Ke Ke Manavaʼofa Ki “Te Faʼahiga Tagata Fuli Pe”
ʼI TE temi ʼae neʼe akoʼi ai e Sesu ʼana tisipulo ki te fakamafola ʼo te logo lelei, neʼe ina fakatokaga age ʼe mole fia fakalogo tuʼumaʼu anai te hahaʼi kia natou. (Luka 10:3, 5, 6) Pea ʼe toe feia pe tatatou faifakamafola. ʼI ʼihi temi ʼe tou felaveʼi ai mo he hahaʼi ʼe aga itaita mai kia tatou. Pea ka natou feia, ʼe feala ke faigataʼa tatatou maʼu te manavaʼofa kia natou ʼae ʼe tou faifakamafola ki ai.
Ko he tahi ʼe manavaʼofa, ʼe mahino ki te ʼu fihifihia pea mo te ʼu meʼa ʼae ʼe ʼaoga ki te hahaʼi, ʼe ʼofa mo fia tokoni kia natou. Kae kotea ʼae ʼe feala ke hoko mo kapau ʼe mole kei tou manavaʼofa ki te hahaʼi ʼae ʼe tou felaveʼi mo ia ʼi te faifakamafola? ʼE puli anai tatatou faʼafai, ko tona fakaʼuhiga, ʼe mole kei tou fia faifakamafola anai kia natou, pea ʼe mole kei feala anai hatatou tokoni kia natou. ʼE feala pe ke tou fakatatau tatatou faʼafai ki he afi. Pea ke haga mu te afi ʼaia, ʼe ʼaoga ke hokohokoʼi. ʼO toe feia pe, ʼe ʼaoga ke tou maʼu ia te manavaʼofa ke malohi ai tatatou faʼafai.—1 Tesalonika 5:19.
ʼE feafeaʼi hatatou ako ke toe lahi age tatatou maʼu te manavaʼofa, maʼia moka faigataʼa? Tou vakaʼi te ʼu faʼifaʼitaki ʼaeni ʼe tolu: Ko Sehova, mo Sesu pea mo te apositolo ko Paulo.
FAʼIFAʼITAKIʼI TE MANAVAʼOFA ʼO SEHOVA
Lolotoga ni taʼu ʼe lauʼi afe, neʼe fasituʼu ai te hahaʼi ʼo ʼuhiga mo Sehova. Kae “ ʼe agalelei [aipe] kia natou ʼae ʼe maʼuli galo pea mo agakovi.” (Luka 6:35) ʼE ina fakaha feafeaʼi tana agalelei? ʼE kataki fualoa ia ki te hahaʼi fuli. Koteʼuhi ʼe loto e Sehova ke “haofaki te faʼahiga tagata fuli pe.” (1 Timoteo 2:3, 4) ʼE moʼoni ʼe fehiʼa te ʼAtua ki te agakovi, kae ʼe maʼuhiga te hahaʼi fuli kia te ia pea ʼe mole ina loto ke mate he tahi.—2 Petelo 3:9.
ʼE iloʼi e Sehova ʼe faiva ia Satana ʼi te uga ʼo te hahaʼi ke natou tui ki te ʼu loi. (2 Kolonito 4:3, 4) Tokolahi neʼe akoʼi age kia natou he ʼu loi ʼo ʼuhiga mo te ʼAtua talu tanatou kei liliki. Koia ʼae ʼe lagi faigataʼa ai tanatou tali ia te moʼoni ʼuhi ko tanatou faʼahiga fakakaukau mo ʼanatou faʼahiga manatu. Kae ʼe fia tokoni moʼoni ia Sehova kia natou. ʼE tou iloʼi feafeaʼi te faʼahi ʼaia?
Ohage la, fakakaukauʼi pe kotea ʼae neʼe logoʼi e Sehova ʼo ʼuhiga mo te hahaʼi ʼo te kolo ko Ninive. Logo la neʼe natou agamalohi, kae neʼe ui fenei e Sehova kia Sonasi: “Kae kia te au, ʼe mole tonu koa la ke au ʼofa mamahi ki Ninive, te kolo lahi ʼae ʼe maʼuʼuli ai ia tagata ʼe toko 120 000 tupu ʼe mole natou iloʼi te kehekehe ʼo tonatou nima mataʼu pea mo tonatou nima hema?” (Sonasi 4:11, MN) Neʼe ʼofa ia Sehova ki te hahaʼi ʼaia, he neʼe mole natou iloʼi te moʼoni ʼo ʼuhiga mo ia. Koia neʼe ina fekauʼi ai Sonasi ke alu ʼo tala ʼana fakatokaga kia natou.
ʼE tou maʼu te manatu ʼa Sehova ʼo ʼuhiga mo te hahaʼi. ʼE natou maʼuhiga kia tatou. Pea ohage pe ko Sehova, ʼe tou fia tokoni kia natou ke natou iloʼi ia ia, tatau aipe pe hage mai ʼe mole natou fia tali te moʼoni.
FAʼIFAʼITAKIʼI TE MANAVAʼOFA ʼO SESU
Ohage pe ko tana Tamai, neʼe ʼofa ia Sesu ki te hahaʼi “koteʼuhi neʼe natou ogosia pea mo mavetevete ohage ko he ʼu ovi ʼe mole honatou tauhi ovi.” (Mateo 9:36) Neʼe mahino ia Sesu ki te tupuʼaga ʼo te aluʼaga ʼaia. Neʼe gaohi koviʼi natou e te kau takitaki lotu pea neʼe natou akoʼi age ni loi. Pea neʼe iloʼi e Sesu ʼe mole liliu anai ʼihi ia natou ko ʼana tisipulo ʼuhi ko ʼonatou faigataʼaʼia. Kae logo la te faʼahi ʼaia, neʼe lahi te ʼu faʼahi neʼe ina akoʼi kia natou.—Maleko 4:1-9.
ʼAua tau lotovaivai moka mole fakalogo atu he tahi ʼi te kamata
Ka fetogi te ʼu aluʼaga ʼo te maʼuli ʼo he tahi, ʼe toe feala pe ke fetogi tana faʼahiga manatu ki te moʼoni
Ka mole fakalogo te hahaʼi ki tatatou logo, tou faigaʼi ke tou mahino pe kotea tona tupuʼaga. ʼE lagi mole lelei ʼanatou manatu ʼo ʼuhiga mo te Tohi-Tapu peʼe ki te kau Kilisitiano, ʼuhi ko te faʼifaʼitaki kovi ʼa te hahaʼi ʼae ʼe natou ui ko natou ko he kau Kilisitiano. Ko ʼihi, neʼe lagi natou logo ki ni loi ʼo ʼuhiga mo te ʼu akonaki ʼae ʼe tou tui ki ai. Kae ʼe lagi matataku ʼihi naʼa fakalainoaʼi natou e ʼonatou kaiga peʼe ko tonatou kolo mo kapau ʼe natou faipalalau mo tatou.
Ko ʼihi ʼae ʼe tou felaveʼi mo natou neʼe lagi natou tau mo he ʼu aluʼaga fakalotomamahi ʼaupito. ʼE ui e te misionea ʼe higoa ko Kim, ko te tokolahi ʼi tona telituale kua puli fuli ʼanatou meʼa ʼuhi ko te tau. ʼE mole ʼi ai hanatou ʼamanaki ki te ka haʼu. ʼE natou lotovaivai pea ʼe mole kei natou falala ki he tahi. ʼI te telituale ʼaia, ʼe faigaʼi tuʼumaʼu e ʼihi ke natou fakagata te faifakamafola ʼa te kau Fakamoʼoni ʼa Sehova. Pea ʼi te tahi ʼaho, neʼe gaohi koviʼi ia Kim lolotoga tana faifakamafola.
Kae ʼe taupau feafeaʼi e Kim ia tona manavaʼofa logo la tona gaohi koviʼi e te hahaʼi? ʼE faiga tuʼumaʼu ke ina manatuʼi ia Taaga Lea 19:11, ʼae ʼe ui fenei ai: “Ko te tagata ae e poto e mole itaita vave.” Ka ina fakakaukauʼi te ʼu aluʼaga ʼae neʼe hoko ki te hahaʼi ʼo tona telituale, ʼe tokoni ki ai ke ina maʼu te manavaʼofa. Pea ʼe mole ko te hahaʼi fuli ʼae ʼe agakovi. He ʼe ʼi te telituale pe ʼaia, ʼe ʼi ai ʼana ʼaʼahi.
ʼE feala ke tou fai te ʼu fehuʼi ʼaeni: ‘Ka na pau la neʼe mole au iloʼi te moʼoni, ʼe au tali anai koa ke faifakamafola mai te kau Fakamoʼoni ʼa Sehova?’ Ohage la, ʼe feafeaʼi moka neʼe tou logo ki he ʼu loi ʼo ʼuhiga mo te kau Fakamoʼoni? ʼE mahino ia, ʼe mole tou toe tali leleiʼi anai te moʼoni pea ʼe ʼaoga anai ke natou maʼu te manavaʼofa ʼo ʼuhiga mo tatou. Neʼe ui e Sesu ʼe tonu ke tou fai ki te hahaʼi te aga ʼae ʼe tou loto ke natou fai mai. Koia ʼae ʼe tonu ai ke tou faigaʼi ke tou lotomahino, ke tou kataki fualoa mo natou tatau aipe pe faigataʼa.—Mateo 7:12.
FAʼIFAʼITAKIʼI TE MANAVAʼOFA ʼA PAULO
Tatau aipe pe neʼe fakafeagai malohi te hahaʼi ki te faifakamafola ʼa Paulo, kae neʼe manavaʼofa ia Paulo kia natou. Kotea tona tupuʼaga? Koteʼuhi, neʼe mole galo kia ia tona maʼuli ʼafeā. Neʼe ina ui fenei: “ ʼI te temi muʼa neʼe au laukovi ki te ʼAtua, mo fakatagaʼi tana hahaʼi pea mo agapauʼu. Kaʼe neʼe manavaʼofa ia Kilisito kia au he neʼe au fai te ʼu meʼa ʼaia ʼi te fakapoʼuli pea neʼe mole au maʼu te tui.” (1 Timoteo 1:13) Neʼe iloʼi e Paulo neʼe lahi te manavaʼofa ʼae ʼa Sehova mo Sesu kia ia. Pea neʼe feala ke lotomahino ki te hahaʼi ʼae neʼe natou fia taʼofi tana faifakamafola, he neʼe lagi ina manatuʼi neʼe feia pe la mo ia ʼi muʼa atu.
ʼI ʼihi temi, neʼe felaveʼi ia Paulo mo he hahaʼi neʼe tui malohi ki te ʼu akonaki loi. Kotea ʼae neʼe ina logoʼi Gaue 17:16, ʼi tana nofo ʼi Ateni, neʼe “ita leva ʼi tana sio ki te fonu ʼo te ʼu taula ʼatua ʼi te kolo.” Kae, neʼe fakaʼaogaʼi e Paulo ia te tupuʼaga ʼaia ʼo tona ita moʼo akoʼi te hahaʼi. (Gaue 17:22, 23) Neʼe ina fakaalu tahi tana faʼahiga faifakamafola ki te faʼahiga hahaʼi kehekehe “ke feala ai [hana] haofaki ʼihi ʼi he aluʼaga pe.”—1 Kolonito 9:20-23.
ʼi tona loto? ʼE tou lau iaʼE feala ke tou faʼifaʼitakiʼi ia Paulo moka tou faifakamafola ki te hahaʼi ʼae ʼe mole natou tali te logo lelei peʼe kia natou ʼae ʼe tui ki ni akonaki loi. Tou fakaʼaogaʼi te ʼu faʼahi ʼae ʼe tou iloʼi ʼo ʼuhiga mo natou, ʼo tou tokoni ke natou ako “te ʼu logo lelei ʼo he meʼa ʼe lelei age.” (Esaia 52:7, MN) Ko te tuagaʼane ʼe higoa ko Dorothy ʼe ina ui fenei: “ ʼI tamatou telituale, ko te tokolahi neʼe akoʼi age kia natou ko te ʼAtua ʼe ko he tuʼi fakamau ʼe agafefeka. ʼE au fakamalō ki te hahaʼi ʼaia ʼuhi ko tanatou tui malohi ki te ʼAtua pea ʼe au fakaha age leva pe kotea ʼae ʼe ui ʼi te Tohi-Tapu ʼo ʼuhiga mo te ʼofa ʼo Sehova mo ʼana fakapapau ki te ka haʼu.”
“KE KE HAGA MALO ʼI TE KOVI ʼAKI TE LELEI”
ʼI te kua ovi mai ʼo te fakaʼosi, ʼe mahino papau ia, “ ʼe ʼaʼasili kovi age” anai te aga ʼa te hahaʼi. (2 Timoteo 3:1, 13) Kae ʼe tonu ke tou taupau totatou manavaʼofa mo totatou fiafia logo la te aluʼaga ʼaia. ʼE feala ke foaki mai e Sehova ia te malohi ke tou “haga malo ʼi te kovi ʼaki te lelei.” (Loma 12:21) ʼE ui e te pionie ʼe higoa ko Jessica, ʼe felaveʼi tuʼumaʼu mo he hahaʼi fiameʼameʼa pea ʼe natou vaʼi tatou mo tatatou logo. ʼE ina toe ui fenei: “ ʼE ko he meʼa fakapiko ʼaia. Ka au kamata haku faipalalau, ʼe au faikole fakalogologo ke tokoni mai ia Sehova ke au maʼu tana faʼahiga sio ki te kilisitiano ʼae ʼe ma faipalalau.” ʼE tokoni te faʼahi ʼaia kia Jessica, ke ina tuku keheʼi ʼana manatu kae fakakaukau ki te faʼahiga tokoni ʼae ʼe feala ke ina foaki ki te kilisitiano ʼaia.
Tou haga kumi ia natou ʼae ʼe natou fia maʼu te moʼoni
ʼAki te temi, ʼe tali anai e ʼihi ke tou tokoni kia natou ke natou iloʼi te moʼoni
ʼE tonu foki ke tou faigaʼi ke tou fakalotomalohiʼi ʼotatou tehina mo tuagaʼane moka tou faifakamafola mo natou. ʼE ui e Jessica moka tali koviʼi he tahi ia natou ʼi te faifakamafola, ʼe ina faigaʼi ke mole ina tokagaʼi te faʼahi ʼaia. Kae palalau ʼo ʼuhiga mo he ʼu meʼa ʼe fakatupu fiafia. Ohage la, ʼe palalau ki te ʼu fua lelei ʼo tatatou faifakamafola logo la tona mole tali leleiʼi e ʼihi.
ʼE mahino lelei ia Sehova ki te faigataʼa ʼo tatatou faifakamafola ʼi ʼihi temi. Kae ʼe fiafia moka tou faʼifaʼitakiʼi ia tona manavaʼofa. (Luka 6:36) ʼE tou iloʼi, ʼe mole manavaʼofa anai mo kataki fualoa ia Sehova ki te hahaʼi ʼo te malama ʼaeni ki te heʼe gata. Pea ʼe feala ke tou tui papau ʼe ina pulihi anai te tuʼu ʼaeni ʼi tona temi totonu. Kae ʼi temi nei, ʼe maʼuhiga tatatou faifakamafola. (2 Timoteo 4:2) Koia, tou haga faifakamafola ʼaki he faʼafai pea mo tou maʼu te manavaʼofa ki “te faʼahiga tagata fuli pe.”