ALATIKE AKO 40
Kotou Maʼumaʼua ʼi Te Fakaʼosi ʼo Te “ ʼu ʼAho Fakamuli”
“Kotou tutuʼu malohi, mo taʼofi maʼu, pea ke lahi tuʼumaʼu ʼakotou gaue ʼi te ʼAliki.”—1 KO. 15:58.
KATIKO 58 Tou Kumi Te ʼu Kaumeʼa ʼo Te Tokalelei
TE ʼU MANATU FAKANOUNOU *
1. He koʼe ʼe tou tui papau ʼe tou maʼuʼuli ʼi “te ʼu ʼaho fakamuli”?
NEʼE kotou tutupu koa ʼi te hili ʼo te taʼu 1914? Kapau ko ia, ʼe kotou maʼuʼuli nei ʼi “te ʼu ʼaho fakamuli” ʼo te tuʼu ʼo te ʼu faʼahiga meʼa ʼaeni. (2 Tim. 3:1) Kua tou logo ki te ʼu aluʼaga ʼae neʼe fakaha fakatomuʼa e Sesu ki totatou temi. ʼE kau ai te ʼu tau, te hoge, te ʼu mafuike, te ʼu taʼi mahaki, te ʼaʼasili ʼo te agakovi pea mo te fakatagaʼi ʼo te hahaʼi ʼa Sehova. (Mat. 24:3, 7-9, 12; Luka 21:10-12) ʼE tou toe sisio foki ki te agaaga ʼa te hahaʼi ʼae neʼe fakaha fakatomuʼa e te apositolo ko Paulo. (Vaka’i te fakamatala ʼae ’i te ’a takai “ Te Agaaga ʼo Te Hahaʼi ʼi Te Temi Nei.”) Ko tatou kau Fakamoʼoni ʼa Sehova, kua tou tui papau ʼe tou maʼuʼuli nei ʼi te ʼu ʼaho fakamuli.—Mik. 4:1.
2. Ko te ʼu fehuʼi fea ʼae ʼe ʼaoga ke tou iloʼi ʼona tali?
2 ʼE mahino ia, kua tou maʼuʼuli nei ʼi te fakaʼosi ʼo “te ʼu ʼaho fakamuli,” koteʼuhi kua lahi ʼaupito te temi ʼae kua fakalaka talu mai te taʼu 1914. Kua ovi mai te ʼaho fakaʼosi, koia ʼae ʼe ʼaoga ai ke tou iloʼi te ʼu tali ki te ʼu fehuʼi maʼuhiga ʼaeni: Kotea te ʼu aluʼaga ʼae ka hoko anai ʼi te fakaʼosi ʼo “te ʼu ʼaho fakamuli”? Pea kotea ʼae ʼe loto e Sehova ke tou fai lolotoga tatatou atalitali ki te hoko ʼo te ʼu aluʼaga ʼaia?
KOTEA ʼAE KA HOKO ʼI TE FAKAʼOSI ʼO “TE ʼU ʼAHO FAKAMULI”?
3. Ka tou lau ia 1 Tesalonika 5:1-3, kotea anai te logo ʼae ka kalagaʼi e te ʼu puleʼaga?
3 Lau ia 1 Tesalonika 5:1-3. ʼE talanoa te apositolo ko Paulo ki “te ʼaho ʼo Sehova.” Ko te ʼu vaega ʼaia, ʼe fakaʼuhiga ki te temi ʼae ʼe kamata ʼaki te ʼohofi ʼo “Papiloni Lahi,” te kautahi fakamalamanei ʼo te lotu hala, pea ʼe fakaʼosi ʼaki ia Alamaketone. (Fkha. 16:14, 16; 17:5) ʼI muʼa pe ʼo te kamata ʼo te “ ʼaho” ʼaia, ʼe kalagaʼi anai e te ʼu puleʼaga te logo ʼaeni, “Tokalelei pea mo fimalie!” ʼI ʼihi temi, ʼe fakaʼaogaʼi e te kau takitaki ʼo te malamanei he ʼu kupusiga palalau feia ʼi ʼanatou faipalalau ʼae ke lelei age te ʼu felogoi ʼa te ʼu puleʼaga. * Kae ko te tala ʼae “tokalelei pea mo fimalie,” ʼe kehekehe tona fakamatala ʼi te Tohi-Tapu. Kotea tona tupuʼaga? Ka hoko te aluʼaga ʼaia, ʼe manatu anai te tokolahi kua lava lelei te gaue ʼa te kau takitaki ke maʼu e te hahaʼi ia he maʼuli fimalie ʼi te malama ʼaeni. Kae ʼi tona fakahagatonu, ʼe kamata anai te “toe mamahi lahi” pea ʼe ‘hoko fakafokifa anai ia te fakaʼauha.’—Mat. 24:21.
ʼAua naʼa ke tuku ke fakahalaʼi koe e te logo “Tokalelei pea mo fimalie” ʼae ka kalagaʼi e te ʼu puleʼaga (Vakaʼi te palakalafe 3-6) *
4. (1) Kotea ʼae ʼe kei tonu ke tou iloʼi ʼo ʼuhiga mo te tala ʼo ‘te tokalelei pea mo te fimalie’? (2) Kotea ʼae kua tou iloʼi ʼo ʼuhiga mo te aluʼaga ʼaia?
4 ʼE ʼi ai ʼihi aluʼaga kua tou iloʼi ʼo ʼuhiga mo te tala ʼo te ‘tokalelei pea mo te fimalie.’ Kae ʼe ʼi ai ʼihi aluʼaga ʼe mole tou iloʼi. ʼE mole tou iloʼi pe ʼe kotea anai ka ina uga te kau takitaki ke natou tala te logo ʼaia pea mo feafeaʼi tona faʼahiga tala. Pea ʼe mole tou iloʼi pe ʼe lahi anai te ʼu logo peʼe ko he logo pe ʼe tahi. Kae ʼe tou iloʼi te aluʼaga ʼaeni: ʼE mole tonu anai ke tou tui ʼe feala ke fakatuʼu te tokalelei ʼi te malamanei e te kau takitaki. Ko te logo ʼaia ʼae ʼe ui mai ʼi te Tohi-Tapu ke tou tokakaga ki ai. ʼE ko te fakailoga ʼaia kua vave hoko mai “te ʼaho ʼo Sehova.”
5. Ka tou lau ia 1 Tesalonika 5:4-6, kotea ʼae ʼe tonu ke tou fai moʼo teuteuʼi ʼo tatou ki “te ʼaho ʼo Sehova”?
5 Lau ia 1 Tesalonika 5:4-6. ʼE fakaha mai e Paulo pe ʼe kotea ʼae ʼe tonu ke tou fai moʼo teuteuʼi ʼo tatou ki “te ʼaho ʼo Sehova.” ʼE mole tonu ke “tou momoe ohage ko ʼihi,” kae ke tou “nonofo ʼalaʼala” pea mo tou nofo tokaga. Ohage la, ʼe tonu ke tou tokakaga ke mole tou kau ki te ʼu meʼa fakapolitike. Kapau ʼe tou kau ki te ʼu aluʼaga ʼaia, pea ʼe tou kau anai ki te malama. (Soa. 15:19) ʼE tou iloʼi ʼe ko te Puleʼaga pe ʼo te ʼAtua ʼae ka ina fakatuʼu ia te tokalelei ʼi te malamanei.
6. Kotea ʼae ʼe feala ke tou fai moʼo tokoni ki ʼihi? Pea kotea tona tupuʼaga?
6 ʼE mole gata pe ki tatatou nonofo ʼalaʼala, kae ʼe tou toe fia tokoni ki ʼihi ke natou ako pe ʼe kotea ʼae ʼe fakakikite ʼi te Tohi-Tapu ʼo ʼuhiga mo te malama. ʼE ʼaoga ke tou fai te faʼahi ʼaia ʼi te temi nei, koteʼuhi ʼi te temi ʼae ka kamata ai te toe mamahi lahi kua tauhala te maliu mai ʼa te hahaʼi ʼo tauhi kia Sehova. Koia ʼae ʼe maʼuhiga ʼaupito ai ke tou faifakamafola ʼi te temi nei. *
KOTOU MAʼUMAʼUA TUʼUMAʼU ʼI TE FAIFAKAMAFOLA
Ka tou faifakamafola, ʼe tou fakaha ai ko te Puleʼaga pe ʼo te ʼAtua ʼae ka ina fakatuʼu te maʼuli fimalie moʼoni ʼi te malamanei (Vakaʼi te palakalafe 7-9)
7. Kotea ʼae ʼe loto e Sehova ke tou fakahoko ʼi te temi nei?
7 ʼE kei toe pe he kiʼi temi siʼi pea kamata ai leva te “ ʼaho” ʼo Sehova. Koia ʼae ʼe loto ai e 1 Ko. 15:58) Neʼe kua fakakikite e Sesu te gaue ʼae ka tou fai. ʼI te temi ʼae neʼe palalau ai ki te ʼu aluʼaga maʼuhiga fuli ʼae ka hoko ʼi te ʼu ʼaho fakamuli, neʼe ina toe ui fenei: “ ʼE tonu muʼa ke fakamafola te logo lelei ʼi te ʼu puleʼaga fuli.” (Mko. 13:4, 8, 10; Mat. 24:14) Kotou fakakaukauʼi age muʼa, ʼi te ʼu lakaga fuli ʼae ʼe kotou faifakamafola ai, ʼe kotou tokoni ki te fakahoko ʼo te lea fakapolofeta ʼaia.
Sehova ke tou maʼumaʼua ʼi te gaue faifakamafola. ʼE maʼuhiga ke tou iloʼi papau pe ʼe ‘lahi tuʼumaʼu ʼatatou gaue ʼi te ʼAliki.’ (8. ʼE tou iloʼi feafeaʼi ʼe hoko atu te tuputupu ʼa te gaue faifakamafola?
8 Neʼe tuputupu feafeaʼi te gaue faifakamafola? ʼI te taʼu fuli, tokolahi neʼe natou fagono ki te logo lelei ʼo te Puleʼaga. Kotou fakakaukauʼi age muʼa ia te tuputupu ʼa te kau faifakamafola ʼi te malamanei katoa ʼi te ʼu ʼaho fakamuli. Ohage la, ʼi te taʼu 1914, neʼe ko te toko 5 155 kau faifakamafola ia fenua ʼe 43. Ia ʼaho nei, kua teitei toko valu miliona nimageau afe tupu kau faifakamafola ia fenua ʼe 240. Kae ʼe heʼeki ʼosi te gaue. ʼE tonu ke hoko atu tatatou tala ki te hahaʼi, ko te puleʼaki pe ʼe tahi moʼo fakatokatoka te ʼu fihifihia fuli ʼo te malamanei, ʼe ko te Puleʼaga ʼo te ʼAtua.—Pes. 145:11-13.
9. He koʼe ʼe tonu ke tou hoko atu tatatou fakamafola ia te logo ʼo te Puleʼaga?
9 ʼE hoki tou tuku pe anai tatatou gaue faifakamafola moka kua fakagafua mai e Sehova. ʼE kei toe temi ʼe fia ki te hahaʼi ke natou ako ke natou iloʼi ia Sehova ʼAtua pea mo Sesu Kilisito? (Soa. 17:3) ʼE mole tou iloʼi te faʼahi ʼaia. Kae ko te faʼahi ʼae ʼe tou iloʼi, ʼe kei feala pe ke natou tali te logo lelei ʼi muʼa ʼo te hoko ʼo te toe mamahi lahi. ʼO feafeaʼi? Mo kapau ʼe “lelei ʼonatou loto ke natou maʼu te maʼuli heʼe gata” pea mo filifili ke natou tauhi kia Sehova. (Gaue 13:48) ʼE tou tokoni feafeaʼi ki te hahaʼi ʼi muʼa ʼo te hoko ʼo te toe mamahi lahi?
10. ʼE tokoni feafeaʼi mai ia Sehova ke tou akoʼi te moʼoni ki te hahaʼi?
10 ʼE foaki mai e Sehova ʼaki tana kautahi te ʼu meʼa fuli ʼae ʼe ʼaoga moʼo akoʼi te moʼoni ki te hahaʼi. Ohage la, ʼe akoʼi tatou ʼi te fono ʼo te vahaʼa. ʼE tokoni mai te fono ʼaia ke tou iloʼi te faʼahiga fai ʼo te ʼu ʼuluaki faipalalau ʼo feia ki te faʼahiga fai ʼo te ʼu ʼaʼahi. ʼE toe akoʼi mai ai pe ʼe feafeaʼi te fai ʼo he ʼu ako Fakatohi-tapu. Pea ʼe toe foaki mai e te kautahi ʼa Sehova he ʼu Meʼa Gaue Ki Te Faiako. ʼE tokoni mai te ʼu meʼa gaue ʼaia . . .
-
moʼo kamata he ʼu faipalalau,
-
moʼo ʼekenaki he tahi ke fia logo,
-
moʼo tokoni ki te hahaʼi ke natou fia mahino lahi age ki te Tohi-Tapu,
-
moʼo akoʼi te moʼoni moka tou faiako pea
-
moʼo fakaafe te hahaʼi ʼae neʼe natou tali te moʼoni ke natou vakaʼi tatatou tuʼasila ʼi te Neti pea mo ʼotatou Fale Fono.
ʼE moʼoni, ʼe mole tonu pe ke tou maʼu te ʼu meʼa gaue ʼaia kae ʼe tonu ke tou fakaʼaogaʼi lelei. * Ohage la, ʼe feala pe ke tou faipalalau mo he tahi ʼe fia logo ki te moʼoni pea tou tuku age he pepa lotu peʼe ko he nusipepa. Pea ʼe lagi ina fia lau anai ʼihi atu nusipepa moka ʼe tou toe liliu mai ʼo ʼaʼahi ia ia. ʼI te mahina fuli, ʼe ko te maʼua ʼo tatou takitokotahi ke tou maʼumaʼua ʼi te faifakamafola.
11. He koʼe neʼe fakatuʼutuʼu ke fai he ʼu Ako Tohi-Tapu ʼi Te Neti?
11 ʼE toe tokoni ia Sehova ki te hahaʼi ke natou ako ia te moʼoni ʼaki te meʼa gaue ʼaeni: Cours bibliques en ligne (Ako Tohi-Tapu ʼi Te Neti) ʼi totatou tuʼasila ʼi te Neti. He koʼe neʼe fakatuʼutuʼu te ʼu ako ʼaia? Koteʼuhi ʼi te mahina fuli ko te toko lauʼi afe hahaʼi ʼi te malamanei katoa ʼe natou fekumi ke natou ako te Tohi-Tapu ʼi te Neti. ʼE fakafealagia e te ʼu ako ʼi tatatou tuʼasila ʼi te Neti ke kamata ako e te hahaʼi te ʼu moʼoni ʼae ʼe maʼu ʼi te Folafola ʼa te ʼAtua. ʼE ʼi ai ʼihi hahaʼi ʼae ʼe tou faipalalau mo natou, ʼe feala pe ke lakilua tanatou tali ʼae ke natou ako te Tohi-Tapu. Pea kapau koia, kotou fakaha age ia te pasina ʼo te ʼu ako ʼi tatatou tuʼasila ʼi te Neti. ʼO toe feia pe mo kapau ʼe feala, kotou fakaha age he ʼu ako ʼi te lea ʼae ʼe natou mahino ki ai. *
12. Kotea ʼae ʼe feala ke iloʼi e he tahi ʼaki te ʼu Ako Tohi-Tapu ʼi Te Neti?
12 Koʼeni te ʼu kupu taki kehekehe ʼo te ʼu Ako Tohi-Tapu ʼi Te Neti: “Te Tohi-Tapu pea mo Ia ʼae neʼe ina tohi,” “Te Hahaʼi Maʼuhiga ʼi Te Tohi-Tapu,” pea mo “Te Logo ʼo Te ʼAmanaki ʼi Te Tohi-Tapu.” Ka ako e he tahi ia te ʼu ako ʼaia, ʼe feala ai ke ina iloʼi te ʼu faʼahi ʼaeni:
-
ʼE lava tokoni feafeaʼi mai te Tohi-Tapu?
-
Ko ai ia Sehova, mo Sesu pea mo te kau ʼaselo?
-
He koʼe neʼe fakatupu e te ʼAtua ia te tagata?
-
He koʼe ʼe tou tau mo te mamahi pea mo te agakovi?
ʼE toe fakamahino ʼi te ʼu ako ʼaia . . .
-
pe ʼe pulihi feafeaʼi anai e Sehova ia te mamahi pea mo te mate,
-
ʼe fakatuʼuake anai e Sehova ia te kau mate, pea
-
ʼe ina fetogi anai te ʼu puleʼaga fakatagata vaʼiganoa, ʼaki ia tona Puleʼaga.
13. ʼE fetogi koa e te ʼu ako ʼi te Neti ia te ʼu ako ʼae ʼe takitaki e he Fakamoʼoni? Kotou fakamahino.
13 ʼE mole fetogi e te ʼu ako ʼi te Neti ia te ʼu ako Tohi-Tapu ʼae ʼe takitaki e he Fakamoʼoni. Neʼe foaki mai e Sesu te maʼua ʼae ke tou fai ni tisipulo. ʼE tou fakaʼamu ke fakaʼaogaʼi te ʼu ako ʼi te Neti e te hahaʼi ʼae ʼe natou tali leleiʼi te moʼoni. ʼE tou toe loto foki ke natou leleiʼia te ʼu manatu ʼae ka natou ako pea ke natou toe fia iloʼi ʼihi atu manatu. Kapau koia, ʼe lagi natou tali anai ke fai hanatou ako Tohi-Tapu. Koia, ʼi te fakaʼosi ʼo te ʼu ako takitahi, ʼe fakaafe ia ia ʼae ʼe ina fakaʼaogaʼi te ʼu ako ʼi te Neti ke ina fakaui ke fai e he Fakamoʼoni hana ako Tohi-Tapu. ʼI te ʼaho fuli, ʼi te malamanei katoa, ʼe fakaui e te toko 230 hahaʼi ʼi tatatou tuʼasila ʼi te Neti ke fai hanatou ako Tohi-Tapu. ʼE maʼuhiga ʼaupito ia te ako ʼae ʼe takitaki e he Fakamoʼoni.
KOTOU FAIGA TUʼUMAʼU KE KOTOU FAI HE ʼU TISIPULO
14. Ka tou lau ia Mateo 28:19, 20, kotea ʼae ʼe tou faigaʼi ke tou fai? Pea kotea tona tupuʼaga?
14 Lau ia Mateo 28:19, 20. Ka tou takitaki he ʼu ako Tohi-Tapu, ʼe tonu ke tou faigaʼi ke tou “fai ni tisipulo” pea mo ‘akoʼi natou ke natou mulimuli ki te ʼu meʼa fuli ʼae neʼe fakatotonu mai e Sesu.’ ʼE tonu ke tou tokoni ki te hahaʼi ke natou mahino ʼe maʼuhiga ke natou filifili te tauhi kia Sehova pea mo lagolago ki tona Puleʼaga. Ko tona fakaʼuhiga, ʼe tonu ke tou fakalotomalohiʼi ke natou maʼuliʼi te ʼu moʼoni ʼae ʼe natou ako, mo foaki ʼonatou maʼuli kia Sehova pea mo papitema. ʼE hoki feala ai ke natou hao ʼi te ʼaho ʼo Sehova.—1 Pet. 3:21.
15. Kotea ʼae ʼe mole feala ke tou hoko atu? Pea kotea tona tupuʼaga?
15 Ohage pe ko tatatou kua talanoa ki ai, ʼe kei toe pe he kiʼi temi siʼi pea hoko mai leva te fakaʼosi ʼo te malama ʼaeni. Koia la ʼae ʼe mole feala ai ke tou hoko atu te ʼu ako ʼa te hahaʼi ʼae ʼe mole loto moʼoni ke natou liliu ko ni tisipulo ʼa Kilisito. (1 Ko. 9:26) ʼE tonu ke tulikaki tatatou gaue. ʼE kei kaugā malie ia natou ʼae ʼe tonu ke natou logo ki te logo ʼo te Puleʼaga ʼi muʼa ʼo te hoko mai ʼo te ʼaho fakaʼosi.
KOTOU TOKAKAGA ʼO KOTOU MAVAE MAI TE ʼU LOTU HALA
16. Ka tou lau ia Fakaha 18:2, 4, 5, 8, kotea ʼae ʼe tonu ke tou fai? (Vakaʼi mo te kiʼi nota.)
16 Lau ia Fakaha 18:2, 4, 5, 8. ʼE fakaha mai ʼi te ʼu vaega ʼaia, ʼe ʼi ai te tahi faʼahi ʼe loto e Sehova ke fai e ʼana kau atolasio. ʼE tonu ke mavae mai te kau Kilisitiano moʼoni mai Papiloni Lahi. Ko he tahi ʼe ina ako te Tohi-Tapu, neʼe lagi kau ki te lotu hala ʼi muʼa ʼo tana iloʼi te moʼoni. Neʼe lagi kau ki te ʼu toʼotoʼoga fakalotu, pe neʼe lagi lagolago ki te fakapaʼaga ʼo te ʼu gaue ʼae neʼe fai ʼi tana lotu. ʼI muʼa ʼo hana liliu ko he kaugā fagona, ʼe tonu ki te kilisitiano ʼaia ke mavae mai te ʼu meʼa fuli ʼe pipiki ki te lotu hala. ʼE tonu anai ke ina momoli he tohi ki tana lotu. ʼE ina fakaha ai kua mavae mai tana lotu pea ʼe mole kei fia kau ki he tahi age kautahi fakalotu ʼe pipiki ki Papiloni Lahi. *
17. Ko te faʼahiga gaue fea ʼae ʼe tonu ke tekeʼi e he Kilisitiano? Pea kotea tona tupuʼaga?
17 ʼE tonu ki he Kilisitiano moʼoni ke tokaga naʼa ʼi ai he pikipikiga ʼo tana gaue pea mo Papiloni Lahi. (2 Ko. 6:14-17) Ohage la, ʼe mole gaue anai ki he ʼekelesia. Pea tahi, ko he Kilisitiano ʼae ʼe gaue ki he sosiete, ʼe mole fia gaue lahi anai ʼi he fale ʼe fakaʼaogaʼi ki te lotu hala. Pea kapau ʼe ʼi ai hana sosiete, ʼe mole faiga anai ke ina maʼu peʼe ke ina tali he faʼahiga gaue pe ʼe ʼi ai hona pikipikiga mo Papiloni Lahi. He koʼe ʼe tou fakatotonu malohi ke tou nonofo agatonu ʼi te aluʼaga ʼaia? Koteʼuhi ʼe mole tou fia kau ki te ʼu gaue, mo te ʼu agahala ʼo te ʼu kautahi fakalotu ʼae ʼe heʼe maʼa kia mata ʼo te ʼAtua.—Esa. 52:11. *
18. Neʼe fakaha feafeaʼi e te tehina tana nofo agatonu ki te ʼu pelesepeto Fakatohi-tapu ʼo ʼuhiga mo tana gaue?
18 Tou vakaʼi te faʼifaʼitaki ʼo te tagata ʼafeā neʼe ʼi ai tana sosiete tufuga ʼakau. Kua hili ki ai ni taʼu, ko te tagata toʼo gaue neʼe ina kole ki te tehina ʼaia ke ina fai he ʼu kiʼi gaue ʼi te ʼekelesia ʼo te kolo ʼae ʼe maʼuli ai. Neʼe iloʼi e te tagata toʼo gaue ʼe fakafisi tuʼumaʼu te tehina ke gaue ki he ʼekelesia. Kae neʼe mole ina maʼu he tahi moʼo fai te ʼu gaue ʼaia. Neʼe fakafisi te tehina ki te gaue, koteʼuhi neʼe pipiki ki te ʼu pelesepeto Fakatohi-tapu. ʼI te vahaʼa ʼae neʼe hoa mai ki ai, neʼe fakaha ʼi te sulunale te pāki ʼo he tahi tagata tufuga ʼakau ʼe ina lolotoga fakapipiki he koluse ki he ʼekelesia. Ka na pau la neʼe mole agatonu te tehina ki te ʼu pelesepeto Fakatohi-tapu, ka na ʼaua la ko tona pāki ʼae neʼe tuʼu ʼi te sulunale. Kotou fakakaukauʼi age muʼa, neʼe feala pe ke ʼulihi ai tona matagafua ʼo mamahi ai ʼona tehina mo tuagaʼane kia ia. Pea kotou toe manatuʼi pe ʼe kotea ʼae neʼe feala ke logoʼi e Sehova.
KOTEA ʼAE NEʼE TOU AKO?
19-20. (1) Kotea ʼae neʼe tou ako? (2) Kotea ʼae ʼe kei tonu ke tou ako?
19 ʼE ui ʼi te Tohi-Tapu, kua vave hoko mai pe ia te lea fakapolofeta maʼuhiga. ʼE ko te kalagaʼi e te kau takitaki ʼo te malama ia te logo, “Tokalelei pea mo fimalie.” Kae neʼe akoʼi tatou e Sehova, ʼe mole feala anai ke fakatuʼu e te ʼu puleʼaga ia te tokalelei moʼoni ʼo talu ai. Kotea ʼae ʼe tonu ke tou fai ʼi muʼa ʼo te hoko mai ʼo te aluʼaga ʼaia pea mo te hoko fakafokifa ʼo te fakaʼauha? ʼE loto e Sehova ke tou maʼumaʼua ʼi te fakamafola ʼo te logo ʼo te Puleʼaga pea ke tou faigaʼi ke toe lahi age tatatou fai ni tisipulo. Pea ʼe tonu ke tou mavae mai te lotu hala. Koia ʼe tonu ai ke tou mavae mai Papiloni Lahi, pea ke ʼaua naʼa tou fai he gaue ʼe pipiki ki ai.
20 ʼE hoko anai ʼihi aluʼaga lolotoga “te ʼu ʼaho fakamuli.” Pea ʼe ʼi ai ʼihi faʼahi ʼe loto e Sehova ke tou fai. Kotea te ʼu faʼahi ʼaia? Pea ʼe feafeaʼi hatatou teuteu ki te ʼu aluʼaga fuli ʼae ka hoko mai? ʼE hoki tou vakaʼi anai ʼi te alatike ka hoa mai.
KATIKO 71 Ko Tatou Ko Te Kautau ʼa Sehova
^ pal. 5 Kua vave pe tatatou logo ki te tala ʼae ʼa te ʼu puleʼaga kua natou maʼu ia te ‘tokalelei pea mo te fimalie.’ Ko te fakailoga ʼaia ʼo te kamataʼaga ʼo te toe mamahi lahi. Kotea ʼae ʼe loto e Sehova ke tou fai ʼo kaku ki te hoko mai ʼo te ʼaho ʼaia? ʼE tou maʼu anai tona tali ʼi te alatike ʼaeni.
^ pal. 3 Ohage la, ʼi tana tuʼasila ʼi te Neti ʼe ui ai e te Kautahi ʼo te ʼu Puleʼaga ʼe natou “taupau ia te tokalelei pea mo te fimalie fakamalamanei.”
^ pal. 6 Vakaʼi te alatike ʼi te nusipepa ʼaeni “Te ʼu Fakamau ʼa Te ʼAtua: ʼE Foaki Tuʼumaʼu Mai Koa e Te ʼAtua He ʼu Fakatokaga Feʼauga?”
^ pal. 10 Kapau ʼe kotou fia maʼu he tahi ʼu manatu ʼo ʼuhiga mo te faʼahiga fakaʼaogaʼi ʼo te ʼu meʼa gaue ʼaia, kotou vakaʼi te alatike “Tou Akoʼi Te Moʼoni” ʼi Te Tule Leʼo ʼo Oketopeli 2018.
^ pal. 11 Kua maʼu nei te ʼu ako ʼaia ʼi te lea Fakapilitania, mo te lea ʼo Portugal, pea ko ʼihi atu lea ʼe hoki tou maʼu pe anai ki ʼamuli.
^ pal. 16 ʼE mole tonu ke tou kau ki he ʼu kautahi, ohage ko te ʼu kautahi ʼe fakatuʼutuʼu maʼa te kau tupulaga, peʼe ko he ʼu kautahi ʼo ʼuhiga mo te ʼu faigaoʼi peʼe ko ʼihi atu kautahi ʼe pipiki ki te lotu hala. Ohage la, kotou vakaʼi te alatike “Te ’u Fehuʼi ’a Te Kau Lautohi” ʼi Te Tule Leʼo (Fakafalani) ʼo te ʼaho 1 ʼo Apelili 1979 ʼo ʼuhiga mo te YMCA (Association chrétienne de jeunes gens) (Kutuga Fakakilisitiano ʼo Te Hahaʼi Tagata ʼe Kei Tupulaga). ʼE toe tatau pe mo te YWCA (Association chrétienne des jeunes femmes) (Kutuga Fakakilisitiano ʼo Te Hahaʼi Fafine ʼe Kei Finemui). Ko ʼihi kutuga ʼae ʼe fakalogo ki te ʼu kautahi ʼaia ʼe mole natou fakamaʼuhigaʼi te ʼu agaaga fakalotu ʼo ʼanatou gaue. Kae ʼaua naʼa galo kia tatou, ko te haʼuʼaga pea mo te ʼu fakatuʼutuʼu ʼo te ʼu kutuga ʼaia ʼe pipiki ki te lotu.
^ pal. 17 Ke tou maʼu he tahi ʼu manatu Fakatohi-tapu ʼo ʼuhiga mo te gaue ki he kautahi fakalotu, vakaʼi te alatike “Te ’u Fehuʼi ’a Te Kau Lautohi” ʼi Te Tule Leʼo ʼo te ʼaho 15 ʼo Apelili 1999.
^ pal. 83 FAKAMATALA ʼO TE PĀKI: ʼI he fale kafe, ʼe sioʼi e te hahaʼi ia te logo “Tokalelei pea mo fimalie” ʼae ʼe fakaha ʼi te televisio. Ko te taumatuʼa ʼe tauhi kia Sehova, neʼe ʼomai hili tanā faifakamafola ki te fale kafe ʼaia, kae ʼe mole nā tui ki te logo ʼaia.