ʼI TE taʼu 1970, neʼe kelikeli ake e te hahaʼi alekeolosia ia te takaiga tohi neʼe tanumia kae neʼe vela tona koga ʼi Ein Gedi ʼi Iselaele, ovi atu ki te kauvai uesite ʼo te Tai Mate. Neʼe natou maʼu te takaiga tohi ʼi tanatou lolotoga keli ia te sinakoka, neʼe vela ʼi te temi ʼae neʼe holoʼi ai te kolo, lagi ʼi te vaha ʼo te taʼu 500 mo te taʼu 550 hili te temi ʼo Sesu. Neʼe kua faigataʼa ʼaupito te lau ʼo te takaiga tohi; neʼe mole feala tona folahi he ʼe neʼe feala pe ke mavetevete ʼo liu maumau ai. Kae, meʼa lelei he ʼe ʼaki te masini hila, te scanner 3-D, neʼe feala he “makafolafola” ʼo te takaiga tohi. ʼAki te polokalama faipāki foʼou, neʼe feala ke lau te meʼa ʼae neʼe tohi ai.

Kotea ʼae neʼe feala ke ʼasi ʼi te scanner? Ko te takaiga tohi ʼaia neʼe ko te koga tohi Fakatohi-tapu. Ko te ʼu toega ʼo te takaiga tohi ʼaia ʼe ko te ʼu vaega ʼo te ʼuluaki koga ʼo te tohi ʼo Levitiko. ʼI te ʼu vaega ʼaia, ʼe tuʼu ai te huafa totonu ʼo te ʼAtua ʼi te Fakahepeleo, ʼae ko te Tetalakalame (ia te ʼu mataʼi tohi ʼe fa). ʼE lau pe ko te takaiga tohi ʼaia neʼe tohi ʼi te vaha ʼo te taʼu 50 pea mo te taʼu 400 hili te temi ʼo Sesu, ko tona fakaʼuhiga kua ʼafeā ʼaupito age te takaiga tohi ʼaia ʼo te ʼu tohi Fakatohi-tapu Fakahepeleo ʼi te ʼu takaiga tohi ʼo te Tai Mate (peʼe ko te ʼu tohi ʼo Qoumrân). ʼE tohi fenei e Gil Zohar ʼi te nusipepa te Jerusalem Post: “ ʼI muʼa ʼo te maʼu ʼo te toega tohi ʼo Levitiko ʼo Ein Gedi, neʼe ko taʼu ʼe afe neʼe vaha mai te ʼu Takaiga Tohi ʼAfea ʼo te Tai Mate mo te tohi Codex ʼo Alep ʼae neʼe tohi ʼi te 10 sekulo ʼo te temi ʼo Sesu.” ʼI te sivi ʼo te kau popoto, ʼe fakaha e te takaiga tohi ʼaia ‘kua makafolafola,ʼ ko te ʼu tohi Massorétique ʼo te Torah “neʼe puipui fakalelei pe ia lolotoga te ʼu taʼu ʼe lauʼi afe, pea ko te ʼu kiʼi hala ʼa te kau hiki tohi neʼe mole fetogi ai te ʼuhiga ʼo te tohi.”