ʼE ʼI AI he fale tanakiʼaga mataga ʼi Selusalemi, ʼe higoa ko te Fale Tanakiʼaga Mataga ʼo Te ʼu Fenua ʼAe ʼe Talanoa Ki Ai Te Tohi-Tapu. Pea ʼe maʼu ai he foʼi maka ʼe togi ai he meʼa mai te taʼu 700 mo 600 ʼi muʼa ʼo totatou temi. Neʼe maʼu te foʼi maka ʼaia ovi ki Hepelone, ʼi Iselaele, ʼi he ʼana neʼe fakaʼaogaʼi ko he fale maka. Neʼe togi ai te ʼu kupu ʼaeni: “Ke fakamalaʼia e Yahweh Sabaot ia Hagaf, te foha ʼo Hagav.” ʼE ha feafeaʼi ʼi te meʼa ʼaia neʼe togi ʼe moʼoni te Tohi-Tapu? ʼE ha ai neʼe iloa pea mo fakaʼaogaʼi te huafa ʼo te ʼAtua, ko Sehova ʼi te temi muʼa. Neʼe tohi te huafa ʼaia ʼaki te ʼu mataʼi tohi Fakahepeleo ʼafeā ʼaeni YHWH. Neʼe maʼu te tahi ʼu meʼa neʼe togi ʼi he ʼu ʼana neʼe fakaʼaogaʼi ko he ʼu fale maka. Neʼe fenonoʼi ai he hahaʼi pea neʼe natou tau tohi ai te huafa ʼo te ʼAtua ʼi te kaupa mo ʼihi higoa ʼe maʼu ai te tahi ʼu faʼahiga tohi ʼo te huafa ʼo te ʼAtua.

Neʼe ui fenei e he fafine faiako ko Rachel Nabulsi ʼo ʼuhiga mo te ʼu meʼa ʼaia neʼe tohi: “Kapau ʼe ha tuʼumaʼu te huafa YHWH, ʼe ha mai ai ʼe maʼuhiga. . . . Ko te ʼu koga Tohi-Tapu mo te ʼu meʼa ʼae neʼe tohi, ʼe ha ai ʼe maʼuhiga te huafa ʼaia ki te hahaʼi ʼo Iselaele mo Suta.” ʼE moʼoni, ʼe ha tuʼa lahi te huafa ʼo te ʼAtua ʼi te Tohi-Tapu. Pea ʼi te temi muʼa, ʼe tau tuʼu te huafa ʼo te ʼAtua ʼi te ʼu higoa ʼo te hahaʼi.

Ko te ʼu kupuʼi palalau “Yahweh Sabaot” ʼae ʼe tuʼu ʼi te foʼi maka, ko tona fakaʼuhiga “Sehova ʼo te ʼatu kautau.” ʼE ha mai ai, neʼe lahi te fakaʼaogaʼi ʼo te huafa ʼo te ʼAtua mo te kupuʼi palalau “Sehova ʼo te ʼatu kautau” ʼi te temi muʼa. Pea ʼe tou maʼu te ʼu kupuʼi palalau ʼaia teitei tuʼa 250 ʼi te Koga Tohi-Tapu Fakahepeleo, kae tafito ʼi te tohi ʼo Esaia, mo Selemia pea mo Sakalia.