1, 2. Kotea te faʼahi neʼe fai e te Tevolo ʼe fakatupu mamahi ki te tagata?

KO TE telefoni, mo te mataʼi hila, mo te motoka, pea mo te ʼaisi ʼe ko he ʼu meʼa ia neʼe faʼu e te tagata ke laka ai ki muʼa te maʼuli. Pea ko ʼihi gaue ʼa te tagata neʼe fakatupu tuʼutamaki ki te maʼuli, ohage la ko te ʼu mahafu tau, te ʼu foʼi pulu ʼae ʼe tanu ʼi te kele, te sikaleti, pea mo te foʼi pulu fakanukeleʼea. Kae ʼe ʼi ai te faʼahi ʼe fakatupu mamahi ki te tagata talu mai fualoa. Kotea te faʼahi ʼaia? Ko te loi. Ko he tahi ʼe loi, ʼe ina fai he ʼu palalau ʼe ina iloʼi ʼe mole moʼoni moʼo fakahalaʼi he tahi. Ko ai ʼae neʼe ʼuluaki loi? Ko te Tevolo. Neʼe fakahigoaʼi ia ia e Sesu Kilisito ko “te tamai ʼo te loi.” (Lau ia Soane 8:44.) Kae ko ʼanafea ʼae neʼe kamata loi ai?

² Neʼe hoko te aluʼaga ʼaia kua hili ki ai taʼu ʼe lauʼi afe ʼi te ʼoloto ʼo Eteni. Ko Atama mo Eva neʼe maʼuli fiafia ʼi te Palatiso taulekaleka ʼae neʼe foaki age e Sehova. Neʼe ui e te ʼAtua kia naua kapau anai ʼe nā kai ki “te akau o te iloilo o te lelei mo te kovi,” ʼe nā mamate anai. Logo la neʼe iloʼi e Satana te aluʼaga ʼaia, kae neʼe ina fakaʼaogaʼi he gata moʼo palalau fenei kia Eva: “E mole kolua mamate anai.” Neʼe ko te ʼuluaki loi ʼaia ʼi te hisitolia ʼo te  tagata. Neʼe toe ui fenei e Satana: “E iloi e te Atua, i te aho ae e kolua kai anai ki ai, e ava anai okolua mata, pea e kolua tatau anai mo te Atua, o kolua iloi anai te lelei mo te kovi.”—Senesi 2:15-17; 3:1-5.

3. He koʼe neʼe kovi te loi ʼa Satana? Pea kotea ʼona nunuʼa?

³ Neʼe kovi te loi ʼa Satana, koteʼuhi neʼe ina iloʼi kapau anai ʼe tui ia Eva kia ia ʼo ina kai te fuaʼi ʼakau, ʼe mate anai. Pea neʼe hoko moʼoni te faʼahi ʼaia. Neʼe talagataʼa ia Atama mo Eva ki te fakatotonu ʼa Sehova pea neʼe nā mamate ki ʼamuli. (Senesi 3:6; 5:5) Pea tahi, ʼuhi ko te agahala ʼa Atama neʼe “mafola ai te mate ki te tagata fuli pe.” ʼI tona fakahagatonu, “neʼe pule ia te mate ohage ko he hau . . . , ʼo feia pe foki kia natou ʼae neʼe mole agahala ohage ko te talagataʼa ʼa Atama.” (Loma 5:12, 14) Ko te tupuʼaga la ʼaia ʼo tatatou mole maʼuli haohaoa ʼo heʼe gata ohage ko tona fakatuʼutuʼu e te ʼAtua ʼi te kamata. Kae, ʼe feala pe tou maʼuʼuli ia ‘taʼu ʼe 70 peʼe 80 mo kapau ʼe tou maʼu he malohi ʼe makehe,’ pea ko te maʼuli “ ʼe fonu pe ia ʼi te malaʼia pea mo te ʼu mamahi.” (Pesalemo 90:10, MN) Ko te ʼu aluʼaga fuli ʼaia neʼe hoko ʼuhi pe ko te loi ʼa Satana.

4. (1) Kotea te ʼu fehuʼi ʼae ʼe tonu ke tou vakaʼi? (2) Ohage ko tona ui ia Pesalemo 15:1, 2, ko ai pe ʼae ʼe feala ke kaumeʼa mo Sehova?

⁴ Neʼe ui fenei e Sesu ʼo ʼuhiga mo Satana: “Neʼe mole haga nofo ia ʼi te moʼoni, koteʼuhi ʼe mole nofo te moʼoni ia ia.” ʼE mole fetogi ia Satana. ʼE kei ina “fakaheʼi [pe] te kele katoa” ʼaki ʼana loi. (Fakaha 12:9) Kae ʼe mole tou loto ke fakahalaʼi tatou e Satana. Koia ʼae ʼe ʼaoga ai ke tou vakaʼi te ʼu fehuʼi ʼaeni ʼe tolu: ʼE fakahalaʼi feafeaʼi e Satana te hahaʼi ia ʼaho nei? He koʼe ʼe loi te hahaʼi? ʼE feafeaʼi hatatou palalau ʼi te moʼoni ʼi te temi fuli ke tou taupau ai ʼatatou felogoi mo Sehova kae ke mole tou hage ko Atama mo Eva?—Lau ia Pesalemo 15:1, 2.

5. ʼE fakahalaʼi feafeaʼi e Satana te hahaʼi ia ʼaho nei?

⁵ ʼE feala hatatou tekeʼi ia te ʼu fakahala ʼa Satana. Neʼe ui fenei e te apositolo ko Paulo: “ ʼE tou iloʼi ʼana fakakaukau.” (2 Kolonito 2:11; nota) ʼE tou iloʼi ko Satana ʼae ʼe ina puleʼi ia te malamanei katoa, ʼo kau ai mo te ʼu lotu hala, te ʼu puleʼaga aga fakakaka pea mo te ʼu faikoloa manumanū. (1 Soane 5:19) Koia ʼe mole tou punamaʼuli ki te ʼekenaki e Satana mo ʼana temonio ia he hahaʼi maʼu tuʼulaga ke natou “loi.” (1 Timoteo 4:1, 2) Ohage la, ko ʼihi kau faikoloa, ʼe natou loi moka natou fia fakatau hanatou ʼu meʼa ʼe fakatupu tuʼutamaki peʼe natou aga fakakaka ke natou maʼu te falā ʼa te hahaʼi.

6, 7. (1) He koʼe ʼe ko he aga kaka tafito ʼa te kau takitaki lotu ia te loi? (2) Kotea he ʼu loi ʼa te kau takitaki lotu neʼe kua ke logo ki ai?

⁶ Ko te loi, ʼe ko he aga kaka tafito ʼaia ʼa te kau takitaki lotu. Kotea tona tupuʼaga? Koteʼuhi kapau ʼe tui he tahi ki ʼanatou akonaki loi ʼo ina fai te ʼu meʼa ʼae ʼe mole leleiʼia e te ʼAtua, ʼe mole feala ke ina maʼu te maʼuli heʼe gata. (Oseo 4:9) Neʼe iloʼi e Sesu neʼe kakaʼi te hahaʼi e te kau takitaki lotu ʼi tona temi. Neʼe ina ui fenei age kia natou ʼaki he lototoʼa: “Malaʼia kia koutou, kau sekelipa mo kau Faliseo malualoi! Koteʼuhi ʼe kotou feoloʼaki ʼi te tai mo te kele ʼo kumi he tahi ke tafoki atu, pea ka tafoki atu, ʼe kotou fakaliliu ia ia ke tuha mo te Seʼeni,” ko tona fakaʼuhiga, ko te mate ʼo talu ai. (Mateo 23:15) Neʼe ui e Sesu, neʼe hage pe te kau takitaki  lotu hala ko tanatou tamai te Tevolo, ia ia ʼae ʼe ko he “faifakapo.”—Soane 8:44.

⁷ Pe ʼe natou pasitea, patele, lapi, peʼe ko ʼihi atu, ʼe mole kei malau te kau takitaki lotu ia ʼaho nei. Ohage pe ko te kau Faliseo, ʼe mole natou akoʼi ki te hahaʼi ia te moʼoni ʼae ʼe haʼu mai te Folafola ʼa te ʼAtua, kae ʼe natou “fetogi te moʼoni ʼo ʼuhiga mo te ʼAtua ʼaki te loi.” (Loma 1:18, 25) Ohage la ʼe natou ui ki te hahaʼi, “ka kua haofaki tatou, kua haofaki tatou ʼo talu ai,” peʼe maʼu e te tagata ia he laumalie ʼe maʼuli tuputupua, peʼe tali e te ʼAtua te faitagata mo te faifafine pea mo te ʼohoana ʼa te tagata mo te tagata pea mo te fafine mo te fafine.

8. Kotea te loi ʼae kua vave tala pe e te kau takitaki fakapolitike, kae ʼe tonu ke tou feafeaʼi?

⁸ ʼE toe fakaʼaogaʼi pe la e te kau takitaki fakapolitike ia he ʼu loi moʼo kakaʼi te hahaʼi. Pea kua natou vave tala pe anai ia he toe loi. ʼE natou tala anai kua natou fakatuʼu ia te “Tokalelei pea mo [te] fimalie” ʼi te malamanei. Kae “ ʼi te temi pe ʼaia, ʼe hoko fakafokifa anai kia natou te fakaʼauha.” Koia ʼe mole tonu ke tou tui ki te kau takitaki fakapolitike ʼae ʼe natou ui ʼe fakaalualu pe ke lelei age te ʼu aluʼaga ʼo te malamanei. Kae ʼe tou “iloʼi lelei ko te ʼaho ʼo Sehova ʼe haʼu anai ohage ko he tagata kaihaʼa ʼi te poʼuli.”—1 Tesalonika 5:1-4.

9, 10. (1) He koʼe ʼe loi te hahaʼi, pea kotea ʼona fua? (2) Kotea ʼae ʼe tonu ke tou manatuʼi ʼo ʼuhiga mo Sehova?

⁹ ʼE mole ko te hahaʼi maʼu tuʼulaga pe ʼae ʼe loi ia ʼaho nei. ʼI te alatike “ Pourquoi nous mentons ” (He Koʼe ʼe Tou Loi?) ʼe ui ai e Y. Bhattacharjee, ko te “loi kua liliu ia ʼo tauaka ʼi te loto ʼo te tagata.” Ko tona fakaʼuhiga, maʼa te hahaʼi ko te loi ʼe lelei pe ia, ʼe mole hona ia kovi. ʼI ʼihi temi, ʼe loi te hahaʼi moʼo puipui ʼo natou totonu, peʼe lagi moʼo fufu ʼo he ʼu aga ʼe kovi peʼe ko hanatou ʼu faifakapo. ʼE natou toe loi ke natou maʼu peʼe ke foaki age hanatou falā ʼi he faʼahiga aluʼaga pe. ʼE toe ui ʼi te alatike ko ʼihi hahaʼi kua mahani ʼi te loi ki “te kau matapule, ki te ʼu kaugā gaue, ki te ʼu kaumeʼa, pea mo natou ʼae ʼe natou ʼoʼofa ai.”

¹⁰ Kotea te ʼu fua ʼo te ʼu loi ʼaia? ʼE mole kei fefalalaʼaki te hahaʼi, pea ʼe mole kei natou felogoi. Ohage la, tou fakakaukauʼi age muʼa te lotomamahi ʼa he tagata ʼohoana ʼi tana iloʼi ʼae, neʼe hala ki tuʼa tona ʼohoana kae neʼe loi moʼo fufu tana aga kovi ʼaia neʼe ina fai. Peʼe fakakaukauʼi age muʼa, ko he tagata ʼe ina gaohi koviʼi tona ʼohoana mo tana fanau ʼi fale, kae ia muʼa ʼo te kaugā malie ʼe ina fakaha ko ia ko he tagata ʼe ʼofa pea mo lototokaga. Ko te faʼahiga hahaʼi ʼaia ʼe feala ke natou kakaʼi te tagata, kae ʼe tonu ke tou manatuʼi ʼe mole feala hanatou kakaʼi ia Sehova. ʼE ui fenei ʼi te Tohi-Tapu “ko meʼa fuli ʼe telefua pea mo ha” kia te ia.—Hepeleo 4:13.

11. Kotea te ako ʼe tou taʼofi mai te faʼifaʼitaki kovi ʼa Ananiasi mo Safila? (Vakaʼi te ʼuluaki pāki.)

¹¹ ʼI te Tohi-Tapu, ʼe ʼi ai te faʼifaʼitaki ʼo te taumatuʼa Kilisitiano neʼe fakahalaʼi e Satana  moʼo lohiʼi ʼo te ʼAtua. Ko Ananiasi mo Safila neʼe nā faigaʼi ke nā kakaʼi te kau apositolo. Neʼe nā fakatau tonā moʼi kele pea nā foaki te koga ʼo te totogi ki te kau apositolo. ʼI tanā fia lelei ki te kokelekasio, neʼe nā ui ai ki te kau apositolo ʼe nā foaki fuli age te falā. Kae neʼe iloʼi e Sehova tanā loi, pea neʼe ina fakatuʼā naua.—Gaue 5:1-10.

12. Kotea anai ka hoko kia natou ʼae ʼe loi kae mole fakahemala, pea kotea tona tupuʼaga?

¹² Kotea te manatu ʼa Sehova ʼo ʼuhiga mo te loi? Ko te hahaʼi fuli ʼae ʼe loi kae mole fakahemala, ʼe li anai natou ki “te vai ʼae ʼe vela ai te afi kakaha,” ohage pe ko Satana. Ko tona fakaʼuhiga, ʼe fakaʼauha anai natou ʼo talu ai. (Fakaha 20:10; 21:8; Pesalemo 5:7) Kotea tona tupuʼaga? Koteʼuhi ʼe fakatatau e Sehova te faʼahiga hahaʼi gutuloi ʼaia kia natou fuli ʼae “ ʼe natou fai te ʼu meʼa ʼae ʼe fakalialia” ki ʼona mata.—Fakaha 22:15, nota.

13. Kotea ʼae ʼe tou iloʼi ʼo ʼuhiga mo Sehova, pea kotea ʼae ʼe ina uga tatou ke tou fai?

¹³ ʼE tou iloʼi ko Sehova “e mole ko he tagata ia ke loi” pea “ ʼe mole feala . . . ke loi te ʼAtua.” (Numelo 23:19; Hepeleo 6:18) ‘ ʼE fehiʼa Sehova ki te ʼalelo ʼae ʼe loi.’ (Taaga Lea 6:16, 17) Kapau ʼe tou loto ke leleiʼia tatou e Sehova, ʼe tonu ke tou fakaha te moʼoni. Koia “ ʼaua naʼa [tou] feloiʼaki.”—Kolose 3:9.

14. (1) Kotea ʼae ʼe mole tatau ai te kau Kilisitiano moʼoni mo te hahaʼi ʼo te ʼu lotu hala? (2) Fakamahino te pelesepeto ʼae ʼe tou maʼu ia Luka 6:45.

¹⁴ He koʼe ʼe mole tatau te kau Kilisitiano moʼoni mo te hahaʼi ʼo te ʼu lotu hala? Koteʼuhi ʼe tou “fakaha te mooni.” (Lau ia Sakalia 8:16, 17.) Neʼe ui fenei e Paulo: “ ʼE matou fakaha ko matou ko te ʼu tagata faifekau ʼa te ʼAtua: . . . ʼE matou tala te moʼoni.” (2 Kolonito 6:4, 7) Pea neʼe ui e Sesu ʼe haʼu  mai te gutu ʼo te hahaʼi “te meʼa ʼae ʼe fonu ʼi [ʼonatou] loto.” (Luka 6:45) Ko tona fakaʼuhiga, ko he tahi ʼe aga fakahagatonu ʼe ina fakaha anai te moʼoni. ʼE ina fakaha anai te moʼoni ki te kau matapule, ki ʼona kaugā gaue, ki ʼona kaumeʼa, mo natou ʼae ʼe ʼofa ai. Tou vakaʼi he ʼu aluʼaga ʼe tou faigaʼi ai anai ke tou aga fakahagatonu ʼi te ʼu faʼahi fuli.

15. (1) He koʼe ʼe mole lelei ke tou fai fakafufu he ʼu meʼa ʼe kovi? (2) Kotea ʼae ʼe feala ke tokoni ki te kau tupulaga ke natou tekeʼi te ʼu fakaneke ʼo ʼonatou kaugā ako? (Vakaʼi te kiʼi nota.)

¹⁵ Kapau kei ke tupulaga, ʼe lagi ke loto ke tali leleiʼi koe e ʼou kaugā ako. Pea ʼuhi ko te faʼahi ʼaia, ko ʼihi tupulaga ʼe natou fai fakafufu he ʼu aga ʼe kovi. Ka natou fakatahi mo te famili peʼe ko te kokelekasio ʼe lelei tanatou aga. Kae ka natou felogoi mo ʼihi ʼi te ʼu fakatahiʼaga ʼi te Neti peʼe ko he hahaʼi ʼe mole tauhi kia Sehova, ʼe natou fetogi tanatou aga. ʼE natou gutu tauvele, ʼe natou tui he ʼu mutuʼi meʼa ʼe mole fakaʼapaʼapa, ʼe natou fakalogo he ʼu musika ʼe heʼe maʼa, ʼe natou inu kava mo fakaʼaogaʼi te toloke, ʼe natou fakatahi fakafufu mo he tahi, peʼe natou fai he tahi ʼu aga ʼe kovi. ʼE natou loi ki ʼanatou matuʼā, ki te ʼu tehina mo tuagaʼane, pea mo Sehova. (Pesalemo 26:4, 5) ʼE iloʼi e Sehova moka tou ‘fakaʼapaʼapa kia te ia ʼaki ʼotatou laugutu’ kae ‘ ʼe mamaʼo ʼaupito ʼotatou loto’ ia te ia ʼo tou fai te meʼa ʼae ʼe fehiʼa ki ai. (Maleko 7:6) Koia ʼae ʼe lelei age ke tou mulimuli ki te taʼaga lea ʼaeni: “ ʼAua naʼa fakaʼamu tou loto ki te kau agahala, kae ke ke manavasiʼi kia Sehova ʼi te ʼaho fuli pe.”—Taaga Lea 23:17, MN. * (Vakaʼi te kiʼi nota.)

16. He koʼe ʼe maʼuhiga ke tou aga fakahagatonu moka tou fai hatatou kole ke tou kau ki he faʼahiga selevisi temi katoa?

¹⁶ Kapau ʼe ke fia pionie katoa peʼe ke fia kau ki te selevisi makehe temi katoa, ohage la ko te gaue ʼi te Petele, ʼe tonu ke ke fai hau kole. ʼE maʼuhiga ʼaupito ke ke aga fakahagatonu moka ke tali ki te ʼu fehuʼi ʼo ʼuhiga mo tou malolo fakasino, mo ʼau fakafiafia, pea mo tou agaaga maʼuli. (Hepeleo 13:18) ʼE feafeaʼi mo kapau neʼe ke fai he aga ʼe fehiʼa ki ai Sehova peʼe hoha ai tou leʼo ʼo loto kae ʼe mole iloʼi e te kau tagata ʼafeā? ʼE tonu ke ke kole tokoni kia natou ke feala hau tauhi kia Sehova ʼaki he leʼo ʼo loto ʼe maʼa.—Loma 9:1; Kalate 6:1.

17. Kotea anai ka tou fai moka fakafehuʼi tatou ʼo ʼuhiga mo ʼotatou tehina mo tuagaʼane e te kau fakafeagai?

¹⁷ Kotea ka ke fai anai moka tapuʼi tatatou gaue ʼi tou fenua, pea puke koe e te kau pule taki ʼo fakafehuʼi ʼo ʼuhiga mo ʼou tehina mo tuagaʼane? ʼE tonu koa ke ke fakaha te ʼu faʼahi ʼae ʼe ke iloʼi? Kotea ʼae neʼe fai e Sesu ʼi tona fakafehuʼi e te kovana Loma? Neʼe fakaʼaogaʼi e Sesu te pelesepeto  Fakatohi-Tapu ʼae, ʼe ʼi ai “he temi ke fakalologo ai, pea mo he temi ke palalau ai,” pea ʼi ʼihi temi neʼe mole gu ia. (Ekelesiasi 3:1, 7; Mateo 27:11-14) Kapau ʼe tou tau mo he aluʼaga feia, ʼe mole tou fakaha anai te ʼu faʼahi ʼae ʼe tou iloʼi ʼo ʼuhiga mo ʼotatou tehina mo tuagaʼane naʼa fakatupu tuʼutamaki kia natou.—Taaga Lea 10:19; 11:12.

18. Kotea ia totatou maʼua moka ʼe fakafehuʼi tatou e te kau tagata ʼafeā ʼo ʼuhiga mo he tehina peʼe tuagaʼane?

¹⁸ Kotea anai ka ke fai mo kapau ʼe ke iloʼi neʼe fai he agahala mamafa e he tahi ʼi te kokelekasio? Ko te maʼua ʼo te kau tagata ʼafeā ke natou taupau ke maʼa te kokelekasio ʼi te aga ʼae ʼe tonu ke fai, koia ʼe feala ke natou fakafehuʼi koe ʼo ʼuhiga mo te aluʼaga ʼaia. Kotea anai ka ke fai, tafito la mo kapau ko hou kaumeʼa lelei peʼe ko hou kaiga? ʼE ui fenei ʼi te Tohi-Tapu: “Ko ae e ina fakaha te mooni e ina fakaha te faitotonu.” (Taaga Lea 12:17; 21:28) Koia ko tou maʼua ke ke fakaha ki te kau tagata ʼafeā ia faʼahi fuli ʼe ke iloʼi. ʼE tonu ke iloʼi e te kau tagata ʼafeā te ʼu aluʼaga fuli ʼae neʼe hoko ke feala ai hanatou tokoni ki te tehina peʼe tuagaʼane ke ina toe maʼu ʼana felogoi lelei mo Sehova.—Sakopo 5:14, 15.

19. Kotea ka tou vakaʼi anai ʼi te alatike ka hoa mai?

¹⁹ Neʼe faikole fenei Tavite kia Sehova: “E ke loto ke nofo te mooni i te takele o te loto.” (Pesalemo 51:8) Neʼe iloʼi e Tavite ʼe maʼuhiga totatou ʼuhiga ʼo loto. Pea ʼi te temi fuli pe, ko te kau Kilisitiano moʼoni ʼe natou “tahi fakaha te mooni ki [ʼonatou] oloi.” Ko te tahi faʼahiga fakaha ʼo totatou kehekehe mo te hahaʼi ʼo te ʼu lotu hala, ko tatatou akoʼi ki te hahaʼi te ʼu moʼoni ʼo te Tohi-Tapu. ʼI te alatike ka hoa mai, ʼe tou vakaʼi anai pe ʼe feafeaʼi hatatou fakahoko te faʼahi ʼaia ʼi te faifakamafola.