Ko Tatou ʼe ʼa Sehova
“Manuia te puleaga ae e Atua [kia Sehova]! Manuia te hahai ae nee ina filifili ko tona tofiga!”—PESALEMO 33:12.
1. He koʼe ʼe feala ke tou ui ko meʼa fuli ʼe ʼa Sehova? (Vakaʼi te ʼuluaki pāki.)
KO MEʼA fuli ʼe ʼa Sehova, “te atu lagi pea mo te atu lagi o te atu lagi, mo te kele mo te u mea fuli ae e mau ai.” (Tetelonome 10:14; Fakaha 4:11) Pea ko tatou fuli ʼaʼana, koteʼuhi neʼe ina fakatupu te tagata. (Pesalemo 100:3) Kae ʼi te tagata fuli ʼae neʼe maʼuli ʼi te kele, neʼe ina fili maʼana ia he hahaʼi ʼi hona aluʼaga makehe.
2. Ohage ko tona ui ʼi te Tohi-Tapu, ko ai ʼae neʼe filifili e Sehova maʼana ʼi hona aluʼaga makehe?
2 Ohage la, ʼi te kapite 135 ʼo Pesalemo, ʼe fakahigoaʼi ai te ʼu kaugana ʼa Sehova ʼo te Iselaele ʼafeā ko “tona tofiga.” (Pesalemo 135:4) Pea tahi, neʼe tala fakatomuʼa e Oseo ko he hahaʼi ʼe mole ko he kau Iselaele, ʼe natou kau anai ki te hahaʼi ʼa Sehova. (Oseo 2:23) Neʼe hoko te lea fakapolofeta ʼaia ʼi te temi ʼae neʼe kamata filifili ai e Sehova ia he hahaʼi ʼe mole ko he kau Iselaele, ke natou kaugā hau ʼi selo mo Kilisito. (Gaue 10:45; ) Ko natou ʼaia neʼe fakanofo ʼaki te laumalie maʼoniʼoni, ʼe fakahigoaʼi ko “he puleʼaga maʼoniʼoni.” Ko “he hahaʼi makehe” ʼa Sehova. ( Loma 9:23-261 Petelo 2:9, 10) Kae ʼe feafeaʼi ki te kau Kilisitiano ʼae ʼe natou maʼu te ʼamanaki ki te maʼuli heʼe gata ʼi te kele? ʼE ui e Sehova ʼo ʼuhiga mo natou ʼaia, ko “taku hahai” pea mo “aku kau filifiliia.”—Esaia 65:22.
3. (1) Ia ʼaho nei, ko ai ʼae ʼe ina maʼu he ʼu felogoi makehe mo Sehova? (2) Kotea ʼae ka tou talanoa ki ai ʼi te alatike ʼaeni?
3 Ia ʼaho nei, ko te “kiʼi faga ovi,” ʼae ʼe natou maʼu te ʼamanaki ki te maʼuli ʼi te lagi, mo “ ʼihi atu ovi,” ʼae ʼe natou maʼu te ʼamanaki ki te maʼuli heʼe gata ʼi te kele, ʼe natou tauhi kia Sehova ohage pe ko he “faga ovi ʼe tahi.” (Luka 12:32; Soane 10:16) ʼE tou fia fakaha kia Sehova tatatou lotofakafetaʼi he ʼe tou maʼu he ʼu felogoi makehe mo ia. ʼI te alatike ʼaeni, ʼe tou talanoa anai pe ʼe feafeaʼi hatatou fakaha tatatou lotofakafetaʼi kia Sehova ki te pilivilesio ʼaia.
TOU FOAKI ʼOTATOU MAʼULI KIA SEHOVA
4. ʼE feafeaʼi hatatou fakaha tatatou lotofakafetaʼi kia Sehova ki te ʼu felogoi ʼae ʼe tou maʼu mo ia? Pea kotea ʼae neʼe toe fakaha e Sesu?
4 Ka tou foaki ʼotatou maʼuli kia Sehova pea mo papitema, ʼe tou fakaha ai tatatou lotofakafetaʼi kia te ia. Pea ʼe tou fakaha ia muʼa ʼo te kaugā malie, ko tatou ʼe ʼa Sehova pea ʼe tou fia fakalogo kia te ia. (Hepeleo 12:9) Neʼe toe fai feia pe mo Sesu ʼi te temi ʼae neʼe papitema ai. Tatau aipe pe neʼe kua kau ia Sesu ki te puleʼaga ʼa Sehova, kae neʼe ina foaki tona maʼuli kia Sehova. ʼE hage pe neʼe ina ui fenei: “E au loto ke [au] fai tou finegalo, sioku Atua! Pea e tuu tau lao i te takele o toku loto.”—Pesalemo 40:8, 9.
5, 6. (1) Kotea ʼae neʼe ui e Sehova ʼi te papitema ʼa Sesu? (2) Tuku mai he faʼifaʼitaki ʼe tokoni mai ke tou mahino pe kotea ʼae ʼe logoʼi e Sehova moka tou foaki ʼotatou maʼuli kia te ia.
5 Kotea ʼae neʼe logoʼi e Sehova ʼi te temi ʼae neʼe papitema ai ia Sesu? ʼE ui fenei ʼi te Tohi-Tapu: “ ʼI tana ʼosi papitema, neʼe hake ake ia Sesu mai te vai. Neʼe ava leva te lagi pea neʼe sio ia ki te laumalie ʼo te ʼAtua ʼe hifo ifo kia te ia ohage ko he lupe. Neʼe toe logo ki he leʼo mai te lagi neʼe ina ui fenei: ‘Ko toku ʼAlo ʼaeni, toku ʼofaina, ʼae ʼe au fiafia ai.’ ” (Mateo 3:16, 17) Neʼe kua foaki e Sesu tona maʼuli ki te ʼAtua. Kae neʼe fiafia ia Sehova ʼi tana sio ʼae ʼe fia fakaʼaogaʼi e Sesu tona maʼuli ke tauhi ʼateaina pe kia te Ia. ʼO toe feia pe, ʼe fiafia ia Sehova moka tou foaki ʼotatou maʼuli kia te ia, pea ʼe ina tapuakinaʼi anai tatou.—Pesalemo 149:4.
6 Kae ko meʼa fuli ʼe ʼa Sehova. Pea kotea la he meʼa ʼe feala ke tou foaki kia te ia? Tou fakakaukauʼi te aluʼaga ʼaeni. Ko he tagata ʼe ina to he ʼu fuʼu ʼakau matala ʼi tona ʼoloto. Pea ʼi te tahi ʼaho, neʼe toliʼi leva e tona kiʼi ʼofafine he matalaʼi ʼakau ʼo ina foaki kia ia. Logo la ko te matalaʼi ʼakau ʼe ʼaʼana, kae ʼe fiafia ʼaupito te tamai ʼo ʼuhiga mo te meʼa ʼofa ʼaia. He ʼe ʼaki te meʼa ʼofa ʼaia, ʼe ina iloʼi ai ʼe ʼofa tona ʼofafine kia ia. Pea ʼe maʼuhiga age te kiʼi matalaʼi ʼakau ʼae neʼe foaki age e tona ʼofafine ʼi te ʼu matalaʼi ʼakau fuli ʼo tona ʼoloto. ʼO toe feia pe, ʼe fiafia ʼaupito ia Sehova moka tou lotolelei ke tou foaki ʼotatou maʼuli kia te ia.—Ekesote 34:14.
7. ʼE tokoni feafeaʼi mai ia Malakia ke tou mahino pe kotea ʼae ʼe logoʼi e Sehova ʼo ʼuhiga mo natou ʼae ʼe tauhi kia te ia ʼaki he lotolelei?
7 Lau ia Malakia 3:16. He koʼe ʼe maʼuhiga ke ke foaki tou maʼuli kia Sehova pea mo ke papitema? ʼE moʼoni, ʼe talu tau tupu, ko koe ʼe ʼa Sehova, ia tou Tupuʼaga. Kae fakakaukauʼi age muʼa ia te toe fiafia ʼae ʼa Sehova moka ke tali ke liliu ia ia ko tou Tuʼi ʼAliki pea moka ke foaki tou maʼuli kia te ia. (Taaga Lea 23:15) ʼE iloʼi e Sehova ia natou ʼae ʼe fia tauhi kia te ia, pea ʼe ina tohi ʼonatou higoa ki tana “tohi fakamanatu.”
8, 9. Kotea ʼae ʼe kole e Sehova kia natou ʼae kua tohi ʼonatou higoa ʼi tana “tohi fakamanatu?”
8 Kapau ʼe tou loto ke mole pulihi totatou higoa ʼi te “tohi fakamanatu” ʼa Sehova, ʼe ʼi ai te ʼu faʼahi ʼe tonu ke tou fai. Neʼe ui e Malakia ʼe tonu ke tou manavasiʼi kia Sehova mo tou metitasio ki tona huafa. Pea kapau ʼe tou atolasio ki he tahi kehe peʼe ki he meʼa, ʼe molehi anai totatou higoa ʼi te tohi ʼa Sehova.—Ekesote 32:33; Pesalemo 69:29.
ʼI te ʼaho fuli, ʼe tonu ke tou fakaha ʼaki tatatou aga ʼe tou fakalogo kia Sehova
9 Koia, ʼe mole gata pe ke tou fakapapau ke tou fai te finegalo ʼo Sehova pea mo papitema. Ko te ʼu faʼahi ʼaia ʼe tou fakahoko tuʼa tahi pe, kae ʼe tou atolasio kia Sehova ʼi totatou maʼuli katoa. ʼI te ʼaho fuli, ʼe tonu ke tou fakaha ʼaki tatatou aga ʼe tou fakalogo kia Sehova.—1 Petelo 4:1, 2.
TOU LIʼAKI TE ʼU HOLI ʼO TE MALAMA ʼAENI
10. Kotea te kehekehe ʼo natou ʼae ʼe tauhi kia Sehova pea mo natou ʼae ʼe mole tauhi kia te ia?
10 ʼI te alatike ʼae neʼe hoki ʼosi atu, neʼe tou talanoa ai neʼe lau e Kaino, mo Salomone, pea mo te kau Iselaele ʼe natou atolasio kia Sehova kae neʼe mole natou nonofo agatonu kia te ia. ʼE ha ʼi te ʼu faʼifaʼitaki ʼaia, ʼe mole tonu pe ke tou ui ʼe tou atolasio kia Sehova. ʼE tonu ke tou fehiʼa ki te meʼa ʼae ʼe kovi kae tou ʼofa ki te meʼa ʼae ʼe lelei. (Loma 12:9) Koia ʼae neʼe ui ai e Sehova ʼe tou sisio anai ki “te kehekehe o te tagata agatonu mo te tagata agakovi, o ae e tauhi ki te Atua pea mo ae e mole tauhi kia ia.”—Malakia 3:18.
11. He koʼe ʼe tonu ke ha lelei ki te hahaʼi fuli ʼe tou tauhi ʼateaina pe kia Sehova?
11 ʼE tou fakafetaʼi kia Sehova he neʼe ina filifili tatou ke tou kau ki tana hahaʼi. ʼE tonu ke ha lelei ki te hahaʼi fuli ʼe tou kau mo Sehova. (Mateo 5:16; 1 Timoteo 4:15) Pea ʼe lelei ke ke fai te ʼu fehuʼi ʼaeni: ‘ ʼE ha lelei koa ki ʼihi ia taku nofo agatonu kia Sehova ʼi te ʼu faʼahi fuli ʼo toku maʼuli? ʼE au fiameʼameʼa koa ʼi te fakaha ki te hahaʼi ko au ko he Fakamoʼoni ʼa Sehova?’ Fakakaukauʼi age muʼa ia te lotomamahi ʼo Sehova mo kapau ʼe tou ufiufi ʼi te fakaha ko tatou ʼe ʼaʼana.—Pesalemo 119:46; lau ia Maleko 8:38.
ʼE ha lelei koa ʼi tou faʼahiga maʼuli ko koe ko he Fakamoʼoni ʼa Sehova? (Vakaʼi te palakalafe 12, 13)
12, 13. He koʼe ʼi ʼihi temi ʼe faigataʼa ai te fakakehekeheʼi ʼo ʼihi kau Fakamoʼoni ʼa Sehova pea mo te hahaʼi ʼo te malama?
12 Kae meʼa fakaʼofaʼofa foki, he ʼe faʼifaʼitakiʼi e ʼihi Fakamoʼoni “te faʼahiga manatu ʼa te malamanei.” Koia, ʼe mole natou kehekehe ai mo natou ʼae ʼe mole atolasio kia Sehova. (1 Kolonito 2:12) Ko “te faʼahiga manatu ʼa te malamanei” ʼe ina uga te hahaʼi ke natou fakamuʼamuʼa ʼonatou holi. (Efeso 2:3) Ohage la, logo la te ʼu tokoni fuli ʼae ʼe tou maʼu, kae fili pe e ʼihi he ʼu teu ʼe mole ha ai te fia malalo. ʼE natou tui he ʼu teu ʼe pipiki fau pea ʼe ʼasi ai ʼihi koga ʼo te sino, maʼia ʼi te ʼu fono Fakakilisitiano. Peʼe natou fili he ʼu faʼahiga faʼu ʼo tonatou lauʼulu ʼe tupu ai te sioʼi ʼo natou. (1 Timoteo 2:9, 10) Koia ʼae ʼe feala ai ke faigataʼa ki ʼihi hanatou iloʼi pe ʼe ko natou ʼaia ko he ʼu Fakamoʼoni ʼa Sehova peʼe kailoa.—Sakopo 4:4.
13 ʼE ʼi ai te tahi ʼu faʼahi ʼe heʼeki liʼaki katoa ai e ʼihi kau Fakamoʼoni ia te faʼahiga manatu ʼa te malamanei. Ohage la, ʼi te ʼu fakafiafia, ko te meʼe pea mo te faʼahiga aga ʼa ʼihi ʼe mole tuha ia mo he kau Kilisitiano. Peʼe ko ʼihi ʼe natou ʼai ki te fakatahitahiʼaga ʼi te Neti he ʼu pāki ʼo natou totonu mo ʼanatou palalau ʼe ha ai ʼanatou sio fakatagata. Neʼe lagi mole fakatonutonuʼi natou ʼi te kokelekasio, kae ʼe feala ke ʼi ai he ʼu fua kovi ʼo tanatou aga ʼaia ki ʼonatou tehina mo tuagaʼane ʼae ʼe faiga malohi ke fakakehekeheʼi natou mai te malama.—Lau ia 1 Petelo 2:11, 12.
ʼAua naʼa ke mulimuli ia natou ʼae ʼe mole natou fakaha lelei ʼe natou kau mo Sehova
14. Kotea ʼae ʼe tonu ke tou fai moʼo puipui ʼatatou felogoi makehe mo Sehova?
14 Ko meʼa fuli ʼae ʼi te malamanei, ʼe ina uga tatou ke tou tokakaga tafito pe ki “te holi ʼo te kakano, mo te holi ʼo te ʼu mata pea mo te fakahaha . . . koloa.” (1 Soane 2:16) Kae ko tatou ʼe ʼa Sehova, koia ʼae ʼe tou kehe ai mo te malama. ʼE “tou liʼaki te aga heʼe lotu, mo te ʼu holi ʼo te malama, kae . . . tou maʼuʼuli fakapotopoto, mo faitotonu, mo pipiki ki te ʼAtua ʼi te lotolotoiga ʼo te tuʼu ʼo te ʼu faʼahiga meʼa ʼaeni.” (Tito 2:12) ʼE tonu ke tou fakaha ʼi te ʼu faʼahi fuli ʼo totatou maʼuli, ko tatou ʼe ʼa Sehova, pe ʼe ʼi tatatou faʼahiga faipalalau, te kai, te inu, te faiteuteu, peʼe ʼi te gaue.—Lau ia 1 Kolonito 10:31, 32.
KE TOU “FEʼOFAMAMAHIʼAKI”
15. He koʼe ʼe tonu ke tou agalelei mo ʼofa ki ʼotatou tehina mo tuagaʼane?
15 ʼE tou fakaha ʼe maʼuhiga ʼatatou felogoi 1 Tesalonika 5:15) ʼE maʼuhiga koa te faʼahi ʼaia? Neʼe ui fenei e Sesu ki ʼana tisipulo: “ ʼAki te faʼahi ʼaia, ʼe iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.”—Soane 13:35.
mo Sehova ʼi ʼatatou faʼahiga felogoi ʼae mo ʼotatou tehina mo tuagaʼane. Mo natou pe la ʼe ʼa Sehova, ohage pe ko tatou. Kapau ʼe tou manatuʼi te faʼahi ʼaia, ʼe tou agalelei anai mo ʼofa tuʼumaʼu anai kia natou. (16. Kotea ʼe tou ako mai te Lao ʼa Moisese ʼo ʼuhiga mo te ʼofa ʼae ʼa Sehova ki tana hahaʼi?
16 ʼE ʼi ai te faʼifaʼitaki ʼi te Lao ʼa Moisese ʼe lava tokoni mai ke tou mahino pe ʼe tonu ke feafeaʼi tatatou aga ki ʼihi ʼi te kokelekasio. ʼI te fale lotu ʼa Sehova, neʼe maʼu ai te ʼu meʼa gaue neʼe fakaʼaogaʼi ʼateaina pe ki te tauhi. Neʼe fakamahino lelei ʼi te Lao pe neʼe tonu ke tokaga feafeaʼi te kau Levite ki te ʼu meʼa gaue ʼaia. Pea ko natou ʼae neʼe mole mulimuli ki te ʼu fakatotonu ʼaia, neʼe tonu ke matehi. (Numelo 1:50, 51) Kapau neʼe maʼuhiga kia Sehova ke tokaga lelei te kau Levite ki te ʼu meʼa gaue ʼae neʼe fakaʼaogaʼi ki tana tauhi, ʼe feafeaʼi age la ʼana kaugana agatonu ʼae neʼe natou foaki ʼonatou maʼuli kia te ia. ʼE ina fakaha mai ʼe tou maʼuhiga kia te ia ʼi tana ui fenei: “Ko ae e fafa kia koutou e fafa ki te kanoi mata o [toku] foi mata.”—Sakalia 2:8.
ʼE tokagaʼi e Sehova moka tou tali kaiga, mo lotofoaki, mo lotofakamolemole, pea mo agalelei
17. Kotea ʼae ʼe tokagaʼi e Sehova?
17 Neʼe ui e Malakia ko Sehova ʼe fakalogo mo ina tokagaʼi ia te aga ʼae ʼe fefakahaʼaki e tana hahaʼi. (Malakia 3:16) “E iloʼi e Sehova ia natou ʼae ʼaʼana.” (2 Timoteo 2:19) ʼE ina tokagaʼi ia meʼa fuli ʼae ʼe tou fai pea mo ʼatatou palalau. (Hepeleo 4:13) Kapau ʼe mole tou agalelei ki ʼotatou tehina mo tuagaʼane, ʼe tokagaʼi e Sehova. Kae, ʼe tou tui papau ʼe toe tokagaʼi e Sehova moka tou tali kaiga, mo lotofoaki, mo lotofakamolemole, pea mo agalelei.—Hepeleo 13:16; 1 Petelo 4:8, 9.
“ ʼE MOLE LIʼAKI ANAI E SEHOVA TANA HAHAʼI”
18. ʼE feafeaʼi hatatou fakafetaʼi kia Sehova ʼi tana filifili tatou ke tou liliu ko tana hahaʼi?
18 ʼE tou fia fakaha kia Sehova tatatou lotofakafetaʼi he ʼe ko tatou ko tana hahaʼi. ʼE tou iloʼi papau neʼe ko he tonu fakapotopoto ʼae neʼe tou toʼo ʼi tatatou foaki ʼotatou maʼuli kia te ia. Logo la ʼe tou maʼuʼuli “ ʼi te lotolotoiga ʼo he taʼiake ʼe aga fakapikopiko pea mo agakovi,” kae ʼe tou “heʼe mele pea mo maʼa” pea ʼe tou mu “ohage ko he ʼu malama ʼi te malamanei.” (Filipe 2:15) Tou fakatotonu ke tou liʼaki ia meʼa fuli ʼae ʼe fehiʼa ki ai ia Sehova. (Sakopo 4:7) Pea tou ʼoʼofa mo tou fakaʼapaʼapa ki ʼotatou tehina mo tuagaʼane, koteʼuhi mo natou pe la ʼe ʼa Sehova.—Loma 12:10.
19. ʼE fakapale feafeaʼi e Sehova ia natou ʼae ʼaʼana?
19 ʼE fakapapauʼi fenei mai ʼi te Tohi-Tapu: “ ʼE mole liʼaki anai e Sehova tana hahaʼi.” (Pesalemo 94:14, MN) ʼE ko he fakamoʼoni ʼaia. Tatau aipe pe kotea ʼae ʼe feala ke hoko, kae ʼe nofo anai Sehova mo tatou. Maʼia pe ʼe tou mamate, ʼe ina manatuʼi tuʼumaʼu anai tatou. (Loma 8:38, 39) “Kapau ʼe tou maʼuʼuli, ʼe tou maʼuʼuli maʼa Sehova, pea kapau ʼe tou mamate, ʼe tou mamate maʼa Sehova. Koia, tatau aipe pe ʼe tou maʼuʼuli peʼe tou mamate, kae neʼe tou foaki ʼotatou maʼuli kia Sehova.” (Loma 14:8) ʼE tou atalitali mo he toe fakaʼamu ki te temi ʼae ka fakatuʼuake ai e Sehova ʼona kaumeʼa agatonu ʼae kua mamate. (Mateo 22:32) Kae ʼo kamata atu ʼi te temi nei, ʼe foaki mai e tatatou Tamai he ʼu meʼa ʼofa taulekaleka. Ohage pe ko tona ui ʼi te Tohi-Tapu, “manuia te puleaga ae e Atua [kia Sehova]! Manuia te hahai ae nee ina filifili ko tona tofiga!”—Pesalemo 33:12.