ALATIKE AKO 42
Kua Ke Maʼu Te Moʼoni
“Kotou vakavakaʼi fakalelei ia meʼa fuli, ʼo kotou taupau maʼu te meʼa ʼae ʼe lelei.”—1 TES. 5:21.
KATIKO 142 Tou Taupau Maʼu Totatou ʼAmanaki
TE ʼU MANATU FAKANOUNOU *
1. He koʼe ʼe faihala te tokolahi?
ʼE LAHI te ʼu lotu ʼe natou ui ʼe natou muliʼi moʼoni ia Kilisito pea ʼe tali e te ʼAtua tanatou tauhi. Kae ʼe faihala te tokolahi. ʼE natou feʼekeʼaki pe ʼe ko te lotu pe ʼe tahi ʼe moʼoni, peʼe tali koa e te Atua te ʼu lotu fuli? ʼE tou tui papau koa ʼe tou akoʼi te moʼoni? ʼE tou tui papau koa ko te tauhi ʼa te kau Fakamoʼoni ʼa Sehova ʼe ko te lotu pe ʼaia ʼe tali e te ʼAtua? He koʼe ʼe tou tui papau ki te faʼahi ʼaia? Tou vakaʼi he ʼu fakamoʼoni.
2. Ka tou lau ia 1 Tesalonika 1:5, he koʼe neʼe tui papau ia te apositolo ko Paulo kua ina maʼu te moʼoni?
2 Neʼe tui papau te apositolo ko Paulo kua ina maʼu te moʼoni. (Lau ia 1 Tesalonika 1:5.) Neʼe loloto tana ako te Folafola ʼa te ʼAtua. Neʼe tui papau ʼe “ko meʼa fuli ʼae ʼe tohi ʼi te ʼu Tohi Taputapu ʼe haʼu ia mai te ʼAtua” koia ʼae neʼe fiafia ai ʼi tana maʼu te moʼoni. (2 Tim. 3:16) ʼI tana ako te folafola, neʼe ina maʼu ai te ʼu fakamoʼoni ʼe ko Sesu te Mesia ʼae neʼe fakapapauʼi mai. Neʼe toe mahino foki ki te mole fia tokagaʼi e te ʼu takitaki lotu te ʼu fakamoʼoni ʼaia. Neʼe ko he ʼu takitaki lotu malualoi he neʼe natou ui ʼe natou fakafofoga te ʼAtua, kae ʼe ha ʼi ʼanatou gaue ʼe natou fakafisi ki ai. (Tito 1:16) Kae neʼe mole hage Paulo ko natou. Neʼe tui ki te ʼu meʼa fuli ʼae neʼe palalau ki ai te Folafola ʼa te ʼAtua. Pea neʼe ina fia fakamafola pea mo maʼuliʼi “te finegalo katoa ʼo te ʼAtua.”—Gaue 20:27.
3. Kotea te manatu ʼa ʼihi ki te lotu moʼoni? Kae kotea te manatu ʼa Paulo? (Vakaʼi mo te ʼa takai “ ʼE Lahi Fau Te ʼu Gaue Mo Te ʼu Manatu ʼa Sehova Ke Fakamatala.”)
3 ʼE manatu ʼihi ʼe feala ke tali te lotu moʼoni ki te ʼu fehuʼi fuli ʼae ʼe tou fai, ʼo feia ki te ʼu fehuʼi ʼae ʼe mole maʼu 1 Tes. 5:21) Neʼe ina ui fenei: “ ʼE mole katoa totatou ʼatamai malama” pea “ ʼe nenefu tatatou sio ohage ʼe tou sisio ʼi he sioʼata ukamea.” (1 Ko. 13:9, 12) Neʼe mole mahino Paulo kia meʼa fuli pea ʼe toe feia pe mo tatou. Kae neʼe mahino ki te ʼu moʼoni tafito ʼo ʼuhiga mo Sehova. Neʼe feʼauga pe te ʼu meʼa ʼae neʼe mahino ki ai ke tui papau ai ʼe kua ina maʼu te moʼoni.
ʼona tali ʼi te Tohi-Tapu. ʼE moʼoni koa te manatu ʼaia? Tou vakaʼi te faʼifaʼitaki ʼa Paulo. Neʼe ina fakalotomalohiʼi ʼona tehina mo tuagaʼane ke natou “vakavakaʼi fakalelei ia meʼa fuli.” Kae neʼe ina toe ui foki ʼe lahi te ʼu meʼa ʼe mole mahino ki ai. (4. Kotea ʼe tonu ke tou fai ke tou iloʼi pe kua tou maʼu te moʼoni? ʼE tou iloʼi feafeaʼi te kau Kilisitiano moʼoni?
4 Kapau ʼe tou fia iloʼi lelei pe ʼe kua tou maʼu te moʼoni, ʼe tonu ke tou fakasiosio te faʼahiga tauhi ʼa Sesu pea mo te ʼu meʼa ʼae ʼe fai e te kau Fakamoʼoni ʼa Sehova ia ʼaho nei. ʼE tou vakaʼi anai ʼi te alatike ʼaeni ko te kau Kilisitiano moʼoni (1) neʼe mole atolasio ki te ʼu fakatata, (2) neʼe natou fakaʼapaʼapa ki te huafa ʼo Sehova, (3) neʼe ʼofa ʼi te moʼoni, pea (4) neʼe natou feʼofaʼofani.
ʼE MOLE TOU ATOLASIO KI TE ʼU FAKATATA
5. Neʼe atolasio feafeaʼi ia Sesu ki te ʼAtua? ʼE tou maʼuliʼi feafeaʼi anai ʼana akonaki?
5 Neʼe ʼofa mamahi Sesu ʼi te ʼAtua koia ʼae neʼe atolasio ai kia ia tokotahi ʼi tana ʼi te lagi mo te kele. (Luka 4:8) Neʼe ina toe akoʼi ki ʼana tisipulo ke natou atolasio pe kia Sehova tokotahi. Neʼe mole he temi neʼe fakaʼaogaʼi ai e Sesu he ʼu pāki peʼe fakatata ʼi tana tauhi ʼo toe feia pe ki ʼana tisipulo. Ko te ʼAtua ʼe laumalie, koia ʼae ʼe mole feala anai ki he tahi ke ina fai he pāki ʼo Sehova. (Esa. 46:5) Kae ʼe feala koa ke tou faikole ki te ʼu pāki ʼo te ʼu sagato? Neʼe ui fenei e Sehova ʼi te lua folafola ʼo te ʼu Folafola ʼe Hogofulu: “E mole ke fau anai kia koe he fakatata maka, pee ko he paaki o he mea pe * e ke mau i oluga o te atu lagi, pee ko he mea ae e ke mau i lalo i te kele . . . E mole ke punou anai i mua o te u mea aia.” (Eke. 20:4, 5) ʼE ha lelei ʼi te ʼu palalau ʼaia ko natou ʼae ʼe natou fia fakafiafiaʼi te ʼAtua ʼe mole tonu ke natou atolasio ki te ʼu fakatata.
6. ʼE feafeaʼi te tauhi ʼa te kau Fakamoʼoni ʼa Sehova ia aho nei?
6 ʼE iloʼi e te kau faihisitolia, neʼe atolasio te kau Kilisitiano ʼo te temi ʼo te kau apositolo ki te ʼAtua pe. Ohage la, ʼe ui ʼi te tohi Histoire de lʼÉglise chrétienne, “neʼe fehiʼa mo fakafisi” te kau ʼuluaki Kilisitiano ki te fakaʼaogaʼi ʼo te ʼu pāki peʼe fakatata ʼi tanatou tauhi. Ia ʼaho nei, ʼe faʼifaʼitakiʼi e te kau Fakamoʼoni ʼa Sehova te faʼahiga tauhi ʼaia ʼa te kau ʼuluaki Kilisitiano. ʼE mole tou faikole ki he ʼu pāki ʼo he ʼu “sagato” peʼe ko he ʼu ʼaselo, ʼo toe feia foki kia Sesu. ʼE mole tou atolasio ki he fuka pea ʼe mole tou toe fai he meʼa ʼe ha ai ʼe tou tauhi ki he puleʼaga peʼe ki totatou fenua totonu. Logo ai ʼe natou fakakinauʼi tatou ke tou fai he meʼa, kae ʼe tou fakalogo ki te ʼu palalau ʼaeni ʼa Sesu: “ ʼE tonu ke ke atolasio kia Sehova tou ʼAtua.”—Mat. 4:10.
7. Kotea ʼe ha ai ʼe mole hage te kau Fakamoʼoni ʼa Sehova ko ʼihi lotu?
7 Ia ʼaho nei, ʼe kua fia fagono pe te hahaʼi ki te ʼu patele iloa. Ko te hahai ʼae ʼe natou vikiʼi te ʼu patele ʼaia ʼe hage pe kua natou ʼatua kia natou. ʼE olo te hahaʼi ki ʼonatou ʼekelesia ʼo totogi hanatou ʼu tohi mo foaki falā kia natou peʼe ki te ʼu kautahi ʼae ʼe natou lagolago ki ai. Pea ʼe tui e ʼihi ki te ʼu meʼa fuli ʼae ʼe ui e te kau patele. ʼE hage pe ia kua natou sisio kia Sesu totonu. Kae ʼe mole feia te kau Fakamoʼoni ʼa Sehova. ʼE mole natou muliʼi he tagata. ʼE natou fakaʼapaʼapa ki ʼonatou takitaki kae ʼe natou manatu tahi mo Sesu ʼi tana ui fenei: “ ʼE kotou tau tehina fuli.” (Mat. 23:8-10) Koia, ʼe mole tou atolasio ki te tagata, ohage ko te kau takitaki lotu peʼe ko te kau takitaki politike. Pea ʼe mole tou lagolago ki ʼanatou fakatuʼutuʼu. ʼE mole tou kau ki te malamanei. Koia ʼae ʼe tou kehekehe ai mo te ʼu lotu ʼaia.—Soa. 18:36.
ʼE TOU FAKAʼAPAʼAPA KI TE HUAFA ʼO SEHOVA
ʼE fiafia te kau Kilisitiano mo’oni ʼi te palalau kia Sehova ki ʼihi (Vakaʼi te palakalafe 8-10) *
8. ʼE tou iloʼi feafeaʼi ʼe loto e Sehova ke iloʼi pea mo fakakololiaʼi tona huafa e te hahaʼi fuli?
8 Neʼe faikole fenei Sesu: “Tamai, fakakololiaʼi tou huafa.” Neʼe tali Sehova ki tana faikole ʼaia ʼaki hana palalau mai te lagi. Neʼe ina fakapapau ai ʼe ina fakakololiaʼi anai tona huafa. (Soa. 12:28) Neʼe fakakololiaʼi e Sesu te huafa ʼo tana Tamai ʼi tana minisitelio. (Soa. 17:26) Koia ʼae ʼe mole tou punamaʼuli anai ki te fiameʼameʼa ʼo te kau Kilisitiano moʼoni ʼi tanatou fakaʼaogaʼi te huafa ʼo te ʼAtua pea mo fakaha ki ʼihi.
9. Neʼe fakaʼapaʼapa feafeaʼi te ʼu ʼuluaki Kilisitiano ki te huafa ʼo te ʼAtua?
9 ʼI te ʼosi fakatuʼu pe ʼo te kokelekasio Fakakilisitiano, ‘neʼe tokaga ia Sehova ki te hahaʼi ʼae ʼe mole Sutea, ke ina filifili mai ia natou te hahaʼi ke natou fua tona huafa.ʼ (Gaue 15:14) Neʼe fiameʼameʼa te kau Kilisitiano ʼaia ʼi tanatou fakaʼaogaʼi te huafa ʼo te ʼAtua mo tona fakaha ki te hahaʼi. Neʼe mole natou matataku ʼi te fakaʼaogaʼi te huafa ʼo te ʼAtua ʼi tanatou minisitelio pea mo ʼanatou tohi. * Neʼe natou fakaha lelei ʼe natou fua te huafa ʼo te ʼAtua.—Gaue 2:14, 21.
10. ʼE tou iloʼi feafeaʼi ko te kau Fakamoʼoni ʼa Sehova pe ʼae ʼe natou fakaʼaogaʼi te huafa ʼo Sehova?
10 ʼE fakakololiaʼi e te kau Fakamoʼoni ʼa Sehova te huafa ʼo Sehova. Ia ʼaho nei, neʼe faigaʼi e te kau takitaki lotu ke natou fufu te huafa ʼo te ʼAtua. Neʼe natou molehi ʼi ʼanatou Tohi-Tapu ʼae neʼe natou fakaliliu pea neʼe natou tapuʼi te fakaʼaogaʼi ʼo tona huafa ʼi ʼanatou toʼotoʼoga fakalotu. * ʼE gata pe ki te kau Fakamoʼoni ʼa Sehova ʼe natou fakaʼapaʼapa pea mo fakamaʼuhigaʼi te huafa ʼo Sehova. ʼE mole he tahi age ʼu lotu ohage ko te kau Fakamoʼoni ʼa Sehova ʼe natou fakaha tona huafa. ʼE tou fai ia meʼa fuli ke tou tuha mo totatou higoa, ʼae ko te Kau Fakamoʼoni ʼa Sehova. (Esa. 43:10-12) Neʼe tou ta te ʼu Tohi-Tapu ʼe 240 miliona tupu, ʼo toe fakatuʼu ai te huafa ʼo Sehova ʼi te ʼu vaega ʼae neʼe molehi ai e ʼihi kau faifakaliliu Tohi-Tapu. Pea ʼe tou toe ta mo te ʼu tohi ʼe fakatafito ki te Tohi-Tapu pea ʼe fakaʼaogaʼi ai te huafa ʼo Sehova. Ko te ʼu tohi ʼaia kua fakaliliu ia lea ʼe 1 000 tupu.
ʼE TOU ʼOFA ʼI TE MOʼONI
11. Neʼe fakaha feafeaʼi te kau ʼuluaki Kilisitiano tonatou ʼofa ʼi te moʼoni?
11 Neʼe ʼofa Sesu ki te moʼoni, ia te moʼoni ʼo ʼuhiga mo te ʼAtua pea mo ʼana fakatuʼutuʼu. Neʼe maʼuliʼi e Sesu te moʼoni, pea neʼe ina fakaha te moʼoni ʼaia ki ʼihi atu. (Soa. 18:37) ʼE toe ʼofa mo te ʼu tisipulo moʼoni ʼa Sesu ʼi te moʼoni. (Soa. 4:23, 24) Neʼe ui e te apositolo ko Petelo ko te lotu Fakakilisitiano moʼoni ʼe ko te “ala ʼo te moʼoni.” (2 Pet. 2:2) Neʼe ʼofa mamahi te kau ʼululaki Kilisitiano ʼi te moʼoni, koia neʼe maliu ai mai te ʼu meʼa fuli ʼe mole alu tahi mo te moʼoni. Ohage la, ko te ʼu akonaki fakalotu, mo te ʼu talatisio pea mo te ʼu manatu fakatagata. (Kol. 2:8) ʼE toe feia pe mo te temi nei, ʼe faiga te kau Kilisitiano moʼoni ke natou ‘mulimuli ʼi te ala ʼo te moʼoni.ʼ ʼE natou tui kia meʼa fuli ʼe ui ʼi te Tohi-Tapu pea mo maʼuliʼi.—3 Soa. 3, 4.
12. Ka tokagaʼi e ʼotatou takitaki neʼe tou mahino hala ki he akonaki Fakatohi-tapu, kotea ʼae ʼe natou fai?
12 ʼE mole ui e te kau Fakamoʼoni ʼa Sehova ʼe natou mahino katoa ki te moʼoni. Neʼe feala ʼihi temi ke natou mahino hala ki he akonaki, peʼe ki te faʼahiga fakatuʼutuʼu ʼo te hahaʼi ʼa te ʼAtua. ʼE mole tonu ke tou punamaʼuli ki te faʼahi ʼaia. Neʼe tala ʼi te Tohi Tapu ʼe ha mamalie anai te ʼatamai malama totonu ʼaki te temi. (Kol. 1:9, 10) ʼE fakaha mamalie e Sehova te moʼoni, pea ʼe tonu ke tou faʼa kataki ʼo talitali ʼo kaku ki tatatou mahino lelei ki te moʼoni. (Taag. 4:18) Ka tokagaʼi e ʼotatou takitaki neʼe tou mahino hala ki he manatu Fakatohi-tapu, ʼe natou fai fakavilivili he ʼu fetogi. ʼE lahi te ʼu lotu ʼe natou ui ʼe natou muliʼi ia Kilisito, ʼe natou fai he ʼu fetogi ke fiafia tanatou hahaʼi peʼe ke natou hage ko te malama. Kae ʼe fai e te hahaʼi ʼa Sehova he ʼu fetogi ke fiafia te ʼAtua pea mo muliʼi te tauhi ʼae neʼe fakaha mai e Sesu. ʼE mole tou fai he ʼu fetogi ke tou hage ko te hahaʼi fuli, peʼe ke tou fakafiafiaʼi te hahaʼi, kae ʼuhi kua tou mahino lelei age ki te Tohi-Tapu. (Sakp. 4:4) ʼEi, ʼe tou ʼofa ʼi te moʼoni.—1 Tes. 2:3, 4.
ʼE TOU FEʼOFAʼOFANI
13. Kotea te kalitate ʼae maʼuhiga age ki te kau Kilisitiano moʼoni?
13 Ko te kalitate ʼae neʼe maʼuhiga age ʼi te kokelekasio ʼo te ʼuluaki sekulo, ʼe ko te ʼofa. Neʼe ui fenei e Sesu: “ ʼAki te faʼahi ʼaia, ʼe iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.” (Soa. 13:34, 35) Ia ʼaho nei, ʼe logo tahi te kau Fakamoʼoni ʼa Sehova ʼi te malamanei katoa. Tatau aipe pe ʼe natou ʼomai mai te ʼu fenua kehekehe pea ʼe mole natou lanu tahi kae ʼe natou logo tahi ia ʼaho nei. ʼE iloga lelei te ʼofa moʼoni ʼaia ʼi ʼatatou fono mo ʼatatou fakatahi lalahi. Ko te ʼu faʼahi ʼaia ʼe fakamoʼoni ai ʼe tou nofo ʼi te lotu ʼae ʼe tali e Sehova.
14. Ka tou lau ia Kolose 3:12-14, ʼe tou fakaha feafeaʼi ʼe tou feʼofeʼofani?
14 ʼE fakalotomalohiʼi tatou ʼi te Tohi Tapu ke tou “feʼofamamahiʼaki.” (1 Pet. 4:8) ʼE tou fakaha ʼe tou feʼofaʼofani moka ʼe tou fefakamolemoleʼaki ʼatatou hala. ʼE tou toe fia lotofoaki pea mo tali kaiga ki ʼotatou tehina mo tuʼagaʼane, ʼo toe feia pe kia natou ʼae ʼe natou gaohi koviʼi tatou. (Lau ia Kolose 3:12-14.) ʼE ko te taʼi ʼofa ʼaia ʼe feala ke tou iloʼi ai te kau Kilisitiano moʼoni.
“TE TUI ʼE TAHI”
15. Kotea te tahi ʼu aluʼaga ʼe tou toe fai?
15 ʼE ʼi ai te tahi ʼu aluʼaga ʼe tou toe fai ke tou muliʼi ai te tauhi ʼae neʼe fakahoko e te kau Kilisitiano ʼo te temi muʼa. Ohage la, ʼi tatatou kautahi ʼe ʼi ai te ʼu taupau feoloʼaki, mo te ʼu tagata ʼafeā, pea mo te ʼu tagata faifekau fakaminisitelio. Pea ʼe tou toe mulimuli ki te faʼahiga fai ʼaia ʼa te kau apositolo ʼo te ʼuluaki sekulo. (Flp. 1:1; Tito 1:5) ʼE tou hage ko natou, ʼe tou fakaʼapaʼapa ki te ʼu lao ʼa Sehova ʼo ʼuhiga mo te ʼu felaveʼi fakasino, mo te nofo ʼohoana, pea mo te toto. ʼE tou toe puipui te kokelekasio mai ia natou ʼae ʼe mole natou fia fakalogo ki te ʼu lao ʼa te ʼAtua.—Gaue 15:28, 29; 1 Ko. 5:11-13; 6:9, 10; Hep. 13:4.
16. Kotea ʼae ʼe tou mahino ki ai ʼi te vaega ʼo Efeso 4:4-6?
16 Neʼe ui e Sesu tokolahi ʼe natou ui anai ko natou ko ʼana tisipulo, kae ko te loi. (Mat. 7:21-23) Neʼe toe fakaha fakatomuʼa ʼi te Tohi Tapu, ʼi te ʼu ʼaho fakamuli, tokolahi ʼe natou ‘fia fakaha anai ʼe natou pipiki ki te ʼAtua.ʼ (2 Tim. 3:1, 5) Kae ʼe ui fakalelei mai ʼi te Tohi-Tapu ʼe mole feala ke tali tuʼa tahi natou e te ʼAtua.—Lau ia Efeso 4:4-6.
17. Ko ai ia ʼaho nei ʼe natou muliʼi ia Sesu pea mo maʼuliʼi te tui moʼoni pe ʼe tahi?
17 Ko ai ia ʼaho nei ʼe natou mauliʼi te tui moʼoni pe ʼe tahi? Neʼe kua tou vakaʼi te ʼu fakamoʼoni. Neʼe tou sivisivi te faʼahiga tauhi ʼae neʼe akoʼi e Sesu pea neʼe fai e te kau ʼuluaki Kilisitiano. Pea ʼe tou tokagaʼi ʼe ko te kau Fakamoʼoni pe ʼa Sehova ʼe natou mulimuli ki ai. ʼE tou fiafia ʼi te kau ki te kau Fakamoʼoni ʼa Sehova pea mo te iloʼi te moʼoni ʼo ʼuhiga mo Sehova mo ʼana fakatuʼutuʼu. Koia, ke tou tui papau ʼe tou nofo ʼi te moʼoni.
KATIKO 3 Ko Toku Malohiʼaga, Taku ʼAmanakiʼaga, Toku Falanakiʼaga
^ pal. 5 ʼI te alatike ʼaeni, ʼe tou vakaʼi anai ia te tauhi moʼoni ʼae neʼe fakatuʼu e Sesu pea neʼe muliʼi feafeaʼi e ʼana ʼuluaki tisipulo ʼi te temi muʼa. ʼE tou toe vakaʼi anai he ʼu fakamoʼoni ʼe fai e te kau Fakamoʼoni ʼa Sehova te tauhi ʼaia ia ʼaho nei.
^ pal. 5 Ko matou ʼae neʼe matou fakailoga kehe.
^ pal. 9 Vakaʼi te ʼa takai “Neʼe Fakaʼaogaʼi Koa e Te ʼu ʼUluaki Kilisitiano Ia Te Huafa ʼo Te ʼAtua?” ʼi Te Tule Leʼo ʼaho 1 ʼo ʼAukusito 2010 p. 6.
^ pal. 10 Ohage la, ʼi te taʼu 2008, neʼe fakatotonu e te Tuʼi Tapu ko Benoît XVI “ke mole toe fakaʼaogaʼi pea mo puʼaki” te huafa ʼo te ʼAtua ʼi te ʼu toʼotoʼoga fakalotu, mo hiva pea mo te ʼu faikole Katolika.
^ pal. 64 FAKAMATALA ʼO TE ʼU PĀKI: Neʼe ta e te kautahi ʼa Sehova te ʼu Tohi-Tapu Fakaliliu ʼo Te Malama Foʼou ia lea ʼe 200 tupu ke maʼu e te hahaʼi he Tohi-Tapu ʼi tanatou lea pea ʼe tuʼu ai te huafa ʼo te ʼAtua.