetogi ʼo tana manatu?
23 Neʼe mahino ai ia Naomi neʼe tokoni age ia Sehova. Neʼe fakaʼaogaʼi e Sehova ia Lute ke tokoni ki ai ʼi tana toe liliu ki tona fenua. (Lute 1:16) Neʼe toe mahino ai ia Naomi neʼe fakaʼaogaʼi e Sehova ia Poase moʼo tokoni kia ia pea mo Lute. (Lute 2:19, 20, lua koga) Neʼe lagi ina ui ‘kua au mahino leva neʼe mole liʼaki au e Sehova. Talu mai te kamata, neʼe tokoni tuʼumaʼu mai.ʼ (Lau ia Pesalemo 136:23, 26.) ʼE mahino ia, neʼe lotofakafetaʼi ia Naomi kia Lute pea mo Poase ʼae neʼe hoko atu pe tanā tokoni kia ia. Tou fakakaukauʼi age te toe fiafia neʼe logoʼi e te toko tolu ʼaeni.
24. He koʼe ʼe tou fia haga fakaha ia te ʼofa agatonu ki ʼotatou tehina mo tuagaʼane?
24 Kotea te ako ʼe tou taʼofi mai te tohi ʼo Lute ʼo ʼuhiga mo te ʼofa agatonu? ʼE uga tatou e te ʼofa agatonu ke ʼaua naʼa tou taʼofi tatatou tokoni ki te ʼu tehina mo tuagaʼane ʼae ʼe tau mo ni aluʼaga faigataʼa. ʼE ina uga tatou ke tou fai ni sakilifisio moʼo tokoni kia natou. ʼE tonu ke mata poto te kau tagata ʼafeā pea mo fakalotomalohiʼi ia natou ʼae ʼe natou fakaha ia te ʼofa agatonu ki ʼihi. Ka tou tokagaʼi he tahi neʼe tou tokoni ki ai kua toe malohi ʼi tana tauhi kia Sehova, ʼe tou logoʼi he fiafia lahi. (Gaue 20:35) Kotea leva te tupuʼaga tafito ʼo tatatou haga fakaha ia te ʼofa agatonu? Koteʼuhi ʼe tou fia faʼifaʼitakiʼi pea mo fakafiafiaʼi ia Sehova, ʼae ʼe ‘mahu ʼi te ʼofa agatonu.ʼ—Eke. 34:6; Pes. 33:22.
KATIKO 130 Tou Lotofakamolemole
^ pal. 5 ʼE kole mai e Sehova ke tou fakaha te ʼofa agatonu ki ʼotatou tehina mo tuagaʼane. Kapau ʼe tou fia mahino lelei ki te kalitate ʼaia, ʼe tou vakaʼi anai pe neʼe fakaha feafeaʼi e he ʼu kaugana ʼa te ʼAtua ʼo te temi muʼa ia te kalitate ʼaia. ʼE tou toe vakaʼi anai pe kotea te ako ʼe tou taʼofi mai te faʼifaʼitaki ʼo Lute, mo Naomi pea mo Poase ʼo ʼuhiga mo te kalitate ʼaia.
^ pal. 8 Kapau ʼe ke fia mahino lelei age ki he ʼu ako ʼi te alatike ʼaeni, ʼe fakalotomalohiʼi koe ke ke lau te ʼu kapite 1 pea mo 2 ʼo te tohi ʼo Lute.
^ pal. 17 ʼE tou toʼo te faʼifaʼitaki ʼo te tuagaʼane koteʼuhi ʼe tou lolotoga palalau kia Naomi. Kae ʼe toe ʼaoga te ʼu tokoni ʼaeni ki he tehina ʼe tau mo he faigataʼaʼia.