Tou Lototokaga Mo Agaʼofa Ohage Ko Sehova
“Manuia ae e tokaga ki te masiva!” —PESALEMO 41:2.
1. ʼE feafeaʼi te fefakahaʼaki e te ʼu kaugana ʼa Sehova ia tonatou ʼofa?
KO TE ʼu kaugana ʼa Sehova ʼi te malamanei katoa, ʼe natou faʼufaʼu ia he foʼi famili ʼe tahi. Ko he fale tau tehina pea ʼe natou feʼofaʼaki. (1 Soane 4:16, 21) ʼI ʼihi temi, ʼe natou fai he ʼu sakilifisio lalahi, kae ʼe lahi pe tanatou fefakahaʼaki te ʼofa ʼaki te ʼu kiʼi meʼa liliki. Ohage la, ko te fai ʼo he ʼu palalau ʼe lave lelei peʼe ko he ʼu gaue ʼe ha ai te agaʼofa. Ka tou lototokaga ki ʼihi, ʼe tou faʼifaʼitakiʼi ai tatatou Tamai ʼae ʼe ʼi selo.—Efeso 5:1.
2. Neʼe faʼifaʼitakiʼi feafeaʼi e Sesu ia te ʼofa ʼo tana Tamai?
2 Ko Sesu neʼe ina faʼifaʼitakiʼi lelei ia tana Tamai. Neʼe agaʼofa tuʼumaʼu ki ʼihi. Neʼe ina ui fenei: “Kotou ʼomai kia te au, ia koutou fuli ʼae ʼe kinakina mo mafasia, pea ʼe au fakafimalieʼi anai koutou.” (Mateo 11:28, 29) Ka tou faʼifaʼitakiʼi ia Sesu, ʼo tou “tokaga ki te masiva,” ʼe tou fakafiafiaʼi ai ia Sehova pea mo tatou. (Pesalemo 41:2) ʼI te alatike ʼaeni, ʼe tou vakaʼi anai pe ʼe feafeaʼi hatatou lototokaga ki totatou famili, ki ʼotatou tehina mo tuagaʼane pea mo natou ʼae ʼe tou faifakamafola ki ai.
TOU LOTOTOKAGA KI TOTATOU FAMILI
3. Kotea ʼae ʼe tonu ke fai e he tagata ke ina fakaha tana lototokaga ki tona ʼohoana? (Vakaʼi te ʼuluaki pāki.)
3 Ko he tagata ʼohoana ʼe tonu ke ina tuku he faʼifaʼitaki lelei moka tokaga ki tona famili. (Efeso 5:25; 6:4) Ohage la, ʼe ui ʼi te Tohi-Tapu ʼe tonu ki te tagata ʼohoana ke lototokaga mo lotomahino ki tona ʼohoana. (1 Petelo 3:7; nota) Ko te tagata ʼohoana ʼae ʼe lotomahino, ʼe ina iloʼi ʼe mole maʼoluga age ia ʼi tona ʼohoana logo la te ʼu faʼahi ʼae ʼe nā kehekehe ai. (Senesi 2:18) ʼE ina fakamaʼuhigaʼi tona ʼohoana pea ʼe ina tokagaʼi te ʼu meʼa ʼae ʼe ina logoʼi. Ko he tuagaʼane ʼe maʼuli ʼi Kanata ʼe ina ui fenei ʼo ʼuhiga mo tona ʼohoana: “ ʼE mole he temi ʼe ina meʼa noaʼi ai te ʼu meʼa ʼae ʼe au logoʼi peʼe ina valokiʼi taku faʼahiga manatu. Pea ʼe fagono lelei mai. ʼE ina maʼu te agaʼofa moka tokoni mai ke au fetogi taku faʼahiga manatu ʼo ʼuhiga mo he aluʼaga.”
ʼE agatonu he tagata ki tona ʼohoana he ʼe ʼofa ai kae ʼe fehiʼa ki te meʼa ʼae ʼe kovi
4. ʼE fakaha feafeaʼi e he tagata ia tana lototokaga ki tona ʼohoana ʼi tana faʼahiga aga ki ʼihi fafine?
4 Ko te tagata ʼae ʼe ina tokagaʼi te ʼu meʼa ʼe logoʼi e tona ʼohoana, ʼe mole tonu ke fakatokaga peʼe fia fai ki he tahi age fafine, peʼe ko he tahi pe ʼi te fakatahiʼaga ʼi te Neti. (Sopo 31:1) ʼE mole ina fai te faʼahi ʼaia ʼi te ʼu fakatahiʼaga ʼi te Neti, pea ʼe mole alu ki te ʼu pasina ʼi te Neti ʼae ʼe mole lelei. ʼE agatonu ki tona ʼohoana he ʼe ʼofa ai pea ʼe ʼofa kia Sehova kae ʼe fehiʼa ki te meʼa ʼae ʼe kovi.—Lau ia Pesalemo 19:15; 97:10.
5. ʼE fakaha feafeaʼi e he fafine ʼe lototokaga ki tona ʼohoana?
5 Ka mulimuli he tagata ʼohoana ki te faʼifaʼitaki ʼofa ʼo tona pule, ia Sesu Kilisito, ʼe faigafua anai ki tona ʼohoana hana “fakaʼapaʼapa lahi” kia ia. (Efeso 5:22-25, 33) ʼE fakaha anai e te fafine tana fakaʼapaʼapa ʼo ina faigaʼi ke mahino ki te ʼu meʼa ʼae ʼe logoʼi e tona ʼohoana. Pea ʼe agaʼofa ʼi te ʼu temi ʼae ʼe maʼumaʼua ai tona ʼohoana ʼi te kokelekasio peʼe ko tana fakatokatoka he ʼu fihifihia. ʼE ui fenei e te tehina ʼi Pilitania: “ ʼI ʼihi temi, ʼe feala ke tokagaʼi e toku ʼohoana ʼe ʼi ai te aluʼaga ʼe au hoha ki ai ʼuhi ko te fetogi ʼo taku aga. Pea ʼe ina maʼuliʼi leva te pelesepeto ʼo Taaga Lea 20:5, tatau aipe pe ʼe tonu ke atalitali ki he temi faigamalie ke hoki au fakaha age ʼaku manatu mo kapau foki ko he meʼa ʼe feala ke au faipalalau mo ia.”
6. ʼE feafeaʼi hatatou fakalotomalohiʼi te ʼu kiʼi fanau ke natou manatu ki ʼihi pea mo agaʼofa? Kotea anai te ʼu fua lelei ka natou maʼu?
6 Ka fefakahaʼaki e te ʼu matuʼā ia te lototokaga, ʼe natou tuku he faʼifaʼitaki lelei ki ʼanatou fanau. Pea ʼe tonu foki ke natou akoʼi ki ʼanatou fanau ke natou manatu ki ʼihi mo agaʼofa. Ohage la, ko te akoʼi ʼo te ʼu fanau ke ʼaua naʼa feleleʼaki ʼi te loto Fale Fono. Peʼe lolotoga he kaitahi, ʼe feala pe ke akoʼi e te ʼu matuʼā ki ʼanatou fanau ko te hahaʼi vaivai ʼae ʼe tonu ke ʼuluaki heu ʼanatou pa pea hoki fakamuli ia natou. ʼE moʼoni, ʼe feala pe ki te kokelekasio katoa ke natou lagolago ki te ʼu matuʼā. Koia tou fakamalo ki he kiʼi fanau Gaue 20:35.
moka lototokaga ʼo ina avahi te matapa maʼa tatou. ʼE tokoni anai te faʼahi ʼaia ki te fanau ke fiafia mo ina ako “ ʼe lahi age te fiafia moka kita foaki, ʼi takita tali.”—KE “TOU FETOKAGAʼAKI” ʼI TE KOKELEKASIO
7. Neʼe feafeaʼi te lototokaga ʼa Sesu ki te tagata tuli? Pea kotea te ako ʼe tou maʼu mai te faʼifaʼitaki lelei ʼa Sesu?
7 ʼI te tahi ʼaho, lolotoga te nofo ʼa Sesu ʼi te potu fenua ʼo Tekapole “ko ʼihi neʼe natou ʼaumai kia te ia he tagata tuli mo ʼalelo vale.” (Maleko 7:31-35) Neʼe fakamalolo e Sesu ia ia, kae neʼe mole ina fai te faʼahi ʼaia ia muʼa ʼo te hahaʼi. Kotea tona tupuʼaga? Koteʼuhi neʼe tuli te tagata, pea neʼe lagi ufiufi ki te hahaʼi. Neʼe mahino ia Sesu ki te ʼu meʼa ʼae neʼe ina logoʼi, pea neʼe ina “toʼo ʼateaina ia ia” ke mamaʼo mai te hahaʼi pea neʼe ina fakamalolo ia ia. ʼE moʼoni ʼe mole feala ke tou fai he ʼu milakulo, kae ʼe tonu ke tou agaʼofa ʼo tou tokagaʼi te ʼu meʼa ʼae ʼe ʼaoga ki ʼotatou tehina mo tuagaʼane pea mo te ʼu meʼa ʼae ʼe natou logoʼi. Neʼe tohi fenei e te apositolo ko Paulo: “Tou fetokagaʼaki ke tou feugaʼaki ki te ʼofa pea mo te ʼu gaue lelei.” (Hepeleo 10:24) Neʼe mahino ia Sesu ki te ʼu meʼa ʼae neʼe logoʼi e te tagata tuli pea neʼe agaʼofa ia ki ai. Ko he faʼifaʼitaki lelei maʼa tatou.
ʼE uga tatou e te ʼofa ke tou faiga malohi ʼo tokoni ki ʼotatou tehina mo tuagaʼane ʼae kua matuʼa peʼe maʼimoa
8, 9. ʼE feafeaʼi hatatou fakaha ʼe tou lototokaga ki ʼotatou tehina mo tuagaʼane ʼae kua matuʼa mo maʼimoa? (Tuku mai he ʼu faʼifaʼitaki.)
8 Tou lototokaga ki te ʼu tehina mo tuagaʼane ʼae kua vaivai matuʼa pea mo maʼimoa. Ko te kalitate ʼae ʼe maʼuhiga ʼaupito ʼi te kokelekasio Fakakilisitiano ʼe ko te ʼofa, kae mole ko te lahi ʼo te ʼu gaue ʼae ʼe feala ke tou fakahoko ʼi he kiʼi temi siʼi. (Soane 13:34, 35) Ko te ʼofa ʼe ina uga tatou ke tou fai ia meʼa fuli moʼo tokoni ki ʼotatou tehina mo tuagaʼane ʼae kua vaivai matuʼa, peʼe maʼimoa ke natou kau ki te ʼu fono peʼe ki te faifakamafola. ʼE tou tokoni pe anai kia natou tatau aipe pe ʼe faigataʼa ʼuhi ko ʼonatou tuʼakoi, peʼe ko tanatou mole kei lava fakahoko he ʼu gaue ʼe lahi. (Mateo 13:23) Ko Michael ʼe heka ʼi tona hekaʼaga toho, ʼe lotofakafetaʼi lahi ki te ʼu tokoni ʼae neʼe ina maʼu mo tona famili mai te ʼu tehina mo tuagaʼane ʼo tona kokelekasio. ʼE ina ui fenei: “ ʼUhi ko te ʼu tokoni ʼaia, ʼe au kau tuʼumaʼu ki te ʼu fono pea mo te gaue faifakamafola. Kae ʼe au leleiʼia tafito te faifakamafola ʼi te ʼu koga meʼa ʼae ʼe kaugā malie.”
9 ʼE lahi te ʼu Petele, ʼe ʼi ai te ʼu tehina mo tuagaʼane kua matuʼa peʼe maʼimoa. ʼE lototokaga ʼanatou tagata taupau he ʼe natou fakafealagia ke natou faifakamafola ʼaki te telefoni peʼe natou fai he ʼu kiʼi tohi. Ko Bill, ko he tehina ʼe taʼu 86 ʼe faitohi ki te hahaʼi ʼae ʼe nonofo ʼi te ʼu koga meʼa mamaʼo, ʼe ina ui fenei: “ ʼE matou fiafia he ʼe ko he pilivilesio ia te faifakamafola ʼaki te fai ʼo he ʼu tohi.” Ko Nancy ʼae kua teitei taʼu 90, ʼe ina ui fenei: “ ʼE mole ko te faitohi pe ki te hahaʼi. Kae ʼe au faifakamafola kia natou. He ʼe ʼaoga ke iloʼi e te hahaʼi ia te moʼoni.” Ko Ethel ʼae neʼe tupu ʼi te 1921, ʼe ina ui fenei: “ ʼE au maʼuli pe mo ʼoku mamahi ʼi te ʼaho fuli. ʼI ʼihi ʼaho, ʼe faigataʼa ai taku teuteu.” Kae logo la te Taaga Lea 27:11.
faʼahi ʼaia, ʼe fiafia ʼi tana faifakamafola ʼaki te telefoni pea ʼe ʼi ai ʼana ʼaʼahi. Ko Barbara ʼe taʼu 85, ʼe ina fakamatala fenei: “ ʼUhi ko taku mahamahaki, ʼe faigataʼa haku kau ki te faifakamafola. Kae ʼaki te telefoni ʼe feala ai ke au faifakamafola ki ʼihi. Malo Sehova.” Mole ʼosi he taʼu katoa ki ai, ko te kiʼi kutuga ʼae kua matuʼa neʼe natou fai te ʼu hola ʼe 1 228 ʼi te faifakamafola, neʼe natou fai te ʼu tohi ʼe 6 265, neʼe natou faifakamafola ʼi te telefoni ʼo tuʼa 2 000 tupu, pea neʼe natou tufa te ʼu nusipepa ʼe 6 315. ʼE tou tui papau, neʼe fiafia lahi ia Sehova ʼo ʼuhiga mo ʼanatou faiga.—10. ʼE tou tokoni feafeaʼi ki ʼotatou tehina mo tuagaʼane ke fua lelei kia natou te ʼu fono?
10 Tou fakaha te lototokaga ʼi te ʼu fono. Kapau ʼe tou maʼu te lototokaga, ʼe tou tokoni anai ki ʼotatou tehina mo tuagaʼane ke fua lelei kia natou te ʼu fono. ʼO feafeaʼi? ʼE lelei ke tou ʼomai tautonu ke ʼaua naʼa tou fakaleluʼi te nofoʼaki. ʼI ʼihi temi, ʼe tou tau mo he ʼu aluʼaga fakapunamaʼuli ʼo tou tauhala ai. Kae kapau leva ʼe tou tauhala ʼi ʼihi ʼaho, pea ʼe tonu ke tou fakakaukauʼi pe ʼe kotea anai ʼona fua ki ʼotatou tehina mo tuagaʼane, mo tou fai he ʼu fetogi ʼe ha ai ʼe tou tokagaʼi ia natou. Pea tou toe manatuʼi ko Sehova pea mo tona ʼAlo ʼae ʼe nā fakaafe tatou ki te ʼu fono. (Mateo 18:20) Koia moka tou ʼomai tautonu ʼe tou fakaha ai ʼe tou fakaʼapaʼapa kia naua.
11. He koʼe ʼe tonu ki te ʼu tehina ʼae ʼe ʼi ai ʼanatou kiʼi akonaki ke natou mulimuli ki te tokoni ʼae ia 1 Kolonito 14:40?
11 Kapau ʼe tou lototokaga ki ʼotatou tehina mo tuagaʼane, ʼe tou mulimuli anai ki te tokoni ʼaeni ʼi te Tohi-Tapu: “Ke fai ia meʼa fuli ʼi te fakaʼapaʼapa pea mo te fakatokatoka.” (1 Kolonito 14:40) Ko te ʼu tehina ʼae ʼe ʼi ai ʼanatou kiʼi akonaki ʼi te ʼu fono ʼe natou mulimuli ki te tokoni ʼaia moka ʼosi tautonu ʼanatou kiʼi akonaki. ʼAki tanatou fai ʼaia, ʼe natou fakaha ai tanatou fakaʼapaʼapa ki te tehina faiakonaki ʼae ka hoa mai pea mo te kokelekasio katoa. Tou manatuʼi ʼe feala ke fakatupu kovi ki ʼihi te ʼosi tauhala ʼo te ʼu fono, he ʼe ko ʼihi tehina mo tuagaʼane ʼe nonofo mamaʼo. Ko ʼihi ʼe tonu ke natou toʼo te ka peʼe ko te saliote afi. Pea ko ʼihi ʼae ʼe mole tauhi ʼonatou ʼohoana kia Sehova, ʼe natou loto ke toe liliu tautonu age ʼonatou ʼohoana ki fale.
12. He koʼe ʼe tuha te kau tagata ʼafeā ke tou fakaʼapaʼapa mo ʼofa kia natou? (Vakaʼi te fakamatala ʼae ʼi te ʼa takai “Tou Lototokaga Kia Natou ʼAe ʼe Natou Takitaki Tatou.”)
12 Ko te kau tagata ʼafeā ʼe gaue kinakina ki te kokelekasio pea mo te faifakamafola, koia ʼe tuha ke tou fakaʼapaʼapa mo ʼofa kia natou. (Lau ia 1 Tesalonika 5:12, 13.) ʼE mahino ia ʼe ke lotofakafetaʼi ki te ʼu gaue fuli ʼae ʼe natou fai maʼa koe. Koia ʼe feala ke ke fakaha tau lotofakafetaʼi ʼaki tau fakalogo mo tau lagolago kia natou, koteʼuhi ʼe “natou haga tokakaga kia [tatou] pea ʼe fakamauʼi anai natou e te ʼAtua ʼo mulimuli ki ʼanatou gaue.”—Hepeleo 13:7, 17.
TE LOTOTOKAGA ʼI TE FAIFAKAMAFOLA
13. Kotea te ako ʼe tou maʼu mai te faʼahiga aga ʼa Sesu ki te hahaʼi?
13 ʼI te lea fakapolofeta ʼo ʼuhiga mo Sesu, neʼe ui fenei e Esaia: “E mole ina fasii anai te foi kaho kua mafasi, pea e mole ina tamatei anai te vavae malama kei kakaha.” (Esaia 42:3) Neʼe ʼofa ia Sesu ki te hahaʼi koia neʼe lotomahino ai kia natou. Neʼe agalelei mo kataki fualoa kia natou, he neʼe mahino ki te ʼu meʼa ʼae neʼe logoʼi e te hahaʼi lotovaivai mo gaʼegaʼe ʼae neʼe hage ko he “foi kaho kua mafasi” peʼe ko he “vavae malama kei kakaha.” Maʼia mo te ʼu fanau liliki neʼe natou fia nonofo mo Sesu. (Maleko 10:14) ʼE mahino ia, ʼe mole feala ke tou mahino peʼe ke tou akoʼi te hahaʼi ohage ko tona fai e Sesu. Kae ʼe feala pe ke tou fakaha te lototokaga ki te hahaʼi ʼo totatou telituale ʼaki tatatou faʼahiga faipalalau, mo te temi ʼae ʼe tou filifili ke tou faifakamafola ai kia natou, pea mo tona loaloaga.
Tou fakaʼaogaʼi he ʼu palalau ʼe lave lelei, ʼo tou agalelei mo tou lototokaga ki te hahaʼi
14. He koʼe ʼe tonu ke tou fakakaukauʼi te ʼu palalau ʼae ʼe tou fai ki te hahaʼi?
14 ʼE tonu ke feafeaʼi ʼatatou palalau ʼae ʼe tou fai ki te hahaʼi? Ia ʼaho nei, ko te toko lauʼi miliona hahaʼi neʼe “ogosia pea mo mavetevete” ʼuhi ko te aga fakakaka mo te agamalohi ʼa te kau takitaki fakapolitike, mo fakakoloa, pea mo fakalotu ʼo te malama ʼaeni. (Mateo 9:36) Koia ko te tokolahi ʼe mole kei natou falala ki he tahi pea ʼe mole kei ʼi ai hanatou ʼamanaki. Ko te tupuʼaga la ʼaia ʼo tatatou fakaʼaogaʼi he ʼu palalau ʼe lave lelei, ʼo tou agalelei mo tou lototokaga kia natou. Tokolahi te hahaʼi ʼe natou fia logo ki te logo lelei, mole ʼuhi he ʼe tou fakaʼaogaʼi lelei te Tohi-Tapu, kae ʼuhi he ʼe tou tokakaga moʼoni mo tou fakaʼapaʼapa kia natou.
15. Kotea te tahi ʼu aluʼaga ʼe feala ke tou lototokaga ai ki te hahaʼi ʼo totatou telituale?
15 ʼE lahi te ʼu aluʼaga ʼe tou lava fakaha ai te lototokaga ki te hahaʼi ʼo totatou telituale. ʼE ʼaoga ke tou fai he ʼu fehuʼi, ʼo tou agalelei pea mo aga fakaʼapaʼapa. Ko te tehina pionie neʼe faifakamafola ʼi te telituale neʼe lahi ai te hahaʼi umiuminoa. Koia neʼe ina fai he ʼu fehuʼi ʼe faigafua pea ʼe mole fakatupu ufiufi kia
natou. Neʼe mole ina ui, “ ʼE ke iloʼi koa te huafa ʼo te ʼAtua?” peʼe “ ʼE ke iloʼi koa pe ʼe kotea te Puleʼaga ʼo te ʼAtua?” Kae, neʼe ina ui pe ia, “ ʼAki te Tohi-Tapu kua au iloʼi ʼe ʼi ai te huafa ʼo te ʼAtua. ʼE feala la ke au fakaha atu pe ko ai tona huafa?” Ko te faʼahiga fai ʼaia, ʼe mole fakaʼaogaʼi ʼi te ʼu telituale fuli, koteʼuhi ko te hahaʼi pea mo ʼanatou agaʼi fenua ʼe kehekehe. Kae ʼe tonu ke tou agalelei tuʼumaʼu ki te hahaʼi ʼo totatou telituale mo tou fakaʼapaʼapa kia natou. Pea ke feala hatatou fai te faʼahi ʼaia, ʼe tonu ke tou iloʼi lelei ia te hahaʼi.16, 17. ʼE feafeaʼi hatatou fakaha te lototokaga moka tou fakatuʼutuʼu (1) te temi ʼae ke tou ʼaʼahi ai te hahaʼi? (2) pe ʼe ko temi ʼe fia ʼe tonu ai ke tou faipalalau mo he tahi?
16 Ko te temi fea ʼae ʼe tonu ai ke tou ʼaʼahi te hahaʼi? Ka tou faifakamafola ʼi te ʼu ʼapi, ʼe mole atalitali mai te hahaʼi he neʼe mole natou fakaafe tatou. Koia ʼe maʼuhiga ʼaupito ai, ke tou ʼaʼahi ia natou ʼi te ʼu temi ʼae ʼe natou fia faipalalau ai. (Mateo 7:12) Ohage la, ʼe lagi ko ʼihi ʼi totatou telituale ʼe natou momoe fualoa ʼi te ʼu fakaʼosi vahaʼa. Koia ʼe lagi lelei age ke ke kamata faifakamafola ʼi te ʼala, ʼi te ʼu koga meʼa ʼae ʼe kaugā malie ai te hahaʼi, peʼe ke toe liliu ʼo ʼaʼahi ia natou ʼae ʼe fia faipalalau anai mo koe.
17 Ko temi ʼe fia ʼe tonu ai ke tou faipalalau mo he tahi? Tokolahi te hahaʼi ʼe natou maʼumaʼua, koia ʼe lelei ai hatatou fakanounou ʼatatou ʼaʼahi tafito la ʼi te kamata. ʼE lelei ke ʼosi vave pe te faipalalau ʼi hatatou nonofo fualoa. (1 Kolonito 9:20-23) Kapau ʼe sio te hahaʼi ʼe tou tokagaʼi tonatou maʼumaʼua, ʼe feala pe ke natou lotolelei ke tou toe liliu mai. Ka tou fakaha te ʼu kalitate ʼae ʼe haʼu mai te laumalie ʼo te ʼAtua, ʼe tou liliu moʼoni anai ko he ʼu “kaugā gaue [ʼo] te ʼAtua.” Pea ʼe lagi fakaʼaogaʼi anai tatou e Sehova ke tou tokoni ki he tahi ke ina iloʼi te moʼoni.—1 Kolonito 3:6, 7, 9.
18. Ka tou lototokaga ki ʼihi, kotea anai te ʼu tapuakina ka tou maʼu?
18 Koia tou faiga malohi ke tou fakaha te lototokaga ki totatou famili, ki ʼotatou tehina mo tuagaʼane, pea mo natou ʼae ʼe tou faifakamafola ki ai. ʼE tou maʼu anai he ʼu tapuakina ʼe lahi ʼi te temi nei pea mo te ka haʼu. Pea ohage ko tona ui fenei ia Pesalemo 41:2, 3: “Manuia ae e tokaga ki te masiva! I te aho o te malaia e haofaki ia ia e [Sehova]; E taupau ia ia e [Sehova] pea e ina fakatologa tona mauli. E manuia ia ia i te kele.”