’E Kei Kotou Manatu’i Koa?
ʼE feala koa ke kotou tali ki te ʼu fehuʼi ʼaeni neʼe kotou vakaʼi ʼi te ʼu Tule Leʼo 2019?
Neʼe fai e te ʼAtua ia te fakapapau ʼaeni: “E noa anai te mahafu tau fuli nee fau ke tau kia koe.” (Esa. 54:17) Kotea te fakaʼuhiga ʼo tana fakapapau ʼaia?
ʼE feala ke tou tui papau, ʼe puipui anai tatou e te ʼAtua mai “te tukumanava o te kau fakapo” ohage la ko te ʼu mahafu tau fuli. (Esa. 25:4, 5) ʼE mole feala ia ke fakamamahiʼi tatou e ʼotatou fili ʼo talu ai.—w19.01, pp. 6-7.
Neʼe fakaha feafeaʼi e Sehova tana faitotonu ki te kau Kanaane pea mo te kau Iselaele ʼae neʼe mole fakalogo?
Neʼe tauteaʼi e Sehova ia natou ʼae neʼe natou fai ni aga heʼe ʼaoga fakalialia pea mo natou ʼae ʼe natou gaohi koviʼi te hahaʼi fafine pea mo te ʼu fanau. Kae neʼe ina tapuakiʼi ia natou ʼae neʼe fakalogo kia te ia pea mo natou ʼae neʼe natou fai he ʼu aga faitotonu ki ʼihi.—w19.02, pp. 22-23.
Kotea ʼae ʼe tonu ke tou fai mo kapau ʼe faikole he tahi ʼe mole tauhi kia Sehova?
ʼE feala pe ke tou fakaʼapaʼapa ki te koga ʼaia pea mo nofo fakalogologo. ʼE mole tou ui anai “ameni” ki tana faikole, pea ʼe mole tou puke anai ʼonatou nima lolotoga te faikole. ʼE feala pe ke tou faikole fakalogologo.—w19.03, p. 31.
He koʼe ʼe ko te fakaʼalikiʼi ʼo he kiʼi fanau ʼe ko he agahala mamafa?
Ko te fakaʼalikiʼi ʼo he kiʼi fanau ʼe ko he agahala ia ki te kiʼi fanau, ki te kokelekasio, ki te ʼu puleʼaga fakatagata pea ki te ʼAtua. ʼE fakaʼapaʼapa te ʼu tagata ʼafeā ki te ʼu lao ʼo te fenua, ʼo natou fakaha ki te kau polisi te aluʼaga ʼo te fakaʼalikiʼi ʼo he kiʼi fanau.—w19.05, pp. 9-10.
ʼE feafeaʼi he fetogi ʼo tau faʼahiga manatu?
ʼE maʼuhiga ke ke faikole kia Sehova, mo metitasio ke ke tokagaʼi ai ʼau manatu ʼae ʼe tonu ke fetogi pea mo ke filifili lelei ʼou kaumeʼa.—w19.06, p. 11.
ʼE feafeaʼi hatatou teuteu ʼi te temi nei ki te ʼu fakataga?
ʼE tonu ke tou fakamalohiʼi ʼatatou felogoi mo Sehova. Tou tui papau ʼe ʼofa ia Sehova kia tatou pea ʼe mole ina liʼaki anai tatou ʼi he temi. Tou lau te Tohi-Tapu ʼi te ʼaho fuli pea mo faikole tuʼumaʼu. Tou tui papau kua vave fakahoko pe e te ʼAtua ʼana fakapapau ʼaki tona Puleʼaga. Tou ako fakaʼatamai te ʼu vaega Fakatohi-tapu ʼae ʼe tou leleiʼia mo te ʼu katiko moʼo fakavikiviki kia Sehova.—w19.07, pp. 2-4.
ʼE tou lava tokoni feafeaʼi ki totatou famili ke haofaki natou?
ʼE maʼuhiga ke tou lotomahino, mo tuku he faʼifaʼitaki lelei, mo kataki fualoa pea mo agalelei.—w19.08, pp. 15-17.
Neʼe fakapapau mai Sesu ia Mateo 11:28 ʼe ina fakafimalieʼi anai tatou. ʼE ina fakahoko feafeaʼi anai tana fakapapau?
ʼE ina foaki mai he ʼu tagata taupau manavaʼofa ʼe natou taupau lelei te kokelekasio, mo he ʼu kaumeʼa lelei pea mo he gaue ʼe maʼuhiga tokotahi.—w19.09, p. 23.
ʼE foaki feafeaʼi mai e Sehova te fakaʼamu pea mo te malohi moʼo fakahoko ia meʼa fuli ʼae ʼe ina leleiʼia? (Flp. 2:13)
ʼE feala ki te ʼAtua ke ina fakamalohiʼi tatou lolotoga tatatou lau te Tohi-Tapu pea mo metitasio ki ai. ʼE ina foaki mai ia te fakaʼamu moʼo fai tona finegalo pea mo te malohi moʼo fakahoko ia meʼa fuli ʼae ʼe ina leleiʼia. ʼE feala ke ina foaki mai ia tona laumalie maʼoniʼoni ke toe lelei age ʼotatou fealagia.— w19.10, p. 21.
Kotea ʼae ʼe tonu ke tou fai ʼi muʼa ʼo te toʼo he tonu?
ʼE ʼaoga ke tou toʼo he ʼu tonu ʼe lelei tukupau. Koia, ʼe tonu ke tou fai he ʼu fekumi, mo faikole ke tou maʼu te poto, mo tou sivisivi te ʼu tupuʼaga ʼae ʼe ina uga tatou ke tou toʼo he ʼu tonu, mo tou fai he ʼu fakatuʼutuʼu ʼo ʼuhiga mo he aluʼaga tafito pea mo tou maʼu he ʼu manatu ʼe fakapotopoto.—w19.11, pp. 27-29.
Neʼe malaga koa te akonaki ʼo ʼuhiga mo te maʼuli tuputupua ʼo te laumalie ʼo te tagata ʼi Eteni, ʼi te temi ʼae neʼe fakahalaʼi ai e Satana ia Eva?
Kailoa ia. Neʼe ui e te Tevolo kia Eva ʼe mole mate anai. Kae neʼe mole ui e te tevolo ʼe lagi ʼe mole ke mate anai. Neʼe puli fuli te ʼu akonaki hala ʼaki te Tulivio. Pea ʼe mahino papau ia, neʼe malaga te akonaki ʼo te maʼuli tuputupua ʼo te laumalie ʼo te tagata ʼi muʼa ʼo te fakamavetevete e te ʼAtua te hahaʼi ʼae neʼe natou laga te tule ʼo Papele.—w19.12, p. 15.