1. He koʼe ʼe tonu ke tou fakalogo ki te fakatokaga ʼae neʼe fai e Sesu?

NEʼE ui fenei e Sesu, ʼi tana lea fakapolofeta ʼo ʼuhiga mo te ʼu ʼaho fakamuli: “Kotou tokakaga kia koutou naʼa mafasia ʼokotou loto ʼi . . . te ʼu tuʼania ʼo te maʼuli.” (Luka 21:34) ʼE tonu ke tou fakalogo ki te fakatokaga ʼaia. Kotea tona tupuʼaga? He ʼe tou tau mo te ʼu aluʼaga ʼe fakatupu lotohoha, ohage pe ko te hahaʼi fuli.

2. Kotea te ʼu aluʼaga fakatupu lotohoha ʼe tonu ke tauʼi e ʼotatou tehina mo tuagaʼane?

² ’I ʼihi lakaga ʼe tou tau ai mo he ʼu tuʼuga fihifihia ʼi totatou maʼuli. Tou vakaʼi te ʼu aluʼaga ʼaeni ʼe lua. Ko Soane * ʼe ko he tehina ʼe tau mo he mahaki faigataʼa (sclérose en plaques). Pea neʼe lotomamahi ʼaupito ʼi tona liʼaki tona ʼohoana kae kua taʼu 19 tanā ʼohoana. Hili ʼaia pea mavae ʼona ʼofafine ʼe toko lua ʼi te moʼoni. Neʼe toe tau ia Bob mo Linda mo ni faigataʼaʼia ʼi he moʼi temi pe ʼe tahi. Neʼe fakamavae naua ʼi ʼonā fale gaue pea neʼe maʼua ke nā mavae mai tonā ʼapi. Pea tahi, neʼe toe fakaha age e te toketa kia Linda ʼe kau ʼi te mahaki mafu, pea ʼe feala pe ke mate ai. Pea neʼe ʼi ai te tahi mahaki faigataʼa neʼe tau mo ia ʼo ina fakavaivaiʼi ai tona sino.

3. Ka tou lau ia Filipe 4:6, 7, kotea ʼae ʼe feala ke tou tui papau ki ai?

³ Ko Sehova ’e ko totatou Tupu’aga pea mo tatatou Tamai manavaʼofa. Koia ʼe tou tui papau ai ʼe mahino ia Sehova ki te ʼu mamahi ʼae ʼe tou tau mo ia ʼuhi ko totatou lotohoha. ʼE fia tokoni mai ke tou lava tauʼi ʼotatou fihifihia. (Lau ia Filipe 4:6, 7.) ʼE lahi te ʼu fakamatala ʼi te Tohi-Tapu ʼo ʼuhiga mo ni kaugana ʼa te  ʼAtua neʼe natou tau mo ni aluʼaga fakatupu lotohoha. ʼE toe fakaha mai pe neʼe tokoni feafeaʼi e Sehova kia natou ke natou lava tauʼi ʼonatou fihifihia. Tou vakaʼi he ʼu faʼifaʼitaki.

4. Kotea te ʼu fihifihia neʼe tau mo Elia, pea neʼe kotea ʼae neʼe ina logoʼi ʼo ʼuhiga mo Sehova?

⁴ Neʼe tauhi ia Elia kia Sehova ʼi te ʼu temi faigataʼa pea neʼe lahi te ʼu aluʼaga kovi neʼe tonu ke ina tauʼi. Neʼe ʼohoana ia te Hau ko Akapo pea mo Sesapele, ko te fafine agakovi neʼe tauhi ki te ʼatua hala ko Paale. Neʼe nā fakamafola ia te tauhi ʼae kia Paale ʼi te fenua katoa, pea neʼe lahi te ʼu polofeta ʼa Sehova neʼe nā fakapogi. Kae neʼe hao ia Elia. Pea tahi, neʼe toe hao ia Elia mai te hoge meʼa kai he neʼe falala kia Sehova. (1 Hau 17:2-4, 14-16) Neʼe toe falala kia Sehova ʼi te temi ʼae neʼe ina tauʼi ai ia te ʼu polofeta ʼa Paale pea mo ʼana kau atolasio. Neʼe ina fakalotomalohiʼi ia te kau Iselaele ke natou tauhi kia Sehova. (1 Hau 18:21-24, 36-38) Neʼe fakaha tuʼa lahi e Sehova kia Elia tana tokoni ʼae kia ia ʼi te ʼu temi fakamataku ʼaia.

5-6. Ka kotou lau ia 1 Hau 19:1-4, kotea ʼae neʼe logoʼi e Elia, pea neʼe fakaha feafeaʼi e Sehova tona ʼofa kia ia?

⁵ Lau ia 1 Hau 19:1-4. Neʼe mataku ia Elia ʼi te temi ʼae neʼe ui ai e te Fineʼaliki ko Sesapele ʼe ina matehi anai ia ia. Koia neʼe hola ki te potu fenua ko Peele-Sepa. ʼI te lahi fau ʼo tana lotovaivai, neʼe ina kole ki te ʼAtua ke ina ‘toʼo atu tona maʼuli.’ He koʼe neʼe lotovaivai feia ia Elia? He neʼe ko te tagata heʼe haohaoa pea “neʼe tatau te ʼu meʼa ʼae neʼe ina logoʼi mo te ʼu meʼa ʼae ʼe tou logoʼi.” (Sakp. 5:17) Neʼe lagi lahi fau tana lotohoha pea mo vaivai ʼaupito ai. Neʼe  lagi manatu ia Elia ʼe mole he ʼuhiga ʼo tana faiga ʼae ke tau maʼa te tauhi maʼa, pea neʼe mole he ʼu fetogi ʼi Iselaele pea ko ia tokotahi pe ʼae ʼe kei tauhi kia Sehova. (1 Hau 18:3, 4, 13; 19:10, 14) ʼE lagi tou punamaʼuli ki te aga ʼa te polofeta ʼaia, kae neʼe mahino ia Sehova ki te ʼu meʼa ʼae neʼe ina logoʼi.

⁶ Neʼe mole valoki e Sehova ia Elia ʼuhi ko tana fakaha age ia te ʼu meʼa ʼae ʼe ina logoʼi ʼi tona loto. Kailoa, kae neʼe tokoni ki ai ke ina toe maʼu he malohi. (1 Hau 19:5-7) Pea ki muli age leva, neʼe fakatonutonuʼi e Sehova ʼaki he agalelei te faʼahiga manatu ʼa Elia, ʼo ina fakaha age tona mafimafi. Neʼe ina ui age kia ia ʼe kei toe te toko 7 000 kau Iselaele ʼe mole natou fia tulolo kia Paale. (1 Hau 19:11-18) Neʼe lahi te ʼu aluʼaga neʼe fakaha age ai e Sehova tona ʼofa kia Elia.

7. He koʼe ʼe tou lotomalohi moka tou tokagaʼi te haga ʼa Sehova ʼo tokoni kia Elia?

⁷ ’E kotou tau koa mo he alu’aga ’e fakamataku? ’E ko he alu’aga fakalotomalohi tatatou iloʼi ʼae neʼe mahino ia Sehova ki te ʼu meʼa ʼae neʼe logoʼi e Elia ʼi tona loto. Koia ʼe tou tui papau ai ʼe mahino ia Sehova ki tatatou lotohoha pea mo tatatou lotomamahi. ʼE ina iloʼi ʼotatou tuʼakoi, mo ʼatatou manatu pea mo te ʼu meʼa ʼae ʼe tou logoʼi ʼi ʼotatou loto. (Pes. 103:14; 139:3, 4) Kapau ʼe tou falala kia Sehova ohage pe ko Elia, ʼe tokoni mai anai ke tou lava tauʼi te ʼu aluʼaga ʼae ʼe tou lotohoha ai.—Pes. 55:23.

8. ʼE tokoni feafeaʼi atu anai ia Sehova ke ke lava tauʼi he aluʼaga ʼe fakatupu lotohoha?

⁸ Ka tou lotohoha ʼaupito ’e feala pe ke tou ma’u he ’u manatu ’e fakatupu lotovaivai. Kapau koia ʼaia, ʼaua naʼa galo kia koe, ʼe fia tokoni atu ia Sehova kia koe. ʼO feafeaʼi? ʼE ina uga koe ke ke fakaha age ʼou fihifihia pea mo kole tokoni age kia te ia. ʼE ina tali atu anai ki ʼau faikole. (Pes. 5:4; 1 Pet. 5:7) Koia faikole tuʼumaʼu kia Sehova mo ke vetevete age ki ai ʼou fihifihia. ʼE mole ina tali fakahagatonu atu anai ohage ko tana fai kia Elia, kae ʼe tali atu anai ʼaki tana Folafola te Tohi-Tapu pea mo tana kautahi. ʼE feala ke tou maʼu he fakalotomalohi ʼi tatatou lau ia te ʼu fakamatala ʼi te Tohi-Tapu pea mo ke maʼu he ʼamanaki lelei. ʼE feala pe ke toe fakalotomalohiʼi koe e ʼou tehina mo tuagaʼane.—Loma 15:4; Hep. 10:24, 25.

9. ʼE lava tokoni feafeaʼi atu he tahi ʼe kotou falala ki ai?

⁹ Neʼe ui e Sehova kia Elia ke ina foaki age he koga ʼo tana gaue kia Eliseo. ʼI tana fai te faʼahi ʼaia, neʼe haga ia Sehova ʼo foaki age kia Elia hona kaumeʼa lelei, neʼe tokoni kia ia ʼi te ʼu temi ʼae neʼe lotovaivai ai. ʼE toe feia pe mo tatou, kapau ʼe tou fakaha age ʼotatou fihifihia ki he tahi ʼe tou falala ki ai, ʼe tokoni mai anai ke tou lava tauʼi totatou lotomamahi. (2 Hau 2:2; Taag. 17:17) Kapau ʼe ke manatu ʼe mole he tahi ʼe feala ke ke fakaha ki ai ʼou fihifihia, kole kia Sehova ke tokoni atu ke ke maʼu he tehina peʼe ko he tuagaʼane kua fotufotuʼa ʼi te faʼahi fakalaumalie, ʼe feala anai ke tokoni atu mo ina fakalotomalohiʼi koe.

10. He koʼe ʼe tou lotomalohi moka tou lau ia te hisitolia ʼo Elia? Kotea te tokoni ʼe tou maʼu mai ia Esaia 40:28, 29?

¹⁰ Neʼe tokoni ia Sehova kia Elia ke ina lava tauʼi ʼona tuʼania pea mo tauhi agatonu kia te ia lolotoga ni taʼu. ʼE tou lotomalohi moka tou lau ia te hisitolia ʼo Elia. ʼE feala pe ke tou fakalaka ʼi he ʼu aluʼaga ʼe fakatupu lotohoha, ʼo tou lotomamahi ai pea mo vaivai ʼaupito ai. Kae kapau ʼe tou falala kia Sehova, ʼe tokoni mai anai ke tou maʼu ia te malohi ʼae ʼe ʼaoga ke tou haga tauhi kia te ia.—Lau ia Esaia 40:28, 29.

11-13. Kotea ʼae neʼe logoʼi e te ʼu kaugana ʼa Sehova ʼi te lahi fau ʼo tanatou lotohoha?

¹¹ Neʼe ʼi ai te tahi ʼu tagata mo ni fafine ʼi te Tohi-Tapu neʼe natou lotomamahi ʼaupito.  Ohage la ko Ana, neʼe ufiufi he neʼe ko te fafine paʼa, pea neʼe manukiʼi ia ia e Penina ʼuhi ko tana mole maʼu hana fanau. (1 Sam. 1:2, 6) ʼI te lahi fau ʼo tana lotomamahi, neʼe tagi mamahi ai pea neʼe mole kei kai.—1 Sam. 1:7, 10.

¹² ʼI ʼihi temi, neʼe lotohoha ʼaupito ia te Hau ko Tavite. Fakakaukauʼi age muʼa te ʼu faigataʼaʼia ʼae neʼe tau mo ia. Neʼe vevele tona loto ʼuhi ko te ʼu agahala ʼae neʼe ina fai. (Pes. 40:13) Neʼe fakafeagai tona foha ʼofaina ko Apesalone kia ia, pea neʼe matehi ai leva. (2 Sam. 15:13, 14; 18:33) Neʼe kakaʼi ia ia e tona kaumeʼa lelei. (2 Sam. 16:23–17:2; Pes. 55:13-15) Neʼe lahi te ʼu pesalemo neʼe tohi e Tavite neʼe ina fakamatala ai tana lotovaivai pea mo tana falala katoa kia Sehova.—Pes. 38:6-11; 94:17-19.

¹³ Ki muli age, neʼe ʼi ai te tagata faipesalemo neʼe ina fia mulimuli ki te maʼuli ʼa te hahaʼi agakovi. ʼE feala pe ke tou ui neʼe ko he tahi ʼo te hakoga ʼa te Levite ko Asafe, neʼe gaue ʼi “te sagatualio o te Atua.” Neʼe lotomamahi ʼaupito ia te tagata faipesalemo, koia neʼe mole kei fiafia ai, pea neʼe kua manumanū ki he tahi age ʼu faʼahiga meʼa. Pea neʼe mole kei ina fakamaʼuhigaʼi tana tauhi ʼae ki te ʼAtua.—Pes. 73:2-5, 7, 12-14, 16, 17, 21.

14-15. Kotea te ako ’e tou ma’u mai ia Ana, mo Tavite pea mo te tagata faipesalemo?

¹⁴ Neʼe falala ia te ʼu kaugana ʼaia ʼe toko tolu kia Sehova. Neʼe natou faikole kia Sehova ʼaki ʼonatou loto katoa, ʼo natou fakaha age ʼonatou tuʼania. Neʼe natou fakaha fakahagatonu age te tupuʼaga ʼo tanatou lotohoha. Pea neʼe natou haga tauhi kia Sehova ʼi te fale tapu.—1 Sam. 1:9, 10; Pes. 55:23; 73:17; 122:1.

¹⁵ Neʼe tali ia Sehova kia natou takitahi, ʼaki he lotomanavaʼofa. Neʼe kua lotofimalie ia Ana. (1 Sam. 1:18) Neʼe tohi fenei e Tavite: “E lahi te u mamahi o te tagata agatonu, kae e  fakamauli ia ia e [Sehova] o heegata.” (Pes. 34:20) Pea ki muli age leva, neʼe mahino te tagata faipesalemo neʼe puke e Sehova ‘tona nima mataʼu,’ pea mo takitaki ia ia ʼaki ʼana tokoni ʼofa. Neʼe hiva fenei: “Kia au, ko taku fakaovi ki te Atua, koena toku koloa: E au fakatuu toku nonoaga i te Aliki, [ia Sehova].” (Pes. 73:23, 24, 28) Kotea te ako ʼe feala ke tou taʼofi mai tanatou faʼifaʼitaki? ʼI ʼihi temi ʼe tou lotohoha ʼaupito ʼuhi ko ʼotatou fihifihia. Kae ʼe feala pe ke tou tauʼi totatou lotohoha. ʼO feafeaʼi? Mo kapau ʼe tou metitasio ki te tokoni ʼa Sehova ki ʼana kaugana, pea mo tou faikole, mo falala pea mo tou fakalogo kia te ia.—Pes. 143:1, 4-8.

16-17. (1) He koʼe ʼe mole tonu ke tou nonofo mamaʼo mai ia Sehova pea mo tana hahaʼi? (2) Kotea ʼae ’e tonu ke tou fai ke tou toe ma’u ia te malohi?

¹⁶ ’E ’i ai te tahi ako ’e feala ke tou taʼofi mai te ʼu faʼifaʼitaki ʼaeni ʼe tolu. ʼE mole tonu ke tou nofo mamaʼo mai ia Sehova pea mo tana hahaʼi. (Taag. 18:1) Neʼe lotomamahi ʼaupito ia Nancy ʼi te temi ʼae neʼe liʼaki ai ia ia e tona ʼohoana. ʼE ina ui fenei: “ ʼI ʼihi ʼaho, neʼe mole au fia sio ki he tahi, pea neʼe mole au fia palalau ki he tahi. Neʼe tuʼa lahi ʼaupito te hoko ʼo te aluʼaga ʼaia. Kae neʼe au tokagaʼi ka au nofo tokotahi pea ʼe au lotomamahi ʼaupito.” Pea neʼe fetogi leva tona maʼuli ʼi te temi ʼae neʼe fia tokoni ai ki ʼihi.  ʼE ina fakamahino fenei: “Neʼe au fakalogo ki tanatou fakamatala mai ʼonatou fihifihia. Pea neʼe au tokagaʼi ai, ka au fagono ki ʼonatou mamahi, ʼe mole kei au tokagaʼi ʼoku mamahi.”

¹⁷ ’E feala pe ke tou toe ma’u he malohi mo kapau ’e tou kau ki te ’u fono. Ka tou olo ’o fono ’e tou tuku ai te faigamalie kia Sehova ke ‘tokoni mai pea ke ina fakapelepele’i’ tatou. (Pes. 86:17) ’E fakalotomalohi’i tatou e Sehova ’i te ’u fono ʼaki tona laumalie maʼoniʼoni, mo tana Folafola pea mo tana hahaʼi. Ka tou kau ki te ʼu fono ʼe tou “fefakalotomalohiʼaki.” (Loma 1:11, 12) Neʼe ui fenei e te tuagaʼane ʼe higoa ko Sophia: “Neʼe tokoni mai e Sehova pea mo ʼoku tehina mo tuagaʼane ke au hoko atu taku tauhi kia Sehova. Neʼe maʼuhiga ʼosi kia au te ʼu fono ʼo te kokelekasio. Neʼe au tokagaʼi, ka au lagolago lelei ki te gaue faifakamafola, pea mo taku kokelekasio, pea ʼe faigafua taku tauʼi toku lotohoha.”

18. Kotea ʼae ʼe feala ke foaki mai e Sehova moka tou lotovaivai?

¹⁸ Ka tou lotovaivai, tou manatu’i neʼe fakapapauʼi mai e Sehova ʼe ina fakafimalieʼi anai tatou ʼi te ka haʼu ʼo talu ai. Kae ʼe mole gata ai. Neʼe ina toe fakapapau mai ʼe tokoni mai anai ke tou lava tauʼi te ʼu aluʼaga ʼae ʼe fakatupu lotohoha kia tatou. ʼE ina foaki mai te “fakaʼamu pea mo te malohi” ke tou lava tauʼi ai tatatou lotovaivai pea ke tou maʼu he ʼamanaki lelei.—Flp. 2:13.

19. Kotea te fakapapau ʼe tou maʼu ia Loma 8:37-39?

¹⁹ Lau ia Loma 8:37-39. Neʼe fakapapau e te apositolo ko Paulo, ʼe mole feala anai ki he meʼa ke ina fakamavae tatou mai te ʼofa ʼo te ʼAtua. ʼE feafeaʼi hatatou tokoni ki ʼotatou tehina mo tuagaʼane ʼae ʼe tau mo ni aluʼaga ʼe fakatupu lotohoha? ʼE tou vakaʼi anai ʼi te alatike ʼae ka hoa mai, pe ʼe tou lava faʼifaʼitakiʼi feafeaʼi ia Sehova, ʼo tou lotomahino pea mo tokoni kia natou moka natou lotohoha pea mo tuʼania.