ALATIKE AKO 49
ʼE ʼi Ai He Temi Ki Te Gaue Mo He Temi Ki Te Malolo
“Tou olo ki he koga meʼa lavaki ke tou malolo ai.” —MKO. 6:31.
KATIKO 143 Tou Haga ʼAlaʼala, Tauhi Mo Talitali
TE ʼU MANATU FAKANOUNOU *
1. Kotea te manatu ʼa te tokolahi ʼo ʼuhiga mo te gaue ia ʼaho nei?
KOTEA te manatu ʼa te hahaʼi ʼi ʼokotou tafaʼaki ʼo ʼuhiga mo te gaue? ʼI ʼihi fenua kua lahi age te gaue kinakina ʼa te hahaʼi. Kua natou maʼumaʼua fau, ʼo mole kei maʼu ai honatou temi malolo, peʼe ke natou fakatahi ai mo ʼonatou kiʼi famili, peʼe ke lahi age tanatou ako te Folafola ʼa te ʼAtua. (Ekl. 2:23) ʼI te tahi faʼahi, ko ʼihi ʼe natou pipiko pea ʼe natou maʼu takuʼaki ke mole natou gaue.—Taag. 26:13, 14.
2-3. Kotea te faʼifaʼitaki ʼe tuku mai e Sehova mo Sesu ʼo ʼuhiga mo te gaue?
2 Koia tokolahi ʼi te malamanei, ʼe mole natou maʼu he manatu ʼe lelei ʼo ʼuhiga mo te gaue. Kae ʼe kehekehe ia mo te manatu ʼa Sehova pea mo Sesu. ʼE mahino ia, ʼe leleiʼia e Sehova te gaue. Koia neʼe ui fenei ai e Sesu: “ ʼE kei gaue pe taku Tamai ʼo kaku mai ki te temi nei, ʼo feia pe mo au ʼe kei au haga gaue.” (Soa. 5:17) Kotou manatuʼi te ʼu meʼa fuli ʼae neʼe fakatupu e te ʼAtua. Ohage la, ko te ʼatulaulau fakatalakitupua, mo te kau ʼaselo tokolahi ʼaupito, peʼe ko te ʼu meʼa matalelei fuli ʼae ʼe maʼu ʼi te kele. Neʼe moʼoni ai te ui fenei ʼa te tagata faipesalemo: “E tapuke osi au gaueaga, oi [“Sehova,” MN]! Nee ke fai natou fuli i te poto. E fonu te kele i au mea lelei.”—Pes. 104:24.
3 Neʼe faʼifaʼitakiʼi tuʼumaʼu e Sesu ia tana Tamai. Neʼe tokoni ki te ʼAtua ʼi te temi ʼae neʼe ina “teuteuʼi ai te lagi.” Neʼe gaue ia tafa ʼo Sehova ohage ko “he tufuga faiva.” (Taag. 8:27-31, MN) Ki muli age, ʼi te maʼuli ʼa Sesu ʼi te kele, neʼe ina fakahoko he gaue fakaofoofo. Neʼe ui e Sesu ko te gaue ʼae neʼe foaki age e Sehova ke ina fai, neʼe hage kia ia ko hana meʼa kai. Pea ko meʼa fuli neʼe ina fakahoko ʼi te kele, neʼe ko he fakamoʼoni ʼaia, neʼe fekauʼi mai ia ia e te ʼAtua.—Soa. 4:34; 5:36; 14:10.
4. Kotea te faʼifaʼitaki ʼe tuku mai e Sehova mo Sesu ʼo ʼuhiga mo te malolo?
4 Kapau ko Sehova mo Sesu ʼe nā gaue tuʼumaʼu, ko tona fakaʼuhiga koa ʼe mole ʼaoga te malolo? Kailoa ia. Ko Sehova ʼe mole gaʼegaʼe ʼi he temi, pea ʼe mole ʼaoga kia te ia he malolo. Kae ʼe ui ʼi te Tohi-Tapu ʼi tana ʼosi fakatupu te kele mo te lagi, “nee ina tuku leva tana gaue . . . , pea nee malolo leva ia.” (Eke. 31:17) Ko tona fakaʼuhiga neʼe ina toʼo he temi ke fakafiafia ai ʼi te ʼu meʼa ʼae neʼe ina fakatupu. Pea maʼia pe la mo Sesu neʼe gaue kinakina ʼi te kele. Kae neʼe ina toʼo he temi ke malolo ai pea mo fakafiafia ʼi te kakai fakatahi mo ʼona kaumeʼa.—Mat. 14:13; Luka 7:34.
5. Kotea ʼae ʼe faigataʼa ki te tokolahi ʼi te ʼu kaugana ʼa te ʼAtua?
5 ʼE fakalotomalohiʼi ʼi te Tohi-Tapu te ʼu kaugana ʼa te ʼAtua ke natou faʼa gaue, kae ʼaua naʼa natou pipiko. (Taag. 15:19) ʼE lagi tonu ke kotou gaue moʼo taupau tokotou famili. Pea ʼe tonu ki te ʼu tisipulo fuli ʼa Kilisito ke natou fakamafola te logo lelei. Kae ʼe toe ʼaoga foki kia koutou he malolo feʼauga. ʼI ʼihi temi ʼe lagi faigataʼa hakotou fakafuafua lelei te temi ʼae ʼe ʼaoga ki takotou gaue, ki te faifakamafola mo te malolo. Kae ʼe feafeaʼi hatatou iloʼi pe ko temi ʼe fia ʼe ʼaoga ki te gaue pea ko temi ʼe fia ʼe ʼaoga ki te malolo?
ʼE TOU MAʼU FEAFEAʼI HE MANATU ʼE LELEI KI TE GAUE MO TE MALOLO?
6. ʼE ha feafeaʼi ia Maleko 6:30-34, neʼe maʼu e Sesu he manatu ʼe lelei ʼo ʼuhiga mo te gaue mo te malolo?
6 ʼE maʼuhiga ke tou maʼu he manatu ʼe lelei ʼo ʼuhiga mo te gaue. ʼAki te takitaki ʼa te ʼAtua, neʼe tohi fenei e te Hau ko Salomone: “E i ai he temi . . . ki te u mea fuli.” Neʼe ina ui, ʼe ʼi ai he temi ke to ai, ke laga ai, ke tagi ai, ke kata pea mo meʼe ai. (Ekl. 3:1-8) Koia ko te gaue mo te malolo, ʼe ko he ʼu faʼahi maʼuhiga ʼe lua ʼo te maʼuli. ʼE fakaha ʼi te Tohi-Tapu, neʼe maʼu e Sesu he manatu ʼe lelei ʼo ʼuhiga mo te gaue mo te malolo. Ohage la ʼi te tahi ʼaho, neʼe maʼumaʼua ʼana apositolo ʼi te faifakamafola ʼo ‘mole pe la maʼu he temi ke natou kakai ai.’ Koia neʼe ui fenei ai e Sesu kia natou: “Tou olo ki he koga meʼa lavaki ke tou malolo ai.” (Lau ia Maleko 6:30-34.) ʼE moʼoni neʼe mole maʼu tuʼumaʼu e Sesu mo ʼana tisipulo he faigamalie ke natou malolo faʼifaʼitaliha ai. Kae neʼe iloʼi e Sesu neʼe ʼaoga kia natou fuli ke natou malolo.
7. Kotea ʼae ʼe feala ke tou fai moka tou vakaʼi te lao ʼo ʼuhiga mo te Sapato?
7 ʼI ʼihi temi, ʼe ʼaoga moʼoni ke tou malolo peʼe ke fetogi ʼatatou agamahani. ʼE ha te faʼahi ʼaia ʼi te fakatuʼutuʼu maʼuhiga ʼae neʼe fai e te ʼAtua maʼa ʼana kaugana. Ko te fakatuʼutuʼu ʼae ko te taupau ʼo te ʼaho ʼo te Sapato ʼi te vahaʼa fuli. ʼE moʼoni, ʼe mole kei tou fakalogo ki te Lao ʼa Moisese. Kae ʼe feala ke fua lelei kia tatou te vakaʼi pe ʼe kotea ʼae ʼe ui ʼi te Lao ʼo ʼuhiga mo te Sapato. ʼE tokoni mai anai ke tou sivisivi tatatou faʼahiga manatu ʼo ʼuhiga mo te gaue pea mo te malolo.
KO TE SAPATO NEʼE KO HE ʼAHO KI TE MALOLO PEA MO TE ATOLASIO KI TE ʼATUA
8. Ka tou lau ia Ekesote 31:12-15, neʼe kotea te fakatuʼutuʼu ʼo te Sapato?
8 ʼE ui ʼi te Tohi-Tapu, neʼe malolo leva te ʼAtua mai tana fakatupu te ʼu meʼa ʼae ʼi te kele hili “aho” ʼe ono. (Sen. 2:2) Kae ʼi ʼihi aluʼaga neʼe hoko atu pe tana gaue, koteʼuhi ʼe ina leleiʼia te gaue. (Soa. 5:17) Neʼe malolo ia Sehova ʼi te fitu “aho.” ʼO toe feia pe, neʼe tonu ke malolo te kau Iselaele ʼi te fitu ʼaho ʼo te vahaʼa. Pea neʼe ui e te ʼAtua, ko te Sapato neʼe ko he fakailoga ia ia mo natou. Neʼe ko “te aho malolo ia” pea neʼe ko he meʼa taputapu maʼa Sehova. (Lau ia Ekesote 31:12-15.) Neʼe tapuʼi ki te kau Iselaele fuli tanatou fakahoko he gaue ʼi te ʼaho ʼaia, ʼo kau ai te ʼu fanau, mo te ʼu kaugana mo ʼanatou manu. (Eke. 20:10) Neʼe fakafealagia ʼi te ʼaho ʼaia ke tokakaga tafito te hahaʼi ki te ʼu meʼa fakalaumalie.
9. ʼI te temi ʼo Sesu, kotea te faʼahiga manatu neʼe maʼu e te tokolahi ʼo ʼuhiga mo te Sapato?
9 Neʼe fakatuʼu te lao ʼo ʼuhiga mo te Sapato ke fua lelei ki te ʼu kaugana ʼa te ʼAtua. Kae, tokolahi te kau takitaki lotu ʼi te temi ʼo Sesu neʼe natou fai he ʼu lao ʼe fefeka fau ʼo ʼuhiga mo te fakalogo ki te lao ʼo te Sapato. Ohage la, neʼe natou ui takua neʼe tapu te fusi fulumeto peʼe ke fakamalolo he tahi ʼi te Sapato. (Mko. 2:23-27; 3:2-5) Kae neʼe mole alu tahi te ʼu lekula ʼaia mo te faʼahiga manatu ʼa te ʼAtua. Pea neʼe fakamahino lelei e Sesu te faʼahi ʼaia kia natou ʼae neʼe fagono kia te ia.
Ko te Sapato neʼe ko he faigamalie ʼaia ki te famili ʼo Sesu ke natou fakaovi ki te ʼAtua (Vakaʼi te palakalafe 10) *
10. Ka tou lau ia Mateo 12:9-12, neʼe kotea te manatu ʼa Sesu ʼo ʼuhiga mo te Sapato?
10 Ko Sesu mo ʼana tisipulo neʼe natou taupau te ʼaho ʼo te Sapato, he neʼe ko natou ko te kau Sutea pea neʼe natou mulimuli ki te Lao ʼa Moisese. * Kae neʼe fakaha e Sesu ʼi ʼana palalau mo ʼana gaue te maʼuhiga ʼae ʼo te aga fakapotopoto. Neʼe ina ui, ʼe feala pe ke tokoni mo agalelei ki tona tatau ʼi te ʼaho ʼaia. Koia neʼe ina ui fenei ai: “ ʼE gafua ʼi te Lao ke fai ia te meʼa ʼae ʼe lelei ʼi te ʼaho ʼo te Sapato.” (Lau ia Mateo 12:9-12.) Kia Sesu, kapau ʼe tokoni mo agalelei he tahi ki tona tatau, neʼe mole talagataʼa ia ki te lao ʼo te Sapato. Pea tahi, neʼe fakaha e Sesu ʼaki ʼana gaue ia te tupuʼaga maʼuhiga ʼo te kole ʼae e te ʼAtua ki tana hahaʼi ke natou malolo ʼi te Sapato. ʼI te ʼaho ʼaia, neʼe malolo te hahaʼi mai ʼanatou gaue, koia ʼae neʼe feala ai ke natou tokakaga tafito ki te ʼu meʼa fakalaumalie. Ko Sesu neʼe lahilahi ake ʼi he famili neʼe natou fakamaʼuhigaʼi te ʼaho ʼo te Sapato, he neʼe natou fakaovi ai ki te ʼAtua. ʼE tou iloʼi te faʼahi ʼaia ʼi te meʼa ʼae neʼe ina fai ʼi tana toe liliu ki te kolo ʼae neʼe lahilahi ake ai ko Nasaleti. ʼE ui fenei ʼi te Tohi-Tapu: “ ʼI te agamahani ʼo Sesu ʼi te ʼaho ʼo te Sapato, neʼe hu ki te sinakoka. Pea neʼe tuʼu ake ke lautohi. Koia neʼe ʼavage kia te ia te takaiga tohi ʼa te polofeta ko Isaia.”—Luka 4:15-19.
KOTEA TAKOTOU MANATU ʼO ʼUHIGA MO TE GAUE?
11. Kotea te faʼifaʼitaki ʼae neʼe tuku e Sosefo kia Sesu ʼo ʼuhiga mo te gaue?
11 ʼE mahino ia, neʼe maʼu e Sosefo ia te faʼahiga manatu ʼa te ʼAtua ʼo ʼuhiga mo te gaue. Koia ʼae neʼe ina akoʼi ai kia Sesu ia te gaue ʼae ko te tufuga ʼakau. (Mat. 13:55, 56) Neʼe lagi sio ia Sesu ki te gaue kinakina ʼo tana tamai tauhi ʼi te ʼaho fuli moʼo taupau tona famili ʼae neʼe hahaʼi. ʼE lelei ke tou fakatokagaʼi ʼana palalau ʼae neʼe ina fai ki ʼana tisipulo ki muli age. Neʼe ina ui fenei: “Ko te tagata gaue ʼe tau mo tona totogi.” (Luka 10:7) ʼE ha lelei mai ai, neʼe iloʼi e Sesu pe ʼe kotea te fakaʼuhiga ʼo te gaue kinakina.
12. Kotea te ʼu vaega ʼae ʼe ha ai ʼe tonu ke gaue kinakina te kau Kilisitiano?
12 Neʼe toe faʼa gaue mo te apositolo ko Paulo. Ko tana gaue tafito, neʼe ko te faifakamafola ʼo ʼuhiga mo Sesu pea mo ʼana akonaki. Kae neʼe toe gaue foki moʼo taupau ʼo tona maʼuli. Neʼe mahino te kau Tesalonika, neʼe ‘gaue kinakina ia ia ʼi te ʼaho mo te po ke ʼaua naʼa liliu ko he kavega mamafa ki he tahi ia natou.’ (2 Tes. 3:8; Gaue 20:34, 35) Neʼe lagi talanoa ia Paulo ki tana gaue ʼae ko te faʼu ʼo te ʼu fale la. ʼEi, neʼe nofo ʼi Kolonito ʼi te ʼapi ʼo Akila mo Pilisila. Pea neʼe gaue mo naua he neʼe nā toe faʼu fale la mo naua. ʼE ui ʼi te Tohi-Tapu neʼe gaue ia Paulo ʼi te ʼaho mo te po, kae ʼe mole fakaʼuhiga leva neʼe gaue tuʼumaʼu ia ia. ʼI ʼihi temi neʼe tuʼu tana gaue, ohage la ko te ʼaho ʼo te Sapato. Pea ʼi te mole gaue ʼa te kau Sutea ʼi te ʼaho ʼaia, neʼe maʼu ai e Paulo te faigamalie ʼae ke faifakamafola.—Gaue 13:14-16, 42-44; 16:13; 18:1-4.
13. Kotea ʼae ʼe tou ako mai te faʼifaʼitaki ʼa Paulo?
13 Neʼe tuku mai e Paulo ia he faʼifaʼitaki lelei. Neʼe tonu ke gaue moʼo taupau ʼo tona maʼuli. Kae neʼe tokaga tuʼumaʼu ke ina fakahoko “te gaue taputapu ʼo te logo lelei mai te ʼAtua.” (Loma 15:16; 2 Ko. 11:23) Pea neʼe ina fakalotomalohiʼi niʼihi ke natou faʼifaʼitakiʼi ia ia. Koia ʼae neʼe liliu ai ia Akila mo Pilisila ko ʼona “kaugā gaue ia Kilisito Sesu.” (Loma 12:11; 16:3) Neʼe toe fakalotomalohiʼi e Paulo ia te kau Kolonito ke ‘lahi tuʼumaʼu ʼanatou gaue ʼi te ʼAliki.’ (1 Ko. 15:58; 2 Ko. 9:8) Pea neʼe toe takitaki ia ia e Sehova ʼaki tona laumalie ke ina tohi fenei: “Kapau ʼe mole fia gaue he tahi, ke ʼaua naʼa kai.”—2 Tes. 3:10.
14. Kotea te fakaʼuhiga ʼo te ʼu palalau ʼae ʼa Sesu ia Soane 14:12?
14 Ko te gaue ʼae ʼe maʼuhiga ʼaupito ʼi te ʼu ʼaho fakamuli ʼaeni, ʼe ko te faifakamafola pea mo te fai ʼo ni tisipulo. Pea neʼe tala fakatomuʼa e Sesu ʼe fakahoko anai e ʼana tisipulo he ’u gaue ʼe lalahi age ʼi ʼana gaue. (Lau ia Soane 14:12.) Neʼe mole ina fia ui ʼe natou fakahoko anai he ʼu milakulo ohage ko ia. Kae ʼe natou faifakamafola mo faiako anai ʼi he ʼu potu fenua ʼe lahi age, ki he hahaʼi ʼe kaugā malie age pea ʼi he temi loaloaga.
15. Kotea te ʼu fehuʼi ʼae ʼe tonu ke tou fai? Pea kotea tona tupuʼaga?
15 Kapau ʼe kotou gaue, kotou fai te ʼu fehuʼi ʼaeni: ‘ ʼE iloʼi koa au ko he tahi ʼe faʼa gaue? ʼE au fakaʼosi tautonu koa te gaue ʼae neʼe foaki mai ke au fakahoko? ʼE au faiga malohi koa ke au fakahoko lelei te gaue ʼaia?’ Kapau koia, ʼe mahino ia, ʼe falala atu anai tou patolo. Pea ʼe lagi lotolelei anai ʼou kaugā gaue ke natou fakalogo ki te logo lelei ʼo te Puleʼaga. ʼE lelei ke kotou fai te ʼu fehuʼi ʼaeni ʼo ʼuhiga mo te gaue faifakamafola mo te faiako: ‘ ʼE iloʼi koa au ko he tahi ʼe faiga malohi ʼi te gaue faifakamafola? ʼE au teuteuʼi lelei koa ʼaku ʼuluaki palalau? ʼE au toe liliu fakavilivili koa
ʼo ʼaʼahi ia natou ʼae neʼe natou fia logo ki te moʼoni? Pea ʼe au kau tuʼumaʼu koa ki te ʼu faʼahiga agaaga faifakamafola kehekehe?’ Kapau koia, ʼe kotou fiafia anai ʼi te ʼu gaue ʼaia.KOTEA TAKOTOU MANATU ʼO ʼUHIGA MO TE MALOLO?
16. Kotea te manatu ʼa Sesu mo ʼana apositolo ʼo ʼuhiga mo te malolo? Kae kotea te manatu ia ʼa te tokolahi ia ʼaho nei?
16 Neʼe iloʼi e Sesu neʼe ʼaoga kia ia mo ʼana apositolo ke natou malolo ʼi ʼihi temi. Kae ʼi te temi muʼa, ko te tokolahi neʼe hage pe ko te tagata maʼu koloa ʼo te faʼifaʼitaki ʼa Sesu. Pea ʼe toe feia pe mo te tokolahi ia ʼaho nei. ʼI te manatu ʼa te tagata ʼaia, neʼe lelei tana aga ʼi tana ui fenei: “Ke au malolo la, mo kai, mo inu pea mo fakafiafia.” (Luka 12:19; 2 Tim. 3:4) Ko te tagata ʼaia, neʼe ina fakamaʼuhigaʼi ʼaupito te malolo mo te ʼu fakafiafia. Kae ko Sesu mo ʼana apositolo, neʼe mole natou fakamuʼamuʼa te ʼu meʼa ʼae ʼe natou leleiʼia.
Kapau ʼe tou maʼu he manatu ʼe lelei ʼo ʼuhiga mo te gaue mo te malolo, ʼe tou tokakaga tuʼumaʼu anai ki ʼatatou gaue fakalaumalie ʼae ʼe fua lelei kia tatou (Vakaʼi te palakalafe 17) *
17. ʼE tou fakaʼaogaʼi feafeaʼi te ʼu ʼaho ʼae ʼe mole tou gaue ai?
17 Ia ʼaho nei, ʼe tou faigaʼi ke tou faʼifaʼitakiʼi ia Sesu. ʼE mole tou fakaʼaogaʼi pe te temi ʼae ʼe tou ʼateaina ai ke tou malolo. Kae ʼe tou toe fakaʼaogaʼi foki te temi ʼaia moʼo fakahoko he ʼu gaue lelei, ohage la ko te faifakamafola mo te kau ki te ʼu fono. ʼI tona fakahagatonu, ʼe taputapu te ʼu gaue ʼaia kia tatou. ʼE maʼuhiga te ʼu gaue ʼaia kia tatou. Koia ʼae ʼe tou faiga malohi ai ke tou kau tuʼumaʼu ki ai. (Hep. 10:24, 25) ʼE tatau aipe pe ʼe tou toʼo hotatou ʼu ʼaho malolo, kae ʼe tou taupau ʼatatou agamahani fakalaumalie. ʼE tou hoko atu tatatou kau tuʼumaʼu ki te ʼu fono, mo tou kumi he ʼu faigamalie ke tou fakaha te moʼoni ki te hahaʼi ʼae ʼe tou felaveʼi.—2 Tim. 4:2.
18. Kotea ʼae ʼe loto e totatou Hau ko Sesu Kilisito ke tou fai?
18 ʼE tou fiafia lahi, koteʼuhi ko totatou Hau ko Sesu Kilisito ʼe ina maʼu he manatu ʼe lelei ʼo ʼuhiga mo te gaue mo te malolo. Pea ʼe tokoni mai ke tou faʼifaʼitakiʼi ia ia. (Hep. 4:15) ʼI te tahi faʼahi, ʼe ina loto ke tou malolo lelei. Pea ʼi te tahi age leva faʼahi, ʼe ina loto ke tou gaue kinakina moʼo taupau totatou maʼuli. Pea ʼe toe loto ke tou faiga malohi ʼi te faifakamafola, koteʼuhi ʼe fua lelei te gaue ʼaia kia tatou. ʼI te alatike ʼae ka hoa mai, ʼe tou palalau anai ki te gaue ʼae ʼe fai e Sesu moʼo fakaʼateainaʼi ʼo tatou mai he faʼahiga maʼuli popula ʼe fakamataku.
KATIKO 38 ʼE Ina Fakamalohi Anai Ia Koe
^ pal. 5 ʼE fakaha mai ʼi te Tohi-Tapu pe ʼe feafeaʼi hatatou maʼu he manatu ʼe lelei ʼo ʼuhiga mo te gaue pea mo te malolo. ʼE tokoni mai anai te alatike ʼaeni ke tou fakakaukauʼi tatatou faʼahiga manatu ki te gaue mo te malolo. Koia ʼe tou vakaʼi anai te faʼifaʼitaki ʼo te Sapato ʼae neʼe tonu ke taupau e te kau Iselaele ʼi te vahaʼa fuli.
^ pal. 10 Neʼe fakaʼapaʼapa lahi te ʼu tisipulo ki te Sapato. Koia ʼae neʼe natou taʼofi ai te teuteuʼi ʼo te ʼavaifo ʼo Sesu ʼi te ʼaho ʼo te Sapato.—Luka 23:55, 56.
^ pal. 55 FAKAMATALA ʼO TE ʼU PĀKI: Neʼe ʼave e Sosefo ia tona kiʼi famili ki te sinakoka ʼi te ʼaho ʼo te Sapato.
^ pal. 57 FAKAMATALA ʼO TE ʼU PĀKI: Ko he tamai ʼe gaue kinakina maʼa tona kiʼi famili, ʼe ina fakaʼaogaʼi tona temi malolo moʼo lagolago ki te ʼu gaue fakalaumalie, pea maʼia pe la moka olo ʼo malolo mo tona kiʼi famili ʼe ina fakahoko pe ʼana agamahani fakalaumalie.