1. Kotea ʼe ke logoʼi ʼi tau iloʼi ʼae ʼe ʼofa Sehova ia tatou?

NEʼE tohi fenei e te apositolo ko Soane: “Ko te ʼAtua ʼe ko te ʼofa.” (1 Soa. 4:8) Koia ʼaki te ʼu palalau ʼaia, ʼe tou manatuʼi ai te manatu maʼuhiga ʼaeni: Ko te ʼAtua ʼe ko te Matapuna ʼo te maʼuli pea mo te ʼofa. ʼE ʼofa Sehova ia tatou! Koia ʼe tou logoʼi ai he fimalie pea mo fiafia.

2. Ka tou lau ia Mateo 22:37-40, kotea ia te ʼu fakatotonu ʼe lua, ʼae ʼe lahi age? He koʼe ʼe faigataʼa ʼi ʼihi temi te fakalogo ki te lua fakatotonu?

² ʼE tonu ki te kau Kilisitiano ke natou fakaha te ʼofa he neʼe fakatotonu mai e Sesu ke tou fai. (Lau ia Mateo 22:37-40.) ʼE tou iloʼi lelei ia Sehova, koia ʼe faigafua ai hatatou fakalogo ki te ʼuluaki fakatotonu. ʼE haohaoa ia Sehova pea ʼe tokaga mo agalelei kia tatou. Kae ʼe lagi feala pe ke faigataʼa hatatou fakalogo ki te lua fakatotonu. Kotea tona tupuʼaga? Koteʼuhi ʼe heʼe haohaoa ʼotatou tehina mo tuagaʼane, ʼae ko ʼihi ʼe kau ki ʼotatou famili totonu. ʼI ʼihi temi, ʼe mole natou agalelei ai mo manavaʼofa. ʼE iloʼi e Sehova ʼe tou tau anai mo te taʼi ʼu fihifihia ʼaia. Koia neʼe ina uga ai he ʼu tagata ke natou tohi te Tohi-Tapu moʼo fakamahino pe koʼe ʼe tonu ke tou feʼofaʼofani pea ʼe feafeaʼi hona fakaha. Neʼe kau ia natou ʼaia ia Soane.—1 Soa. 3:11, 12.

3. Kotea ʼae neʼe fakaha e Soane ʼi ʼana tohi?

³ ʼI te ʼu tohi ʼa Soane, ʼe ina fakaha ai ʼe tonu ke fakaha e te kau Kilisitiano te ʼofa. Ohage la, ʼe lahi age tana fakaʼaogaʼi te kupu “ ʼofa” ʼi tana Evaselio ʼi te tahi age ʼu tagata tohi Evaselio ʼe toko tolu. Neʼe kua vave taʼu teau ʼi tana tohi tana Evaselio pea mo ʼana tohi ʼe tolu. Pea neʼe ina fakaha ai ʼe tonu ke tou fai ia meʼa fuli ʼaki pe te ʼofa. (1 Soa. 4:10, 11) Kae neʼe ʼaoga he temi ke mahino lelei ai ki te faʼahi ʼaia.

4. Neʼe ʼofa tuʼumaʼu koa ia Soane ki ʼihi?

 ⁴ ʼI te kei tupulaga ʼa Soane, neʼe mole ina fakaha tuʼumaʼu te ʼofa. ʼI te tahi ʼaho, neʼe olo ia Sesu mo ʼana tisipulo ki Selusalemi ʼo natou fakalaka ʼi Samalia. Pea ko te hahaʼi ʼo te kiʼi kolo ʼo Samalia neʼe mole natou fia tali kaiga kia natou. Kotea ʼae neʼe fai e Soane? Neʼe nā kole mo tona tehina ko Sakopo kia Sesu ke nā fakahifo mai he afi mai te lagi ʼo fakaʼauha natou. (Luka 9:52-56) Ki muli age, neʼe mole ʼofa Soane ki te tahi ʼu apositolo. Neʼe nā uga mo tona tehina tanā faʼe ke ina kole kia Sesu ke ina foaki age honā ʼu tuʼulaga maʼuhiga ʼi te Puleʼaga. ʼI te logo ʼa te tahi kau apositolo ki te meʼa ʼaia neʼe nā fai, neʼe natou iita ai. (Mat. 20:20, 21, 24) Logo la te ʼu vaivaiʼaga ʼo Soane kae neʼe ʼofa pe Sesu ia ia.—Soa. 21:7.

5. Kotea ka tou vakaʼi ʼi te alatike ʼaeni?

⁵ ʼI te alatike ʼaeni, ʼe tou vakaʼi anai te faʼifaʼitaki ʼa Soane mo ʼihi manatu neʼe ina tohi ʼo ʼuhiga mo te ʼofa. ʼE tou toe ako ai anai te faʼahiga fakaha ʼo te kalitate ʼaia ki ʼotatou tehina mo tuagaʼane. Pea ʼe tou toe vakaʼi anai he aluʼaga maʼuhiga ʼe tonu ai ki he pule famili ke ina fakaha tona ʼofa ki tona famili.

6. ʼE fakaha feafeaʼi mai e Sehova tona ʼofa?

⁶ ʼE manatu te tokolahi ʼe fakaha te ʼofa ʼaki ni palalau ʼe lelei. Kae ʼe tonu ke tou toe fakaha te ʼofa moʼoni ʼaki ni gaue. (Vaka’i mo Sakopo 2:17, 26.) Tou vakaʼi te faʼifaʼitaki ʼa Sehova. ʼE ʼofa ia tatou. (1 Soa. 4:19) Pea ʼe ina fakaʼaogaʼi he ʼu palalau ʼe malave loto ʼi te Tohi-Tapu moʼo fakaha mai tona ʼofa. (Pes. 25:10; Loma 8:38, 39) ʼE fakaha mai e Sehova tona ʼofa ʼaki ʼana palalau mo ʼana gaue. Koia ʼae ʼe tou tui papau ai ʼe ʼofa ia tatou. Neʼe tohi fenei e Soane: “Neʼe fakaha mai e te ʼAtua tona ʼofa kia tatou ʼi te aluʼaga ʼaeni: Neʼe ina fekauʼi mai tona ʼAlo ʼulu tokotahi ki te malamanei ke feala ai hatatou maʼu te maʼuli ʼaki ia ia.” (1 Soa. 4:9) Neʼe tuku e Sehova ke mamahi mo mate tona ʼAlo ʼofaina maʼa tatou. (Soa. 3:16) Koia, ʼe tou tui papau ai ʼe ʼofa Sehova ia tatou.

7. Neʼe fakaha feafeaʼi e Sesu tona ʼofa ia tatou?

⁷ Neʼe fakaha lelei e Sesu ki ʼana tisipulo ʼe ʼofa mamahi ia natou. (Soa. 13:1; 15:15) Neʼe ina fakaha tona ʼofa mamahi kia natou ʼo feia pe mo tatou. Neʼe mole ina fakaha pe ʼaki ʼana palalau kae neʼe toe ha foki ʼi ʼana gaue. Neʼe ina ui fenei: “ ʼE mole he tahi ʼe lahi age tona ʼofa ʼi te ʼofa ʼa he tahi ʼe ina foaki tona maʼuli ʼo ʼuhiga mo  ʼona kaumeʼa.” (Soa. 15:13) Ka tou fakakaukauʼi te ʼu gaue neʼe fai peʼe lolotoga fai e Sehova mo Sesu maʼa tatou, kotea ʼe ina uga tatou ke tou fai?

8. Ka tou lau ia 1 Soane 3:18, kotea ʼae ʼe tonu ke tou fai?

⁸ ʼE tou fakaha ʼe tou ʼoʼofa ia Sehova mo Sesu ʼaki hatatou fakalogo kia naua. (Soa. 14:15; 1 Soa. 5:3) Pea neʼe fakatotonu mai e Sesu ke tou feʼofaʼofani. (Soa. 13:34, 35) Kapau ʼe tou ʼoʼofa ʼi totatou tehina mo tuagaʼane, ʼe mole tonu pe ke tou ui age ʼe tou ʼoʼofa ia natou kae ʼe tonu ke tou toe fakaha ʼaki ni gaue. (Lau ia 1 Soane 3:18.) ʼO feafeaʼi?

9. Kotea neʼe ina uga Soane ke ina fai ʼuhi ko tona ʼofa?

⁹ Neʼe feala pe ke hoko atu e Soane tana gaue tautai mo tana tamai, ʼae ko he gaue fakafamili pea mo maʼu ai hana falā. Kae neʼe ina fakaʼaogaʼi leva tona maʼuli moʼo tokoni ki ʼihi ke natou iloʼi te moʼoni ʼo ʼuhiga mo Sehova mo Sesu. Neʼe mole faigafua te maʼuli ʼae neʼe ina filifili. Neʼe fakatagaʼi ia ia pea neʼe pilisoniʼi ʼi te vaʼe fakaʼosi ʼo te ʼuluaki sekulo kae neʼe kua matuʼa. (Gaue 3:1; 4:1-3; 5:18; Fkha. 1:9) Logo la tona pilisoniʼi kae neʼe ina haga manatuʼi pe ʼihi. Ohage la, neʼe ʼave ia ia ʼo fakaʼaunofo ʼi Patemosi. Pea neʼe ina tohi ai te tohi ʼo Fakaha pea mo momoli ki te ʼu kokelekasio ke iloʼi e ʼona tehina te ʼu aluʼaga ka hoko ʼi te ka haʼu. (Fkha. 1:1) Pea hili tana ʼaunofo, neʼe ina tohi tana Evaselio ʼo ʼuhiga mo te maʼuli pea mo te faifakamafola ʼa Sesu. Neʼe ina toe tohi ia tohi ʼe tolu moʼo fakalotomalohiʼi ʼona tehina mo tuagaʼane. ʼE feafeaʼi hau faʼifaʼitakiʼi te maʼuli fakasakilifisio ʼo Soane?

10. ʼE feafeaʼi hau fakaha ʼe ke ʼofa ki tou tatau?

¹⁰ ʼE feala ke ke fakaha tou ʼofa ki tou tatau ʼi tau faʼahiga fakaʼaogaʼi tou maʼuli. ʼE loto e te malama ʼa Satana ke ke manatu pe kia koe totonu. Ohage la, ke ke fakaʼaogaʼi tou temi mo tou malohi katoa ke maʼu hau falā peʼe ke ke iloa. Kae ʼe maʼuli fakasakilifisio te kau faifakamafola ʼae ʼi te malamanei katoa. Koia ʼae ʼe lahi age ai tonatou temi faifakamafola pea mo tanatou palalau ki te hahaʼi ʼo ʼuhiga mo Sehova. Pea ko ʼihi ʼe natou faifakamafola mo faiako temi katoa.

11. ʼE fakaha feafeaʼi e ʼihi kau faifakamafola tonatou ʼofa kia Sehova mo ʼonatou tehina mo tuagaʼane?

¹¹ Tokolahi te kau Kilisitiano ʼe tonu ke natou gaue ʼi te ʼaho fuli moʼo taupau te maʼuli ʼo tonatou kiʼi famili. Logo pe la te faʼahi ʼaia, kae ʼe natou lagolago ki te kautahi ʼa te ʼAtua ʼo mulimuli pe ki ʼonatou fealagia. Ohage la, ʼe natou tokoni ki te ʼu gaue haofaki maʼuli, peʼe ki te ʼu laga fale. Pea ʼe natou foaki ni meʼa ʼofa moʼo lagolago ki te gaue fakamalamanei. ʼE natou fai te ʼu meʼa fuli ʼaia ʼuhi ko tonatou ʼofa ki te ʼAtua mo tonatou tatau. Pea ʼe tou fakaha fuli totatou ʼofa ki ʼotatou tehina mo tuagaʼane ʼaki tatatou kau tuʼumaʼu ki te ʼu fono pea mo lagolago ki ai. Tatau aipe pe ʼe tou gaʼegagaʼe, kae ʼe tou kau pe ki te ʼu fono. Logo la ʼe tou hoha moka tou faitali, kae ʼe tou fai pe. Pea tatau aipe pe ʼe tou tau fuli mo ni faigataʼaʼia, kae ʼe tou fakalotomalohiʼi ʼihi ʼi muʼa mo te hili ʼo te fono. (Hep. 10:24, 25) Koia, ʼe tou lotofakafetaʼi lahi ki te ʼu faiga ʼe fai e ʼotatou tehina mo tuagaʼane fuli.

12. Neʼe toe fakaha feafeaʼi e Soane tona ʼofa ki ʼona tehina mo tuagaʼane?

¹² Neʼe fakaha e Soane tona ʼofa ki ʼona tehina mo tuagaʼane ʼaki hana fakamalo  kia natou. Kae neʼe ina toe foaki age he ʼu tokoni. Ohage la, ʼi tana ʼu tohi, neʼe fakamalo ai kia natou ʼo ʼuhiga mo tanatou tui mo ʼanatou gaue lelei. Kae neʼe ina toe foaki fakahagatonu age he ʼu tokoni ʼo ʼuhiga mo te agahala. (1 Soa. 1:8–2:1, 13, 14) ʼO toe feia pe, ʼe tonu ke tou fakamalo ki ʼotatou tehina mo tuagaʼane ki ʼanatou gaue lelei. Kae kapau ʼe kamata maʼu e he tahi he manatu ʼe mole lelei peʼe ina fai he agamahani ʼe kovi, tou fakaha age ki ai ʼaki he aga fakaʼeteʼete te meʼa ʼae ʼe tonu ke logo ki ai. Kapau ʼe tou fai feia, ʼe tou fakaha ai totatou ʼofa ki ai. ʼE moʼoni, ʼe tonu ke tou lototoʼa ʼi te tokoniʼi ʼo hotatou kaumeʼa. Pea ʼe ui mai ʼi te Tohi-Tapu ko he ʼu kaumeʼa moʼoni ʼe natou fetokoniʼaki.—Taag. 27:17.

13. Kotea te meʼa ʼae ʼe mole tonu ke tou fai?

¹³ ʼI ʼihi temi, ko te fakaha ʼo te ʼofa ʼe mole ko te fai ʼo ʼihi meʼa. Ohage la, ʼe mole tou iita vave anai ʼi he ʼu palalau ʼe fai mai e he ʼu tehina mo tuagaʼane. Tou vakaʼi he aluʼaga neʼe hoko ʼi te faifakamafola ʼa Sesu. Neʼe ina ui age ki ʼana tisipulo ke natou kai tona sino mo inu tona taʼataʼa ke natou maʼu ai te maʼuli. ʼI tana fai te ʼu palalau ʼaia, neʼe punamaʼuli te tokolahi ʼo natou liʼaki ai ia ia. (Soa. 6:53-57) Kae neʼe nonofo pe ʼona kaumeʼa moʼoni mo ia, ʼo kau ai ia Soane. ʼE mahino ia, neʼe natou toe punamaʼuli mo natou, pea neʼe mole natou mahino ki te meʼa ʼae neʼe ina fia ui. Kae neʼe mole natou manatu neʼe faihala pea neʼe mole natou iita vave ʼi ʼana palalau. Neʼe natou falala kia ia pea mo iloʼi neʼe ina tala tuʼumaʼu pe te moʼoni. (Soa. 6:60, 66-69) Koia, ʼe maʼuhiga ʼaupito ke mole tou iita vave ki te ʼu meʼa ʼae ʼe ui e ʼotatou tehina mo tuagaʼane. Kae, tou tuku ke natou fakamahino mai te meʼa ʼae ʼe natou fia ui.—Taag. 18:13; Ekl. 7:9.

14. He koʼe ʼe mole tonu ke tou fehihiʼa ki ʼotatou tehina mo tuagaʼane?

¹⁴ Neʼe toe fakatokaga tatou e Soane ke ʼaua naʼa tou fehihiʼa ki ʼotatou tehina mo tuagaʼane. Kapau ʼe mole tou tokagaʼi te fakatokaga ʼaia, ʼe tou tuku anai he faigamalie ke fakahalaʼi tatou e Satana. (1 Soa. 2:11; 3:15) Neʼe hoko te aluʼaga ʼaia ki ʼihi tehina neʼe maʼuʼuli ʼi te fakaʼosi ʼo te ʼuluaki sekulo. Neʼe fai e Satana ia meʼa fuli ke fefehiʼaʼaki te ʼu kaugana ʼa te ʼAtua pea ke mole natou logo tahi. ʼI te temi ʼae neʼe tohi ai e Soane ʼana tohi, neʼe ʼi ai he ʼu tagata neʼe natou maʼu te faʼahiga manatu  ʼa Satana ʼi te kokelekasio. Ohage la, neʼe fakatupu e Tiotefeso ni maveuveu ʼi te kokelekasio. (3 Soa. 9, 10) Neʼe mole fakaʼapaʼapa ki te ʼu taupau feoloʼaki ʼae neʼe fekauʼi e te Kolesi Pule. Pea neʼe toe faiga ke ina fakamavae ʼi te kokelekasio ia natou ʼae neʼe tali kaiga kia natou ʼae neʼe mole ʼofa ai. ʼI fiatuʼu leva! Ia ʼaho nei, ʼe kei faigaʼi pe e Satana ʼi te ʼu faʼahi fuli ke mole logo tahi te ʼu kaugana ʼa te ʼAtua pea ke mole natou fetokoniʼaki. Koia, ʼaua naʼa tou tuku te fehiʼa ke ina fakamavetevete tatou.

15. Kotea ʼae ʼe tonu ke manatuʼi e te pule famili?

¹⁵ ʼE ʼofa te pule famili ki tona kiʼi famili. Pea ʼe ina fakaha te faʼahi ʼaia ʼaki tana foaki te ʼu meʼa ʼae ʼe ʼaoga kia natou ʼi te faʼahi fakasino. (1 Tim. 5:8) Kae ʼe tonu ke ina manatuʼi ʼe maʼuhiga ʼaupito kia ia ke tokoni ki tona kiʼi famili ke natou maʼu ni felogoi lelei mo Sehova. (Mat. 5:3) Ke ke manatuʼi te faʼifaʼitaki ʼae neʼe tuku mai e Sesu ki te ʼu pule famili. ʼE ui mai ʼi te tohi ʼo Soane, neʼe manatuʼi tuʼumaʼu pe e Sesu tona famili ʼi tana tugaki mate ʼi te pou. Neʼe tutuʼu pe ia Malia mo Soane ʼi ʼona tafa, ʼi te koga meʼa ʼae neʼe matehi ai. Logo la neʼe mamahi ʼaupito ia Sesu, kae neʼe ina kole kia Soane ke tokaga ki siʼana faʼe. (Soa. 19:26, 27) ʼE mahino ia, neʼe ʼi ai te ʼu tehina mo tokolua ʼo Sesu neʼe tokakaga ki te ʼu meʼa ʼae neʼe ʼaoga kia Malia ʼi te faʼahi fakasino. Kae neʼe heʼeki ʼi ai he tahi ia natou neʼe kua liliu ko hana tisipulo. Koia, neʼe tokaga pe ia Sesu ke maʼu e Malia te ʼu meʼa ʼae ʼe ʼaoga ki ai ʼi te faʼahi fakasino mo te faʼahi fakalaumalie.

16. Kotea te ʼu maʼua ʼae neʼe maʼu e Soane?

¹⁶ Neʼe lahi ʼaupito te ʼu maua ʼae neʼe tonu ke fakahoko e Soane. Neʼe ko te apositolo, koia neʼe tonu ai ke ina tuku he faʼifaʼitaki lelei ʼo faʼafai ʼi te faifakamafola. Pea ʼe lagi neʼe kua ʼohoana. Koia, neʼe tonu ai ke tokaga ki te ʼu meʼa ʼae ʼe ʼaoga ki tona kiʼi famili pea mo tokoni ke natou maʼu ni felogoi lelei mo te ʼAtua. (1 Ko. 9:5) Kotea te ako maʼa te ʼu pule famili?

17. ʼE fakaha feafeaʼi e he pule famili ʼe ʼofa ʼi tona kiʼi famili?

¹⁷ ʼE feala ki he tehina, ʼae ko he pule famili ke lahi tona ʼu maʼua ʼe ina fakahoko. Ohage la, ʼe tonu ke gaue lelei ke fakakololiaʼi ai ia Sehova ʼuhi ko tana aga. (Efe. 6:5, 6; Tito 2:9, 10) Pea ʼe feala ke ʼi ai ʼona  maʼua ʼi te kokelekasio. Koia, ʼe tonu anai ke ina tuku he faʼifaʼitaki lelei ʼo faʼafai ʼi te faifakamafola pea mo toʼo he temi moʼo fakalotomalohiʼi ʼona tehina. Pea ʼe toe maʼuhiga foki ke ina ako tuʼumaʼu te Tohi-Tapu mo tona ʼohoana mo ʼana fanau. ʼE mahino ia, ʼe lotofakafetaʼi anai te kiʼi famili ki te ʼu faiga ʼae ʼe ina fai ke natou maʼu he maʼuli malolo lelei mo fiafia, pea mo tana tokoni kia natou ke natou haga tauhi kia Sehova.—Efe. 5:28, 29; 6:4.

18. Kotea ʼae neʼe tui papau ki ai ia Soane?

¹⁸ Neʼe maʼuli fualoa ia Soane pea neʼe lahi te ʼu aluʼaga fakafiafia neʼe hoko kia ia. Neʼe lahi te ʼu ʼahiʼahi neʼe tau mo ia ʼo feala pe ke vaivai ai tana tui. Kae neʼe ina fai tuʼumaʼu pe ia meʼa fuli ke fakalogo ki te ʼu fakatotonu ʼa Sesu, kae tafito ke ʼofa ki ʼona tehina mo tuagaʼane. Koia ʼae neʼe tui papau ai neʼe ʼofa ia Sehova mo Sesu ki ai pea neʼe nā foaki age te malohi ke ina tauʼi he faʼahiga faigataʼa pe. (Soa. 14:15-17; 15:9, 10; 1 Soa. 4:16) Neʼe mole ina tuku ke taʼofi e Satana mo tona malama tona ʼofa ki ʼona tehina mo tuagaʼane pea mo tana fakaha tona ʼofa ʼaki ʼana palalau mo ʼana gaue.

19. Kotea ʼae ʼe fakalotomalohiʼi ai tatou ia 1 Soane 4:7 ke tou fai? Pea kotea tona tupuʼaga?

¹⁹ Ohage pe ko Soane, ʼe tou maʼuʼuli ʼi he malama ʼe puleʼi e Satana pea ʼe mole ʼofa ʼi he tahi. (1 Soa. 3:1, 10) ʼE mole loto e Satana ke tou ʼoʼofa ki ʼotatou tehina mo tuagaʼane, kae ʼe mole lava anai ia. Kae ʼe feala pe ke hoko te faʼahi ʼaia mo kapau ʼe tou tuku ke hoko. Koia, tou fakatotonu ke tou ʼoʼofa ki ʼotatou tehina mo tuagaʼane, pea mo fakaha kia natou totatou ʼofa ʼaki ʼatatou palalau mo ʼatatou gaue. Pea ʼe tou fiafia anai ʼi te kau ki te famili ʼo Sehova mo tou maʼuli fiafia moʼoni anai.—Lau ia 1 Soane 4:7.