ALATIKE AKO 35
Tou Fakamaʼuhiga’i Te Kau Matuʼa ʼo Te Kokelekasio
“Ko te ulu hina ko he kolona o te mauhiga”—TAAG. 16:31.
KATIKO 138 Te Matalelei ’o Te ’u ’Ulu Hina
TE ʼU MANATU FAKANOUNOU *
1-2. (1) Ia Taaga Lea 16:31, ʼe tou fakaʼuhiga feafeaʼi te kau matu’a? (2) Kotea te ʼu fehuʼi ka tali ki ai te alatike ʼaeni?
ʼI ARKANSAS, ʼi Amelika, ’e tu’u ai he haʼeleʼaga ʼo te hahaʼi pea ʼe feala tau maʼu ai ni maka maʼuhiga. Kae ʼe he’eki fakama’a ke matalelei. Koia, tokolahi ’e natou fakalaka ʼi ai kae ’e mole natou tokagaʼi te maʼuhiga ’o te ’u maka ʼaia.
2 Koia, ʼe maʼuhiga ʼaupito te kau matuʼa ʼo te kokelekasio ohage pe ko te ʼu maka maʼuhiga ʼaia. Pea ʼe fakata ʼi te Tohi-Tapu ia natou ʼe ʼulu hina ki he kolona. (Lau ia Taaga Lea 16:31; 20:29.) Kae ʼe feala pe ke mole tou fakamaʼuhiga’i natou. Ka mahino te kau tupulaga ʼe maʼuhiga te kau matuʼa, pea ʼe lahi age anai te ʼu ako ka natou maʼu. ʼI te alatike ʼaeni, ʼe tou tali anai kia fehuʼi ʼe tolu: He koʼe ʼe fakamaʼuhiga’i e Sehova ʼana kaugana kua matuʼa? Kotea te gaue ne’e ina fakatu’utu’u ke natou fai ’i tana kautahi? Pea kotea te ako ʼe feala ke tou maʼu mai ʼanatou faʼifaʼitaki?
HE KOʼE ʼE NATOU MAʼUHIGA KIA SEHOVA?
ʼE maʼuhiga te ’u tehina mo tuaga’ane matu’a kia Sehova mo te kokelekasio (Vaka’i te palakalafe 3)
3. Ia Pesalemo 92:13-16, he koʼe ’e ʼofa ʼaupito ia Sehova ʼi te ʼu tehina mo tuaga’ane matu’a?
3 ʼE ʼofa ʼaupito ia Sehova ʼi te kau matu’a he ’e natou tauhi agatonu kia te ia. ʼE ina iloʼi mo’oni natou, pea ’e toe mahino ki ʼonatou kalitate. Neʼe maʼu e te kau matuʼa te poto ʼi tanatou tauhi kia te ia ʼi tonatou maʼuli. Koia ’e fiafia ia Sehova moka natou vaevae mo te kau tupulaga. (Sopo 12:12; Taag. 1:1-4) ’E toe maʼuhiga kia te ia tanatou fa’a kataki. (Mala. 3:16) Ne’e mole natou hao ʼi te ’u faigata’aʼia ’o te maʼuli, kae ne’e mole vaivai ai tanatou tui. Ne’e toe malohi age tanatou ʼamanaki ’i te ʼaho ʼae ne’e natou iloʼi ai te mo’oni. Pea ʼe ʼofa Sehova ia natou koteʼuhi ʼe kei natou haga tala pe tona huafa ‘ ʼi tonatou temi matu’a.’—Lau ia Pesalemo 92:13-16.
4. Kotea te ʼu aluʼaga ʼe fakalotomalohiʼi ai ʼotatou tehina mo tuagaʼane kua matu’a?
4 Kapau kua ke matuʼa, ke ke manatuʼi ’e mole galoʼi e Sehova ʼau gaue ’i muʼa atu. (Hep. 6:10) Ne’e ke lagolago mo fa’afai ’i te minisitelio, pea ʼe ina manatuʼi mo fiafia ai. Ne’e ke kataki’i te ’u aluʼaga faigata’a, ʼo kau ai ia natou neʼe natou fakamamahiʼi koe. Ne’e ke fakalogo mo tauʼi te ’u mo’oni ’o te Tohi-Tapu. Pea ne’e ke fakahoko te ’u gaue maʼuhiga ’i te kokelekasio pea mo akoako ʼihi. Ne’e ke faiga’i ke ke mulimuli lelei ki te ’u fetogi ne’e hoko ’i te kautahi ’a Sehova. Pea ne’e ke lagolago mo fakalotomalohi’i ia natou ʼae ne’e tauhi temi katoa kia Sehova. ’E ofa mamahi Sehova kia koe ʼuhi ko tau nofo agatonu kia te ia. Pea ne’e ina ui ‘ ʼe mole ina siʼaki anai tana kau agatonu.’ (Pes. 37:28) ʼE ina fai atu te fakapapau ʼaeni: ‘ ʼE au tokoni anai kia koutou ’o kaku ki tokotou ʼulu hina.’ (Esa. 46:4) Kae ʼaua leva na’a ke manatu kua ke matuʼa, pea ʼe mole kei ʼi ai hou ʼaoga. Kailoa ia, ʼe ke maʼuhiga.
ʼE NATOU MAʼUHIGA KI TE KAUTAHI ʼA SEHOVA
5. Kotea ʼe tonu ke manatuʼi e te ’u tehina mo tuaga’ane matu’a?
5 ʼE maʼuhiga ʼaupito ʼotatou tehina mo tuaga’ane matu’a ʼi te kautahi ʼa Sehova. ʼE moʼoni, ʼe mole kei natou malolohi ohage ko te temi mu’a. Kae ’e maʼuhiga ʼaupito te ’u gaue ʼae ne’e natou fai. ʼE kei hoko atu pe tonatou faka’aogaʼi e Sehova ia aluʼaga kehekehe. Pea ʼe tou vakaʼi anai te ʼu faʼifaʼitaki ʼo ʼana kaugana ʼi te temi muʼa pea mo te temi nei.
6-7. Ne’e tauhi agatonu koa ʼihi kia Sehova ʼo aʼu ki tonatou temi matuʼa? Tuku mai ni faʼifaʼitaki.
6 ’E talanoa ʼi te Tohi-Tapu ki ni tagata mo ni fafine ne’e tauhi agatonu kia Sehova ’o a’u ki tonatou temi matuʼa. Ohage la ko Moisese, neʼe teitei taʼu 80 ʼi tona filifili e Sehova ko tana polofeta, pea ke ina taki te puleʼaga ’o Iselaele. Ko te polofeta ko Taniela ne’e ko tana tagata ʼave logo kae ne’e kua ta’u
90 tupu. Pea neʼe taʼu 90 tupu te apositolo ko Soane ’i tana tohi ia te tohi ’o Fakaha.7 Ne’e mole fa’a iloʼi ʼihi kaugana agatonu ’a Sehova ’o feia mo tanatou tui. Kae, ne’e tokagaʼi e Sehova tanatou agatonu, ’o ina fakapale ai natou. Ohage la, ʼe mole lahi te palalau ʼi te Tohi-Tapu kia Simeone, ʼae “neʼe faitotonu pea mo manavasi’i.” Kae ne’e iloi lelei e Sehova ia ia. Neʼe ina foaki age te pilivilesio ʼae ke sio kia Sesu kei veliveli pea mo tala he lea fakapolofeta ki te ki’i fanau pea mo tana faʼe. (Luka 2:22, 25-35) Ne’e toe tokagaʼi e Sehova ia te fafine polofeta vitua ko Ana. Neʼe ta’u 84 kae “ne’e mole puli ʼi he temi ’i te fale lotu.” Ne’e tapuakinaʼi e Sehova ia ia he neʼe alu tuʼumaʼu ki te fale lotu pea neʼe ina tuku ke sio kia Sesu kei veliveli. ʼEi, ne’e ʼofa mamahi ia Sehova kia Simeone pea mo Ana.—Luka 2:36-38.
ʼE kei haga tauhi agatonu pe te tuaga’ane ko Didur kia Sehova, ’i tona ta’u 81 (Vaka’i te palakalafe 8)
8-9. Kotea te faʼifaʼitaki lelei ’e tuku mai e te ’u tuaga’ane vitua?
8 ʼI totatou temi, tokolahi te ’u tehina mo tuaga’ane matu’a ʼe natou tuku he fa’ifa’itaki lelei ki te kau tupulaga. Tou palalau muʼa ki te tuaga’ane ko Lois Didur. Ne’e pionie makehe ʼi tona ta’u 21, ’i Canada. Pea ne’e fualoa ʼosi tana gaue mo tona ʼohoana ko John ʼi te siliko. Ki muli age, ne’e nā gaue ʼi te Petele ʼo Canada ia ta’u ʼe 20 tupu. ʼI tona ta’u 58, ne’e fakaui age ke nā olo ʼo gaue ʼi Ukraine. Kotea ka nā fai? ʼE nā ui anai koa kua nā matu’a fau ʼi te olo ʼo maʼuli ’i he tahi fenua? Kailoa ia, kae ne’e nā tali atu aipe. Pea neʼe hino’i ia John ke kau ki te Komite ʼo te Filiale ʼo te fenua ʼaia. Pea hili pe ki ai ta’u ’e 7 ne’e mate leva ia John, kae neʼe fakatuʼutuʼu pe e Loïs ke nofo ʼi Ukraine. ʼI temi nei, kua ta’u 81 pea ʼe kei kau pe ki te famili ’o te Petele ’o Ukraine. ʼE kei hoko atu pe tana fa’afai ’i te mo’oni mo tona ʼofa’inaʼi e te ’u tehina mo tuaga’ane.
9 Ohage ko Lois, ʼe lagi mole kei fa’a tokagaʼi ʼihi tuaga’ane ’i te temi nei ʼi te kua mamate ’o ʼonatou ʼohoana. Kae ʼe mole ui leva ’e mole kei natou maʼuhiga he ʼe kua natou vitua. ’E maʼuhiga ʼaupito kia Sehova te ’u tuaga’ane ʼaia ne’e lagolago ki ʼonatou ʼohoana lolotoga ni ta’u, pea ʼe kei hoko atu pe tanatou tauhi kia te ia. (1 Tim. 5:3) Pea ʼe natou toe fakalotomalohiʼi te kau tupulaga.
10. Ko te fa’ifa’itaki lelei fea ne’e tuku mai e Tony?
10 ’E toe maʼuhiga ʼaupito te ’u tehina mo tuaga’ane matu’a ʼae ’e maʼu’uli ’i te ’u fale vaivai. Ohage la ko Tony. Ne’e papitema ’i ʼAukusito 1942 ’i Pennsylvanie, ’i Amelika. Neʼe ko tona ta’u 20 ʼaia. Hili pe ki ai, ne’e pilisoni ta’u lua vaelua ʼuhi ko tana fakafisi ki te solia. Neʼe ʼohoana mo Hilda, pea neʼe nā akoʼi ʼanā fanau ʼe toko lua ʼi te mo’oni. Ne’e taupau pelesita ’i te ’u kokelekasio ’e tolu (ʼi temi nei ko te kootinatea ’o te kolesi ʼo te kau tagata ʼafeā), pea ne’e toe taupau fakasiliko. Ne’e
toe tokaga foki ki te fai ʼo te ’u fono mo ni ako Tohi-Tapu ’i te fale pilisoni. ’I te temi nei, kua ta’u 98 pea ʼe kei hoko atu pe tana gaue maʼa Sehova. ʼE ina fai ia meʼa fuli maʼa Sehova pea mo kau tu’umaʼu ki te ’u gaue ’o tana kokelekasio.11. ʼE tou fakaha feafea’i ’e tou manatuʼi te ʼu tehina mo tuaga’ane, ʼae ’i te ’u fale vaivai?
11 ʼE tou fakaha feafea’i ’e tou manatuʼi te ʼu tehina mo tuaga’ane, ʼae ’i te ’u fale vaivai? ʼE feala ke foaki age e te kau tagata ʼafeā hanatou ʼu gaue ʼi te kokelekasio. Pe ʼe tou olo ’o ʼa’ahi pe’e faipalalau mo natou ’i te neti. Tou tokaga lelei kia natou ʼae ’e nonofo ʼi he fale vaivai ʼe tuʼu mamaʼo mai tanatou kokelekasio. ʼAua na’a tou galoʼi ia natou ʼaia. ʼE lagi ʼe ʼi ai ʼihi ia natou ʼaia ʼe ufiufi ʼi te palalau ki tonatou maʼuli. Kae tou to’o he temi ke tou faipalalau mo fai ni fehuʼi kia natou. Pea tou fagono lelei ki te ʼu fakamatala fakafiafia neʼe natou logoʼi ’i tanatou tauhi kia Sehova. ʼE mahino ia, ʼe tou maʼu ai ni fakalotomalohi.
12. Kotea ’e tou mahino ki ai moka tou iloʼi lelei te kau matu’a ’o te kokelekasio?
12 Ka tou iloʼi lelei te ’u tehina mo tuaga’ane matu’a, ʼe tou fiafia ʼi tatatou iloʼi te malohi ʼo tanatou tui. Ohage la, ko Harriette ne’e kua fualoa tana tauhi agatonu kia Sehova ’i tana kokelekasio, ʼi New Jersey, ʼi Amelika. Kae ’i te tahi ʼaho, ne’e alu leva ʼo nofo ʼi tana kiʼi taʼahine. Neʼe faiga te ʼu tehina mo tuaga’ane ’o tana kokelekasio fo’ou ke natou iloʼi lelei ia ia. Pea neʼe natou mahino ai neʼe maʼuhiga ʼaupito. Ne’e ina fakalotomalohi’i ai natou. Neʼe ina fakamatala age te aluʼaga ne’e hoko ki ai ʼi tana minisitelio, ʼi te ʼu ta’u 1920. Ko te temi ʼaia ne’e ina maʼu ai te mo’oni. Ka alu ʼo faifakamafola, ’e alu tu’umaʼu mo tana polosi fulu nifo na’a meʼa hala age pe ’e puke e te kau polisi. Pea ne’e hoko te faʼahi ʼaia, ’i te 1933, ne’e tuʼa lua tona puke ʼo nofo vahaʼa katoa ʼi te pilisoni. ʼI te ’u temi ʼaia, ne’e lagolago kia ia tona ʼohoana ʼae neʼe mole ko he Fakamo’oni ’a Sehova. Neʼe tokaga ki ʼanā fanau ’e toko tolu. ʼEi, ʼe tuku mai e ’otatou tehina mo tuagaʼane matu’a ni fa’ifa’itaki lelei. Pea ʼe tuha mo natou ke tou fakamaʼuhigaʼi ohage pe ko Harriette.
13. He koʼe ’e maʼuhiga ʼaupito te kau matu’a ki te kautahi ’a Sehova?
13 ʼE maʼuhiga ʼaupito ʼotatou tehina mo tuagaʼane matu’a kia Sehova mo tana kautahi. Neʼe natou sisio ki te tapuakina’i e Sehova tana hahaʼi ʼo feia pe mo natou ’i he ’u aluga kehekehe. Pea ne’e natou taʼofi ni ako ’i te ’u lakahala ʼae ne’e natou fai. Koia ke ke faka’uhiga natou ko ni “matapuna o te poto,” pea mo ke ako mai ʼanatou faʼifaʼitaki. (Taag. 18:4) Ka ke faiga ke ke iloʼi lelei natou, ’e malohi anai tau tui, pea ’e lahi anai te ʼu ako ʼe ke taʼofi mai ai.
TE ’U AKO ’E TOU MAʼU MAI ʼANATOU FAʼIFAʼITAKI
Ne’e fiafia ia Eliseo ’i tana fakatahi mo Elia. ʼE tou toe maʼu ni ako moka ʼe tou fagono lelei ki te ’u fakamatala ’a natou ʼae kua fualoa tanatou tauhi kia Sehova (Vaka’i te palakalafe 14-15)
14. Ka tou lau ia Tetelonome 32:7, kotea ’e ina uga tatou ke tou fai?
14 Ke ke faiga ke ke faipalalau mo te ’u tehina mo tuaga’ane matu’a. (Lau ia Tetelonome 32:7.) ʼE lagi kua natou ga’ega’e mo vaivai ’i te fa’ahi fakasino, kae ʼe kei natou faʼafai pe ʼi te tauhi kia Sehova. Pea ’e natou maʼu ai he “matagafua ’e lelei” ia mua ’o Sehova. (Ekl. 7:1, NWT) Manatuʼi koe pe koʼe ’e natou maʼuhiga kia Sehova. Pea haga hoko atu pe tau faka’apa’apa’i natou. ʼE feala hau faʼifaʼitakiʼi ia Eliseo. Ne’e faiga malohi ke nofo mo Elia ’i te ʼaho fakaʼosi ’i muʼa ’o tana mavae. Neʼe tu’a tolu tana ui fenei age: “E mole au mavae anai ia koe.”—2 Hau 2:2, 4, 6.
15. Kotea te ’u fehuʼi ʼe feala ke tou fai ki ʼotatou tehina mo tuaga’ane matu’a?
Taag. 1:5; 20:5; 1 Tim. 5:1, 2) Ohage la, ʼe feala ke ke fehuʼi fenei age kia natou: “’I tou temi tupulaga, he koʼe neʼe ke tui papau kua ke maʼu te mo’oni?” “Kotea ʼae ne’e ina uga koe ke ke fakaovi kia Sehova ʼi tou maʼuli?” “Kotea la ’e tonu ke kita fai ke kita fiafia tu’umaʼu ’i te tauhi kia Sehova?” (1 Tim. 6:6-8) Hili ai, pea ke fagono lelei ki tanatou fakamatala atu tonatou maʼuli.
15 Fakaha ki ʼou tehina mo tuagaʼane matu’a ’e ke tokaga’i mo’oni natou. Ke ke fai age ni fehuʼi kia natou mo he fakaʼapaʼapa. (16. Kotea ʼe hoko moka faipalalau he tehina peʼe tuagaʼane kua matuʼa mo he tupulaga?
16 Ka ke to’o hou temi ke ke faipalalau ai mo he tehina peʼe ko he tuagaʼane kua matuʼa, ’e kolua fefakalotomalohiʼaki anai. (Loma 1:12) ’E ke tokagaʼi anai te tokaga ’a Sehova ki ʼana kaugana agatonu. Kae ’e ina logo’i anai tona fakamaʼuhiga’i. ’E fiafia anai ’i te fakamatala atu te ’u tapuakina ne’e ina maʼu mai ia Sehova.
17. He koʼe ʼe tou ui ʼe maʼuhiga ʼotatou tehina mo tuagaʼane kia Sehova?
17 ʼAki te temi, ko te matalelei ’o te sino ’e puli mamalie, kae ko natou ʼae ’e agatonu ’e natou maʼuhiga kia Sehova. (1 Tes. 1:2, 3) He koʼe ’e tou ui te faʼahi ʼaia? Koteʼuhi ʼaki te temi ne’e natou tuku te laumalie maʼoniʼoni ke ina akoʼi natou pea ke tokoni kia natou ke natou maʼu ni kalitate matalelei. Koia, tou ako ke tou iloʼi lelei ʼotatou tehina mo tuaga’ane matu’a. Kapau ʼe tou fai feia, pea ʼe toe lahi age tatatou faka’apa’apa’i natou mo maʼu ni ako mai ʼanatou faʼifaʼitaki lelei. Pea ’e tou toe tokagaʼi ai ’e natou maʼuhiga ʼaupito.
18. Kotea ka tou vakaʼi ’i te alatike ka hoa mai?
18 Kapau ʼe tou loto ke logo tahi pea mo malohi he kokelekasio, ’e tonu ki te kau tupulaga ke natou faka’apa’apa kia natou kua matu’a. Kae ʼe tonu foki kia natou matu’a ke natou toe mahino ki te ʼaoga ʼo te kau tupulaga, pea ke natou fakamaʼuhigaʼi ia natou. Pea ko te faʼahi ʼaia ka tou vakaʼi ’i te alatike ka hoa mai.
KATIKO 144 Haga Sio Ki Te Totogi
^ pal. 5 ’E maʼuhiga ʼaupito te kau matuʼa. ʼI te ʼalatike ʼaeni, ’e ina fakalotomalohi’i tatou ke lahi age totatou ʼofa mo fakaʼapaʼapa kia natou. ʼE tou vakaʼi ai anai pe kotea te ʼu ako ʼe tou taʼofi mai tanatou kua fakapotopoto mo te ʼu aluʼaga neʼe hoko ʼi tonatou maʼuli. Pea ʼe toe tokoni anai kia natou ke natou iloʼi ʼe natou maʼuhiga ’i te kautahi ’a Sehova.