He Koʼe ʼe Maʼuhiga Ke Tou Fia Malalo Tuʼumaʼu?
“E nofo te poto i te agamalu [“fia malalo,” MN].”—TAAGA LEA 11:2.
KATIKO: 38, 69
1, 2. He koʼe neʼe situʼa ia Sehova kia Saulo? (Vakaʼi te ʼuluaki pāki.)
ʼI TE temi ʼae neʼe filifili ai e Sehova ia Saulo ke liliu ko he hau, neʼe ko he tagata fia malalo. (1 Samuele 9:1, 2, 21; 10:20-24) Kaʼe ki muli age ʼi tana kua ʼafio hau neʼe liliu leva ʼo fiameʼalahi. ʼI te tahi ʼaho, neʼe ʼamanaki ʼohofi te kau Iselaele e te toko lauʼi afe kau Filisitini. Neʼe ui ai e te polofeta ko Samuele kia Saulo ʼe haʼu anai ʼo momoli he sakilifisio kia Sehova. Kaʼe ʼi muʼa ʼo te kaku mai ʼa Samuele, neʼe kua matataku te kau Iselaele pea neʼe natou feholaki mai ia Saulo. Neʼe tuaiʼia e Saulo te haʼu ʼa Samuele, pea neʼe ina momoli totonu ai te sakilifisio. Kaʼe neʼe mole ko he tuʼulaga ʼaia ʼo Saulo ke ina fai te faʼahi ʼaia, koia neʼe ita ai ia Sehova.—1 Samuele 13:5-9.
2 ʼI te tau mai leva ʼae ʼa Samuele, neʼe ina fakatonutonuʼi ia Saulo ʼuhi ko tana talagataʼa kia Sehova. Kaʼe ʼi te manatu ia ʼa Saulo, neʼe mole ina fai he meʼa ʼe kovi. Neʼe fia maʼu takuʼaga pea neʼe ina tukugakoviʼi mo te hahaʼi. (1 Samuele 13:10-14) Pea talu mai ai, neʼe lahi te ʼu aga fiameʼalahi neʼe fai e Saulo. Koia ʼae neʼe mole kei loto ai e Sehova ke hoko atu ia tana ʼafio. (1 Samuele 15:22, 23) Neʼe lelei te kamataʼaga ʼo te maʼuli ʼo Saulo kaʼe neʼe fakaʼofaʼofa leva tona fakaʼosi.—1 Samuele 31:1-6.
3. (1) Kotea te manatu ʼa te tokolahi ʼo ʼuhiga mo te fia malalo? (2) Ko te ʼu fehuʼi fea ka tou tali anai ki ai?
3 ʼE manatu te tokolahi, ʼe mole feala ke natou maʼu tuʼulaga mo kapau ʼe natou fia malalo. ʼE natou laupisiʼi pe ia natou totonu. Ohage la, ko te tagata gaoʼi ʼata ʼe iloa pea ʼe fai politike, neʼe ina ui fenei: “Ko te kupu fia malalo ʼe mole mo tuha mo au pea ʼe au fakaʼamu ke mole au fia malalo ʼi he ʼaho.” Kaʼe he koʼe ʼe maʼuhiga ke fia malalo te kau Kilisitiano? Kotea koa ia te fia malalo? ʼE tali anai ki ai te alatike ʼaeni. Pea ʼi te alatike ʼae ka hoa mai, ʼe tou vakaʼi ai anai pe ʼe feafeaʼi hatatou taupau te fia malalo tatau aipe pe ʼe faigataʼa.
HE KOʼE ʼE MAʼUHIGA TE FIA MALALO?
4. Kotea te fakaʼuhiga ʼo te fai ʼo he gaue ʼaki te fialahi?
4 ʼE ui ʼi te Tohi-Tapu ko te fiamaʼoluga ʼe fakafeagai ki te fiamalalo. (Lau ia Taaga Lea 11:2) Neʼe tagi mamahi fenei ia Tavite kia Sehova: “Taʼofi . . . tau kaugana ke mamaʼo mai te ʼu gaue ʼae ʼe fai ʼaki te fialahi.” (Pesalemo 19:13, MN) Kotea te fakaʼuhiga ʼo te fai ʼo he gaue ʼaki te fialahi? Ko te fakahoko ʼo he gaue kaʼe ʼe mole ʼa tatou tona fai, he ʼe lagi tou fialahi fau peʼe mole tou faʼa kataki fualoa. ʼI totatou ʼuhiga heʼe haohaoa, ʼe tou fakahoko ʼi ʼihi temi he gaue ʼe ha ai totatou fialahi. Koia ohage pe ko te faʼifaʼitaki ʼo te Hau ko Saulo, kapau ʼe tou liliu ʼo fialahi, ʼe mole tou fakafiafiaʼi ai anai ia Sehova. ʼE ui ʼi te Pesalemo 119:21, MN, ko Sehova ʼe ina “fakatonutonuʼi [anai] te kau fialahi.” Kotea tona tupuʼaga?
Kapau ʼe tou fia malalo, ʼe tou fakaha ai ʼe tou fakaʼapaʼapa kia Sehova
5. He koʼe ko te fai ʼo he gaue ʼaki te fialahi ʼe ko he hala mamafa?
5 ʼUluaki, kapau ʼe tou fakahoko he gaue ʼaki te fialahi, ʼe mole ko hatatou fakaʼapaʼapa ʼaia kia Sehova, totatou ʼAtua mo totatou Pule. Lua, kapau ʼe tou fakahoko he gaue kaʼe ʼe mole gafua ke tou fai, ʼe feala ke tou fihi peʼe tou fetokakoviʼaki ai mo te hahaʼi. (Taaga Lea 13:10) Pea tolu, ʼe feala ke lau valeʼi tatou mo kapau ʼe fakamoʼoni e he tahi neʼe tou fai he gaue ʼaki te fialahi. (Luka 14:8, 9) ʼAki te ʼu aluʼaga ʼaia, ʼe tou mahino ai pe koʼe ʼe loto e Sehova ke tou fia malalo.
KOTEA TE FIA MALALO?
6, 7. ʼE pipiki feafeaʼi te fia malalo ki te agavaivai?
6 ʼE pipiki te fia malalo ki te agavaivai. Ko te Kilisitiano ʼae ʼe agavaivai ʼe mole fiatuʼu kaʼe ʼe ina fakaʼuhiga ʼona tatau ʼe natou maʼoluga age ia ia. (Filipe 2:3) ʼE toe fia malalo foki ia ia ʼae ʼe agavaivai. ʼE mahino ki ʼona tuʼakoi pea ʼaki he agavaivai ʼe ina fakaha ʼana lakahala. Pea ʼe lotolelei ke fakalogo ki te ʼu manatu ʼa ʼihi pea mo toʼo mai ia natou he ʼu ako. ʼE leleiʼia ʼaupito e Sehova ia te tagata agavaivai.
7 ʼE ui ʼi te Tohi-Tapu, ko te tagata ʼae ʼe fia malalo ʼe ina iloʼi te ʼu tuʼakoi ʼo ʼona fealagia. Pea ʼe tokoni te aluʼaga ʼaia kia ia ke fakaʼapaʼapa pea mo agalelei ki ʼona tatau.
8. Kotea te faʼahiga manatu ʼae ʼe tonu ke tou tekeʼi mo kapau ʼe tou fia malalo tuʼumaʼu?
Loma 12:16) Peʼe tou loto ke tokagaʼi fau tatou. (1 Timoteo 2:9, 10) ʼE toe feala foki ke tou fia fakatotonu te ʼu gaue ʼa ʼihi.—1 Kolonito 4:6.
8 ʼE feala pe ke tou kamata maʼu he ʼu manatu fiatuʼu kaʼe ʼe mole tou tokagaʼi. ʼO feafeaʼi? Ohage la, ʼe tou manatu ʼe tou maʼoluga age ʼi ʼihi koteʼuhi ʼe tou maʼu pilivilesio ʼi te kokelekasio ʼo tatau mo natou ʼae ʼe tou feiloʼiʼaki. (9. He koʼe ʼe liliu ʼihi ʼo fiatuʼu? Kotou tuku mai he faʼifaʼitaki.
9 Kapau ʼe mole tou lolomi ʼotatou holi ʼae ʼe kovi, ʼe feala ke tou fai ai he aga fialahi. Ko te tokolahi kua fiatuʼu, koteʼuhi ʼe natou fia vikiviki pe ia natou totonu, peʼe natou maheheka ki ʼihi, peʼe mole natou lolomi tonatou iita. Neʼe hoko te aluʼaga ʼaia ki ʼihi ʼe talanoa ki ai ʼi te Tohi-Tapu, ohage ko Apesalone, mo Osiasi pea mo Nepukatenesale. Kaʼe neʼe kua fakatokaga leleiʼi age pe e Sehova ʼe tonu ke natou agavaivai.—2 Samuele 15:1-6; 18:9-17; 2 Koloniko 26:16-21; Taniela 5:18-21.
10. He koʼe ʼe mole tonu ke tou fakamauʼi te ʼu tupuʼaga ʼae ʼe fai ai e he tahi he meʼa? Kotou tuku mai he faʼifaʼitaki.
10 ʼE ʼi ai te tahi age ʼu tupuʼaga ʼo te mole fia malalo ʼa te hahaʼi ʼi ʼihi temi. Tou fakakaukauʼi age muʼa te ʼu faʼifaʼitaki ʼo Apimeleke pea mo Petelo. (Senesi 20:2-7; Mateo 26:31-35) Neʼe fiatuʼu moʼoni koa te ʼu tagata ʼaia? Peʼe neʼe mole lagi nā iloʼi pe te ʼu aluʼaga fuli ʼae neʼe hoko peʼe neʼe mole nā fakakaukau pe naua? ʼE mole tonu ke tou fakamauʼi te ʼu tupuʼaga ʼae ʼe fai ai e he tahi he meʼa, koteʼuhi ʼe mole feala ke tou iloʼi te meʼa ʼae ʼi ʼonatou loto.—Lau ia Sakopo 4:12.
TAKOTOU GAUE ʼI TE FAKATUʼUTUʼU ʼA TE ʼATUA
11. Kotea ʼae ʼe tonu ke tou mahino ki ai?
11 ʼE mahino te tagata ʼae ʼe fia malalo pe ʼe kotea tona ʼuhiga ʼi te fakatuʼutuʼu ʼa te ʼAtua. Ko Sehova ʼe ko te ʼAtua ʼo te fakatokatoka. ʼE ina fakaʼaogaʼi ʼana kaugana fuli ʼi te kokelekasio. Pea neʼe ina foaki mai kia tatou takitokotahi he ʼu fealagia ʼe kehekehe, pea ʼe ina fakagafua mai ke tou filifili ia tona faʼahiga fakaʼaogaʼi. Koia kapau ʼe tou fia malalo, ʼe tou fakaʼaogaʼi anai ʼotatou fealagia ʼo mulimuli ki te finegalo ʼo Sehova. (Loma 12:4-8) Pea ʼe tou iloʼi ai ʼe fakaʼamu ia Sehova ke tou fakaʼaogaʼi ʼotatou fealagia moʼo fakavikiviki kia te ia pea mo tokoni ki ʼihi.—Lau ia 1 Petelo 4:10.
12, 13. Kotea ʼae ʼe tonu ke tou manatuʼi mo kapau ʼe ʼi ai he ʼu fetogi ʼi tatatou tauhi ʼae kia Sehova?
12 ʼAki te temi, ʼe feala ke fetogi te ʼu gaue ʼae ʼe tou fakahoko ʼi tatatou tauhi ʼae kia Sehova. Ohage la, tou fakakaukauʼi age muʼa te ʼu fetogi ʼae neʼe hoko kia Sesu. ʼUluaki, neʼe nā maʼuʼuli ʼateaina pe mo tana Tamai. (Taaga Lea 8:22) Lua, neʼe tokoni kia Sehova ki te fakatupu ʼo te ʼu ʼaselo, mo te ʼatulaulau pea mo te tagata. (Kolose 1:16) Pea tolu leva, neʼe fekauʼi mai ki te kele. Neʼe liliu ai ko he tagata. (Filipe 2:7) Hili tona mate, neʼe toe liliu ia Sesu ki te lagi, pea ʼi te taʼu 1914 neʼe liliu ai ko te Hau ʼo te Puleʼaga ʼo te ʼAtua. (Hepeleo 2:9) Pea ʼi te ka haʼu, hili tana ʼafio ia taʼu ʼe afe, ʼe toe liufaki anai e Sesu ia te Puleʼaga kia Sehova ke “liliu ai te ʼAtua ko meʼa fuli maʼa te hahaʼi fuli.”—1 Kolonito 15:28.
13 ʼE feala pe foki ke hoko he ʼu fetogi ʼi totatou maʼuli. ʼI ʼihi temi, ʼe toe feala ke fetogi ʼatatou gaue ʼuhi ko te ʼu tonu ʼae ʼe tou fai. Hepeleo 6:10.
Ohage la, neʼe tou selipatea pea tou toʼo leva te tonu ʼae ke tou ʼohoana. Peʼe ke tou maʼu hatatou fanau. Ki muli age, ʼe tou fakatotonu ke tou fai he ʼu fetogi ke feala ai hatatou tauhi temi katoa kia Sehova. Pea ʼe feala pe foki ke toe fetogi mo ʼotatou maʼua ʼuhi ko ʼotatou aluʼaga. ʼE lagi feala ke lahi age tatatou gaue peʼe kailoa. Kaʼe tatau aipe pe ʼe kei tou tupulaga peʼe kua tou matutuʼa, haohaoa mo mahaki peʼe kailoa, ʼe iloʼi e Sehova ʼotatou tuʼakoi takitokotahi ʼi tatatou tauhi ʼae kia te ia. ʼE mole kole mai e Sehova ke tou fai he meʼa ʼe mole tou lavaʼi. Kaʼe ʼe fiafia ʼaupito ʼi te ʼu gaue fuli ʼae ʼe tou fakahoko maʼa te ia.—14. ʼE tokoni feafeaʼi mai tatatou fia malalo ke tou fiafia ʼi te ʼu aluʼaga fuli ʼe hoko kia tatou?
14 Neʼe fiafia ʼaupito ia Sesu ʼi te ʼu gaue fuli ʼae neʼe tuku age e Sehova ʼo toe feia pe mo tatou ki ʼatatou gaue. (Taʼaga Lea 8:30, 31, MN) Ko te tagata ʼae ʼe fia malalo, ʼe fiafia ʼi te ʼu gaue pea mo te ʼu maʼua ʼae ʼe ina fakahoko ʼi te kokelekasio. ʼE mole ina tokagaʼi te ʼu meʼa ʼae ʼe fai e te hahaʼi. Kaʼe ʼe nofoʼaki pe tana gaue ʼi te kautahi ʼo te ʼAtua, koteʼuhi ʼe ina iloʼi neʼe hinoʼi mai e Sehova. ʼE toe fakaʼapaʼapa ia te tagata fia malalo ki ʼona tehina mo tuagaʼane pea ʼe fiafia ʼi te lagolago kia natou. Pea ʼe ina iloʼi neʼe toe foaki e Sehova ia tanatou gaue.—Loma 12:10.
TE MANATU ʼAE ʼE LELEI ʼO ʼUHIGA MO TE FIA MALALO
15. Kotea ʼae ʼe tou ako mai te faʼifaʼitaki ʼo Seteone?
15 Ko Seteone ʼe ko he faʼifaʼitakiʼaga lelei ʼo te fia malalo. ʼI te temi ʼae neʼe hinoʼi ai e Sehova ke ina haofaki te kau Iselaele mai te kau Matiane, neʼe ina ui fenei: “Ko taku toko afe ʼaeni ʼe ko te tokosiʼi pe ʼaia ’i Manase,
pea ko au ʼae ʼe veliveli ʼaupito ’i te ʼapi ʼo taku tamai.” (Tuʼi Fakamau 6:15, MN) Neʼe fakalogo ia Seteone kia Sehova he neʼe falala kia te ia. Pea neʼe faiga ke mahino katoa ki te meʼa ʼae neʼe kole age e Sehova pea neʼe ina kumi tana takitaki. (Tui Fakamau 6:36-40) Ko Seteone neʼe ko he tagata malohi, mo lototoʼa, mo poto pea mo maʼuli tokaga. (Tui Fakamau 6:11, 27) Ki muli age, neʼe loto e te hahaʼi ke liliu ko honatou pule, kaʼe neʼe mole tali e Seteone. Pea ʼi te hili ʼo tana fakahoko te gaue ʼae neʼe kole age e Sehova, neʼe toe liliu pe ki tona ʼapi.—Tui Fakamau 8:22, 23, 29.16, 17. ʼE feala ke tuputupu feafeaʼi te tagata fia malalo?
16 Kapau ʼe tali e he tahi ia he gaue foʼou peʼe ʼe loto ke lahi age ʼana gaue ʼi te kokelekasio, ʼe mole fakaʼuhiga leva ʼe mole fia malalo. ʼE ui ʼi te Tohi-Tapu, ʼe lelei moka ʼe loto he kaugana ʼa Sehova ke ina tauhi ʼona tehina mo tuagaʼane pea ke tuputupu ʼi te faʼahi fakalaumalie. (1 Timoteo 4:13-15) Kaʼe ʼe ʼaoga koa ke hoki tuku mai pe he gaue foʼou pea hoki tou tuputupu ai? Kailoa ia. He ʼe feala pe kia tatou fuli ke tou hikihiki totatou ʼuluagaaga Fakakilisitiano pea mo te ʼu fealagia ʼae neʼe foaki mai e Sehova, ke toe lelei age tatatou tauhi ʼae kia te ia pea mo tou tokoni ai ki ʼihi.
17 ʼE kumi muʼa anai e te tagata ʼae ʼe fia malalo pe ʼe kotea ʼae ka fakamaʼua age kia ia, pea hoki ina tali leva he gaue. Pea ʼe faikole anai ʼo ʼuhiga mo te gaue ʼaia mo ina vakavakaʼi fakalelei pe ʼe ina lavaʼi anai. Ohage la, ʼe ina toe maʼu anai koa he temi mo he malohi feʼauga ki ʼihi atu maʼua maʼuhiga? Kapau ʼe mole koia, ʼe feala koa ke fai e ʼihi te gaue ʼae ʼe ina lolotoga fai? ʼI tana kua ʼosi fakakaukauʼi te aluʼaga ʼaia, ʼe lagi manatu anai te tagata fia malalo ʼe mole ina lavaʼi te gaue foʼou ʼaia. Koia kapau ʼe tou fia malalo, pea ʼe lelei age pe ke tou fakafisi.
18. (1) Kotea ʼe tonu ke fai e he tagata ʼe fia malalo mo kapau ʼe filifili ki he gaue foʼou? (2) ʼE tokoni feafeaʼi mai ia Loma 12:3 ke tou fia malalo?
18 ʼE loto ia Sehova ke tou ʻhaʼele mo ia ʼi te fia malalo.’ (Mikea 6:8) Koia, ka filifili tatou ki he gaue foʼou, tou kumi ia te takitaki mo te tokoni ʼa Sehova ohage ko tona fai e Seteone. Pea ʼe tonu ke tou metitasio loloto ki te ʼu tokoni ʼae ʼe foaki mai e Sehova ʼaki tana Folafola pea mo tona kautahi. Tou manatuʼi, ʼe mole tou lavaʼi te ʼu gaue fuli ʼi tatatou tauhi ʼaki ʼotatou fealagia, kaʼe ʼaki te agavaivai mo te lotolelei ʼa Sehova ke tokoni mai kia tatou. (Pesalemo 18:36) Ko te tagata ʼae ʼe fia malalo, ʼe mole ‘manatu ia ʼe maʼuhiga.’—Lau ia Loma 12:3.
19. He koʼe ʼe tonu ke tou fia malalo?
19 ʼE iloʼi e te tagata fia malalo ʼe ko Sehova tokotahi pe ʼae ʼe tuha mo fakakololia fuli, koteʼuhi ʼe ko totatou Tupuʼaga pea ʼe ko te Maʼoluga ʼo te ʼatulaulau. (Fakaha 4:11) Koia kapau ʼe tou fia malalo, ʼe tou fiafia anai ʼi te ʼu gaue fuli ʼae ʼe tou fakahoko ʼi tatatou tauhi kia Sehova. ʼE tou fakaʼapaʼapa anai ki te ʼu manatu mo te ʼu meʼa ʼae ʼe logoʼi e ʼotatou tehina mo tuagaʼane, pea ʼe tou logo tahi ai anai. Ko te tagata fia malalo, ʼe fakakaukau lelei muʼa pea hoki ina fakahoko he gaue, koteʼuhi ʼe ina tekeʼi ai he ʼu lakahala ʼe mamafa. Pea ko Sehova ʼe ʼofa kia natou ʼae ʼe fia malalo. Ko te ʼu tupuʼaga la ʼaia ʼo te maʼuhiga ʼae ke fia malalo te hahaʼi ʼa te ʼAtua. ʼI te alatike ʼae ka hoa mai, ʼe tou vakaʼi ai anai pe ʼe feafeaʼi hatatou taupau te fia malalo tatau aipe pe ʼe faigataʼa.