Toe Fakamalohiʼi ʼAu Felogoi Mo Sehova
ʼI TE taʼu fuli, tokolahi te ʼu ovi ʼa Sehova ʼe toe fakahu mai ki te kokelekasio. Fakakaukauʼi age te toe ‘fiafia lahi ʼi selo’ moka toe liliu mai he tahi kia Sehova. (Luka 15:7, 10) Kapau neʼe heʼeki faʼa fualoa hou toe fakahu mai, ʼe tonu ke mahino kia koe, ʼe fiafia ʼaupito ia Sesu, mo te kau ʼaselo pea mo Sehova totonu ʼi tau toe kau ki te kokelekasio. Kae ʼi tau toe fakamalohiʼi ʼau felogoi mo Sehova, ʼe feala ke ke tau mo ni fakahala. Kotea ʼihi ʼo te ʼu fakahala ʼaia? Pea kotea ʼae ka tokoni atu ke ke tauʼi te ʼu fakahala ʼaia?
TE ʼU FAKAHALA
Tatau aipe pe kua toe fakahu mai natou, kae tokolahi te ʼu tehina mo tuagaʼane ʼe hoko atu tanatou lotovaivai. ʼE lagi ke mahino ki te meʼa ʼae neʼe logoʼi e te Hau ko Tavite, tatau aipe pe neʼe kua fakamolemole ki ai ia Sehova. Neʼe ina ui fenei: “ ʼE fakamamahiʼi au e ʼaku agahala.” (Pes. 40:13; 65:3, NWT) ʼE feala ki he tahi ʼe toe liliu mai kia Sehova ke ina logoʼi te ufiufi peʼe tautea tona loto lolotoga he ʼu taʼu. Neʼe ui fenei e Isabelle, * ʼae neʼe fakamavae lolotoga taʼu ʼe 20: “Neʼe faigataʼa ʼosi kia au taku tali kua fakamolemole mai ia Sehova.” Kapau ʼe ke lotovaivai, ʼe feala pe ke ke toe vaivai ʼi te faʼahi fakalaumalie. (Taag. 24:10) Koia, faiga malohi ke ʼaua naʼa toe hoko ia te faʼahi ʼaia.
Ko ʼihi tehina mo tuagaʼane ʼe natou lotovaivai moka natou tokagaʼi te ʼu faiga ʼe tonu ke natou fakahoko ke natou toe maʼu he ʼu felogoi lelei mo Sehova. ʼE fakamahino fenei mai e Antoine pe kotea ʼae neʼe ina logoʼi ʼi te hili ʼo tona kua fakahu mai: “Neʼe hage kia au kua au galoʼi ia meʼa fuli ʼo toku maʼuli Fakakilisitiano ki muʼa atu.” ʼE feala ki te faʼahiga manatu ʼaia ke ina taʼofi he tahi ʼi tana faʼafai ʼi te ʼu gaue fakalaumalie.
Fakakaukauʼi age: Ko he fale neʼe maumauʼi e he afā. ʼE feala ke ke lotovaivai moka ke tokagaʼi te temi pea mo te ʼu faiga ʼae ʼe tonu ke ke fai moʼona toe laga. ʼO toe feia pe ki tou fale fakalaumalie,
ʼae ko ʼau felogoi mo Sehova. Neʼe maumauʼi e he ʼu agahala mamafa, pea ʼe lagi ke manatu ʼe ʼaoga he ʼu faiga malohi ke ke toe maʼu ʼau felogoi ʼaia. Kae ʼaua naʼa ke lotovaivai he ʼe mole ke tokotahi ki te fakahoko ʼo te faʼahi ʼaia.ʼE ui fenei mai e Sehova kia tatou fuli: “Kotou ʼomai pea ke tou fakatokatoka.” (Esa. 1:18, NWT) Neʼe ke fakahoko he ʼu faiga malohi ke ke fakatokatoka mo ia. Pea ʼe ʼofa ia Sehova ia koe ʼi te ʼu faiga fuli ʼae neʼe ke fakahoko. ʼE tonu ke ke manatuʼi te koga ʼaeni, ʼe ke foaki kia Sehova ia te fealagia ʼae ke tali ki te ʼu tukugakovi ʼa Satana.—Taag. 27:11.
ʼI tau toe liliu mai kia Sehova, neʼe ke fakaovi kia te ia pea ʼe ina fakapapauʼi mai ʼe toe fakaovi atu anai. (Sakp. 4:8) Koia, ʼe toe fakaʼuhiga koe e ʼihi ko he tahi ʼo te kokelekasio pea ʼe ko he meʼa ʼe lelei. Kae ʼe mole gata ai. ʼE tonu ke ke haga fakamalohiʼi tou ʼofa ki tau Tamai pea mo Kaumeʼa mo Sehova. ʼO feafeaʼi?
FAI HAU ʼU FAKATUʼUTUʼU FAKAPOTOPOTO
Faiga ke ke fai hau ʼu fakatuʼutuʼu fakapotopoto. ʼE lagi kei malohi te ʼu fakatafito ʼo tou fale fakalaumalie, ia tau mahino kia Sehova pea mo ʼana fakapapau. Kae ʼe feafeaʼi ki te ʼu koga tafito ʼo tou fale fakalaumalie? ʼE lagi tonu anai ke ke toe fakamalohiʼi. Koia, ʼe tonu anai ke ke toe toʼo ʼau agamahani lelei fakalaumalie. ʼE tonu anai ke ke faifakamafola tuʼumaʼu pea mo ke fakatahi mo ʼou tehina mo tuagaʼane. Tou vakaʼi ʼihi atu fakatuʼutuʼu ʼe feala ke ke fai.
Palalau tuʼumaʼu kia Sehova. ʼUhi ko te tautea ʼo tou loto, ʼe lotomahino tau Tamai mo kapau ʼe faigataʼa tau faikole age. (Loma 8:26) Kae logo meʼa fuli, ke ke “kataki ʼi te faikole” pea mo ke fakaha kia Sehova ʼe ke loto ke ke liliu ko hona kaumeʼa. (Loma 12:12) ʼE manatuʼi e Andrej: “Neʼe au ufiufi ʼosi pea neʼe tautea toku loto. Kae ka au faikole, ʼe malulu mai te ʼu koga ʼaia. ʼE fimalie ai toku loto.” Kapau ʼe mole ke iloʼi he palalau ke ke fai kia Sehova, ʼe feala ke ke metitasio ki te ʼu Pesalemo 51 pea mo 65, ʼe tuʼu ai te ʼu faikole neʼe fai e te Hau ko Tavite ʼi tana ʼosi fakahemala.
Akoʼi tuʼumaʼu te Tohi-Tapu. ʼE tokoni atu anai ke malohi tau tui pea ʼe ʼaʼasili ai tou ʼofa kia Sehova. (Pes. 19:8-12) Neʼe fakatokagaʼi fenei e Felipe: “ ʼUhi ʼae neʼe mole haku ʼu agamahani fakalaumalie lelei, neʼe au vaivai ai ʼi te faʼahi fakalaumalie pea neʼe au lituʼa ai kia Sehova. ʼE mole au loto ke toe hoko te faʼahi ʼaia. Neʼe au fakatuʼutuʼu ai ke au puipui toku maʼuli fakalaumalie ʼaki haku fai he polokalama ako lelei.” He koʼe ʼe mole ke fai hau fakatuʼutuʼu feia? Kapau ʼe ʼaoga atu he tokoni ke ke iloʼi pe ʼe ko te kupu tafito fea ʼae ka ke akoʼi, ʼe feala ke ke kole tokoni ki hou kaumeʼa kua fotufotuʼa.
Toe fakamalohiʼi ʼau felogoi mo ʼou tehina mo tuagaʼane. ʼE tuʼania ʼihi neʼe toe fakahu mai naʼa maʼu e te kokelekasio he manatu ʼe mole lelei ʼo ʼuhiga mo natou. ʼE fakamoʼoni ki ai ia Larissa: “Neʼe au ufiufi. Neʼe hage pe neʼe au kakaʼi te ʼu tehina mo tuagaʼane. Pea neʼe ʼaoga mai he temi loaloaga ke au pulihi te faʼahiga manatu ʼaia.” Ke mahino kia koe ʼe loto e te kau tagata ʼafeā pea mo te ʼu tehina mo tuagaʼane fotufotuʼa ke natou tokoni atu ke ke toe kaumeʼa mo Sehova. (Vakaʼi te ʼa takai “ Te Meʼa ʼe Feala Ke Fai e Te Kau Tagata ʼAfeā.”) ʼE natou fiafia ʼi tau toe liliu mai kia Sehova pea ʼe natou fakaʼamu ke fua lelei kia koe.—Taag. 17:17.
Kotea ʼae ʼe feala ke ke fai ke ke fakaovi ai kia natou ʼo te kokelekasio? Kau tuʼumaʼu ki te ʼu fono pea mo ke faifakamafola tuʼumaʼu mo natou. Kotea anai te ʼu fua lelei ka ke maʼu mai ai? Neʼe tali fenei ki ai ia Felix: “Neʼe fakaʼamu lahi te ʼu tehina mo tuagaʼane ʼo taku kokelekasio ke au toe liliu mai kia Sehova. Koia, neʼe natou fiafia ʼi taku toe liliu mai. Neʼe natou fakaha mai tonatou fiafia ʼi taku toe liliu ko he tahi ʼo te kokelekasio pea neʼe fakamolemole mai ia Sehova. Neʼe natou tokoni mai ke hoko atu taku tuputupu.”—Vakaʼi te ʼa takai “ Te Meʼa ʼe Feala Ke Ke Fai.”
HOKO ATU ʼAU FAIGA
ʼE hoko atu pe anai te fakato e Satana he ʼu “afā” ʼi tou ala moʼou fakalotovaivaiʼi pea mo taʼofi koe ke ʼaua naʼa ke fakamalohiʼi ʼau felogoi mo Sehova. (Luka 4:13) ʼE ke tokalelei ke ke tauʼi mo kapau ʼe ke toe laga mo fakamalohiʼi tou fale fakalaumalie ʼi te temi nei.
Neʼe fai e Sehova ia te fakapapau ʼaeni: “E au kumi anai te ovi ae nee puli noa, pea e au aumai anai ae nee hehe, pea e au hai anai te lavea o ia ae nee lavea, pea e au fakamalohii anai ae nee mahaki.” (Esk. 34:16) Neʼe kua tokoni ia Sehova ki te tokolahi ʼo ʼana ovi kua hehe ke natou toe liliu mai kia te ia. Koia ke mahino kia koe, ʼe fia tokoni atu ke ke fakamalohiʼi ʼau felogoi mo ia.
^ pal. 4 Neʼe fetogi ʼihi higoa ʼi te alatike ʼaeni.