ALATIKE AKO 38
Fakaovi Ki Tou Famili Fakalaumalie
“E au hake ki taku Tamai pea ko takotou Tamai.”—SOA. 20:17.
KATIKO 3 Ko Toku Malohiʼaga, Taku ʼAmanakiʼaga, Toku Falanakiʼaga
TE ʼU MANATU FAKANOUNOU *
1. Kotea neʼe ui e Sesu ʼo ʼuhiga mo Sehova? Pea kotea ’e tou mahino mai ai?
ʼE KAU ia Sesu, “te ’uluaki tupu ’o me’a fuli ’ae ne’e fakatupu” pea mo te kau ’aselo ’i te famili ’a Sehova. (Kol. 1:15; Pes. 103:20) ’I te ma’uli ’a Sesu ’i te kele, ne’e tokoni ki te haha’i ke natou mahino ʼe feala ke natou pauʼi ia Sehova ko hanatou Tamai. Koia ’i tana palalau ki ʼana tisipulo, ne’e ina ui ’o ’uhiga mo Sehova ko “taku Tamai pea ko takotou Tamai.” (Soa. 20:17) Pea ka tou foaki totatou ma’uli pea mo papitema, ʼe tou kau ki he fo’i famili fale tau tehina mo tuaga’ane ’e fonu ʼi te ’ofa.—Mko. 10:29, 30.
2. Kotea ʼae ka tou vakaʼi ʼi te alatike ʼaeni?
2 ’E faigata’a ki ’ihi ia tanatou faka’uhiga ia Sehova ko he Tamai ’e fonu ’i te ’ofa. Ko ’ihi ’e mole natou iloʼi te fakaha ’o tonatou ’ofa ki ’onatou tehina mo tuaga’ane. ’I te alatike ’aeni, ’e tou vaka’i ai pe ’e tokoni feafea’i mai ia Sesu ke tou faka’uhiga ia Sehova ko he Tamai ’ofa ’e feala ke tou fakaovi ki ai. ’E tou toe vaka’i ai pe feafeaʼi hatatou faʼifaʼitakiʼi ia Sehova ʼi tana faʼahiga tokaga ki ’otatou tehina mo tuaga’ane.
ʼE LOTO E SEHOVA KE KE FAKAOVI AGE
3. ʼE ha feafeaʼi ʼi te faikole ʼae neʼe akoʼi mai e Sesu ’e loto e Sehova ke tou fakaovi kia te ia?
3 Ko Sehova, ’e ko he Tamai ’ofa. ʼE loto e Sesu ke tou manatu tahi mo ia. ʼE ina iloʼi ko Sehova ’e ko he tamai fonu ’i te ’ofa pea ’e faigafua te fakaovi ki ai. Kae ’e mole ko he tahi ’e agakovi pea mo ina pule’i fakamalohi tatou. ’E ha lelei te fa’ahi ’aia ’i te faikole ’ae ne’e ako’i e Sesu ki tana kau tisipulo. ’E kamata fenei: “Ko tamatou Tamai.” (Mat. 6:9) Ne’e feala pe ke fakalotomalohi’i tatou e Sesu ke tou pau’i fenei kia Sehova “Mafimafi,” “Tupuʼaga” pe’e ‘Hau ʼo te he’e gata.’ (Sen. 49:25; Esa. , NWT; 40:281 Tim. 1:17) Pea tahi, ’e ko he ’u higoa fakatu’ulaga ’e tuha mo ia pea ’e tou ma’u ’i te Tohi-Tapu. Kae, ne’e loto e Sesu ke tou pauʼi kia Sehova “Tamai.”
4. ’E tou ilo’i feafea’i ’e loto e Sehova ke tou fakaovi age kia te ia?
4 ’E faigata’a koa kia koe tau faka’uhiga ia Sehova ko he Tamai ’ofa? ’E manatu feia ʼihi ia tatou. ’E lagi mata faigata’a kia tatou ia te kupu tamai fonu ’i te ’ofa he ’e lagi mole ’ofaina’i tatou e ’atatou matu’ā. Kae ʼe fakalotofimalie tatatou ilo’i ’ae ’e mahino ia Sehova ki te ’u me’a ’ae ’e tou logoʼi. ’E fia fakaovi mai kia tatou. Koia ʼae ʼe ina fai mai ai te fakaafe ’aeni: “Kotou fakaovi ki te ’Atua, pea ’e fakaovi atu anai kia koutou.” (Sakp. 4:8) ’Ei, ʼe ’ofa ia Sehova ia tatou pea ’e ko tatatou Tamai pe ʼaia ʼe lelei tokotahi.
5. Ia Luka 10:22, ’e tokoni feafea’i mai ia Sesu ke tou fakaovi kia Sehova?
5 ’E lava tokoni mai ia Sesu ke tou fakaovi kia Sehova. ’E ina ilo’i lelei ia ia pea ’e ina fa’ifa’itaki’i lelei ’Ona kalitate. Koia ne’e ina ui fenei: “Ko ’ae kua sio kia te au, kua toe sio ia ki te Tamai.” (Soa. 14:9) Ohage ko hotatou ta’okete, ’e ako’i tatou e Sesu ke tou faka’apa’apa ki tatatou Tamai pea mo fakalogo ki ai. Pea ’e ina fakamahino mai pe kotea ’ae ’e tonu ke tou fai ke ’aua na’a tou fakamamahi’i ia Ia pea mo fakafiafia’i Tona loto. Kae neʼe tokoni mai ia Sesu ke tou mahino ʼe agalelei ia Sehova pea mo fonu ’i te ’ofa. (Lau ia Luka 10:22.) Tou vaka’i ’ihi faʼifaʼitaki.
6. Ko te ’u alu’aga fea ne’e fagono ai ia Sehova ki te ’u faikole ’a Sesu?
6 ’E fagono Sehova moka palalau age ’ana fanau. Ohage la, ne’e lahi te ʼu faikole neʼe fai e tona ’Alo ’i tana ’i te kele. Pea neʼe fagono ia Sehova ki ai. (Luka 5:16) Ne’e faikole ia Sesu ’i te temi ’ae ne’e ina to’o ai he ’u tonu ma’uhiga. Ohage la ne’e fagono ia Sehova ki tana faikole ʼi tana filifili ʼana apositolo ’e toko 12. (Luka 6:12, 13) Ne’e faikole ia Sesu ’i te temi ’ae ne’e tu’ania ai pea ne’e fagono Sehova ki ai. Pea ’i mu’a ’o tona lavaki’i e Sutasi, ne’e faikole ia Sesu ’o ’uhiga mo te ’u alu’aga faigata’a ’ae ka tau mo ia pea ne’e fagono ia Sehova ki ai. Ne’e mole gata ’aki pe tana fagono ki te faikole ’o tona ’Alo, kae ne’e ina fekau’i he ’aselo ke alu ’o fakalotomalohi’i.—Luka 22:41-44.
7. Kotea te ako ’e tou ta’ofi mai te tali e Sehova ia te ’u faikole ’o ’ana kaugana?
7 ʼE hoko atu pe te fagono ʼa Sehova ki te ’u faikole ’o ’ana kaugana pea ’e ina tali anai ’i tona temi totonu. (Pes. 116:1, 2) Tou vaka’i pe ne’e tali feafeaʼi ia Sehova ki te ’u faikole ’a he tuaga’ane ’i Initia. Ne’e hoha tuʼumaʼu pea ne’e faikole kia Sehova ’o ’uhiga mo te alu’aga ’aia. Ne’e ina tohi fenei: “’I te JW Televisio ’o Maio 2019, ne’e talanoa ai pe feafea’i he tau’i ’o te tu’ania pea mo te hoha. Neʼe ko he aluʼaga ia neʼe tokoni moʼoni mai kia au. Pea ne’e ko te tali ’aia ki ’aku faikole.”
8. Ne’e fakaha feafeaʼi e Sehova tona ’ofa ’ae kia Sesu?
8 ’E ’ofa ia Sehova pea ’e tokaga kia tatou, ohage pe ko tona ’ofa kia Sesu. Neʼe tokaga kia ia ’i tana maʼuli ’i te kele. (Soa. 5:20) Ne’e foaki e Sehova kia Sesu ia te ’u me’a ’ae ’aoga ki ai ’i te fa’ahi fakalaumalie mo fakasino. Pea neʼe ina fakalotomalohiʼi ia ia moka lotohoha. Ne’e ui e Sehova ki tona ʼAlo ʼe ʼofa ia ia pea ʼe fiafia ʼo ʼuhiga mo ia. (Mat. 3:16, 17) Neʼe iloʼi e Sesu ’e feala ke falala tu’uma’u ki tana Tamai fonu ’i te ’ofa ’ae ’e ’i selo, koia ne’e mole ina logo’i ai hona li’akina.—Soa. 8:16.
9. ʼE tou iloʼi feafeaʼi ’e ’ofa ia Sehova ia tatou?
9 ʼE lahi ia te ’u alu’aga ’e fakaha mai ai e Sehova ia tona ’ofa ohage pe ko tana fai kia Sesu. Ne’e ina taki mai tatou kia te ia. Pea neʼe ina foaki mai hotatou ʼu tehina mo tuagaʼane ʼofaina ke tou fiafia ai pea ke natou fakalotomalohiʼi tatou. (Soa. 6:44) Pea tahi, ’e ina foaki tu’uma’u mai ia te me’a kai fakalaumalie moʼo fakamalohiʼi tatatou tui. ʼE toe tokoni mai ke tou ma’u ia te ’u me’a ’ae ’aoga kia tatou ’i te fa’ahi fakasino. (Mat. 6:31, 32) Ka tou fakakaukau’i ia te ’ofa ’o Sehova kia tatou, ’e malohi ai totatou ’ofa kia te ia.
’OFA KI ’OU TEHINA MO TUAGA’ANE OHAGE KO TONA FAI E SEHOVA
10. Kapau ʼe ʼofa ia Sehova ki ’otatou tehina mo tuaga’ane, kotea ’ae ’e ina uga tatou ke tou fai?
10 ’E ’ofa ia Sehova ki ’otatou tehina mo tuaga’ane. Kae lagi faigata’a kia tatou ’i ’ihi temi tatatou fakaha totatou ’ofa kia natou. Ne’e mole tou lahilahi fuli ake ’i he aga’i fenua ’e tahi pea ne’e mole tatau totatou ako’i. Pea ’e tou fai fuli he ’u lakahala ’e feala ke iita pea mo mamahi ai ni’ihi. Kae ’e feala ke tou faiga ʼo fakamalohiʼi te ’ofa ʼi te kokelekasio. ’O feafea’i? ’Aki tatatou fa’ifa’itaki’i ia tatatou Tamai. (Efe. 5:1, 2; 1 Soa. 4:19) Tou vaka’i pe ’e lava tokoni feafea’i mai te fa’ifa’itaki ʼa Sehova.
11. Ne’e fakaha feafea’i e Sesu ia te “manavaʼofa lahi” ’o Sehova?
11 ’E fakaha e Sehova ia tona “manava’ofa lahi” ki te haha’i. (Luka 1:78) Ko he tahi ’e manava’ofa, ’e ina logo’i te mamahi ’o ’ihi. ’E faiga ke tokoni kia natou pea mo fakalotofimalie’i natou. Neʼe ha ʼi te fa’ahiga tokaga ’a Sesu ki te hahaʼi ia te ’ofa mamahi ’o Sehova kia natou. (Soa. 5:19) ’I te tahi ’aho, neʼe sio ia Sesu ki he haha’i kaugā malie, pea “ne’e ’ofa mamahi ia natou, kote’uhi ne’e natou ogosia pea mo mavetevete ohage ko he ’u ovi ’e mole honatou tauhi ovi.” (Mat. 9:36) Ne’e mole gata ’aki pe tana ’ofa mamahi ’i te haha’i ’aia, kae ne’e tokoni kia natou. Ne’e ina fakamalolo te kau mahaki pea ne’e ina fakalotofimalie’i natou ’ae ’e “kinakina mo mafasia.”—Mat. 11:28-30; 14:14.
12. ’E tou lava fakaha feafea’i ’e tou ’ofa mamahi ki ’otatou tehina mo tuaga’ane?
12 Kapau ʼe tou fia fakaha ʼe tou ’ofa mamahi ki ’otatou tehina mo tuaga’ane, ’e tonu ke tou
mahino ki ʼonatou faigata’aʼia. ’E lagi mahaki kovi he tuaga’ane ’i tatatou kokelekasio. ’E lagi mole meo ’i he temi. Kae ’e lagi fiafia anai mo kapau ’e tokoni age he tahi. ’E ina ma’u koa ia te ’u me’a ’ae ’e ’aoga ki tona famili? ’E mole koa la feala ke tou tokoni ki ai ki te teuteu’i ’o he ki’i me’a kai pe’e ki te fai ’o te menasi? Pe’e lagi ʼi ai he tehina ’i te kokelekasio ’e mole kei ’i ai hana gaue. ’E mole koa la feala ke tou foaki age he ki’i fo’i falā mo’o tokoni ki ai ʼo kaku ki tana hoki maʼu hana gaue?13-14. ’E tou lava fakaha feafea’i ’e tou lotofoaki ohage ko Sehova?
13 ’E lotofoaki ia Sehova. (Mat. 5:45) ’E mole tonu ke tou atalitali ke kole tokoni mai ’otatou tehina mo tuaga’ane pea hoki tou ’ofa mamahi kia natou. Ohage ko Sehova, tou fakaha ia te lotofoaki kia natou. ’E ina fakahopo te la’a ma’a tatou ’i te ’aho kae he’eki tou kole age. Pea ’e ’aoga te mafana ’o te la’a ki te haha’i fuli, kae mole ki te haha’i pe ’ae ’e lotofakafeta’i kia Sehova. ’E mole koa la ko he fakamo’oni ’aia ’o tona ’ofa? ’E agalelei ia Sehova mo lotofoaki pea ’e ina foaki mai ia me’a fuli ’e ’aoga mai. ’E mole koa la tupu ai hou ’ofa kia te ia?
14 Ohage ko tatatou Tamai ’ae ’e ’i selo, tokolahi ’i ’otatou tehina mo tuaga’ane ’e natou lotofoaki ki ’ihi. Ohage la ʼi te 2013, ne’e to ia te Afā Haiyan ’o ina maumau’i ia te ’u motu ’o Filipine. Tokolahi te ’u tehina mo tuaga’ane ne’e maumau ’onatou ’api pea mo puli ai ’onatou koloa. Kae ne’e tokoni kia natou tonatou famili fakalaumalie. Tokolahi ne’e natou fai ni me’a ’ofa pea ko ’ihi ne’e natou tokoni ki te toe laga ’o te ’u ’api, ’o natou laga ai ia ’api ’e teitei 750 lolotoga ni mahina. He’eki fa’a fualoa, lolotoga te ta’i mahaki ko te Kolonavilusi ne’e tou fetokoni’aki pea mo fefakalotomalohi’aki. Ne’e tou fakaha ’e tou ’o’ofa kia natou ’o totatou famili fakalaumalie.
15-16. Ia Luka 6:36, kotea ’ae ’e tonu ke tou fai ke tou fa’ifa’itaki’i ai ia tatatou Tamai ʼae ʼi selo?
15 ’E manava’ofa pea mo lotofakamolemole ia Sehova. (Lau ia Luka 6:36.) ’E fakaha mai e Sehova ia tona lotomanava’ofa ’i te ’aho fuli. (Pes. 103:10-14) Ne’e he’e haohaoa te ʼu tisipulo ʼa Sesu. Kae ne’e lotomanava’ofa kia natou mo fakamolemole ’anatou lakahala. Ne’e lotolelei ke ina sakilifisio’i tona ma’uli mo’o fakamolemole ’aki ’atatou agahala. (1 Soa. 2:1, 2) ’E mole koa la tou fia fakaovi kia Sehova mo Sesu ’i tana fakaha te ’u kalitate ’aia?
16 Kapau ’e tou ‘fakamolemole’ gafua, ’e malohi anai tatatou maʼuli feʼofaʼofani. (Efe. 4:32) ’E mahino ia, ’e faigata’a ’i ’ihi temi ia te lotofakamolemole. ’E tonu ke tou fai ni faiga ke feala hatatou lotofakamolemole. Ne’e tokoni ki he tuaga’ane ia he alatike ’o Te Tule Le’o ’ae ko tona kupu tafito “Kotou Fefakamolemoleʼaki ʼAki Te Lotolelei.” * Ne’e ina tohi fenei: “Ne’e tokoni mai te alatike ke fetogi taku fa’ahiga sio pea ke au ma’u he manatu ’e lelei. ’E fakamahino ai ko te fakamolemole ’e mole faka’uhiga ’e tou tali he aga ’e kovi pe’e tou ui ’e mole kovi ia. Kae ko tona faka’uhiga ke tou li’aki ia te ’u manatu kovi fuli ’e tupu mai te aga ’aia pea ʼe feala anai ke tou maʼu te tokalelei.” Ka tou lotolelei ʼo fakamolemole ki ’otatou tehina mo tuaga’ane, ’e tou fakaha ai ’e tou ’o’ofa ia natou pea ’e tou fa’ifa’itaki’i ai tatatou Tamai ko Sehova.
KE KE FIAFIA ’I TAU KAU KI TE FAMILI ’O SEHOVA
17. Ia Mateo 5:16, ’e tou lava fakama’uhiga feafea’i ia tatatou Tamai ’ae ’e ’i selo?
17 ’I me’a fakafiafia takita kau ki he famili fakamalamanei ’e fe’ofaʼofani. ’E tou faka’amu ke kaugā malie age te haha’i ’e fakatahi mai ki te tauhi kia Sehova. Koia, ’e tonu ai ke tou tokakaga na’a tou ’ulihi ia te matagafua ’o Sehova pea mo tana haha’i. ’E tonu ke tou faiga ke lelei tatatou aga ke tupu ai hanatou fia logo ki te logo lelei.—Lau ia Mateo 5:16.
18. Kotea ’ae ka tokoni mai ke tou lototo’a ’i te faifakamafola?
18 ’I ’ihi temi, ’e fatufatu’i pe’e fakataga’i tatou ’uhi ’ae ’e tou fakalogo ki tatatou Tamai ’ae ’e ’i selo. Kotea ’ae ’e tonu ke tou fai mo kapau ’e tou matataku ’i te palalau ki te haha’i ’o ’uhiga mo tatatou tauhi? Tou tui papau ’e tokoni mai anai ia Sehova pea mo tona ’Alo. Ne’e fakamahino age e Sesu ki tana kau tisipulo ke ’aua na’a natou tu’ania ki te ’u me’a ’ae Mat. 10:19, 20.
ka natou palalau anai ki ai pea mo tona fa’ahiga ui. Kotea tona tupu’aga? “Koteʼuhi ʼe foaki atu anai ʼi te temi ʼaia te ʼu palalau ʼae ʼe tonu ke kotou fai. He ʼe mole ko koutou pe ʼae ʼe palalau, kaʼe ʼe ko te laumalie ʼo takotou Tamai ʼae ʼe palalau maʼa koutou.”—19. Kotea ’ae ne’e tokoni kia Robert ke faifakamafola ’aki he lototo’a?
19 Tou vakaʼi te faʼifaʼitaki ʼa Robert. Hili ki ai ni ta’u, neʼe kei fo’ofo’ou tana ako te Tohi-Tapu pea ne’e he’eki katoa tana mahino. Ne’e tonu ke alu ki te telepinale ʼo fakamahino pe koʼe ʼe mole alu ʼo solia ʼi Afelika Saute. ʼAki he lototo’a, neʼe ina fakamahino ’e mole fia lagolago ki te ’u faʼahi fakapolitike he ’e ’ofa ’i ’ona tehina mo tuaga’ane. Ne’e fiafia ’i tana kau ki totatou famili fakalaumalie. Kae ne’e fehu’i fenei age e te tu’i fakamau: “Ko ai ’ou tehina mo tuaga’ane?” Ne’e mole ʼamanaki ia Robert ʼe fai age te fehu’i ’aia. Koia, ne’e ina manatu’i atu aipe te koga tohi ’o te ’aho ’aia. Ko te koga tohi ’o Mateo 12:50: “Ko ’ae ’e ina fai te finegalo ’o taku Tamai ’ae ’e ’i selo, ’e ko ia ’aia ko toku tehina, mo toku tuaga’ane pea mo taku fa’e.” ʼEi, neʼe he’eki fa’a fualoa ia te ako e Robert ia te Tohi-Tapu. Kae ne’e tokoni ia te laumalie ’o Sehova ki ai ke ina tali ki te fehu’i ’aia pea mo ’ihi atu fehu’i ne’e mole ’amanaki ki ai. ʼE mahino ia, ne’e fiafia ia Sehova ’o ’uhiga mo Robert. Ka tou faifakamafola ʼaki he lototoʼa ʼi ni aluʼaga faigataʼa, ʼe toe fiafia Sehova ’o uhiga mo tatou he ʼe tou falala kia te ia.
20. Ia Soane 17:11, 15, kotea ’ae ’e tonu ke tou kataki ’o fai?
20 ʼE tou fiafia ʼi te kau ki he famili fakalaumalie ’e maʼuli feʼofaʼofani. ’E tou ma’u ia te Tamai ʼae ʼe lelei tokotahi pea mo ’otatou tehina mo tuaga’ane ’e ’o’ofa ia tatou. ’Aua na’a tou me’a noa’i te ’u faʼahi ’aia. ʼE fehihi’a ia Satana mo natou ʼae ’e kau ki ai ia tatou. Pea ’e natou faiga ke tou manatu ’e mole ’ofa ia tatatou Tamai ’ae ’e ’i selo ia tatou pea ke mole tou logo tahi. Kae me’a lelei, ne’e faikole ia Sesu ki tana Tamai ke ina puipui tatou pea ke logo tahi tu’uma’u totatou famili. (Lau ia Soane 17:11, 15.) Pea ne’e tali lelei e Sehova tana kole. Ohage ko Sesu, tou tui papau ’e ’ofa ia tatatou Tamai ’ae ’e ’i selo ia tatou pea ’e tokoni tu’uma’u mai anai. Koia tou kataki ’o fakaovi tu’uma’u ki totatou famili fakalaumalie.
KATIKO 99 Te ’u Lau’i Miliona Tehina
^ pal. 5 ’E tou ma’u he toe pilivilesio lahi ’i tatatou kau ki he fo’i famili ’o ni tehina mo tuaga’ane ’e fe’ofa’ofani. ’E tou faka’amu ke tou fakamalohi’i ’atatou felogoi. ’O feafea’i? ’O tou ’o’ofa ki ’ihi ohage ko te ’ofa ’a Sehova kia tatou pea mo tou fa’ifa’itakiʼi ia Sesu mo te ’u tehina mo tuaga’ane.
^ pal. 16 Vaka’i Te Tule Le’o ’o te ’aho 1 ’o Novepeli 2012, pasina 28-32.
^ pal. 57 FAKAMATALA ʼO TE ʼU PĀKI: Ne’e fekau’i e Sehova ia tana ’aselo ke alu ’o fakalotomalohi’i ia Sesu ’i te ’oloto ’o Setesemani.
^ pal. 59 FAKAMATALA ʼO TE ʼU PĀKI: ʼI te ta’i mahaki Kolonavilusi, tokolahi te ’u tehina mo tuaga’ane ne’e natou teuteu’i pea mo tufa ia te me’a kai.
^ pal. 61 FAKAMATALA ʼO TE ʼU PĀKI: Ko he faʼe ʼe tokoni ki tana kiʼi taʼahine ʼae ʼe ina momoli he tohi moʼo fakalotomalohi’i he tehina ʼi te pilisoni.