“Kapau ʼe Kotou Iloʼi Te ʼu Faʼahi ʼAia, ʼe Kotou Fiafia Mo Kapau ʼe Kotou Fai”
“Ko taku meʼa kai ʼe ko te fai ʼo te finegalo ʼo ia ʼae neʼe ina fekauʼi mai au pea mo fakaʼosi tana gaue.”—SOANE 4:34.
1. Kotea te agaaga ʼae ʼe maʼu e te hahaʼi ʼo te malama, pea ʼe feala ke malave feafeaʼi ki tatatou agavaivai?
HE KOʼE ʼe faigataʼa tatatou maʼuliʼi te ʼu faʼahi ʼae ʼe tou ako ʼi te Folafola ʼa te ʼAtua? Koteʼuhi ʼe ʼaoga ke tou maʼu te agavaivai ke feala hatatou fai ia te meʼa ʼae ʼe lelei. ʼE faigataʼa hatatou maʼuliʼi te agavaivai ʼi “te ʼu ʼaho fakamuli” ʼaeni, koteʼuhi ko te tokolahi ’i ʼotatou tafaʼaki ʼe “ ʼoʼofa pe . . . kia natou totonu, mo manako ki te paʼaga, mo fiameʼameʼa, mo fiatuʼu” pea ʼe “mole natou lotololomi.” (2 Timoteo 3:1-3) ʼE tou iloʼi ʼe kovi te taʼi ʼu aga ʼaia he ʼe tou tauhi ki te ʼAtua. Kae, ʼe hage kia tatou ʼe maʼuli fimalie pea mo fiafia ia natou ʼae ʼe agakovi. (Pesalemo 37:1; 73:3) Pea ʼe lelei ke tou fai te ʼu fehuʼi ʼaeni: ‘ ʼE ʼaoga koa ʼaku faiga ke au kumi muʼa te ʼu meʼa ʼae ʼe lelei ki ʼihi? Kapau ʼe au agavaivai, ʼe fakaʼapaʼapaʼi tuʼumaʼu anai koa au e te hahaʼi?’ (Luka 9:48) Tokolahi ʼi te malama ʼaeni ʼe natou manatu pe kia natou totonu. Kapau ʼe tou fakagafua ki te agaaga ʼaia ke ina fetogi tatou, ʼe fakatupu kovi anai ki totatou ʼuhiga Kilisitiano pea mo ʼatatou felogoi mo ʼotatou tehina mo tuagaʼane. Kae, ka tou vakaʼi mo tou muliʼi te faʼifaʼitaki ʼo te ʼu kaugana agavaivai ʼa te ʼAtua, ʼe fua lelei anai kia tatou.
2. Kotea ʼae ʼe feala ke tou ako mai te ʼu kaugana agatonu ʼa te ʼAtua ʼo te temi muʼa?
2 Kotea ʼae neʼe tokoni ki te ʼu kaugana agatonu ʼa te ʼAtua ʼi te temi muʼa ke natou liliu ko ʼona kaumeʼa? Kotea ʼae neʼe natou fai moʼo fakafiafiaʼi tona loto? Neʼe natou maʼu feafeaʼi te malohi moʼo fai te meʼa ʼae ʼe lelei? Ka tou lau mo metitasio ki te ʼu faʼifaʼitaki ʼo te ʼu kaugana ʼaia ʼi te Tohi-Tapu, ʼe toe malohi age anai tatatou tui.
KE MALOHI TUʼUMAʼU TATATOU TUI
3, 4. (1) ʼE akoʼi feafeaʼi tatou e Sehova? (2) He koʼe ʼe mole feʼauga tatatou maʼu te ʼatamai malama ke malohi tuʼumaʼu ai tatatou tui?
3 ʼE foaki mai e Sehova ia meʼa fuli ʼe ʼaoga ke malohi tuʼumaʼu ai tatatou tui. ʼE tou maʼu he ʼu tokoni lelei, pea mo ina akoʼi tatou ʼaki te Tohi-Tapu, ʼatatou tohi, tatatou tuʼasila ʼi te Neti, te JW Télédiffusion, ʼatatou fono mo ʼatatou fakatahi lalahi. Kae neʼe fakamahino e Sesu ʼe mole feʼauga tatatou maʼu te ʼatamai malama. Neʼe ina ui fenei: “Ko taku meʼa kai ʼe ko te fai ʼo te finegalo ʼo ia ʼae neʼe ina fekauʼi mai au pea mo fakaʼosi tana gaue.”—Soane 4:34.
4 Ko te fai ʼo te finegalo ʼo te ʼAtua neʼe hage kia Sesu ko hana meʼa kai. Ko te kai ki he meʼa kai ʼe kano lelei ʼe tou toe maʼu ai hotatou malohi. Pea ʼe toe feia pe mo kapau ʼe tou fai te finegalo ʼo te ʼAtua, ʼe tou toe malohi ai mo tou fafaga tatatou tui. Ohage la, neʼe lagi ke alu gaʼegaʼe ʼo faifakamafola kae ʼi tau toe liliu mai neʼe mole koa la ke malohi mo fiafia?
5. ʼE fua lelei feafeaʼi kia tatou moka ʼe tou maʼu te poto?
5 ʼE tou aga fakapotopoto moka tou fakalogo kia Sehova. (Pesalemo 107:43) Pea ʼe lahi te ʼu lelei ʼe maʼu e natou ʼae ʼe natou maʼu te poto. He ʼe ui fenei ʼi te Tohi-Tapu: “E mauhiga lahi age ia ia mea fuli e totogi kovi. . . . Ko he akau aia o te mauli kia natou ae e natou too ia, pea e manuia natou ae e natou kukumi mau ia.” (Taaga Lea 3:13-18) Neʼe ui fenei e Sesu: “Kapau ʼe kotou iloʼi te ʼu faʼahi ʼaia, ʼe kotou fiafia mo kapau ʼe kotou fai.” (Soane 13:17) ʼE fiafia anai te ʼu tisipulo ʼa Sesu mo kapau ʼe natou haga fai te ʼu faʼahi ʼae neʼe ina akoʼi age kia natou. Pea neʼe tonu ke natou mulimuli ki ʼana akonaki mo tana faʼifaʼitaki ʼi tonatou maʼuli katoa.
6. He koʼe ʼe tonu ke tou haga maʼuliʼi te ʼu faʼahi ʼae ʼe tou ako?
6 Ia ʼaho nei, ʼe tonu ke tou haga maʼuliʼi te ʼu faʼahi ʼae ʼe tou ako. Tou toʼo he faʼifaʼitaki: Tou fakakaukauʼi he tagata faimekanisia ʼe ina iloʼi lelei tana gaue, ʼe ʼi ai ʼana meʼa gaue, mo te ʼu piesi fetogi. ʼE hoki ʼaoga pe anai te ʼu meʼa fuli ʼaia kia ia mo kapau ʼe ina fakaʼaogaʼi. ʼE mahino ia, kua fualoa tana faimekanisia. Kae ke feala hana taupau ia tana poto gaue, ʼe tonu ke ina fakaʼaogaʼi tuʼumaʼu te ʼu faʼahi ʼae neʼe ina ako ʼo ʼuhiga mo tana gaue. ʼO toe feia pe, ʼi tatatou kamata ako ia te moʼoni, neʼe tou fiafia he neʼe tou maʼuliʼi te ʼu faʼahi ʼae neʼe tou lau ʼi te Tohi-Tapu. Kae ke feala hatatou fiafia tuʼumaʼu, ʼe tonu ke tou haga maʼuliʼi te ʼu faʼahi ʼae ʼe akoʼi mai e Sehova.
7. Kotea ʼae ʼe tonu ke tou fai ke tou taʼofi he ʼu ako mai te ʼu faʼifaʼitaki ʼi te Tohi-Tapu?
7 ʼI te alatike ʼaeni, ʼe tou talanoa anai ki he ʼu aluʼaga ʼe feala ke faigataʼa ai hatatou maʼu te agavaivai. ʼE tou vakaʼi anai pe neʼe taupau feafeaʼi e ʼihi kaugana agatonu ia tanatou agavaivai. Kae ʼe mole tonu pe ke tou lau pe kotea ʼae neʼe natou fai. ʼE tonu ke tou fakakaukauʼi te faʼifaʼitaki ʼa te ʼu kaugana ʼaia pea mo maʼuliʼi te ʼu ako ʼae ʼe tou taʼofi mai ai.
ʼE HAGE PE TE HAHAʼI KO TATOU
8, 9. Kotea ʼe tou ako ʼo ʼuhiga mo te agavaivai ʼa Paulo ia Gaue 14:8-15? (Vakaʼi te ʼuluaki pāki.)
8 ʼE loto e te ʼAtua “ke haofaki te faʼahiga tagata fuli pe pea ke natou maʼu te ʼatamai malama totonu ʼo te moʼoni.” (1 Timoteo 2:4) Kotea tau manatu ʼo ʼuhiga mo natou fuli ʼae ʼe heʼeki natou iloʼi te moʼoni? Neʼe fakamafola te apositolo ko Paulo ki he kau Sutea neʼe kua natou iloʼi pe ʼihi faʼahi ʼo ʼuhiga mo Sehova. Kae neʼe toe faifakamafola pe foki kia natou ʼae ʼe tauhi ki te ʼu ʼatua loi. Pea ʼi ʼihi temi, neʼe ʼahiʼahiʼi ai te agavaivai ʼa Paulo ʼi tana faifakamafola ki te hahaʼi ʼaia. ʼO feafeaʼi?
9 ʼI te ʼuluaki folau misionea ʼa Paulo, neʼe olo mo Palenapa ki te kolo ko Lisitia. Pea ʼi te manatu ʼa te hahaʼi ʼo te kolo ʼaia, ko Paulo mo Palenapa neʼe hage ko he ʼu tagata makehe ʼaupito, ʼo natou foaki ai kia naua te ʼu higoa ʼo ʼonatou ʼatua hala ko Seusi mo Helemesi. Neʼe fakaʼaogaʼi koa e Paulo mo Palenapa tonā laupisiʼi ʼaia? Neʼe nā ui koa ke nā fakafiafia muʼa he neʼe hoki ʼosi atu pe tonā fakatagaʼi ʼi te ʼu kolo ʼe lua ʼae neʼe nā ʼaʼahi? Neʼe nā manatu koa ʼe ko he faigamalie ʼaia ke nā fakamafola te logo lelei? Kailoa ia. Neʼe nā iita mo nā kalaga fenei: “He koʼe ʼe kotou fai te ʼu meʼa ʼaeni? Mo maua foki ko he ʼu tagata pea ʼe ʼi ai ʼoma vaivaiʼaga ohage pe ko koutou.”—Gaue 14:8-15.
10. He koʼe neʼe mole fia maʼoluga age ia Paulo mo Palenapa ʼi te hahaʼi ʼo Lisitia?
10 ʼI te ui ʼae ʼa Paulo mo Palenapa ko naua foki ko he ʼu tagata, neʼe nā fia ui ko naua ko he ʼu tagata agahala. Neʼe mole leva nā fia ui ʼe tatau tanā tauhi mo te tauhi ʼa te hahaʼi ʼo Lisitia. He ʼe ko te ʼAtua ʼae neʼe ina hinoʼi ia Paulo mo Palenapa ki te gaue fakamisionea. (Gaue 13:2) Pea tahi, neʼe fakanofo naua ʼaki te laumalie maʼoniʼoni pea neʼe fakaofoofo tanā ʼamanaki. Kae neʼe mole ko he tupuʼaga ʼaia ke nā fia maʼoluga age ʼi ʼihi. Neʼe mahino kia naua, neʼe toe feala pe ke maʼu e te hahaʼi ʼaia te ʼamanaki ki te maʼuli ʼi selo mo kapau neʼe natou tali te logo lelei.
11. ʼE feafeaʼi hatatou faʼifaʼitakiʼi te agavaivai ʼa Paulo moka tou faifakamafola?
11 Tou faʼifaʼitakiʼi ia te faʼahiga fakaha ʼae e Paulo ia tana agavaivai. ʼAua naʼa tou manatu ʼi he temi ʼe tou makehe age tatou ʼuhi ko te faifakamafola mo te ʼu gaue ʼae ʼe tou fakahoko ʼaki te tokoni ʼa Sehova. Pea tahi, tou fai te ʼu fehuʼi ʼaeni: ‘Kotea taku manatu ʼo ʼuhiga mo natou ʼae ʼe au faifakamafola ki ai ʼi toku telituale? ʼE au maʼu koa he ʼu manatu fakapalatahi ʼo ʼuhiga mo he faʼahiga hahaʼi?’ Ko te kau Fakamoʼoni ʼa Sehova ʼi te malamanei katoa, ʼe natou kumi te hahaʼi ʼae ka natou tali anai te logo lelei. Pea ʼe faiga ʼihi kau Fakamoʼoni, ke natou ako ia te lea peʼe ko te ʼu agaʼi fenua ʼo te hahaʼi ʼae ʼe fehiʼaʼinaʼi. Kae ʼe mole natou fia maʼoluga age ʼi te hahaʼi ʼaia. ʼE natou faigaʼi ke natou mahino ki te aluʼaga ʼo te kilisitiano takitokotahi ke feala hanatou tokoni ki te tokolahi ke natou tali te logo ʼo te Puleʼaga.
TOU HUFAKIʼI ʼIHI ʼO TOU TOʼO ʼONATOU HIGOA
12. Neʼe fakaha feafeaʼi e Epafalasi ia tana tokaga moʼoni ki ʼihi?
12 Ko te tahi faʼahiga fakaha ʼo tatatou agavaivai, ʼe ko te hufakiʼi ʼo ʼotatou tehina mo tuagaʼane ʼae kua natou “maʼu, ohage ko [tatou], he tui ʼe maʼuhiga.” (2 Petelo 1:1) Neʼe fai te faʼahi ʼaia e Epafalasi. ʼE talanoa tuʼa tolu pe te Tohi-Tapu ki ai. ʼI te ʼapi ʼae neʼe leʼo ai ia Paulo ʼi Loma, neʼe faitohi ki te kau Kilisitiano ʼo Kolose, ʼo ina ui fenei ʼo ʼuhiga mo Epafalasi: “ ʼE faikole fakamalotoloto tuʼumaʼu maʼa koutou.” (Kolose 4:12) Neʼe iloʼi lelei e Epafalasi ʼona tehina mo tuagaʼane, pea neʼe tokaga moʼoni kia natou. Neʼe ui e Paulo ko Epafalasi, neʼe “pilisoni fakatahi” mo ia. ʼO ha mai ai neʼe ʼi ai te ʼu fihifihia ʼo Epafalasi. (Filemone 23) Kae neʼe tokaga tuʼumaʼu pe ia ki te ʼu meʼa ʼae neʼe ʼaoga ki ʼona tehina mo tuagaʼane. Pea ʼe ʼi ai te faʼahi neʼe ina fai moʼo tokoni kia natou. Neʼe hufakiʼi natou e Epalafasi, ʼo ina toʼo ʼonatou higoa pea ʼe toe feala pe ke tou fai feia. Ko te taʼi ʼu faikole ʼaia ʼe malohi ʼaupito.—2 Kolonito 1:11; Sakopo 5:16.
13. ʼE feafeaʼi hau faʼifaʼitakiʼi ia Epafalasi ʼi ʼau faikole?
13 Ko ai ʼae ʼe feala ke ke toʼo tona higoa ʼi ʼau faikole? ʼE lagi ke iloʼi hou ʼu kaumeʼa peʼe ko hou ʼu famili ʼi te kokelekasio ʼe natou felaveʼi mo he ʼu faigataʼaʼia. ʼE lagi maʼua ke natou toʼo he u tonu maʼuhiga peʼe tonu ke natou tekeʼi he ʼu fakahala. ʼE toe feala ke ke faikole maʼa te ʼu tehina ʼae ʼe maʼu ʼonatou higoa ʼi tatatou tuʼasila ʼi te Neti jw.org Fakafalani ʼi te alatike “Témoins de Jéhovah emprisonnés en raison de leur foi” (Ko He Kau Fakamoʼoni ʼa Sehova Neʼe Pilisoniʼi ʼUhi Ko Tanatou Tui). (Vakaʼi SALLE DE PRESSE > VEILLE JURIDIQUE ET DROITS DE L’HOMME.) ʼE toe feala foki ke ke faikole maʼa natou ʼae kua mate he tahi neʼe natou ʼoʼofa mamahi ai, mo natou ʼae ʼe lotomamahi ʼuhi ko he tuʼutamaki fakanatula peʼe ko te ʼu tau pea mo natou ʼae ʼe felaveʼi mo he ʼu fihifihia fakapaʼaga. ʼI tona fakahagatonu, ʼe kaugā malie ʼotatou tehina mo tuagaʼane ʼe ʼaoga kia natou ʼatatou faikole. Ka tou faikole maʼa natou, ʼe tou fakaha ai ʼe mole tou manatu pe ki te ʼu meʼa ʼae ʼaoga kia tatou, kae ʼe tou toe manatu foki ki te ʼu meʼa ʼae ʼe ʼaoga ki ʼihi. (Filipe 2:4) Pea ko Sehova ʼe fagono ki te ʼu faikole ʼaia.
KE TOU “LOTOLELEI ʼO FAGONO”
14. He koʼe ʼe feala ke tou ui ko Sehova ʼae ʼe lelei tukupau ia tana fagono?
14 Ko te tahi faʼahiga fakaha ʼo tatatou agavaivai, ʼe ko tatatou fagono lelei ki ʼihi. ʼE ui mai ia Sakopo 1:19, ke tou “lotolelei ʼo fagono.” Ko Sehova ʼae ʼe lelei tukupau ia tana fagono. (Senesi 18:32; Sosue 10:14) Ohage la, tou lau ia te faipalalau ʼae ʼe tou maʼu ia Ekesote 32:11-14. (Lau.) Logo la neʼe mole ʼaoga ke fakaha e Moisese kia Sehova tana manatu ʼo ʼuhiga mo te aluʼaga ʼae neʼe hoko, kae neʼe tuku aipe e Sehova ke ina fai te faʼahi ʼaia. ʼE tou fagono anai koa ʼaki he kataki fualoa ki he tahi neʼe faihala ki muʼa atu pea mo tou mulimuli anai ki tana manatu? Ko Sehova, ʼe fagono ʼaki he kataki fualoa ki te hahaʼi fuli ʼae ʼe faikole age kia te ia ʼaki te tui.
15. ʼE feafeaʼi hatatou faʼifaʼitakiʼi te faʼahiga fakamaʼuhigaʼi ʼae ʼo ʼihi e Sehova?
15 Tou fai te ʼu fehuʼi ʼaeni: ‘Kapau ʼe agavaivai ʼaupito ia Sehova ʼo fagono ki te hahaʼi ohage ko tana fai kia Apalahamo, Lasele, Moisese, Sosue, Manoa, Elia pea mo Esekiasi, ʼe mole tonu koa la ke au faʼifaʼitakiʼi ia ia? ʼE feala koa ke toe lahi age taku fakamaʼuhigaʼi ʼoku tehina fuli, ʼo au fagono ki ʼanatou manatu pea mo mulimuli ki ai moka ʼe feala? ʼE ʼi ai koa he tahi ʼi toku kokelekasio peʼe ko toku famili ʼe ʼaoga ke au tokaga ki ai ʼi te temi nei? Kotea ʼae ka au fai anai maʼa ia?’—Senesi 30:6; Tui Fakamaau 13:9; 1 Hau 17:22; 2 Koloniko 30:20.
“E LAGI SIO ANAI [IA SEHOVA] KI TOKU FAKAOFAOFA”
Neʼe ui fenei e Tavite: ‘Kotou tukunoa ia ia.’ Mo ka na pau la neʼe ko koe, kotea ʼae neʼe ke fai? (Vakaʼi te palakalafe 16, 17)
16. Kotea ʼae neʼe fai e te Hau ko Tavite ʼi te agakovi ʼa Simei kia ia?
16 ʼE toe tokoni mai te agavaivai ke tou maʼu te lotololomi moka gaohi koviʼi tatou kae neʼe mole tou fai he meʼa ʼe kovi. (Efeso 4:2) ʼE tou maʼu he faʼifaʼitaki lelei ʼo ʼuhiga mo te faʼahi ʼaia ia 2 Samuele 16:5-13. (Lau.) Ko Simei, ko te kaiga ʼo te Hau ko Saulo neʼe laukovi mo laga fihi kia Tavite mo ʼana tagata faifekau. Neʼe feala pe ke fakagata e Tavite te meʼa ʼae neʼe fai e Simei, kae neʼe ina katakiʼi ʼana laukovi. Neʼe maʼu feafeaʼi e Tavite te malohi ke lotololomi ai? Tou vakaʼi te kapite tolu ʼo Pesalemo.
17. Kotea ʼae neʼe tokoni kia Tavite ke ina maʼu te lotololomi, pea ʼe feafeaʼi hatatou faʼifaʼitakiʼi ia ia?
17 Ko te kapite tolu ʼo Pesalemo, neʼe tohi e Tavite ʼi te temi ʼae neʼe fia matehi ai ia ia e tona foha ko Apesalone. Neʼe ko te temi ʼaia neʼe laukovi ai ia Simei kia Tavite. Kae neʼe maʼu e Tavite te malohi ke mole ita. ʼO feafeaʼi? Ia Pesalemo 3:5, ʼe tou lau ai te ʼu palalau ʼaeni ʼa Tavite: “I toku leo e au tagi [kia Sehova], pea e ina tali mai kia au mai tona mouga maonioni.” Moka agakovi mai he tahi kia tatou, ʼe tonu ke tou faikole ohage ko tona fai e Tavite. Pea ʼe foaki mai anai e Sehova ia tona laumalie maʼoniʼoni ke feala hatatou faʼa kataki. ʼE ke manatu koa ki he aluʼaga ʼe tonu ke toe lahi ai tau lotololomi peʼe tonu koa ke toe lahi age ia tau lotofakamolemole? ʼE ke tui papau koa ʼe sio ia Sehova ki tou lotomamahi pea ʼe ina tapuakinaʼi anai koe?
“KO TE POTO ʼE KO TE MEʼA ʼAE ʼE MAʼUHIGA TAFITO”
18. ʼE fua lelei feafeaʼi anai kia tatou te maʼuliʼi tuʼumaʼu ʼo te ʼu fakatotonu ʼa Sehova?
18 Ko te fai ʼo te meʼa ʼae ʼe tou iloʼi ʼe lelei, ʼe ko he aga fakapotopoto ia pea ʼe tapuakinaʼi anai tatou e Sehova. ʼE ui fenei ia Taaga Lea 4:7, MN: “Ko te poto ʼe ko te meʼa ʼae ʼe maʼuhiga tafito.” Tatau aipe pe ʼe fakatafito te poto ki te ʼatamai malama, kae ʼe mole gata ʼaki pe tatatou mahino ki he ʼu aluʼaga. Kapau ʼe tou maʼu te poto, pea ʼe ha anai ʼi te ʼu tonu ʼae ʼe tou toʼo. Pea ko te ʼu lo ʼe toe popoto pe la mo natou he ʼe natou tanaki hanatou meʼa kai ki te temi momoko. (Taaga Lea 30:24, 25) Ko Kilisito ʼae ʼe fakahigoa ko “te poto ʼo te ʼAtua,” ʼe ina fai tuʼumaʼu te ʼu meʼa ʼae ʼe leleiʼia e tana Tamai. (1 Kolonito 1:24; Soane 8:29) ʼO toe feia pe, ka tou agavaivai mo tou aga fakapotopoto ʼo tou fai te meʼa ʼae ʼe tou iloʼi ʼe lelei, ʼe fakapale anai tatou e te ʼAtua. (Lau ia Mateo 7:21-23.) Koia, tou haga gaue ke tou tauhi fuli kia Sehova ʼaki he agavaivai ʼi totatou kokelekasio. ʼE moʼoni, ʼe ʼaoga he temi pea mo he kataki fualoa ke tou maʼuliʼi ai te ʼu meʼa ʼae ʼe tou iloʼi ʼe lelei. Kae ka tou fai te faʼahi ʼaia, ʼe tou fakaha ai ʼe tou agavaivai pea ʼe tou maʼuli fiafia anai ʼi te temi nei ʼo talu ai.