ALATIKE AKO 3
ʼE Ke Maʼuhiga Kia Sehova!
“Ko ia ae nee manatu kia tatou i te temi nee tou mamahi ai.” —PES. 136:23.
KATIKO 33 Tuku Tau Kavega Kia Sehova
TE ʼU MANATU FAKANOUNOU *
1-2. Kotea te ʼu aluʼaga ʼae ʼe tau mo te ʼu kaugana ʼa Sehova, pea kotea ʼae ʼe feala ke natou logoʼi?
FAKAKAUKAUʼI age muʼa te ʼu aluʼaga ʼaeni ʼe tolu: ʼE fakaha age e te toketa ki he tehina tupulaga kua ina maʼu he mahaki ʼe kovi. Ko te tahi tehina faʼa gaue, kua taʼu 50, ʼe mole kei hana gaue. Logo la ʼana faiga malohi, kae mole heʼeki ina maʼu hana tahi gaue. Ko he tuagaʼane kua vaivai matuʼa, ʼe mole kei lahi tana gaue kia Sehova.
2 Kapau ʼe ke tau mo he aluʼaga feia, ʼe lagi ke logoʼi ai ʼe mole kei hou ʼaoga. Ko te aluʼaga ʼaia ʼe feala ke puli ai tou fiafia, pea ʼe mole kei ke taupau he manatu ʼe lelei, pea toe fua kovi ki ʼau felogoi mo ʼihi.
3. Kotea te manatu ʼa Satana pea mo natou ʼae ʼe ina fakaneke ʼo ʼuhiga mo te maʼuli?
3 ʼE ha ʼi te malama ʼaeni te manatu ʼa Satana ʼo ʼuhiga mo te maʼuli. Neʼe fakaha tuʼumaʼu e Satana ʼe mole ina fakamaʼuhigaʼi te tagata. Neʼe mole ʼofa, he neʼe ina iloʼi lelei pe kapau ʼe talagataʼa ia Eva ki te ʼAtua pea ʼe mate anai. Kae neʼe ina ui ia kia Eva ʼe liliu anai ʼo ʼateaina moka ʼe talagataʼa. Pea tahi, ʼe puleʼi e Satana te ʼu tuʼu fakakoloa, mo fakapolitike pea mo fakalotu ʼo te malama ʼaeni. ʼE mole tou punamaʼuli ki te mole fakaʼapaʼapa ʼa te kau faikoloa, mo te kau takitaki politike, pea mo te kau takitaki lotu ki te maʼuli pea mo te ʼu meʼa ʼae ʼe logoʼi e te hahaʼi.
4. Kotea ʼae ka tou vakaʼi ʼi te alatike ʼaeni?
4 Kae ko Sehova ʼe ina loto ke tou maʼu he manatu ʼe lelei ʼo Pes. 136:23; Loma 12:3) ʼE tou vakaʼi anai ʼi te alatike ʼaeni pe ʼe tokoni feafeaʼi mai ia Sehova ʼi te ʼu aluʼaga ʼaeni: (1) Moka tou mahahaki, (2) moka tou tau mo he ʼu fihifihia fakapaʼaga, pea (3) moka tou vaivai matuʼa, he ʼe feala ke tou maʼu ai te manatu ʼae ʼe mole kei hotatou ʼaoga ʼi te tauhi kia Sehova. Moʼo kamata, tou vakaʼi muʼa pe ʼe koʼe ʼe tou tui papau ʼe tou maʼuhiga fuli kia Sehova.
ʼuhiga mo tatou. Pea ʼe tokoni mai ʼi te ʼu aluʼaga ʼae ʼe feala ke tou manatu ai ʼe mole tou maʼuhiga. (ʼE TOU MAʼUHIGA FULI KIA SEHOVA
5. Kotea ʼae ʼe ke tui ai ʼe tou maʼuhiga kia Sehova?
5 Logo la neʼe faʼu tatou ʼaki te efu, kae ʼe tou maʼuhiga age ʼi he lukuga efuʼi kele. (Sen. 2:7) Tou vakaʼi he ʼu tupuʼaga ke tou tui ai ʼe tou maʼuhiga kia Sehova. ʼUluaki, neʼe ina fakatupu te tagata mo te fealagia ʼae ke ina faʼifaʼitakiʼi ʼona kalitate. (Sen. 1:27) Pea neʼe ina fakatupu tatou ʼo tou maʼuhiga age ʼi te ʼu meʼa fuli ʼae neʼe ina fakatupu. Neʼe ina toe foaki mai te maʼua ʼae ke tou tokakaga ki te kele pea mo te ʼu manu fuli.—Pes. 8:5-9.
6. Kotea he tahi fakamoʼoni ʼe ha ai ʼe tou maʼuhiga kia Sehova logo la totatou ʼuhiga agahala?
6 Neʼe hoko atu te fakamaʼuhigaʼi e Sehova te tagata maʼia ʼi te ʼosi agahala ʼa Atama. ʼE tou tui ʼe tou maʼuhiga kia te ia, he neʼe ina foaki mai tona ʼAlo ʼofaina, ia Sesu, moʼo totogi ʼatatou agahala. (1 Soa. 4:9, 10) ʼE feala anai ʼaki te totogi ʼaia, ke fakatuʼuake e Sehova natou ʼae kua mamate ʼuhi ko te agahala ʼa Atama. ʼE ina fakatuʼuake anai “te kau faitotonu pea mo te kau heʼe faitotonu.” (Gaue 24:15) ʼE fakaha mai e te Tohi-Tapu ʼe tou maʼuhiga kia Sehova, tatau aipe pe ʼe tou mahahaki, peʼe tou masisiva, peʼe kua tou vaivai matuʼa.—Gaue 10:34, 35.
7. Kotea te tahi age ʼu fakamoʼoni ʼe feala ke tou tui ai ʼe tou maʼuhiga kia Sehova?
7 ʼE ʼi ai he tahi age ʼu fakamoʼoni ke tou tui ai ʼe tou maʼuhiga kia Sehova. Ohage la, neʼe ina taki mai tatou kia te ia pea neʼe ina tokagaʼi tatatou faʼahiga tali te logo lelei. (Soa. 6:44) ʼI tatatou kamata fakaovi kia te ia, neʼe fakaovi mai kia tatou. (Sakp. 4:8) Pea tahi, ʼe faʼa kataki ʼo akoʼi tatou, ʼo ha ai ʼe tou maʼuhiga kia te ia. ʼE ina iloʼi totatou ʼuhiga ʼi te temi nei, kae ʼe ina toe iloʼi ʼe toe feala pe ke tou fetogi ʼo lelei age. Pea ʼe ina fakatonutonuʼi tatou he ʼe ʼofa ia tatou. (Taag. 3:11, 12) Ko te ʼu fakamoʼoni la ʼaia ʼe ha ai ʼe ina fakamaʼuhigaʼi tatou!
8. ʼE malave feafeaʼi kia tatou te ʼu palalau ʼae ʼe tou maʼu ia Pesalemo 18:28-30 moka tou tau mo he ʼu fihifihia?
8 Neʼe meʼa noaʼi e ʼihi ia te Hau ko Tavite. Kae neʼe ina iloʼi ʼe ʼofa Sehova pea mo lagolago kia ia. Pea neʼe tokoni ia te faʼahi ʼaia kia ia ke ina lava katakiʼi te aluʼaga ʼaia ʼaki he ʼu manatu ʼe lelei. (2 Sam. 16:5-7) Ka tou lotomamahi peʼe tou tau mo he ʼu fihifihia, ʼe feala ke tokoni mai ia Sehova ke tou maʼu he manatu ʼe lelei moka tou tau mo he fihifihia. (Lau ia Pesalemo 18:28-30.) Ka lagolago mai ia Sehova kia tatou, ʼe feala ke tou maʼu te fiafia ʼi tatatou tauhi kia te ia. (Loma 8:31) Tou vakaʼi ʼi te lakaga nei aluʼaga ʼe tolu ʼe ʼaoga ai ke tou manatuʼi ʼe ʼofa ia Sehova kia tatou, pea ʼe ina fakamaʼuhigaʼi tatou.
MOKA TOU MAHAHAKI
9. Kotea te ʼu manatu ʼe feala ke tou maʼu moka tou mahahaki?
9 Ka tou mahahaki, ʼe feala ke tou maʼu he ʼu manatu ʼe mole lelei, ohage la ʼe mole kei ʼi ai hotatou ʼuhiga. ʼE feala ke tou ufiufi moka tokagaʼi e ʼihi ʼe mole kei tou lava fai he ʼu gaue peʼe moka tou kole tokoni tuʼumaʼu ki ʼihi. Pea tatau aipe pe ʼe mole iloʼi e ʼihi ʼe tou mahaki,
kae ʼe feala pe ke tou maʼu te manatu ʼae ʼe mole kei hotatou ʼuhiga he ʼe mole kei tou lava gaue ohage ko te temi muʼa. ʼI te ʼu aluʼaga ʼaia, ʼe fakalotomalohi tatou e Sehova. ʼO feafeaʼi?10. ʼO mulimuli kia Taaga Lea 12:25, kotea ʼae ʼe feala ke tokoni mai moka tou mahahaki?
10 Ka tou mahahaki, ʼe feala ke fakalotomalohi tatou e “he palalau ofa.” (Lau ia Taaga Lea 12:25.) Neʼe tohi e Sehova ʼi te Tohi-Tapu ‘he ʼu palalau ʼofa,’ ke tou manatuʼi ai ʼe tou maʼuhiga kia te ia logo la totatou mahaki. (Pes. 31:20; 41:4) Kapau ʼe tou lau liuliuga te ʼu folafola ʼaia mai te ʼAtua, ʼe tokoni mai anai ke tou tauʼi ʼatatou manatu ʼae ʼe mole lelei, ʼuhi ko totatou mahaki.
11. Neʼe maʼu feafeaʼi e he tehina te tokoni ʼa Sehova?
11 Tou vakaʼi te faʼifaʼitaki ʼo Jorge. Neʼe tau ʼi tona temi tupulaga mo he mahaki neʼe fakaalualu ʼo kovi ʼosi, pea neʼe manatu ai neʼe mole kei maʼuhiga. ʼE ina fakamatala fenei: “Neʼe sioʼi au e te hahaʼi ʼuhi ko toku mahaki. Neʼe lahi ai toku ufiufi, pea neʼe au toe maʼu mo he ʼu manatu ʼe mole lelei. ʼI te ʼasili kovi ʼo toku mahaki, neʼe au fakakaukauʼi pe ʼe feafeaʼi anai te fetogi ʼo toku maʼuli. Neʼe au lotomamahi ʼosi. Neʼe au kole mamahi kia Sehova ke tokoni mai.” Neʼe tokoni feafeaʼi ia Sehova kia Jorge? ʼE ina hoko atu fenei: “Neʼe kua faigataʼa taku lautohi, koia neʼe fakalotomalohiʼi au ke au lau pe he ʼu vaega ʼo Pesalemo, ʼae ʼe fakaha ai ʼe tokagaʼi e Sehova ʼana kaugana. Neʼe au lau te ʼu vaega ʼaia ʼi te ʼaho fuli. Neʼe au maʼu ai he fakalotofimalie. Pea ʼaki te temi, neʼe tokagaʼi e te hahaʼi kua au toe malimali. Neʼe natou toe ui neʼe fakalotomalohi kia natou ʼi tanatou sisio ki toku fiafia. Neʼe au mahino ai neʼe tali e Sehova ʼaku faikole! Neʼe tokoni mai e Sehova ke fetogi ʼaku manatu. Kua feala leva ke au fakakaukauʼi he ʼu manatu
Fakatohi-tapu ʼe ha ai pe ʼe feafeaʼi te faʼahiga sio ʼa Sehova kia au logo la toku mahaki.”12. ʼE feafeaʼi hau maʼu te tokoni ʼa Sehova moka ke tau mo he mahaki?
12 Kapau ʼe ke tau mo he mahaki, ke ke tui papau ʼe mahino ia Sehova ki tou aluʼaga. Ke ke kole mamahi kia Sehova ke tokoni atu ke ke maʼu he ʼu manatu ʼe lelei ʼo ʼuhiga mo tou mahaki. Pea ke ke kumi ʼi te Tohi-Tapu te ʼu ‘palalau ʼofa’ ʼae neʼe tohi e Sehova maʼa koe. Fakakaukauʼi te ʼu vaega Fakatohi-tapu ʼae ʼe fakamaʼuhigaʼi ai e Sehova ʼana kaugana. Kapau ʼe ke fai feia, ʼe ke mahino anai ʼe agalelei ia Sehova kia natou ʼae ʼe tauhi agatonu kia te ia.—Pes. 84:12.
MOKA TOU TAU MO HE ʼU FIHIFIHIA FAKAPAʼAGA
13. Kotea ʼae ʼe feala ke logoʼi e he pule famili neʼe fakamavae ʼi tana gaue?
13 ’E fakaʼamu e te ʼu pule famili fuli ke natou foaki ki ʼonatou famili te ʼu meʼa ʼae ʼe ʼaoga ki te maʼuli. Fakakaukauʼi age muʼa he tehina neʼe fakamavae ʼi tana gaue kae neʼe mole ina fai he aga ʼe kovi. ʼE faiga malohi ke maʼu hana tahi gaue, kae mole hona fua. Pea ʼe ina logoʼi leva ʼe mole hona ʼuhiga. ʼE tokoni feafeaʼi anai kia ia tana fakakaukauʼi te ʼu fakapapau ʼa Sehova?
14. He koʼe ʼe fakahoko e Sehova ʼana fakapapau?
14 ʼE fakahoko tuʼumaʼu e Sehova ʼana fakapapau koteʼuhi ʼe lahi ʼona tupuʼaga. (Sos. 21:45; 23:14) ʼUluaki, ʼe ina fakahoko ʼuhi ko tona huafa peʼe ko tona matagafua. Neʼe fakapapauʼi e Sehova ʼe tokaga anai ki ʼana kaugana agatonu, pea kia te ia, ʼe ko he maʼua ke ina fakahoko tana fakapapau ʼaia. (Pes. 31:2-4) Pea tahi, ʼe ina iloʼi ʼe tou lotomamahi anai mo kapau ʼe mole tokaga kia tatou, he ʼe tou kau ki tona famili. ʼE ina toe fakapapauʼi mai ʼe ina foaki mai te ʼu meʼa ʼae ʼe ʼaoga ki totatou maʼuli fakasino pea mo fakalaumalie. Pea ʼe ina fakahoko moʼoni anai tana fakapapau ʼaia.—Mat. 6:30-33; 24:45.
15. (1) Kotea te fihifihia ʼae neʼe tau mo te kau Kilisitiano ʼo te ʼuluaki sekulo? (2) ʼO mulimuli kia Pesalemo 37:18, 19, kotea ʼae ʼe tou lava tui papau ki ai?
15 ʼE feala ke tou tauʼi ʼotatou fihifihia fakapaʼaga mo kapau ʼe tou manatuʼi ʼe fakahoko e Sehova ʼana fakapapau. Pea ʼe tou falala ʼe tokoni mai anai. Manatuʼi te faʼifaʼitaki ʼo te kau Kilisitiano ʼo te ʼuluaki sekulo. ʼI te temi ʼae neʼe fakatagaʼi ai te kokelekasio, ‘neʼe mavetevete fuli te ʼu tisipulo, gata pe ki te kau apositolo.’ (Gaue 8:1) Fakakaukauʼi age muʼa te ʼu fihifihia fakapaʼaga ʼae neʼe hoko ki te kau Kilisitiano ʼaia! Ko ʼihi neʼe lagi mole kei honatou ʼapi mo hanatou gaue. Kae neʼe mole liʼakina natou e Sehova. Pea neʼe mole puli tonatou fiafia. (Gaue 8:4; Hep. 13:5, 6; Sakp. 1:2, 3) Neʼe lagolago ia Sehova ki te kau Kilisitiano agatonu ʼaia, pea ʼe toe lagolago anai kia tatou.—Lau ia Pesalemo 37:18, 19.
MOKA TOU VAIVAI MATUʼA
16. He koʼe ʼe feala ke tou manatu ʼe mole maʼuhiga kia Sehova tatatou tauhi?
16 Ka tou liliu ʼo vaivai matuʼa, ʼe feala pe ke tou maʼu te manatu ʼae ʼe veliveli te meʼa ʼae ʼe tou foaki kia Sehova. Neʼe lagi hoko te aluʼaga ʼaia ki te Hau ko Tavite. (Pes. 71:9) Kapau ʼe tou toe manatu feia mo tatou, ʼe tokoni feafeaʼi mai anai ia Sehova?
17. Kotea ʼae ʼe tou taʼofi mai te hisitolia ʼo te tuagaʼane ko Jheri?
17 Tou vakaʼi te faʼifaʼitaki ʼa te tuagaʼane ko Jheri. Neʼe fakaafe ia ia ki he fono ʼo ʼuhiga mo te taupau ʼo te Fale Fono, kae neʼe mole fia kau ki ai. Neʼe ina ui fenei: “Kua au vaivai matuʼa, mo vitua, pea ʼe mole feala ke fakaʼaogaʼi au e Sehova he ʼe mole hoku faiva. ʼE mole hoku ʼaoga.”
ʼI muʼa ʼo te hoko ʼo te fono ʼaia, neʼe ina fakaha kia Sehova ʼana manatu. ʼI te ʼaho ake, ʼi tana tau atu ki te Fale Fono, neʼe kei feʼekeʼaki pe e Jheri pe neʼe tonu ke kau ki ai peʼe kailoa. Lolotoga te fono, neʼe ui e he tehina ʼi te ʼu tehina ʼae neʼe natou taki te fono, ko te faʼahi ʼae ʼe maʼuhiga, ʼe ko tatatou tali ʼae ke akoʼi tatou e Sehova. ʼE manatuʼi e Jheri: “Neʼe au ui fenei: ‘ ʼE au lavaʼi te faʼahi ʼaia!’ Neʼe au tagi koteʼuhi neʼe au mahino neʼe tali e Sehova taku kole. Neʼe ina fakaha lelei mai ʼe au maʼu he meʼa ʼe maʼuhiga ke au momoli pea ʼe ina fia akoʼi au!” ʼE ina hoko atu fenei: “Neʼe au tau atu ki te fono mo taku hoha pea mo lotovaivai. Kae ʼi te hili ʼo te fono, neʼe kua au maʼu te lotofalala, mo te lotomalohi pea mo te manatu ʼae ʼe au maʼuhiga kia Sehova!”18. ʼE fakaha feafeaʼi e te Tohi-Tapu ʼe kei maʼuhiga pe kia Sehova tatatou tauhi, logo la kua tou vaivai matuʼa?
18 Tou tui papau ʼe foaki mai e Sehova he gaue maʼa tatou, logo la kua tou vaivai matuʼa. (Pes. 92:13-16) Neʼe akoʼi mai e Sesu ʼe maʼuhiga kia Sehova te meʼa ʼae ʼe tou lavaʼi, tatau aipe pe ʼe tou logoʼi ʼe mole faʼa maʼuhiga. (Luka 21:2-4) Koia, fakakaukauʼi te meʼa ʼae ʼe feala ke ke fai. Ohage la, ʼe feala ke ke palalau ki te hahaʼi ʼo ʼuhiga mo Sehova, mo hufakiʼi te ʼu tehina mo tuagaʼane, pea mo fakalotomalohiʼi ʼihi ke nonofo agatonu. ʼE fakaʼaogaʼi koe e Sehova ohage ko hona “kaugā gaue,” mole ʼuhi ko te ʼu meʼa ʼae ʼe ke fakahoko, kae ʼuhi ko tou loto ʼae ke hoko atu tau fakalogo kia te ia.—1 Ko. 3:5-9.
19. ʼO mulimuli kia Loma 8:38, 39, kotea ʼae ʼe feala ke tou tui papau ki ai?
19 ʼE tou fiafia lahi ʼi te atolasio kia Sehova, ko he ʼAtua ʼe ina fakamaʼuhigaʼi moʼoni natou ʼae ʼe tauhi kia te ia! Neʼe ina fakatupu tatou ke tou fakahoko tona finegalo. Pea ko te tauhi moʼoni ʼe ina fakafiafiaʼi totatou maʼuli. (Fkha. 4:11) ʼE mole lagi tou maʼuhiga ki te malama, kae ʼe mole ko te sio ʼaia ʼa Sehova kia tatou. (Hep. 11:16, 38) Kapau ʼe tou lotovaivai ʼuhi ko te mahaki, peʼe ko te ʼu fihifihia fakapaʼaga peʼe ko te vaivai matuʼa, tou manatuʼi ʼe mole he meʼa ʼe feala ke ina fakamavae tatou mai te ʼofa ʼo tatatou Tamai ʼae ʼi selo kia tatou.—Lau ia Loma 8:38, 39.
^ pal. 5 Neʼe kua ke tau koa mo he aluʼaga neʼe ke manatu ai ʼe mole ke maʼuhiga? ʼE fakamanatuʼi atu anai e te alatike ʼaeni ʼe ke maʼuhiga kia Sehova. ʼE ina fakaha atu anai pe ʼe feafeaʼi hau taupau he manatu ʼe lelei logo la te ʼu aluʼaga ʼae ʼe hoko ʼi tou maʼuli.
KATIKO 30 Taku Tamai, Toku ʼAtua Pea Mo Kaumeʼa