Neʼe Mate Moʼoni Koa Ia Sesu Maʼa ʼAku?
ʼE TOU maʼu ʼi te Tohi-Tapu te ʼu palalau neʼe fai e te ʼu tagata “neʼe tatau te ʼu meʼa ʼae neʼe [natou] logoʼi mo te ʼu meʼa ʼae ʼe tou logoʼi.” (Sakp. 5:17) Ohage la, ʼe tou mahino gafua ki te ʼu palalau ʼaeni neʼe fai e Paulo ia Loma 7:21-24: “Moka ʼe au fia fai te meʼa ʼae ʼe lelei, ʼe ko te meʼa ʼae ʼe kovi ʼae ʼe nofo ia au. . . . Tagata fakaʼofaʼofa ʼae ko au!” ʼE ko he fakalotomalohi tatatou iloʼi ʼae neʼe maʼu e Paulo ia he ʼu manatu feia ʼo ʼuhiga mo ia totonu, moka tou tauʼi ʼotatou vaivaiʼaga.
Neʼe toe fai e Paulo ʼihi palalau ʼo ina fakaha ai te ʼu meʼa ʼae neʼe ina logoʼi. Neʼe ina ui, ko te ʼAlo ʼo te ʼAtua, neʼe ʼofa kia ia pea neʼe ina foaki ia ia totonu maʼa ia. (Kalate 2:20) ʼE kotou toe logoʼi koa te faʼahi ʼaia? ʼE lagi tahitahiga takotou logoʼi te faʼahi ʼaia.
Kapau ʼe tou lotovaivai pea mo tou ui ʼe mole hotatou ʼuhiga ʼuhi ko ʼatatou agahala ki muʼa atu, ʼe faigataʼa anai hatatou tui ʼe ʼofa Sehova kia tatou pea mo fakamolemole mai. ʼE feala pe la ke tou toe manatu ko te sakilifisio ʼo Sesu ʼe mole ko he meʼa ʼofa ia maʼa tatou. ʼE loto koa e Sesu ke tou manatu feia ʼo ʼuhiga mo te totogi? Kotea ʼae ʼe feala ke tokoni mai ke tou maʼu ai te manatu ʼa Sesu ʼo ʼuhiga mo te totogi? Tou tali ki te ʼu fehuʼi ʼaia ʼe lua.
TE MANATU ʼA SESU ʼO ʼUHIGA MO TANA SAKILIFISIO
ʼE loto e Sesu ke tou mahino neʼe ina foaki tona maʼuli maʼa tatou takitokotahi. He koʼe ʼe tou tui papau ki te faʼahi ʼaia? Tou fakakaukauʼi age muʼa te aluʼaga neʼe hoko ia Luka 23:39-43. Neʼe ʼi ai te tagata neʼe tutuki ʼi te pou fakamamahi ovi kia Sesu. Neʼe ina iloʼi neʼe ina fai te ʼu aga ʼe kovi. Neʼe lagi kovi ʼaupito te aga ʼae neʼe ina fai, koteʼuhi ʼi te agamahani ko natou ʼae neʼe agakovi ʼaupito, ʼe tutuki ʼi he pou fakamamahi. Neʼe tuʼania ʼaupito te tagata, koia neʼe ina kole mamahi fenei ai kia Sesu: “Manatuʼi au moka ke hu ki tou Puleʼaga.”
Kotea ʼae neʼe fai e Sesu? Logo la tona mamahi, kae neʼe maliu tona ʼulu ʼo sio ki te tagata. Kua vave mate pe ia Sesu, kae logo la te aluʼaga ʼaia neʼe malimali pea mo ina fakalotomalohiʼi te tagata ʼo ina ui fenei: “ ʼE au tala moʼoni atu kia koe ʼi te ʼaho nei, ʼe ke nofo anai mo au ʼi te Palatiso.” Neʼe feala pe he ui age e Sesu ki te tagata, “ko te Foha ʼo te tagata, neʼe . . . haʼu . . . ke ina . . . foaki tona maʼuli ko he totogi maʼa te tokolahi.” (Mat. 20:28) Kae neʼe loto e Sesu ke mahino te tagata neʼe ina momoli tona maʼuli maʼa ia totonu. Pea neʼe ina ui ki te tagata ʼe maʼuli anai ʼi te palatiso ʼi te kele.
ʼE mahino papau ia, neʼe loto e Sesu ke mahino te tagata, ko te sakilifisio ʼae ka ina momoli ʼe toe fua lelei pe anai kia ia. Neʼe fai e Sesu te ʼu palalau ʼaia kae neʼe heʼeki maʼu e te tagata ʼaia te fealagia ʼae ke tauhi ki te ʼAtua. Ko te tupuʼaga la ʼaia ʼo tatatou tui papau ʼe loto e Sesu ke toe mahino kia ia ʼae kua papitema pea mo tauhi ki te ʼAtua, ʼe fua lelei kia ia tana sakilifisio. Kotea ʼae ʼe feala ke tokoni mai ke tou tui ai ki te ʼu fua lelei ʼae ʼe tou maʼu mai te sakilifisio ʼo Kilisito logo la ʼatatou agahala neʼe tou fai ʼi muʼa atu?
KOTEA ʼAE NEʼE TOKONI KIA PAULO?
Neʼe fakatotonu e Sesu kia Paulo ke alu ʼo faifakamafola, koia neʼe feala ai kia Paulo ke mahino 1 Tim. 1:12-14) Neʼe foaki e Sesu kia Paulo te gaue ʼae ko te faifakamafola. ʼI tana fai te faʼahi ʼaia, neʼe fakaha ki ai e Sesu tana lotomanavaʼofa, mo tona ʼofa pea mo tana falala ʼae kia ia. Neʼe toe kole mai e Sesu kia tatou ke tou olo ʼo faifakamafola. (Mat. 28:19, 20) Koia ʼaki tatatou olo ʼae ʼo faifakamafola, ʼe tou toe mahino koa ohage ko Paulo neʼe mate ia Sesu maʼa tatou?
neʼe mate ia Sesu maʼana. ʼO feafeaʼi? Neʼe ina ui fenei: “ ʼE au fakafetaʼi kia Kilisito Sesu totatou ʼAliki, ʼae neʼe ina foaki mai kia au te malohi, he neʼe sio ʼe au agatonu ʼo ina hinoʼi au ki he gaue taputapu, logo la ʼi te temi muʼa neʼe au laukovi ki te ʼAtua, mo fakatagaʼi tana hahaʼi pea mo agapauʼu.” (Ko Albert ʼae neʼe fakamavae ʼi te moʼoni lolotoga teitei taʼu ʼe 34 pea kua toe liliu mai nei kia Sehova. ʼE ina ui, ‘ ʼe mole feala ke ina galoʼi te ʼu aga kovi ʼae neʼe ina fai ki muʼa atu. Kae ka faifakamafola, ʼe ina logoʼi ohage ko te apositolo ko Paulo, ko Sesu ʼae neʼe ina fakatotonu ke alu ʼo faifakamafola. Neʼe lotomalohi ai pea neʼe lahi age tona fiafia ʼo ʼuhiga mo ia, mo tona maʼuli pea mo tona ka haʼu.’—Pes. 51:5.
Ka kotou ako te Tohi-Tapu mo te hahaʼi, kotou fakalotomalohiʼi ia natou ʼo kotou fakaha age ʼe manavaʼofa pea mo ʼofa ia Sesu kia natou
Neʼe lahi te ʼu aga ʼe kovi neʼe fai e Allan, pea neʼe agamalohi ʼi muʼa ʼo tana iloʼi te moʼoni. Neʼe ina ui fenei: “ ʼE kei au manatuʼi pe te ʼu mamahi ʼae neʼe au fai ki te hahaʼi, pea ʼi ʼihi temi ʼe au lotovaivai ai. Kae ʼe au fakamalo kia Sehova ʼi tana fakafealagia ki he tagata agahala ohage ko au ke au fakamafola te logo lelei ki te hahaʼi. Ka tali e te hahaʼi ia te logo lelei, pea ʼe au manatuʼi te lahi ʼo te ʼofa ʼo Sehova mo tana agalelei. ʼE hage kia au, ʼe fakaʼaogaʼi au e Sehova ke au tokoni ki te hahaʼi ʼae neʼe natou fai he ʼu aga ʼe kovi ohage pe ko au ʼi muʼa atu.”
Ka tou faifakamafola, ʼe tou fakaʼaogaʼi totatou malohi moʼo fai he ʼu gaue ʼe lelei pea mo tou maʼu he ʼu manatu ʼe lelei. Koteʼuhi ʼe tou logoʼi ai te manavaʼofa, mo te ʼofa pea mo te falala ʼae ʼe maʼu e Sesu ʼo ʼuhiga mo tatou.
ʼE LAHI AGE IA SEHOVA ʼI TOTATOU LOTO
ʼE hoko atu pe anai te fakatuʼā ʼo tatou e totatou loto ʼo ʼuhiga mo ʼatatou hala ʼae neʼe tou fai ki muʼa atu ʼo kaku ki te pulihi ʼo te malama ʼa Satana. Kotea anai ka tokoni mai ke tou lava tauʼi te ʼu faʼahiga manatu ʼaia?
Ko Jean, neʼe ina faifakafufu te ʼu aga ʼe kovi ʼi tana kei finemui. ʼE ina ui fenei: “ ʼE au fiafia koteʼuhi ‘ ʼe maʼoluga age te ʼAtua ʼi ʼotatou loto.’ ” (1 Soa. 3:19, 20) ʼE toe feia mo tatou, ʼe feala ke tou fiafia ʼi tatatou iloʼi ʼae ʼe iloʼi lelei age e Sehova mo Sesu totatou ʼuhiga agahala ia tatou totonu. Tou manatuʼi neʼe nā momoli te totogi ʼaki tonā ʼofa. Pea neʼe mole nā fai te faʼahi ʼaia maʼa he ʼu hahaʼi haohaoa kae maʼa te kau agahala ʼae neʼe fakahemala.—1 Tim. 1:15.
Ka tou metitasio ʼi te faikole ki te faʼahiga tokaga ʼa Sesu ki te hahaʼi agahala, pea moka tou faiga malohi ʼi te faifakamafola ʼae neʼe fakatotonu mai e Sesu, ʼe tou tui papau ai neʼe foaki e Sesu ia te totogi maʼa tatou takitokotahi. Kapau ʼe tou fakahoko te gaue ʼaia, ʼe feala pe ke tou ui ohage ko Paulo: “Neʼe ʼofa [Sesu] ia au pea neʼe ina foaki ia ia totonu maʼaku.”