“Kotou Fakafetaʼi ʼo ʼUhiga Mo Meʼa Fuli Pe”
ʼI TAU manatu la, ko koe koa ko he tahi ʼe lotofakafetaʼi tuʼumaʼu? ʼE tonu kia tatou fuli ke tou fakakaukauʼi lelei te fehuʼi ʼaia. Neʼe tala fakatomuʼa ʼi te Tohi-Tapu ʼe “maʼuli galo” anai te hahaʼi tokolahi ʼi te ʼu ʼaho fakamuli. (2 Tim. 3:2) ʼE mahino ia, neʼe kua ke felaveʼi mo he hahaʼi ʼe natou ui, ko meʼa ʼae ʼe natou maʼu neʼe tonu pe ia ke foaki age kia natou. Pea ko tanatou manatu ʼe mole tonu ia ke natou lotofakafetaʼi. ʼE ke fia fakatahi koa mo te faʼahiga hahaʼi ʼaia?
ʼE kehekehe ia mo te kau atolasio ʼa Sehova, koteʼuhi ʼe fakalotomalohiʼi natou ke natou fakaha te ‘lotofakafetaʼi ʼo ʼuhiga mo meʼa fuli pe.’ (Kol. 3:15; 1 Tes. 5:18) Ko te gaueʼi ʼo te kalitate ʼae ko te lotofakafetaʼi ʼe feala ke maʼu ai he ʼu fua lelei. Kotea te ʼu fua lelei ʼaia?
KO TE LOTOFAKAFETAʼI ʼE FEALA KE KITA MAʼU AI HE SIO FAKAPOTOPOTO ʼO ʼUHIGA MO KITA TOTONU
Ko te ʼu fua lelei ʼe tou maʼu mo kapau ʼe tou maʼuliʼi te lotofakafetaʼi ʼe feala ke lahi ai totatou fiafia ʼae ʼo ʼuhiga mo tatou totonu. Koia ko he tahi ʼe mahani ʼi te fakamalo ʼe lahi ai tona fiafia. Ka liliu te fakamalo ko he agamahani ʼa he tahi pea ʼe lahi anai te fiafia ʼae ʼe ina logoʼi. Pea tahi, ʼe ko he aga ia ʼe lelei kia ia ʼae ʼe kita faifakamalo ki ai. He koʼe ʼe tou maʼu te ʼu fua lelei ʼaia mai te lotofakafetaʼi. Tou toʼo he faʼifaʼitaki. Kapau ʼe foaki atu e he tahi he meʼa ʼofa kia koe ʼe mole ke fiafia koa la ʼo ke iloʼi ʼe ke maʼuhiga kia ia. ʼE ina tokagaʼi ia koe. Ka ke logoʼi tana lototokaga ʼaia ʼe ke ma u ai te fiafia. ʼE faigafua ai tatatou logoʼi te fiafia ʼae neʼe logoʼi e Lute ʼi te agalelei ʼae ʼa Poase kia ia. Neʼe lagi fiafia lahi ʼi tana iloʼi ʼae ʼe tokagaʼi ia ia e Poase.—Lute 2:10-13.
ʼE maʼuhiga ʼaupito ke tou fakaha tatatou lotofakafetaʼi ki te ʼAtua. Neʼe lagi kua ke manatuʼi te ʼu meʼa ʼofa fakalaumalie pea mo fakamalama ʼae neʼe ina foaki atu pea ʼe kei hoko atu pe tana foaki atu. (Tet. 8:17, 18; Gaue 14:17) Kae ʼe ke fakakaukauʼi koa te ʼu meʼa ʼofa ʼaia? He koʼe koa ʼe mole ke toʼo he temi moʼo fakakaukauʼi te ʼu tapuakina ʼae neʼe ina foaki atu kia koe mo natou ʼae ʼe ke ʼofa ai? Kapau ʼe ke metitasio ki te lotofoaki ʼo tou Tupuʼaga, ʼe tuputupu anai tau lotofakafetaʼi kia te ia. Pea tahi, ʼe ke tui papau anai ʼe ʼofa ia koe pea ʼe ina leleiʼia te ʼu gaue ʼae ʼe ke fai.—1 Soa. 4:9.
ʼE tonu ke tou metitasio ki te ʼu meʼa fuli ʼae ʼe foaki mai e Sehova pea mo tatou foki ʼe tonu ke tou fakamalo kia te ia. (Pes. 100:4, 5) Ko te fakaha ʼo tatatou lotofakafetaʼi ʼe tou maʼu ai he toe lotofiafia lahi.
KA TOU LOTOFAKAFETAʼI ʼE TOE MALOHI AI ʼATATOU FAKAKAUMEʼA
ʼE toe fua lelei kia tatou ia te lotofakafetaʼi, koteʼuhi ʼe ina fakamalohiʼi ʼatatou fakakaumeʼa. ʼE tou loto fuli ke ʼofainaʼi tatou. Kapau ʼe ke fakamalo fakamalotoloto ki he tahi neʼe ina fai he meʼa ʼe lelei kia koe, ʼe kolua kaumeʼa lelei anai. (Loma 16:3, 4) Pea tahi, ko te lotofakafetaʼi ʼe ina uga ke tou tokoni ki niʼihi. Ko he tahi ʼe lotofakafetaʼi ʼe ina tokagaʼi te ʼu meʼa lelei ʼae ʼe fai e ʼihi maʼa ia. Pea ʼe ʼekenaki ai ia ia ke ina fakaha te agalelei. ʼE moʼoni, ko te tokoni ʼae ki niʼihi ʼe fakatupu fiafia. Ohage ko tona ui fenei e Sesu: “ ʼE lahi age te fiafia moka kita foaki, ʼi takita tali.”—Gaue 20:35.
Ko Robert Emmons, ko he tagata faiako ʼi te univelesite ʼo Californie pea mo ina toe takitaki te ako ʼo ʼuhiga mo te lotofakafetaʼi. ʼE ina ui fenei: “Ke feala hatatou fakaha te lotofakafetaʼi, ʼe tonu ke tou mahino ʼe ʼaoga pe ke tou fetokoniʼaki ia tatou. ʼI ʼihi temi ʼe tou foaki pea ʼi ʼihi temi ʼe tou tali.” ʼE fakalogo totatou maʼuli fiafia ki ʼihi ʼi he ʼu aluʼaga kehekehe. Ohage la, 1 Ko. 12:21) Ko he tahi ʼe lotofakafetaʼi ʼe ina leleiʼia moʼoni te ʼu meʼa ʼae ʼe tou fai maʼa ia. Kae ʼe feafeaʼi kia koe, ko hau agamahani koa tau fakaha te lotofakafetaʼi?
ʼe feala ke tokoni mai niʼihi ʼo foaki mai he meʼa kai peʼe ko he ʼu faitoʼo. (KO TE LOTOFAKAFETAʼI ʼE MALAVE KI TATATOU FAʼAHIGA SIO KI TE MAʼULI
Ko te tahi fua lelei moka ʼe tou fakaha te lotofakafetaʼi, ko tatatou tokakaga tafito ki te meʼa ʼae ʼe lelei kae mole ki te meʼa ʼae ʼe kovi. ʼE hage totatou ʼuto ko he meʼa fakaoʼo. ʼE ina fakafealagia ke tuʼu tatatou fakakaukau ki he ʼu aluʼaga kae ʼe ina taʼofi tatatou manatu ki ʼihi aluʼaga. Ko he tahi ʼe lotofakafetaʼi, ʼe faigafua tana tokagaʼi te meʼa ʼae ʼe lelei kae ʼe fakasiʼisiʼi tana tokaga ki te meʼa ʼae ʼe fakalotovaivai. Ka lahi tau lotofakafetaʼi, ʼe ke tokagaʼi anai te ʼu gaue lelei ʼae ʼe fai e niʼihi. Pea kapau ʼe lahi tau tokagaʼi ʼanatou gaue lelei pea ʼe ke lotofakafetaʼi anai. Kapau ʼe ha te lotofakafetaʼi ʼi tau faʼahiga sio ki te maʼuli, ʼe tokoni atu anai ke ke mulimuli ki te tokoni ʼaeni ʼa te apositolo ko Paulo: “Kotou fakafiafia tuʼumaʼu ʼi te ʼAliki.”—Flp. 4:4.
ʼE tokoni atu te lotofakafetaʼi ke mole ke maʼu he ʼu manatu fakalotovaivai. ʼE faigataʼa ʼaupito hakita fakaha te lotofakafetaʼi mo kapau ʼe tou taupau he loto ita, mo lotomamahi pea mo he loto fuaʼa. Pea tahi, ko te hahaʼi ʼae ʼe lotofakafetaʼi ʼe mole fia maʼu koloa. ʼE natou fiafia, koteʼuhi ʼe natou maʼuli fakafeʼauga pea ʼe mole natou kumi ke natou maʼu koloa.—Flp. 4:12.
KE KE FAKAKAUKAU KI TE ʼU TAPUAKINA FULI ʼAE NEʼE KE MAʼU
Kapau ʼe ke atolasio kia Sehova, ʼaua naʼa galo kia koe ʼe loto e Satana ke ke lotomamahi mo lotovaivai ʼi te ʼu faigataʼaʼia ʼae ʼe ke tau mo ia. Kapau ʼe mole lelei tau faʼahiga manatu pea mo lauga tuʼumaʼu ʼo ʼuhiga mo meʼa fuli, ʼe ke fakafiafiaʼi ai ia Satana. ʼE faigataʼa anai tau fakaha te logo lelei ʼo te Puleʼaga. ʼI tona fakahagatonu, ʼe pipiki te lotofakafetaʼi ki te fua ʼo te laumalie ʼo te ʼAtua. Ohage la, ko te fiafia ʼae ʼe tou maʼu mai te ʼu meʼa fuli ʼe foaki mai e Sehova pea mo tatatou tui ki ʼana fakapapau.—Kal. 5:22, 23.
ʼE mahino ia, ʼe ke manatu tahi mo te ʼu manatu ʼae neʼe ke lau ʼi te alatike ʼaeni. Kae ʼe ke iloʼi foki, ʼe tonu ke ke faiga malohi ke ke maʼu he manatu ʼe lelei ʼo ʼuhiga mo te maʼuli pea mo ke lotofakafetaʼi. Kae ʼaua naʼa ke lotovaivai. ʼE feala ke ke gaueʼi pea mo taupau te lotofakafetaʼi. ʼO feafeaʼi? ʼI te ʼaho fuli, toʼo he temi moʼo fakakaukauʼi he ʼu aluʼaga ʼo tou maʼuli ʼae ʼe ina uga ia koe ke ke lotofakafetaʼi. Kapau ʼe ke fai feia, ko te fakaha ʼo te lotofakafetaʼi ʼe liliu anai ko hau agamahani. ʼE lahi age anai tou fiafia ia natou ʼae ʼe manatu tuʼumaʼu ki ʼonatou fihifihia. Ke ke fakakaukau ki te ʼu meʼa lelei ʼae ʼe foaki atu e te ʼAtua pea mo ʼihi. Pea ko te ʼu meʼa lelei ʼaia ʼe natou fakalotomalohiʼi mo fakafiafiaʼi tou loto. ʼE feala pe ke ke tohi ʼi te ʼaho fuli he ʼu aluʼaga ʼe lua peʼe tolu ʼe ina uga koe ke ke fakaha te lotofakafetaʼi.
ʼE ui e ʼihi kau popoto, kapau “ ʼe tou fakaha tuʼumaʼu tatatou lotofakafetaʼi ki ʼihi, ʼe feala ke fetogi ai te gaue ʼo te uto ke faigafua age ai hatatou logo fimalie ʼi totatou maʼuli.” Ko he tahi ʼe lotofakafetaʼi, ʼe ko he tahi ʼe fiafia lahi. Koia, ke ke fakakaukauʼi ʼou tapuakina, ke ke fakafiafia ʼi te ʼu lelei ʼae ʼe ke maʼu ʼi tou maʼuli pea ke ke fakaha tuʼumaʼu te lotofakafetaʼi. ʼAua tau manatu ʼae, ko te maʼua ʼo Sehova ke ina foaki atu ia meʼa fuli. Kae fakafetaʼi kia te ia koteʼuhi ʼe “agalelei ia ia.” ʼEi, ke ke “fakafetaʼi ʼo ʼuhiga mo meʼa fuli pe.”—1 Klk. 16:34; 1 Tes. 5:18.