Kua Kotou Iloʼi Koa?
He koʼe neʼe fakahigoaʼi e Sesu ia te kau fakatau manu ʼi te fale lotu ʼi Selusalemi ko he “kau kaihaʼa”?
ʼI TE Evaselio ʼo Mateo ʼe tou lau fenei: “Neʼe hu ia Sesu ki te fale lotu pea neʼe ina kapu natou fuli ʼae neʼe faifakatau pea mo totogi ni koloa ʼi te fale lotu. Neʼe ina tokatokahi ai te ʼu laupapa ʼo te hahaʼi fetogi paʼaga pea mo te ʼu hekaʼaga ʼo natou ʼae neʼe fakatau lupe. Pea neʼe ina ui fenei age kia natou: “Kua tohi: ‘ ʼE fakahigoa anai toku ʼapi ko he fale faikole,’ kaʼe ʼe kotou fakaliliu koutou ko he fale ʼo te kau kaihaʼa.” ”—Mateo 21:12, 13.
ʼE fakaha ʼi te hisitolia neʼe agakaka ia te kau faifakatau koloa, he neʼe totogi kovi ʼosi te ʼu koloa ʼae neʼe natou fakatau. Ohage la, ʼi te agamahani, neʼe feala ki te kau masisiva ke natou toʼo hanatou ʼu kulukulu ki ʼanatou sakilifisio, he neʼe totogi lelei. Kaʼe, ʼe ui ʼi te ʼu tohi Fakasutea ʼafeā, ʼi te ʼuluaki sekulo, ko te totogi ʼo he ʼu kulukulu ʼe lua neʼe ko te foʼi tenalio aulo ʼe tahi. Neʼe ko te totogi ʼaia ʼa he tahi ʼe gaue ia ʼaho ʼe 25. Pea ʼi te kua totogi kovi ʼo te ʼu kulukulu, neʼe mole kei feala ai ki te kau masisiva ke natou toʼo hanatou ʼu kulukulu. (Levitiko 1:14; 5:7; 12:6-8) Neʼe ita lahi ai te Lapi ko Simeon ben Gamaliel. Koia, neʼe ina fakasiʼisiʼi ifo ai te ʼu sakilifisio ʼae neʼe tonu ke momoli e te kau Sutea. Pea neʼe toe hifo ai foki mo te totogi ʼo te ʼu kulukulu ʼe lua.
Ohage pe ko tatatou vakaʼi, neʼe manumanū ia te kau faifakatau ʼi te fale lotu pea neʼe natou agakaka. Koia neʼe tonu tonatou fakahigoaʼi e Sesu ko te “kau kaihaʼa.”