ALATIKE AKO 1
“Koia, Kotou Olo ʼo Fai Ni Tisipulo”
TE VAEGA ʼO TE TAʼU 2020: “Koia, kotou olo ʼo fai ni tisipulo . . . , ʼo kotou papitemaʼi natou.” —MAT. 28:19.
KATIKO 79 Akoʼi Age Ke Natou Tutuʼu Malohi
TE ʼU MANATU FAKANOUNOU *
1-2. Kotea ʼae neʼe ui e te ʼaselo ki te ʼu fafine? Pea kotea te ʼu fakatotonu ʼae neʼe ina foaki kia naua?
KUA mafoa ake leva te ʼaho 16 ʼo Nisani ʼo te taʼu 33 H.T.S. * Neʼe ʼi ai ʼihi fafine neʼe pipiki ki te ʼAtua mo lotomamahi ʼaupito, neʼe natou olo ki te fale maka. Neʼe kua ʼaho lua te tuku ai te sino ʼo te ʼAliki ko Sesu Kilisito. Neʼe natou olo mo te ʼu ʼakau fakamagoni mo te ʼu lolo magoni moʼo fakamagoni tona sino. Kae ʼi tanatou tau atu ki ai, neʼe natou punamaʼuli, he neʼe lavaki te fale maka. Neʼe ui age e te ʼaselo ki te ʼu fafine ʼaia kua fakatuʼuake ia Sesu. Pea neʼe ina toe ui fenei: “ ʼE muʼamuʼa ia koutou ki Kalilea. ʼE kotou sisio anai kia te ia ʼi ai.”—Mat. 28:1-7; Luka 23:56; 24:10.
2 ʼI te mavae mai ʼa te ʼu fafine mai te fale maka, neʼe felaveʼi ia Sesu mo naua. Pea neʼe ina fakatotonu fenei age: “Kolua olo ʼo fakamatala ki ʼoku tehina te ʼu meʼa ʼae neʼe hoko ke natou olo ai ki Kalilea, pea ʼe natou sisio anai kia te au ʼi ai.” (Mat. 28:10) Koia, hili te fakatuʼuake ʼo Sesu, neʼe ina fakatuʼutuʼu ke ʼuluaki felaveʼi mo ʼana tisipulo. Pea ʼi tanatou felaveʼi leva, neʼe foaki age e Sesu kia natou he ʼu fakatotonu maʼuhiga.
NEʼE FAKATOTONU E SESU KIA AI TE FAI ʼO NI TISIPULO?
ʼI te felaveʼi ’a Sesu mo ʼana apositolo pea mo ʼihi tisipulo ʼi Kalilea, hili tona fakatuʼuake, neʼe ina fakatotonu age ke natou ‘olo ki te hahaʼi ʼo fai ni tisipulo’ (Vakaʼi te alatike ako 1, palakalafe 3-4)
3-4. ʼE tou iloʼi feafeaʼi neʼe mole foaki pe e Sesu te fakatotonu ʼae ia Mateo 28:19, 20 ki ʼana apositolo? (Vakaʼi te pāki ʼo te takafi.)
3 Lau ia Mateo 28:16-20. ʼI te felaveʼi ’a Sesu mo ʼana tisipulo, neʼe palalau kia natou ʼo ʼuhiga mo he gaue maʼuhiga ʼe natou fakahoko anai ʼi tonatou temi. Pea ʼe tou toe lolotoga fakahoko nei te gaue maʼuhiga ʼaia. Neʼe ina ui fenei: “Koia, kotou olo ʼo fai ni tisipulo ʼi te hahaʼi ʼo te ʼu fenua fuli pe, . . . ʼo akoʼi natou ke natou mulimuli ki te ʼu meʼa fuli ʼae neʼe au fakatotonu atu kia koutou.”
4 ʼE loto e Sesu ke faifakamafola ʼana tisipulo fuli. Neʼe mole ina tuku pe te fakatotonu ʼaia ki ʼana apositolo agatonu ʼae ʼe toko 11. ʼE feafeaʼi hatatou iloʼi te faʼahi ʼaia? ʼI te temi ʼae neʼe foaki ai e Sesu te fakatotonu ʼaia, neʼe mole ko te kau apositolo pe ʼae neʼe nonofo mo ia ʼi te moʼuga ʼo Kalilea. Tou manatuʼi te ʼu palalau ʼaeni neʼe fai e te ʼaselo ki te ʼu fafine: “ ʼE kotou sisio anai kia te ia ʼi [Kalilea].” Koia ʼe mahino ia, neʼe toe kau ai mo te ʼu fafine agatonu ʼaia. Kae neʼe mole gata ai. Neʼe ui e te apositolo ko Paulo, neʼe ha ia Sesu “ki te ʼu tehina ʼe toko 500 tupu ʼi he temi pe tahi.” (1 Ko. 15:6) Neʼe fakatahitahi ʼifea te ’u tehina ʼaia?
5. Kotea ʼae ʼe tou ako mai ia 1 Kolonito 15:6?
5 ʼE feala hatatou tui ʼe talanoa Paulo ia 1 Kolonito 15:6 ki te fakatahitahi ʼae neʼe hoko ʼi Kalilea, ʼae ʼe fakamatala ia Mateo kapite 28. Kotea tona tupuʼaga? ʼUluaki, neʼe kaugā malie te ʼu tisipulo ʼa Sesu neʼe ko te kau Kalilea. Koia neʼe faigafua age te fakatahitahi ʼa he hahaʼi kaugā malie ʼi he moʼuga ʼo Kalilea, ʼi hanatou fakatahitahi ʼi he loto fale ʼi Selusalemi. Lua, hili te fakatuʼuake ʼo Sesu, neʼe kua ʼosi faipalalau pe mo ʼana apositolo ʼe toko 11 ʼi he koga fale ʼi Selusalemi. Ka na pau la neʼe loto e Sesu ke ina foaki pe ki ʼana apositolo te fakatotonu ʼae ke faifakamafola pea mo fai ni tisipulo, neʼe feala pe ke ina fai ʼi Selusalemi. Kae neʼe ina kole kia natou, mo ʼihi fafine pea mo ʼihi atu hahaʼi ke natou felaveʼi ki Kalilea.—Luka 24:33, 36.
6. ʼE tou iloʼi feafeaʼi neʼe mole fai pe e Sesu tana fakatotonu ki te kau Kilisitiano ʼo tona temi? Pea kotea te ʼu fua ʼo te fakalogo ki te fakatotonu ʼaia?
6 ’E ’i ai te tahi tupu’aga maʼuhiga ke tou tui ai neʼe mole fai pe e Sesu tana fakatotonu ki te kau Kilisitiano ʼo tona temi. Neʼe fakaʼosi fenei e Sesu ʼana fakatotonu: “ ʼE au nofo anai mo koutou ʼi te ʼaho fuli pe ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaeni.” (Mat. 28:20) ʼE moʼoni, kua tou kaugā malie ia ʼaho nei ʼi te fai ʼo ni tisipulo. Tou fakakaukauʼi age muʼa, ʼi te taʼu fuli ko te teitei toko 300 000 hahaʼi ʼe natou papitema ko he ʼu kaugana ʼa Sehova, pea mo liliu ai ko te ʼu tisipulo ʼa Sesu Kilisito!
7. Kotea ʼae ka tou palalau ki ai ʼi te alatike ʼaeni? Pea kotea tona tupuʼaga?
7 Tokolahi ia natou ʼae ʼe natou ako te Tohi-Tapu, ʼe natou tuputupu pea mo papitema. Kae ko ʼihi leva ʼe mole natou fia liliu ko ni tisipulo. ʼE natou leleiʼia te ako ʼo te Tohi-Tapu kae ʼe mole natou fakamalotoloto. Kapau ʼe ke fai he ako Tohi-Tapu ʼa he tahi, ʼe lagi ke fia tokoni ki ai ke ina maʼuliʼi te ʼu meʼa ʼae ʼe ina ako ke liliu ai ko he tisipulo ʼa Kilisito. ʼE tou palalau anai ʼi te alatike ʼaeni pe ʼe tou lava tokoni feafeaʼi ki ʼatatou kau ako, ke natou ʼoʼofa kia Sehova pea ke natou tuputupu ʼi te faʼahi fakalaumalie. He koʼe ʼe tonu ke tou palalau ki te aluʼaga ʼaia? Koteʼuhi ʼe ʼi ai anai he temi ʼe tonu ai ke tou fakakaukau pe ʼe tonu ke hoko atu te ako peʼe tonu ke taʼofi.
FAIGA MALOHI KE ʼOFA KIA SEHOVA
8. He koʼe ʼe feala ke faigataʼa te tokoni ki he ako ke ʼofa kia Sehova?
8 ʼE loto e Sehova ke tauhi age te hahaʼi ʼaki te ʼofa. ʼE tonu ke tou tokoni ki te kau ako ke natou mahino, ʼe tokagaʼi e Sehova ia natou takitokotahi pea ʼe ʼofa mamahi ia natou. ʼE tou loto ke natou mahino ko Sehova ko “te tamai a te u fanau hala matua” pea mo “te tauhi o te u vitua.” (Pes. 68:6) ʼI te temi ʼae ʼe mahino ai ʼau kau ako ʼe ʼofa mamahi te ʼAtua kia natou, ʼe toe tuputupu anai mo tonatou ʼofa kia te ia. ʼE lagi faigataʼa ki ʼihi kau ako hanatou mahino ko Sehova ko he Tamai ʼofa, koteʼuhi neʼe mole ʼofa ʼanatou tamai kia natou. (2 Tim. 3:1, 3) Koia la ʼae, ka ke fai he ako Tohi-Tapu, fakamaʼuhigaʼi te ʼu kalitate taulekaleka ʼo Sehova. Tokoni ki tau ako ke mahino ko totatou ʼAtua ʼofa ʼe ina loto ke ina maʼu te maʼuli heʼe gata. Pea ʼe lotolelei anai ia Sehova ʼi te tokoni age ki ai. Kotea la he tahi age faʼahi ʼe feala ke tou fai?
9-10. Kotea te ʼu tohi ʼae ʼe tonu ke tou fakaʼaogaʼi moʼo fai he ako Tohi-Tapu? Kotea tona tupuʼaga?
9 Fakaʼaogaʼi te ʼu tohi “Kotea ʼAe ʼe Akoʼi Mai ʼi Te Tohi-Tapu?” pea mo “Kotou Haga Nonofo ʼi Te ʼOfa ʼo Te ʼAtua.” ʼE tokoni tafito mai te ʼu tohi ʼaia ke tou faigaʼi ke ʼoʼofa ʼatatou kau ako kia Sehova. Ohage la, ʼi te kapite 1 ʼo te tohi Ako’i Mai, ʼe tou maʼu ai te ʼu tali ki te ʼu fehuʼi ʼaeni: ʼE tokaga koa te ʼAtua kia tatou?, Kotea ʼae ʼe logoʼi e te ʼAtua moka maʼuli mamahi te hahaʼi?, pea ʼE feala koa ke ke kaumeʼa mo Sehova? Kae ʼe feafeaʼi ki te tohi Te ʼOfa ʼo Te ʼAtua? ʼE tokoni te tohi ʼaia kia ia ʼae ʼe ako, ke mahino ʼe lelei age anai tona maʼuli pea ʼe fakaovi anai kia Sehova mo kapau ʼe ina maʼuliʼi te ʼu pelesepeto Fakatohi-tapu. Tatau aipe pe neʼe kua ke fakaʼaogaʼi te ʼu tohi ʼaia moʼo fai he ʼu ako Tohi-Tapu, kae ke ke teuteuʼi lelei pe te ʼu ako takitahi. Pea ke ke fai te fa’ahi ʼaia ʼo ke manatuʼi te ʼu meʼa ʼae ʼe ʼaoga kia ia ʼae ʼe ako.
10 Kae, ʼe feafeaʼi mo kapau ʼe fia vakaʼi e tau ako he manatu ʼe talanoa ki ai he tohi ʼe mole maʼu ʼi ʼatatou Meʼa Gaue Ki Te Faiako? ʼE lagi feala pe ke ke fakalotomalohiʼi ke hoki ina lau pe la te tohi ʼaia. Kapau ʼe ke fai feia, pea ʼe hoko atu pe anai takolua ako te ʼu tohi ʼe lua ʼae neʼe tou talanoa ki ai ʼi te palakalafe ki muʼa atu.
Kamata te ako ʼaki he faikole (Vakaʼi te palakalafe 11)
11. Ko te temi fea ʼae ʼe tonu ai ke tou kamata he ako pea mo fakaʼosi ʼaki te faikole? Pea ʼe tou tokoni feafeaʼi kia ia ʼae ʼe ako ke mahino ki tona maʼuhiga?
11 Kamata te ako ʼaki te faikole. ʼI te agamahani, ʼe lelei age te kamata ʼo he ako pea fakaʼosi ʼaki te faikole ʼi te ʼu ʼuluaki vahaʼa pe. ʼE tonu ke tou fakamahino kia ia ʼae ʼe ako, ʼe hoki tou mahino pe ki te Folafola ʼa te ʼAtua ʼaki te tokoni ʼa te laumalie maʼoniʼoni ʼa te ʼAtua. ʼE fakaʼaogaʼi e ʼihi te vaega ʼo Sakopo 1:5 moʼo fakamahino ki ʼanatou kau ako te maʼuhiga ʼae ʼo te faikole ʼi te ako. ʼE ui fenei ʼi te vaega ʼaia: “Koia, kapau ʼe ʼi ai he tahi ia koutou ʼe ʼaoga ki ai te poto, ke ina haga kole ki te ʼAtua.” Pea ʼe natou fai leva te fehuʼi ʼaeni kia ia ʼae ʼe ako: “ ʼE feafeaʼi hatatou kole te poto ki te ʼAtua?” ʼE mahino ia, ʼe ina tali anai ʼe tonu ke tou faikole ki te ʼAtua.
12. ʼE feafeaʼi hau fakaʼaogaʼi ia Pesalemo 139:2-4 moʼo tokoni kia ia ʼae ʼe ako ke lelei age ʼana faikole?
12 Fakaha ki tau ako pe ʼe feafeaʼi te faikole. Tokoni ki ai ke mahino, ko Sehova ʼe fia fagono moʼoni ki ʼana faikole. Fakamahino ki ai, ko ʼatatou faikole takitokotahi ʼe tou fakaha ai kia Sehova te ʼu meʼa fuli ʼae ʼe tou logoʼi, ʼo feia mo te ʼu meʼa ʼae ʼe mole tou fia fakaha ki he tahi. Tou manatuʼi kua ʼosi iloʼi e Sehova ʼatatou manatu loloto. (Lau ia Pesalemo 139:2-4.) ʼE feala ke tou fakalotomalohi ia ia ʼae ʼe ako ke kole tokoni ki te ʼAtua ke ina fetogi ʼana manatu pea ke ina tauʼi ʼana agamahani ʼae ʼe kovi. Tou vakaʼi te faʼifaʼitaki ʼaeni: ’E ko he tahi kua fualoa tana ako te Tohi-Tapu. Kae ʼe kei pipiki pe ki he ʼaho lahi ʼe mole tonu ke kau ki ai te kau Kilisitiano. Logo la ʼe ina iloʼi ʼe mole leleiʼia e te ʼAtua te ʼaho lahi ʼaia, kae ʼe kei ina leleiʼia pe ʼihi aluʼaga ʼo te ʼaho lahi ʼaia. Fakalotomalohiʼi ia ia ke faikole ʼo ʼuhiga mo te ʼu meʼa ʼae ʼe ina logoʼi, pea mo kolekole kia Sehova ke tokoni kia ia ke ʼofa pe ki te meʼa ʼae ʼe ʼofa ki ai Sehova.—Pes. 97:10.
Fakaafe tau ako ki ʼatatou fono (Vakaʼi te palakalafe 13)
13. (1) He koʼe ʼe mole tonu ke fakatuatuai te fakaafe ʼo tatatou ako ki te ʼu fono? (2) Kotea ʼae ʼe tonu ke tou fai ke mole mataku ʼi te kau ki ʼatatou fono?
13 ʼAua naʼa ke fakatuatuai ʼi te fakaafe tau ako ke kau ki ʼatatou fono. ʼE feala ki te ʼu meʼa ʼae ʼe logo mo sio ki ai ʼi te ʼu fono ke malave ki tona loto pea mo tuputupu ai. Fakaha age ki ai te ʼata viteo Kotea ʼAe ʼe Fai ʼi Te Fale Fono? pea ke fakaafe leva ia ia ki ʼatatou fono. Kapau ʼe feala, ui age ki ai ʼe ke fia haʼu ʼo kumi ia ia. ʼE toe lelei pe foki la ke ke fetogitogi natou ʼae ʼe olo mo koe ʼo fai te ako. Kapau ʼe ke fai feia, ʼe feiloʼiʼaki anai tau ako mo natou ʼo te kokelekasio. Pea ʼe mole mataku anai ʼi te kau ki ʼatatou fono.
TOKONI KI TAU AKO KE TUPUTUPU ʼI TE FAʼAHI FAKALAUMALIE
14. Kotea ʼae ʼe feala ke ina uga ia ia ʼae ʼe ako ke tuputupu ʼi te faʼahi fakalaumalie?
14 Tou fakatuʼutuʼu ke tou tokoni ki tatatou ako ke tuputupu ʼi te faʼahi fakalaumalie. (Efe. 4:13) Ka fia ako e he tahi ia te Tohi-Tapu, lagi ʼe ina fia maʼu he ʼu fua lelei ʼe tokoni anai ki tona maʼuli. Kae kapau ʼe tuputupu tona ʼofa kia Sehova, ʼe mahino ia, ʼe ina fakakaukauʼi anai pe ʼe feafeaʼi hana tokoni ki niʼihi, pea mo natou ʼo te kokelekasio. (Mat. 22:37-39) ʼI te temi ʼae ʼe ke fakafuafua ai kua feala, fakamahino age ki tau ako ʼe ko totatou maʼua pea ʼe ko he pilivilesio te lagolago fakapaʼaga ki te gaue ʼo te Puleʼaga.
Akoʼi ki tau ako pe ʼe kotea ʼae ʼe tonu ke ina fai moka tau mo he ʼu fihifihia (Vakaʼi te palakalafe 15)
15. ʼE tou tokoni feafeaʼi ki he tahi ʼe ako ke ina fakatokatoka hona fihifihia?
15 Tokoni ki tau ako ke ina tauʼi te ʼu fihifihia. Tou to’o te faʼifaʼitaki ʼaeni: Ko tau ako kua faifakamafola kae ʼe heʼeki papitema. Pea ʼe ina ui atu neʼe fakamamahiʼi ia ia e he tehina ʼo te kokelekasio. ʼAua naʼa ke ui age pe ʼe ko ai ʼae ʼe moʼoni peʼe ko ai ʼae ʼe hala. Kae ke fakamahino age ʼaki te Tohi-Tapu pe ʼe kotea ʼae ʼe tonu ke ina fai. ʼE feala pe hana fakamolemole ki te tehina pea mo ina galo’i te meʼa ʼae neʼe hoko. Kae kapau ʼe mole feala, pea ʼe tonu leva ke alu ki te tehina ʼo faipalalau mo ia ʼi te ʼofa, ʼaki te fakatuʼutuʼu ʼae ke nā fakatokatoka. (Vakaʼi ia Mateo 18:15.) Pea ʼe tonu anai ke ke tokoni ki ai ke ina teuteuʼi te ʼu palalau ʼae ka ina fai. Fakaha ki ai pe ʼe feafeaʼi hana fakaʼaogaʼi te application JW Library, mo te Kumiʼaga Tohi maʼa te Kau Fakamoʼoni ʼa Sehova pea mo tatatou tuʼasila ʼi te Neti jw.org. ʼE feala ai ke ina maʼu he ʼu puleʼaki moʼo fakatokatoka te fihifihia ʼaia. Kapau ʼe ina ako te fakatokatoka ʼo ʼona fihifihia mo ʼihi ʼi muʼa ʼo tona papitema, ʼe felogoi lelei anai mo te kokelekasio katoa hili tana papitema.
16. He koe e lelei ke ke fakaafe ʼihi kaugā fagona ke olo mo koe ʼo fai te ako?
16 Fakaafe ʼihi ʼo te kokelekasio ke natou kau ki te fai ʼo te ako, ’o feia mo te taupau ʼo te siliko moka ina ʼaʼahi te kokelekasio. Kotea tona tupuʼaga? Koteʼuhi ʼe feala ke maʼu e tau ako he tahi ʼu fua lelei. Ohage la, ʼe feala pe ke tokoni ʼihi kaugā fagona ki tau ako ʼi he ʼu aluʼaga ʼe lagi mole feala ke ke tokoni ki ai. Tou toʼo he faʼifaʼitaki. Kua tuʼa lahi te faigaʼi e tau ako ke tuku tana suluka, kae ʼe mole ina lavaʼi. ʼE feala leva ke ke fakaafe ki te ako he Fakamoʼoni neʼe faigataʼa ʼaupito te tuku ʼo tana suluka. ʼE feala anai ke ina foaki he ʼu tokoni ʼaoga kia ia ʼae ʼe ako. Kapau ʼe kolua kaugā olo mo he tehina kua faiva ʼi te faifakamafola, ʼe lagi faigataʼa anai kia koe tau fai te ako. Koia, ʼe feala pe ke ke kole age ke ina takitaki te ako. Ka ke fakaafe he tahi ke kolua fai he ako Tohi-Tapu, faiga ke fua lelei kia ia ʼae ʼe ako. Ke ke manatuʼi, ʼe tou fakatuʼutuʼu ke tou tokoni kia ia ʼae ʼe ako ke tuputupu ʼi te faʼahi fakalaumalie.
’E TONU KOA KE AU TA’OFI MU’A TE AKO?
17-18. Kotea ʼae ʼe tonu ke ke fakakaukauʼi ʼi muʼa ʼo hau taʼofi he ako?
17 Kapau ’e mole fai e tau ako he ’u fetogi ’i tona maʼuli, ’e tonu anai ke ke vaka’i pe ’e tonu ke hoko atu pe’e kailoa. ’I mu’a ’o hau fai he puleʼaki, ’e tonu anai ke ke manatu’i te ’u fealagia ’o tau ako. Ko ʼihi hahaʼi ʼe ʼaoga kia natou he temi ʼe loaloaga ke natou tuputupu ai. Koia, ʼe feala ke ke fai te ʼu fehuʼi ʼaeni: ‘ ʼE tuputupu lelei koa taku ako, logo la te alu’aga ʼo tona maʼuli?’ ‘Kua ina kamata “mulimuli” koa, peʼe maʼuliʼi te ʼu meʼa ʼae ʼe ina ako?’ (Mat. 28:20) ʼE feala ke tuputupu mamalie te ʼu faiga ʼo ia ʼae ʼe ako, kae ʼe tonu ke fai tuʼumaʼu.
18 Kae kapau la, talu mai te temi ʼae neʼe kamata *
ai tana ako, ʼe mole faiga fakamalotoloto, kotea ʼae ʼe tonu ke ke fai? Fakakaukauʼi age muʼa te aluʼaga ʼaeni: Ohage la ko he tahi kua ina ʼosi ako te tohi Ako’i Mai pea mo te lagi tohi Te ʼOfa ’o Te ʼAtua, kae mole heʼeki pe la kau ʼi he fono, pe’e ko te ʼAho Fakamanatu. Pea ʼe ina holoʼi pe tana ako ʼi he meʼa noa. Kapau ko te ʼuhiga ʼaia ʼo tau ako, ʼe lagi lelei ke ke faipalalau fakahagatonu mo ia.19. ʼE feafeaʼi anai hau tokoni ki he tahi ’e mole faiga fakamalotoloto ʼi tana ako? Pea kotea ʼae ʼe tonu ke ke fakakaukau ki ai?
19 ʼE feala ke ke kamata te faipalalau ʼaia, ʼo ke fehuʼi fenei age: ‘Kotea ʼae ʼe faigataʼa ai kia koe ke ke liliu ko he Fakamoʼoni ʼa Sehova?’ ʼE feala pe ke ina tali fenei atu: ‘’E au fia ako te Tohi-Tapu, kae ʼe mole feala anai ke au liliu ko he Fakamoʼoni ʼa Sehova!’ Kapau la, talu mai te temi ʼae neʼe kamata ai tana ako, ʼe kei feia pe tana manatu, ko he lagi faigamalie ʼaia ke taʼofi mu’a tana ako. Kae kapau la ’e ina fakaha atu te tupu’aga ’o tana mole tuputupu ʼi te faʼahi fakalaumalie. Ohage la, ʼe ina ui atu ʼe faigataʼa anai kia ia te faifakamafola. Koia, ʼi tau kua iloʼi tana manatu, kua faigafua leva tau tokoni ki ai.
ʼAua naʼa pulinoa tou temi ʼi te fai ʼo he ako ʼa he tahi ʼe mole faiga ke tuputupu (Vakaʼi te palakalafe 20)
20. ʼE tokoni feafeaʼi mai ia Gaue 13:48, ke tou iloʼi ai pe ’e tonu ke tou taʼofi pe’e tou hoko atu te ako?
20 Meʼa fakaʼofaʼofa foki, koteʼuhi ko ʼihi kau ako ʼe natou hage ko te kau Iselaele ʼo te temi ʼo Esekiele. Neʼe ui fenei e Sehova ki tana polofeta ’o ʼuhiga mo natou ʼaia: “Koeni, e ke hage kia natou ko he tagata hiva malie, ae e leo lelei, pea e poto i te fai musika. E natou fakalogo ki au palalau, kae e mole pe natou fai natou.” (Esk. 33:32) ʼE feala ke faigataʼa hatatou ui kia ia ʼae ʼe ako ʼe tou taʼofi mu’a tana ako. Kae “ ʼe kua nounou te temi ʼae ʼe kei toe.” (1 Ko. 7:29) ʼE lagi lelei age ke ʼaua naʼa hoko atu te ako ʼa ia ʼae ʼe mole tuputupu. Kae tou ako’i tatou ia natou ʼae ’e fakaha ’e “lelei ʼonatou loto ke natou maʼu te maʼuli heʼe gata.”—Lau ia Gaue 13:48.
ʼE lagi ʼi ai ni hahaʼi ʼi tou telituale ʼe natou faikole ke natou maʼu he tokoni (Vakaʼi te palakalafe 20)
21. Kotea te vaega ’o te ta’u 2020, pea ’e tokoni feafeaʼi mai kia tatou?
21 ʼE tokoni mai anai te vaega ʼo te ta’u ʼaeni ke lelei age tatatou fai ni tisipulo. Neʼe fai e Sesu te ʼu palalau ʼaia lolotoga tanatou fono maʼuhiga ʼae neʼe hoko ’i te mo’uga ’o Kalilea. Neʼe ina ui fenei: “Koia, kotou olo ʼo fai ni tisipulo . . . , ʼo kotou papitemaʼi natou.”—Mat. 28:19.
ʼE tou loto ke lelei age tatatou fai ni tisipulo pea mo tokoni ki ʼatatou ako ke tuputupu ʼo kaku ki te papitema (Vaka’i te palakalafe 21)
KATIKO 70 Kotou Kumi Ia Natou ʼAe ʼe Tuha Mo Te Maʼuli
^ pal. 5 Ko te vaega ʼo te taʼu 2020, ʼe ina fakalotomalohiʼi tatou ke tou olo ʼo “fai ni tisipulo.” Pea ʼe tonu ke fakalogo te ʼu kaugana fuli ʼa Sehova ki te fakatotonu ʼaia. ʼE feafeaʼi hatatou ʼekenaki ʼatatou kau ako Tohi-Tapu ke natou liliu ko he ʼu tisipulo ʼa Kilisito? ʼE fakaha ʼi te alatike ʼaeni pe ʼe feafeaʼi hatatou tokoni ke natou liliu ʼo kaumeʼa lelei mo Sehova. ʼE tou toe vakaʼi anai pe ʼe feafeaʼi hatatou iloʼi pe ʼe tonu ke hoko atu he ako Tohi-Tapu peʼe tonu ke taʼofi.
^ pal. 1 Ko te ’u mata ’i tohi ’aeni H.T.S. ko tona faka’uhiga: Hili te Temi ’o Sesu.
^ pal. 18 Vakaʼi te ʼata viteo Fakagata Te ʼu Ako ʼAe ʼe Mole Tuputupu, ’i te Televisio JW.