“Ko Ai ʼAe ʼe Kau Mo Sehova?”
“Ko Sehova tou ʼAtua ʼae ʼe tonu ke ke manavasiʼi ki ai. Ko ia ʼae ʼe tonu ke ke tauhi ki ai, pea ko ia ʼae ʼe tonu ke ke pipiki ki ai.”—TETELONOME 10:20, MN.
1, 2. (1) He koʼe ko he aga fakapotopoto tatatou kau mo Sehova? (2) Kotea ʼae ka tou talanoa anai ki ai ʼi te alatike ʼaeni?
ʼE KO he aga fakapotopoto hatatou nonofo ovi kia Sehova. He ʼe mole he fakatatau ʼo tona malohi, mo tona poto pea mo tona ʼofa. Pea ʼe mahino ia, ʼe tou fia nofo agatonu tuʼumaʼu kia te ia mo tou haga kau mo ia. (Pesalemo 96:4-6) Kae neʼe mole fai te faʼahi ʼaia e ʼihi kau atolasio ʼa te ʼAtua.
2 ʼI te alatike ʼaeni, ʼe tou talanoa anai ki te ʼu faʼifaʼitaki ʼo niʼihi neʼe natou ui ʼe natou kau mo Sehova, kae natou lolotoga fai te ʼu meʼa ʼae ʼe fehiʼa ki ai Sehova. ʼE tou taʼofi anai he ʼu ako maʼuhiga mai te ʼu faʼifaʼitaki ʼaia, pea ʼe tokoni mai anai ke tou nonofo agatonu kia Sehova.
ʼE SIVISIVI E SEHOVA TOTATOU LOTO
3. He koʼe neʼe faigaʼi e Sehova ke tokoni kia Kaino, pea kotea te ʼu palalau ʼae neʼe Ina fai ki ai?
3 Tou fakakaukauʼi pe kotea ʼae neʼe hoko kia Kaino. Logo la neʼe mole atolasio ki te ʼu ʼatua hala, kae neʼe mole tali e Sehova ia tana tauhi. Kotea tona tupuʼaga? Neʼe mole lelei te ʼu faʼahi ʼae 1 Soane 3:12) Neʼe fakatokaga fenei Sehova kia Kaino: “Kapau ʼe ke fai te meʼa ʼae ʼe lelei, ʼe mole hoko anai koa he hikihiki? Kae kapau ʼe mole ke fai te meʼa ʼae ʼe lelei, ʼe nono te agahala ʼi te huʼaga, pea ʼe haga atu tona holi kia koe; pea ko koe, ʼe ke pule anai koa ki ai?” (Senesi 4:6, 7, MN) Neʼe fakaha lelei e Sehova, kapau neʼe fakahemala ia Kaino pea mo filifili ke kau mo te ʼAtua, ʼe nofo anai ia mo Kaino.
neʼe sio ki ai Sehova ʼi te loto Kaino. (4. Kotea ʼae neʼe fai e Kaino ʼi tana maʼu te faigamalie ʼae ke kau mo Sehova?
4 Ka na neʼe fetogi e Kaino ia tana faʼahiga manatu, ʼe toe tali anai e Sehova ia tana tauhi. Kae neʼe mole fakalogo ia Kaino ki te ʼAtua, ʼo ina fai ai he ʼu aga ʼe kovi ʼuhi he neʼe mole lelei ʼana manatu mo ʼona holi totonu. (Sakopo 1:14, 15) ʼE mahino ia, ʼi te kei tupulaga ʼa Kaino neʼe lagi mole ʼamanaki tuʼa tahi ʼe fakafeagai anai kia Sehova. Kae ʼi te temi leva ʼaia, neʼe kua ina meʼa noaʼi te ʼu fakatokaga ʼa te ʼAtua, mo agatuʼu ki te ʼAtua pea neʼe ina matehi tona tehina totonu.
5. Kotea te ʼu faʼahiga manatu ʼae ʼe feala ai ke puli ia tatou te ʼofa ʼo Sehova?
5 Ia ʼaho nei, ʼe feala pe ke ui e he Kilisitiano ʼe atolasio kia Sehova kae ina lolotoga fai te ʼu meʼa ʼae ʼe fehiʼa ki ai Sehova ohage pe ko Kaino. (Suta 11) ʼE lagi faʼa fai ʼi te faifakamafola mo fono tuʼumaʼu. Kae ʼe lagi ina tuku ke puleʼi tana faʼahiga fakakaukau e ʼana manatu heʼe ʼaoga, ʼana manatu manumanū, peʼe ko tona lotofehiʼa. (1 Soane 2:15-17; 3:15) ʼE feala ke iku te ʼu faʼahiga manatu ʼaia ki te agahala. ʼE moʼoni, ʼe lagi mole iloʼi e ʼihi pe kotea ʼae ʼe tou fai peʼe ko ʼatatou manatu, kae ʼe iloʼi ia e Sehova. Koia ʼe ina iloʼi mo kapau ʼe mole tou kau mo ia.—Lau ia Selemia 17:9, 10.
6. ʼE tokoni feafeaʼi mai ia Sehova ke tou malo ʼi ʼotatou holi ʼae ʼe kovi?
6 Maʼia pe ʼe tou fai he ʼu lakahala, kae ʼe mole foimo liʼaki atu aipe tatou e Sehova. Kapau ʼe tou olo ʼi he ala ʼe fakatupu tuʼutamaki, ʼe ui fenei mai e Sehova: “Koutou toe liliu mai kia au, pea e au toe liliu mai anai kia koutou.” (Malakia 3:7) ʼE iloʼi e Sehova ʼe tou tauʼi fuli ʼotatou vaivaiʼaga. ʼE ina loto ke tou liliu ʼo malohi pea ke tou tauʼi te meʼa ʼae ʼe kovi. (Esaia 55:7) Kapau ʼe tou fai feia, ʼe ina fakapapauʼi mai ʼe tokoni mai anai, ʼo ina foaki mai te malohi ke feala hatatou malo ʼi ʼotatou holi ʼae ʼe kovi.—Senesi 4:7, MN.
ʼAUA NAʼA KAKAʼI TATOU
7. Neʼe puli feafeaʼi te fakakaumeʼa ʼa Salomone mo Sehova?
7 Neʼe maʼu e Salomone he ʼu felogoi lelei mo Sehova ʼi tana kei tupulaga. Neʼe foaki e te ʼAtua kia Salomone ia te poto pea ina toe foaki age mo he gaue maʼuhiga, ko te laga ʼo te fale lotu taulekaleka ʼo Selusalemi. Kae neʼe puli leva te fakakaumeʼa ʼa Salomone mo Sehova. (1 Hau 3:12; 11:1, 2) Neʼe tuʼu ʼi te lao ʼa te ʼAtua ʼe mole tonu ke nonofo he tagata mo “ni ohoana kaugamalie, o tupu naa maliu anai tona loto mai [ia Sehova].” (Tetelonome 17:17) Neʼe talagataʼa ia Salomone ki te lao ʼaia. Neʼe ko ʼona ʼohoana ʼe 700 pea toe nonofo mo ʼihi fafine ʼe 300. (1 Hau 11:3) Tokolahi ʼi te ʼu fafine ʼaia neʼe ko he ʼu matapule pea neʼe natou tauhi ki te ʼu ʼatua hala. Koia neʼe toe talagataʼa ia Salomone ki te lao ʼa te ʼAtua ʼae ʼe ui ai ke ʼaua te ʼohoana mo he ʼu fafine matapule.—Tetelonome 7:3, 4.
8. Neʼe fakamamahiʼi feafeaʼi e Salomone ia Sehova?
8 Neʼe puli mamalie pe te leleiʼia e Salomone te ʼu lao ʼa Sehova. ʼAki te temi neʼe ina fai 1 Hau 11:5-8; 2 Hau 23:13) Neʼe faihala ia Salomone he ʼe lagi ʼi tana manatu, ʼe mole tokagaʼi anai e Sehova te ʼu faʼahi ʼaia, ʼuhi ko tana kei momoli te ʼu faisakilifisio ʼi tona fale lotu.
ai he ʼu hala mamafa. Neʼe ina faʼu he ʼaletale maʼa te ʼatua fafine ko Asetalate mo te tahi ki te ʼatua hala ko Kemosi, pea neʼe atolasio fakatahi mo ʼona ʼohoana ki te ʼu ʼatua hala ʼaia. Neʼe fakatuʼu e Salomone te ʼu ʼaletale ʼaia ʼi he moʼuga ʼe haga ifo pe ki Selusalemi, te kolo ʼae neʼe ina fakatuʼu ai te fale lotu ʼo Sehova. (9. Kotea te ʼu nunuʼa ʼo te talagataʼa ʼa Salomone ki te ʼAtua?
9 Kae ʼe mole meʼa noaʼi e Sehova ia te agahala ʼi he temi. ʼE ui fenei ʼi te Tohi-Tapu: “Neʼe ita Sehova kia Salomone, he ʼe ko tona loto neʼe kua mamaʼo mai ia Sehova.” Neʼe faigaʼi e te ʼAtua ke tokoni kia Salomone. Neʼe “ ʼasi tuʼa lua age [ia Sehova] kia ia, pea ʼo ʼuhiga mo te faʼahi ʼaia, neʼe ina fakatotonu age ke ʼaua tana mulimuli ki ʼihi ake ʼatua. Kae neʼe mole fakalogo ia ki te fakatotonu ʼa Sehova.” Koia neʼe mole kei ʼofa mo lagolago te ʼAtua ki ai. Neʼe mole fakagafua e Sehova ke nofo hau te hakoga ʼo Salomone ki Iselaele katoa, pea neʼe natou fetaulaki mo te ʼu toe fihifihia ʼaupito lolotoga he ʼu lauʼi taʼu ʼe teau.—1 Hau 11:9-13, MN.
10. Kotea ʼae ʼe feala ke fakatupu kovi ki ʼatatou felogoi mo Sehova?
10 Ka tou fakakaumeʼa mo he hahaʼi ʼe mole mahino peʼe mole fakaʼapaʼapa ki te ʼu pelesepeto ʼa te ʼAtua, ʼe ʼi ai pe anai hona ʼu fua kovi ki tatatou faʼahiga manatu pea mo tatatou fakakaumeʼa mo Sehova. ʼE lagi natou kau ki
te kokelekasio, kae mole malohi ʼanatou felogoi mo Sehova. ʼE lagi ko hotatou ʼu famili, he ʼu vahaʼa fale, he ʼu kaugā gaue, peʼe ko he ʼu kaugā ako ʼe mole natou tauhi kia Sehova. Kapau ko te hahaʼi ʼaia ʼe mole alu tahi tonatou maʼuli mo te ʼu pelesepeto ʼa Sehova, ʼe feala pe ke natou fakaleluʼi tatou ʼo feala ai ke puli ʼatatou felogoi lelei mo te ʼAtua.11. Kotea ʼae ka tokoni mai ki tatatou filifili ʼotatou kaumeʼa?
11 Lau ia 1 Kolonito 15:33. ʼE lahi te hahaʼi ʼe ʼi ai ʼonatou kalitate. Tokolahi ia natou ʼae ʼe mole tauhi kia Sehova ʼe mole natou fai he ʼu faʼahi ʼe kovi. ʼE lagi ʼe ke iloʼi ʼihi ia natou ʼaia. Ko tona fakaʼuhiga koa ko he ʼu fakakaugā lelei ʼaia? ʼE malave feafeaʼi anai te ʼu fakakaumeʼa ʼaia ki ʼau felogoi mo Sehova? ʼE natou tokoni atu koa ke ke fakaovi kia Sehova? Kotea ʼae ʼe maʼuhiga tafito ki te hahaʼi ʼaia? Kotea ʼae ʼe natou palalau ki ai? ʼE natou palalau tafito koa ki te ʼu faʼahiga faiteuteu, te paʼaga, te ʼu kiʼi masini foʼou, te ʼu fakafiafia, peʼe ko ʼihi atu aluʼaga? ʼE natou faifatufatu tuʼumaʼu koa? ʼE natou fai koa ni fakahuahua kovi? Neʼe fakatokagaʼi fenei e Sesu: “ ʼE haʼu mai te gutu te meʼa ʼae ʼe fonu ʼi te loto.” (Mateo 12:34) Kapau ʼe ke tokagaʼi ko ʼou fakakaugā ʼe fakatupu kovi ki ʼau felogoi lelei mo Sehova, fai he fakatuʼutuʼu. Fakatuʼakoi te temi ʼae ʼe ke fakatahi ai mo natou, peʼe ke fakagata te ʼu fakakaumeʼa ʼaia.—Taaga Lea 13:20.
ʼE LOTO E SEHOVA KE TOU AGATONU KIA TE IA
12. (1) Kotea ʼae neʼe ui age e Sehova ki te kau Iselaele ʼi tanatou ʼosi mavae mai Esipito? (2) Kotea te tali ʼa te kau Iselaele ki te kole age e te ʼAtua ke natou agatonu?
12 ʼE tou toe maʼu he ʼu ako mai te faʼahi ʼae neʼe hoko ki te ʼosi fakaʼateainaʼi ʼo te kau Iselaele e Sehova mai Esipito. ʼI tanatou fakatahitahi ʼi te lalo Moʼuga ʼo Sinai, neʼe fakaha e Sehova ʼe nofo mo natou ʼi hona aluʼaga fakaofoofo. Neʼe natou sisio ki he toe ʼao matolu, te tapa ʼo te hila, mo he kohu, pea neʼe natou logo ki te mana mo te puhi fakatagi. (Ekesote 19:16-19) Neʼe natou logo leva ki te fakaha age ʼae e Sehova ko ia “ko he Atua e finenonofo.” ʼI te Tohi-Tapu. Fakaliliu ʼo Te Malama Foʼou ʼi te Fakafalani, ʼe fakaliliu fenei: “Ko au ko te ʼAtua ʼe ina fakamaʼua he pipiki ʼateaina pe kia te au.” Neʼe ina fakapapau ʼe agatonu anai kia natou ʼae ʼe ʼofa kia te ia pea mo fakalogo ki ʼana fakatotonu. (Lau ia Ekesote 20:1-6.) Neʼe fakaha e Sehova ki te kau Iselaele kapau ʼe natou kau mo ia pea ʼe nofo anai mo natou. Kapau neʼe ke nofo mo te kau Iselaele, neʼe malave feafeaʼi koa tau logoʼi te ʼu palalau ʼa Sehova? ʼE mahino ia ʼe ke hage pe ko te kau Iselaele ʼae neʼe natou ui fenei: “E matou fai anai te u mea fuli ae kua lea ki ai [ia Sehova].” (Ekesote 24:3) Kae mole faʼa fualoa ki ai, neʼe ʼahiʼahiʼi te agatonu ʼa te kau Iselaele ki te ʼAtua. ʼO feafeaʼi?
13. Neʼe ʼahiʼahiʼi feafeaʼi te agatonu ʼa te kau Iselaele?
13 Neʼe matataku te kau Iselaele ʼi te fakaha age e te ʼAtua ia tona malohi, koia neʼe hake ai Moisese ki te Moʼuga ʼo Sinai ʼo palalau kia Sehova ʼo ʼuhiga mo natou. (Ekesote 20:18-21) Kae neʼe fualoa te nofo ʼa Moisese ʼi te moʼuga. ʼE mahino mai neʼe hage kua natou māʼua nonofo ʼi te toafa he ʼe kua puli tonatou takitaki. Kotea ʼae neʼe natou fai? ʼE iloga mai neʼe kua tuku katoa tanatou falala ki te takitaki fakatagata, ia Moisese. Neʼe natou kamata hoha ai, ʼo natou ui fenei kia Alone: “Fai he atua ke haele i omatou mua, koteuhi ko Moisese, te tagata ae nee ina fakamavae matou mai te fenua o Esipito, e mole matou iloi tona aluaga.”—Ekesote 32:1, 2.
14. Neʼe faihala feafeaʼi te kau Iselaele, pea kotea te ui ʼa Sehova?
14 Neʼe iloʼi e te kau Iselaele ʼe mole lelei te atolasio ki te ʼu taula ʼatua. (Ekesote 20:3-5) Kae neʼe vave pe tanatou maliu ʼo atolasio ki te ʼuhiʼi pipi aulo. Logo la neʼe natou talagataʼa ki te ʼu fakatotonu ʼa Sehova, kae neʼe natou faihala ʼaupito ʼi tanatou manatu ʼae kei natou kau pe mo Sehova. Neʼe fakahigoaʼi foki e Alone ia tanatou tauhi ʼaia ki te ʼuhiʼi pipi, ko “he aho lahi fakafiafia [kia Sehova].” Kotea te ui ʼa Sehova? Neʼe ina ui kia Moisese ko te hahaʼi “kua natou fai ni mea fakalialia” pea kua natou mavae ʼi te ala ʼae neʼe Ina “fakaha kia natou.” Neʼe ita lahi ai Sehova ʼo manatu ai ke ina molehi te puleʼaga katoa ʼo Iselaele.—Ekesote 32:5-10.
Neʼe tuku e Sehova te fealagia ʼae ki te kau Iselaele ke natou fakaha ʼe natou fia kau mo ia
15, 16. Neʼe fakaha feafeaʼi e Moisese mo Alone ʼe nā kau mo Sehova? (Vakaʼi te ʼuluaki pāki.)
15 Kae ko Sehova ko te ʼAtua manavaʼofa. Neʼe ina fakatotonu ke mole ina molehi te puleʼaga ʼo Iselaele. Kae neʼe ina tuku te fealagia ʼae ki te kau Iselaele ke natou fakaha ʼe natou fia kau mo ia. (Ekesote 32:14) ʼI te sio ʼae ʼa Moisese ki te meʼe, te kalaga, mo te hiva ʼa te hahaʼi ʼi muʼa ʼo te taula ʼatua, neʼe ina maumauʼi ai pea mo tutu te ʼuhiʼi pipi aulo ʼaia ʼi te afi. Pea neʼe kalaga ʼo ina ui fenei: “Ko ai ʼae ʼe kau mo Sehova? Kotou ʼomai kia au.” Pea “neʼe fakatahi age leva te kau Levite fuli” kia Moisese.—Ekesote 32:17-20, 26, MN.
16 Tatau aipe pe neʼe fai e Alone te ʼuhiʼi pipi aulo, kae neʼe fakahemala, ʼo ina fili ke kau mo Sehova ohage pe ko te kau Levite ʼae. Neʼe fakaha e te ʼu tagata agatonu ʼaia ʼe mole natou kau mo natou ʼae neʼe agahala. Neʼe ko he tonu fakapotopoto, koteʼuhi ʼi te ʼaho pe ʼaia, neʼe mamate ai te kau atolasio ʼe lauʼi afe ʼo te ʼuhiʼi pipi aulo. Kae ko natou ʼae neʼe kau mo Sehova neʼe maʼuʼuli, pea neʼe fakapapau e te ʼAtua ʼe ina tapuakinaʼi anai natou.—Ekesote 32:27-29.
17. Kotea te ako ʼe tou maʼu mai te faitohi ʼa Paulo ʼo ʼuhiga mo te ʼuhiʼi pipi aulo?
17 Kotea te ako ʼe tou maʼu mai ai? Neʼe ui fenei e te apositolo ko Paulo: “Neʼe liliu te ʼu meʼa ʼaia ko he ʼu faʼifaʼitaki maʼa tatou,” ke ʼaua naʼa tou “liliu ko he ʼu hahaʼi tauhi taula ʼatua.” Neʼe fakamahino e Paulo ko te ʼu fakamatala ʼaia “neʼe tohi moʼo fakatokaga ʼo tatou, ia tatou ʼaeni ʼe maʼuʼuli ʼi te fakaʼosi ʼo te tuʼu ʼo te ʼu faʼahiga meʼa ʼaeni. Koia, ko ʼae ʼe manatu ʼe tuʼu, ke tokaga ia naʼa higa.” (1 Kolonito 10:6, 7, 11, 12) Ohage pe ko tona fakatokagaʼi mai e Paulo, ʼe feala pe ki ʼihi kau atolasio ʼa Sehova ke natou fai he ʼu aga ʼe kovi mo natou manatu, ʼe kei natou maʼu pe te ʼofa ʼo Sehova. Kae mole ui leva kua maʼu e he tahi te ʼofa ʼo Sehova ʼuhi pe he ʼe fia kaumeʼa mo Sehova mo ina ui ʼe agatonu kia te ia.—1 Kolonito 10:1-5.
18. Kotea ʼae ʼe feala ke ina fakamamaʼo tatou mai ia Sehova, pea kotea anai ka hoko?
18 ʼI te mole hifo vave mai ʼa Moisese mai
te Moʼuga ʼo Sinai ohage ko te ʼamanaki ʼa te kau Iselaele, neʼe natou kamata hoha ai leva. ʼO toe feia pe, kapau mole hoko vave mai te fakaʼosi ʼo te tuʼu ʼaeni ohage ko tatatou ʼamanaki ki ai, ʼe feala pe ke tou kamata hoha. ʼE lagi tou kamata manatu kei mamao atu te hoko mai ʼo te ka haʼu taulekaleka ʼae neʼe fakapapau mai e Sehova pea tou manatu leva ʼe lagi ko he moemisi pe ia. Pea tou haga tahi pe leva ki te faʼahi ʼae ʼe tou loto ki ai kae mole ki ʼae ʼe loto ki ai Sehova. Kapau mole tou nofo tokaga, ʼe feala pe ke tou fakamamaʼo mai ia Sehova pea mo tou fai leva he ʼu faʼahi neʼe mole tou ʼamanaki ki ai.19. Kotea ʼae ʼe tonu ke tou manatuʼi tuʼumaʼu, pea kotea tona tupuʼaga?
19 ʼE loto e Sehova ke tou fakalogo ʼateaina pe kia te ia pea ko ia tokotahi pe ʼae ʼe tonu ke tou atolasio ki ai. (Ekesote 20:5) He koʼe ʼe ina kole mai te faʼahi ʼaia? Koteʼuhi ʼe ʼofa ia tatou. Kapau ʼe mole tou fai te meʼa ʼae ʼe loto ki ai Sehova, ʼe tou fai anai te meʼa ʼae ʼe loto ki ai Satana, ʼo ina taki ai tatou ki te malaʼia. Neʼe ui fenei e Paulo: “ ʼE mole feala ke kotou iinu ki te ipu ʼo Sehova pea mo te ipu ʼo te kau temonio. ʼE mole feala ke kotou kakai ʼi ‘te laupapa ʼo Sehova’ pea mo te laupapa ʼo te kau temonio.”—1 Kolonito 10:21.
KE KE NOFO OVI KIA SEHOVA
20. ʼE lava tokoni feafeaʼi mai ia Sehova mo kapau neʼe tou fai he lakahala?
20 Ko Kaino, Salomone, mo te kau Iselaele neʼe natou maʼu fuli te faigamalie ʼae ke natou fakahemala pea ke natou fetogi tanatou aga. (Gaue 3:19) ʼE ha lelei mai, ʼe mole fakafisi atu aipe ia Sehova ki he tahi moka ina fai hana lakahala. Tou fakakaukauʼi pe neʼe feafeaʼi tana fakamolemole kia Alone. Ia ʼaho nei, ʼe foaki mai e Sehova te ʼu fakatokaga fonu ʼi te ʼofa ke ʼaua naʼa tou fai te ʼu meʼa ʼae ʼe kovi. ʼE ina fakaʼaogaʼi te Tohi-Tapu, ʼatatou tohi, pea mo ʼotatou tehina mo tuagaʼane. Kapau ʼe tou tokagaʼi te ʼu fakatokaga ʼa Sehova, ʼe feala ai ke tou iloʼi papau ʼe lotomanavaʼofa anai kia tatou.
21. Kotea ʼe tonu ke ke fai moka ʼahiʼahiʼi tau nofo agatonu kia Sehova?
21 ʼE ʼi ai te fakatuʼutuʼu ʼo te ʼofa makehe ʼo Sehova. (2 Kolonito 6:1) ʼE ina foaki mai te faigamalie ʼae “ke tou liakī te aga heʼe lotu, mo te ʼu holi ʼo te malama.” (Lau ia Tito 2:11-14.) ʼI te malama ʼaeni, ʼe ʼahiʼahiʼi tuʼumaʼu pe anai tatatou nofo agatonu kia Sehova. Koia, fakatotonu ke ke kau mo Sehova. Pea manatuʼi, “ko Sehova tou ʼAtua ʼae ʼe tonu ke ke manavasiʼi ki ai. Ko ia ʼae ʼe tonu ke ke tauhi ki ai, pea ko ia ʼae ʼe tonu ke ke pipiki ki ai.”—Tetelonome 10:20, MN.