1, 2. (1) Kotea te gaue ʼae neʼe fakamuʼamuʼa e Sesu, pea kotea tona tupuʼaga? (2) Kotea ʼae ʼe tonu ke tou fai ke tou “kaugā gaue mo te ʼAtua”?

KO SESU KILISITO neʼe ko he tagata tufuga ʼakau pea neʼe liliu ki muli age ko he tagata faiako. (Maleko 6:3; Soane 13:13) Neʼe ina fai leleiʼi te ʼu gaue ʼaia ʼe lua. ʼI tona ʼuhiga tagata tufuga ʼakau, neʼe poto ʼi te fakaʼaogaʼi ʼo ʼana meʼa gaue moʼo faʼu he ʼu meʼa ʼaki te papa. Pea ʼi tona ʼuhiga tagata faiako, neʼe ina fakaʼaogaʼi lelei tona ʼatamai malama moʼo akoʼi te hahaʼi ʼae neʼe mole ako ke natou mahino ki te ʼu moʼoni ʼo te Folafola ʼa te ʼAtua. (Mateo 7:28; Luka 24:32, 45) ʼI tona taʼu 30, neʼe mole kei tufuga ʼakau ia Sesu kae neʼe liliu ko he tagata faiako he neʼe ina iloʼi neʼe ko te gaue maʼuhiga pe ʼaia ʼe tahi neʼe feala ke ina fai. Neʼe ina ui, ko te tupuʼaga ʼo tona fekauʼi mai e te ʼAtua ki te kele ko te fakamafola ʼo te logo lelei ʼo te Puleʼaga ʼo te ʼAtua. (Mateo 20:28; Luka 3:23; 4:43) Neʼe fakamuʼamuʼa e Sesu te fakamafola ʼo te logo lelei, pea neʼe ina loto ke toe fai feia e ʼihi.—Mateo 9:35-38.

² ʼE moʼoni, ʼe lagi mole ko tatou ko he ʼu tufuga ʼakau, kae ʼe tou faiako fuli he ʼe tou akoʼi te logo lelei ki te hahaʼi. Ko te gaue ʼaia ʼe maʼuhiga ʼaupito he ʼe tou liliu ai ʼo “kaugā gaue mo te ʼAtua.” (1 Kolonito 3:9; 2 Kolonito 6:4) Pea ʼe tou manatu tahi mo te tagata faipesalemo ʼi tana ui fenei: “Ko te fakatafito o tau  folafola ko te mooni.” (Pesalemo 119:159, 160) Ko te folafola ʼa Sehova ʼe ko te moʼoni. Koia la ʼae ka tou faifakamafola ʼe tou tokakaga anai ʼo “fakaʼaogaʼi lelei te folafola ʼo te moʼoni.” (Lau ia 2 Timoteo 2:15.) Tou faiga tuʼumaʼu ke tou fakaʼaogaʼi lelei te Tohi-Tapu, he ʼe ko tatatou meʼa gaue tafito ʼaia moʼo akoʼi te hahaʼi ʼo ʼuhiga mo Sehova, mo Sesu, pea mo te Puleʼaga. ʼE tokoni mai te kautahi ʼa Sehova ʼo ina foaki mai he tahi ʼu meʼa gaue ke tou faiva ai ʼi te faifakamafola. Pea ʼe toe ʼaoga foki ke tou iloʼi pe ʼe feafeaʼi tonatou fakaʼaogaʼi pea ʼe tou maʼu te ʼu meʼa gaue ʼaia ʼi ʼatatou Meʼa Gaue Ki Te Faiako.

3. Kotea te fakatuʼutuʼu ʼae ʼe tonu ke tou fai ʼi te faifakamafola, pea ʼe tokoni feafeaʼi mai ia Gaue 13:48 ke tou fakahoko te faʼahi ʼaia?

³ ʼE lagi ke feʼekeʼaki pe koʼe ʼe tou ui Meʼa Gaue Ki Te Faiako kae mole tou ui Meʼa Gaue Ki Te Faifakamafola. Koteʼuhi ko te “faifakamafola” ʼe fakaʼuhiga ki te tala ʼo he logo, kae ko te “faiako,” ʼe ko te fakamahino ʼo te logo ʼaia ki he tahi ke malave ki tona ʼatamai mo tona loto ke feala ai hana maʼuliʼi te ʼu faʼahi ʼae ʼe ina ako. Lolotoga te kiʼi temi veliveli ʼaeni ʼe tou maʼuʼuli ai, ʼe tonu ke tou fakatuʼutuʼu ke tou kamata he ʼu ako Tohi-Tapu pea mo akoʼi te moʼoni ki te hahaʼi ke natou liliu ko he ʼu tisipulo ʼa Kilisito. Ko tona fakaʼuhiga, ʼe tonu ke tou haga kumi ʼaki he faʼa fai ia natou fuli ʼae ʼe “lelei ʼonatou loto ke natou maʼu te maʼuli heʼe gata,” pea mo tokoni kia natou ke natou tauhi kia Sehova.—Lau ia Gaue 13:44-48.

4. ʼE feafeaʼi hatatou maʼu ia natou ʼae ʼe “lelei ʼonatou loto ke natou maʼu te maʼuli heʼe gata”?

⁴ ʼE feafeaʼi hatatou maʼu ia natou ʼae ʼe “lelei ʼonatou loto ke natou maʼu te maʼuli heʼe gata”? Neʼe ko te puleʼaki pe ʼe tahi maʼa te kau ʼuluaki Kilisitiano, neʼe ko te faifakamafola. Neʼe ui fenei e Sesu ki ʼana tisipulo: “ ʼI te ʼu kolo lalahi pea mo te ʼu kolo liliki ʼae ka kotou hu anai ki ai, kotou kumi pe ko ai ʼae ʼe tuha ke ina fakatalitali koutou.” (Mateo 10:11) ʼE tonu ke tou toe fai feia ʼi te temi nei. ʼE moʼoni, ʼe mole tou ʼamanaki ʼe tali anai te logo lelei e te hahaʼi ʼae ʼe mole natou fia kumi te ʼAtua, peʼe fiatuʼu. Kae ʼe tou kumi te hahaʼi agavaivai mo fakamalotoloto, ʼae ʼe natou ʼe fia ako te moʼoni. ʼE feala ke tou fakatatau tatatou kumi te hahaʼi ki te gaue ʼae neʼe fai e Sesu ʼi tana kei tufuga ʼakau. Neʼe tonu muʼa ke ina maʼu te faʼahiga papa ʼae moʼo faʼu ʼaki he puha, he matapa, he ʼakau ʼamo, peʼe ko he faʼahiga meʼa pe. Hili ia, pea ina fakaʼaogaʼi ʼana meʼa gaue, mo ʼona fealagia, moʼo faʼu ʼaki te ʼu meʼa ʼaia. ʼE toe feia pe ia ʼaho nei, ʼe tonu muʼa ke tou maʼu te hahaʼi ʼae ʼe fakamalotoloto, pea tou fakaʼaogaʼi leva ʼatatou meʼa gaue mo ʼotatou fealagia moʼo tokoni kia natou ke natou liliu ko he ʼu tisipulo.—Mateo 28:19, 20.

5. Kotea ʼe tonu ke tou iloʼi ʼo ʼuhiga mo te ʼu meʼa gaue ʼae ʼe maʼu ʼi ʼatatou Meʼa Gaue Ki Te Faiako? Tuku mai he faʼifaʼitaki. (Vakaʼi te ʼu ʼuluaki pāki.)

⁵ ʼI te kesi ʼaiʼaga meʼa gaue, ʼe tahi alu pe te ʼu meʼa gaue ki tona faʼahiga fakaʼaogaʼi. Ohage la, tou fakakaukauʼi age muʼa te ʼu meʼa gaue ʼae neʼe fakaʼaogaʼi e Sesu ʼi tana kei tufuga ʼakau. * (Vakaʼi te kiʼi nota.) Neʼe ʼaoga ki ai he ʼu meʼa gaue moʼo fuafua, fakailoga, tuʼusi, puhi, mo teuteuʼi te papa, pea mo fakapipiki tahi. ʼO toe feia pe, ko meʼa gaue fuli ʼe maʼu ʼi ʼatatou Meʼa Gaue Ki Te Faiako, ʼe tahi alu pe ki tona faʼahiga fakaʼaogaʼi. Koia tou vakaʼi pe ʼe feafeaʼi te fakaʼaogaʼi ʼo te ʼu meʼa gaue maʼuhiga ʼaia.

6, 7. (1) ʼE feafeaʼi tau fakaʼaogaʼi te ʼu kiʼi kate? (2) Kotea te ʼu fakatuʼutuʼu ʼe lua ʼo te ʼu pepa fakaafe ki ʼatatou fono?

⁶ Te ʼu Kiʼi Kate. ʼE veliveli kae ʼe ʼaoga moʼo fakaha ki te hahaʼi pe ʼe ko ai ia tatou pea ʼe toe feala ai foki ke natou olo ki totatou tuʼasila ʼi te Neti jw.org. ʼI totatou tuʼasila, ʼe lahi anai te ʼu faʼahi ʼe natou ako ʼo ʼuhiga mo tatou pea ʼe toe feala pe ke natou kole ke fai hanatou ako Tohi-Tapu. ʼO aʼu mai ki te temi nei, ko te toko 400 000 tupu neʼe natou kole ke fai hanatou ako Tohi-Tapu ʼi totatou tuʼasila ʼi te Neti jw.org. Pea ʼi te ʼaho fuli pe, ko te toko lauʼi teau hahaʼi ʼe natou kole ke fai hanatou ako Tohi-Tapu. ʼE lelei ke ke maʼu tuʼumaʼu hau ʼu kiʼi kate ke ke fakaʼaogaʼi ʼi te temi fuli pe ʼae ʼe ke fetaulaki ai mo te hahaʼi.

⁷ Te ʼu Pepa Fakaafe. ʼI te pepa fakaafe ki ʼatatou fono ʼe tou lau fenei ai: “ ʼE matou fakaafe koe ke fai hau ako Tohi-Tapu mo te Kau Fakamoʼoni ʼa Sehova.” ʼE feala pe ke fai “ ʼi ʼamatou fono” peʼe “ko he tahi ke tokoni atu.” Ko te ʼu fakatuʼutuʼu ʼe lua ʼo te ʼu pepa fakaafe: ko te fakaha ki te hahaʼi pe ko ai ia tatou pea ina fakaafe natou ʼae ʼe “natou mahino ʼe ʼaoga kia natou te ʼu meʼa fakalaumalie” ke natou ako te Tohi-Tapu mo tatou. (Mateo 5:3) ʼE moʼoni, ʼe fakaafe te hahaʼi fuli pe ki ʼatatou fono tatau aipe pe ʼe natou tali ke fai hanatou ako Tohi-Tapu peʼe kailoa. Koteʼuhi ka natou ʼomai ki ʼatatou fono, ʼe lahi anai te ʼu faʼahi ʼe natou ako ʼo ʼuhiga mo te Tohi-Tapu.

8. He koʼe ʼe maʼuhiga ke tou haga fakaafe te hahaʼi, kehe pe ke natou kau tuʼa tahi ki ʼatatou fono? Tuku mai he faʼifaʼitaki.

⁸ ʼE maʼuhiga ke tou haga fakaafe te hahaʼi, kehe pe ke natou kau tuʼa tahi ki ʼatatou fono. Kotea tona tupuʼaga? ʼE natou sisio anai ki te kehekehe ʼa te Kau Fakamoʼoni ʼa Sehova pea mo te ʼu lotu hala, he ʼe natou akoʼi te ʼu moʼoni ʼo te Tohi-Tapu mo natou tokoni ki te hahaʼi ke natou iloʼi ia te ʼAtua. (Esaia 65:13) Ohage la, neʼe tokagaʼi te kehekehe ʼaia e te taumatuʼa ʼi Amelika ko Ray mo Linda kua hili nei ki ai ni taʼu. Neʼe nā fia iloʼi lelei age ia te ʼAtua he neʼe nā tui kia te ia. Koia neʼe nā fakatotonu ai ke nā olo ki te ʼu ʼekelesia fuli ʼo tonā kolo pea ke nā ako faʼahi ʼe lua. ʼUluaki, neʼe tonu ke ʼi ai he faʼahi ʼe nā ako ʼi te ʼekelesia, pea lua, neʼe tonu ke teuteu te hahaʼi ʼo te ʼekelesia ʼaia ohage ko he hahaʼi ʼe tauhi ki te ʼAtua. Neʼe lauʼi taʼu tanā fai te faʼahi ʼaia, koteʼuhi neʼe lahi te ʼu ʼekelesia. Kae neʼe nā lotovaivai ʼaupito, he neʼe mole he meʼa neʼe nā ako, pea neʼe mole fakaʼapaʼapa te faiteuteu ʼa te hahaʼi ʼi te ʼu ʼekelesia. Hili tanā ʼaʼahi te ʼekelesia fakamuli ʼae neʼe kua nā tohi, neʼe alu ia Linda ʼo gaue kae toe liliu ia Ray ki fale. ʼI tana toe liliu ʼaia ki fale, neʼe sio ki te Fale Fono pea neʼe ina ui, ‘He koʼe koa ʼe mole au alu ʼo vakaʼi pe ʼe kotea ʼae ʼe fai ai?’ ʼE mahino papau ia, neʼe ko he meʼa lelei tana ulu ki te Fale Fono ʼaia. Ko natou fuli ʼae neʼe ʼi te Fale Fono, neʼe natou agalelei pea neʼe lelei tanatou faiteuteu. Neʼe heka ia Ray ʼi te ʼatu muʼa pea neʼe ina leleiʼia te ʼu faʼahi ʼae neʼe ina ako. Ko te aluʼaga ʼaia ʼe ina fakamanatuʼi mai te fakamatala ʼa te apositolo ko Paulo ʼo ʼuhiga mo he tahi neʼe hoki kau ki te ʼu fono pea mo ina ui fenei: “ ʼE nofo moʼoni te ʼAtua ia koutou.” (1 Kolonito 14:23-25) Neʼe kau leva ia Ray ki te ʼu fono ʼo te ʼAhotapu fuli. Pea neʼe toe kau foki ki te ʼu fono ʼo te vahaʼa. Neʼe toe kau mo Linda ki te ʼu fono pea tatau aipe pe neʼe kua nā taʼu 70 tupu, kae neʼe nā tali ke fai hanā ako Tohi-Tapu pea mo papitema.

9, 10. (1) He koʼe ʼe faigafua te fakaʼaogaʼi ʼo te ʼu kiʼi pepa lotu? (2) Fakamahino pe ʼe feafeaʼi te fakaʼaogaʼi ʼo te kiʼi pepa lotu Kotea Ia Te Puleʼaga ʼo Te ʼAtua?

⁹ Te ʼu Kiʼi Pepa Lotu. ʼE tou maʼu te ʼu kiʼi pepa lotu ʼe valu ʼi ʼatatou meʼa gaue ki te faiako. ʼE faigafua tona fakaʼaogaʼi pea ʼe ʼaoga moʼo kamata he ʼu faipalalau. Talu mai te kamata ha ʼo te ʼu kiʼi pepa lotu ʼaia ʼi te 2013, ko pepa lotu ʼe nima miliale ʼae neʼe ta. ʼE tatau ʼosi pe tonatou loa mo tonatou laulahi. Koia, kapau kua tou popoto ʼi te fakaʼaogaʼi ʼo he kiʼi pepa lotu ʼe tahi, kua feala tonatou fakaʼaogaʼi fuli. ʼE feafeaʼi hau fakaʼaogaʼi he kiʼi pepa lotu moʼo kamata hau faipalalau mo he tahi?

¹⁰ ʼE lagi ke fia fakaʼaogaʼi te kiʼi pepa lotu Kotea Ia Te Puleʼaga ʼo Te ʼAtua? Fakaha te ʼuluaki fehuʼi ʼi te ʼuluaki pasina pea ke fehuʼi fenei age: “Neʼe kua ke feʼekeʼaki koa pe kotea ia te Puleʼaga ʼo te ʼAtua? ʼI tau manatu la, ʼe ko he . . . ?” Hili ia pea ke fehuʼi age ki ai pe ʼe ko te tali fea ʼi te ʼu tali ʼae ʼe tolu ka ina fili anai. ʼE mole ke ui age anai pe ʼe tonu peʼe hala ia tana tali, kae haga avahi te kiʼi pepa lotu pea ke alu ki te kupu taki “ ʼE Ui ʼi Te Tohi-Tapu” pea ke lau te ʼu vaega ʼae ʼe tuʼu ai, ko Taniela 2:44 mo Esaia 9:5. ʼI muʼa ʼo tau mavae, alu ki te tuʼa ʼo te kiʼi pepa lotu ki te kupu taki “Tou Fai Te Fehuʼi ʼAeni,” pea ke lau age te fehuʼi ʼaeni: “ ʼE feafeaʼi anai te maʼuli moka pule te Puleʼaga ʼo te ʼAtua?” ʼE hoki ke tali anai ki te fehuʼi ʼaia moka ʼe ke toe liliu ʼo ʼaʼahi te kilisitiano ʼaia. Moka kolua toe felaveʼi, ʼe feala ke ke fakaha age te ako 7 ʼo te kaupepa lahi Te ʼu Logo Lelei Mai Te ʼAtua. Pea ko te kaupepa lahi ʼaia ʼe ko tatatou meʼa gaue moʼo kamata he ʼu ako Tohi-Tapu.

11. Kotea te fakatuʼutuʼu ʼo ʼatatou nusipepa? Pea kotea ʼae ʼe tonu ke tou iloʼi ʼo ʼuhiga mo ʼatatou nusipepa?

¹¹ Te ʼu Nusipepa. Ko te ʼu nusipepa ʼae ʼe lahi tokotahi tona ta pea mo tona fakaliliu, ʼe ko Te Tule Leʼo pea mo te Kotou ʼAʼala! Ko te kaugā malie ʼi te malamanei katoa ʼe natou lau te ʼu nusipepa ʼaia, koia ko te fakatuʼutuʼu ʼo te ʼu kupu tafito ʼo te ʼu nusipepa ʼaia, ʼe ko te ʼekenaki ʼo te hahaʼi kehekehe ke natou fia lau. ʼE tonu ke tou fakaʼaogaʼi te ʼu nusipepa ʼaia moʼo tokoni ki te hahaʼi ke natou fia iloʼi pe kotea ʼae ʼe maʼuhiga tafito ʼi totatou maʼuli ʼi te ʼaho fuli. Kae ʼe tonu muʼa foki ke tou iloʼi pe neʼe fakatuʼutuʼu Te Tule Leʼo mo te Kotou ʼAʼala! ki te faʼahiga hahaʼi feafeaʼi.

12. (1) Neʼe ta te Kotou ʼAʼala! maʼa te faʼahiga hahaʼi feafeaʼi, pea kotea te fakatuʼutuʼu ʼo te nusipepa ʼaia? (2) Kotea te ʼu fua lelei neʼe ke maʼu ʼaki te meʼa gaue ʼaia ʼi te ʼu ʼaho pe ʼaeni?

¹² Kotou ʼAʼala! Ko te nusipepa ʼaia ʼe fakahagahaga ki te hahaʼi ʼae ʼe mole natou faʼa iloʼi lelei te Tohi-Tapu peʼe kailoa. ʼE lagi mole natou iloʼi te ʼu akonaki ʼa te kau Kilisitiano, peʼe lagi mole natou falala ki te lotu, peʼe lagi mole natou iloʼi ʼe feala ke tokoni te Tohi-Tapu ki tonatou maʼuli. Ko te fakatuʼutuʼu tafito ʼo te Kotou ʼAʼala! ʼe ko te ʼekenaki ʼo te kau lautohi ke natou fakamoʼoni ʼe maʼuli moʼoni ia te ʼAtua. (Loma 1:20; Hepeleo 11:6) ʼE toe tokoni foki te nusipepa ʼaia ki te kau lautohi ke natou tui ko te Tohi-Tapu, ʼe “ko te folafola ʼa te ʼAtua.” (1 Tesalonika 2:13) Koʼeni te ʼu kupu tafito ʼo te ʼu nusipepa ʼe tolu Kotou ʼAʼala! ʼo te taʼu 2018: “Te Ala ʼo Te Maʼuli Fiafia,” “Tokoni ʼe 12 Ki Te Maʼuli Fiafia ʼo Te Famili,” “He Tokoni Maʼa Natou ʼAe ʼe Putu.”

13. (1) ʼE fakahagahaga kia ai ia Te Tule Leʼo ki te tufa? (2) Kotea te ʼu fua lelei neʼe ke maʼu ʼaki te meʼa gaue ʼaia ʼi te ʼu ʼaho pe ʼaeni?

¹³ Ko te fakatuʼutuʼu ʼo Te Tule Leʼo ki te  tufa, ʼe ko te fakamahino ʼo te ʼu akonaki Fakatohi-tapu ki te hahaʼi ʼae kua natou maʼu he faʼahiga fakaʼapaʼapa ki te ʼAtua pea mo te Tohi-Tapu. ʼE lagi ʼi ai he ʼu faʼahi kua natou iloʼi ʼo ʼuhiga mo te Tohi-Tapu, kae ʼe mole natou mahino lelei pe ʼe kotea ʼae ʼe akoʼi ai. (Loma 10:2; 1 Timoteo 2:3, 4) Koʼeni te ʼu kupu tafito ʼo te ʼu Tule Leʼo ʼe tolu ki te tufa ʼo te taʼu 2018: “ ʼE Kei ʼAoga Koa Te Tohi-Tapu Ki Totatou Temi?,” “Kotea Anai Totatou Ka Haʼu?,” “ ʼE Tokaga Mai Koa Ia Te ʼAtua Kia Koe?”

14. (1) Kotea te ʼu fakatuʼutuʼu ʼo te ʼu kiʼi ʼata viteo ʼae ʼe fa ʼi ʼatatou Meʼa Gaue Ki Te Faiako? (2) Kotea te ʼu fua lelei neʼe ke maʼu ʼaki te ʼu kiʼi ʼata viteo ʼaia?

¹⁴ Te ʼu ʼAta Viteo. ʼI te temi ʼo Sesu, neʼe fakaʼaogaʼi pe e te kau tufuga ʼakau ʼanatou meʼa gaue mahani. Kae ia ʼaho nei, ko te kau gaue papa, ʼe natou fakaʼaogaʼi te ʼu kiʼi masini hila ohage ko te ʼu tutuʼu, te ʼu vili, mo te ʼu kiʼi masini tele papa. Ia ʼaho nei ka tou faifakamafola, kua tou toe maʼu mo te ʼu kiʼi ʼata ke tou fakaha ki te hahaʼi. Pea koʼeni te ʼu ʼata viteo ʼe fa ʼe tou maʼu ʼi ʼatatou meʼa gaue ki te faiako: He Koʼe ʼe Lelei Ke Ke Ako Te Tohi-Tapu? ʼE Feafeaʼi Te Fai ʼo He Ako Tohi-Tapu? Kotea ʼAe ʼe Fai ʼi Te Fale Fono? Te Kau Fakamoʼoni ʼa Sehova—Ko Ai Ia Matou? Moka tou kamata he faipalalau, ʼe lelei te fakaʼaogaʼi ʼo te ʼu kiʼi ʼata ʼae ʼe mole minuta lua ʼi te ʼu kiʼi ʼata ʼaia ʼe fa. Pea ʼe lelei age te fakaʼaogaʼi ʼo te ʼu kiʼi ʼata ʼae ʼe loaloaga moka tou faipalalau mo te hahaʼi ʼae ʼe maʼu honatou temi peʼe ko ʼatatou ʼaʼahi. ʼE fakaofoofo te ʼu meʼa gaue ʼaia, koteʼuhi ʼe feala ke ina uga te hahaʼi ke natou ako te Tohi-Tapu pea ke natou kau ki ʼatatou fono.

15. Ka sioʼi e he tahi he kiʼi ʼata ʼi tana lea, ʼe feala ke malave feafeaʼi ki ai? Tuku mai he ʼu faʼifaʼitaki.

¹⁵ Tou vakaʼi te aluʼaga neʼe hoko ki he tuagaʼane. Neʼe felaveʼi mo te fafine ʼe haʼu mai Micronésie pea ʼe palalau ʼi te lea ʼo te potu fenua ʼaia ʼae ko te Yapois. Neʼe fakaha age e te tuagaʼane ia te kiʼi ʼata He Koʼe ʼe Lelei Ke Ke Ako Te Tohi-Tapu? ʼi tana lea. ʼI te temi pe ʼae neʼe kamata ai te kiʼi ʼata, neʼe ui fenei e te fafine: “Ko taku lea. ʼE mole au tui ʼosi au. Pea ʼe iloga ʼi te faʼahiga palalau ʼa te tagata ʼe ma fenua tahi. ʼE palalau ʼi taku lea.” Hili ʼaia, neʼe ina ui ʼe ina lau anai mo sioʼi fuli te ʼu alatike mo te ʼu kiʼi ʼata ʼi tana lea ʼi te jw.org. (Vakaʼi ia Gaue 2:8, 11.) Koʼeni te tahi aluʼaga ʼo ʼuhiga pe mo te kiʼi ʼata viteo ʼaia. Ko he tuagaʼane ʼi Amelika ʼe ʼi ai tana fakafotu ʼe nofo ʼi he fenua matapule. Neʼe ina momoli ki ai te kiʼi ʼata viteo ʼaia ʼi tana lea ʼi te Neti. Neʼe sioʼi e tana fakafotu te kiʼi ʼata viteo pea neʼe faitohi ʼo tali fenei ki ai ʼi te Neti: “Neʼe au leleiʼia tafito te koga ʼae ʼe fakamahino ai ʼe ʼi ai te malohi agakovi ʼe ina puleʼi te malamanei. Pea neʼe au kole ke fai haku ako Tohi-Tapu.” ʼE fakaofoofo te aluʼaga ʼaia he ʼe nofo ʼi he fenua ʼe fakatuʼakoi ai tatatou gaue.

16. Fakamahino te fakatuʼutuʼu ʼo te ʼu kaupepa lalahi takitahi ʼaeni: (1) Tou Fakalogo Ki Te ʼAtua Pea Ke Tou Māʼuʼuli ʼo He’egata. (2) Te ʼu Logo Lelei Mai Te ʼAtua. (3) Ko Ai ʼe Ina Fai Te Finegalo ʼo Sehova Ia ʼAho Nei?

¹⁶ Te ʼu Kaupepa Lalahi. ʼE feafeaʼi hatatou akoʼi te moʼoni ki he tahi ʼe mole poto lelei ʼi te lautohi peʼe ki he tahi ʼe mole ʼi ai he ʼu tohi Fakatohi-Tapu ʼi tana lea? ʼE feala ke tou fakaʼaogaʼi te kaupepa lahi Tou Fakalogo Ki Te ʼAtua Pea Ke Tou Māʼuʼuli ʼo He’egata. * (Vakaʼi te kiʼi nota.) ʼE tou toe maʼu te tahi meʼa gaue lelei moʼo kamata he ʼu ako Tohi-Tapu ko te kaupepa lahi Te ʼu Logo Lelei Mai Te ʼAtua.  ʼE feala tau fakaha ki he tahi te ʼu fehuʼi ʼe 14 ʼe tuʼu ʼi te tuʼa kaupepa pea mo fehuʼi age pe kotea ʼae ʼe ina leleiʼia. Hili ia pea ke kamata te ako Tohi-Tapu ʼo mulimuli pe ki te fehuʼi neʼe ina filifili. Neʼe kua ke ʼahiʼahi fai koa la te faʼahi ʼaia ʼi tau toe liliu ʼo fai ʼau ʼaʼahi? Ko te tolu kaupepa lahi ʼi ʼatatou meʼa gaue ki te faiako ʼe Ko Ai ʼe Ina Fai Te Finegalo ʼo Sehova Ia ʼAho Nei? Ko te fakatuʼutuʼu ʼo te kaupepa lahi ʼaia ʼe ko te fakahaha ʼo tatatou kautahi ki ʼatatou kau ako Tohi-Tapu. ʼE fakamahino ʼi Te Maʼuli Fakakilisitiano Mo Te Faifakamafola—Kaupepa Ako ʼo Malesio 2017 pe ʼe feafeaʼi te fakaʼaogaʼi ʼo te kaupepa lahi ʼaia.

17. (1) Kotea te fakatuʼutuʼu ʼa te ʼu tohi ako takitahi? (2) Kotea ʼae ʼe tonu ke fai e ia ʼae ʼe papitema kae heʼeki ʼosi tana ako, pea kotea tona tupuʼaga?

¹⁷ Te ʼu Tohi. Kapau ʼe ke fai he ako ʼa he tahi ʼaki he kaupepa lahi, ʼe feala pe ʼi te temi fuli ke ke hiki ki te tohi Kotea ʼAe ʼe Akoʼi Mai ʼi Te Tohi-Tapu? Ko te meʼa gaue ʼaia ʼe feala ke tokoni ki te hahaʼi ke lahi age tanatou mahino ki te ʼu akonaki tafito ʼo te Tohi-Tapu. Kapau kua ʼosi te tohi ʼaia kae kua tuputupu ia ia ʼae ʼe ako, ʼe feala ke ke hoko atu te ako ʼaki te tohi Kotou Haga Nonofo ʼi Te ʼOfa ʼo Te ʼAtua. ʼE tokoni anai te meʼa gaue ʼaia kia ia ke ina maʼuliʼi te ʼu pelesepeto Fakatohi-Tapu ʼi te ʼaho fuli. Tou manatuʼi, ʼe tatau aipe pe ʼe papitema kae heʼeki ʼosi tana ako te ʼu tohi ʼaia ʼe lua, ʼe tonu ke hoko atu tana ako. ʼE tokoni anai ki ai ke malohi tana tui pea mo nofo agatonu kia Sehova.—Lau ia Kolose 2:6, 7.

18. (1) Kotea te fakalotomalohi ʼe tuku mai ia 1 Timoteo 4:16 ke tou fai, pea kotea anai ʼona fua? (2) Kotea tatatou fakatuʼutuʼu moka tou fakaʼaogaʼi ʼatatou Meʼa Gaue Ki Te Faiako?

¹⁸ Ko tatou ko te Kau Fakamoʼoni ʼa Sehova, pea ʼe ko totatou maʼua ke tou akoʼi “te moʼoni ʼae ko te logo lelei” ki te hahaʼi ke feala hanatou maʼu te maʼuli heʼe gata. (Kolose 1:5; lau ia 1 Timoteo 4:16.) ʼE tokoni mai te kautahi ke tou fai te faʼahi ʼaia, ʼo ina foaki mai he ʼu meʼa gaue ʼe ʼaoga pea ʼe tou maʼu ʼi ʼatatou Meʼa Gaue Ki Te Faiako. (Vakaʼi te fakamatala ʼae ʼi te ʼa takai “  ʼAtatou Meʼa Gaue Ki Te Faiako.”) Tou fakaʼaogaʼi fakalelei te ʼu meʼa gaue ʼaia. ʼE feala pe kia tatou takitokotahi ke tou filifili pe ʼe ko te meʼa gaue fea ʼae ka tou fakaʼaogaʼi pea ʼi te lakaga fea. Tou manatuʼi, ʼe mole tonu pe ke tou tufa he ʼu tohi ki te hahaʼi, pea ʼe mole tou foaki anai he ʼu tohi kia natou ʼae ʼe mole natou fia tali te logo lelei. Kae ʼe tou fakatuʼutuʼu ke tou fai ni tisipulo ia natou ʼae ʼe fakamalotoloto, mo agavaivai, mo natou fia iloʼi moʼoni te ʼAtua, pea mo natou ʼae ʼe “lelei ʼonatou loto ke natou maʼu te maʼuli heʼe gata.”—Gaue 13:48; Mateo 28:19, 20.