NEʼE au tupu ʼi te taʼu 1934. ʼI te temi ʼaia, neʼe kua kau ʼaku matuʼā, ko Fred mo Edna Molohan, ki te kau Ako ʼo Te Tohi-Tapu (te Kau Fakamoʼoni ʼa Sehova) talu mai taʼu ʼe 20. ʼE au fiafia he neʼe nā akoʼi au ke au ʼofa kia Sehova. Neʼe matou maʼuʼuli ʼi te kiʼi kolo ko Parsons ʼi te potu saute esite ʼi Kansas. Teitei pe ko te ʼu tehina mo tuagaʼane ʼo tomatou kokelekasio neʼe ko he kau fakanofo. Neʼe matou kau tuʼumaʼu ki te ʼu fono mo te gaue faifakamafola. Neʼe ko hamatou agamahani ko te faifakamafola ʼi te ala ʼi te ʼu Moeaki hili hoʼata. Pea ʼi te temi nei, ko te faʼahiga faifakamafola ʼaia ʼe fai ʼi te ʼu koga meʼa ʼae ʼe kaugā malie ai te hahaʼi. ʼI ʼihi temi neʼe matou gaʼegagaʼe ai, kae neʼe toʼo tuʼumaʼu e Papa ʼamatou foʼi sope moka ʼosi te faifakamafola.

Neʼe lahi te telituale ʼo tomatou kiʼi kokelekasio, he neʼe ʼi ai te ʼu kiʼi kolo liliki pea mo te ʼu fale gaue kele. Neʼe totogi tuʼumaʼu e ʼihi tagata gaue kele te ʼu tohi ʼae neʼe matou tuku age ʼaki he ʼu lauʼakau, he ʼu fuaʼi moa (neʼe hoki tae age pe ʼi te ʼu fatai), peʼe ko he ʼu moa maʼuli. Neʼe kua totogi e Papa ia te ʼu tohi, koia neʼe ʼaoga ai te ʼu meʼa kai ʼaia ki tomatou kiʼi famili.

Neʼe ʼi ai te fakatagi ʼo ʼaku matuʼā neʼe nā fakaʼaogaʼi ʼi te faifakamafola. Neʼe mole feala haku fakaʼaogaʼi he neʼe kei au veliveli. Kae lolotoga te ʼu ʼaʼahi pea mo te ʼu ako Tohi-Tapu, neʼe au fiafia ʼi te tokoni ki ʼaku matuʼā moʼo fakahaʼele te ʼu akonaki ʼa te tehina ko Rutherford ʼae neʼe puke.

Neʼe haʼi e Papa he meʼa ʼi te fuga motoka moʼo fakaleʼo lahi te fakatagi pea neʼe liliu ai tamatou motoka ko he motoka fakatagi. Neʼe ko he meʼa lelei ki te faifakamafola. ʼI te agamahani, ʼe fakahaʼele muʼa he kiʼi musika ke tokagaʼi e te hahaʼi, pea matou ʼai leva he akonaki Fakatohi-tapu. Hili ia pea matou foaki he ʼu tohi kia natou ʼae ʼe natou fia tali lelei.

ʼI te ʼu ʼAhotapu neʼe alu ia Papa mo te motoka fakatagi ki te haʼeleʼaga ʼo te kiʼi kolo veliveli ʼo Cherryvale, ʼi Kansas, he ʼe ko te tokolahi neʼe malolo ʼi ai. Pea neʼe ʼomai leva te kau polisi ʼo ui age ʼe feala  pe tana fakahaʼele tana motoka fakatagi ʼi tuʼa ʼo te haʼeleʼaga. Neʼe ʼave leva e Papa te motoka ʼo tau ʼi te ʼala ʼe ovi mai pe ki te haʼeleʼaga ke feala he fakalogo ʼa te hahaʼi ki te polokalama. Neʼe au leleiʼia tuʼumaʼu ʼamatou olo feia mo Papa pea mo toku tehina lahi, ia Jerry.

Lolotoga te ʼu taʼu ʼaia, neʼe matou kau ki te ʼu faifakamafola makehe ʼi te ʼu koga meʼa neʼe lahi ai te fakafeagai ʼa te hahaʼi. Ohage pe ko taku fakaha ʼi te kamata, ʼe matou tutuʼu kei poʼuli ʼo olo mo te ʼu kiʼi pepa lotu peʼe ko he ʼu kaupepa lalahi ʼo ʼai fakafufu ki te ʼu lalo matapa ʼo te ʼu ʼapi. Hili ia, pea matou fakatahitahi ʼi te tuʼa kolo moʼo vakaʼi pe neʼe puke he tahi e te kau polisi.

Ko te tahi faʼahiga faifakamafola, neʼe ko te haʼele mo te ʼu pano. Neʼe matou tui he ʼu pano lalahi pea neʼe matou haʼele ʼi he loto kolo. ʼE au manatuʼi ʼi te tahi temi neʼe haʼele te ʼu tehina mo he ʼu pano ʼe tohi ai “Ko Te Lotu ʼe Ko He Hele Pea Ko He Kaka.” Neʼe kamata tanatou haʼele ʼi tomatou ʼapi, ʼo natou haʼele ia teitei kilometa ʼe lua ʼi te loto kolo, pea natou toe liliu mai ki fale. Ko te meʼa lelei, neʼe mole he tahi ia natou neʼe puke, kae neʼe hahaʼi ia natou neʼe natou fia iloʼi pe kotea ʼae neʼe lolotoga hoko.

Ko toku famili neʼe olo tuʼumaʼu ki te ʼu fakatahi lalahi ʼi Texas. Neʼe gaue ia Papa ʼi te sosiete faʼu ala ki te ʼu saliote afi. Koia la ʼae neʼe mole totogi ai ʼamatou feoloʼaki ʼi te saliote afi ki te ʼu fakatahi lalahi pea mo haʼele ki ʼomatou kaiga. Ko te tokolua lahi ʼo Mama, ia Fred Wismar pea mo tona ʼohoana ko Eulalie, neʼe maʼuʼuli ʼi Temple ʼi Texas. Pea ko Fred, taku Faʼe Tagata, neʼe ina iloʼi te moʼoni hili te taʼu 1900 kae kei tupulaga. Neʼe papitema, pea neʼe palalau ki te ʼu faʼahi neʼe ina ako ki ʼona tehina mo tuagaʼane, ʼo kau ai mo taku faʼe. Ko te ʼu tehina ʼo te loto Texas neʼe natou iloʼi lelei taku Faʼe Tagata ia Fred he neʼe ko he tagata taupau fakafenua (ʼi te temi nei kua higoa ko te tagata taupau ʼo te siliko). Neʼe agalelei, mo fiafia, mo faʼafai ʼi te moʼoni pea neʼe ko he faʼifaʼitaki lelei kia au.

ʼI te taʼu 1941, neʼe matou olo ʼi te saliote afi ki St. Louis, ʼi Missouri, ʼo kau ki he fakatahi lahi. Neʼe fakaafe te kau tupulaga fuli ke natou heheka fakatahi ʼi muʼa ʼo fakalogo te akonaki ʼa te tehina ko Rutherford “ Enfants du Roi ” (Fanau ʼo Te Hau). ʼI te ʼosi ʼo tana akonaki, neʼe punamaʼuli te toko 15 000 kau tupulaga. Ko te tehina ko Rutherford pea mo natou ʼae neʼe tokoni ki ai, neʼe natou foaki mai kia matou takitokotahi te tohi foʼou Enfants.

ʼI Apelili 1943, neʼe matou kau ki te Fakatahi Lahi “ Appel à l’action ” ʼi Coffeyville, ʼi Kansas. Pea ʼi ai, neʼe tala ifo ʼe fai anai ʼi te ʼu kokelekasio fuli te ako foʼou, ko te Ako Fakateokalatike. Neʼe toe tufa mo te kaupepa lahi ʼe maʼu ai te ʼu ako ʼe 52 pea neʼe matou fakaʼaogaʼi ʼi te ako ʼaia. Ki muli age ʼo te taʼu pe ʼaia, neʼe au fai ai taku ʼuluaki faipalalau. Kae neʼe makehe te fakatahi lahi ʼaia kia au, he neʼe au papitema mo ʼihi ʼi he liuʼa ʼe momoko. Pea ʼe tuʼu fakatahi te liuʼa ʼaia mo te fale gaue kele neʼe tuʼu ovi age pe.

ʼI te ʼosi ʼo taku ako ʼi te lise ʼi te 1951 neʼe maʼua leva ke au fakakaukauʼi toku ka haʼu. Ko toku tehina ko Jerry neʼe kua lolotoga gaue ia ʼi te Petele. Neʼe au toe fia alu mo au ʼo gaue ʼi te Petele, koia neʼe au fai ai taku kole ke au gaue ʼi ai. Mole fualoa, neʼe fakaafe au ke au alu ʼo gaue ʼi te Petele ʼo au kamata ai ʼi te ʼaho 10 ʼo Malesio 1952. Neʼe ko he tonu ʼe lelei he neʼe tokoni mai ke au tauhi ki te ʼAtua ʼo lahi age.

Neʼe au fakaʼamu ke au gaue ʼi te fale ta tohi ke au tokoni ki te ta ʼo te ʼu nusipepa pea mo ʼihi tohi. Kae neʼe hinoʼi au ke au gaue ʼi te fale kai pea ki muli age ʼi te fale kuka. Neʼe au fiafia ʼi te gaue ʼaia he neʼe lahi te ʼu ako neʼe au maʼu ai. Neʼe feala ʼaki te ʼu hola ʼae neʼe au gaue ai ʼi te fale kuka, ke au maʼu he temi moʼo fai taku ako tokotahi ʼi te tanakiʼaga tohi ʼo te Petele. Neʼe tokoni te faʼahi ʼaia ke malohi ai taku tui pea mo ʼaku felogoi mo Sehova. Neʼe au fakatotonu leva ke toe lahi age taku tauhi kia Sehova ʼi te Petele lolotoga te temi ʼae ʼe kei au fealagia ai. Neʼe mavae ia Jerry ʼi te Petele ʼi te 1949 pea neʼe ʼohoana mo Patricia, kae neʼe nonofo ovi mai pe ʼi Brooklyn. Pea neʼe nā tokoni mo fakalotomalohiʼi au lolotoga te temi ʼae neʼe kei au foʼofoʼou ai ʼi te Petele.

ʼE mole faʼa fualoa ki taku tau atu ki te Petele, neʼe kamata kumi leva e te kautahi he kau Petelite ke natou kau ki te ʼu tehina faiakonaki ʼi muʼa ʼo te  kaugā malie. Ko te ʼu tehina faiakonaki ʼaia neʼe hinoʼi ke olo ʼo ʼaʼahi he ʼu kokelekasio ʼe tuʼu mamaʼo ʼi Brooklyn ia kilometa ʼe 320. ʼI ai, ʼe natou fai anai he akonaki ki te kaugā malie pea natou faifakamafola fakatahi mo te kokelekasio. Neʼe au kau ʼi te ʼu tehina ʼaia. Neʼe au lotohoha ʼi taku kamata fai ʼaku akonaki pea mo taku ʼaʼahi te ʼu kokelekasio. ʼI te temi ʼaia neʼe hola katoa te akonaki. Neʼe au fealuʼaki ʼi te saliote afi moʼo ʼaʼahi te ʼu kokelekasio. ʼE kei au manatuʼi lelei pe te ʼAhotapu hili hoʼata ʼo te taʼu 1954 ʼi te temi momoko. Neʼe au toʼo te saliote afi ʼae neʼe tonu ke au toe liliu ai ki New York pea mo tau ki te Petele ʼi te afiafi. Kae ʼi te liliu, neʼe ʼi ai te afā ʼo lalahi ai te ʼu tuʼani matagi pea mo te nive. Neʼe mate ai te masini ʼo te saliote afi, pea neʼe hoki au tau ki te Kolo ko New York ʼi te Monite ʼi te hola nima uhu. Neʼe au toʼo ai leva te tahi saliote afi ʼe alu ki Brooklyn pea neʼe au alu atu aipe ʼo gaue ʼi te fale kuka. Neʼe au tauhala pea neʼe lahi toku gaʼegaʼe he neʼe mole au moe ʼi te po katoa ʼaia. Kae ko te fiafia ʼae neʼe au maʼu ʼi taku tokoni ki te ʼu kokelekasio mo taku felaveʼi mo te ʼu tehina mo tuagaʼane foʼou, neʼe lahi age ia ʼi te ʼu sakilifisio ʼae neʼe au fai.

Lolotoga te ʼu ʼuluaki taʼu ʼae neʼe au gaue ai ʼi te Petele, neʼe au kau ki te polokalama ako Tohi-Tapu ʼae neʼe fagonogono ʼi te vahaʼa fuli ʼi tatatou fale latio ʼae ko te WBBR. Neʼe tuʼu te ʼu fale puke leʼo ʼi te lua fata ʼo te fale fata ʼae ʼo te 124 Columbia Heights. Ko te tehina ko Alexander H. Macmillan ʼae neʼe gaue ʼi te Petele lolotoga he ʼu taʼu, neʼe kau tuʼumaʼu ki te ʼu polokalama ʼaia. Neʼe matou fakahigoaʼi ia ia ko tehina Mac. Neʼe ko he faʼifaʼitakiʼaga lelei kia matou kau tupulaga ʼi te Petele koteʼuhi neʼe nofo agatonu logo la ʼona faigataʼaʼia.

ʼI te 1958, neʼe hinoʼi au ki he tahi gaue ʼe pipiki tahi mo te Ako ʼo Kileate. Neʼe tonu ke au tokoni ki te hahaʼi tagata mo fafine faʼafai ʼaia ke natou maʼu hanatou ʼu pepa fakagafua pea mo fakatuʼutuʼu ia tanatou olo leva ʼae ki te ʼu fenua ʼae neʼe hinoʼi natou ki ai. Neʼe totogi kovi te vakalele, koia tokolahi te kau misionea ʼae neʼe olo ki Afelika pea mo Asia, neʼe natou toʼo te sitima. ʼI ni taʼu ki muli age, ʼuhi ko tona kua totogi lelei, tokolahi te kau misionea neʼe natou toʼo te vakalele ke natou olo ki te ʼu koga meʼa ʼae neʼe hinoʼi natou ki ai.

ʼI te 1960, neʼe kole mai ke au lue he ʼu vakalele ʼe ina ʼave anai te ʼu tehina mo tuagaʼane mai Amelika ki te ʼu fakatahi fakamalamanei ʼi Eulopa ʼi te 1961. Neʼe au toʼo te vakalele ʼae neʼe alu mai New York ki Hambourg, ʼi Siamani. ʼI te ʼosi ʼo te fakatahi, neʼe au lue mo ʼihi tehina ʼo te Petele te motoka. Neʼe matou fakalaka ʼi Siamani ke matou olo ʼo ʼaʼahi te Petele ʼo Loma ʼi Italia. Hili ia, neʼe matou olo leva ki Falani, ki te ʼu Pyrénées, pea mo Sepania ʼae neʼe tapuʼi ai tatatou gaue. Neʼe feala ai ke matou fakatoʼo ki te ʼu tehina ʼo Barcelone he ʼu tohi neʼe kofukofu ohage ko he ʼu meʼa ʼofa. Neʼe ko he meʼa fakafiafia ia tamatou felaveʼi ʼaia. ʼOsi ʼaia, pea matou olo ai leva ki Amsterdam pea matou toʼo te vakalele ke matou toe liliu ki New York.

ʼI te 1962, neʼe kole mai ke au fakatuʼutuʼu te ʼu faifolau ʼo te ʼu fakatahi fakamalamanei ki te malamanei katoa. Pea neʼe ko tehina mo tuagaʼane ʼe  toko 583 ʼae neʼe kau ki ai. Neʼe ko te fakatahi lahi ʼo te 1963 “ La bonne nouvelle éternelle ” (Te Logo Lelei ʼe Heʼe Gata). Neʼe olo ai te kau teleke ki te ʼu fakatahi lalahi ʼae neʼe fai ʼi Eulopa, Asia, Pasifika Saute, Honolulu, ʼi Hawaii pea mo Pasadena ʼi Californie. Neʼe natou olo foki ʼo haʼele ʼi te ʼu fenua ʼae ʼe talanoa ki ai te Tohi-Tapu. Ko te gaue ʼo te selevisi ʼae neʼe kau ai, ko te taʼofi ʼo te ʼu lapalasi ʼi te ʼu vakalele pea mo he ʼu koga fale ʼi te ʼu otele, ʼo toe feia mo te maʼu ʼo te ʼu pepa fakagafua.

Neʼe maʼuhiga ʼaupito kia au te taʼu 1963. Neʼe au ʼohoana ʼi te ʼaho 29 ʼo Sunio mo Lila Rogers, ko te tuagaʼane ʼe haʼu mai Missouri pea neʼe gaue ʼi te Petele talu mai te taʼu 1960. Hili te vahaʼa katoa ki toma ʼohoana, neʼe ma folau ʼo foliʼi te malamanei katoa ʼo ma olo ai ki Keleka, Esipito pea mo Lipane. ʼOsi ʼaia pea ma folau ki Jordanie. Kae ʼi ai neʼe fakatuʼakoi tatatou gaue, pea ko te kau takitaki neʼe mole natou foaki he ʼu pepa fakagafua ki te Kau Fakamoʼoni ʼa Sehova. Pea matou feʼekeʼaki pe kotea anai ka hoko moka matou tau atu. Kae neʼe matou fiafia mo punamaʼuli ʼi tamatou sisio ki he ʼu tehina mo tuagaʼane neʼe olo age ʼo tali matou pea mo te kie laulahi ʼe tohi ai “Malo siʼi faifolau ʼa te Kau Fakamoʼoni ʼa Sehova.” Neʼe ko he meʼa fakaofoofo ia tamatou mamata te ʼu koga fenua ʼae neʼe maʼuʼuli ai ia Apalahamo, Isaake, pea mo Sakopo, neʼe toe faifakamafola ai ia Sesu pea mo ʼana apositolo. Pea ko te ʼu potu fenua ʼaia neʼe kamata mafola ai te lotu Fakakilisitiano “ ʼo kaku ki te ʼu potu taupotu ʼo te kele.”—Gaue 13:47.

Lolotoga taʼu ʼe 55, ko Lila neʼe ko toku kaumeʼa lelei mo agatonu ʼi te ʼu gaue fuli ʼae neʼe hinoʼi au ki ai. Neʼe ma ʼaʼahi tuʼa lahi ia Sepania mo Potukalia ʼi te temi ʼae neʼe tapuʼi ai tatatou gaue. Neʼe ma fakalotomalohiʼi te ʼu tehina mo tuagaʼane pea neʼe ma foaki kia natou he ʼu tohi pea mo ʼihi meʼa neʼe ʼaoga kia natou. Neʼe toe feala tamā ʼaʼahi te ʼu tehina neʼe pilisoni ʼi Cadix ʼi Sepania. Neʼe lahi toku fiafia he neʼe feala ke au fakalotomalohiʼi natou.

Talu mai te taʼu 1963, neʼe au teuteuʼi te ʼu folau ki te ʼu fakatahi fakamalamanei ʼi Afelika, ʼOsitalalia, ʼi te Lotomalie ʼo Amelika pea mo te potu Saute ʼo Amelika, mo Eulopa, mo te ʼu fenua Asia, Hawaii, Niusila, mo Porto Rico. Neʼe ma kau mo Lila ki te ʼu fakatahi lalahi ʼe mole feala anai ke ma galoʼi, ohage la ko te fakatahi lahi ʼi Varsovie, ʼi Pologne, ʼi te taʼu 1989. Neʼe lahi te ʼu tehina mai Lusia neʼe feala tanatou kau ki te fakatahi lahi ʼaia. Neʼe ko tanatou hoki kau ʼae ki he fakatahi lahi. Pea neʼe ma felaveʼi mo te ʼu tehina mo tuagaʼane neʼe pilisoni ʼi Union soviétique lolotoga he ʼu taʼu ʼuhi ko tanatou tui.

Neʼe au leleiʼia taku tahi gaue, ko te ʼaʼahi mo te fakalotomalohiʼi ʼo te ʼu famili ʼo te ʼu Petele mo te kau misionea ʼo te malamanei. ʼI tamā ʼaʼahi fakamuli, neʼe ma fai ki Kolea Saute ʼo ma felaveʼi ai mo te ʼu tehina ʼe toko 50 neʼe pilisoni ʼi Suwon. Neʼe natou maʼu fuli he ʼu manatu ʼe lelei mo natou fakaʼamu ke natou toe tauhi faʼifaʼitaliha kia Sehova. Ko tamatou felaveʼi ʼaia neʼe fakalotomalohi kia maua.—Loma 1:11, 12.

Neʼe au sio ki te tapuakinaʼi e Sehova tana hahaʼi lolotoga he ʼu taʼu. ʼI taku papitema ʼi te taʼu 1943,  neʼe ko te teitei toko 100 000 kau faifakamafola. Ia ʼaho nei kua toko valu miliona tupu te Kau Fakamoʼoni ʼa Sehova ia fenua ʼe 240. Ko te ʼu tehina mo tuagaʼane ʼae neʼe kau ki te ako ʼi Kileate neʼe tokoni lahi ki te tuputupu ʼaia. Ko he meʼa fakafiafia lahi taku kaugā gaue mo te tokolahi ʼo te kau misionea pea mo taku tokoni ki tanatou olo ki te ʼu fenua ʼae neʼe hinoʼi natou ki ai.

ʼE au fiafia ʼi taku fakaʼaogaʼi toku maʼuli mo toku temi tupulaga moʼo tauhi kia Sehova pea mo gaue ʼi te Petele. Neʼe tapuakinaʼi au e Sehova lolotoga te ʼu taʼu ʼaia. Mole gata pe toma fiafia ʼi tamā gaue ʼi te Petele, kae neʼe ma toe fiafia mo Lila ʼi tamā faifakamafola mo te ʼu kokelekasio ʼo Brooklyn lolotoga taʼu ʼe 50 tupu pea neʼe lahi ʼoma kaumeʼa lelei.

ʼE kei au gaue pe ʼi te Petele pea ʼe lagolago mai pe ia Lila ʼi te ʼaho fuli. Ia ʼaho nei logo la kua au taʼu 84, kae ʼe au fiafia he ʼe kei au gaue pe ʼo au tokaga ki te ʼu tohi ʼae ʼe momoli mai peʼe fakahu ki te fale meli.

Ko he toe fiafia lahi takita kau ki te kautahi fakaofoofo ʼa Sehova pea kita sio ki te moʼoni ʼo te ʼu palalau ʼaeni ’a Malakia 3:18: “E koutou toe sio anai ki te kehekehe o te tagata agatonu mo te tagata agakovi, o ae e tauhi ki te Atua pea mo ae e mole tauhi kia ia.” ʼI te ʼaho fuli pe ʼe tou sio ai ki te kovi ʼaupito ʼo te malama ʼa Satana. Pea ko te hahaʼi ʼae ʼi ʼotatou tafaʼaki ʼe mole hanatou ʼamanaki pea ʼe mole natou fiafia. Kae ʼe tatau aipe te kua faigataʼa ʼo te maʼuli, ko natou ʼae ʼe ʼofa mo tauhi kia Sehova ʼe natou fiafia, pea ʼe ʼi ai tanatou ʼamanaki ki te ka haʼu. Koia, ʼe ko he pilivilesio moʼoni te fakamafola ʼo te logo lelei ki te hahaʼi. (Mateo 24:14) Kua vave pe te fetogi e te Puleʼaga ʼo te ʼAtua ia te malama ʼafeā ʼaeni ʼaki te palatiso. Kua tou fakaʼamu ke hoko mai la te ʼaho ʼaia. Pea ko te ʼu kaugana ʼa Sehova ʼe natou haohaoa fuli anai, mo fiafia, pea mo maʼuli anai ʼo talu ai.