ALATIKE AKO 5
ʼE Matou Olo Anai Mo Koutou
“E matou olo anai mo [“koutou,” MN], koteuhi kua matou iloi e nofo te Atua mo koutou.”—SAKL. 8:23.
KATIKO 26 Neʼe Kotou Fai Kia Te Au
TE ʼU MANATU FAKANOUNOU *
1. Kotea ʼae neʼe fakakikite e Sehova ʼo ʼuhiga mo totatou temi?
ʼO ʼUHIGA mo totatou temi, neʼe fakakikite fenei e Sehova: “E too anai e ni tagata e toko hogofulu mai te u lea kehekehe fuli o te atu puleaga he tagata Sutea e toko tahi i te tapatapa o tona kofu, o ui: E matou olo anai mo [“koutou,” MN], koteuhi kua matou iloi e nofo te Atua mo koutou.” (Sakl. 8:23) ʼI te vaega ʼaeni, ʼe fakata e te “tagata Sutea” ia natou ʼae neʼe fakanofo e te ʼAtua ʼaki tona laumalie maʼoniʼoni. ʼE toe fakahigoaʼi natou ko “te Iselaele ʼa te ʼAtua.” (Kal. 6:16) Pea ʼe fakata e te “toko hogofulu” tagata ia natou ʼae ʼe natou maʼu te ʼamanaki ke natou maʼuli ʼi te kele ʼo talu ai. ʼE natou iloʼi ko te kau fakanofo neʼe filifili e Sehova, pea ʼe ko he pilivilesio kia natou tanatou tauhi fakatahi ki te ʼAtua mo te kau Kilisitiano fakanofo.
2. ʼE lava “olo” feafeaʼi te ʼu “tagata e toko hogofulu” mo te kau fakanofo?
2 Tatau aipe pe ʼe mole feala hatatou iloʼi te ʼu higoa takitahi ʼo te kau fakanofo ʼae ʼe maʼuli ʼi te kele, * kae ʼe feala pe kia natou ʼae ʼe natou ʼamanaki maʼuʼuli ʼi te kele ke natou “olo” mo te kau fakanofo. ʼO feafeaʼi? ʼE ui ia Sakalia 8:23, ko te ʼu “tagata e toko hogofulu” ʼe natou puke anai te tapaʼi kofu ʼo “he tagata Sutea,” * ʼo ui fenei: “E matou olo anai mo [“koutou,” MN], koteuhi kua matou iloi e nofo te Atua mo koutou.” ʼE talanoa te vaega ʼaeni ki te tagata Sutea ʼe tahi. Kae ʼi te lea Fakahepeleo, ko te kupu “koutou,” ʼe fakaʼuhiga ki he toko lua peʼe laka atu. Ko te tagata Sutea ʼaia ʼe mole ina fakatata he foʼi tokotahi pe. ʼE ina fakatata te kau fakanofo katoa. Ko natou ʼae neʼe mole fakanofo, ʼe natou tauhi kia Sehova fakatahi mo te kau fakanofo. Kae ʼe mole natou fakamaʼuhigaʼi ia natou ko honatou ʼu takitaki, koteʼuhi ʼe natou mahino ko tonatou Takitaki pe ʼe tahi ko Sesu.—Mat. 23:10.
3. Kotea te ʼu fehuʼi ʼae ka tali anai ki ai te alatike ʼaeni?
3 Ia ʼaho nei, ʼe kei ʼi ai pe te kau Kilisitiano fakanofo ʼe fakatahi mo tatou. Koia, ʼe feala pe ke tou fai te ʼu fehuʼi ʼaeni: (1) Kotea te manatu ʼae ʼe tonu ke maʼu e te kau fakanofo ʼo ʼuhiga mo natou totonu? (2) ʼE tonu ke feafeaʼi tatatou aga kia natou ʼae ʼe natou kai ki te pane pea mo inu ki te vino? (3) ʼE tonu koa ke tou hoha ʼi te tuputupu ʼa natou ʼae ʼe natou kai ki te pane pea mo inu ki te vino? ʼE tali anai te alatike ʼaeni ki te ʼu fehuʼi ʼaia.
ʼE TONU KE FEAFEAʼI TE MANATU ʼA TE KAU FAKANOFO ʼO ʼUHIGA MO NATOU TOTONU?
4. Kotea te fakatokaga ʼe tonu ke fakakaukauʼi fakamalotoloto ki ai e te kau fakanofo, pea kotea tona tupuʼaga?
4 ʼE tonu ke fakakaukauʼi fakamalotoloto e te kau fakanofo ki te fakatokaga ʼae ʼe tou maʼu 1 Kolonito 11:27-29. (Lau.) ʼE lava feafeaʼi ki he Kilisitiano fakanofo hana kai ki te pane pea mo inu ki te ipu ʼo te ʼAliki “kaʼe ʼe mole tuha mo ia”? ʼE feala ke hoko te aluʼaga ʼaia, mo kapau ʼe kai ki te pane pea mo inu ki te vino, kae ʼe mole fakalogo ki te ʼu lao ʼa Sehova. (Hep. 6:4-6; 10:26-29) ʼE mahino te kau fakanofo ʼe tonu ke natou nofo agatonu, mo kapau ʼe natou fia maʼu “te fakapale ʼae ʼe ko te pauʼi mai te ʼAtua ʼaki ia Kilisito Sesu.”—Flp. 3:13-16.
ia5. ʼE tonu ke feafeaʼi te manatu ʼa te kau Kilisitiano fakanofo ʼo ʼuhiga mo natou totonu?
5 ʼE tokoni te laumalie maʼoniʼoni ʼa Sehova ki ʼana kaugana ke natou agavaivai, kae mole fiatuʼu. (Efe. 4:1-3; Kol. 3:10, 12) ʼE mole natou maʼu te manatu ʼae ʼe natou lelei age ʼi ʼihi. ʼE natou iloʼi ʼe mole foaki e Sehova tona laumalie maʼoniʼoni ki ʼana fakanofo ʼo lahi age ʼi ʼana kaugana ʼae ʼe mole fakanofo. ʼE mole natou manatu ʼe natou mahino lelei age ʼi ʼihi ki te ʼu moʼoni Fakatohi-tapu. Pea ʼe mole natou fakaha anai ʼi he temi ki he Kilisitiano ko ia ko te fakanofo pea ʼe tonu ke kai ki te pane mo inu ki te vino. ʼAki he agavaivai, ʼe natou iloʼi papau ʼe ko Sehova tokotahi pe ʼae ʼe ina fakaafe ia natou ka maʼuli ʼi selo.
6. ʼO mulimuli kia 1 Kolonito 4:7, 8, ʼe tonu ke feafeaʼi te aga ʼa te kau fakanofo?
6 Logo la ʼe ko he pilivilesio lahi ki te kau fakanofo tonatou fakaafe ke maʼuli ʼi selo, ʼe mole natou fakaʼamu anai ke fakamaʼuhigaʼi natou. (Flp. 2:2, 3) Pea tahi, ʼe natou mahino neʼe mole fakaha e Sehova ki he tahi tonatou fakanofo. Koia, ʼe mole natou punamaʼuli ai mo kapau ʼe mole tui atu aipe ʼihi kua fakanofo natou. ʼE natou iloʼi ʼe tokoni te Tohi-Tapu ke ʼaua naʼa tui fakavilivili ki he tahi ʼe ina ui neʼe foaki age e te ʼAtua hana gaue makehe. (Fkha. 2:2) ʼE mole loto e he Kilisitiano fakanofo ke tokagaʼi fau ia ia, pea ʼe mole ina ui kia natou ʼae ko tonatou hoki felaveʼi ʼaia mo ia, ko ia ko he fakanofo. Pea ʼe moʼoni, ʼe mole fiameʼameʼa anai ʼi te pilivilesio ʼae kua ina maʼu.—Lau ia 1 Kolonito 4:7, 8.
7. Kotea ʼae ʼe mole fai e te kau fakanofo, pea kotea tona tupuʼaga?
7 ʼE mole manatu anai e te kau fakanofo ʼe tonu pe ke fakatahitahi ki he tahi kau fakanofo. ʼE mole natou kumi pe he tahi kau fakanofo ke natou faipalalau ki tonatou fakanofo, peʼe natou fai he ʼu kiʼi kutuga ʼo natou ako te Tohi-Tapu. (Kal. 1:15-17) Kapau ʼe natou fai feia, ʼe mole natou lagolago ki te logo tahi ʼo te kokelekasio. Kae ʼe natou fakafeagai anai ki te laumalie maʼoniʼoni ʼae ʼe tokoni ki te ʼu kaugana ʼa te ʼAtua ke natou tokalelei mo logo tahi.—Loma 16:17, 18.
ʼE TONU KE FEAFEAʼI TATATOU AGA KIA NATOU ʼAE ʼE NATOU KAI KI TE PANE PEA MO INU KI TE VINO?
8. He koʼe ʼe tonu ke tou tokakaga ki tatatou faʼahiga aga ki te kau fakanofo? (Vakaʼi mo te kiʼi nota.)
8 ʼE tonu ke feafeaʼi tatatou aga ki te ʼu tehina mo tuagaʼane fakanofo? ʼE mole lelei hatatou fakamaʼuhigaʼi fau he tahi, tatau aipe pe ʼe ko he tehina fakanofo ʼo Kilisito. (Mat. 23:8-12) Ka palalau te Tohi-Tapu ki te kau tagata ʼafeā, ʼe ina fakalotomalohiʼi tatou ke tou “faʼifaʼitakiʼi tanatou tui,” kae ʼe mole ina ui ʼe feala ke tou fakaliliu he tagata ko hatatou takitaki. (Hep. 13:7) ʼE moʼoni, ʼe ui e te Tohi-Tapu “ke lahi age te fakaʼapaʼapaʼi” ʼo ʼihi. Kae ʼe mole tou fai anai te faʼahi ʼaia ʼuhi kua fakanofo natou, kae ʼuhi he ’e “natou takitaki lelei te kokelekasio” pea mo “gaue kinakina ʼi te tala pea mo te akoʼi ʼo te folafola.” (1 Tim. 5:17) Kapau ʼe tou fakamaʼuhigaʼi fau te kau fakanofo, ʼe feala pe ke natou ufiufi ai, * peʼe natou liliu ai ʼo fiatuʼu. (Loma 12:3) ʼE mole he tahi ia tatou ʼe tou fia fai he meʼa ke tupu ai he agahala mamafa ʼa he tehina ʼo Kilisito!—Luka 17:2.
9. ʼE tou fakaha feafeaʼi ʼe tou fakaʼapaʼapa ki te kau Kilisitiano fakanofo?
9 ʼE tou fakaha feafeaʼi ʼe tou fakaʼapaʼapa kia natou ʼae neʼe fakanofo e Sehova? Ohage la, ʼe mole tou fehuʼi age anai pe neʼe feafeaʼi tonatou fakanofo. ʼE ko he aluʼaga ʼe mole tou kau ki ai, ʼe ʼa ia pe mo Sehova. (1 Tes. 4:11; 2 Tes. 3:11) ʼE mole tonu ke tou manatu neʼe toe fakanofo mo tona ʼohoana, peʼe ko ʼana matuʼā, peʼe ko ʼihi ʼo tona famili. ʼE mole fakanofo he tahi ʼuhi he neʼe fakanofo ʼana matuʼā peʼe ko tona ʼohoana. Kae ʼe ko te ʼAtua ʼae ʼe ina fakanofo he tahi. (1 Tes. 2:12) Pea, ʼe mole tonu ke tou fai he ʼu fehuʼi ʼe fakatupu mamahi. Ohage la, ʼe mole tou fehuʼi anai ki te ʼohoana ʼo he tehina fakanofo te ʼu meʼa ʼae ʼe ina logoʼi ʼi tana iloʼi ʼae ʼe mole maʼuli anai mo tona ʼohoana ʼo heʼe gata ʼi te kele. ʼE tou tui papau anai, ʼi te malama foʼou, ʼe fakafiafiaʼi anai e Sehova te loto ʼo te ʼu meʼa maʼuli fuli pe.—Pes. 145:16.
10. Kotea te tuʼutamaki ʼe mole tou to anai ki ai mo kapau ʼe mole tou “vikiʼi” ʼihi?
10 Kapau ʼe mole tou fakamaʼuhigaʼi fau te kau fakanofo, pea ʼe tou toe puipui ai foki mo tatou totonu. ʼO feafeaʼi? ʼE ui e te Tohi-Tapu, ʼe feala anai ki ʼihi kau fakanofo ke mole nonofo agatonu. (Mat. 25:10-12; 2 Pet. 2:20, 21) Koia, ʼe mole tonu ke tou “vikiʼi” he ʼu hahaʼi, ohage la ko te kau fakanofo, peʼe natou iloa peʼe kua fualoa tanatou tauhi kia Sehova. Pea ʼe mole tou muliʼi ia natou. (Suta 16, nota.) Kapau ʼe tou fai feia, tatau aipe pe ʼe natou heʼe agatonu peʼe natou mavae ʼi te kokelekasio, ʼe mole puli ai anai tatatou tui kia Sehova pea ʼe mole tou tuku anai tatatou tauhi kia te ia.
ʼE TONU KOA KE TOU HOHA ʼI TANATOU TUPUTUPU?
11. Kotea ʼae neʼe hoko ʼaki te temi ʼo ʼuhiga mo te lahi ʼo natou ʼae ʼe natou kai ki te pane mo inu ki te vino?
11 Lolotoga ni taʼu, neʼe hifo te lahi ʼo natou ʼae ʼe natou kai ki te pane mo inu ki te vino. Kae ʼi te ʼu taʼu pe ʼae kua hili, kua tuputupu ʼi te taʼu fuli. ʼE tonu koa ke tou hoha ai? Kailoa. Tou vakaʼi he ʼu tupuʼaga.
12. He koʼe ʼe mole tonu ke tou hoha ʼi te tuputupu ʼa natou ʼae ʼe natou kai ki te pane pea mo inu ki te vino?
12 “ ʼE iloʼi e Sehova ia natou ʼae ʼaʼana.” (2 Tim. 2:19) Ko te ʼu tehina ʼae ʼe natou fakaau ia natou ʼae ʼe natou kai ki te pane mo inu ki te vino, ʼe mole natou iloʼi pe ko ai moʼoni ʼae ʼe ina maʼu te ʼamanaki ki te maʼuli ʼi selo. ʼE kehekehe ia mo Sehova. Koia, ʼe kau ki te fakaau ia natou ʼae ʼe natou manatu neʼe fakanofo natou, kae ʼe natou faihala. Ko ʼihi ia natou ʼae neʼe natou kai ki te pane mo inu ki te vino, neʼe mole kei hoko atu tanatou fai te faʼahi ʼaia. Pea ko ʼihi ʼe lagi natou mahahaki ʼi te fakakaukau peʼe ʼi te loto, ʼo natou manatu ai ʼe natou kaugā hau mo Kilisito ʼi selo. Koia, ʼe ha lelei ai ʼe mole feala ke tou iloʼi papau pe ko fakanofo ʼe fia kei toe ʼi te kele.
13. ʼE fakaha koa ʼi te Tohi-Tapu pe ʼe toko fia anai te kau fakanofo ʼi te kele moka kamata te mamahi lahi?
13 ʼE maʼu pe anai ʼi te potu fuli ʼo te kele te kau fakanofo ʼi te temi ʼae ʼe haʼu ai Sesu ʼo ʼave natou ki selo. (Mat. 24:31) ʼE moʼoni, ʼe fakaha ʼi te Tohi-Tapu, lolotoga te ʼu ʼaho fakamuli, ʼe tokosiʼi anai te kau Kilisitiano fakanofo ʼae ʼe maʼuʼuli ʼi te kele. (Fkha. 12:17) Kae mole ina fakaha pe ʼe natou toko fia anai moka kamata te mamahi lahi.
14. Ohage ko tona fakaha ia Loma 9:11, 16, ʼe tou mahino feafeaʼi ki te filifili ʼo te kau fakanofo?
14 Ko Sehova ʼae ʼe ina filifili te temi ʼae ʼe fakanofo ai te kau fakanofo. (Loma 8:28-30) Neʼe ina kamata filifili ʼihi hili te fakatuʼuake ʼo Sesu. ʼE hage ia neʼe fakanofo fuli te kau Kilisitiano moʼoni ʼo te ʼuluaki sekulo. ʼI te ʼu taʼu ki muli mai, tokolahi ia natou ʼae neʼe natou ui ko he kau Kilisitiano, neʼe mole natou maʼuliʼi te ʼu akonaki ʼa Kilisito. Logo la te aluʼaga ʼaia, neʼe fakanofo e Sehova ʼi te ʼu taʼu ʼaia, te kau Kilisitiano moʼoni ʼae neʼe tokosiʼi. Neʼe natou hage ko te fulumeto ʼae neʼe tonu ke homo fakatahi mo te vao kovi. (Mat. 13:24-30) Pea lolotoga te ʼu ʼaho fakamuli, neʼe hoko atu e Sehova tana filifili ia natou ʼae ka kau ki te toko 144 000. * Koia, kapau ʼe ina fakatotonu ke ina fakanofo ʼihi kau agatonu ʼi muʼa ʼo te hoko mai ʼo te fakaʼosi, ʼe mole tou lotolotolua anai ʼo ʼuhiga mo te poto ʼo Sehova. (Lau ia Loma 9:11, 16.) * ʼAua naʼa tou hage ko te kau gaue ʼae neʼe palalau ki ai e Sesu ʼi tana tahi lea fakata. Neʼe natou mumuna ʼo ʼuhiga mo te aga ʼa te pule kia natou ʼae neʼe hoki kamata gaue ʼi te hola fakaʼosi.—Mat. 20:8-15.
15. ʼE kau fuli koa te kau fakanofo ki “te tagata faifekau agatonu mo poto”? Fakamahino.
15 Ko natou ʼae ʼe ʼamanaki maʼuli ʼi selo, mole natou kau fuli ki “te tagata faifekau agatonu mo poto.” (Lau ia Mateo 24:45-47.) Ohage ko te ʼuluaki sekulo, ʼe fakaʼaogaʼi e Sehova mo Sesu ia ʼaho nei he ʼu tehina ʼe tokosiʼi moʼo fafaga, peʼe akoʼi te tokolahi. ʼI te ʼuluaki sekulo, neʼe fakaʼaogaʼi pe ʼihi Kilisitiano fakanofo moʼo tohi ia te Koga Tohi-Tapu Fakakeleka. ʼE toe feia pe ia ʼaho nei, ko he kiʼi tokosiʼi pe ʼi te kau Kilisitiano fakanofo ʼae ʼe natou maʼu te gaue ko te foaki ʼo te meʼa kai “ ʼi tona temi totonu” ki te hahaʼi ʼa te ʼAtua.
16. Kotea ʼae neʼe tou ako mai te alatike ʼaeni?
16 Kotea ʼae neʼe tou ako mai te alatike ʼaeni? Neʼe fakatuʼutuʼu e Sehova ke ina foaki te maʼuli heʼe gata ʼi te kele ki te tokolahi ʼo ʼana kaugana, pea ko te maʼuli ʼi selo ki he kiʼi tokosiʼi ʼae ka kaugā hau anai mo Sesu. ʼE ina fakapale ʼana kaugana fuli, te “tagata Sutea” feia mo te ’u “tagata e toko hogofulu.” Pea ʼe ina loto ke natou fakalogo tatau ki te ʼu lao pea mo natou nonofo agatonu. ʼE tonu ke natou agavaivai fuli, mo natou tauhi fuli kia te ia ʼi te logo tahi. Pea ʼe tonu ke natou faiga malohi ke natou taupau te tokalelei ʼi te kokelekasio. Tou hoko atu tatatou tauhi kia Sehova pea mo muliʼi ia Kilisito ohage ko “he faga ovi ʼe tahi” he ʼe kua ovi mai te fakaʼosi.—Soa. 10:16.
^ pal. 5 ʼI te taʼu ʼaeni, ʼe fakamanatu anai te mate ʼo Kilisito ʼi te Feliatolu, ʼaho 7 ʼo Apelili. ʼE feafeaʼi anai tatatou aga kia natou ʼae ʼe natou kai ki te pane pea mo inu ki te vino ʼi te ʼaho ʼaia? Kapau ʼe tuputupu ia natou ʼae ʼe natou kai ki te pane pea mo inu ki te vino, ʼe feala koa ke ke hoha ai? ʼE tali anai e te alatike ʼaeni ki te ʼu fehuʼi ʼaia. Neʼe toʼo te ʼu manatu mai te alatike ʼo Te Tule Leʼo ʼo Sanualio 2016.
^ pal. 2 ʼO mulimuli kia Pesalemo 87:5, 6, ʼe lagi fakaha anai e te ʼAtua ʼi te ka haʼu te higoa ʼo natou fuli ʼae ʼe kaugā hau mo Sesu ʼi selo.—Loma 8:19.
^ pal. 2 ʼI te vaega ʼaeni pea mo ʼihi atu, ko matou ʼae neʼe matou fakailoga keheʼi.
^ pal. 8 Vakaʼi te fakamatala ʼae ’i te ’a takai “Ko Te ʼOfa ‘’e Mole Ina Fai Ni Aga ʼe Mole Tau Mo Feʼauga’” ʼi Te Tule Leʼo ʼo Sanualio 2016.
^ pal. 14 Tatau aipe pe ʼe fakaha ia Gaue 2:33 neʼe mafola te laumalie maʼoniʼoni ʼaki ia Sesu, kae ʼe ko Sehova totonu ʼae ʼe ina filifili te kau Kilisitiano takitahi.
^ pal. 14 Kapau ’e kotou fia ma’u he tahi ’u fakamahino, vakaʼi te alatike “Te ʼu Fehuʼi ʼa Te Kau Lautohi” ʼi Te Tule Leʼo ʼo te ʼaho 1 ʼo Maio 2007.
KATIKO 34 ʼE Au Haʼele Anai ʼi Te Moʼoni
^ pal. 57 FAKAMATALA ʼO TE PĀKI: ʼI he fakatahi lahi, ko he ʼu tehina mo tuagaʼane ʼe natou feleleʼi ke natou toho he ʼu pāki mo te fakafofoga ʼo te pilo fakamalamanei pea mo tona ʼohoana. ʼE mole ko he aga fakaʼapaʼapa ʼaia!