Tou Taupau Te Tokalelei ʼo Te Loto Logo La Te ʼu Fetogi ʼi ʼOtatou Maʼuli
“E au mau he laumalie fimalie mo tokalelei.”—PESALEMO 131:2.
1, 2. (1) Kotea ʼae ʼe feala ke tou logoʼi moka hoko he ʼu fetogi fakapunamaʼuli ʼi totatou maʼuli? (Vakaʼi te ʼuluaki pāki.) (2) ʼO mulimuli kia Pesalemo 131, kotea ʼae ʼe feala ke tokoni mai ke tou maʼu he fakakaukau ʼe tokalelei?
LOLOTOGA taʼu ʼe 25, ko Lloyd mo Alexandra neʼe ko te ʼu Petelite, hili ia pea neʼe hinoʼi naua ki te gaue faifakamafola. ʼI te kamata, neʼe mamahi ʼonā loto. ʼE ui fenei e Lloyd: “Kia au ko te Petele mo taku gaue ʼae neʼe au fakahoko ʼi ai, neʼe ko toku maʼuli katoa pe ʼaia. Neʼe au leleiʼia te ʼu tupuʼaga ʼo te ʼu fetogi, kae ʼi te ʼu vahaʼa pea mo te ʼu mahina ʼae neʼe hoa mai ki ai, neʼe au logoʼi leva hoku liʼakina.” ʼI he tahi temi neʼe lelei te ʼu manatu ʼa Lloyd ʼo ʼuhiga mo te ʼu fetogi, pea ʼi he tahi temi leva kua loto mamahi.
2 ʼI ʼihi temi, ʼe hoko he ʼu fetogi ʼi totatou maʼuli kae neʼe mole tou ʼamanaki ki ai, pea ʼe feala ke lahi ai totatou lotohoha mo ʼotatou tuʼania. (Taaga Lea 12:25) Ka faigataʼa hakita tali peʼe kita fakamamahani ki te ʼu fetogi, ʼe feafeaʼi hakita maʼu he lotofimalie? (Lau ia Pesalemo 131:1-3.) Tou vakaʼi pe neʼe feafeaʼi ki ʼihi kaugana ʼa Sehova, ʼo te temi muʼa pea mo te temi nei, tanatou lava taupau he lotofimalie mo tokalelei logo la te ʼu fetogi fakapunamaʼuli ʼi ʼonatou maʼuli.
ʼE TOKONI FEAFEAʼI MAI “TE TOKALELEI ʼO TE ʼATUA”?
3. Neʼe feafeaʼi te fetogi fakapunamaʼuli ʼo te maʼuli ʼo Sosefo?
3 Ohage la, tou fakakaukauʼi age muʼa te ʼu aluʼaga ʼae neʼe hoko kia Sosefo. ʼI te ʼu foha fuli ʼo Sakopo, neʼe ko Sosefo ʼae neʼe ʼofa mamahi ai. Pea neʼe maheheka ai ʼona tehina. Neʼe natou fakatau ia Sosefo ʼi tona taʼu 17 ohage ko he tagata kaugana. (Senesi 37:2-4, 23-28) Lolotoga teitei taʼu ʼe 13, neʼe maʼuli mamahi ʼi Esipito, neʼe ko he kaugana pea ki muli age neʼe pilisoni. Neʼe mamaʼo ʼaupito ia Sosefo ʼi tana tamai ʼae neʼe ʼofa mamahi ai. Neʼe feala pe ʼaki te ʼu aluʼaga ʼaia ke lotovaivai ai mo loto ita, kae neʼe mole hoko he faʼahi feia. Kotea ʼae neʼe tokoni ki ai?
4. (1) Kotea ʼae neʼe fakakaukauʼi tafito e Sosefo ʼi tana nofo ʼi te pilisoni? (2) Neʼe tali feafeaʼi ia Sehova ki te ʼu faikole ʼa Sosefo?
4 Lolotoga te maʼuli mamahi ʼa Sosefo ʼi te pilisoni, neʼe lagi ina fakakaukauʼi tafito te faʼahiga tokoni ʼae ʼa Sehova kia ia. (Senesi 39:21; Pesalemo 105:17-19) Neʼe lagi ina toe manatuʼi mo te ʼu moemisi fakapolofeta ʼae neʼe ina fai ʼi tana kei tupulaga pea neʼe tui papau ʼe nofo Sehova mo ia. (Senesi 37:5-11) ʼE mahino papau ia, neʼe faikole tuʼumaʼu kia Sehova ʼo fakaha ki ai te ʼu meʼa fuli ʼae ʼi tona loto. (Pesalemo 145:18) Pea neʼe tali e Sehova te ʼu faikole ʼa Sosefo ʼaki tana foaki ki ai te fakapapau ʼae ʼe nofo anai “mo ia” ʼi ʼona ʼahiʼahi fuli.—Gaue 7:9, 10. * (Vakaʼi te kiʼi nota.)
5. ʼE tokoni feafeaʼi mai “te tokalelei ʼo te ʼAtua” ke toe lahi age tatatou fia tauhi kia Sehova?
5 ’E tatau aipe pe kotea he fihifihia ʼe tou tau mo ia, kae ʼe tou maʼu “te tokalelei ʼo te ʼAtua” ʼae ʼe ina puipui ʼotatou “fealagia fakakaukau” pea ʼe tokoni mai ke tou lotofimalie. (Lau ia Filipe 4:6, 7.) Ka tou lotohoha, ko “te tokalelei ʼo te ʼAtua” ʼe feala ke ina foaki mai te malohi ke tou tauhi tuʼumaʼu kia Sehova. Tou vakaʼi he ʼu faʼifaʼitaki ʼo he ʼu tehina mo tuagaʼane ʼi totatou temi neʼe natou tau mo he ʼu aluʼaga feia.
KOLE KIA SEHOVA KE TOKONI ATU KE KE TOE MAʼU TE TOKALELEI
6, 7. ʼE lava tokoni feafeaʼi mai ʼatatou faikole ke tou toe maʼu ai he fakakaukau ʼe tokalelei? Tuku mai he faʼifaʼitaki.
6 Ko Ryan mo Juliette neʼe ko te ʼu pionie makehe fakatemi, kae ʼi tanā iloʼi ʼae kua ʼosi tanā selevisi ʼaia neʼe nā lotomamahi ai. ʼE ui fenei e Ryan: “Neʼe ma tuku te aluʼaga ʼaia kia nima ʼo Sehova ʼi te faikole. Neʼe ma mahino neʼe ko he faigamalie lelei ʼaia ke ma tuku tamā falala kia te ia. Tokolahi ʼi toma kokelekasio neʼe kei foʼofoʼou ʼi te moʼoni, koia neʼe ma kole ai kia Sehova ke tokoni mai ke ma tuku he faʼifaʼitakiʼaga lelei ʼi te tui.”
7 Neʼe feafeaʼi te tali ʼa Sehova ki tanā faikole? ʼE ui fenei e Ryan: “ ʼI te hili ʼo tamā faikole, neʼe puli atu aipe ʼamā manatu fakatupu mamahi pea mo ʼamā tuʼania. Ko te tokalelei ʼo te ʼAtua neʼe ina puipui ʼoma loto mo ʼoma fealagia fakakaukau. Neʼe ma mahino ai ʼe kei feala pe ke fakaʼaogaʼi maua e Sehova mo kapau ʼe ma taupau he manatu ʼe lelei.”
8-10. (1) ʼE tokoni feafeaʼi mai te laumalie ʼo te ʼAtua moka tou lotohoha? (2) ʼE lava tokoni feafeaʼi mai ia Sehova moka ʼe tou fakamuʼamuʼa tatatou tauhi kia te ia?
8 ʼE feala ki te laumalie ʼo te ʼAtua ke ina fakafimalieʼi tatou. Pea ʼe toe feala ke ina fakaha Soane 14:26, 27.) Tou vakaʼi pe kotea ʼae neʼe hoko kia Philip mo Mary, ko he taumatuʼa neʼe nā Petelite lolotoga teitei taʼu ʼe 25. ʼI tanā kua mavae leva ʼi te Petele, neʼe mamate ʼanā faʼe mo te tahi kaiga ʼo Philip ʼi te vaha pe ʼo mahina ʼe fa. Pea neʼe tonu ke nā taupau te tamai ʼa Mary, ʼae neʼe kua puli tona ʼatamai.
mai he ʼu vaega Fakatohi-tapu ʼe tokoni mai anai ke tou mahino pe kotea ʼae ʼe maʼuhiga moʼoni ʼi te maʼuli. (Lau ia9 ʼE ui fenei e Philip: “Neʼe au ui pe ʼe au katakiʼi lelei te aluʼaga ʼaia, kae neʼe ʼi ai te faʼahi neʼe kei totō ia au. Pea neʼe au lau leva ia Kolose 1:11 ʼi he alatike ʼo Te Tule Leʼo ako. ʼE moʼoni, neʼe au maʼu te faʼa kataki, kae neʼe tonu ke au ‘ ʼutakiʼi ia meʼa fuli ʼaki te kataki fualoa mo te fiafia.’ ʼAki te vaega ʼaia neʼe au manatuʼi ai, ko toku fiafia ʼe mole fakalogo ki te ʼu aluʼaga ʼae ʼe hoko ʼi toku maʼuli, kae ki te ʼu fua lelei ʼo te laumalie ʼo te ʼAtua ʼae ʼe au maʼu ʼi toku maʼuli.”
10 Neʼe fakamuʼamuʼa e Philip mo Mary ia tanā tauhi kia Sehova, pea neʼe ina tapuakinaʼi naua ʼi te ʼu aluʼaga kehekehe. Ki muli age neʼe nā mavae ʼi te Petele, pea neʼe nā maʼu he ʼu ako Tohi-Tapu neʼe tuputupu lelei. Neʼe natou loto ke fai liuliuga ʼanatou ako Tohi-Tapu ʼi te vahaʼa. ʼE ui fenei e Mary: “Ko ʼamā ako Tohi-Tapu ʼaia, neʼe ko toma fiafiaʼaga pea neʼe ko he faʼahiga ui mai ʼaia ʼa Sehova kia maua ko meʼa fuli ʼe to lelei pe anai.”
FAIGAʼI KE TAPUAKINAʼI KOE E SEHOVA
11, 12. (1) Kotea ʼae neʼe fai e Sosefo ke tupu ai hona tapuakinaʼi e Sehova? (2) Neʼe fakapale feafeaʼi e Sehova ia Sosefo?
11 Ka hoko he ʼu fetogi fakapunamaʼuli ʼi totatou maʼuli, ʼe feala pe ke tou lotohoha ʼo tou manatu tafito ai ki ʼotatou fihifihia. Neʼe hoko te aluʼaga ʼaia kia Sosefo. Kae neʼe ina filifili ke ina fai ia meʼa fuli neʼe ina lavaʼi ʼi te aluʼaga ʼae neʼe tau mo ia. Ohage la neʼe gaue kinakina ia Sosefo maʼa Potifale, pea neʼe toe gaue kinakina ʼi te pilisoni ʼi te ʼu gaue fuli neʼe hinoʼi age e te pule ʼo te fale pilisoni.—Senesi 39:21-23.
12 ʼI te tahi ʼaho, neʼe hinoʼi ia Sosefo ke tokaga ki te ʼu tagata pilisoni ʼe toko lua neʼe gaue ʼi te fale hau ʼo Falaone. Neʼe agalelei Sosefo kia naua, pea neʼe nā fakamatala faʼifaʼitaliha age kia ia ʼonā tuʼania mo ʼanā moemisi fakamataku ʼae neʼe nā fai ʼi te po kua hili. (Senesi 40:5-8) Kae ʼi te temi ʼaia, neʼe mole iloʼi e Sosefo ʼe iku anai tanatou faipalalau ʼaia ki tona fakaʼateaina. Hili ki ai taʼu ʼe lua, neʼe fakamavae leva Sosefo ʼi te fale pilisoni pea neʼe liliu ko he takitaki malohi ʼo Esipito. Neʼe tuʼulaga lua ia Sosefo ʼo hoa atu kia Falaone.—Senesi 41:1, 14-16, 39-41.
13. Kotea ʼe feala ke tou fai ke tapuakinaʼi tatou e Sehova, tatau aipe pe kotea te aluʼaga ʼe tou tau mo ia?
Pesalemo 37:5) ʼE tatau aipe pe ʼe mole kei tou iloʼi he meʼa ke tou fai peʼe tou hoha, kae ʼe mole tou “hala ʼamanaki” anai. (2 Kolonito 4:8; nota) ʼE nofo anai Sehova mo tatou, tafito moka tou fakamuʼamuʼa te gaue faifakamafola.
13 ʼE lagi feala pe ke tou felaveʼi mo he aluʼaga ohage ko Sosefo, ʼo mole kei ʼi ai hotatou malohi. Kae kapau ʼe tou faʼa kataki mo tou faiga fakamalotoloto, ʼe tapuakina anai tatou e Sehova. (TOKAGA TAFITO KI TAU FAIFAKAMAFOLA
14-16. Neʼe tokaga tafito feafeaʼi ia Filipo ki te gaue faifakamafola logo la te ʼu fetogi ʼae neʼe hoko ʼi tona maʼuli?
14 Ko Filipo te tagata faifakamafola neʼe ko he faʼifaʼitakiʼaga lelei he neʼe tokaga tafito ki tana faifakamafola logo la te ʼu fetogi ʼae neʼe hoko ʼi tona maʼuli. ʼI te tahi temi, neʼe ʼi ai tona pilivilesio foʼou ʼi Selusalemi. (Gaue 6:1-6) Pea neʼe fetogi katoa ai leva tona maʼuli. Hili te matehi ʼo Setefano, neʼe fakamataku te fakatagaʼi ʼo te kau Kilisitiano, pea neʼe natou feholaki ai mai Selusalemi. Ko Filipo, ʼi tana fia maʼumaʼua ki te tauhi kia Sehova, neʼe alu ʼo faifakamafola ki te hahaʼi ʼo te kolo ko Samalia, he neʼe ʼaoga ke natou logo ki te logo lelei.—Mateo 10:5; Gaue 8:1, 5.
15 Neʼe taki ia Filipo e te laumalie ʼo te ʼAtua ki te ʼu koga meʼa ʼae neʼe tonu ke alu ki ai, pea neʼe mulimuli aipe. Koia, neʼe fakaʼaogaʼi ai e Sehova ia ia ke alu ʼo faifakamafola ʼi te ʼu koga meʼa ʼae neʼe heʼeki logo te hahaʼi ki te logo lelei. Tokolahi te kau Sutea neʼe natou meʼa noaʼi mo gaohi koviʼi ia te kau Samalitana. Kae neʼe mole maʼu e Filipo he ʼu manatu fakapalatahi, pea neʼe fiafia ia ʼi te tala ʼo te logo lelei kia natou. Pea neʼe fagono te kau Samalitana kia Filipo, ʼo natou “tokagaʼi fakalelei” te ʼu faʼahi ʼae neʼe talanoa ki ai.—Gaue 8:6-8.
16 Hili ia, neʼe taki leva e te laumalie ʼo te ʼAtua ia Filipo ke alu ʼo faifakamafola ʼi te ʼu kolo ko Asoti mo Sesalea, he neʼe kaugā malie te kau Senitile ʼae neʼe maʼuʼuli ai. (Gaue 8:39, 40) Pea neʼe toe fetogi ia tona maʼuli. Neʼe ina maʼu leva tona kiʼi famili. Kae logo la te ʼu fetogi ʼae neʼe hoko ʼi tona maʼuli, neʼe maʼumaʼua aipe ʼi te gaue faifakamafola. Pea neʼe haga tapuakinaʼi e Sehova ia Filipo mo tona kiʼi famili.—Gaue 21:8, 9.
17, 18. Moka hoko he ʼu fetogi ʼi ʼotatou maʼuli, ʼe tokoni feafeaʼi mai tatatou maʼumaʼua ʼi te gaue faifakamafola?
17 ʼE ui e te tokolahi ʼi te selevisi temi katoa, logo la te ʼu fetogi ʼae ʼe hoko ʼi ʼonatou maʼuli, kae ʼe natou maʼu te fiafia mo he ʼu manatu ʼe lelei ʼuhi pe ko tanatou tokakaga tafito ki te gaue faifakamafola. Tou vakaʼi te faʼifaʼitaki ʼo te taumatuʼa ʼi Afelika Saute ʼe higoa ko Osborne mo Polite. Hili tanā mavae ʼi te Petele, neʼe nā manatu ʼe faigafua anai te maʼu ʼo hanā gaue vaeluaʼi temi pea mo honā nofoʼaga. Kae ʼe ui fenei e Osborne: “ ʼI tamā manatu, ʼe maʼu anai hamā gaue, kae neʼe mole hoko te faʼahi ʼaia.” ʼE ui fenei e Polite: “Lolotoga mahina ʼe tolu neʼe mole maʼu hamā gaue, pea neʼe mole pe la ma tanaki hamā kiʼi foʼi falā. Neʼe faigataʼa ʼaupito.”
18 Kotea ʼae neʼe tokoni kia Osborne mo Polite ʼi te aluʼaga faigataʼa ʼaia? ʼE ui fenei e Osborne: “Ko tamā faifakamafola fakatahi mo te kokelekasio, neʼe tokoni mai ke ma manatuʼi tuʼumaʼu ʼamā fakatuʼutuʼu pea ke ma taupau he ʼu manatu ʼe lelei.” Neʼe mole nā tuku ke taʼofi naua e ʼonā tuʼania, kae neʼe nā fakatotonu ke nā maʼumaʼua ʼi te gaue faifakamafola. Neʼe nā maʼu ai he toe fiafia lahi. Pea ʼe toe ui fenei e Osborne: “Neʼe ma olo ʼo kumi gaue ʼi te ʼu faʼahi fuli pe, pea neʼe ma maʼu ai tamā gaue.”
FALALA KATOA KIA SEHOVA
19-21. (1) Kotea ʼae ka tokoni mai anai ke tou taupau te tokalelei ʼo tatatou fakakaukau? (2) Kotea te ʼu fua lelei ʼe tou maʼu moka ʼe tou fakamamahani mo he aluʼaga fakapunamaʼuli neʼe hoko?
ʼE malohi moʼoni ʼatatou felogoi mo Sehova he neʼe tou fakamamahani mo te ʼu fetogi ʼae neʼe hoko ʼi ʼotatou maʼuli
19 Ohage ko tatatou vakaʼi, kapau ʼe tou fai ia meʼa fuli ʼe tou lavaʼi logo la te ʼu aluʼaga ʼae ʼe hoko ʼi ʼotatou maʼuli mo tou falala katoa kia Sehova, ʼe feala ai anai ke tou taupau he ʼatamai ʼe tokalelei ʼi te ʼu ʼahiʼahi fuli. (Lau ia Mikea 7:7.) ʼAki te temi ʼe lagi tou mahino ai, ʼe malohi moʼoni ʼatatou felogoi mo Sehova he neʼe tou fakamamahani mo te ʼu fetogi ʼae neʼe hoko ʼi ʼotatou maʼuli. ʼE ui e Polite, neʼe ina taʼofi he ako mai tona hinoʼi e te Petele ki te gaue faifakamafola: neʼe mahino ai leva pe kotea te fakaʼuhiga ʼo te falala katoa kia Sehova ʼi te ʼu faigataʼaʼia. ʼE ina ui fenei: “Neʼe malohi ai ʼaku felogoi pea mo ia.”
20 Ko Mary ʼae neʼe tou talanoa ki ai ʼi muʼa atu, ʼe pionie katoa pea ʼe kei tokaga pe ki tana tamai. ʼE ina ui fenei: “Kua au iloʼi ʼi te temi nei, ka au lotohoha, ʼe ʼai haku kiʼi tuʼu moʼo faikole pea mo au fakalotofimalieʼi toku loto. ʼE mahino ia, ko te ako maʼuhiga ʼae neʼe au taʼofi, ko te tuku ia meʼa fuli kia nima ʼo Sehova, pea ʼe ʼaoga tuʼumaʼu anai te faʼahi ʼaia ʼi te ka haʼu.”
21 ʼE ui e Lloyd mo Alexandra, neʼe ʼahiʼahiʼi tanā tui e te ʼu fetogi ʼae neʼe hoko ʼi ʼonā maʼuli ʼi hona aluʼaga neʼe mole nā ʼamanaki ki ai. Kae ʼe nā fakatokagaʼi, neʼe tokoni moʼoni te ʼu ʼahiʼahi ʼaia kia naua. ʼI te temi nei kua nā iloʼi, ʼe feala ke nā maʼu he fakalotofimalie moka nā tau mo he ʼu faigataʼaʼia ʼuhi kua malohi tanā tui. Pea ʼe nā logoʼi kua nā liliu ko he tagata mo he fafine ʼe lelei age.
22. Kapau ʼe tou fai ia meʼa fuli ʼe tou lavaʼi logo la te ʼu aluʼaga ʼe tou tau mo ia, kotea ʼae ʼe feala ke tou tui papau ki ai?
22 ʼI te tuʼu ʼaeni, ʼe feala pe ke hoko he ʼu aluʼaga fakapunamaʼuli ʼi ʼotatou maʼuli. ʼE feala pe ke hinoʼi tatou ki he tahi gaue ʼi te tauhi kia Sehova, peʼe tou mahahaki, peʼe tou maʼu he ʼu maʼua fakafamili foʼou. Tatau aipe pe kotea ʼae ʼe feala ke hoko, kae ʼe feala ke ke tui papau ʼe tokaga Sehova kia koe, pea ʼe tokoni atu anai ʼi tona temi totonu. (Hepeleo 4:16; 1 Petelo 5:6, 7) ʼI te temi nei, fai ia meʼa fuli ʼe ke lavaʼi logo la te ʼu aluʼaga ʼae ʼe ke tau mo ia. Faikole ki tau Tamai, ia Sehova, pea mo ke ako ke ke falala katoa kia te ia. Kapau ʼe ke fai feia, ʼe ke maʼu tuʼumaʼu pe anai te tokalelei ʼo te fakakaukau ʼae ʼe haʼu mai ia Sehova, tatau aipe pe kotea he ʼu fetogi ʼe hoko ʼi tou maʼuli.
^ pal. 4 Hili ki ai he ʼu taʼu, neʼe fakahigoaʼi e Sosefo tona ʼuluaki foha ko Manase koteʼuhi neʼe ina ui fenei: “Kua tuku e te Atua ke au galoi oku mamahi fuli.” Neʼe mahino ia Sosefo ko tona foha ʼe ko he meʼa ʼofa mai ia Sehova moʼona fakalotofimalieʼi.—Senesi 41:51.