ʼI TE ʼamanaki fakalaka ʼa te kau Iselaele ʼi te Vai Tafe ʼo Solotane ke natou hu ki te kele ʼae neʼe fakapapau age e te ʼAtua, neʼe olo age te hahaʼi ʼo ʼaʼahi te kau Iselaele. Neʼe olo age te kau fafine matapule ʼo fakaafe te hahaʼi tagata ki te ʼu fakafiafia. Neʼe feala pe ke ui ko he aluʼaga ʼe tahitahiga tona hoko. Neʼe feala pe ke ui ʼe mole ʼi ai he meʼa ʼe kovi ʼi te fai kaumeʼa, mo te meʼe, pea mo te kai ʼo he meʼa kai kano lelei. Logo la ko te agaʼi fenua pea mo te aga ʼa te hahaʼi fafine ʼaia neʼe mole alu tahi mo te Lao ʼa te ʼAtua, kae neʼe lagi manatu fenei ʼihi tagata Iselaele: ‘ ʼE mole matou pikisia leva ʼi ʼanatou aga. ʼE matou tokakaga anai.ʼ

 Kotea ʼae neʼe hoko? ʼE ui fenei mai ʼi te Tohi-Tapu: “Nee kamata faiaga leva te hahai ki te u taahine o Moape.” ʼI tona fakahagatonu, neʼe loto e te ʼu fafine ʼaia ke atolasio te hahaʼi tagata Iselaele ʼaia ki te ʼu ʼatua hala. Pea neʼe hoko te faʼahi ʼaia. Koia, “nee to leva te hauhau o [Sehova] ki Iselaele.”—Num. 25:1-3.

Ko faʼahi ʼe lua neʼe maumauʼi ai te Lao ʼa te ʼAtua e te kau Iselaele ʼaia: Neʼe natou atolasio ki te ʼu taula ʼatua, pea neʼe natou fai te ʼu felaveʼi fakasino heʼe ʼaoga. Neʼe mamate ai te toko lauʼi afe ʼi tanatou talagataʼa. (Eke. 20:4, 5, 14; Tet. 13:6-9) He koʼe koa neʼe toe fakaʼofaʼofa te aga ʼae neʼe natou fai? Neʼe ko te lakaga pe ʼae neʼe hoko ai te aluʼaga ʼaia. Koteʼuhi neʼe kei toe pe he kiʼi temi siʼi pea fakalaka te toko lauʼi afe kau Iselaele ʼaia, ʼi te Solotane ke natou hu ki te Kele ʼo Te Fakapapau moka na pau la neʼe mole natou maumauʼi te Lao ʼa te ʼAtua.—Num. 25:5, 9.

ʼO ʼuhiga mo te ʼu aluʼaga ʼaia, neʼe tohi fenei e te apositolo ko Paulo: “Neʼe hoko te ʼu faʼahi ʼaia kia natou moʼo akoʼi ʼo tatou, pea neʼe tohi moʼo fakatokaga ʼo tatou, ia tatou ʼaeni ʼe maʼuʼuli ʼi te fakaʼosi ʼo te tuʼu ʼo te ʼu faʼahiga meʼa ʼaeni.” (1 Ko. 10:7-11) ʼE mahino ia, neʼe fiafia ʼaupito ia Satana ʼi te agahala mamafa ʼaia ʼa te kau Iselaele kia Sehova, ʼo mole kei natou tuha ai ke natou hu ki te Kele ʼo Te Fakapapau. ʼE ko he aga fakapotopoto kia tatou ke tou ako mai te fakatokaga ʼaia, he ʼe fiafia lahi anai ia Satana mo kapau ʼe ina lava taʼofi tatatou hu ki te malama foʼou ʼa te ʼAtua!

ʼE loto e Satana ke tuʼutamakiʼia te kau Kilisitiano, ʼo ina fakaʼaogaʼi he ʼu hele ʼe ina iloʼi lelei pea ʼe higa ai te hahaʼi tokolahi. Ohage pe ko tana fai e Satana ʼi muʼa atu mo te kau Iselaele, neʼe ina fakaʼaogaʼi te ʼu felaveʼi fakasino heʼe ʼaoga. ʼI totatou temi, ʼe kei higa aipe te tokolahi ki te hele fakatupu tuʼutamaki ʼaia. Ko te hele ʼaia ʼe feala ke ina taki ia tatou ki te aga heʼe ʼaoga ʼe ko te ʼu ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga.

Ia ʼaho nei, kua feala pe te sioʼi ʼo he ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga kae mole iloʼi mai e te hahaʼi. ʼI te temi muʼa, kapau ko he tahi neʼe fia sio ki he ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga neʼe tonu ia ke alu ki he fale senima ʼo te ʼu ʼata heʼe ʼaoga ʼaia, peʼe alu ki te ʼu fale koloa ʼae ʼe maʼu ai te ʼu tohi mo te ʼu ʼata heʼe ʼaoga. Neʼe mole lagi olo ki ai te hahaʼi ʼi tanatou ufiufi ʼae naʼa tokagaʼi age tanatou olo ki te ʼu taʼi fale ʼaia. Kae ʼi te temi nei, kua feala pe ki he tahi ʼaki te Neti ke sio ki he ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga ʼi tana fale gaue peʼe ʼi tana motoka. Pea ʼe lahi te ʼu fenua, kua feala pe ki he tagata peʼe ki he fafine ke sio ki he ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga, ʼi tona ʼapi.

Kae ʼe mole gata ai. ʼAki te ʼu kiʼi masini toʼotoʼo, kua faigafua age te mamata ki he ʼata peʼe ko he ʼu pāki ʼae ʼe ha ai te ʼu felaveʼi fakasino heʼe ʼaoga. Peʼe haʼele lalo te hahaʼi peʼe natou olo ʼi te ʼu papika, kua feala pe hanatou sioʼi he ʼu pāki heʼe ʼaoga ʼi ʼanatou kiʼi masini toʼotoʼo.

Mai tona aluʼaga ʼae kua faigafua pe te sioʼi fakafufu ʼo he ʼata peʼe ko he ʼu pāki ʼae ʼe ha ai te ʼu felaveʼi fakasino heʼe ʼaoga, ko te ʼu fua kovi ʼae ʼe maʼu mai ai kua lahi age ʼi te temi nei ʼi tona fai ki muʼa atu. Ko te tokolahi ʼae ʼe natou fai te faʼahi ʼaia, ʼe fakatupu kovi ki tonatou maʼuli fakataumatuʼa, ʼe mole kei natou fakaʼapaʼapa kia natou totonu pea ʼe mole kei lelei ʼonatou leʼo ʼo loto. Kae ʼe toe kovi age ia kia natou ʼae ʼe tauhi ki te ʼAtua he ʼe feala ai ke natou maumauʼi ʼanatou felogoi mo te ʼAtua. ʼE mahino papau ia, ko te sioʼi ʼo he ʼata peʼe ko he ʼu pāki heʼe ʼaoga ʼe fakatupu tuʼutamaki kia natou ʼae ʼe natou fai te faʼahi ʼaia. ʼE fakatupu lotomamahi ʼaupito. ʼE feala pe ʼaki te temi ke puli te ʼu mamahi ʼaia, kae ʼe toe feala pe foki ke galoʼi gataʼa.

Kae ʼe tonu ke tou mahino, ʼe foaki mai e Sehova te puipui ki te hele ʼaia ʼa Satana. Kapau ʼe tou loto ke puipui ia tatou e Sehova, ʼe mole tonu ke tou faʼifaʼitakiʼi te kau Iselaele ʼae neʼe tou talanoa ki ai ʼi muʼa atu kae ke tou ‘fakalogo’ kia te ia. (Eke. 19:5) ʼE tonu ia ke tou mahino lelei, ʼe fehiʼa te ʼAtua ki te ʼu ʼata peʼe ko he ʼu pāki heʼe ʼaoga. He koʼe ʼe tou ui te faʼahi ʼaia?

Fakakaukauʼi age muʼa te faʼahi ʼaeni: ʼI te temi muʼa, neʼe makehe ʼaupito te ʼu lao ʼae neʼe foaki e te ʼAtua ki te puleʼaga ʼo Iselaele. Neʼe hage te ʼu lao ʼaia ko he kaupa, moʼo puipui ʼo te kau Iselaele mai te hahaʼi ʼi ʼonatou tafaʼaki pea mo ʼanatou aga fakalialia. (Tet. 4:6-8) Neʼe fakaha fakalelei e te ʼu lao ʼaia te moʼoni maʼuhiga ʼo ʼuhiga mo Sehova: ʼE fehiʼa ki te ʼu felaveʼi fakasino heʼe ʼaoga.

 ʼI tana palalau ʼo ʼuhiga mo te ʼu aga heʼe ʼaoga ʼae neʼe fai e te ʼu puleʼaga ʼi te ʼu tafaʼaki, neʼe ui fenei e Sehova ki te kau Iselaele: “Ke aua naa kotou fai anai te mea ae e fai i te fenua o Esipito, ae nee kotou nonofo ai, pea e mole kotou fai anai te mea ae e fai i te fenua o Kanaane, ae e au ave koutou ki ai. . . . Kua uli te fenua ia natou; e tautea anai tana agakovi.” Maʼa te ʼAtua maʼoniʼoni ʼo Iselaele, neʼe fakalialia ʼaupito te faʼahiga maʼuli ʼa te kau Kanaane koia ʼae neʼe liliu ai tonatou fenua ʼo heʼe maʼa.—Lev. 18:3, 25.

Logo la neʼe kua tauteaʼi te kau Kanaane e Sehova, kae neʼe hoko atu te fakahoko ʼo te ʼu felaveʼi fakasino heʼe ʼaoga e te ʼu puleʼaga ʼi te ʼu tafaʼaki. Hili ki ai taʼu ʼe 1 500 tupu, neʼe ui e Paulo ko te ʼu puleʼaga ʼaia neʼe maʼuʼuli ai te kau Kilisitiano, neʼe “mole kei natou ufiufi.” Pea neʼe kua “natou fakahoko te ʼu aga fakalialia pea mo fai fakavalevale te ʼu aga heʼe maʼa fuli.” (Efe. 4:17-19) ʼE toe feia aipe ia ʼaho nei, tokolahi te hahaʼi ʼe natou fai he ʼu aga fakalialia ʼaupito kae ʼe mole natou ufiufi ai. Koia ʼe tonu ai ki te kau atolasio moʼoni ʼa te ʼAtua ke natou faiga fakamalotoloto ke ʼaua naʼa natou sioʼi he ʼu pāki ʼe ha ai te ʼu aga heʼe ʼaoga ʼo te hahaʼi ʼo te malama ʼaeni.

Ko te ʼu ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga ʼe ko he moamoagaʼi ʼo te ʼAtua. Neʼe ina fakatupu te tagata ki tona pāki. Koia ʼe feala ai ke tou faʼifaʼitakiʼi ʼona kalitate. Neʼe ina foaki mai te fealagia ʼae ke tou logoʼi te meʼa ʼae ʼe fakapotopoto ʼo ʼuhiga mo ʼae ʼe totonu peʼe ko te meʼa ʼae ʼe kovi. Neʼe fakapotopoto te ʼAtua ʼi tana foaki te ʼu lao ʼo ʼuhiga mo te ʼu felaveʼi fakasino. Neʼe ina fakatuʼutuʼu te ʼu felaveʼi fakasino ke gata pe ki he taumatuʼa kua ʼohoana ke nā fakafiafia ki te faʼahi ʼaia. (Sen. 1:26-28; Taag. 5:18, 19) Kae kotea ʼae ʼe fakaneke e te hahaʼi ʼae ʼe natou fai te ʼu ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga? ʼE natou meʼa noaʼi katoa te ʼu lekula ʼa te ʼAtua ʼo ʼuhiga mo te aga ʼae ʼe tonu ke fai. ʼEi, ko te hahaʼi ʼae ʼe natou fai te ʼu ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga ʼe mole natou fakaʼapaʼapa kia Sehova. ʼE fakamauʼi anai e te ʼAtua ia natou ʼae ʼe natou meʼa noaʼi ʼana lekula ʼi tanatou fai he ʼu meʼa ʼe fakaneke ai te ʼu aga heʼe ʼaoga.—Loma 1:24-27.

Kae ’e feafeaʼi ki te haha’i ʼae ’e natou lau peʼe natou sioʼi te ʼu ʼata peʼe ko te ʼu pāki heʼe ʼaoga? ’E lagi manatu e ʼihi ’e mole kovi ia. Kae ’i tona fakahagatonu, ’e natou lagolago ki te haha’i ʼae ’e natou meʼa noaʼi te ’u pelesepeto ’a Sehova. Lagi ’i tanatou kamata sio’i te ʼu ʼata pe’e ko te ʼu pāki heʼe ʼaoga, neʼe mole ko tanatou fakatuʼutuʼu ʼaia. Kae ’e fakaha lelei mai ʼi te Tohi-Tapu, ’e tonu ke fehihiʼa te kau atolasio ’o te ʼAtua moʼoni ki te ʼu ʼata peʼe ko te ʼu pāki  heʼe ʼaoga. ’E fakalotomalohi’i fenei tatou ’i te Tohi-Tapu: “Koutou ae e oofa [kia Sehova], koutou fehihia ki te kovi!”—Pes. 97:10.

Ma’ia mo natou ʼae ’e mole fia sio ki te ʼu ʼata kovi peʼe ko te ʼu pāki heʼe ʼaoga ’e feala pe ke mole natou lavaʼi tanatou mole sio ki ai. ’E tou agahala fuli, pea ’e lagi tonu ke tou faigaʼi ke tou teteke ʼatatou holi he’e ma’a. Pea tahi, ’e lagi faigaʼi e totatou ʼuhiga he’e haohaoa ke tou maʼu takuʼaki ke mole tou fakalogo ai ki te Lao ʼa te ʼAtua. (Sel. 17:9) Kae tokolahi kua natou liliu ko he kau Kilisitiano neʼe natou malo ’i te tau ʼaia. Ko he meʼa fakalotomalohi te iloʼi ʼo te fa’ahi ʼaia mo kapau ’e kotou faiga mo koutou ke kotou malo ʼi te tau ʼaia. Kotou tokaga’i pe ’e lava tokoni feafeaʼi atu te Folafola ’a te ʼAtua ke ʼaua naʼa kotou to ki te hele ’a Satana ʼae ko te sioʼi ʼo te ʼu ʼata kovi peʼe ko te ʼu pāki heʼe ʼaoga.

Ohage ko tona fakamatala ’i mu’a atu, tokolahi te kau Iselaele neʼe natou fakagafua ke taki natou e ʼonatou holi kovi ki te mala’ia. ’E feala pe ke hoko te meʼa ʼaia ia ʼaho nei. Neʼe ui e te tehina ’o Sesu ʼae ko Sakopo te tuʼutamaki ʼaia: “Ko te tagata takitokotahi [ʼe] . . . ina tuku tona holi totonu ke ina taki pea mo fakahalaʼi ia ia. Pea ka fafaga te holi, ʼe ina fakatupu te agahala.” (Sakp. 1:14, 15) Ka tuputupu he holi kovi ’i te loto ’o he tahi, ’e faifai pe anai pea agahala ia. Koia ’e tonu ai ke tou taʼaki te ’u manatu he’e ʼaoga ʼi tatatou fakakaukau, kae ʼaua naʼa tuʼu tatatou fakakaukau ʼi te ’u manatu he’e maʼa ʼaia.

Kapau ’e kotou tautau maʼu he ’u manatu he’e ma’a, kotou foimo fai he puleʼaki ki ai. Neʼe ’ui fenei e Sesu: “Pea kapau ʼe ke higa ʼuhi ko tou nima peʼe ko tou vaʼe, haga ʼo tuʼusi pea mo ke li mamaʼo. . . . Pea kapau ʼe ke higa ʼuhi ko tou mata, haga ʼo kapeʼi pea mo ke li mamaʼo.” (Mat. 18:8, 9) Neʼe mole ui mai e Sesu ke tou hifi totatou sino. Neʼe ina fakaʼaogaʼi te fakata ʼaia mo’o fakaha te maʼuhiga ʼae ke tou foimo pulihi te puleʼaki ʼaia ʼae ’e feala ke tou higa ai. Pea ʼe feafeaʼi hatatou lava maʼuliʼi te tokoni ʼaia ke ʼaua naʼa tou to ki te hele ʼae ko te sioʼi ʼo te ʼu ʼata kovi peʼe ko te ʼu pāki heʼe ʼaoga.

Kapau ’e kotou sio hala ki te ʼu ʼata kovi peʼe ko te ʼu pāki heʼe ʼaoga, ʼaua naʼa kotou manatu, ‘’E au poto pe au ’i te puleʼaki’i ’o te fa’ahi ʼaia.’ ʼAua naʼa kotou faihala. ʼE tonu ke kotou foimo sio kehe. Foimo matehi atu aipe te televisio mo te olotinatea pe’e ko te masini toʼotoʼo. Kae kotou fakakaukauʼi tafito he ʼu manatu ʼe maʼa. Ka kotou fai te fa’ahi ʼaia, ’e lava tokoni atu ke kotou lolomi takotou fakakaukau, ke ʼaua naʼa pule’i koutou e te ’u holi kovi.

Kapau la kua kotou lava liʼaki te sio’i ’o te ʼu ʼata kovi peʼe ko te ʼu pāki heʼe ʼaoga, kae ’e feafeaʼi la mo kapau ’e tautau hake ia koutou te manatu’i ’o te ’u meʼa ʼae neʼe kotou sio’i ki mu’a atu? ’E feala ia ke nofo fualoa he ’u pāki heʼe ʼaoga pe’e ko he ’u manatu ki te fa’ahi ʼaia ’i te ʼatamai ’o he tahi. ’E feala pe ia ke toe ha ’i he temi pe ia. Kapau ’e hoko he meʼa feia, ’e lagi kotou logo’i hakotou fia fai he aga he’e ma’a, ohage ko te mulu. Koia ke mahino kia koutou ’e feala pe ke hake fakapunamaʼuli atu ia he ’u fakakaukau feia, pea ke kotou nofo tokaga ki tona tau’i.

Kotou fakamalohi’i takotou fakatotonu ʼae ke kotou lolomi ʼakotou fakakaukau mo ʼakotou aga ke natou fakahoko te finegalo ’o te ʼAtua. Ke kotou hage ko te apositolo ko Paulo ʼae neʼe ina lava “tuki palaʼi [tona] sino pea mo [ina] taki ohage ko he kaugana.” (1 Ko. 9:27) ʼAua naʼa kotou tuku ke pule’i koutou e te ’u holi he’e ma’a. “Ke kotou fetogi tokotou ʼulugaaga ʼo kotou fakafoʼou tokotou ʼatamai, ke feala ai ke kotou vakavakaʼi pea mo iloʼi e koutou totonu ia te finegalo ʼo te ʼAtua, ʼae ʼe lelei, mo haohaoa pea mo ina leleiʼia.” (Loma 12:2) Kotou manatu’i: ’E mole kotou fiafia anai mo kapau ’e kotou fai he ’u aga he’e ʼaoga, kae ’e lahi age anai tokotou fiafia ’i takotou manatu pea mo fai te meʼa ʼae ’e loto ki ai te ʼAtua.

Kotou faiga’i ke kotou ma’u fakaʼatamai he ’u vaega Fakatohi-tapu. Ka hake ia koutou he ’u manatu kovi, kotou fakamalohi’i ia koutou ke kotou fakakaukau ki te ’u vaega ʼaeni. Ohage la ko te ’u vaega ’o Pesalemo 119:37; mo Esaia 52:11; mo Mateo 5:28; mo Efeso 5:3; mo Kolose 3:5; pea mo 1 Tesalonika 4:4-8. ’E tokoni atu anai te ʼu vaega ʼaeni, ke kotou fakaalu tahi takotou faʼahiga manatu mo te manatu ’a Sehova ’o ʼuhiga mo te sioʼi ʼo te ʼu ʼata kovi peʼe ko te ʼu pāki heʼe ʼaoga, pea mo kotou mahino ki te meʼa ʼae ’e loto e Sehova ke kotou fai.

’E feafeaʼi la mo kapau ʼi ʼihi temi ’e ke fia sioʼi pe’e ke fakakaukauʼi he ’u meʼa he’e ʼaoga? ʼE tonu ke ke mulimuli fakalelei ki totatou Faʼifaʼitakiʼaga ko Sesu. (1 Pet. 2:21) ’I tona ʼosi papitema, neʼe haga fakahala’i aipe ia Sesu e Satana. Kotea ʼae neʼe fai e Sesu? ’Aki te folafola, neʼe ina haga tekeʼi aipe te ’u fakahala ’a Satana. Neʼe ina ’ui fenei: “Alu Satana!” pea neʼe hoki tukunoaʼi ai ia ia e Satana. Ohage pe ko te teteke tuʼumaʼu e Sesu ia te fakahala ’a te Tevolo, pea ’e toe feia pe mo tatou ke ʼaua naʼa tou tuku ’i he temi ʼatatou faiga. (Mat. 4:1-11) ’E faiga’i tuʼumaʼu pe anai e Satana mo tona malama ke ina fakafonu totatou ʼatamai ʼaki he ’u manatu he’e ʼaoga. Kae ʼaua naʼa tou tuku te tau’i ’o te fa’ahi ʼaia. ’E feala pe ke tou malo ʼo tou liʼaki ai te sioʼi ʼo te ʼu ʼata kovi peʼe ko te ʼu pāki heʼe ʼaoga. Pea ʼaki te tokoni ’a Sehova, ’e feala ke tou malo ʼi totatou fili.

Kotou haga faikole kia Sehova mo kotou falala katoa kia te ia. Neʼe ui fenei e Paulo: “Kotou fakaha ki te ʼAtua ʼakotou kole, pea ko te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai ʼokotou loto pea mo ʼokotou fealagia fakakaukau ʼaki ia Kilisito Sesu.” (Flp. 4:6, 7) ’E foaki atu anai e te ʼAtua te tokalelei mo’o tokoni atu ke kotou haga lolomi te fia fai ’o te meʼa ʼae ’e kovi. Kapau ’e kotou fakaovi kia Sehova, pea “’e fakaovi atu anai kia koutou.”—Sakp. 4:8.

Kapau ʼe nofo te Tuʼi ʼo te ʼatulaulau mo tatou ʼe ko he puipuiʼaga lelei ʼaia ki te ʼu fakaneke kovi ʼa Satana. Neʼe ui fenei e Sesu: “ ʼE haʼu ia te pule ʼo te malamanei, pea ʼe mole feala ke ina puleʼi au.” (Soa. 14:30) He koʼe neʼe tui papau ia Sesu ki te faʼahi ʼaia? Koteʼuhi ʼi te tahi ʼaho, neʼe ina fakamahino fenei: “Ko Ia ʼae neʼe ina fekauʼi mai au ʼe fakatahi mo au. Neʼe mole ina liakī au koteʼuhi ʼe au fai tuʼumaʼu pe te ʼu meʼa ʼae ʼe ina leleiʼia.” (Soa. 8:29) Kapau ʼe ke kumi tuʼumaʼu ke ke fai te meʼa ʼae ʼe lelei kia Sehova ʼe mole ina liʼaki anai ia koe ʼi he temi. ʼAua naʼa ke to ki te hele ʼae ko te sioʼi ʼo te ʼu ʼata kovi peʼe ko te ʼu pāki heʼe ʼaoga he ʼe mole puleʼi ai anai koe e Satana.