1919—Kua Hili Nei Ki Ai Taʼu ʼe Teau
ʼI TE taʼu 1919, neʼe kua ʼosi leva te Tau Lahi (ʼae ki muli age neʼe fakahigoaʼi ko te ʼUluaki Tau Fakamalamanei). Neʼe hoko te tau ʼaia lolotoga taʼu ʼe fa. ʼI te fakaʼosi ʼo te taʼu 1918 neʼe fakagata ai leva te ʼu tau. Pea ʼi te ʼaho 18 ʼo Sanualio 1919 neʼe kamata ai te Fono Lahi o ʼuhiga mo te Tokalelei ʼi Palesi. Neʼe fakafealagia ai te fai ʼo he fakamoʼoni ʼae ko te traité de Versailles moʼo fakagata te ʼu tau ʼae ʼa Siamani mo te ʼu Fenua Fakatahi. Neʼe sinie te traité ʼaia ʼi te ʼaho 28 ʼo Sunio 1919.
Neʼe toe fakagafua e te traité ʼaia ke fakatuʼu te kautahi foʼou ʼae ʼe fakahigoaʼi ko te Sosiete ʼo te ʼu Puleʼaga. Ko te fakatuʼutuʼu ʼa te kautahi ʼaia “ko te faigaʼi ke felogoi te ʼu puleʼaga pea mo fakatuʼu te tokalelei pea mo te haofaki ʼo te hahaʼi.” Neʼe kaugā malie te ʼu lotu ʼo te Keletiate neʼe natou lagolago ki te fakatuʼutuʼu ʼaia. Ohage la ko te Fono Fakapuleʼaga ʼo te ʼu ʼEkelesia ʼo Kilisito ʼi Amelika neʼe ui ai ʼo ʼuhiga mo te kautahi ʼaia, “ ʼe ina fakafofoga ia te Puleʼaga ʼo te ʼAtua ʼi te kele.” Pea neʼe ina toe fakaha tana lagolago ki te faʼahi ʼaia ʼi tana fekauʼi te ʼu teleke ki te Fono Lahi ʼo ʼuhiga mo te Tokalelei ʼi Palesi. Neʼe ui e te tagata ʼi te ʼu teleke ʼaia, ko te Fono Lahi ʼaia “ ʼe ina fakailoga te kamataʼaga ʼo he temi foʼou ʼi te hisitolia ʼo te tagata.”
Ko he temi foʼou leva ʼae neʼe kamata, kae neʼe mole ʼuhi ko natou ʼae neʼe kau ki te Fono Lahi ʼo te tokalelei. ʼI tona fakahagatonu, neʼe kamata ʼi te taʼu 1919 ia he aluʼaga foʼou ki te gaue faifakamafola. Neʼe foaki e Sehova ki ʼana kaugana ia tona malohi ke toe lahi age tanatou faifakamafola. Kae neʼe tonu muʼa ke fai he fetogi lahi ʼo ʼuhiga mo te kau Ako ʼo Te Tohi-Tapu.
KO HE TONU ʼE MOLE FAIGAFUA
ʼI te Moeaki ʼaho 4 ʼo Sanualio 1919, neʼe tonu ke fakanofo ia he ʼu tehina takitaki ʼo te kautahi Watch Tower Bible and Tract Society. ʼI te temi ʼaia, neʼe ko te tehina ko Joseph F. Rutherford ʼae neʼe ina takitaki ia te kautahi ʼa Sehova. Kae neʼe pilisoni ʼi Atlanta, ʼi Géorgie, ʼi Amelika ʼo fakatahi mo ʼihi tehina ʼe toko fitu. Neʼe pilisoniʼi natou kae neʼe mole natou fai he meʼa ʼe kovi. Neʼe tonu ki te ʼu tehina ke natou toʼo he tonu. Pe ʼe toe fakanofo te ʼu tehina takitaki ʼi te pilisoni peʼe tonu ke fetogi ia natou.
ʼI tana ʼi te pilisoni, ko te tehina ko Rutherford neʼe tuʼania ki te ka haʼu ʼo te kautahi. Neʼe ina iloʼi ʼe leleiʼia e ʼihi tehina ke fakanofo he pelesita foʼou. Koia neʼe ina fai ai he tohi kia natou ʼae neʼe fakatahitahi ki te toʼo ʼo te tonu ʼaia. Neʼe ina ui ʼi tana tohi ke fakanofo ko te pelesita ia te tehina ko Evander J. Coward. Neʼe fakamatala e te tehina ko Rutherford tona agaaga, ko he tahi ʼe “fakatokatoka,” mo “agamalū” pea ʼe “agatonu ki te ʼAliki.” Kae tokolahi te ʼu tehina neʼe natou loto ke holoʼi te fili ʼo he ʼu tehina takitaki kia mahina ʼe ono. Neʼe manatu tahi te ʼu avoka ʼo te
ʼu tehina ʼae neʼe pilisoni mo te tonu ʼaia. Kae lolotoga tanatou faipalalau ʼaia, neʼe iita ʼihi tehina.Neʼe fakamahino leva e Richard H. Barber ki muli age, te aluʼaga ʼae neʼe feala ke ‘malu ai ʼonatou loto.’ Neʼe ui fenei e te tehina: “ ʼE mole ko au ko he tagata poto ʼi te lao, kae ʼe au iloʼi te lao ʼa te tagata agatonu. Ko te meʼa ʼae ʼe fakamaʼua mai e te ʼAtua, ʼe ko te agatonu. Ko te faʼahiga fakaha ʼae ʼe lelei tukupau ʼo tatatou agatonu ki te ʼAtua, ko te toe fakanofo ʼo te tehina ko Rutherford ke pelesita.”—Pes. 18:26.
Neʼe fakamatala ki muli age e Alexander Macmillan ʼae neʼe pilisoni mo ia, neʼe hokaʼi e te tehina ko Rutherford te kaupa ʼo tona koga fale mo ina ui fenei age: “ ʼAumai age tou nima.” Pea neʼe ina fakatoʼo age leva he tohi. Neʼe mahino atu aipe te tehina ko Macmillan ki te tohi ʼaia. Neʼe ui fenei ʼi te tohi: “RUTHERFORD WISE VAN BARBER ANDERSON BULLY PEA MO SPILL TEHINA TAKITAKI TOLU ʼULUAKI KOMITE TAKITAKI ʼOFA FAKATAUTEHINA.” Ko tona fakaʼuhiga, neʼe toe fakanofo te kau ʼuluaki takitaki fuli. Pea ʼe toe kau pe ia te tehina ko Joseph pea mo William Van Amburgh ki te komite takitaki. Koia ʼe toe nofo pe anai te tehina ko Rutherford ko te pelesita ʼo te kautahi.
KUA FAKAʼATEAINA
ʼI te kei pilisoni ʼa te ʼu tehina ʼe toko valu, neʼe fakaui leva e te kau Ako ʼo Te Tohi-Tapu ki te hahaʼi ke natou sinie tanatou kole. Ko tanatou kole ki te puleʼaga moʼo fakaʼateainaʼi te ʼu tehina mai te pilisoni. Neʼe kole e te ʼu tehina mo tuagaʼane lototoʼa ʼaia ki ni hahaʼi ʼe mole tauhi kia Sehova ke natou sinie tanatou kole, ʼo ha mai ai tanatou lototoʼa. Pea neʼe ko te toko 700 000 hahaʼi ʼae neʼe natou sinie tanatou kole. Kae ʼi muʼa ʼo te fakaha ʼo tanatou kole ki te puleʼaga, neʼe kua fakaʼateainaʼi te tehina ko Rutherford pea mo ʼona tehina. Neʼe natou mavae mai te pilisoni ʼi te Feliafa ʼaho 26 ʼo Malesio 1919.
Neʼe fai e te tehina ko Rutherford ia he akonaki kia natou ʼae neʼe natou fakatalitali ia ia. Neʼe ina ui fenei: “ ʼE au tui papau, ko te ʼahiʼahi ʼae neʼe tou tau mo ia, ko he teuteuʼi pe ʼaia ʼo tatou ki te ʼu temi faigataʼa ʼaupito ʼae ka hoko mai. . . . Neʼe mole kotou tau pe moʼo fakaʼateainaʼi ʼokotou tehina mai te pilisoni. Neʼe mole ko te fakatuʼutuʼu tafito ʼaia. . . . Kae neʼe kotou tau moʼo fakamoʼoni ki te Moʼoni, pea neʼe maʼu e natou ʼae neʼe kau ki te tau ʼaia ia he tapuakina taulekaleka.”
ʼE ha ʼi te ʼu aluʼaga ʼae neʼe hoko ʼo ʼuhiga mo te fakamauʼi ʼo ʼotatou tehina, neʼe ko Sehova ʼae neʼe ina takitaki te ʼu aluʼaga ʼaia. ʼI te ʼaho 14 ʼo Maio 1919, neʼe fai leva e te telepinale (cour d’appel) te tonu ʼaeni: “ ʼI te aluʼaga ʼaeni, neʼe mole fai ki te kau pilisoni ia te . . . faifakamau faitotonu ʼae neʼe maʼua ke fai kia natou, pea koia ʼae neʼe holoʼi ai te tonu.” Neʼe tauteaʼi te ʼu tehina takua neʼe natou fai he ʼu hala mamafa. Pea ka na pau la neʼe fakamolemole pe neʼe fakasiʼisiʼi pe tonatou fakatuʼā, ʼe mahino ia neʼe mole feala ke molehi tanatou tuʼa. Neʼe mole he tukugakovi neʼe fai ʼo ʼuhiga mo natou. Koia, neʼe taupau aipe e te Tuʼi Fakamau ko Rutherford ʼona fealagia ʼae ke ina fakafofoga te ʼu kaugana ʼa Sehova ia muʼa ʼo te Telepinale Lahi ʼo Amelika. Pea neʼe tuʼa lahi tana fakahoko te faʼahi ʼaia hili tona fakaʼateainaʼi.
NEʼE NATOU FAKATOTONU KE NATOU FAIFAKAMAFOLA
Neʼe manatuʼi fenei e te tehina ko Macmillan: “ ʼE mole matou fakaʼaoʼaoganoa anai ʼo atalitali pe ke hoki ʼave matou e te ʼAliki ki te lagi. Neʼe matou iloʼi ʼe tonu anai ke matou fai he aluʼaga ke matou mahino ai pe ʼe kotea moʼoni te finegalo ʼo te ʼAliki.”
Kae neʼe mole feala ke hoko atu e te ʼu tehina ʼo ʼatatou pilo lalahi ia te gaue ʼae neʼe natou fakahoko lolotoga he ʼu taʼu. Kotea tona tupuʼaga? Koteʼuhi, lolotoga tanatou pilisoni, neʼe maumauʼi te ʼu lauʼi ukamea fuli ʼae neʼe fakaʼaogaʼi moʼo ta te ʼu tohi. Neʼe ko he aluʼaga fakalotovaivai, pea neʼe feʼekeʼaki ai ʼihi tehina pe ko te fakaʼosi ʼaia ʼo te gaue faifakamafola.
Neʼe kei ʼi ai koa he hahaʼi ʼe natou fia logo ki te logo ʼo te Puleʼaga ʼae ʼe fakamafola e te kau Ako ʼo Te Tohi-Tapu? Neʼe fai ai e te tehina ko Rutherford ia he akonaki ki te kaugā malie moʼo tali ki te fehuʼi ʼaia. Neʼe ui fenei e te tehina ko Macmillan: “Ka na pau la neʼe mole haʼu he tahi ʼi te fono ʼaia, ka na ʼaua la neʼe matou tuku te gaue faifakamafola.”
ʼI te ʼAhotapu ʼaho 4 ʼo Maio 1919, neʼe fai ai e te tehina ko Rutherford ia he akonaki ki te kaugā malie logo la neʼe mahaki kovi. Neʼe fai te akonaki ʼaia ʼi Los Angeles, ʼi Californie pea koʼeni tona kupu tafito, “ Un espoir pour l’humanité affligée ” (“He ʼAmanaki Ki Te Malamanei ʼAe ʼe Mamahi”). Neʼe teitei toko 3 500 ia natou ʼae neʼe ʼomai ʼo fakalogo ki te akonaki ʼaia. Neʼe ʼi ai te tahi hahaʼi neʼe toko lauʼi teau neʼe ʼomai, kae neʼe mole feala ke natou kau ai he neʼe kua kaugā malie fau. ʼI te ʼaho ake, neʼe toe fai e te tehina ko Rutherford ia te akonaki ʼaia ia muʼa ʼo te toko 1 500 hahaʼi. Neʼe kua maʼu leva e te ʼu tehina ia te tali ki tanatou fehuʼi, neʼe kei ʼi ai pe he hahaʼi ʼe fia logo ki te logo lelei.
Ko te ʼu fakatuʼutuʼu ʼae neʼe fai e te ʼu tehina ki muli age, neʼe ʼi ai ʼona fua lelei ki te faifakamafola ʼa te Kau Fakamoʼoni ʼa Sehova ʼo te temi ʼaia ʼo kaku mai ki te temi nei.
TE TUPUTUPU ʼO TE ʼU TAʼU KI MULI AGE
Neʼe fakaha ʼi Te Tule Leʼo (Fakapilitania) ʼo te ʼaho 1 ʼo ʼAukusito 1919, ʼe fai anai he fakatahi lahi ʼi te kamata ʼo te mahina ʼo Sepetepeli ʼi Cedar Point, ʼi
Ohio. Ko Clarence Beaty ʼae neʼe ko he tupulaga mai Missouri neʼe kau ʼi te kau Ako ʼo Te Tohi-Tapu, neʼe ina ui fenei: “Neʼe mahino lelei ki te hahaʼi fuli, neʼe tonu ke natou kau ai.” Neʼe ko te toko 6 000 tupu ʼu tehina mo tuagaʼane neʼe kau ʼi te fakatahi lahi ʼaia, ko tona fakaʼuhiga neʼe laka maumau age ia te nofoʼaki. Pea neʼe ko te toko 200 tupu ʼae neʼe papitema ʼi te Vai Tafe ʼo Érié, ʼo lahi ʼaupito ai te fiafia.ʼI te nima ʼaho ʼo te fakatahi lahi, ʼi te ʼaho 5 ʼo Sepetepeli 1919, neʼe fakaha ai e te tehina ko Rutherford ʼi tana akonaki “ Discours aux collaborateurs ” (“Akonaki Ki Te ʼu Kaugā Gaue”) ia te nusipepa foʼou, L’Âge d’Or. * Neʼe kotea te fakatuʼutuʼu ʼo te nusipepa ʼaia? “Ko te talanoa ki te ʼu aluʼaga maʼuhiga ʼae ʼe lolotoga hoko, pea mo fakamahino ʼaki te Tohi-Tapu pe koʼe ʼe hoko te ʼu aluʼaga ʼaia.”
Neʼe fakalotomalohiʼi te kau Ako ʼo Te Tohi-Tapu fuli ke natou faifakamafola ʼaki he faʼafai ʼo natou fakaʼaogaʼi te nusipepa foʼou ʼaia. Ko te tohi neʼe ina fakamahino te faʼahiga fakatuʼutuʼu ʼo te faifakamafola, neʼe ui fenei ai: “ ʼE tonu ke manatuʼi e te kau Kilisitiano fuli ʼae kua [papitema], ʼe ko he toe pilivilesio te tauhi ʼae kia Sehova. ʼE tonu ke natou toʼo te faigamalie ʼaia ʼi te temi nei ke natou faiga malohi ʼi te fakamafola ʼae ka fakahoko ʼi te malamanei katoa.” Neʼe fakaofoofo tanatou tali te fakaafe ʼaia ke natou kau ki te faifakamafola. Neʼe natou faifakamafola ʼaki he faʼafai, koia ʼi te mahina ʼo Tesepeli, neʼe ko te toko 50 000 hahaʼi ʼae neʼe natou fakaui hanatou nusipepa foʼou.
ʼI te fakaʼosi ʼo te taʼu 1919, neʼe toe fai leva e te ʼu kaugana ʼa Sehova te ʼu fakatuʼutuʼu koteʼuhi kua natou toe lotomalohi. Pea tahi, neʼe lahi te ʼu lea fakapolofeta neʼe kua hoko ʼo ʼuhiga mo te ʼu ʼaho fakaʼosi. Neʼe fakakikite ia Malakia 3:1-4 kua fakaʼosi te ʼahiʼahi pea mo te fakamaʼa ʼo te hahaʼi ʼa Sehova. Neʼe kua fakaʼateaina natou mai “Papiloni Lahi.” Pea neʼe fakanofo leva e Sesu “te tagata faifekau agatonu mo poto.” * (Fkha. 18:2, 4; Mat. 24:45) Koia, neʼe kua natou lotomalohi leva ke natou fakahoko te gaue ʼae neʼe foaki age e Sehova.
^ pal. 22 Ko te nusipepa L’Âge d’Or neʼe fakahigoa ʼi te 1937 ko te Consolation, pea ʼi te 1946 ko te Kotou ʼAʼala! (Réveillez-vous !).
^ pal. 24 Vakaʼi Te Tule Leʼo ʼaho 15 ʼo Sulio 2013 p. 10-12, 21-23; pea mo Te Tule Leʼo ʼo Malesio 2016 p. 29-32.