ALATIKE AKO 36
Tou Fakamaʼuhigaʼi Te Kau Tupulaga
“Ko te malohi ko te kololia o te kau tupulaga.”—TAAG. 20:29.
KATIKO 88 Fakaha Mai ʼOu Ala
TE ʼU MANATU FAKANOUNOU *
1. Kotea ʼe feala ke tou fai moka hifo leva te vaivai matuʼa?
KA HIFO te vaivai matuʼa, ʼe lagi tou tuʼania naʼa mole toe fakaʼaoga tatou ohage ko te temi muʼa ki te ʼu gaue ʼa Sehova. ʼE moʼoni, kua hifo leva totatou malohi. Kae kua lahi age totatou fakapotopoto pea kua tou fotufotuʼa ʼi te faʼahi fakalaumalie. Koia, ʼe feala ke tou tokoni kia natou ʼae ʼe kei tupulaga ke natou tuputupu ʼi te faʼahi fakalaumalie pea mo tali he tahi ʼu gaue. Neʼe ui fenei e he tehina kua fualoa tana tagata ʼafeā: “ ʼI taku logoʼi ʼae kua hifo toku vaivai matuʼa, neʼe au fiafia ʼi taku iloʼi ʼae ʼe ʼi ai te ʼu tehina tupulaga ʼe feala ke natou hoko atu.”
2. Kotea ʼae ka tou talanoa anai ʼi te alatike ʼaeni?
2 ʼI te alatike ʼi muʼa atu, neʼe tou vakaʼi ai te ʼu ako ʼe feala ke maʼu e te kau tupulaga moka natou fakatahi mo te kau matuʼa. ʼE tou talanoa anai ʼi te alatike ʼaeni ki te agavaivai, te fia malalo, te lotofakafetaʼi pea mo te lotofoaki. ʼE tokoni te ʼu kalitate ʼaia ʼe fa ki te kau matuʼa ke natou gaue fakatahi mo te kau tupulaga ke fua lelei ki te kokelekasio.
TE AGAVAIVAI
3. Ia Filipe 2:3, 4, kotea te manatu ʼe tonu ke maʼu e he Kilisitiano agavaivai?
3 Ka agavaivai he tehina kua matuʼa pea ʼe tokoni anai kia natou ʼae kei tupulaga. Ko he tahi ʼe agavaivai ʼe ina fakaʼuhiga te hahaʼi fuli ʼe maʼoluga age ia ia. (Lau ia Filipe 2:3, 4.) Ka fakaha e te kau Kilisitiano matuʼa te kalitate ʼaia, ʼe natou mahino ai ʼe lahi te faʼahiga fai ʼo he gaue. Ko te maʼuhiga ʼe ko he gaue ʼe lelei pea ʼe alu tahi mo te ʼu pelesepeto Fakatohi-tapu. Koia ʼae ʼe mole natou ʼamanaki anai ʼe fai e ʼihi te ʼu gaue ohage ko natou. (Ekl. 7:10) ʼE feala ke natou tokoni ki te kau tupulaga moka ʼe natou fakaha age te ʼu faʼahi neʼe natou ako. Kae ʼe natou toe mahino “ ʼe fetogi te agaaga ʼo te malamanei” pea ʼe tonu ke natou muliʼi te ʼu fetogi ʼaia.—1 Ko. 7:31.
4. Neʼe faʼifaʼitakiʼi feafeaʼi e te ʼu taupau ʼo te siliko ia te kau Levite?
4 ʼE toe iloʼi e te kau Kilisitiano agavaivai ʼe mole kei feala hanatou fai he ʼu gaue ohage ko te temi muʼa he ʼe kua natou vaivai. Ohage la, tou talanoa ki te ʼu taupau ʼo te siliko. ʼI tonatou taʼu 70, ʼe kole age kia natou ke natou fetogi tanatou selevisi. ʼE ko he aluʼaga ʼe feala ke faigataʼa kia natou. ʼE natou leleiʼia te gaue ʼaia he ʼe natou tokoni ki ʼonatou tehina mo tuagaʼane. Pea ʼe natou fia fakahoko tuʼumaʼu. Kae ʼe natou mahino ki te ʼaoga ʼo he ʼu tehina kei tupulaga ke natou hoko atu. Koia ʼae ʼe natou faʼifaʼitakiʼi leva te kau Levite. Neʼe kole age ke natou taʼofi tanatou gaue ʼi te tapenakulo ʼi tonatou taʼu 50. Neʼe mole fakalogo tonatou fiafia ki te ʼu gaue ʼae neʼe natou fai. Ka natou kaku ki te taʼu ʼaia, ʼe natou toʼo ia faigamalie fuli ke natou tokoni ki te kau tupulaga ke natou fakahoko ʼanatou gaue. (Num. 8:25, 26) Ia ʼaho nei, ka taʼu 70 te ʼu taupau ʼo te siliko, pea ʼe mole kei natou ʼaʼahi leva te ʼu kokelekasio. Kae ʼe lahi tanatou tokoni mo fakalotomalohiʼi te kokelekasio ʼae neʼe hinoʼi natou ki ai.
5. Kotea te ako ʼe tou maʼu mai te faʼifaʼitaki ʼa Dan pea mo Katie?
5 Tou vakaʼi te faʼifaʼitaki ʼa Dan ʼae neʼe ko he taupau ʼo te siliko ia taʼu ʼe 23. ʼI tona taʼu 70, neʼe pionie makehe mo tona ʼohoana ko Katie. Kotea ae neʼe nā fai ke nā leleiʼia te gaue ʼaia? Neʼe ui e Dan neʼe heʼeki maʼumaʼua feia. ʼE ʼi ai ʼona maʼua ʼi te kokelekasio. ʼE tokoni ki te ʼu tehina ke liliu ko ni tagata faifekau fakaminisitelio pea mo akoako ʼihi ke natou faifakamafola ki te hahaʼi ʼo te ʼu kolo lalahi peʼe ʼi te ʼu fale pilisoni. ʼU tehina mo tuagaʼane kua matuʼa pe ʼe kotou kau ki te selevisi temi katoa peʼe kailoa, kae ʼe feala pe ke kotou tokoni ki ʼihi. ʼO feafeaʼi? Kotou fakamamahani mo te gaue ʼae kua hinoʼi atu. Kotou faiga ke kotou fakahoko he tahi ʼu fakatuʼutuʼu. Pea kotou tokakaga tafito pe ki te ʼu meʼa ʼae ʼe kotou lavaʼi.
TE FIA MALALO
6. He koʼe ʼe lelei ke tou fia malalo? Tuku mai he faʼifaʼitaki.
6 Ko ia ʼae ʼe fia malalo, ʼe mahino ki ʼona tuʼakoi. (Taag. 11:2) ʼE ina iloʼi ʼe mole kei tatau leva he ʼe kua hifo tona vaivai. Koia ʼae ʼe tokoni ki ai ke fiafia tuʼumaʼu pea mo faʼafai. ʼE feala ke tou fakata he tahi ʼe fia malalo ki he tahi ʼe ina foe he motoka ʼi he mahake. ʼE maʼua anai ke ina fetogi tana vitesi ke hoko atu tana hake. ʼE alu mamalie anai, kae mole tuʼu anai te motoka. ʼE toe feia pe mo he tahi ʼe fia malalo. ʼE ina iloʼi te temi ʼae ke ina fai ai he ʼu fetogi mo kapau ʼe ina fia hoko atu tana gaue kia Sehova.—Flp. 4:5.
7. Neʼe fakaha feafeaʼi e Palesilai tana fia malalo?
7 Tou vakaʼi te faʼifaʼitaki ʼa Palesilai. Neʼe fakaafe e te Hau ko Tavite ia ia ki tona fale hau kae neʼe kua taʼu 80. ʼAki he loto fia malalo, neʼe fakafisi e Palesilai te fakaafe ʼa te Hau. Neʼe mahino ki ʼona tuʼakoi he neʼe kua vaivai. Koia neʼe palalau ai ki te Hau ko Tavite ke fili te tupulaga ko Kimame, ke ina fetogi ia ia (2 Sam. 19:35-37) Ohage ko Palesilai, ʼe fiafia te ʼu tehina matuʼa ʼi tanatou foaki ki te kau tupulaga he ʼu fealagia ke natou gaue ʼi te kokelekasio.
8. Neʼe fakaha feafeaʼi e te Hau ko Tavite tana fia malalo?
8 ʼE toe tuku mai e te Hau ko Tavite he faʼifaʼitaki lelei ʼo ʼuhiga mo te fia malalo. Neʼe kua ina loto ke ina laga he fale lotu ki tona ʼAtua. Kae neʼe fakaha age e Sehova ʼe tuku anai te pilivilesio ʼaia kia Salomone. Neʼe ina tali te tonu ʼaia pea neʼe lagolago malohi ki te laga ʼaia ʼo te fale lotu. (1 Klk. 17:4; 22:5) Neʼe mole manatu ia ʼe lelei age ke ina fai te gaue he ʼe kei tupulaga ia Salomone pea ʼe heʼeki mahino feʼauga ki te ʼu gaue. (1 Klk. 29:1) Neʼe iloʼi e Tavite ʼe fakalogo te laga ʼo te fale lotu ki te tapuakina ʼa Sehova. Kae ʼe mole fakalogo ia ki te ʼu taʼu ʼa natou ʼae ka natou fakahoko te gaue peʼe ki ʼonatou faiva. Ohage ko Tavite, ʼe hoko atu pe e te ʼu tehina mo tuagaʼane kua vaivai matuʼa te gaue ʼae neʼe hinoʼi natou ki ai. Pea ʼe natou iloʼi ʼe tapuakiʼi anai e Sehova te kau tupulaga ʼae neʼe natou fetogi natou.
9. Neʼe fakaha feafeaʼi e Shigeo tana fia malalo?
9 ʼE toe feia pe ʼi totatou temi, ʼe tou maʼu te ʼu faʼifaʼitaki lelei ʼo ʼuhiga mo te fia malalo. Tou talanoa kia Shigeo. ʼI te 1976, ʼi tona taʼu 30, neʼe kau ki he Komite ʼo Te Filiale. ʼI te taʼu 2004, neʼe ko ia te kootinatea. Hili ki ai ni tau, neʼe tokagaʼi e Shigeo ʼe mole kei tatau leva tona malohi pea ʼe mole kei ina fai ʼana gaue ohage ko te mahani. Neʼe palalau kia Sehova ki te faʼahi ʼaia, pea neʼe ina toe fakakaukauʼi te tupuʼaga ʼo tana loto ʼae ke fetogi ia ia e he tehina tupulaga. Ia aho nei, ʼe kei tokoni pe ia Shigeo ki te Komite ʼo Te Filiale kae ʼe mole kei kootinatea. Neʼe tou vakaʼi ʼi te ʼu Taag. 20:29.
faʼifaʼitaki ʼa Palesilai, mo te Hau ko Tavite pea mo Shigeo ia te agavaivai mo te fia malalo. Pea ʼe ha mai ai, ka fakaha e he tahi te ʼu kalitate ʼaia, ʼe mole ina tokagaʼi tafito anai te heʼeki fakapotopoto ʼa te kau tupulaga kae ki ʼonatou kalitate. ʼE hage kia ia ko hona ʼu kaugā gaue kae mole ko he ʼu tehina ʼe natou fakataupiepie.—TE LOTOFAKAFETAʼI
10. Kotea te manatu ʼa te ʼu tehina mo tuagaʼane matuʼa ʼo ʼuhiga mo te kau tupulaga?
10 ʼE hage pe ki te ʼu tehina mo tuagaʼane matuʼa te kau tupulaga ko he ʼu meʼa ʼofa mai ia Sehova. Pea ʼe natou lotofakafetaʼi ki te ʼu gaue ʼae ʼe natou fai. ʼE natou iloʼi logo la mole kei tatau tonatou malohi, kae ʼe natou falala ʼe hoko atu anai e te kau tupulaga te ʼu gaue ʼa te kokelekasio.
11. Ia Lute 4:13-16, kotea te faʼifaʼitaki lelei neʼe tuku e Naomi ki te ʼu tehina mo tuagaʼane matuʼa?
11 ʼE toe talanoa foki ʼi te Tohi-Tapu ki te faʼifaʼitaki lelei ʼo Naomi. ʼI tana kua finematuʼa, neʼe ina tali ke tokoni age he fafine kei finemui. ʼI te mate ʼo tana kiʼi tama, neʼe ina ui age kia Lute te ʼohoana ʼo tana kiʼi tama ke liliu ki tona famili. Kae neʼe mole fia siʼaki e Lute te faʼe ʼo tona ʼohoana. Neʼe fia alu pe ia mo ia ki Petelehemi pea neʼe tali e Naomi tana fia tokoni age. (Lute 1:7, 8, 18) Neʼe lahi ai te ʼu tapuakina neʼe nā maʼu. (Lau ia Lute 4:13-16.) Koia neʼe tuku mai e Naomi he faʼifaʼitaki lelei ki te ʼu tehina mo tuagaʼane matuʼa.
12. Neʼe fakaha feafeaʼi e Paulo tana lotofakafetaʼi?
12 Neʼe fakaha e Paulo tana lotofakafetaʼi ki te ʼu tokoni ʼae neʼe ina maʼu mai ʼona tehina mo tuagaʼane. Neʼe fakamalo ki te ʼu tehina mo tuagaʼane ʼo Filipe ki te ʼu koloa ʼae neʼe natou foaki age. (Flp. 4 :16) Neʼe toe fakaha e Paulo tana lotofakafetaʼi kia Timoteo ki tana tokoni age. (Flp. 2:19-22) Pea ʼi tona ʼave ki Loma, neʼe fakafetaʼi ki te ʼAtua ʼi tana fekauʼi age he ʼu tehina ke ʼomai ʼo fakalotomalohiʼi. (Gaue 28:15) Ko Paulo neʼe ko he tagata faʼafai. Neʼe haʼele ʼi ni ʼu kilometa mo faifakamafola pea mo fakalotomalohiʼi te ʼu kokelekasio. Kae neʼe mole fialahi ia, neʼe ina tali te tokoni ʼo ʼona tehina mo tuagaʼane.
13. ʼE fakaha feafeaʼi anai e te hahaʼi matuʼa tanatou lotofakafetaʼi?
13 ʼU tehina mo tuagaʼane kua matuʼa, kotou fakaha ki te kau tupulaga ʼe kotou fiafia ʼi takotou fakatahi mo natou ʼi te kokelekasio. Ka natou kole atu ke natou feʼaveʼaki koutou ʼi tanatou motoka mo fai ʼakotou fakatau peʼe ko he tahi age gaue, kotou tali fakafiafia. Kotou manatuʼi ʼe ko he faʼahiga fakaha atu e Sehova tona ʼofa. Kotou tokoni kia natou ke natou tuputupu ʼi te faʼahi fakalaumalie, pea ʼe feala ke kotou kaumeʼa lelei mo natou. ʼE kotou fiafia anai ʼi takotou sio ki tanatou lagolago lelei ki te kokelekasio. Kotou toʼo he temi ke kotou fakatahi ai mo natou pea mo fakamatala age tokotou maʼuli. Kapau ʼe kotou fai feia, ʼe kotou ‘lotofakafetaʼiʼ kia Sehova tana taki mai he kau tupulaga lotolelei mo fia gaue ki te kokelekasio.—Kol. 3:15; Soa. 6:44; 1 Tes. 5:18.
TE LOTOFOAKI
14. Neʼe fakaha feafeaʼi e te Hau ko Tavite tana lotofoaki?
14 ʼE ha ʼi te faʼifaʼitaki ʼa te Hau ko Tavite, ʼe maʼuhiga ki te ʼu tehina mo tuagaʼane matuʼa ke natou fakaha he tahi age kalitate. Ko te kalitate ʼaia ʼe ko te lotofoaki. Neʼe foaki e Tavite he meʼa ʼofa maʼuhiga moʼo tokoni ki te laga ʼo te fale lotu. Ko te meʼa ʼofa ʼaia, neʼe ina toʼo mai ʼona koloa. (1 Klk. 22:11-16; 29:3, 4) Kae neʼe iloʼi e Tavite ʼe ui pe anai ko tona foha ko Salomone ʼae neʼe ina laga te fale lotu. Kapau ʼe mole kei tou maʼu he malohi feʼauga ke tou kau ki te ʼu laga fale, ʼe feala pe ke tou lagolago ʼaki ʼatatou meʼa ʼofa ʼo mulimuli ki ʼotatou fealagia. Pea ʼe feala ke maʼu e te kau tupulaga he ako mai ai.
15. Neʼe fakaha feafeaʼi e Paulo tana lotofoaki kia Timoteo?
15 ʼE toe tuku mai e Paulo he faʼifaʼitaki lelei ʼo ʼuhiga mo te lotofoaki. Neʼe ina fakaafe ia Timoteo, ʼae neʼe kei tupulaga, ke kaugā alu mo ia ʼi ʼana folau fakamisionea. Pea neʼe ina fakaha age kia ia ʼana faʼahiga faifakamafola mo faiakonaki. (Gaue 16:1-3) Ko tana akoako ʼaia ia Timoteo neʼe tokoni ke faiva ʼi te faifakamafola pea mo te faiakonaki. (1 Ko. 4:17) Pea neʼe toe fakaha e Timoteo ki niʼihi te ʼu faʼahiga gaue ʼa Paulo.
16. He koʼe neʼe akoako e Shigeo te tahi atu ʼu tehina?
16 ʼE mole tuʼania te ʼu tehina matuʼa naʼa mole toe fakaʼaogaʼi natou ʼi te kokelekasio. Kotea tona tupuʼaga? He ʼe natou akoako te kau tupulaga ke natou fai ni gaue neʼe natou fai mahani. Ohage la, ko Shigeo ʼae neʼe tou talanoa ki ai ʼi te kamata, neʼe ina akoako ʼihi ʼo te Komite ʼo Te Filiale, ʼae kei tupulaga age ia ia. Neʼe ina fai te faʼahi ʼaia ke tokoni ki te ʼu gaue ʼo te Puleaga ʼi tona fenua. Koia ʼi te temi ʼae neʼe mole kei feala ai ke kootinatea, neʼe fetogi leva ia ia e he tehina neʼe lelei tona akoako. Neʼe kau ia Shigeo ʼi te Komite ʼo Te Filiale lolotoga taʼu ʼe 45 tupu. Pea neʼe hoko atu pe tana fakaʼaogaʼi te ʼu faʼahi ʼae neʼe ina ako moʼo tokoni ki ʼihi tupulaga. Ko te ʼu tehina ʼae ʼe hage ko Shigeo ʼe tokoni moʼoni ki te hahaʼi ʼa te ʼAtua.
17. Kotea te ako ʼe maʼu e te kau matuʼa ia Luka 6:38?
17 ʼU tehina mo tuagaʼane kua matuʼa, ʼe kotou fakaha takotou tui mo agatonu kia Sehova ʼi tokotou maʼuli. Pea ko te faʼahiga maʼuli Luka 6:38.
lelei pe ʼaia. ʼAki takotou faʼifaʼitaki, ʼe kotou fakaha ai te maʼuhiga ʼae ke tou ako pea mo maʼuliʼi te ʼu pelesepeto Fakatohi-tapu. Neʼe lahi te ʼu faʼahi neʼe kotou ako kae neʼe kotou mahino ʼe ʼaoga ke kotou tali te ʼu fetogi ʼae kua hoko. Pea ʼe feia pe mo koutou, ʼu tehina mo tuagaʼane matuʼa neʼe heʼeki fualoa takotou papitema. ʼE lahi te ʼu gaue ʼe feala ke kotou fai. Ohage la, ʼe feala hakotou fakamahino kia natou ʼae kei tupulaga pe koʼe ʼe natou fiafia moka ʼe natou ako ke natou iloʼi ia Sehova ia aho nei. ʼE natou fiafia anai ʼi te fagono ki takotou fakamatala te ʼu aluʼaga ʼae neʼe hoko ʼi tokotou maʼuli pea mo te ʼu ako maʼuhiga neʼe kotou maʼu mai ai. Pea ʼe ko he koloa maʼuhiga ia te ʼu faʼahi ʼae neʼe kotou maʼu. Kapau ʼe ko hakotou agamahani te vaevae te ʼu koloa ʼaia mo ʼihi, ʼe lahi anai te ʼu tapuakina ʼe kotou maʼu mai ia Sehova.—Lau ia18. ʼE feala ke fetokoniʼaki feafeaʼi te ʼu tehina mo tuagaʼane matuʼa mo te kau tupulaga?
18 Naʼi tehina mo tuagaʼane matuʼa, kotou fakaovi ki te kau tupulaga. ʼE kotou maʼu ai anai ni fua lelei ʼo feia pe mo natou. (Loma 1:12) ʼE feala ke kotou fetokoniʼaki. ʼE lahi te ʼu aluʼaga neʼe hoko ʼi te maʼuli ʼa te ʼu tehina mo tuagaʼane matuʼa ʼo natou liliu ai ʼo fakapotopoto. Kae ko te kau tupulaga ʼe kei natou malolohi. Koia kapau ʼe kotou gaue fakatahi pea mo felogoi lelei, pea ʼe kotou vikiʼi ai tatatou Tamai ʼae ʼe ʼi selo pea mo fua lelei ai ki te kokelekasio.
KATIKO 90 Tou Fefakalotomalohiʼaki
^ pal. 5 ʼE tou fiafia ʼi tatatou maʼu ʼi ʼatatou kokelekasio he kau tupulaga mo he kau finemui ʼe lagolago malohi ki te kautahi ʼa Sehova. ʼE natou ʼomai mai ni fenua kehekehe. Pea ʼe feala ke tokoni te kau matuʼa ki te kau tupulaga ʼaia ʼe natou fia gaue malohi maʼa Sehova.
^ pal. 55 FAKAMATALA ʼO TE ʼU PĀKI: Ko he tehina taupau ʼo te siliko kua taʼu 70. Neʼe hinoʼi ia ia mo tona ohoana ki he tahi age gaue. Neʼe lahi te ʼu faʼahi neʼe nā ako ʼi tonā maʼuli koia ʼe feala ai ke nā akoako ni tehina mo tuagaʼane ʼo tanā kokelekasio foʼou.